Published:Updated:

ஸ்டார்ட்அப் தொழில்முனைவோர்களுக்குக் கைகொடுக்கும் புதிய களம்!

ஸ்டார்ட்அப்

பிரீமியம் ஸ்டோரி

மிழகத்தில் ஸ்டார்ட்அப் தொழில்முனைவோர்களை ஊக்குவிப்பதற்குப் பல அமைப்புகளும் ஆக்கபூர்வமான நடவடிக்கைகளை எடுத்துவருகின்றன. கடந்த வாரம் சி.ஐ.ஐ தமிழ்நாடு கூட்டமைப்பு ‘ஸ்டார்ட்அப் பிரினர்’ (startupreneur) என்னும் ஒரு நாள் கருத்தரங்கை நடத்தியது. தொழில் தொடங்குவதில் இருக்கும் சவால்கள், நிதி திரட்டுவது, டெக்னாலஜி தொடர்பான மாற்றங்கள், தொழில்முனைவில் கல்வி நிறுவனங்கள்/இன்குபேட்டர்களின் பங்கு உள்ளிட்ட பல தலைப்புகளில் இந்தியா முழுக்க உள்ள நிபுணர்கள் பேசியது குறிப்பிடத்தக்கது.

ஸ்டார்ட்அப் தொழில்முனைவோர்களுக்குக் கைகொடுக்கும் புதிய களம்!

இந்த நிகழ்ச்சியை இன்ஃபோசிஸ் நிறுவனத்தின் இணை நிறுவனர் கிரிஷ் கோபாலகிருஷ்ணன் தொடங்கி வைத்துப் பேசினார். ‘‘ தொழில்முனைவுக் கான கருத்தரங்கு நடக்கும் இந்தச் சமயத்தில் சித்தார்த்தா மரணமடைந்தது வருத்தம் அளிக்கிறது. தமிழ்நாடு அரசு தொழில்முனைவோர் களை ஊக்குவிக்கப் பல நடவடிக்கைகளை எடுத்துவருகிறது. தமிழகத்தின் பல நகரங்களுக்குச் சென்றிருக்கிறேன். சேலம், ஈரோடு, கோவை, மதுரை உள்ளிட்ட நகரங்களில் தொழில்முனைவுக் கான வாய்ப்புகள் நிறைய இருப்பதை நானே நேரடியாகப் பார்த்திருக்கிறேன்.

பெங்களூருவில் உள்ள பணியாளர்கள் ஸ்டார்ட்அப் நிறுவனங்களில் பணிபுரிய ஆர்வமாக இருக்கின்றனர். ஆனால், தமிழ்நாட்டில் உள்ளவர்கள் இன்ஃபோசிஸ், டி.சி.எஸ் மாதிரி பெரிய நிறுவனங்களில் வேலை செய்யவே ஆர்வமாக இருக்கின்றார்கள். ஸ்டார்ட்அப் நிறுவனங்களில் பணியாற்றுவதைத் தொழில் துறை அமைப்புகளும் அரசும் ஊக்குவிக்க வேண்டும்.

ஸ்டார்ட்அப் தொழில்முனைவோர்களுக்குக் கைகொடுக்கும் புதிய களம்!

பெங்களூருவில் அதிக தொழில்முனைவோர்கள் இருக்கக் காரணம், அங்கு எளிதில் பணியாளர்கள் கிடைப்பதுதான். தமிழகத்திலும் பணியாளர்கள் எளிதாகக் கிடைக்கும்பட்சத்தில், புதிய தொழில் தொடங்குவது இங்கேயும் அதிகரிக்கும்.

ஸ்டார்ட்அப் தொழில்முனைவு என்றாலே நிதி திரட்ட வேண்டும் எனப் பலரும் நினைக் கிறார்கள். நிதி திரட்ட முடியாமல் பிசினஸ் மூலமாக லாபம் ஈட்ட முடிந்தாலே சிறந்த தொழில்முனைவு என்பதை ஸ்டார்ட்அப் தொழில் தொடங்கவிருப்பவர்கள் புரிந்துகொள்ள வேண்டும். வென்ச்சர் கேப்பிட்டல் நிறுவனங்கள் அதிக லாபத்தை எதிர்பார்ப்பார்கள். அப்படி யானால் உங்களது தயாரிப்பும் (அல்லது சேவையும்) மிகச் சிறப்பானதாக இருக்க வேண்டும். தனித்துவமில்லாத எந்தத் தயாரிப்பும் இல்லாமல் நீங்கள் நிதி திரட்டுவது சாத்தியமே இல்லை.

ஸ்டார்ட்அப் தொழில்முனைவோர்களுக்குக் கைகொடுக்கும் புதிய களம்!

புதிய தொழில்கள்தான் இந்தியாவை அடுத்த கட்டத்துக்குக் கொண்டுசெல்லும். நம் நாடு ஐந்து டிரில்லியன் டாலர் பொருளாதாரமாக மாற வேண்டும் எனில், பெருமளவிலான இளைஞர்கள் தொழில்முனைவில் ஈடுபட வேண்டும்’’ என்று பேசினார் அவர்.

சி.ஐ.ஐ வடக்குப் பிரிவின் இணைத் தலைவர் முனிச் சாவ்லா, தொழில்முனைவதில் தனது அனுபவத்தை அருமையாக எடுத்துச் சொன்னார். “இருபது ஆண்டுகளுக்கும் மேலான வங்கித்துறை அனுபவம் எனக்கு இருந்தது. சிட்டி வங்கி, ஐ.சி.ஐ.சி.ஐ வங்கி ஆகியவற்றில் பணியாற்றியிருக்கிறேன். தொழில்முனைவுக்கு வயதில்லை என்பதைப் புரிந்துகொண்டு 50 வயதில்தான் சொந்தத் தொழிலைத் தொடங்கினேன். வங்கியில் இருக்கும்போது சம்பளம், விடுமுறை, சலுகைகள், பெரிய கார், ஆண்டு விடுமுறை என அனைத்தும் இருக்கும். ஆனால், சொந்தத் தொழிலில் எந்தச் சலுகையும் கிடைக்காது. அடுத்த மூன்று ஆண்டுகளுக்கு வீட்டுச் செலவுக்குப் பணத்தை எடுத்து வைத்துவிட்டுத்தான் தொழிலுக்கு வந்தேன். அந்த மூன்று ஆண்டுகளும் முடிந்துவிட்டது. இப்போது சிறப்பாக இருக்கிறேன் என்றாலும், ஆரம்ப காலத்தில் பல தியாகங் களைச் செய்யவேண்டியிருந்தன” என்று அவர் சொன்னது புதிய தொழில்முனைவோர்களுக்கு நல்ல ஊக்கத்தைத் தருவதாக இருந்தது.

பணியில் இருக்கும்போது சம்பளம், விடுமுறை, சலுகைகள், பெரிய கார், ஆண்டு விடுமுறை என பலவிதமான சலுகைகளும் இருக்கும். ஆனால், சொந்தத் தொழில் செய்யும் நிலையில் எந்தச் சலுகையும் கிடைக்காது!

சென்னை ஐ.ஐ.டி இன்குபேஷன் பிரிவின் இயக்குநர் மகேஷ் பஞ்சக்னுலா பேசும்போது, “பேராசிரியர்கள் இரு விஷயங்களில் தொழில்முனைவோர்களுக்கு உதவ முடியும். தொழில்முனைவில் சில சிக்கல்கள் இருக்கும். அந்தச் சிக்கல்களை ஒரு பேராசிரியராக நாங்கள் தீர்க்கமுடியும். பிரச்னையின் அடிப்படையைப் புரிந்து கொண்டு அதற்கேற்ப தீர்வு வழங்க முடியும். அடுத்ததாக ஸ்டார்ட்அப் நிறுவனங்களில் பணிபுரியும் ஆர்வம் இருக்கும் மாணவர்களை உங்களுடன் இணைக்க முடியும். பல பெரிய நிறுவனங்களை விட்டுவிட்டு ஸ்டார்ட்அப் நிறுவனங்களில் பணிபுரிய மாணவர்கள் தயாராக இருக்கிறார்கள்” எனக் கூறினார்.

ஸ்டார்ட்அப் தொழில்முனைவோர்களுக்குக் கைகொடுக்கும் புதிய களம்!

சோனா குழுமத்தின் தியாகு வள்ளியப்பா பேசும்போது, “கல்வி நிலையங்களைத் தொழில்முனைவுக்கேற்ற இடமாக மாற்றி யிருக்கிறோம். எங்களிடம் கணிப்பொறி, கட்டுமானம் உள்ளிட்ட அடிப்படை வசதிகள் உள்ளன. ஆனால், ஆண்டுக்கு 180 நாள்கள் மட்டுமே அவற்றைப் பயன்படுத்துகிறோம். தவிர, ஒரு நாளைக்குச் சராசரியாக ஐந்து மணி நேரம் மட்டுமே பயன்படுத்துகிறோம். அதனால் எங்கள் கல்லூரியில் ஸ்டார்ட்அப் இன்குபேஷன் மையம் தொடங்கத் திட்டமிட்டிருக்கிறோம். இங்கு பணியாற்ற விரும்பும் மாணவர்களை நாங்கள் வரவேற்கிறோம்’’ என்றார்.

கிரேட் லேக்ஸ் கல்லூரியின் பேராசிரியர் என் ஸ்ரீதர் கூறும்போது, “பெரு நிறுவனங்களில் வேலை வாங்கிக் கொடுக்கும் பணியை மட்டும் நாங்கள் செய்யவில்லை. தொழில்முனைவையும் நாங்கள் ஊக்குவிக்கிறோம். எங்களிடம் படித்தவர்கள் 15-க்கும் மேற்பட்ட வெற்றிகரமான நிறுவனத்தை உருவாகியிருக்கிறார்கள்’’ என்றார்.

தமிழக அரசின் தொழில்முனைவு இயக்குநர் ஆர்.வி. சஞ்சீவனா, தமிழக அரசு தொழில்முனைவுக்கு செய்துவரும் பல விஷயங்களைப் பற்றி பேசினார். மாணவர்கள், தொழில்முனைவோர்கள், தொழில் முனைவதில் ஆர்வமாக இருப்பவர்கள் எனப் பல தரப்பினருக்கும் இந்த நிகழ்ச்சி தொழில்முனைவுக்கான புதிய களமாக அமைந்திருந்தது.

வாசு கார்த்தி

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு