Published:Updated:

இனிப்பும் புளிப்பும் புதுமையும்!

ஒட்டுமொத்த விகடனுக்கும் ஒரே ஷார்ட்கட்

Use App
இனிப்பும் புளிப்பும் புதுமையும்!
இனிப்பும் புளிப்பும் புதுமையும்!

சுதா செல்வகுமார், படங்கள்: க.பாலாஜி

பிரீமியம் ஸ்டோரி

``நாம் அதிகம் அறியாத பழ வகைகளில் டிராகன் ஃப்ரூட்டும் ஒன்று. ஜூன் முதல் டிசம்பர் வரை சந்தையில் பரவலாகக் கிடைக்கிற இப்பழம், இனிப்பும் புளிப்பும் கலந்தது. சிவப்புத் தோல் சிவப்புச் சதையுடனும், சிவப்புத் தோல் வெள்ளைச் சதையுடனும், மஞ்சள் தோல் வெள்ளைச் சதையுடனும் மூன்று விதங்களாகக் கிடைக்கின்றன.  டிராகன் ஃப்ரூட்டில் ஆன்டி-ஆக்ஸிடன்ஸ் சத்து அதிகம் இருப்பதால் குடல் புற்றுநோய் வருவதைத் தடுக்க உதவும்.

இனிப்பும் புளிப்பும் புதுமையும்!

வைட்டமின் பி, வைட்டமின் சி சத்துகளும் அதிகம் உள்ளன. எடை குறைப்பு, செரிமானத் திறன் அதிகரிப்பு, பார்வை மேம்பாடு, பற்களுக்கு உறுதி, உடலுக்கு மிக குளிர்ச்சி... இப்படி பல நன்மைகளை அளிப்பதால், இதற்கு `சூப்பர் ஃபுட்’ என்ற செல்லப் பெயரும் உண்டு’’ என்கிறார் சென்னையைச் சேர்ந்த சமையல் கலைஞர் சுதா செல்வகுமார். இந்தப் பழத்தைக் கொண்டு செய்யக்கூடிய விதவிதமான ரெசிப்பிகளை அளிக்கிற இவர், ``இந்த ரெசிப்பிகளுக்கு எந்த வகை டிராகன் ஃப்ரூட்டை வேண்டுமானாலும் பயன்படுத்தலாம். வண்ணம் மட்டுமே மாறுபடும். சிவப்பு சதைப்பகுதி கொண்ட பழத்தில் இனிப்புச் சுவை சற்றே கூடுதலாக இருக்கும்’’ என்று கூடுதல் தகவல் அளிக்கிறார்.

இனிப்பும் புளிப்பும் புதுமையும்!

டிராகன் ஃப்ரூட் கூல் க்ரீம் வித் கிராக்கர் பிஸ்கட்

தேவையானவை:

 டிராகன் பழம் - 2 (தோல் சீவி, சிறிய துண்டுகளாக்கவும்)
 கிராக்கர் பிஸ்கட் - 4
 கலர் ஸ்பிரிங்கிள்ஸ் - தேவையான அளவு
 டார்க் சாக்லேட் பார் - ஒன்று (துண்டுகளாக்கவும்)
 வெண்ணெய் - ஒரு டீஸ்பூன்
 ஃப்ரெஷ் விப்பிங் க்ரீம் - ஒரு கப்
 கண்டன்ஸ்டு மில்க் -  கால் கப்
 சர்க்கரை – கால் கப்
 ஐஸ்க்ரீம் குச்சிகள் - 2

இனிப்பும் புளிப்பும் புதுமையும்!

செய்முறை:

டிராகன் பழத் துண்டுகளை மிக்ஸியில் சேர்த்துத் தண்ணீர்விடாமல் கூழாக அரைத்தெடுக்கவும். அகலமான பாத்திரத்தில் விப்பிங் க்ரீமைப் போட்டு எலெக்ட்ரிக் ஹேண்ட் பிளெண்டரால் இரு மடங்காகும் வரை அடிக்கவும். அதனுடன் சர்க்கரை, கண்டன்ஸ்டு மில்க் சேர்த்து மீண்டும் அடிக்கவும். பிறகு டிராகன் பழக்கூழைச் சேர்த்து அடித்து, காற்றுப்புகாத டப்பாவில் போட்டு மூடவும். இதை ஃப்ரீசரில் 6 மணி நேரம் வைத்து எடுக்கவும். டிராகன் கூல் க்ரீம் ரெடி.

டார்க் சாக்லேட்டுடன் வெண்ணெய் சேர்த்து டபுள் பாய்லிங் முறையில் உருக்கி எடுக்கவும். ஒரு கிராக்கர் பிஸ்கட்டின் மீது ஒரு பெரிய ஸ்கூப் அளவு டிராகன் கூல் க்ரீம் வைக்கவும். அதன் மேலே மற்றொரு பிஸ்கட் வைத்து மூடவும். நடுவில் ஐஸ் குச்சியைச் செருகவும்.

இதேபோல் மற்ற இரண்டு பிஸ்கட்களையும் இதேபோல் செய்துகொள்ளவும். இதைப் பத்து நிமிடங்கள் ஃப்ரீசரில் வைத்து எடுக்கவும். செட் ஆன பிஸ்கட்டை வெளியே எடுத்து, மேல் பக்கத்தின் பாதியளவு மட்டும் உருக்கிய சாக்லேட்டைத் தடவி, அதன் மேல் கலர் ஸ்பிரீங்கிள்ஸ் அல்லது சில்வர் சுகர் பால்ஸ் தூவவும். இதை மீண்டும் பத்து நிமிடங்கள் ஃப்ரீசரில் வைத்து எடுத்துப் பரிமாறவும்.

குறிப்பு:

கடையிலிருந்து வாங்கும் விப்பிங் க்ரீம் பாக்கெட் எப்போதும் ஃப்ரிட்ஜிலேயே இருக்க வேண்டும். உருக்கிய டார்க் சாக்லேட்டுக்குப் பதிலாக ரெடிமேட் சாக்கோ ஸ்பெரட்டும் தடவலாம்.

டிராகன் ஃப்ரூட் சில் லாலிபாப்

தேவையானவை:

 டிராகன் ஃப்ரூட் - ஒன்று (தோல் சீவவும்)
 பன்னீர் சோடா - ஒரு கப்
 லாலிபாப் குச்சிகள் (அ) ஐஸ் குச்சிகள் - தேவையான அளவு
 விருப்பமான வடிவ சாக்லேட் சிலிக்கான் மோல்டு - ஒன்று
 பொடித்த சர்க்கரை - 2 டேபிள்ஸ்பூன்
 புதினா இலைகள் - சிறிதளவு

இனிப்பும் புளிப்பும் புதுமையும்!

செய்முறை:

டிராகன் ஃப்ரூட்டை இரண்டாக நீளவாக்கில் நறுக்கவும். பிறகு சிறிய ஸ்கூப் ஸ்பூனால் சதைப்பகுதியை எடுக்கவும். (சிறிய உருண்டைகளாக வரும்). பாத்திரத்தில் பொடித்த சர்க்கரையுடன் பன்னீர் சோடா சேர்த்துக் கலக்கவும்.  சிலிக்கான் மோல்டின் குழிகளில் ஒரு ஸ்கூப் டிராகன் ஃப்ரூட் உருண்டையை வைக்கவும். அதன்மீது ஒரு புதினா இலை வைக்கவும். மேலே தேவையான அளவு சோடா கலவையை ஊற்றவும். எல்லாக் குழிகளிலும் இதே போல ஊற்றவும். இதை ஃப்ரிட்ஜில் அரை மணி நேரம் வைத்து எடுக்கவும். அதன் நடுவில் லாலிபாப் குச்சி (அ) ஐஸ் குச்சி செருகி மீண்டும்  ஃப்ரீசரில் 6 மணி நேரம் வைத்து எடுத்துப் பரிமாறவும்.

டிராகன் ஃப்ரூட் சால்சா

தேவையானவை:

 டிராகன் பழம் - 2 (தோல் சீவி, விரும்பிய வடிவில் துண்டுகளாக்கவும்)
 உடைத்த முந்திரி - ஒரு டேபிள்ஸ்பூன் (அரை மணி நேரம் ஊறவைக்கவும்)
 பொடியாக நறுக்கிய வெங்காயத்தாள் - 2 டேபிள்ஸ்பூன்
 மிளகுத்தூள் - அரை டீஸ்பூன்
 எலுமிச்சைப் பழம் - பாதியளவு (சாறு பிழியவும்)
 கண்டன்ஸ்டு மில்க் - 2 டேபிள்ஸ்பூன்
 தோல் சீவி துருவிய இஞ்சி - ஒரு டீஸ்பூன்
 டிராகன் பழக்கூழ் - அரை கப் (தோல் சீவி சதைப் பகுதியை அரைத்த விழுது)
 ஜெல்லித் துண்டுகள் - 10
 உப்பு - ஒரு சிட்டிகை
 விருப்பமான சிப்ஸ் - தேவையான அளவு

இனிப்பும் புளிப்பும் புதுமையும்!

செய்முறை:

டிராகன் பழத் துண்டுகளுடன் இஞ்சித் துருவல் வெங்காயத்தாள், உப்பு, ஜெல்லித் துண்டுகள் சேர்த்துக் கலக்கவும். அதனுடன் டிராகன் பழக்கூழ், கண்டன்ஸ்டு மில்க், முந்திரி, எலுமிச்சைச் சாறு, மிளகுத்தூள் சேர்த்துக் கலக்கவும். இதை 15 நிமிடங்கள் ஃப்ரிட்ஜில் வைத்து எடுக்கவும். விருப்பமான சிப்ஸுடன் பரிமாறவும். இனிப்பு, புளிப்பு, உப்பு, காரம் சேர்ந்து அமிர்தமாக இருக்கும்.

டிராகன் ஃப்ரூட் பான்கேக்

தேவையானவை:

 சிவப்பு சதைப்பகுதி கொண்ட டிராகன் ஃப்ரூட் - 3 (தோல் சீவி, சிறிய துண்டுகளாக்கவும்)
 வெண்ணெய் (அ) நெய் - சிறிதளவு
 மைதா மாவு - ஒரு கப்
 பொடித்த சர்க்கரை - கால் கப்
 பொடித்த விருப்பமான நட்ஸ் கலவை - 3 டேபிள்ஸ்பூன்
 காய்ச்சி ஆறவைத்த பால் - 2 கப்
 வெனிலா எசென்ஸ் - சில துளிகள்
 ஏலக்காய்த்தூள் - ஒரு சிட்டிகை
 குங்குமப்பூ - ஒரு சிட்டிகை
 பேக்கிங் பவுடர் - ஒரு சிட்டிகை
 உப்பு - ஒரு சிட்டிகை

இனிப்பும் புளிப்பும் புதுமையும்!

க்ரீம் செய்ய

 பொடித்த சர்க்கரை - கால் கப்
 ஹெவி க்ரீம் - ஒரு கப்
 ஃப்ரெஷ் விப்பிங் க்ரீம் - ஒரு கப்

அலங்கரிக்க:

 கேரமல் சிரப் (அ) தேன் - சிறிதளவு
 டூட்டி ஃப்ரூட்டி - ஒரு டேபிள்ஸ்பூன்
 டிராகன் பழ ஸ்கூப்,
க்ரீம் ஸ்கூப் -  சிறிதளவு

செய்முறை:

டிராகன் பழத் துண்டுகளை மிக்ஸியில் சேர்த்துத் தண்ணீர்விட்டு கூழாக அரைத்தெடுக்கவும் (விரும்பினால் வடிகட்டலாம்). மைதா மாவுடன் உப்பு, ஏலக்காய்த்தூள், பேக்கிங் பவுடர், பொடித்த சர்க்கரை சேர்த்துக் கலக்கவும். அதனுடன் அரைத்த பழக்கூழ், பால், வெனிலா எசென்ஸ் சேர்த்து தோசை மாவுப் பதத்துக்குக் கரைக்கவும். அதனுடன் நட்ஸ், குங்குமப்பூ சேர்த்துக் கலக்கவும்.

தோசைக்கல்லைச் சூடாக்கி சிறிதளவு வெண்ணெய் (அ) நெய் தடவி மாவைச் சற்று கனமான தோசைகளாக ஊற்றி, இருபுறமும் வேகவிட்டு எடுக்கவும். பான்கேக் ரெடி. நன்கு ஆறிய பிறகு டப்பாவில் போட்டு மூடி ஃப்ரிட்ஜில் ஒரு மணி நேரம் வைத்து எடுக்கவும்.

அகலமான பாத்திரத்தில் விப்பிங் க்ரீம் சேர்த்து எலெக்ட்ரிக் ஹேண்ட் பிளெண்டரில் 10 நிமிடங்கள் அடிக்கவும். அதனுடன் ஹெவி க்ரீம் சேர்த்துச் சிறிது நேரம் அடிக்கவும். பிறகு, பொடித்த சர்க்கரை சேர்த்துப் பஞ்சு போல மிருதுவாக வரும் வரை அடித்தெடுக்கவும். பான் கேக் மேல் க்ரீமைத் தடவி ஒன்றன் மேல் ஒன்றாக அடுக்கவும். மேலே தேன் அல்லது கேரமல் சிரப் ஊற்றவும். இந்த அடுக்கை முக்கோணத் துண்டுகளாக்கி டிராகன் பழ ஸ்கூப், க்ரீம் ஸ்கூப், டூட்டி ஃப்ரூட்டி, தேன் வைத்து அலங்கரித்துப் பரிமாறவும்.

டிராகன் ஃப்ரூட் சீஸ் ஸ்டெப்ஸ்

தேவையானவை:

 டிராகன் பழம் - 2
 சீஸ் ஸ்லைஸ்கள் - 4
 செர்ரி - சிறிதளவு
 லாலிபாப் குச்சிகள் (அ) டிக்கா மூங்கில் குச்சிகள் - தேவையான அளவு
 பெரிய பிரெட் ஸ்லைஸ் - 4
 நெய் - சிறிதளவு
 வெஜ் மயோனைஸ் - கால் கப்

இனிப்பும் புளிப்பும் புதுமையும்!

செய்முறை:

பிரெட்டின் ஓரங்களை நீக்கிவிட்டு பெரிய குக்கீஸ் கட்டரால் விரும்பிய (வட்டம், திலகம், ஸ்டார், இதயம், பூ) வடிவில் துண்டுகளாக்கவும். சீஸ் துண்டுகளையும் அதே மாதிரி வெட்டிக்கொள்ளவும். டிராகன் ஃப்ரூட்டை வட்டமாக நறுக்கி அதன் சதைப்பகுதியில் குக்கீஸ் கட்டரை வைத்து இதே மாதிரி அழுத்தி எடுத்துக்கொள்ளவும். வாணலியில் நெய்விட்டுச் சூடாக்கி வெட்டி வைத்த பிரெட் துண்டுகளை வைத்து டோஸ்ட் செய்து எடுக்கவும். அதன்மீது வெஜ் மயோனைஸ் தடவவும். பிறகு அதன் மீது சீஸ், டிராகன் ஃப்ரூட் வைக்கவும். அதன் நடுவே டிக்கா குச்சியைக் குத்தவும். மேல் பகுதியில் செர்ரி குத்திப் பரிமாறவும்.  பார்க்கவும், சுவைக்கவும் நன்றாக இருக்கும்.

குறிப்பு:

ஒரே வடிவக் கட்டரை பயன்படுத்தவும். பிரெட்டை டோஸ்ட் செய்யாமலும் பயன்படுத்தலாம்.

டிராகன் ஃப்ரூட் லேயர்டு புட்டிங்

தேவையானவை:

 டிராகன் ஃப்ரூட் துண்டுகள் - 2 கப்
 தோல், கொட்டை நீக்கி, நறுக்கிய மாம்பழத் துண்டுகள் - ஒரு கப்
 காய்ச்சி ஆறவைத்த பால் - அரை கப்
 சர்க்கரை - ஒரு கப்
 தேங்காய்ப்பால் - அரை கப்
 ஃப்ரெஷ் க்ரீம் - அரை கப்
 சப்ஜா விதை - ஒரு டேபிள்ஸ்பூன்

இனிப்பும் புளிப்பும் புதுமையும்!

செய்முறை:

சப்ஜா விதைகளை 15 நிமிடங்கள் தண்ணீரில் ஊறவைக்கவும். நறுக்கிய டிராகன் பழத் துண்டுகள், மாம்பழத் துண்டுகளை தனித்தனி ஜிப்-லாக் கவரில் போட்டு மூடி ஃப்ரீசரில் இரவு முழுவதும் வைக்கவும்.
காலையில் எடுத்து மிக்ஸியில் தனித்தனியாக விழுதாக அரைத்தெடுக்கவும். பாலுடன் க்ரீம், தேங்காய்ப்பால், சர்க்கரை சேர்த்து அடித்தெடுக்கவும். பெரிய கண்ணாடி டம்ளர்களில் சிறிதளவு அரைத்த டிராகன் ஃப்ரூட் கலவையைச் சேர்க்கவும். அதன் மீது சிறிதளவு ஊறிய சப்ஜா விதைகளை போடவும். அதன் மீது மாம்பழக் கலவை, அடித்த பால் கலவை என மாற்றி மாற்றி ஊற்றி நிரப்பவும். இதை ஃப்ரீசரில்
5 மணி நேரம் வைத்து எடுத்து சாப்பிடவும்.

குறிப்பு:

சீஸனுக்கு ஏற்றாற்போல (பப்பாளி, வாழை, பலா) பழங்களைப் பயன்படுத்தலாம்.

டிராகன் ஃப்ரூட் `பப்பா தோய்’ வித் பிரெட் பாக்கெட்

தேவையானவை:

 பெரிய பிரெட் ஸ்லைஸ் - 8 (ஓரங்களை நீக்கவும்)
 தோல் சீவி சதுரமாக நறுக்கிய (அ) ஸ்கூப் உருண்டையாக எடுத்த டிராகன் ஃப்ரூட் - கால் கப்
 கெட்டித் தயிர் - ஒரு கப்
 கண்டன்ஸ்டு மில்க் - ஒரு கப்
 ஏலக்காய்த்தூள் - ஒரு சிட்டிகை
 வறுத்துப் பொடித்த நட்ஸ் கலவை - 2 டேபிள்ஸ்பூன்
 டிராகன் பழக்கூழ் - ஒரு கப்
 நெய் – சிறிதளவு

இனிப்பும் புளிப்பும் புதுமையும்!

செய்முறை:

கெட்டித்தயிரை துணியில் கட்டி சுமார் 3, 4 மணி நேரம் தொங்கவிடவும். (தண்ணீர் முழுவதும் வடிந்து விடும்; தயிர் கெட்டியாகத்தான் இருக்க வேண்டும்). பாத்திரத்தில் தயிருடன் கண்டன்ஸ்டு மில்க், டிராகன் பழக் கூழ் சேர்த்து ஹேண்ட் பிளெண்டரால் நன்கு அடிக்கவும். அதனுடன் டிராகன் பழத்துண்டுகள், ஏலக்காய்த்தூள், நட்ஸ் சேர்த்துக் கலக்கவும். இதைச் சிறிய கிண்ணங்களில் ஊற்றி ஃபாயில் பேப்பரால் மூடி ஆவியில் 20-25 நிமிடங்கள் வேகவிட்டு எடுக்கவும்.

இதுதான் பப்பா தோய். ஆறியதும் ஃப்ரிட்ஜில் வைத்து நன்கு குளிரவைக்கவும் (இதை அப்படியேவும் சாப்பிடலாம்). 

தவாவில் சிறிதளவு நெய்விட்டு நான்கு பிரெட் ஸ்லைஸ்களைப் பொன்னிறமாக டோஸ்ட் செய்து எடுக்கவும். விருப்பமான வடிவ பிஸ்கட் கட்டரை நான்கு பிரெட் ஸ்லைஸ்களை நடுவே வைத்து அழுத்தம் தரவும். வெட்டப்பட்ட வடிவத்தைத் தனியே எடுத்து வைத்துவிடவும். வெட்டி எடுக்கப்பட்ட  பிரெட்டின் கீழே டோஸ்ட் செய்த பிரெட்டை வைக்கவும். குழிவான பகுதியில் பழ பப்பா தோயை நிரப்பவும். எல்லா பிரெட்டிலும் இப்படிச் செய்து பரிமாறவும்.

குறிப்பு:

இது ஒரு பெங்காலி டிஷ் . `பப்பா’ என்றால் அவித்த என்றும் ‘தோய்’ என்றால் தயிர் என்றும் பொருள். ஸ்டீம்டு யோகர்ட்டை பப்பாளி, மாம்பழம், ஸ்ட்ராபெர்ரி என விரும்பும் பழத்தில் தயாரிக்கலாம்.

டிராகன் ஃப்ரூட் வித் சுகர்கேன் ஜூஸ்

தேவையானவை:

 டிராகன் ஃப்ரூட் - ஒன்று (தோல் சீவி, சிறிய துண்டுகளாக்கவும்)
 கரும்புச் சாறு - ஒரு கப்
 எலுமிச்சைப் பழம் - ஒன்று (சாறு பிழியவும்)
 சர்க்கரை - 2 டேபிள்ஸ்பூன்
 இஞ்சிச் சாறு - ஒரு டீஸ்பூன்
 ஐஸ்கட்டிகள் - சிறிதளவு (பொடிக்கவும்)

இனிப்பும் புளிப்பும் புதுமையும்!

செய்முறை:

டிராகன் பழத் துண்டுகளுடன் கரும்புச் சாறு, சர்க்கரை, எலுமிச்சைச் சாறு, இஞ்சிச் சாறு சேர்த்து மிக்ஸியில் அடித்தெடுக்கவும். அதனுடன் பொடித்த ஐஸ்கட்டிகள் சேர்த்துப் பருகவும்.

டிராகன் ஃப்ரூட் ஃப்ரை

தேவையானவை:

 தோல் சீவி, வட்டமாக நறுக்கிய டிராகன் பழத் துண்டுகள் - 5
 பான்கேக் மிக்ஸ் - ஒரு கப்
 எண்ணெய் - சிறிதளவு
 உருக்கிய கேரமல் (Melted Caramel) - கால் கப்
 ஐசிங் சுகர் (அ) பொடித்த சர்க்கரை - சிறிதளவு

இனிப்பும் புளிப்பும் புதுமையும்!

செய்முறை:

பான்கேக் மிக்ஸுடன் தேவையான அளவு தண்ணீர்விட்டுக் கெட்டியாகக் கரைக்கவும். டிராகன் பழத்துண்டின் மீது சிறிதளவு கேரமல் தடவி 10 நிமிடங்கள் ஃப்ரிட்ஜில் வைத்து எடுக்கவும். வாணலியில் எண்ணெயைக் காயவிட்டு டிராகன் பழத்துண்டுகளை கரைத்துவைத்துள்ள பான்கேக் மிக்ஸில் முக்கி எடுத்துப் பொரித்தெடுக்கவும். மேலே ஐசிங் சுகர் (அ) பொடித்த சர்க்கரை தூவிப் பரிமாறவும்.

டிராகன் ஃப்ரூட் க்ரீமி ரோல்

தேவையானவை:

 ரெடிமேட் பேஸ்டரி ஷீட் - 5
 கலர் ஸ்பிரிங்கிள்ஸ் - ஒரு  டேபிள்ஸ்பூன்
 டிராகன் பழம் - 2 (தோல் நீக்கி, நறுக்கி, ஸ்கூப் செய்து எடுக்கவும்)
 கலர் சீரக மிட்டாய் - ஒரு டேபிள்ஸ்பூன்
 பிரவுன் சுகர் - 2 டேபிள்ஸ்பூன்
 பீநட் பட்டர் - 3 டேபிள்ஸ்பூன்
 சாக்கோ ஸ்பிரெட் - 3 டேபிள்ஸ்பூன்
 மைதா மாவு - ஒரு டேபிள்ஸ்பூன்
 செர்ரி - சிறிதளவு
 எண்ணெய் - தேவையான அளவு

இனிப்பும் புளிப்பும் புதுமையும்!

செய்முறை:

ரெடிமேட் பேஸ்டரி ஷீட்டை எடுத்துக் கையளவு மூடியால் அழுத்தம் தந்து, வட்ட வடிவமாக எடுத்துக்கொள்ளவும். மைதா மாவுடன் சிறிதளவு தண்ணீர்விட்டுக் கெட்டியாக பேஸ்ட் போல கரைக்கவும். சப்பாத்திக் குழவியில் வட்ட வடிவ பேஸ்ட்ரி ஷீட்டை வைத்து, சுருட்டி ஓரத்தில் மைதா பேஸ்ட் தடவி இரு முனைகளை ஓட்டவும். பிறகு அப்படியே 10 நிமிடங்கள் ஃப்ரிட்ஜில் வைக்கவும். வாணலியில் எண்ணெயைக் காயவிட்டுக் குழவியிலிருந்து ஷீட்டை எடுத்துப் போட்டுப் பொரித்தெடுக்கவும் (சுருள் அல்லது உருளை மாதிரி வரும்). சிறிய பவுலில் ஒரு டேபிள்ஸ்பூன் பிரவுன் சுகர், ஒரு டேபிள்ஸ்பூன் பீநட் பட்டர், கலர் சீரக மிட்டாய், பாதியளவு டிராகன் ஸ்கூப் சேர்த்துக் கலக்கவும். பீநட் பட்டர் பழ க்ரீம் ரெடி.

மற்றொரு பவுலில் சாக்கோ ஸ்பிரெட் (Spread), கலர் ஸ்பிரிங்கிள்ஸ், ஒரு டேபிள்ஸ்பூன் பிரவுன் சுகர், மீதமுள்ள டிராகன் ஸ்கூப் சேர்த்துக் கலக்கவும். சாக்கோ பழ பேஸ்ட் ரெடி.

பொரித்த சுருளில் ஒருபுறம் பாதியளவு பீநட் பட்டர் க்ரீமும் மறுபுறம் சாக்கோ பேஸ்ட் க்ரீமும் வைத்து நிரப்பவும். பொரித்த ரோலை செர்ரி துண்டுகள் வைத்து அலங்கரித்துப் பரிமாறவும். ஒருபுறம் சாப்பிடும்போது பீநட் பட்டர் பழச்சுவையுடனும் மறுபுறம் சாப்பிடும்போது சாக்கோ பேஸ்ட் பழச்சுவையுடனும் இருக்கும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு