செல்லப்பிராணிகளை வளர்ப்பது என்பது பலருக்கும் பிடித்தமான விஷயம். அதிலும் குறிப்பாக நாய் வளர்ப்பது வீட்டின் பாதுகாப்புக்கும் உதவும் என்பதால் பலரின் வீட்டு ரேஷன் அட்டையில் சேர்க்கப்படாத ஓர் உறுப்பினராக அது உள்ளது. நாய் வளர்ப்பவர்கள் பின்பற்ற வேண்டிய தடுப்பூசி அட்டவணை பற்றிச் சொல்கிறார், திருச்சியைச் சேர்ந்த செல்லப்பிராணி பயிற்றுநர் சிவக்குமார்.

``எந்த வகையான நாய்க்குட்டியாக இருந்தாலும் பிறந்து நான்கு வாரத்தில் முதல் தவணை தடுப்பூசி போட்டுவிட வேண்டும். அதற்கு, குட்டிகளை அருகில் உள்ள கால்நடை மருத்துவமனைக்கு அழைத்துச் சென்றாலே போதுமானது.

அங்கு கால்நடை மருத்துவர் Distemper மற்றும் மிக முக்கியமாக பார்வோ வைரஸ் நோய்க்கு எதிரான எதிர்ப்பு சக்தியை உருவாக்கும் தடுப்பூசியை (Nobivac puppy DP) செலுத்துவார்.

* தொடர்ந்து அடுத்தடுத்து எந்த மாதங்களில் தடுப்பூசி செலுத்த வேண்டும் என்று, மருத்துவர் தெளிவாகக் குறிப்பிட்டு கூறுவார்.

பெரும்பாலும் அடுத்த 30 நாள்களுக்குள்ளாக அடுத்த தடுப்பூசியான Nobivac DHPPi செலுத்த வேண்டும். விருப்பத்தின்பேரில், நாயின் உடற்கூறுக்கு ஏற்ப எலிக்காய்ச்சலுக்கான தடுப்பூசியையும் (Nobivac Lepto) அப்போது செலுத்தலாம்.