பிட்காய்ன் என்ற கண்ணுக்குத் தெரியாத ‘ஆன்லைன் வர்ச்சுவல் கரன்சி’யை வாங்கி, கஷ்டப்பட்டு சம்பாதித்த பணத்தை இழக்க வேண்டாம் என மத்திய நிதி அமைச்சகம் எச்சரிக்கை விடுத்துள்ளது. பிட்காய்ன் பற்றிய செய்தி காட்டுத் தீயாக பரவிவரும் இந்தச் சமயத்தில், மிகப் பொருத்தமான எச்சரிக்கையையே மத்திய நிதி அமைச்சகம் செய்துள்ளது.

பிட்காய்ன் என்னும் கம்ப்யூட்டர் கரன்சி 2011-ல்தான் புழக்கத்துக்கு வந்தது. இந்த பிட்காய்னை எல்லோரும் கவனிக்கக் காரணம், கடந்த சில ஆண்டுகளில் அது தந்த லாபம். கடந்த ஓராண்டில் மட்டும் இது 1,300 சதவிகித லாபமும், இரண்டு வருடங்களில் 3,200 சதவிகிதமும் லாபம் தந்துள்ளது. இந்த அபரிமிதமான லாபத்தைப் பார்த்தவர்கள், எதிர்காலத்திலும் நல்ல லாபம் கிடைக்கும் என்று நினைத்து இதை வாங்குகிறார்கள்.

பிட்காய்னை வாங்கி, அதில் பணம் போடத் துணிபவர்கள் ஒரு விஷயத்தை மட்டும் மறக்கக் கூடாது. பிட்காய்ன் என்பது தங்கத்தைப் போன்றோ, ரியல் எஸ்டேட் மனையைப் போன்றோ அல்லது நிறுவனங்களின் பங்குகளைப் போன்றோ மதிப்பினை அளந்து பார்க்கக்கூடியதொரு பொருளல்ல. அதற்கென்று எந்த ஓர் உருவமோ அல்லது வடிவமோ இல்லை. அப்படியிருக்க, அதன் மதிப்பு இவ்வளவுதான் என்பதை எப்படி அளக்க முடியும், இதன் விலை இன்னும் ஏறும் என்று எப்படிச் சொல்ல முடியும்?

மேலும், இந்த கரன்சி கம்ப்யூட்டரில் இருப்பதால், தொழில்நுட்ப வித்தைக்காரர்கள் இதனை ‘ஹேக்’ செய்து கொள்ளையடிக்க வாய்ப்புண்டு. அப்படிப்பட்ட நிகழ்ச்சிகள் ஏற்கெனவே நடக்கவும் செய்திருக்கின்றன. எந்தக் கட்டுப்பாடும் இல்லாமல் ரகசியமாகப் பரிவர்த்தனை செய்யலாம் என்பதே இதிலுள்ள பாசிட்டிவ் அம்சம். ஆனால், சர்வதேசத் தீவிரவாதிகளுக்குத்தான் இது சாதகமே தவிர, சாதாரண மனிதர்களுக்கு எந்த நன்மையுமில்லை.

நமது நிதி அமைச்சகம் எச்சரித்துள்ளபடி, இது சொத்து அல்ல. எனவே, இதில் போடப்படும் பணம் முதலீடு என்று சொல்ல முடியாது. பலரும் இதனை வாங்க நினைப்பதினால்தான் விலை உயர்கிறதேயொழிய, இதற்கு உள்ளார்ந்த மதிப்பு எதுவும் இல்லை. தவிர, பிட்காய்ன் பரிவர்த்தனைக்கு சீன அரசாங்கம் ஏற்கெனவே தடை விதித்துள்ள நிலையில், நமது அரசாங்கமும் கூடிய விரைவில் இதற்குத் தடை விதித்தாலும் ஆச்சர்யப்படுவதற்கில்லை. அப்படித் தடை விதிக்கும்பட்சத்தில்,  போட்ட பணம் அத்தனையையும் இழக்க வேண்டிய அபாயம் ஏற்படலாம்.

எனவே, பாடுபட்டுச் சேர்த்த பணத்தை ‘பொன்ஸி’ திட்டத்தில் போட்டு வீணடிப்பது போல, பிட்காய்னில் போட்டு வீணடிக்கக் கூடாது. பேராசை பெரும் நஷ்டத்தையே விளைவிக்கும். பிட்காய்ன் மோசடி வலையில் நாம் சிக்காமல் இருப்பதே புத்திசாலித்தனம்!

- ஆசிரியர்