Published:Updated:

30 வகை நாஞ்சில் நாட்டு ஸ்பெஷல்

நாஞ்சில் நாட்டு ஸ்பெஷல்
பிரீமியம் ஸ்டோரி
நாஞ்சில் நாட்டு ஸ்பெஷல்

நாஞ்சில் நாடு போலவே தமிழகத்தின் ஒவ்வொரு பகுதிக்கும் தனித்துவமான உணவுப் பண்பாடு உண்டு.

30 வகை நாஞ்சில் நாட்டு ஸ்பெஷல்

நாஞ்சில் நாடு போலவே தமிழகத்தின் ஒவ்வொரு பகுதிக்கும் தனித்துவமான உணவுப் பண்பாடு உண்டு.

Published:Updated:
நாஞ்சில் நாட்டு ஸ்பெஷல்
பிரீமியம் ஸ்டோரி
நாஞ்சில் நாட்டு ஸ்பெஷல்
நாஞ்சில் நாட்டு ஸ்பெஷல்
நாஞ்சில் நாட்டு ஸ்பெஷல்
மாம்பழ காடி
மாம்பழ காடி

மாம்பழ காடி

தேவை: மாம்பழம் - 2, வெல்லம் - 200 கிராம், அரிசி மாவு - 2 டீஸ்பூன், தேங்காய்த் துருவல் - 2 டேபிள்ஸ்பூன், சுக்குத்தூள் - அரை டீஸ்பூன், ஏலக்காய்த்தூள் - அரை டீஸ்பூன்.

செய்முறை: மாம்பழத்தைக் கழுவி பெரிதாக நறுக்கிக்கொள்ளவும்.ஓர் அகலமான, கனமான கடாயில் நறுக்கிய மாம்பழம் மற்றும் அதன் கொட்டைகளையும் சேர்த்து ஒரு கப் தண்ணீர் ஊற்றி வேகவிடவும். ஒரு பாத்திரத்தில் தட்டிய வெல்லம், சிறிதளவு தண்ணீர் சேர்த்துக் கொதிக்கவிடவும். வெல்லம் நன்கு கரைந்ததும் ஒரு பாத்திரத்தில் வடிகட்டிக்கொள்ளவும். மாம்பழம் பாதி வெந்ததும் வடிகட்டிய வெல்லக் கரைசலையும் சேர்த்துக் கொதிக்க விடவும். மாம்பழத்துண்டுகள் வெல்லத்தோடு சேர்ந்து நன்கு வெந்ததும் ஏலக்காய்த்தூள், சுக்குத்தூள் சேர்த்துக் கலந்துகொள்ளவும். அரிசி மாவை சிறிதளவு தண்ணீர்விட்டுக் கரைத்துக்கொள்ளவும். பிறகு கொதிக்கும் காடியில் சேர்த்து சிறிது கெட்டியானதும் தேங்காய்த் துருவல் சேர்த்து இறக்கவும்.

ஒட்டுமொத்த விகடனுக்கும் ஒரே ஷார்ட்கட்!

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer
பலாக்கொட்டை உருண்டை
பலாக்கொட்டை உருண்டை

பலாக்கொட்டை உருண்டை

தேவை: பலாக்கொட்டை - 20, தேங்காய்த் துருவல் - ஒரு கப், பொடித்த வெல்லம் - அரை கப், ஏலக்காய் - 4, சுக்குத்தூள் - ஒரு டீஸ்பூன்.

செய்முறை: பலாக்கொட்டையின் தோலை உரித்துக்கொள்ளவும். பின்னர் ஒரு சிறிய குக்கரில் சேர்த்து சிறிதளவு தண்ணீர்விட்டு நான்கு முதல் ஆறு விசில் வரும் வரை வேகவைத்துக்கொள்ளவும். வேகவைத்த கொட்டைகளை ஒரு தட்டில் மாற்றி ஆறவிடவும். ஒரு வாணலியில் தேங்காய்த் துருவல் சேர்த்து லேசாக வறுத்துக்கொள்ளவும். பின்னர் ஒரு பெரிய மிக்ஸி ஜாரில் வேகவைத்த கொட்டைகளைச் சேர்த்து லேசாகப் பொடிக்கவும். பிறகு வறுத்த தேங்காய்த் துருவல், பொடித்த வெல்லம், ஏலக்காய், சுக்குத்தூள் சேர்த்து இடைவெளி விட்டு விட்டு ஒன்றாகச் சேரும் வரை அரைத்துக்கொள்ளவும். அரைத்த பலாக்கொட்டை கலவையை ஒரு தட்டில் மாற்றிக்கொள்ளவும். அதை சிறு சிறு உருண்டைகளாக உருட்டிக்கொள்ளவும்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

நேந்திரம்பழப் பாயசம்
நேந்திரம்பழப் பாயசம்

நேந்திரம்பழப் பாயசம்

தேவை: பழுத்த நேந்திரம்பழம் - 3, பாகு வெல்லம் - 250 கிராம், முதல் தேங்காய்ப்பால் - ஒரு கப், இரண்டாம் தேங்காய்ப்பால் - ஒன்றரை கப், ஏலக்காய்த்தூள் - அரை டீஸ்பூன், சுக்குத்தூள் - அரை டீஸ்பூன், பல்லு பல்லாக நறுக்கிய தேங்காய் - கால் கப், உடைத்த முந்திரிபருப்பு - 10, நெய் - 4 டேபிள்ஸ்பூன்.

செய்முறை: நேந்திரம்பழங்களைத் தோல் உரிக்கவும். ஒரு பாத்திரத்தில் சிறிதளவு தண்ணீர் ஊற்றி பழத்தைச் சேர்த்து 10 நிமிடங்கள் வேகவிடவும். பழங்கள் வெந்ததும் அதை ஒரு மிக்ஸி ஜாரில் நைஸாக அரைக்கவும். ஒரு பாத்திரத்தில் பாகு வெல்லம் சேர்த்து சிறிதளவு தண்ணீர் ஊற்றி, அடுப்பை மிதமான சூட்டில் வைக்கவும். வெல்லம் நன்கு கரைந்ததும் ஒரு பாத்திரத்தில் வடிகட்டிக் கொள்ளவும். ஒரு கனமான கடாயில் அரைத்த நேந்திரம்பழ விழுது, கரைத்த வெல்லத்தையும் சேர்த்து சிறிது நேரம் கொதிக்கவிடவும். பின்னர் இரண்டாம் தேங்காய்ப்பால் சேர்த்து, ஒரு டேபிள்ஸ்பூன் நெய்விட்டு, அடுப்பை மிதமான சூட்டில் வைத்து 10 நிமிடங்கள் சுண்டவிடவும். பிறகு ஏலக்காய்த்தூள், சுக்குத்தூள், 2 டேபிள்ஸ்பூன் நெய் சேர்த்துக் கலந்துகொள்ளவும். வாணலியில் ஒரு டேபிள்ஸ்பூன் நெய்விட்டு முந்திரியையும் நறுக்கிய தேங்காயையும் தனித்தனியாக வறுத்து பாயசத்தில் கலந்துகொள்ளவும். கடைசியாக முதல் (திக்கான) தேங்காய்ப்பால் சேர்த்துக் கலந்து இரண்டு நிமிடங்கள் வைத்து இறக்கவும்.

பலாப்பழ இனிப்பு தோசை
பலாப்பழ இனிப்பு தோசை

பலாப்பழ இனிப்பு தோசை

தேவை: பச்சரிசி - ஒரு கப், பலாப்பழச்சுளை - 10, தேங்காய்த் துருவல் - முக்கால் கப், வெல்லம் - அரை கப், ஏலக்காய் - 5, நெய் - தேவையான அளவு.

செய்முறை: பச்சரிசியைத் தண்ணீரில் இரண்டு முறை கழுவிக்கொள்ளவும். பின்னர் 2 கப் தண்ணீர் ஊற்றி இரண்டு மணி நேரம் ஊறவைக்கவும். பலாப்பழத்தின் கொட்டைகளை நீக்கி பொடியாக நறுக்கவும். வெல்லத்தைப் பொடித்துக்கொள்ளவும். ஒரு பெரிய மிக்ஸி ஜாரில் நறுக்கிய பலாப்பழத் துண்டுகளைச் சேர்த்து அரைத்துக்கொள்ளவும். பின்னர் அதோடு ஊறவைத்த அரிசி, சிறிதளவு தண்ணீர் சேர்த்து அரைக்கவும். அரிசி லேசாக அரைபட்டதும் ஏலக்காய், தேங்காய்த் துருவல், பொடித்த வெல்லம் சேர்த்து அரைத்துக்கொள்ளவும். அரைத்த மாவை ஒரு பாத்திரத்தில் மாற்றிக்கொள்ளவும். மாவு கெட்டியாக இருந்தால் சிறிதளவு தண்ணீர்விட்டு நன்கு கலந்துகொள்ளவும்.

ஓர் இரும்பு தோசைக்கல்லை மிதமான சூட்டில்வைத்து காய்ந்ததும் ஒன்றரை கரண்டி மாவைத் தோசை போல் ஊற்றிக்கொள்ளவும். தோசையைச் சுற்றி நெய்விட்டு கீழ்ப்பகுதி பொன்னிறமாக மாறியதும் திருப்பிப் போட்டு, நன்கு வெந்ததும் ஒரு தட்டில் மாற்றிக்கொள்ளவும். சூடான பலாப்பழ இனிப்பு தோசையை தேன்வைத்து பரிமாறவும்.

குறிப்பு: மாவில் வெல்லம் சேர்த்துள்ளதால் தோசையைக் குறைந்த சூட்டில் வேகவிடவும்.

பைனாப்பிள் புளிசேரி
பைனாப்பிள் புளிசேரி

பைனாப்பிள் புளிசேரி

தேவை: கடைந்த மோர் - 2 கப், அன்னாசிப்பழத் துண்டுகள் - ஒரு கப் (பொடியாக நறுக்கியது), வெந்தயம் - கால் டீஸ்பூன், கடுகு - அரை டீஸ்பூன், உளுந்து - அரை டீஸ்பூன், காய்ந்த மிளகாய் - ஒன்று, பெருங்காயத்தூள் - அரை டீஸ்பூன், எண்ணெய் - ஒரு டீஸ்பூன், கறிவேப்பிலை - சிறிதளவு, உப்பு - தேவையான அளவு.

அரைக்க: தேங்காய்த் துருவல் - 4 டேபிள்ஸ்பூன், சின்ன வெங்காயம் - 3 (தோலுரிக்கவும்), பூண்டு - 2 பல், பச்சை மிளகாய் - 3, பச்சரிசி (ஊறவைத்தது) - அரை டீஸ்பூன், மல்லி (தனியா) - 4, மஞ்சள்தூள் - அரை டீஸ்பூன், சீரகம் - அரை டீஸ்பூன்.

செய்முறை: ஒரு சிறிய மிக்ஸி ஜாரில் அரைக்கக்கொடுத்துள்ள பொருள்களைச் சேர்த்து சிறிதளவு தண்ணீர் ஊற்றி அரைத்துக்கொள்ளவும். ஒரு சிறிய பாத்திரத்தில் பொடியாக நறுக்கிய அன்னாசிப்பழத் துண்டுகளைச் சேர்த்து, அரை கப் தண்ணீர் ஊற்றி மிதமான தீயில் வேகவைத்துக்கொள்ளவும். ஒரு குழம்பு பாத்திரத்தில் கடைந்த மோர், உப்பு சேர்த்து நன்கு கலந்துகொள்ளவும். பின்னர் அரைத்த தேங்காய் விழுது, வேகவைத்த அன்னாசிப்பழத் துண்டுகள், பெருங்காயத்தூள் சேர்த்துக் கலந்துகொள்ளவும்.

இப்போது குழம்பைக் குறைந்த சூட்டில் வைத்து கொதிக்கவிடவும். குழம்பு நுரைக்கட்டி வரும்போது கிள்ளிய கறிவேப்பிலை சேர்த்து இறக்கவும். வாணலியில் எண்ணெய்விட்டு சூடானதும் அதில் வெந்தயம், கடுகு, உளுந்து, காய்ந்த மிளகாய் சேர்த்து தாளித்து புளிசேரியில் கலந்துகொள்ளவும்.

புளி மிளகாய்
புளி மிளகாய்

புளி மிளகாய்

தேவை: சின்ன வெங்காயம் - 20, பச்சை மிளகாய் - 10, புளி - சிறிய எலுமிச்சை அளவு, மஞ்சள்தூள் - அரை டீஸ்பூன், வெந்தயம் - அரை டீஸ்பூன், கடுகு - ஒரு டீஸ்பூன், உளுந்து - ஒரு டீஸ்பூன், பெருங்காயம் - சிறிய துண்டு, கறிவேப்பிலை - 20 இலைகள், வெல்லம் - சிறிய துண்டு, நல்லெண்ணெய் - 3 டேபிள்ஸ்பூன், உப்பு - தேவையான அளவு.

செய்முறை: புளியை அரை கப் சூடான நீரில் 15 நிமிடங்கள் ஊறவைத்து, பின்னர் ஒரு கப் தண்ணீர் ஊற்றிக் கரைத்துக்கொள்ளவும். சின்ன வெங்காயத்தைத் தோலுரித்து பொடியாக நறுக்கவும். பச்சை மிளகாயை நீளவாக்கில் கீறி, பிறகு பொடியாக அல்லது பாதியாக நறுக்கவும்.

வாணலியில் நல்லெண்ணெய்விட்டு சூடானதும் வெந்தயம் போட்டு சிவந்ததும் கடுகு, உளுந்து சேர்த்து தாளிக்கவும். பின்னர் பொடியாக நறுக்கிய சின்ன வெங்காயம், பச்சை மிளகாய், சிறிது உப்பு சேர்த்து நன்கு வதக்கவும். பச்சை மிளகாய் நன்றாக வதங்கி, நிறம் மாறியதும் புளிக்கரைசலைச் சேர்த்து நன்றாகக் கலந்து கொள்ளவும். அதில் உப்பு, மஞ்சள்தூள் சேர்த்து மிதமான தீயில் மூடி வைத்து கொதிக்கவிடவும். சிறிது கொதிவந்ததும் பெருங்காயத்துண்டு சேர்த்துக்கொள்ளவும். புளி மிளகாய் கெட்டியாகும்போது வெல்லம், கிள்ளிய கறிவேப்பிலை சேர்த்து எண்ணெய் மேலே மிதக்கும் வரை கொதித்ததும் இறக்கவும். இதை இட்லி, தோசை மற்றும் தயிர் சாதத்துடன் சாப்பிட்டால் மிகவும் சுவையாக இருக்கும்.

வாழைக்காய்த் துவட்டல்
வாழைக்காய்த் துவட்டல்

வாழைக்காய்த் துவட்டல்

தேவை: வாழைக்காய் - 2, மஞ்சள்தூள் - அரை டீஸ்பூன், மிளகாய்த்தூள் - அரை டீஸ்பூன், கடுகு - அரை டீஸ்பூன், உளுந்து - அரை டீஸ்பூன், கறிவேப்பிலை - 10 இலைகள், தேங்காய் எண்ணெய் - 3 டேபிள்ஸ்பூன், உப்பு - தேவையான அளவு. அரைக்க: தேங்காய்த் துருவல் - 4 டேபிள்ஸ்பூன், சின்ன வெங்காயம் - 2 (தோலுரிக்கவும்), பூண்டு - 3 பல், சீரகம் - அரை டீஸ்பூன், காய்ந்த மிளகாய் ‌‌- ஒன்று.

செய்முறை: வாழைக்காயைத் தோல் சீவி சிறு சிறு துண்டுகளாக நறுக்கிக்கொள்ளவும். அரைக்கக் கொடுத்துள்ள பொருள்களைத் தண்ணீர் விடாமல் கொரகொரப்பாக அரைத்துக்கொள்ளவும். ஒரு பாத்திரத்தில் 2 கப் தண்ணீர் ஊற்றி, கொதித்ததும் அதில் நறுக்கிய வாழைக்காய்த் துண்டுகள், மஞ்சள்தூள், உப்பு சேர்த்து வேகவைக்கவும். வாழைக்காய் பாதி வெந்ததும் தண்ணீரை முழுவதும் வடித்துக்கொள்ளவும்.

ஒரு இரும்பு வாணலியில் ஒரு டேபிள்ஸ்பூன் தேங்காய் எண்ணெய்விட்டு, சூடானதும் அதில் கடுகு, உளுந்து சேர்த்துத் தாளிக்கவும். பின்னர் கறிவேப்பிலை, மிளகாய்த்தூள், அரைத்த தேங்காய் விழுதைச் சேர்த்து வதக்கவும். பிறகு வேகவைத்த வாழைக்காயைச் சேர்த்து தேங்காய் விழுதோடு நன்கு புரட்டிக்கொள்ளவும். மீதமுள்ள தேங்காய் எண்ணெயைச் சுற்றிலும் ஊற்றி நன்கு முறுகலாகும் வரை வறுக்கவும். வாழைக்காய் நன்றாக முறுகியதும் இறக்கவும்.

புளிக்கறி
புளிக்கறி

புளிக்கறி

தேவை: முருங்கைக்காய் - 5 துண்டுகள், கத்திரிக்காய் - ஒன்று (நறுக்கவும்), புளி - சிறிய எலுமிச்சை அளவு, பெருங்காயம் - சிறிய துண்டு, வெந்தயம் - கால் டீஸ்பூன், கடுகு, உளுந்து - தலா அரை டீஸ்பூன், பொடியாக நறுக்கிய சின்ன வெங்காயம் - 2 டேபிள்ஸ்பூன், கறிவேப்பிலை - சிறிதளவு, எண்ணெய் - ஒரு டேபிள்ஸ்பூன், உப்பு - தேவையான அளவு. அரைக்க: தேங்காய்த் துருவல் - ஒரு கப், சின்ன வெங்காயம் - 5, மஞ்சள்தூள் - அரை டீஸ்பூன், காய்ந்த மிளகாய் - 6.

செய்முறை: தேங்காய்த் துருவல், மஞ்சள்தூள், சின்ன வெங்காயம், காய்ந்த மிளகாய் சேர்த்து தண்ணீர்விட்டு அரைத்துக்கொள்ளவும். ஒரு குழம்பு பாத்திரத்தில் சிறிதளவு தண்ணீர் ஊற்றி நறுக்கிய காய்கறிகளைச் சேர்த்து, அடுப்பை மிதமான தீயில் வைத்து வேகவிடவும். புளியைத் தண்ணீரில் 15 நிமிடங்கள் ஊறவைத்து அரை கப் தண்ணீர் ஊற்றிக் கெட்டியாகக் கரைத்துக் கொள்ளவும். புளிக்கரைசலோடு உப்பு, பெருங்காயத்துண்டு, அரைத்த தேங்காய் விழுதைச் சேர்த்து நன்கு கலந்துகொள்ளவும். காய்கறிகள் நன்கு வெந்ததும், கரைத்து வைத்துள்ள கலவையைச் சேர்த்து நன்கு கலந்துகொள்ளவும். குழம்பு லேசாகக் கொதித்து மேலே பொங்கி வந்ததும் கிள்ளிய கறிவேப்பிலை சேர்த்து இறக்கவும். வாணலியில் எண்ணெய்விட்டு சூடானதும் வெந்தயம் போட்டு சிவந்ததும் கடுகு, உளுந்து தாளித்து, பொடியாக நறுக்கிய சின்ன வெங்காயம் சேர்த்து நன்கு பொன்னிறமாக வதக்கி, சூடான குழம்பில் சேர்த்துக் கலந்துகொள்ளவும்.

சேனை வாழை எரிசேரி
சேனை வாழை எரிசேரி

சேனை வாழை எரிசேரி

தேவை: சேனைக்கிழங்கு - 200 கிராம், வாழைக்காய் - ஒன்று, தேங்காய்த் துருவல் - 2 டேபிள்ஸ்பூன், பொடித்த வெல்லம் - அரை டேபிள்ஸ்பூன், கடுகு - அரை டீஸ்பூன், உடைத்த கறுப்பு உளுந்து - ஒரு டீஸ்பூன், கறிவேப்பிலை - 15 இலைகள், தேங்காய் எண்ணெய் - 2 டேபிள்ஸ்பூன், உப்பு - தேவையான அளவு. அரைக்க: தேங்காய்த் துருவல் - ஒரு கப், சின்ன வெங்காயம் - 4 (தோலுரிக்கவும்), மிளகு - 2 டீஸ்பூன், சீரகம் - ஒரு டீஸ்பூன்.

செய்முறை: சேனைக்கிழங்கை மண்போக கழுவி தோல் சீவிக்கொள்ளவும். பின்னர் கன சதுரங்களாக நறுக்கவும். அதேபோல் வாழைக்காயையும் தோல் சீவி கன சதுரங்களாக நறுக்கவும். அகலமான பாத்திரத்தில் சேனைக்கிழங்கைச் சேர்த்து மூழ்கும் வரை தண்ணீர் ஊற்றி மிதமான தீயில் வேகவிடவும்.சேனைக்கிழங்கு பாதி வெந்ததும் நறுக்கிய வாழைக்காய்த் துண்டுகளைச் சேர்த்து கலந்து வேகவிடவும். ஒரு சிறிய மிக்ஸி ஜாரில் தேங்காய்த் துருவல், சின்ன வெங்காயம், மிளகு, சீரகம் சேர்த்து, சிறிதளவு தண்ணீர் ஊற்றி அரைத்துக்கொள்ளவும். காய்கறிகள் வெந்ததும் உப்பு, அரைத்த தேங்காய் விழுதைச் சேர்த்துக் கலந்து கொதிக்கவிடவும். பின்னர் பொடித்த வெல்லம் சேர்த்துக் கலந்து, கலவை நன்கு கொதித்து கெட்டியானதும் அடுப்பை அணைத்துவிடவும்.

வாணலியில் சிறிதளவு தேங்காய் எண்ணெய்விட்டு சூடானதும் தேங்காய்த் துருவல் சேர்த்து முறுகலாகும் வரை வறுத்து சூடான எரிசேரியோடு கலந்துகொள்ளவும். பிறகு அதே வாணலியில் மீதமுள்ள தேங்காய் எண்ணெய்விட்டு சூடானதும் கடுகு போட்டு வெடித்ததும் உடைத்த கறுப்பு உளுந்து சேர்த்து சிவந்ததும் கறிவேப்பிலை சேர்த்து எரிசேரியோடு கலந்து கொள்ளவும்.

முருங்கைக்காய் மாங்காய் அவியல்
முருங்கைக்காய் மாங்காய் அவியல்

முருங்கைக்காய் மாங்காய் அவியல்

தேவை: முருங்கைக்காய் - 2, மாங்காய் - கால் பங்கு, கடுகு - அரை டீஸ்பூன், உளுந்து - அரை டீஸ்பூன், கறிவேப்பிலை - 10 இலைகள், தேங்காய் எண்ணெய் - 2 டேபிள்ஸ்பூன், உப்பு - தேவையான அளவு. அரைக்க: தேங்காய்த் துருவல் - 5 டேபிள்ஸ்பூன், காய்ந்த மிளகாய் - 2, சின்ன வெங்காயம் - 4 (தோலுரிக்கவும்), மஞ்சள்தூள் - அரை டீஸ்பூன், சீரகம் - ஒரு டீஸ்பூன்.

செய்முறை: முருங்கைக்காயை 2 அங்குலத் துண்டுகளாக நறுக்கி, பிறகு பாதியாக நறுக்கிக்கொள்ளவும். மாங்காயை அதே அளவில் தோலோடு நறுக்கிக்கொள்ளவும். ஒரு சிறிய மிக்ஸி ஜாரில் அரைக்கக்கொடுத்துள்ள பொருள்களைச் சேர்த்து, சிறிதளவு தண்ணீர் ஊற்றி அரைத்துக்கொள்ளவும்.கனமான பாத்திரத்தில் நறுக்கிய முருங்கைக்காய்த் துண்டுகளைச் சேர்த்து அரை கப் தண்ணீர் ஊற்றி மூடி வைத்து வேகவிடவும். முருங்கைக்காய் பாதி வெந்ததும் நறுக்கிய மாங்காயைச் சேர்த்து வேகவிடவும். முருங்கைக்காயும் மாங்காயும் வெந்ததும் அதில் உப்பு, அரைத்த தேங்காய் விழுதைச் சேர்த்து நன்கு கலந்து மிதமான சூட்டில் வைத்து கொதிக்கவிடவும். அவியல் நன்கு பச்சை வாசனை போகும் வரை கொதித்ததும் ஒரு டேபிள்ஸ்பூன் தேங்காய் எண்ணெய் கலந்து இறக்கவும்.

வாணலியில் ஒரு டேபிள்ஸ்பூன் தேங்காய் எண்ணெய்விட்டு சூடானதும் அதில் கடுகு, உளுந்து சேர்த்து தாளிக்கவும். பின்னர் கறிவேப்பிலை சேர்த்து தாளித்து சூடான அவியலில் கலந்துகொள்ளவும்.

குறிப்பு: இந்த அவியலுக்கு முருங்கைக்காய் முற்றலாகவும் பிஞ்சாகவும் இல்லாமல் அளவான காயைத் தேர்ந்தெடுக்கவும். இதில் மாங்காய் சேர்ப்பதால் தயிர் அல்லது புளி சேர்க்க வேண்டாம்.

பாகற்காய் அவியல்
பாகற்காய் அவியல்

பாகற்காய் அவியல்

தேவை: பாகற்காய் - 3, சின்ன வெங்காயம் - 15, புளி - சிறிய எலுமிச்சை அளவு, கடுகு, உளுந்து - தலா அரை டீஸ்பூன், கறிவேப்பிலை - 10 இலைகள், தேங்காய் எண்ணெய் - 2 டேபிள்ஸ்பூன், உப்பு - தேவையான அளவு. அரைக்க: தேங்காய்த் துருவல் - கால் கப், சீரகம் - ஒரு டீஸ்பூன், சின்ன வெங்காயம் - 4 (தோலுரிக்கவும்), மஞ்சள்தூள் - அரை டீஸ்பூன், மிளகாய்த்தூள் - ஒரு டீஸ்பூன்.

செய்முறை: பாகற்காயைக் கழுவி நடுவில் இருக்கும் விதைகளை நீக்கி ஓர் அங்குலத் துண்டுகளாக நீளமாக நறுக்கவும். சின்ன வெங்காயத்தை நீளமாக நறுக்கவும். புளியைச் சூடான நீரில் ஊறவைத்து, பின்னர் ஒரு கப் தண்ணீர் ஊற்றிக் கரைத்துக்கொள்ளவும். அரைக்கக் கொடுத்துள்ள பொருள்களைச் சிறிதளவு தண்ணீர் ஊற்றி அரைத்துக்கொள்ளவும். கனமான கடாயில் ஒன்றரை டேபிள்ஸ்பூன் தேங்காய் எண்ணெய்விட்டு சூடானதும் சின்ன வெங்காயம் சேர்த்து வதக்கவும். வெங்காயம் லேசாக வதங்கியதும் பாகற்காயைச் சேர்த்து வதக்கவும். பாகற்காய் வதங்கி நிறம் மாறியதும் புளிக்கரைசலைச் சேர்த்துக் கலந்து மிதமான தீயில் வேகவிடவும். புளிக்கரைசலில் சிறிது நேரம் வெந்ததும், உப்பு, அரைத்த தேங்காய் விழுது சேர்த்துக் கலந்து ஐந்து நிமிடங்கள் பச்சை வாசனை போகும் வரை கொதிக்க வைத்து இறக்கவும். வாணலியில் மீதமுள்ள தேங்காய் எண்ணெயைச் சூடாக்கி அதில் கடுகு, உளுந்து சேர்த்து, வெடித்ததும் கறிவேப்பிலை சேர்த்து தாளித்து, சூடான அவியலில் கலந்துகொள்ளவும்.

கப்பா மசியல்
கப்பா மசியல்

கப்பா மசியல்

தேவை: மரவள்ளிக்கிழங்கு - 2, கடுகு - அரை டீஸ்பூன், உளுந்து - அரை டீஸ்பூன், கறிவேப்பிலை - 10 இலைகள், தேங்காய் எண்ணெய் - ஒரு டேபிள்ஸ்பூன். அரைக்க: தேங்காய்த் துருவல் - அரை கப், பச்சை மிளகாய் - 3, பூண்டு - 2 பல், உப்பு - தேவையான அளவு.

செய்முறை: மரவள்ளிக்கிழங்கைக் கழுவி, பின்னர் ஒரு கத்தியால் தோலை உரித்துக்கொள்ளவும். பிறகு பெரிய துண்டுகளாக நறுக்கிக்கொள்ளவும். நறுக்கிய துண்டுகளைத் தண்ணீரில் மூன்று முறை கழுவிக்கொள்ளவும். அகலமான பாத்திரத்தில் 5 கப் தண்ணீர் ஊற்றிக் கொதிக்கவிடவும். அதில் நறுக்கிய மரவள்ளிக்கிழங்கைச் சேர்த்து மூடி வைத்து வேகவிடவும்.

ஒரு சிறிய மிக்ஸி ஜாரில் தேங்காய்த் துருவல், பச்சை மிளகாய், பூண்டு, உப்பு சேர்த்து தண்ணீர் விடாமல் அரைத்துக்கொள்ளவும். மரவள்ளிக்கிழங்கு மென்மையாக வெந்ததும் தண்ணீரை முழுவதும் வடித்துக்கொள்ளவும். பின் ஒரு பாத்திரத்தில் மாற்றிக்கொள்ளவும். பிறகு வேகவைத்த கிழங்கோடு அரைத்த விழுதைச் சேர்த்துப் பிசைந்துகொள்ளவும். வாணலியில் தேங்காய் எண்ணெய்விட்டு சூடானதும் அதில் கடுகு, உளுந்து சேர்த்து தாளிக்கவும். பின் கலந்து வைத்துள்ள மரவள்ளிக்கிழங்கைச் சேர்த்து லேசாகக் கிளறி, கறிவேப்பிலை சேர்த்து இறக்கவும்.

சீமைச்சக்கை தொவரன்
சீமைச்சக்கை தொவரன்

சீமைச்சக்கை தொவரன்

தேவை: சீமைச்சக்கை (இதை கறிப்பலா, சீனிப்பலாக்காய் என்று கூறுவார்கள்) - ஒன்று, மஞ்சள்தூள் - அரை டீஸ்பூன், கடுகு - அரை டீஸ்பூன், உளுந்து - அரை டீஸ்பூன், கறிவேப்பிலை - 10 இலைகள், தேங்காய் எண்ணெய் - ஒரு டேபிள்ஸ்பூன், உப்பு - தேவையான அளவு. அரைக்க: தேங்காய்த் துருவல் - அரை கப், காய்ந்த மிளகாய் - ஒன்று, சின்ன வெங்காயம் - 2 (தோலுரிக்கவும்), பூண்டு - 3 பல், சீரகம் - கால் டீஸ்பூன், கறிவேப்பிலை - 3 இலைகள்.

செய்முறை: சீமைச்சக்கையின் தோலைச் சீவி, பாதியாக நறுக்கிக்கொள்ளவும். பின்னர் நடுவில் இருக்கும் வழவழப்பான பகுதிகளை எடுத்து, பிறகு கன சதுரங்களாக நறுக்கிக்கொள்ளவும். ஒரு சிறிய மிக்ஸி ஜாரில் அரைக்கக் கொடுத்துள்ள பொருள்களைச் சேர்த்து சிறிதளவு தண்ணீர் ஊற்றிக் கொரகொரப்பாக அரைத்துக்கொள்ளவும். ஒரு பாத்திரத்தில் நறுக்கிய சீமைச்சக்கை துண்டுகள், மஞ்சள்தூள், உப்பு சேர்த்து மூழ்கும் அளவுக்குத் தண்ணீர் ஊற்றி வேகவிடவும். நன்கு வெந்ததும் தண்ணீரை வடிகட்டிக்கொள்ளவும்.

வாணலியில் தேங்காய் எண்ணெய்விட்டு சூடானதும் கடுகு, உளுந்து சேர்த்து தாளிக்கவும். பின்னர் கறிவேப்பிலை, வேகவைத்த சீமைச்சக்கை துண்டுகளைச் சேர்த்து வதக்கவும். பிறகு அரைத்த தேங்காய் விழுது சேர்த்து நன்கு கலந்து புரட்டி பச்சை வாசனை போகும் வரை வதக்கி இறக்கவும்.

மரவள்ளிக்கிழங்குக் கூட்டு
மரவள்ளிக்கிழங்குக் கூட்டு

மரவள்ளிக்கிழங்குக் கூட்டு

தேவை: மரவள்ளிக்கிழங்கு - 2 (நடுத்தரமான அளவு), கடுகு - அரை டீஸ்பூன், உளுந்து - அரை டீஸ்பூன், கறிவேப்பிலை - சிறிதளவு, அரிசி மாவு - ஒரு டீஸ்பூன், உப்பு - தேவையான அளவு, எண்ணெய் - ஒரு டீஸ்பூன்.அரைக்க: தேங்காய்த் துருவல் - 5 டேபிள்ஸ்பூன், சின்ன வெங்காயம் - 3 (தோலுரிக்கவும்), சீரகம் - ஒரு டீஸ்பூன், மஞ்சள்தூள் - அரை டீஸ்பூன், மிளகாய்த்தூள் - அரை டீஸ்பூன்.

செய்முறை: மரவள்ளிக்கிழங்கை நன்கு கழுவி ஒரு கத்தியால் நடுவில் லேசாகக் கீறி, தோலை உரித்துக்கொள்ளவும். பிறகு பொடியாக நறுக்கிக்கொள்ளவும். நறுக்கிய கிழங்குத் துண்டுகளை மீண்டும் இரண்டு அல்லது மூன்று முறை கழுவிக்கொள்ளவும். ஒரு பாத்திரத்தில் ஒரு கப் தண்ணீர் ஊற்றிக் கொதிக்கவிடவும். தண்ணீர் நன்கு கொதித்ததும் நறுக்கிய மரவள்ளிக்கிழங்குத் துண்டுகளைச் சேர்த்து 10 நிமிடங்கள் மூடிவைத்து வேகவிடவும். ஒரு சிறிய மிக்ஸி ஜாரில் அரைக்கக்கொடுத்துள்ள பொருள்களைச் சேர்த்து சிறிதளவு தண்ணீர் ஊற்றி நைஸாக அரைத்துக்கொள்ளவும்.

மரவள்ளிக்கிழங்கு நன்கு மென்மையாக வெந்ததும் உப்பு சேர்த்து நன்கு கலந்து கொள்ளவும். பின்னர் அரைத்த தேங்காய் விழுதைச் சேர்த்துக் கலந்துகொள்ளவும். கூட்டு நன்கு கொதித்ததும் அரிசி மாவைத் தூவி நன்கு கலந்து சிறிது கெட்டியானதும் இறக்கவும். வாணலியில் எண்ணெய்விட்டு கடுகு, உளுந்து சேர்த்து தாளிக்கவும். பிறகு கறிவேப்பிலை சேர்த்துப் பொரிந்ததும் கூட்டில் கலந்துகொள்ளவும்.

சீமைச்சக்கைத் தீயல்
சீமைச்சக்கைத் தீயல்

சீமைச்சக்கைத் தீயல்

தேவை: சீமைச்சக்கை - பாதியளவு, சின்ன வெங்காயம் - 8, புளி - சிறிய எலுமிச்சை அளவு உருண்டை, கடுகு - அரை டீஸ்பூன், உளுந்து - அரை டீஸ்பூன், கறிவேப்பிலை - சிறிதளவு, வெந்தயம் - கால் டீஸ்பூன், தேங்காய் எண்ணெய் - 2 டேபிள்ஸ்பூன், உப்பு - தேவையான அளவு. வறுத்து அரைக்க: தேங்காய்த் துருவல் - முக்கால் கப், காய்ந்த மிளகாய் - 6, மல்லி (தனியா) - 2 டேபிள்ஸ்பூன், கறிவேப்பிலை - 15 இலைகள்.

செய்முறை: புளியை அரை கப் இளம் சூடான நீரில் 15 நிமிடங்கள் ஊறவைத்து, 2 கப் தண்ணீர் ஊற்றிக் கரைத்துக்கொள்ளவும். சீமைச்சக்கையின் தோலைச்சீவி கனமான துண்டுகளாக நறுக்கிக்கொள்ளவும். சின்ன வெங்காயத்தைத் தோலுரித்துக்கொள்ளவும். வாணலியில் ஒரு டீஸ்பூன் தேங்காய் எண்ணெய்விட்டு சூடானதும் அதில் மல்லியைச் சேர்த்து சிறிது வறுக்கவும். பின்னர் காய்ந்த மிளகாய், கறிவேப்பிலை சேர்த்து வறுக்கவும். அதோடு தேங்காய்த் துருவல் சேர்த்து நன்கு கைவிடாமல் வறுக்கவும். தேங்காய் நன்கு தண்ணீர் பதம் இல்லாமல் முறுகலாகும் வரை வறுக்கவும். பின்னர் ஒரு சிறிய மிக்ஸி ஜாரில் சிறிதளவு தண்ணீர் ஊற்றி வறுத்தவற்றைச் சேர்த்து நைஸாக அரைத்துக்கொள்ளவும்.

வாணலியில் ஒன்றரை டேபிள்ஸ்பூன் தேங்காய் எண்ணெய்விட்டு சூடானதும் அதில் வெந்தயம் போட்டு சிவந்ததும் சின்ன வெங்காயத்தைச் சேர்த்து வதக்கவும். இதனுடன் நறுக்கிய சீமைச்சக்கைத் துண்டுகளைச் சேர்த்து வதக்கவும். அவை லேசாக வதங்கியதும் புளிக்கரைசலைச் சேர்த்துக் கலந்து, உப்பு சேர்த்து மூடிவைத்து வேகவிடவும். சீமைச்சக்கை வெந்ததும் அரைத்த தேங்காய் விழுதைச் சேர்த்து மேலும் ஒரு கப் தண்ணீர் ஊற்றி நன்கு கலந்து, அடுப்பை மிதமான தீயில் வைத்து கொதிக்கவிடவும். குழம்பின் மேலே எண்ணெய் பிரிந்து வரும் வரை கொதிக்கவைத்து இறக்கவும். வாணலியில் சிறிதளவு தேங்காய் எண்ணெய்விட்டு சூடானதும் அதில் கடுகு, உளுந்து சேர்த்து தாளிக்கவும். பிறகு கறிவேப்பிலை சேர்த்து சூடான தீயலில் கலந்து மூடிவைக்கவும்.

நாஞ்சில் சாம்பார்
நாஞ்சில் சாம்பார்

நாஞ்சில் சாம்பார்

தேவை: துவரம்பருப்பு - அரை கப், சின்ன வெங்காயம் - 10, பச்சை மிளகாய் - 2 (கீறவும்), முருங்கைக்காய், கத்திரிக்காய், கேரட், உருளைக்கிழங்கு - தலா ஒன்று, வெண்டைக்காய் - 4, பூசணிக்காய் - சிறிய துண்டு, மாங்காய் - 4 சிறிய துண்டு, புளி - சிறிய எலுமிச்சை அளவு, பெருங்காயம் - சிறிய துண்டு, வெந்தயம் - கால் டீஸ்பூன், கடுகு, உளுந்து - தலா அரை டீஸ்பூன், காய்ந்த மிளகாய் - ஒன்று, எண்ணெய் - ஒரு டேபிள்ஸ்பூன், மஞ்சள் தூள், கறிவேப்பிலை, கொத்தமல்லி - சிறிதளவு, உப்பு - தேவையான அளவு. சாம்பார் பொடிக்கு: காய்ந்த மிளகாய் - 7, மல்லி (தனியா) - ஒன்றரை டேபிள்ஸ்பூன், சீரகம் - ஒரு டீஸ்பூன், வெந்தயம் - அரை டீஸ்பூன்.

செய்முறை: துவரம்பருப்பைக் கழுவி குக்கரில் சேர்த்து, தேவையான அளவு தண்ணீர் ஊற்றி 8 விசில் வரும் வரை வேகவைத்துக்கொள்ளவும். புளியை ஒரு கப் தண்ணீரில் ஊறவைத்து, 2 கப் தண்ணீர் ஊற்றிக் கரைத்துக்கொள்ளவும். வாணலியை லேசாக சூடாக்கி மல்லியைச் சேர்த்து வாசனை வரும் வரை வறுக்கவும். மல்லி நிறம் மாறும்போது சீரகம், வெந்தயம் சேர்த்து வறுத்துக்கொள்ளவும். பின்னர் காய்ந்த மிளகாய் சேர்த்து லேசாக வறுக்கவும். பிறகு மிக்ஸி ஜாரில் சேர்த்து நைஸாகப் பொடித்துக்கொள்ளவும். சாம்பார் பொடி தயார்.அகலமான கடாயில் நறுக்கிய முருங்கைக்காய், கத்திரிக்காய், உருளைக்கிழங்கு சேர்த்து மூழ்கும்வரை தண்ணீர் ஊற்றி மூடி வைத்து வேகவிடவும். மற்றொரு வாணலியில் சிறிதளவு எண்ணெய்விட்டு சூடானதும் வெந்தயம், சின்ன வெங்காயம், பச்சை மிளகாய், நறுக்கிய கேரட், வெண்டைக்காய் சேர்த்து வதக்கவும். முருங்கைக்காய், கத்திரிக்காய் பாதி வெந்ததும் வதக்கிய பொருள்களைச் சேர்த்து வேகவிடவும். காய்கறிகள் வெந்ததும் நறுக்கிய பூசணிக்காய், மாங்காய், புளிக்கரைசல், மஞ்சள்தூள், அரைத்த சாம்பார் பொடி, உப்பு சேர்த்துக் கலந்து மூடிவைத்து கொதிக்கவிடவும். பிறகு பெருங்காயம், வேகவைத்த துவரம்பருப்பு சேர்த்து, மேலும் ஒரு கப் தண்ணீர் ஊற்றிக் கலந்து, அடுப்பை மிதமான சூட்டில் வைத்து ஏழு நிமிடங்கள் கொதிக்கவிடவும். சாம்பார் நன்கு கொதித்ததும் கிள்ளிய கறிவேப்பிலை, கொத்தமல்லி தூவி இறக்கவும். வாணலியில் சிறிது எண்ணெய்விட்டு சூடானதும் கடுகு, உளுந்து, காய்ந்த மிளகாய் சேர்த்து தாளித்து சாம்பாரில் கலந்து மூடிவைக்கவும்.

நார்த்தங்காய்ப் பச்சடி
நார்த்தங்காய்ப் பச்சடி

நார்த்தங்காய்ப் பச்சடி

தேவை: நார்த்தங்காய் - 3 (பழுத்தது), சின்ன வெங்காயம் - 20 (பொடியாக நறுக்கவும்), பச்சை மிளகாய் - 2 (பொடியாக நறுக்கவும்), மிளகாய்த்தூள் - 4 டீஸ்பூன், மஞ்சள்தூள் - ஒரு டீஸ்பூன், மல்லித்தூள் (தனியாத்தூள்) - 2 டீஸ்பூன், புளி - பெரிய எலுமிச்சை அளவு உருண்டை, பொடித்த வெல்லம் - 3 டேபிள்ஸ்பூன், பெருங்காயத்தூள் - ஒரு டீஸ்பூன், கடுகு, உளுந்து - தலா அரை டீஸ்பூன், கறிவேப்பிலை - சிறிதளவு, நல்லெண்ணெய் - 5 டேபிள்ஸ்பூன், உப்பு - தேவையான அளவு.

செய்முறை: நார்த்தங்காயைக் கழுவிப் பொடியாக நறுக்கவும். புளியை அரை கப் சூடான நீரில் 20 நிமிடங்கள் ஊறவைக்கவும். பின்னர் ஒரு கப் தண்ணீர் ஊற்றிக் கரைத்துக்கொள்ளவும். கனமான கடாயில் நல்லெண்ணெய்விட்டு சூடானதும் கடுகு, உளுந்து சேர்த்து தாளிக்கவும். பிறகு, நறுக்கிய பச்சை மிளகாய், சின்ன வெங்காயம் சேர்த்து வதக்கவும். சின்ன வெங்காயம் பொன்னிறமாக மாறியதும் பொடியாக நறுக்கிய நார்த்தங்காயைச் சேர்த்து கைவிடாமல் வதக்கவும். நார்த்தங்காய் நன்கு வதங்கி நிறம் மாறியதும் மஞ்சள்தூள், மிளகாய்த்தூள், மல்லித்தூள் சேர்த்து வதக்கவும். இதனுடன் புளிக்கரைசல், உப்பு சேர்த்துக் கலந்துகொள்ளவும். அடுப்பை மிதமான தீயில் வைத்து வேகவிடவும். பச்சடி கொதிக்க ஆரம்பித்ததும் பொடித்த வெல்லம் சேர்த்துக் கலந்துகொள்ளவும். பச்சடி கெட்டியானதும் பெருங்காயத்தூள், கிள்ளிய கறிவேப்பிலை சேர்த்து லேசாகக் கொதித்ததும் இறக்கவும்.

பப்படம் தொவரன்
பப்படம் தொவரன்

பப்படம் தொவரன்

தேவை: பப்படம் - 5, சின்ன வெங்காயம் - 7 (பொடியாக நறுக்கவும்), கடுகு - அரை டீஸ்பூன், உளுந்து - அரை டீஸ்பூன், கறிவேப்பிலை - 10 இலைகள், மிளகாய்த்தூள் - அரை டீஸ்பூன், உப்பு - சிறிதளவு, தேங்காய் எண்ணெய் - தேவையான அளவு. அரைக்க: தேங்காய்த் துருவல் - 3 டேபிள்ஸ்பூன், காய்ந்த மிளகாய் - ஒன்று, மஞ்சள்தூள் - அரை டீஸ்பூன், சீரகம் - கால் டீஸ்பூன், கறிவேப்பிலை - 4 இலைகள்.

செய்முறை: முதலில் பப்படங்களை ஒரு கத்தரிக்கோல் வைத்து சிறிது சிறிதாக நறுக்கிக்கொள்ளவும். வாணலியில் தேங்காய் எண்ணெய்விட்டு சூடானதும் அதில் நறுக்கிய பப்படங்களைச் சேர்த்துப் பொரித்துக்கொள்ளவும். ஒரு சிறிய மிக்ஸி ஜாரில் அரைக்கக்கொடுத்துள்ள பொருள்களைத் தண்ணீர் விடாமல் கொரகொரப்பாக அரைத்துக்கொள்ளவும். வாணலியில் சிறிதளவு தேங்காய் எண்ணெய்விட்டு சூடானதும் அதில் கடுகு, உளுந்து சேர்த்து தாளிக்கவும். பின்னர் பொடியாக நறுக்கிய சின்ன வெங்காயம், கறிவேப்பிலை சேர்த்து வதக்கவும். வெங்காயம் வதங்கியதும் அதில் சிறிதளவு உப்பும் மிளகாய்த்தூளும் சேர்த்து லேசாக வதக்கி அரைத்த தேங்காய் விழுதைச் சேர்த்து கைவிடாமல் வதக்கவும். பிறகு பொரித்த பப்படங்களைச் சேர்த்து நன்கு கலந்துகொள்ளவும். கரண்டியால் லேசாக பப்படங்களை உடைத்துக்கொள்ளவும். பப்படங்கள் தேங்காய் விழுதோடு நன்கு கலந்ததும் இறக்கவும்.

பூவரசன் இலை கொழுக்கட்டை
பூவரசன் இலை கொழுக்கட்டை

பூவரசன் இலை கொழுக்கட்டை

தேவை: பூவரசன் இலை - 20, இடியாப்ப மாவு - ஓர் ஆழாக்கு, பாசிப்பருப்பு - 100 கிராம், துருவிய வெல்லம் - 150 கிராம், தேங்காய்த் துருவல் - ஒரு கப், வறுத்த கறுப்பு எள் - ஒரு டேபிள்ஸ்பூன், நெய் - ஒரு டேபிள்ஸ்பூன், நல்லெண்ணெய் - ஒரு டீஸ்பூன்.

செய்முறை: வாணலியை லேசாக சூடாக்கி அதில் பாசிப்பருப்பைச் சேர்த்து லேசாக வறுத்துக்கொள்ளவும். பிறகு குக்கரில் முக்கால் கப் தண்ணீர் ஊற்றி இரண்டு விசில் வரும் வரை வேகவைத்துக்கொள்ளவும். பின்னர் ஒரு கரண்டியால் லேசாக மசித்துக்கொள்ளவும். ஒரு கனமான கடாயில் நெய்விட்டு சூடானதும் அதில் தேங்காய்த் துருவல் சேர்த்து வறுக்கவும். தேங்காய் பொன்னிறமாக மாறியதும் துருவிய வெல்லத்தைச் சேர்த்துக் கலந்து, அதோடு அரை கப் தண்ணீர் ஊற்றிக் கொதிக்கவிடவும். வெல்லம் கரைந்து கெட்டியாக ஆனதும் வேகவைத்து மசித்த பாசிப்பருப்பைச் சேர்த்து வதக்கவும். பருப்புக் கலவை நன்கு உருண்டு, கடாயில் ஒட்டாமல் வரும்போது வறுத்த கறுப்பு எள்ளைச் சேர்த்து அடுப்பை அணைத்துவிடவும்.

அகலமான பாத்திரத்தில் இடியாப்ப மாவை இளம் சூடான நீர், நல்லெண்ணெய் ஊற்றிப் பிசைந்துகொள்ளவும். பூவரசு இலைகளை ஈரத்துணியால் துடைத்துக்கொள்ளவும். பிசைந்த அரிசி மாவில் சிறிய எலுமிச்சை அளவு உருண்டையை இலையின் மேல் வைத்து வட்டமாகத் தட்டி அதில் ஒரு டீஸ்பூன் பாசிப்பருப்பு பூரணத்தை வைத்து சோமாஸ் போல் நீளமாக மடித்து வைக்கவும். பின்னர் இட்லிப் பாத்திரத்தில் மடித்த பூவரசு இலைகளை அடுக்கி வைத்து ஏழு நிமிடங்கள் ஆவியில் வேகவைத்து எடுக்கவும். கொழுக்கட்டைகளைப் பரிமாறும் வரை இலைகளில் இருந்து பிரிக்க வேண்டாம்.

பச்சைச் சுண்டைக்காய் அவியல்
பச்சைச் சுண்டைக்காய் அவியல்

பச்சைச் சுண்டைக்காய் அவியல்

தேவை: பச்சைச் சுண்டைக்காய் - 250 கிராம், சின்ன வெங்காயம் - 15, புளி - சிறிய உருண்டை, கடுகு - அரை டீஸ்பூன், உளுந்து - அரை டீஸ்பூன், தேங்காய் எண்ணெய் - 2 டேபிள்ஸ்பூன், கறிவேப்பிலை - சிறிதளவு, உப்பு - தேவையான அளவு. அரைக்க: தேங்காய்த் துருவல் - அரை கப், சின்ன வெங்காயம் - 3 (தோலுரிக்கவும்), பச்சை மிளகாய் - 2, சீரகம் - அரை டீஸ்பூன், மஞ்சள்தூள் - அரை டீஸ்பூன்.

செய்முறை: பச்சைச் சுண்டைக்காயின் காம்புகளை நீக்கி நன்கு கழுவிக்கொள்ளவும். பின்னர் ஒரு குழவிக்கல்லை வைத்து தட்டிக்கொள்ளவும். சின்ன வெங்காயத்தைப் பொடியாக நறுக்கிக்கொள்ளவும். புளியைச் சிறிதளவு தண்ணீர் ஊற்றி ஊறவைத்து கெட்டியாகக் கரைத்துக்கொள்ளவும். ஒரு சிறிய மிக்ஸி ஜாரில் தேங்காய்த் துருவல், சின்ன வெங்காயம், பச்சை மிளகாய், சீரகம், மஞ்சள்தூள் சேர்த்து, சிறிதளவு தண்ணீர் ஊற்றி அரைத்துக்கொள்ளவும்.

ஒரு கனமான கடாயில் தேங்காய் எண்ணெய்விட்டு சூடானதும் அதில் பொடியாக நறுக்கிய வெங்காயம், தட்டிய சுண்டைக்காய் சேர்த்து வதக்கவும்.சுண்டைக்காய் நன்கு வதங்கி நிறம் மாறியதும் ஒரு கப் தண்ணீர் ஊற்றிக் கலந்து மூடிவைத்து வேகவிடவும். சுண்டைக்காய் நன்கு வெந்ததும் புளிக்கரைசல் சேர்த்து மேலும் சில நிமிடங்கள் வேகவைத்துக்கொள்ளவும். பிறகு அரைத்த தேங்காய் விழுது, உப்பு சேர்த்துக் கலந்து, அடுப்பை மிதமான தீயில் வைத்து பச்சை வாசனை போகும் வரை கொதிக்கவைத்து இறக்கவும். வாணலியில் சிறிதளவு தேங்காய் எண்ணெய்விட்டு சூடானதும் கடுகு, உளுந்து சேர்த்து வெடித்ததும் கறிவேப்பிலை சேர்த்து, சூடான அவியலில் கலந்து மூடி வைக்கவும்.

அவல் வரட்டல்
அவல் வரட்டல்

அவல் வரட்டல்

தேவை: அவல் - 200 கிராம், பாகு வெல்லம் - 100 கிராம், தேங்காய்த் துருவல் - ஒரு கப், கறுப்பு எள் - ஒரு டேபிள்ஸ்பூன், பொட்டுக்கடலை - 2 டேபிள்ஸ்பூன், முந்திரி - 7, நெய் - ஒரு டேபிள்ஸ்பூன்.

செய்முறை: ஒரு கனமான வாணலியில் கறுப்பு எள்ளைச் சேர்த்து நன்கு வெடிக்கும் வரை வறுக்கவும். பின்னர் ஒரு கிண்ணத்தில் மாற்றிக்கொள்ளவும். அதே வாணலியில் நெய்விட்டு சூடானதும் அதில் உடைத்த முந்திரியைச் சேர்த்து பொன்னிறமாக வறுக்கவும். பிறகு தேங்காய்த் துருவல் சேர்த்து, கைவிடாமல் வறுக்கவும். இதனுடன் பொடித்த வெல்லம் சேர்த்து அரை கப் தண்ணீர் ஊற்றிக் கொதிக்கவிடவும். தேங்காயும் வெல்லமும் நன்கு சேர்ந்து திரண்டு, வாணலியில் ஒட்டாமல் வரும்போது பொட்டுக்கடலை சேர்த்துக் கலக்கவும். பின் அவலைச் சேர்த்து கைவிடாமல் கிளறவும். அவல் நன்கு வெல்லத்தோடு கலந்ததும், வறுத்த கறுப்பு எள்ளைச் சேர்த்துக் கலந்து பரிமாறும் பாத்திரத்தில் மாற்றவும்.

மலபார் வெள்ளரிக்காய் தயிர்ப்பச்சடி
மலபார் வெள்ளரிக்காய் தயிர்ப்பச்சடி

மலபார் வெள்ளரிக்காய் தயிர்ப்பச்சடி

தேவை: மலபார் வெள்ளரிக்காய் - ஒன்று (சிறியது), கெட்டித் தயிர் - 2 கப், கடுகு - அரை டீஸ்பூன், உளுந்து - அரை டீஸ்பூன், காய்ந்த மிளகாய் - ஒன்று, கறிவேப்பிலை - சிறிதளவு, உப்பு - தேவையான அளவு, தேங்காய் எண்ணெய் - ஒரு டீஸ்பூன். அரைக்க: தேங்காய்த் துருவல் - அரை கப், சின்ன வெங்காயம் - 2 (தோலுரிக்கவும்), பச்சை மிளகாய் - ஒன்று, சீரகம் - கால் டீஸ்பூன்.

செய்முறை: மலபார் வெள்ளரிக்காயை தோல் சீவி, நடுவில் இருக்கும் விதைகளை நீக்கி, பொடியாக நறுக்கிக்கொள்ளவும். ஒரு பாத்திரத்தில் நறுக்கிய வெள்ளரிக்காய் சேர்த்து மூழ்கும்வரை தண்ணீர் ஊற்றி வேகவிடவும். ஒரு சிறிய மிக்ஸி ஜாரில் அரைக்கக்கொடுத்துள்ள பொருள்களைச் சேர்த்து, சிறிதளவு தண்ணீர் ஊற்றி அரைத்துக்கொள்ளவும். வெள்ளரிக்காய் வெந்ததும் அரைத்த தேங்காய் விழுதைச் சேர்த்து சிறிது நேரம் பச்சை வாசனை போகும் வரை கொதிக்க வைத்து இறக்கவும். நன்கு ஆறியதும் உப்பு, கெட்டித் தயிர் சேர்த்துக் கலந்துகொள்ளவும். வாணலியில் தேங்காய் எண்ணெய்விட்டு சூடானதும் கடுகு, உளுந்து சேர்த்து தாளிக்கவும். பின்னர் காய்ந்த மிளகாய், கறிவேப்பிலை சேர்த்து தாளித்துப் பச்சடியில் கலந்துகொள்ளவும்.

இஞ்சிப் பச்சடி
இஞ்சிப் பச்சடி

இஞ்சிப் பச்சடி

தேவை: இஞ்சி - 100 கிராம், புளி - சிறிய எலுமிச்சை அளவு உருண்டை, காய்ந்த மிளகாய் - 4, மல்லி (தனியா) - ஒரு டேபிள்ஸ்பூன், பெருங்காயம் - சிறிய துண்டு, மஞ்சள்தூள் - அரை டீஸ்பூன், துருவிய வெல்லம் - 2 டேபிள்ஸ்பூன், கடுகு - அரை டீஸ்பூன், உளுந்து - அரை டீஸ்பூன், கறிவேப்பிலை - 10 இலைகள், நல்லெண்ணெய் - 4 டேபிள்ஸ்பூன், உப்பு - தேவையான அளவு.

செய்முறை: இஞ்சியைக் கழுவி தோல் சீவி சிறு சிறு துண்டுகளாக நறுக்கிக்கொள்ளவும். புளியை அரை கப் சூடான நீரில் 15 நிமிடங்கள் ஊறவைத்து பின்னர் அரை கப் தண்ணீர் ஊற்றிக் கரைத்துக்கொள்ளவும். வாணலியில் சிறிதளவு எண்ணெய்விட்டு சூடானதும் அதில் நறுக்கிய இஞ்சித் துண்டுகளைச் சேர்த்து வதக்கவும். இஞ்சி வதங்கியதும் ஒரு தட்டில் மாற்றிக்கொள்ளவும். பிறகு அதே வாணலியில் மல்லியைச் சேர்த்து வறுக்கவும். பின்னர் காய்ந்த மிளகாய் சேர்த்து வறுத்துக்கொள்ளவும். ஒரு சிறிய மிக்ஸி ஜாரில் வதக்கிய இஞ்சி, வறுத்த மல்லி, காய்ந்த மிளகாய் சேர்த்து சிறிதளவு தண்ணீர் ஊற்றி அரைத்துக்கொள்ளவும். கனமான கடாயில் எண்ணெய்விட்டு சூடானதும் அதில் கடுகு, உளுந்து, கறிவேப்பிலை சேர்த்து தாளித்து, இதனுடன் அரைத்த இஞ்சி விழுதைச் சேர்த்து வதக்கவும்.

பிறகு புளிக்கரைசலைச் சேர்த்து, உப்பு, மஞ்சள்தூள் சேர்த்துக் கலந்து, அடுப்பை மிதமான சூட்டில் வைத்துக் கொதிக்கவிடவும். பச்சடி கொதிக்க ஆரம்பித்ததும் பெருங்காயம் சேர்த்துக் கலந்துகொள்ளவும். சிறிது கெட்டியாகும்போது துருவிய வெல்லம் சேர்த்துக் கலந்துகொள்ளவும். பச்சடி நன்கு கெட்டியாகி எண்ணெய் பிரிந்து மேலே மிதக்கும்போது இறக்கவும்.

சீமைச்சக்கை மசாலாக் கறி
சீமைச்சக்கை மசாலாக் கறி

சீமைச்சக்கை மசாலாக் கறி

தேவை: சீமைச்சக்கை - ஒன்று, வெங்காயம் - ஒன்று, தக்காளி - ஒன்று, பட்டை - சிறிய துண்டு, சோம்பு - கால் டீஸ்பூன், மஞ்சள்தூள் - அரை டீஸ்பூன், கறிவேப்பிலை - சிறிதளவு, கொத்தமல்லி - சிறிதளவு, எண்ணெய் - 2 டேபிள்ஸ்பூன், உப்பு - தேவையான அளவு. அரைக்க: தேங்காய்த் துருவல் - முக்கால் கப், சின்ன வெங்காயம் - 7 (தோலுரிக்கவும்), பூண்டு - 5 பல், சோம்பு - அரை டீஸ்பூன், மல்லி (தனியா) - ஒரு டேபிள்ஸ்பூன், காய்ந்த மிளகாய் - 4.

செய்முறை: சீமைச்சக்கையின் தோலைச் சீவி பாதியாக நறுக்கிக்கொள்ளவும். பின்னர் நடுவில் இருக்கும் வழவழப்பான பகுதிகளை எடுத்து, பிறகு கனமான சதுரங்களாக நறுக்கிக்கொள்ளவும். வாணலியில் சிறிதளவு எண்ணெய்விட்டு சூடானதும் சின்ன வெங்காயம், பூண்டு சேர்த்து வதக்கவும். வெங்காயம் லேசாக வதங்கியதும் சோம்பு, மல்லி, காய்ந்த மிளகாய் சேர்த்து வாசனை வரும் வரை வறுக்கவும். கடைசியாக தேங்காய்த் துருவல் சேர்த்து வறுத்துக்கொள்ளவும். அவை நன்கு ஆறியதும் ஒரு சிறிய மிக்ஸி ஜாரில் சேர்த்து தண்ணீர்விட்டு நைஸாக அரைத்துக்கொள்ளவும். ஒரு கனமான கடாயில் எண்ணெய்விட்டு சூடானதும் பட்டை, சோம்பு, கறிவேப்பிலை சேர்த்து தாளித்து, பின்னர் பொடியாக நறுக்கிய வெங்காயம் சேர்த்து வதக்கவும். வெங்காயம் வதங்கியதும் பொடியாக நறுக்கிய தக்காளியைச் சேர்த்து நன்கு வதக்கவும். தக்காளி வதங்கியதும் நறுக்கிய சீமைச்சக்கை துண்டுகளைச் சேர்த்து சிறிது நேரம் வதக்கவும். பிறகு அரை கப் தண்ணீர் ஊற்றி நன்கு கலந்து மஞ்சள்தூள், உப்பு சேர்த்து மூடி வைத்து வேகவிடவும். சீமைச்சக்கை நன்கு வெந்ததும் அடுப்பை மிதமான சூட்டில் வைத்து 10 நிமிடங்கள் கொதிக்க வைத்து இறக்கவும். கடைசி யாக, பொடியாக நறுக்கிய கொத்தமல்லி தூவிக் கலந்துகொள்ளவும்.

பலாப்பழம் பருப்புப் பாயசம்
பலாப்பழம் பருப்புப் பாயசம்

பலாப்பழம் பருப்புப் பாயசம்

தேவை: பலாப்பழச்சுளை - 15, பாசிப்பருப்பு - கால் கப், பாகு வெல்லம் - ஒன்றரை கப், முதல் தேங்காய்ப்பால் - ஒரு கப், இரண்டாம் தேங்காய்ப்பால் - 2 கப், ஏலக்காய்த்தூள் - ஒரு டீஸ்பூன், முந்திரிப்பருப்பு - 10, நெய் - 4 டேபிள்ஸ்பூன்.

செய்முறை: பலாப்பழச்சுளையிலுள்ள கொட்டைகளை நீக்கி மிகவும் பொடியாக நறுக்கவும். வாணலியை லேசாக சூடாக்கி அதில் பாசிப்பருப்பை லேசாக வறுக்கவும். பின்னர் குக்கரில் தேவையான அளவு தண்ணீர் ஊற்றி குழைய வேகவைத்துக்கொள்ளவும்.

கனமான கடாயில் பொடியாக நறுக்கிய பலாப்பழத் துண்டுகளைச் சேர்த்து ஒரு கப் தண்ணீர் ஊற்றி மூடி வைத்து வேகவிடவும். ஒரு பாத்திரத்தில் பொடியாக்கிய வெல்லம் சேர்த்து, சிறிதளவு தண்ணீர் ஊற்றி, மிதமான சூட்டில் கரைத்து வடிகட்டிக்கொள்ளவும். பலாப்பழம் வெந்ததும் ஒரு கரண்டியால் மசித்துக்கொள்ளவும். பின்னர் வடிகட்டிய வெல்லக் கரைசல் ஊற்றிக் கிளறவும். பிறகு 2 டேபிள்ஸ்பூன் நெய், வேகவைத்த பாசிப்பருப்பு, இரண்டாம் தேங்காய்ப்பால் சேர்த்துக் கலந்து, அடுப்பை மிதமான சூட்டில் வைத்துக் கொதிக்கவிடவும். பாயசம் அடி பிடிக்காமலிருக்க இடையிடையே கிளறிக்கொண்டே இருக்கவும். பாயசம் கெட்டியானதும் ஏலக்காய்த்தூள் சேர்த்து, மீதமுள்ள நெய்யில் வறுத்த முந்திரிப்பருப்பு சேர்த்துக் கலந்துகொள்ளவும். எல்லாம் சேர்ந்து நன்கு கலந்ததும் முதல் தேங்காய்ப்பால் ஊற்றி மூன்று நிமிடங்களில் இறக்கவும்.

பட்டாணி தேங்காய்ப்பால் கறி
பட்டாணி தேங்காய்ப்பால் கறி

பட்டாணி தேங்காய்ப்பால் கறி

தேவை: காய்ந்த பச்சைப் பட்டாணி - 200 கிராம், வெங்காயம் - ஒன்று, தேங்காய்ப்பால் - 2 கப், கொத்தமல்லி - சிறிதளவு, தேங்காய் எண்ணெய் - 3 டேபிள்ஸ்பூன், உப்பு - தேவையான அளவு. அரைக்க: கீறிய பச்சை மிளகாய் - 4, பூண்டு - 10 பல், மல்லித்தூள் (தனியாத்தூள்) - 2 டீஸ்பூன்.

செய்முறை: காய்ந்த பச்சைப் பட்டாணியை ஐந்து மணி நேரம் ஊறவைக்கவும். பின்னர் குக்கரில் சேர்த்து, தேவையான அளவு தண்ணீர் ஊற்றி ஆறு விசில் வரும் வரை வேகவைத்துக்கொள்ளவும். வாணலியில் ஒரு டேபிள்ஸ்பூன் தேங்காய் எண்ணெய்விட்டு சூடானதும் பூண்டுப் பற்களை சேர்த்து வதக்கவும். பிறகு நீளமாகக் கீறிய பச்சை மிளகாய் சேர்த்து நிறம் மாறும் வரை வதக்கவும். பின்னர், அடுப்பை அணைத்துவிட்டு மல்லித்தூள் சேர்த்துக் கலந்து இறக்கவும். அவை ஆறியதும் சிறிதளவு தண்ணீர் சேர்த்து நைஸாக அரைத்துக்கொள்ளவும்.‌

வாணலியில் 2 டேபிள்ஸ்பூன் எண்ணெய்விட்டு சூடானதும் பொடியாக நறுக்கிய வெங்காயம் சேர்த்து வதக்கவும். வெங்காயம் பொன்னிறமாக வதங்கியதும் அதில் அரைத்த பச்சை மிளகாய் விழுதைச் சேர்த்து வதக்கவும். அவை வதங்கியதும் வேகவைத்த பட்டாணியைச் சேர்த்து நன்றாகக் கலந்துகொள்ளவும். பிறகு அதில் உப்பு சேர்த்துக் கலந்து, தேங்காய்ப்பால் சேர்த்துக் கலந்துகொள்ளவும். அடுப்பை மிதமான சூட்டில் வைக்கவும். மசாலா நான்கு நிமிடங்கள் கொதித்து பச்சை வாசனை போனதும், பொடியாக நறுக்கிய கொத்தமல்லி தூவி இறக்கவும்.

உள்ளி வடை
உள்ளி வடை

உள்ளி வடை

தேவை: பெரிய வெங்காயம் - 2, கடலை மாவு - ஒரு கப், அரிசி மாவு - கால் கப், பச்சை மிளகாய் - 2, இஞ்சி - சிறிய துண்டு, மிளகாய்த்தூள் - அரை டீஸ்பூன், கறிவேப்பிலை - 10 இலைகள், உப்பு - தேவையான அளவு, எண்ணெய் - பொரிக்கத் தேவையான அளவு.

செய்முறை: வெங்காயத்தைத் தோலுரித்து நீளமாகவும் மெலிதாகவும் நறுக்கிக்கொள்ளவும். இஞ்சி, பச்சை மிளகாயைப் பொடியாக நறுக்கவும். ஒரு பாத்திரத்தில் நறுக்கிய வெங்காயத்தோடு உப்பு சேர்த்து நன்கு கைகளால் கலந்து 10 நிமிடங்கள் மூடி வைக்கவும். பின்னர் மிளகாய்த்தூள், கறிவேப்பிலை, பொடியாக நறுக்கிய பச்சை மிளகாய், இஞ்சி சேர்த்துக் கலந்துகொள்ளவும். கடலை மாவைச் சிறிது சிறிதாகச் சேர்த்து வெங்காயத்தோடு நன்றாகப் பிசிறிக் கொள்ளவும். பின்னர் அரிசி மாவு சேர்த்து சிறிதளவு தண்ணீர்விட்டு நன்கு சமமாகப் பிசைந்துகொள்ளவும். வாணலியில் எண்ணெய்விட்டு சூடானதும் பிசைந்த கலவையில் இருந்து சிறு சிறு உருண்டைகளாக உருட்டிப் போடவும்.

ஒரு பக்கம் பொன்னிறமாக மாறியதும் மெதுவாகத் திருப்பி போட்டு நன்கு மொறுமொறுப்பானதும் தட்டில் மாற்றிக்கொள்ளவும்.

நேந்திரம்பழம் அப்பம்
நேந்திரம்பழம் அப்பம்

நேந்திரம்பழம் அப்பம்

தேவை: நன்கு பழுத்த நேந்திரம்பழம் - 2, கோதுமை மாவு - அரை கப், மைதா மாவு - 2 டேபிள்ஸ்பூன், அரிசி மாவு - ஒரு டேபிள்ஸ்பூன், சர்க்கரை - 3 டேபிள்ஸ்பூன், சமையல் சோடா - கால் டீஸ்பூன், ஏலக்காய்த்தூள் - அரை டீஸ்பூன், சுக்குத்தூள் - அரை டீஸ்பூன், எண்ணெய் - 200 மில்லி.

செய்முறை: நேந்திரம்பழத்தின் தோலை உரித்து வட்ட வட்டமாக நறுக்கிக்கொள்ளவும். ஓர் அகலமான பாத்திரத்தில் சர்க்கரை, கால் கப் தண்ணீர் ஊற்றி நன்கு கரைத்துக்கொள்ளவும். சர்க்கரை நன்கு கரைந்ததும் அதில் கோதுமை மாவு, மைதா மாவு, அரிசி மாவு, சமையல் சோடா சேர்த்து நன்கு கலந்துகொள்ளவும். பின்னர் சிறிது சிறிதாக தண்ணீர் ஊற்றி பஜ்ஜி மாவு பதத்துக்குக் கரைத்துக்கொள்ளவும். அதில் ஏலக்காய்த்தூள், சுக்குத்தூள் சேர்த்து கலந்து 10 நிமிடங்கள் மூடி வைக்கவும். வாணலியில் எண்ணெயை ஊற்றி, அடுப்பை மிதமான தீயில் வைத்து, காயவைக்கவும். பின்னர் நறுக்கிய நேந்திரம்பழத் துண்டுகளை மாவில் இரு பக்கங்களிலும் நன்கு தோய்த்து எண்ணெயில் போட்டு, குறைந்த சூட்டில்வைத்து வேகவிடவும். பிறகு மெதுவாகத் திருப்பிப் போட்டு நன்கு பொன்னிறமாகப் பொரித்தெடுக்கவும்.

தக்காளி ஜாம்
தக்காளி ஜாம்

தக்காளி ஜாம்

தேவை: நன்கு பழுத்த தக்காளி - 6, சர்க்கரை - 200 கிராம், முந்திரிப்பருப்பு - 6, ஏலக்காய்த்தூள் - அரை டீஸ்பூன், நெய் - 2 டேபிள்ஸ்பூன்.

செய்முறை: ஓர் அகலமான பாத்திரத்தில் 2 கப் தண்ணீர் ஊற்றிக் கொதிக்கவிடவும். தக்காளியை நன்கு கழுவி பின்புறத்தில் கத்தியால் ‘x’ வடிவில் லேசாகக் கீறி வைக்கவும். பின்னர் கொதிக்கும் நீரில் போட்டு 10 நிமிடங்கள் வேகவிடவும். தக்காளி நன்கு வெந்ததும் ஒரு தட்டில் மாற்றி ஆறவிடவும். பின்னர் அதன் தோலை முழுவதும் உரித்துக்கொள்ளவும். பிறகு ஒரு பெரிய மிக்ஸி ஜாரில் சேர்த்து நைஸாக அரைத்துக்கொள்ளவும். ஓர் அகலமான, கனமான கடாயில் அரைத்த தக்காளி விழுதைச் சேர்த்துக்கொள்ளவும். அதோடு சர்க்கரை சேர்த்து நன்கு கலந்து, அடுப்பை மிதமான தீயில் வைத்துக் கிளறவும்.

சர்க்கரை நன்கு கரைந்து தக்காளி விழுதோடு சேர்ந்து கொதிக்கும்போது கைவிடாமல் கிளறவும். முந்திரிப்பருப்பை ஒரு டேபிள்ஸ்பூன் நெய்யில் பொன்னிறமாக வறுத்துவைக்கவும். ஜாம் பளபளவென்று கெட்டியானதும் ஏலக்காய்த்தூள், வறுத்த முந்திரிப்பருப்பு சேர்த்து நன்கு கிளறி மீதமுள்ள நெய்விட்டு நன்கு கலந்து அடுப்பை அணைத்துவிடவும். 10 நிமிடங்கள் கடாயின் சூட்டிலேயே வைத்து பின்னர் நெய் தடவிய பாத்திரத்தில் மாற்றிக்கொள்ளவும்.

நெய் கொழுக்கட்டை
நெய் கொழுக்கட்டை

நெய் கொழுக்கட்டை

தேவை: இடியாப்ப மாவு - ஒரு கப், சர்க்கரை - அரை கப், தேங்காய்ப்பால் - ஒரு கப் (ஒரு மூடி தேங்காயில் இருந்து எடுத்த பால்), தண்ணீர் - அரை கப், நெய் - ஒரு டேபிள்ஸ்பூன்.

செய்முறை: ஓர் அகலமான, கனமான கடாயில் சர்க்கரை, தேங்காய்ப்பால், தண்ணீர் சேர்த்துக்கொள்ளவும். பின்னர் அடுப்பைக் குறைந்த சூட்டில் வைத்து சர்க்கரையைக் கரையவிடவும். தேங்காய்ப்பாலோடு சர்க்கரை நன்கு கரைந்து வரும்போது ஒரு துளி நெய்விட்டுக் கலந்துகொள்ளவும். இப்போது இடியாப்ப மாவைச் சிறிது சிறிதாகக் கொதிக்கும் தேங்காய்ப்பாலில் சேர்த்துக் கிளறவும். மாவு நன்கு சேர்ந்து கடாயில் ஒட்டாமல் வரும்போது இறக்கவும். பின்னர் கைகளில் சிறிது நெய்யைத் தடவிக்கொண்டு, மாவைச் சிறு சிறு உருண்டைகளாக அல்லது நீளமாக உருட்டிக்கொள்ளவும். உருட்டிய கொழுக்கட்டைகளை இட்லி பாத்திரத்தில் மூன்று நிமிடங்கள் ஆவியில் வேகவைத்து எடுக்கவும்.

குறிப்பு: மாவு தேங்காய்ப்பாலில் நன்கு வெந்துவிட்டால் தனியாக இட்லி பாத்திரத்தில்வைத்து வேகவைக்க வேண்டாம்.

முத்துலட்சுமி மாதவகிருஷ்ணன்
முத்துலட்சுமி மாதவகிருஷ்ணன்

தலைவாழையிலையில்

அறுசுவை விருந்து!

நாஞ்சில் நாடு என்று அழைக்கப்படுவது கன்னியாகுமரி மாவட்டத்தின் நாகர்கோவில், அகஸ்தீஸ்வரம், தோவாளை ஆகிய வட்டங்களை உள்ளடக்கிய பகுதி. பசுமையான மலைத்தொடர்களும், தென்னை மரங்களும், வயல்வெளிகளும் நாஞ்சில் நாட்டின் அடையாளம். நாஞ்சில் உணவுகளில் பெரும் பாலும் வீட்டுத்தோட்டத்தில் விளைகிற தேங்காய், வாழை, பலா போன்றவை இடம்பெறும். தேங்காய், முக்கியப் பொருளாக இருக்கும். அவியல், எரிசேரி, புளிசேரி, தீயல், பச்சடி மற்றும் பாயசம் போன்றவை தலைவாழையிலையில் பரிமாறப்படும். இதை கவிமணி தேசிக விநாயகம் பிள்ளை மிக அழகாக ஒரு கவிதையில் கூறியிருக்கிறார்...

`அவியல் பொரியல் துவையல் தீயல்

பச்சடி தொவரன் கிச்சடி சட்டினி

சாம்பார் கூட்டுத் தயிர்ப்புளி சேரி

பருப்பு பப்படம் பாயசம் பிரதமன்

பழமிவையோடு படைப்பு போட

எத்தனை நாளைக் கெங்களால் ஏலும்

அரசனும் கூட ஆண்டியாவானே!’

நாஞ்சில் நாடு போலவே தமிழகத்தின் ஒவ்வொரு பகுதிக்கும் தனித்துவமான உணவுப் பண்பாடு உண்டு. துரித உணவுகளை கைவிட்டு விட்டு நமது குழந்தைகளுக்கு ஒருவேளையாவது நம் பாரம்பர்ய உணவு வகைகளைச் செய்து கொடுப்போம். இந்த இணைப்பிதழில், நாஞ்சில் நாட்டு உணவு வகைகளைப் படங்களுடன் வழங்குகிறார் virundhombal.com இணையதள நிர்வாகி முத்துலட்சுமி மாதவகிருஷ்ணன்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism