காலீஸ்தான் ஆதரவாளர்களால் கலவர பூமி ஆகிறதா பஞ்சாப்?

காலிஸ்தான் பிரிவினைவாதியான அம்ரித்பால் சிங்கையும், அவருடைய ஆதரவாளர்களையும் கைதுசெய்ய போலீஸார் நடத்திவரும் தேடுதல் வேட்டையால் ஒட்டுமொத்த பஞ்சாப் மாநிலமும் பதற்றத்தில் இருக்கிறது.

யார் இந்த அம்ரித்பால்?

பஞ்சாப் காவல்துறைக்கு சிம்ம சொப்பனமாகத் திகழ்பவர் அம்ரித்பால் சிங். கடந்த பிப்ரவரி 23-ம் தேதி இவர் தலைமையில் பெருங்கூட்டம் ஒன்று அமிர்தசரஸ் அருகேயுள்ள அஜ்னாலா நகர் காவல் நிலையத்தைத் தாக்கியது. காரணம், சிறையிலிருந்த அம்ரித்பால் சிங்கின் நண்பர் லவ்ப்ரீத் சிங்கை மீட்பதற்காக, அந்தக் கும்பல் துப்பாக்கிகளையும் வாள்களையும் ஏந்தியபடி காவல் நிலையத்தில் போலீஸாருடன் மோதலில் ஈடுபட்டது. இந்தக் களேபரத்தின் காரணமாக, லவ்ப்ரீத் சிங் சிறையிலிருந்து விடுதலைசெய்யப்பட்டார். மேலும், அவர்மீது போடப்பட்டிருந்த கடத்தல், திருட்டு வழக்குகளும் திரும்பப்பெறப்பட்டன.

இத்தனை களேபரங்களுக்கும் காரணமான, அம்ரித்பால் சிங் ப்ளஸ் டூ வரை மட்டுமே படித்தவர். அமிர்தசரஸ் அருகேயுள்ள ஜல்லுபூர் என்ற கிராமத்தைச் சேர்ந்தவர். பள்ளிப் படிப்பை முடித்தவுடன் பிழைப்புக்காக துபாய்க்குச் சென்ற இவர், 12 ஆண்டுகள் அங்கு ஒரு டிரான்ஸ்போர்ட் நிறுவனத்தில் பணியாற்றினார். 2022-ம் ஆண்டு, பிப்ரவரி மாதம் இந்தியாவுக்குத் திரும்பியபோது, ‘காலிஸ்தான்’ தீவிரவாதியாகவே அவர் மாறியிருந்தார். ‘வாரிஸ் பஞ்சாப் தே’ என்ற இயக்கத்தின் தலைவராக தன்னைத் தானே அறிவித்துக்கொண்டதோடு, சீக்கியர்களுக்குத் தனி நாடு வேண்டும் என்ற கோரிக்கையைத் தீவிரமாக எழுப்ப ஆரம்பித்தார். இவரின் கவர்ச்சியான பேச்சு, மூளைச்சலவையால் ஏராளமான இளைஞர்கள் அவருக்குப் பின்னால் திரண்டார்கள். இதனால் அவரை, ‘பிந்த்ரன்வாலே 2.0’ என்று அம்ரித்பால் சிங்கின் ஆதரவாளர்கள் அழைக்கிறார்கள்.

பிந்த்ரன்வாலே யாரென்று தெரிந்துகொள்ள வேண்டுமென்றால், 38 ஆண்டுகளுக்குப் பின்னோக்கிப் போக வேண்டும். பஞ்சாப்பைப் பிரித்து ‘காலிஸ்தான்’ என்ற பெயரில் சீக்கியர்களுக்கென தனிநாடு உருவாக்க வேண்டும் என்று இளைஞர்களைத் திரட்டி ஆயுதமேந்தி வன்முறையில் ஈடுபட்டவர் ஜர்னைல் சிங் பிந்த்ரன்வாலே. காலிஸ்தான் ஆதரவாளர்களால் கலவர பூமியானது பஞ்சாப்.

சீக்கியர்களின் புனிதத்தலமான பொற்கோயிலுக்குள் ஆயுதங்களுடன் சென்று, அதைத் தங்களின் தலைமையிடம்போல மாற்றவும் செய்தார் பிந்த்ரன்வாலே. அவரது கொட்டத்தை அடக்க நினைத்த அன்றைய பிரதமர் இந்திரா காந்தி, ராணுவத்தை அனுப்பினார். பொற்கோயிலுக்குள் புகுந்து ராணுவம் நடத்திய வேட்டையில் பிந்த்ரன்வாலே உட்பட 1,500-க்கும் மேற்பட்டோர் கொல்லப்பட்டனர்.

பொற்கோயிலின் புனிதத்தை இந்திரா காந்தி களங்கப்படுத்திவிட்டார் என்று சீக்கியர்களில் ஒரு பகுதியினர் இந்திரா காந்தி மீது கோபடைந்தனர். அதன் விளைவாக, 1984-ம் ஆண்டு, தனக்கு மெய்க்காப்பாளர்களாக இருந்த சீக்கியர்களாலேயே இந்திரா காந்தி படுகொலை செய்யப்பட்டார்.