Published:Updated:

சிறுதானிய தீபாவளி!

சிறுதானிய தீபாவளி!
பிரீமியம் ஸ்டோரி
சிறுதானிய தீபாவளி!

சிறுதானிய தீபாவளி!

சிறுதானிய தீபாவளி!

சிறுதானிய தீபாவளி!

Published:Updated:
சிறுதானிய தீபாவளி!
பிரீமியம் ஸ்டோரி
சிறுதானிய தீபாவளி!

`நலம் வாழ எந்நாளும் வேண்டும் சிறுதானியம்’ என்பது ஆரோக்கியத்துக்கு வழிகாட்டும் புதுமொழி. தீபாவளி அன்று மட்டும் விதிவிலக்கா, என்ன? ``புட்டு, கொழுக்கட்டை, பாயசம், சாலட், கட்லெட், மஞ்சூரியன், கோலா உருண்டை, ஃப்ரைடு ரைஸ், முட்டை வறுவல் என எந்த வகை உணவையும் சிறுதானியம் கொண்டு ருசியாகத் தயாரிக்க முடியும்’’ என்கிறார் சென்னையைச் சேர்ந்த சமையல் கலைஞர் ஜெ.கலைவாணி.

சிறுதானிய தீபாவளி!

பாரம்பர்ய சிறுதானிய உணவுகளை அவ்வளவாக விரும்பாத குழந்தைகள்கூட இதுபோன்ற வித்தியாசமான உணவுகளை வரவேற்பார்கள் என்பதில் சந்தேகமே இல்லை. காலை, மதியம், இரவு என எல்லா மெனுக்களிலும் இடம்பெறக்கூடிய வகையில் பல உணவுகள் இங்கே இடம்பெற்றுள்ளன.

சிறக்கட்டும் சிறுதானிய தீபாவளி!

ஒட்டுமொத்த விகடனுக்கும் ஒரே ஷார்ட்கட்!

- ஜெ.கலைவாணி, தே.அசோக்குமார்

சிறுதானிய தீபாவளி!

பனிவரகு ஸ்வீட் பிடிக்கொழுக்கட்டை

தேவையனவை:

 பனிவரகு மாவு - ஒரு கப்
 பொடித்த வெல்லம் - முக்கால் கப்
 ஏலக்காய்த்தூள் - அரை ஸ்பூன்
 தேங்காய் - ஒரு மூடி (துருவவும்)
 நெய் - சிறிதளவு

சிறுதானிய தீபாவளி!

செய்முறை:

பனிவரகு மாவை வெறும் வாணலியில் வாசனை வரும் வரை வறுத்து எடுக்கவும். வெல்லத்தூளை ஒரு பாத்திரத்தில் போட்டு, அத்துடன் 2 கப் தண்ணீரைச் சேர்த்துக் கொதிக்கவிடவும். வெல்லம் கரைந்து கொதிக்க ஆரம்பித்ததும், கீழே இறக்கி, அதை வடிகட்டவும். வடிகட்டிய வெல்லத்தை, அடிகனமான ஒரு பாத்திரத்தில் ஊற்றி பாகு காய்ச்சவும்.அடுப்பைத் தணித்துக்கொண்டு, வறுத்த பனிவரகு மாவைச் சிறிது சிறிதாகச் சேர்த்துக் கிளறவும். பின்னர் அதில் தேங்காய்த் துருவல், ஏலக்காய்த்தூள் சேர்த்து, மாவு கெட்டியாகும் வரை கிளறிக்கொண்டே இருக்கவும். பின்னர் அதை கீழே இறக்கி வைத்து ஆறவிடவும். மாவு சற்று ஆறியவுடன், கைகளில் சிறிது நெய்யைத் தடவிக்கொண்டு, சிறிதளவு மாவை எடுத்து உருட்டி, உள்ளங்கையில் வைத்து மூடி சற்று விரல்களால் அழுத்தி, கொழுக்கட்டைப் பிடிக்கவும். எல்லா மாவையும் இப்படியே செய்து, நெய் தடவிய இட்லித் தட்டில் அடுக்கி, இட்லி குக்கரில் வைத்து, 10 அல்லது 15 நிமிடங்கள் ஆவியில் வேகவைத்து எடுக்கவும்.

பனிவரகு இந்தியாவிலிருந்தே மற்ற நாடுகளுக்குப் பரவியது.

சிவப்பரிசி கேழ்வரகு இனிப்புப்புட்டு

தேவையனவை:

 சிவப்பரிசி மாவு - ஒரு கப்
 கேழ்வரகு மாவு - அரை கப்
 தேங்காய்த் துருவல் - கால் கப்
 ஏலக்காய்த்தூள் - அரை டீஸ்பூன்
 நெய் - 4 டீஸ்பூன்
 முந்திரி, பாதாம், திராட்சை -
தலா 4 டேபிள்ஸ்பூன்
 பொடித்த வெல்லம் - கால் கப்
 உப்பு - ஒரு சிட்டிகை
 சர்க்கரை - சிறிதளவு

சிறுதானிய தீபாவளி!

செய்முறை:

சிவப்பரிசி மாவு மற்றும் கேழ்வரகு மாவை வாணலியில் போட்டுச் சிவக்க வறுக்கவும். சிறிதளவு வெந்நீரில் ஒரு சிட்டிகை உப்பு, சிறிதளவு சர்க்கரை சேர்த்துக் கலந்து மாவில் தெளித்து, கட்டிகள் இல்லாதவாறு பிசிறவும். இதை நனைத்துப் பிழிந்த காட்டன் துணியில் வைத்து மூடி, இட்லி குக்கரில் 15 நிமிடம் வேகவைத்து எடுக்கவும். வேகவைத்த மாவைக் கட்டிகள் இல்லாமல் உதிர்த்துக்கொள்ளவும். வாணலியில் நெய்விட்டுச் சூடானதும் முந்திரி, பாதாம், திராட்சையை வறுத்துக்கொள்ளவும். வாயகன்ற பாத்திரத்தில் ஆறவைத்துள்ள மாவைப் போட்டு அதனுடன் தேங்காய்த் துருவல், ஏலக்காய்த்தூள், வெல்லத்தூள் சேர்த்து நன்றாகக் கலந்துகொள்ளவும். பிறகு வறுத்து வைத்துள்ள முந்திரி, பாதாம், திராட்சையை நெய்யுடன் இதில் சேர்த்து, கிளறிப் பரிமாறவும்..

ஆரியம், ராகி, கேப்பை ஆகிய சொற்களும் கேழ்வரகையே குறிக்கின்றன.

தினை வெஜிடபிள் மஞ்சூரியன்

தேவையனவை:

 வேகவைத்த தினை - கால் கப்
 கேரட் - ஒன்று (துருவவும்)
 கோஸ் - அரை கப் (துருவியது)
 குடமிளகாய், வெங்காயம் - ஒன்று (பொடியாக நறுக்கவும்)
 பீன்ஸ் - கால் கப் (பொடியாக நறுக்கியது)
 தோல் நீக்கி சீவிய இஞ்சி - பூண்டு - 2 டீஸ்பூன்
 நறுக்கிய கொத்தமல்லித்தழை - ஒரு கைப்பிடி அளவு
 மிளகுத்தூள் - ஒரு டீஸ்பூன்
 மைதா மாவு, சோள மாவு - ஒரு டீஸ்பூன்
 வினிகர் - ஒரு டீஸ்பூன்
 சோயா சாஸ், சில்லி சாஸ் - 2 டீஸ்பூன்
 மிளகுத்தூள் - ஒரு டீஸ்பூன்
 எண்ணெய், உப்பு - தேவையான அளவு

சிறுதானிய தீபாவளி!

செய்முறை:

நறுக்கிய காய்கறிகளைப் பாத்திரத்தில் சேர்த்து வேகவைத்த தினை, கொத்தமல்லித்தழை, மிளகுத்தூள், மைதா மாவு, சோள மாவு, உப்பு, ஒரு டீஸ்பூன் இஞ்சி - பூண்டு சேர்த்துக் கலந்து உருண்டைகளாக்கவும். வாணலியில் எண்ணெய்விட்டுக் காய்ந்ததும் உருண்டைகளைப் போட்டுப் பொன்னிறமாக வறுத்துக்கொள்ளவும்.

ஒரு வாணலியில் எண்ணெய்விட்டு, மீதமுள்ள இஞ்சி - பூண்டு சேர்த்து, வெங்காயம் சேர்த்து வதக்கி பிறகு வினிகர், சோயா சாஸ், சில்லி சாஸ், உப்பு, மிளகுத்தூள் சேர்த்துக் கலக்கவும். இதனுடன் அரை டம்ளர் தண்ணீர்விட்டுக் கலந்து, வறுத்த உருண்டைகளைச் சேர்த்துக் கலந்து சுண்டவிட்டு எடுத்தால், தினை வெஜிடபிள் மஞ்சூரியன் ரெடி.

மஞ்சூரியன் என்பது வடகிழக்கு சீனாவிலுள்ள ஒரு பகுதி.

மரவள்ளிக்கிழங்கு ஜவ்வரிசி பாயசம்

தேவையனவை:

 மரவள்ளிக்கிழங்கு - ஒரு கப் (துருவவும்)
 ஜவ்வரிசி - கால் கப்
 ஏலக்காய்த்தூள் - ஒரு டீஸ்பூன்
 பாதாம், முந்திரி - தலா 10
 பால் - ஒரு லிட்டர்
 காய்ச்சி ஆறவைத்த பால் - அரை டம்ளர்
 பனை வெல்லம் - அரை கப் (பொடித்தது)
 நெய் - ஒரு டேபிள்ஸ்பூன்

சிறுதானிய தீபாவளி!

செய்முறை:

ஜவ்வரிசியை ஒரு கப் தண்ணீரில் ஒரு மணி நேரம் ஊறவைக்கவும்.  காய்ச்சி ஆறவைத்த பாலுடன் பாதாம், முந்திரியைச் சேர்த்து அரைத்துக்கொள்ளவும். பாலுடன் ஏலக்காய்த்தூள் சேர்த்துக் காய்ச்சவும்.  நன்கு கொதிவந்த பிறகு துருவிய கிழங்கைச் சேர்த்து வேகவிடவும். பின்பு ஜவ்வரிசியைச் சேர்த்து வேகவிடவும். ஜவ்வரிசி வெந்ததும். அரைத்த பாதாம் - முந்திரி விழுது, பனை வெல்லம் சேர்த்துக் கிளறி, நெய் சேர்த்துக் கலந்து இறக்கவும். வாணலியில் நெய்விட்டு திராட்சையைச் சேர்த்து வறுத்து, அதை நெய்யுடன் பாயசத்தில் கலந்து, ஆறியதும் பரிமாறவும்.

உண்மையான ஜவ்வரிசி இந்தோனேசியத் தீவுகளில் வளர்கின்ற ஜவ்வரிசி மரங்களிலிருந்தே பெறப்படுகிறது.

சோளம் ஆலூ கச்சோரி

தேவையனவை:

 சோள மாவு - ஒரு கப்
 மைதா மாவு - ஒரு கப்
 ஓமம் - அரை டீஸ்பூன்
 சீரகம் - அரை டீஸ்பூன்
 பெருங்காயத்தூள் - சிறிதளவு
 பச்சை மிளகாய் - ஒன்று (பொடியாக நறுக்கவும்)
 மஞ்சள்தூள் - அரை டீஸ்பூன்
 மிளகாய்த்தூள் - முக்கால் டீஸ்பூன்
 உருளைக்கிழங்கு - 2 (வேகவைத்து மசிக்கவும்)
 ஆம்சூர் பவுடர் (மாங்காய்த்தூள்) - அரை டீஸ்பூன்
 எண்ணெய், உப்பு - தேவையான அளவு

சிறுதானிய தீபாவளி!

செய்முறை:

பாத்திரத்தில் சோள மாவு, மைதா மாவு, சிறிதளவு உப்பு, ஓமம், ஒரு டீஸ்பூன் எண்ணெய் ஆகியவற்றைச் சேர்த்துக் கலந்து தண்ணீர் சேர்த்துப் பிசைந்துகொண்டு 10 நிமிடங்கள் மூடி வைக்கவும். வேகவைத்த உருளைக்கிழங்கை மசிக்கவும். வாணலியில் எண்ணெய்விட்டு சீரகம், பெருங்காயத்தூள், பச்சை மிளகாய் சேர்த்து வதக்கவும். அதில் மஞ்சள்தூள், மிளகாய்த்தூள், சிறிதளவு உப்பு, ஆம்சூர் பவுடர் சேர்த்துக் கிளறி, மசித்த உருளைக்கிழங்கைச் சேர்க்கவும். அனைத்தையும் சேர்த்துக் கிளறி இறக்கி ஆறவிடவும்.

மூடி வைத்த மாவை எடுத்து உருண்டைகளாக்கி வட்டமாகத் திரட்டி, அதனுள் உருளைக்கிழங்கு கலவையைச் சிறிய உருண்டை அளவு  வைத்து மூடி உருண்டை பிடித்து லேசாக அழுத்தி கச்சோரி வடிவில் செய்துகொள்ளவும். பணியாரக்கல்லை அடுப்பில் வைத்துச் சூடேறியதும் எண்ணெய்விட்டு ஒவ்வொரு குழியிலும் ஒவ்வொரு கச்சோரியை வைத்து மூடி, இருபுறமும் பொன்னிறமாக வேகவிட்டு எடுக்க, சுவையான சோளம் ஆலூ கச்சோரி தயார்.

சில்லி சாஸ் அல்லது தக்காளி சாஸ் உடன் பரிமாறவும்.

இந்தியாவில் அரிசி மற்றும் கோதுமைக்கு அடுத்து சோளம் முக்கியமாகப் பயன்படுத்தப்படுகிறது.

கம்பு காய்கறி கட்லெட்

தேவையனவை:

 கம்பு - அரை கப் (மசிய வேகவைக்கவும்)
 கேரட் - ஒன்று 
 கோஸ், பீன்ஸ், குடமிளகாய் - தலா கால் கப் (பொடியாக நறுக்கியது)
 மீல்மேக்கர் - ஒரு கப் (வெந்நீரில் ஊறவைக்கவும்)
 உருளைக்கிழங்கு - 2
 பெரிய வெங்காயம் - 2 (நறுக்கவும்)
 பச்சை மிளகாய் - 2 (பொடியாக நறுக்கவும்)
 நறுக்கிய கொத்தமல்லித்தழை - ஒரு கைப்பிடி அளவு
 புதினா இலைகள் - கால் கப்
 இஞ்சி - பூண்டு விழுது - முக்கால் டீஸ்பூன்
 கறி மசாலா - ஒரு டீஸ்பூன்
 பிரெட் ஸ்லைஸ் - 6
 கரம் மசாலாத்தூள் - கால் டீஸ்பூன்
 மிளகாய்த்தூள் - அரை டீஸ்பூன்
 மஞ்சள்தூள் - கால் டீஸ்பூன்
 எண்ணெய், உப்பு -   தேவையான அளவு

சிறுதானிய தீபாவளி!

செய்முறை:

வெங்காயம், புதினா இலைகளைப் பொடியாக நறுக்கிக்கொள்ளவும் ஊறவைத்த மீல்மேக்கரை மிக்ஸியில் அரைத்துக் கொள்ளவும். கேரட்டைத் துருவவும். உருளைக்கிழங்கை வேகவைத்து மசித்துக்கொள்ளவும். பின்பு அனைத்தையும் ஒன்றாகக் கலந்து, அதனுடன் காய்கறிக் கலவை, மசிய வேகவைத்த கம்பு, பச்சை மிளகாய் உப்பு, அரைத்த மீல்மேக்கர், கொத்தமல்லித்தழை, இஞ்சி - பூண்டு விழுது, கறி மசாலா, கரம் மசாலாத்தூள், மிளகாய்த்தூள், மஞ்சள்தூள் சேர்த்துப் பிசைந்துகொள்ளவும்

பிரெட்டின் ஓரப் பகுதிகளை நீக்கிவிட்டு நடுப்பகுதியை எடுத்துத் தண்ணீரில் தோய்த்து, இரண்டு கைகளாலும் அழுத்தி நீரைப் பிழியவும். பிறகு அந்த பிரெட்டையும் காய்கறிக் கலவையுடன் சேர்த்துப் பிசைந்துகொள்ளவும். கலவையை உருண்டையாக உருட்டி கட்லெட் அச்சில் வைத்துத் தட்டிவிட்டு ஓரத்தில் உள்ள மாவை எடுத்துவிடவும். பிறகு கட்லெட்டுகள் உடையாமல் அச்சில் இருந்து பிரித்து எடுக்கவும். இதைச் செய்யும்போது ஒரு வாழையிலை அல்லது பிளாஸ்டிக் பேப்பரை அச்சில் வைத்துச் செய்தால் எடுப்பதற்கு எளிதாக இருக்கும். 

தோசைக்கல்லைக் காயவைத்து, அதில் சிறிது எண்ணெய் தடவி, கட்லெட்டுகளைப் போட்டு எண்ணெய் ஊற்றி வெந்ததும் திருப்பிப்போட்டு வேகவிடவும். கட்லெட் கருகிவிடாமல் பார்த்துக்கொள்ளவும். இருபுறமும் லேசாகச் சிவக்க ஆரம்பித்ததும் எடுத்துவிடவும். இதைத் தக்காளி சாஸ் தொட்டுக்கொண்டு சாப்பிட மிகவும் சுவையாக இருக்கும்.

குறிப்பு:

தோசைக்கல்லில்  டோஸ்ட் செய்வதற்கு முன்பு கட்லெட்டை உடைத்த முட்டையில் நனைத்து பொறைத்தூள் அல்லது பிரெட் தூளில் புரட்டி வறுத்து எடுக்க, மேலும் சுவை கூடும்.

1700-ம் ஆண்டுவாக்கிலேயே உலகின் பல சமையல் முறைகளில் கட்லெட் இடம்பெற்றுள்ளது.

தினை ஜவ்வரிசி சாலட்

தேவையனவை:

 ஜவ்வரிசி - ஒரு கப்
 வறுத்து, வேகவைத்த தினை – அரை கப்
 வறுத்துப் பொடித்த வேர்க்கடலை - அரை கப்
 தோல் நீக்கிய வேர்க்கடலை - ஒரு டீஸ்பூன்
 பச்சை மிளகாய் - 2 (இரண்டாகக் கீறவும்)
 சர்க்கரை - ஒரு டீஸ்பூன்
 மிளகுத்தூள் - அரை டீஸ்பூன்
 எலுமிச்சைச் சாறு - ஒரு டீஸ்பூன்
 கொத்தமல்லித்தழை - ஒரு கைப்பிடி அளவு
 சீரகம் – அரை டீஸ்பூன்
 மிளகாய்த்தூள் – கால் டீஸ்பூன்
 எண்ணெய் (அ) நெய் ­ தேவையான அளவு
 உப்பு - சிறிதளவு

சிறுதானிய தீபாவளி!

செய்முறை:

ஜவ்வரிசியை 3 மணி நேரம் ஊறவைத்து, வடிகட்டி உலரவிடவும். வேகவைத்த தினையை  உலரவைத்து உதிர்க்கவும். வாணலியில் எண்ணெய் (அ) நெய்விட்டு, வறுத்த வேர்க்கடலை, சீரகம், பச்சை மிளகாய் தாளிக்கவும். அதனுடன் மிளகாய்த்தூள் சேர்த்து வதக்கவும். பிறகு தினை, ஜவ்வரிசி, உப்பு, வேர்க்கடலைப் பொடி சேர்த்துக் கலக்கவும். அதனுடன் சர்க்கரை, மிளகுத்தூள், எலுமிச்சைச் சாறு சேர்த்துக் கலக்கவும். ஜவ்வரிசி கண்ணாடிபோல் ஆனதும், இறக்கி கொத்தமல்லித்தழை சேர்த்துப் பரிமாறவும்.

குறிப்பு:

வேகவைத்த மக்காச்சோளம் சேர்க்கலாம். சுவை அதிகமாகும்.

தினைக்கதிர் நரி வாலைப் போலவே காட்சியளிப்பதால், தினையை ஆங்கிலத்தில் `பாக்ஸ்டைல் மில்லட்’ என்றழைக்கிறோம்.

முட்டை சோளம் மிளகு வறுவல்

தேவையனவை:

 முட்டை - 4
 சோளம் - அரை கப் (வேகவைத்தது)
 மஞ்சள்தூள் - அரை டீஸ்பூன்
 வெங்காயம் - 2 (பொடியாக நறுக்கவும்)
 பச்சை மிளகாய் - 2 (பொடியாக நறுக்கவும்)
 கறிவேப்பிலை - ஓர் ஆர்க்கு
 தக்காளி - ஒன்று (நறுக்கவும்)
 இஞ்சி - பூண்டு விழுது - கால் டீஸ்பூன்
 தனியாத்தூள் (மல்லித்தூள்) - ஒரு டீஸ்பூன்
 சீரகத்தூள் - அரை டீஸ்பூன்
 மிளகுத்தூள் - அரை டீஸ்பூன்
 எண்ணெய் -  4 டீஸ்பூன்
 உப்பு - ஒரு டீஸ்பூன்
 நறுக்கிய கொத்தமல்லித்தழை - சிறிதளவு

சிறுதானிய தீபாவளி!

செய்முறை:

முட்டைகளை வேகவைத்து உரித்து நீளவாக்கில் இரண்டாக நறுக்கி வைத்துக்கொள்ளவும். வாணலியில் எண்ணெய்விட்டு மஞ்சள்தூள், உப்பு, மிளகுத்தூள் சேர்த்து முட்டைகளைப் போட்டு இருபுறமும் பொன்னிறமாக வறுத்து எடுத்துக்கொள்ளவும். அதே வாணலியில் மீண்டும் எண்ணெய்விட்டு வெங்காயம், பச்சை மிளகாய், கறிவேப்பிலை சேர்த்து வதக்கி, தக்காளி சேர்த்து மேலும் வதக்கவும். அத்துடன் இஞ்சி - பூண்டு விழுது, மல்லித்தூள், சீரகத்தூள், சிறிதளவு மிளகுத்தூள், வேகவைத்த சோளம் சேர்த்துக் கலந்து, தண்ணீர் சேர்த்துக் கிளறி எண்ணெய்ப் பிரியும் வரை வதக்கவும். பின்பு அதில் முட்டைகளைச் சேர்த்துக் கலந்து, கொத்தமல்லித்தழை தூவி இறக்கிப் பரிமாறவும்.

அமெரிக்காவில் மற்ற தானியங்களைவிட சோளமே அதிக அளவு பயன்படுத்தப்படுகிறது.

சோளம் பொட்டேட்டோ டாஃபி

தேவையனவை:

 சோள மாவு - ஒரு கப்
 மைதா - அரை கப்
 ஓமம் - ஒரு டீஸ்பூன்
 உப்பு - சிறிதளவு
 எண்ணெய் - தேவையான அளவு

ஸ்டஃபிங் செய்யத் தேவையானவை:

 எண்ணெய் - 2 டீஸ்பூன்
 பச்சை மிளகாய் - 2 (பொடியாக நறுக்கவும்)
 உருளைக்கிழங்கு - 4 (வேகவைத்து மசிக்கவும்)
 ஓமம் - ஒரு டீஸ்பூன்
 கரம் மசாலாத்தூள் - ஒரு டீஸ்பூன்
 சாட் மசாலாத்தூள் - ஒரு டீஸ்பூன்
 கடலை மாவு - அரை கப்
 நறுக்கிய கொத்தமல்லித்தழை -
ஒரு கைப்பிடி அளவு
 உப்பு - சிறிதளவு

சிறுதானிய தீபாவளி!

செய்முறை:

பாத்திரத்தில் சோள மாவு, மைதா மாவு, ஓமம், உப்பு சேர்த்துக் கலந்து, சிறிதளவு எண்ணெய், தேவையான தண்ணீர் சேர்த்து, சப்பாத்தி மாவுப் பதத்துக்குப் பிசைந்துகொள்ளவும். காட்டன் துணியை நனைத்துப் பிழிந்து அதில் மாவை வைத்துச் சுற்றி 15 நிமிடங்கள் அப்படியே வைக்கவும்.

வாணலியில் எண்ணெய்விட்டு பச்சை மிளகாய் சேர்த்து வதக்கி, ஓமம், கரம் மசாலாத்தூள், சாட் மசாலாத்தூள், கடலை மாவு சேர்த்து நன்றாக வதக்கவும். மாவு சிவந்து வரும்போது உருளைக்கிழங்கைச் சேர்த்துக் கொத்தமல்லித்தழை, உப்பு சேர்த்துக் கிளறி இறக்கி ஆறவிட்டுச் சிறிய உருளைக்கிழங்கு வடிவில் பிடித்துவைக்கவும்.

சோள மாவை எடுத்துச் சிறிய சிறிய உருண்டைகளாக்கி, சப்பாத்திக்கல்லில் வைத்து நீளவாக்கில் திரட்டி, கத்தியால் நீளவாக்கில் மூன்று கோடுகள் போட்டு உருளைக்கிழங்கு ஸ்டஃப்பிங் உருண்டையை நடுவில் வைத்து மாவால் நீளவாக்கில் மூடி, சாக்லேட் போன்று முனைகளைத் திருகி, கோடுகள் போட்ட பகுதியில் ஸ்டஃபிங் வெளியே தெரியுமாறு மாவைச் சுருட்டிக்கொள்ள சோளம் - பொட்டேட்டோ டாஃபிகள் தயார். வாணலியில் எண்ணெயைக் காயவிட்டு ஒருமுறைக்கு நான்கு டாஃபிகளாகப் பொன்னிறமாகப் பொரித்து எடுத்துப் பரிமாறவும்.

புரதம், இரும்பு, கால்சியம், கொழுப்பு மற்றும் நார்ச்சத்துகள் சோளத்தில் அடங்கியுள்ளன.

சோள அவல் செஷ்வான் ஃப்ரைடு ரைஸ்

தேவையனவை:

 சோள அவல் - 2 கப்
 முட்டை - 2
 பெரிய வெங்காயம் - ஒன்று (பொடியாக நறுக்கவும்)
 இஞ்சி - பூண்டு விழுது - ஒரு டீஸ்பூன்
 பச்சை மிளகாய் - ஒன்று (பொடியாக நறுக்கவும்)
 புதினா இலை - 10
 வறுத்த முந்திரிப்பருப்பு - 6
 சோயா சாஸ் - ஒரு டீஸ்பூன்
 தக்காளி சாஸ் - ஒரு டீஸ்பூன்
 ரெட் சில்லி சாஸ்  - 2 டீஸ்பூன்
 மிளகுத்தூள் - ஒரு டீஸ்பூன்
 மிளகாய்த்தூள் - அரை டீஸ்பூன்
 நறுக்கிய கொத்தமல்லித்தழை - ஒரு கைப்பிடி அளவு
 நெய் - 2 டீஸ்பூன்
 உப்பு - தேவைக்கேற்ப

சிறுதானிய தீபாவளி!

செய்முறை:

சோள அவலை இரண்டு முறை நீரில் கழுவி, பெரிய துளைகள் உள்ள சில்வர் வடிகட்டியில் போட்டுத் தண்ணீர் உள்ள அகலமான பாத்திரத்தில் முக்கி 5 நிமிடங்கள் ஊறவைக்கவும். பிறகு நசுக்கிப்பார்த்து முழுவதும் ஊறியவுடன் எடுத்துத் தண்ணீரை இறுத்துக்கொள்ளவும். வெங்காயத்தை நீளவாக்கில் நறுக்கி வைத்துக்கொள்ளவும்.முட்டையை உடைத்து நன்றாகக் கலக்கிக்கொள்ளவும். வாணலியில் நெய் ஊற்றி, அடித்த முட்டையை ஊற்றி ஸ்க்ராம்பிள் செய்து அதில் புதினா இலை, நறுக்கிய வெங்காயம், பச்சை மிளகாய், முந்திரி சேர்த்துக் கிளறவும். இதனுடன் இஞ்சி - பூண்டு விழுது சேர்த்து பச்சை வாசனை போகும் வரை கிளறி மிளகாய்த்தூள், உப்பு, மிளகுத்தூள், சோயா சாஸ், தக்காளி சாஸ், ரெட் சில்லி சாஸ் சேர்த்துத் தீயை அதிகமாக வைத்துக் கிளறவும். அதனுடன் சோள அவல் சேர்த்து 2 நிமிடங்கள் கிளறவும். அதன் மேலாக கொத்தமல்லித்தழையைத் தூவிவிட்டுப் பரிமாறவும். அட்டகாசமான சுவையில் சோள அவல் செஷ்வான் ஃப்ரைடு ரைஸ் ரெடி.

குறிப்பு:

முந்திரியைத் தனியாக வறுத்தும் சேர்க்கலாம். சோள அவல் முழுவதும் ஊறியும் உதிர்ந்தும் இருக்க வேண்டும். ஈரப்பதம் குறைந்தால் சிறிதளவு தண்ணீர் தெளித்துக் கிளறலாம். ஃப்ரிட்ஜில் வைத்து எடுத்துச் சூடு செய்யும்போது சோள அவல் ஃப்ரைடு ரைஸில் தண்ணீர் தெளித்து நன்றாகக் குலுக்கிவிட்டுப் பின்பு சூடு செய்தால் வறட்சி ஆகாமல் மெத்தென்று இருக்கும். சோளம் அதிக நீரை உறிஞ்சக்கூடியது.

சிறு வெள்ளைச் சோளமே இந்தியாவின் இயற்கைச் சோளமாகும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism