Published:Updated:

கிச்சன் பேஸிக்ஸ்: பாரம்பர்ய காபி மிகச் சிறப்பு... மிக நல்லது!

கிச்சன் பேஸிக்ஸ்: பாரம்பர்ய காபி மிகச் சிறப்பு... மிக நல்லது!
பிரீமியம் ஸ்டோரி
News
கிச்சன் பேஸிக்ஸ்: பாரம்பர்ய காபி மிகச் சிறப்பு... மிக நல்லது!

விசாலாட்சி இளையபெருமாள்

காபி இல்லாமல் சில மனிதர்கள் எப்படித்தான் வாழ்கிறார்களோ? என்னால், நிச்சயம் முடியாது! - மார்த்தா குயின் (அமெரிக்க நடிகை)

கிச்சன் பேஸிக்ஸ்: பாரம்பர்ய காபி மிகச் சிறப்பு... மிக நல்லது!

ப்போது எத்தனையோ காபி வகைகள் பிரபலமாக இருந்தாலும், நம் முன்னோர் அருந்தியது கருப்பட்டி காபி, சுக்கு காபி, சுக்கு மல்லி காபி, கடுங்காபி போன்ற உடல்நலத்தைப் பேணிக் காக்கும் வகைகள்தாம்!

நாம் காபியில் சேர்க்கும் வெள்ளைச் சர்க்கரையில் சில ரசாயனங்கள் உள்ளதால், நமது உடலில் இன்சுலின் சுரப்பைப் பாதித்து, ரத்தச் சர்க்கரை அளவை அதிகரித்து, நீரிழிவை ஏற்படுத்தக்கூடும். நாட்டுச் சர்க்கரை, கருப்பட்டி, பனங்கற்கண்டு ஆகியவை ரசாயனம் கலக்காமல் செய்யப்படுகின்றன. இவை  உடலைச் சுறுசுறுப்பாக்கும். பெண்களுக்கு இடுப்பு எலும்புகள் மற்றும் கர்ப்பப்பையை வலுப்படுத்தும். நோய் எதிர்ப்பு சக்தியை மேம்படுத்தும். எலும்புகள், பற்களுக்கு உறுதியைத் தரும். செரிமானப் பிரச்னைகளைச் சீராக்கும்.

`கறுப்புத் தங்கம்’ எனும் கருப்பட்டி: பனைமரத்திலிருந்து கிடைக்கும் பனை நீரிலிருந்து கருப்பட்டி தயாரிக்கப்படுகிறது.  கருப்பட்டியில் மிகவும் பிரபலமான வகை உடன்குடி கருப்பட்டி. சுக்கு கருப்பட்டி, மூலிகைக் கருப்பட்டி என சுவையூட்டி சேர்க்கப்பட்ட கருப்பட்டி வகைகளும் உண்டு.

பனங்கற்கண்டு: சுத்தப்படுத்தப்பட்ட கருப்பட்டிப் படிகங்களாக உருவாகும் சர்க்கரையே ‘பனங்கற் கண்டு’.

நாட்டுச் சர்க்கரை: கரும்புச் சாறு பாகாகக் காய்ச்சப்பட்டு, குறிப்பிட்ட கொதிநிலை வரும்போது அதன் சத்துகளில் மாற்றம் ஏற்படுகிறது. அச்சு வெல்லம், உருண்டை வெல்லம் என்று மாற்றம் அடைந்த பின்னர் பிரவுன் நிறத்தில் கிடைக்கும் பொருளே நாட்டுச் சர்க்கரை.

சுக்குப்பொடி: உலர்ந்த இஞ்சிப் பொடிதான் இது.

கருப்பட்டி காபி

தேவை: ஃபில்டர் காபித்தூள் - 6 டீஸ்பூன், கருப்பட்டி – 2 டேபிள்ஸ்பூன் (துருவியது / தூளாக்கியது), தண்ணீர் – 3 கப், பால் – அரை கப் (விருப்பப்பட்டால்).

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
கிச்சன் பேஸிக்ஸ்: பாரம்பர்ய காபி மிகச் சிறப்பு... மிக நல்லது!
கிச்சன் பேஸிக்ஸ்: பாரம்பர்ய காபி மிகச் சிறப்பு... மிக நல்லது!

செய்முறை: ஒரு பாத்திரத்தில் மூன்று கப் தண்ணீரைச் சேர்த்து, அதனுடன் கருப்பட்டி சேர்த்துக் கொதிக்கவைக்கவும். நன்கு கொதித்தவுடன், ஃபில்டர் காபித்தூள் சேர்த்து மூடிவைத்து மேலும் 5 நிமிடங்கள் குறைவான தீயில் கொதிக்கவைக்க வேண்டும். பிறகு அடுப்பை அணைத்து, 5 நிமிடங்களுக்கு அதை அப்படியே வைக்க வேண்டும். காபித்தூள் அடியில் ஒதுங்கிவிடும். இதை ஒரு நைஸ் டீ வடிகட்டியில் வடிகட்ட வேண்டும். விருப்பப்பட்டால் அரை கப் பாலை தனியாகக் கொதிக்கவைத்து சேர்த்துக் கொள்ளலாம்.

திரிகடுகம் காபி
(மிளகு, சுக்கு, திப்பிலி இவை மூன்றும் சேர்த்து செய்யும் காபி)


தேவை: திரிகடுகம் பொடி – ஒரு டேபிள்ஸ்பூன், கருப்பட்டி – 2 டேபிள்ஸ்பூன் (துருவியது/தூளாக்கியது), ஃபில்டர் காபித்தூள் - 6 டீஸ்பூன், தண்ணீர் – 3 கப்.

திரிகடுகம் பொடிக்கு: மிளகு - 30 கிராம், சுக்கு - 50 கிராம், திப்பிலி - 5 கிராம்.

கிச்சன் பேஸிக்ஸ்: பாரம்பர்ய காபி மிகச் சிறப்பு... மிக நல்லது!
கிச்சன் பேஸிக்ஸ்: பாரம்பர்ய காபி மிகச் சிறப்பு... மிக நல்லது!

செய்முறை: மிளகு, சுக்கு, திப்பிலி ஆகியவற்றை வெயிலில்  உலரவைத்து நன்றாகப் பொடித்துக்கொள்ளவும். பின்னர், அதைக் காற்றுப்புகாத ஒரு டப்பாவில் சேகரித்து வைக்க வேண்டும். ஒரு பாத்திரத்தில் மூன்று கப் தண்ணீரைச் சேர்த்து, அதனுடன் கருப்பட்டி சேர்த்துக் கொதிக்கவைக்கவும். நன்கு கொதித்தவுடன், காபித்தூள் மற்றும் ஒரு டேபிள்ஸ்பூன் திரிகடுகம் பொடி சேர்த்து மூடிவைத்து, மேலும் 5 நிமிடங்கள் குறைவான தீயில் கொதிக்கவைக்க வேண்டும். பிறகு அடுப்பை அணைத்து, 5 நிமிடங்களுக்கு அதை அப்படியே வைக்க வேண்டும். காபித்தூள் அடியில் ஒதுங்கி, காபி தெளிந்த பின்னர் ஒரு நைஸ் டீ வடிக்கட்டியால் வடிகட்டி, சூடாகப் பருகவும்.

சுக்கு மல்லி காபி

தேவை: தண்ணீர் - ஒன்றேகால் கப், சுக்குப்பொடி - ஒரு டீஸ்பூன், ஃபில்டர் காபித்தூள் – 3 டீஸ்பூன், கருப்பட்டி - 2 டேபிள்ஸ்பூன் (விருப்பப்பட்டால்), பால் – அரை கப் (விருப்பப்பட்டால்).

சுக்குப்பொடிக்கு: சுக்குத்தூள் – கால் கப், மல்லி (தனியா) - 2 டேபிள்ஸ்பூன், சீரகம் - ஒரு டீஸ்பூன், மிளகு - ஒரு டீஸ்பூன்.

கிச்சன் பேஸிக்ஸ்: பாரம்பர்ய காபி மிகச் சிறப்பு... மிக நல்லது!
கிச்சன் பேஸிக்ஸ்: பாரம்பர்ய காபி மிகச் சிறப்பு... மிக நல்லது!

செய்முறை: சுக்குப்பொடி தயாரிக்கக் கொடுத்துள்ள பொருள்களை மிக்ஸியில் சேர்த்து பொடி செய்துகொள்ள வேண்டும். பிறகு, அதை காற்றுப்புகாத ஒரு டப்பாவில் சேகரித்து வைக்க வேண்டும். ஒரு பாத்திரத்தில் தண்ணீர் ஊற்றி அடுப்பில்வைத்து, கொதிக்க ஆரம்பித்ததும், அதில் சுக்குப்பொடி, ஃபில்டர் காபித்தூள் மற்றும் கருப்பட்டி (தேவைப்பட்டால்) சேர்த்து, 5 நிமிடங்கள் மிதமான தீயில் கொதிக்கவைக்கவும். பிறகு அடுப்பை அணைத்து, 5 நிமிடங்களுக்கு அதை அப்படியே வைக்க வேண்டும். காபித்தூள் அடியில் ஒதுங்கி, காபி தெளிந்த பின்னர், ஒரு நைஸ் டீ வடிகட்டியால் வடிகட்டி சூடாகப் பருகவும். விருப்பப்பட்டால், அரை கப் பாலை தனியாகக் கொதிக்கவைத்து சேர்த்துக்கொள்ளலாம்.

மூலிகை காபி

தேவை: தண்ணீர் – ஒன்றேகால் கப், மூலிகைப் பொடி - ஒரு டீஸ்பூன், ஃபில்டர் காபி தூள் – 3 டீஸ்பூன், கருப்பட்டி - 2 டேபிள்ஸ்பூன் (விருப்பப்பட்டால்).

மூலிகைப் பொடிக்கு: அதிமதுரம் – ஒரு துண்டு, மல்லி (தனியா) – 2 டீஸ்பூன், சீரகம் – அரை டீஸ்பூன், சோம்பு – கால் டீஸ்பூன், சுக்கு – ஒரு துண்டு, மிளகு – கால் டீஸ்பூன், திப்பிலி – 2 துண்டு, ஓமம் – கால் டீஸ்பூன், கிராம்பு – ஒன்று, ஏலக்காய் – ஒன்று.

செய்முறை: மூலிகைப் பொடிக்குக் கொடுத்துள்ள அனைத்துப் பொருள்களையும் வெயிலில் உலரவைத்து நன்றாகப் பொடித்துக்கொள்ளவும். பின்னர், அதை காற்றுப்புகாத ஒரு டப்பாவில் சேகரித்து வைக்க வேண்டும். ஒரு பாத்திரத்தில் மூன்று கப் தண்ணீரைச் சேர்த்து, அதனுடன் கருப்பட்டி சேர்ப்பதாக இருந்தால், சேர்த்துக் கொதிக்கவைக்கவும். நன்கு கொதித்தவுடன், காபித்தூள் மற்றும் மூலிகைப் பொடி சேர்த்து மூடிவைத்து, மேலும் 5 நிமிடங்கள் குறைவான தீயில் கொதிக்கவைக்க வேண்டும். பிறகு அடுப்பை அணைத்து, 5 நிமிடங்களுக்கு அதை அப்படியே வைக்க வேண்டும். காபித்தூள் அடியில் ஒதுங்கி, காபி தெளிந்தபின்னர், ஒரு நைஸ் டீ வடிகட்டியால் வடிகட்டி சூடாகப் பருகவும்.

அராபிக் காபி

அராபிக் க்ஹாவா எனப்படும் அராபிக் காபி, அரேபிய நாடுகளில் மிகப் பிரசித்திபெற்ற காபி ஆகும். இது எஸ்பிரஸ்ஸோ போலவே பிளாக் காபி வகையைச் சேர்ந்தது. இது சுவையூட்டியான ஏலக்காய், கிராம்பு, ரோஸ் வாட்டர், குங்குமப்பூ சேர்த்து செய்யப்படுகிறது. இதைச் செய்து அரேபிய பிளாஸ்கில் ஊற்றிவைத்து, மிகச் சிறிய கோப்பையில் பரிமாறுவார்கள். அளவு இரண்டு மடக்குதான் இருக்கும். ஆனால், காபியின் கசப்பு இருக்கும். அராபிக் க்ஹாவாவில் இனிப்பு சேர்க்கப்படுவது இல்லை. அதனுடன் பேரீச்சம்பழமோ, ஏதேனும் இனிப்புப் பண்டமோ வழங்கப்படும். காபித்தூள் அரைக்கும்போதே அத்துடன் ஏலக்காய், கிராம்பு சேர்த்து அரைத்துக்கொள்ளவும்.

அராபிக் க்ஹாவா

தேவை: தண்ணீர் – 3 கப், ரோஸ் வாட்டர் – ஒரு டீஸ்பூன், குங்குமப்பூ – ஒரு சிறு சிட்டிகை, அராபிக் க்ஹாவா பொடி – 3 டீஸ்பூன்.

அராபிக் க்ஹாவா பொடிக்கு: ஏலக்காய் – நான்கு, கிராம்பு – இரண்டு, காபி கொட்டை – அரை கப்.

பரிமாறுவதற்கு: பேரீச்சம்பழம் – 6-7

கிச்சன் பேஸிக்ஸ்: பாரம்பர்ய காபி மிகச் சிறப்பு... மிக நல்லது!
கிச்சன் பேஸிக்ஸ்: பாரம்பர்ய காபி மிகச் சிறப்பு... மிக நல்லது!

செய்முறை: அராபிக் க்ஹாவா பொடிக்குக் கொடுத்துள்ள அனைத்துப் பொருள்களையும் சேர்த்து காபித்தூள் போல கொரகொரப்பாகப் பொடித்துக்கொள்ளவும். பிறகு அதைக் காற்றுப்புகாத ஒரு டப்பாவில் சேகரித்து வைக்க வேண்டும். ஒரு பாத்திரத்தில் மூன்று கப் தண்ணீரைச் சேர்த்துக் கொதிக்கவைக்கவும். நன்கு கொதித்தவுடன், அராபிக் க்ஹாவா பொடி மற்றும் குங்குமப்பூ சேர்த்து மூடிவைத்து, மேலும் 5 நிமிடங்கள் குறைவான தீயில் கொதிக்கவைக்க வேண்டும். பிறகு அடுப்பை அணைத்து, 5 நிமிடங்களுக்கு அதை அப்படியே வைக்க வேண்டும். காபித்தூள் அடியில் ஒதுங்கி, காபி தெளிந்த பின்னர், ஒரு நைஸ் டீ வடிகட்டியால் வடிகட்டி, ரோஸ் வாட்டர் சேர்த்து, பேரீச்சம்பழத்துடன் சூடாகப் பருகவும்.

மேற்கூறிய காபி வகைகளில், கருப்பட்டிக்குப் பதிலாக பனங்கற்கண்டு, நாட்டுச் சர்க்கரையைப் பயன்படுத்தலாம். கருப்பட்டியின் வகையைப் பொறுத்து  அதன் இனிப்புத் தன்மை மாறுபடும். இதை அனுசரித்து கருப்பட்டியைக் கூடுதலாகவோ, குறைவாகவோ பயன்படுத்தலாம். பனங்கற்கண்டுக்கு இனிப்பு குறைவாக இருப்பதால், அரை டீஸ்பூன் முதல் ஒரு டீஸ்பூன் வரை அதிகமாகச் சேர்க்கலாம்.

படங்கள், வீடியோ : லக்ஷ்மி வெங்கடேஷ்