Published:Updated:

மோடி செய்யக்கூடாத வரலாற்றுத் தவறு!

மோடி செய்யக்கூடாத வரலாற்றுத் தவறு!

பிரீமியம் ஸ்டோரி
மோடி செய்யக்கூடாத வரலாற்றுத் தவறு!

மீண்டுமொருமுறை ரிசர்வ் வங்கியுடன் மோதப் பார்க்கிறது மத்திய அரசாங்கம். முக்கிய நிதிக் கொள்கைகளை உருவாக்கும் குழுவில் ரிசர்வ் வங்கியின் சார்பில் இடம்பெறும் உறுப்பினர்களின் எண்ணிக்கையைக் கணிசமாகக் குறைப்பதன் மூலம் அதன் அதிகாரத்தைப் பறித்து, தான் ஊதும் மகுடிக்கேற்ப ஆடும் பாம்பாக மாற்ற முயற்சித்திருக்கிறது.

நிதிக் கொள்கைகளை உருவாக்கும் குழு பற்றி உர்ஜித் கமிட்டி செய்த பரிந்துரைக்குப் பதிலாக வேறொரு திட்டத்தை முன்வைத்திருக்கிறது மத்திய அரசாங்கம். அதன்படி, இந்தக் குழுவில் இருவர் ஆர்பிஐ சார்பிலும் (ஆர்பிஐ கவர்னர் அதில் ஒருவர்), ஒருவர் ஆர்பிஐயினாலும் நியமிக்கப்படுவார். மீதமுள்ள நான்குபேர் மத்திய அரசினால் நியமிக்கப்படுவார்கள். இதன்மூலம் நிதிக் கொள்கைகள் தொடர்பான முக்கிய முடிவுகளை எடுப்பதில் ஆர்பிஐ-க்கு இருக்கும் அதிகாரத்தைப் பிடுங்க நினைத்திருக்கிறது மத்திய அரசாங்கம்.

இந்திய அரசியல் அமைப்பில் சிற்சில முக்கிய அமைப்புகள் தன்னிச்சை யாகச் செயல்பட அனுமதிக்கப்பட்டு இருப்பதனால்தான், இங்கு ஜனநாயகம் தழைத்தோங்குகிறது. உதாரணமாக, நீதிமன்றத்தின் அதிகாரத்தில் அரசாங்கம் தலையீடு செய்ய முடியாது. தேர்தல் கமிஷனுக்கு உத்தரவுகளை இட முடியாது. கணக்குகளைத் தணிக்கை செய்யும் ஆடிட்டர் ஜெனரல் அரசு விருப்பத்துக்கேற்ப நடக்க வேண்டும் என்று நினைக்க முடியாது. அப்படி இருக்க, ரிசர்வ் வங்கி மட்டும் தனக்குக் கட்டுப்பட்டு நடக்க  வேண்டும் என்று மத்திய அரசு எப்படி எதிர்பார்க்கிறது?

மோடி செய்யக்கூடாத வரலாற்றுத் தவறு!

கடன்களுக்கான வட்டியை ரிசர்வ் வங்கி குறைக்க மறுக்கிறதே என்கிற கோபம், மத்திய அரசுக்கு இருக்கலாம். வங்கிகள் அளிக்கும் தொழில் கடன் கடந்த இருபது ஆண்டுகளில் இல்லாத அளவுக்குக் குறைந்திருப்பதைக் கண்டு மனம் குமுறலாம். இதற்கு ஆர்பிஐதான்  காரணம் என்று சொல்ல முடியுமா? தொழில் சூழல் உயர இந்த அரசாங்கம்  என்ன நடவடிக்கை எடுத்தது? ‘மேக் இன் இந்தியா’ என்று அறிவித்தபின்னும் இன்றைக்கு 5 லட்சம் சிறுதொழில் நிறுவனங்கள் நலிந்து கிடக்க யார் காரணம்?

ஆக, பொருளாதார முன்னேற்றத்துக்கும் தொழில் வளர்ச்சிக்கும் தேவையான நடவடிக்கைகளை எடுக்காமல், ஆர்பிஐக்கு இருக்கும் அதிகாரத்தை மட்டும் குறைக்க மத்திய அரசாங்கம் நினைப்பது சரியல்ல. இந்த விஷயத்தில் மத்திய அரசாங்கம், தன் விருப்பத்தைப் பிடிவாதமாக நிறைவேற்றிக் கொண்டால், வரலாற்றில் மிகப் பெரிய தவற்றை செய்தவராக பிரதமர் மோடி சித்திரிக்கப்படுவார் என்பதில் சந்தேகமே இல்லை.

- ஆசிரியர்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு