இதேமாதிரி, வாசகர்கள் கேட்ட கேள்விகளின் அடிப்படையில் எழுதப்பட்ட சிறப்புக் கட்டுரைகளை வாசிக்க... இங்கே க்ளிக் செய்யவும்.

அரசு பல்வேறு திட்டங்களைச் செயல்படுத்தி வருகிறது. அரசின் திட்டங்களுக்குப் பொது மக்கள் மத்தியில் எதிர்ப்புகளும் ஆதரவுகளும் இருந்து கொண்டேதான் உள்ளன. அப்படி தேனி சுற்றுவட்டாரப் பகுதி மக்களின் மனதில் அச்சத்தையும் எதிர்ப்பையும் ஏற்படுத்திய திட்டம் தேனி மாவட்டத்தில் தொடங்கவிருக்கும் நியூட்ரினோ ஆய்வுத் திட்டம். நியூட்ரினோ ஆய்வை எங்கு தொடங்கலாம் என இமயம் முதல் குமரிவரை ஆராய்ச்சி செய்து தேனி மாவட்டத்திலுள்ள பொட்டிபுரத்தை ஐ.என்.ஓ (India-based Neutrino Observatory) தேர்வு செய்தது. இந்த அமைப்புதான் இந்தியா முழுவதும் நியூட்ரினோ ஆய்வை முன்னெடுக்கிறது.

வேதியியல் ஆராய்ச்சியில் கண்டறியப்பட்டதுதான் அணு. அணுவில் நியூட்ரான், எலெக்ட்ரான், புரோட்டான் என்ற துகள்களைக் கண்டறிந்தனர். அதன்பின் அணுவை விடச் சிறிய துகள் உள்ளது எனக் கண்டறியப்பட்டது. அதன் பெயரே நியூட்ரினோ. சிறிய துகள்களாக உள்ள இந்த நியூட்ரினோவின் நிறை மிகவும் குறைவு. விஞ்ஞானிகளின் கவனத்தை இது ஈர்த்ததற்கான காரணம், நியூட்ரினோ மற்ற துகள்களுடன் இணைவதில்லை. `நியூட்ரினோ மற்ற துகள்களுடன் இணைந்து செயல்பட்டால் எவ்விதமான வேதியியல் மாற்றத்தைத் தரும் மற்றும் நியூட்ரினோ தனித்து இயங்கும் போது அதனால் என்னென்ன பயன்களைப் பெறலாம் என்ற நோக்கில் இந்த ஆய்வுக் கூடத்தைத் தொடங்க இருக்கிறோம்' என்று ஐ.என்.ஓ அறிக்கை வெளியிட்டது.

பல்வேறு தரப்பினர் எதிர்ப்பு தெரிவித்து வந்தாலும் ``வளர்ந்த நாடுகள் இந்த ஆய்வைத் தொடர்ந்துவரும் நிலையில் இந்தியாவும் இதைக் கையாள முடிவு செய்துள்ளது. இதனால் பொதுமக்களுக்குப் பயன் கிடைக்கும்" என்கிறது ஐ.என்.ஓ.

அமெரிக்கா, ரஷ்யா போன்ற வளர்ந்த நாடுகளில் இந்த ஆய்வை நடத்தினாலும், அந்நாடுகள் ஆய்வுக்கூடங்களை மக்கள் வசிக்கும் பகுதிகளுக்கு வெளியேதான் நடத்துகின்றன. ஆனால், நம் நாட்டிலோ பசுமை கொஞ்சும் தேனியில் திட்டத்தை அமல்படுத்த முடிவு செய்துள்ளனர். மலையைக் குடைந்து குகை அமைத்து ஆராய்ச்சி செய்ய உள்ளதாக ஐ.என்.ஓ அறிக்கையில் குறிப்பிட்டுள்ளனர். குகையில் நியூட்ரினோ உணர் கருவியைப் பொருத்தி இயற்கை முறையில் நியூட்ரினோவை ஆராய்ச்சி செய்து பின்பு கருவிகளின் உதவியோடு செயற்கை முறையிலும் நியூட்ரினோவை ஆராய்ச்சி செய்ய உள்ளதாக தெரிவித்திருந்த நிலையில், இந்தத் திட்டத்திற்குப் பல்வேறு எதிர்ப்புகள் கிளம்பின.

செயற்கை முறையில் கருவிகளைக்கொண்டு நியூட்ரினோக்களை ஆராய்ச்சி செய்ய உள்ளதால் பொதுமக்களும் சமூக ஆர்வலர்களும் எதிர்ப்பு தெரிவித்து வருகின்றனர். செயற்கை முறையில் ஆராய்ச்சி செய்தால் நியூட்ரினோவில் உள்ள கதிரியக்கத் தன்மை ஆராய்ச்சியின் மூலம் பாதிப்பை ஏற்படுத்தும் என மக்கள் அஞ்சுகின்றனர்.

இதேமாதிரி உங்களுக்குத் தோணும் கேள்விகள், சந்தேகங்களைக் கீழே பதிவு செய்யுங்க!