Published:Updated:

ஆடி, ஆவணி 30 வகை பண்டிகை ரெசிப்பிகள்

ஆடி, ஆவணி 30 வகை பண்டிகை ரெசிப்பிகள்
பிரீமியம் ஸ்டோரி
ஆடி, ஆவணி 30 வகை பண்டிகை ரெசிப்பிகள்

பண்டிகைக் கோலாகலம்!

ஆடி, ஆவணி 30 வகை பண்டிகை ரெசிப்பிகள்

பண்டிகைக் கோலாகலம்!

Published:Updated:
ஆடி, ஆவணி 30 வகை பண்டிகை ரெசிப்பிகள்
பிரீமியம் ஸ்டோரி
ஆடி, ஆவணி 30 வகை பண்டிகை ரெசிப்பிகள்
ஆடி, ஆவணி 30 வகை பண்டிகை ரெசிப்பிகள்

எலுமிச்சைப்பழ சாதம்

தேவை: பாஸ்மதி அரிசி – 200 கிராம் சிறிய எலுமிச்சைப் பழம் - 2 (சாறு பிழியவும்) பச்சை மிளகாய் – 2 (பொடியாக நறுக்கவும்) பொட்டுக்கடலை – ஒரு டேபிள்ஸ்பூன் வறுத்த வேர்க்கடலை – ஒரு கப் முந்திரிப்பருப்பு – 10 (வறுத்துக்கொள்ளவும்) கறிவேப்பிலை – சிறிதளவு கடுகு – ஒரு டீஸ்பூன் மஞ்சள்தூள் – ஒரு சிட்டிகை பெருங்காயத்தூள் – சிறிதளவு எண்ணெய், உப்பு – தேவையான அளவு.

ஆடி, ஆவணி 30 வகை பண்டிகை ரெசிப்பிகள்

ஒட்டுமொத்த விகடனுக்கும் ஒரே ஷார்ட்கட்!

செய்முறை: ஒரு பங்கு அரிசிக்கு இரண்டு பங்கு தண்ணீர்விட்டு குக்கரில் சேர்த்து இரண்டு விசில்விட்டு இறக்கவும். வாணலியில் ஒரு டேபிள்ஸ்பூன் எண்ணெய்விட்டு கடுகு தாளித்து, பச்சை மிளகாயைப் போட்டு, பொட்டுக்கடலை, மஞ்சள்தூள், பெருங்காயத்தூள் சேர்த்து வறுத்து தனியாக வைத்துக்கொள்ளவும். வேகவைத்த சாதத்தை அகலமான பாத்திரத்தில் போட்டு வறுத்ததைச் சேர்த்து, வறுத்த வேர்க்கடலை, வறுத்த முந்திரிப்பருப்பையும் சேர்க்கவும். இதில் கறிவேப்பிலையைக் கிள்ளிப்போட்டு உப்பு, எலுமிச்சைச்சாறு சேர்க்கவும். சிறிதளவு எண்ணெய்விட்டு நன்றாகக் கலக்கவும்.

சிறப்பு: ஆடி மாதம் செவ்வாய், வெள்ளி விளக்கு பூஜை செய்யும்போது விதம்விதமான சாதம் செய்வது வழக்கம். அதில் எலுமிச்சைப்பழ சாதமும் ஒன்று.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

தேங்காய் சாதம்

தேவை: பாஸ்மதி அரிசி – 200 கிராம் நன்கு முற்றிய தேங்காய் – ஒன்று பச்சை மிளகாய் – 2 உடைத்த உளுத்தம்பருப்பு – 2 டேபிள்ஸ்பூன் முந்திரிப்பருப்பு – 10 (வறுத்துக்கொள்ளவும்) கடுகு – ஒரு டேபிள்ஸ்பூன் பெருங்காயத்தூள், கறிவேப்பிலை – சிறிதளவு தேங்காய் எண்ணெய், உப்பு – தேவையான அளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: அரிசியுடன் ஒரு பங்குக்கு இரண்டு பங்கு தண்ணீர் அளந்துவிட்டு குக்கரில் வைத்து இரண்டு விசில்விட்டு இறக்கவும். தேங்காயை உடைத்து துருவிக்கொள்ளவும். வாணலியில் எண்ணெய்விட்டு தேங்காய்த் துருவலைப் போட்டு மிதமான தீயில் பொன்னிறமாக வறுத்து எடுத்துக்கொள்ளவும். வாணலியில் ஒரு டேபிள்ஸ்பூன் தேங்காய் எண்ணெய்விட்டு கடுகு தாளித்து, உளுத்தம்பருப்பு சேர்த்து, நறுக்கிய பச்சை மிளகாய் போட்டு வறுத்து எடுத்துக் கொள்ளவும். அகலமான பாத்திரத்தில் சாதத்தைப் போட்டு வறுத்த தேங்காய்த் துருவல், தாளித்த பொருள்கள், உப்பு, பெருங்காயத்தூள் சேர்த்து, கறிவேப்பிலையைக் கிள்ளிப் போட்டு நன்றாகக் கலக்கவும். வறுத்த முந்திரிப்பருப்பை மேலே பரவலாக சேர்க்கவும்.

குறிப்பு: சாதம் கலக்கும்போது ஒரு ஸ்பூன் நெய்விட்டு கலந்தால், வாசனை நன்றாக இருக்கும்; ருசியும் கூடும்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

புளியோதரை

தேவை: பாஸ்மதி அரிசி – 200 கிராம் புளி – 100 கிராம் நல்லெண்ணெய் – 100 மில்லி உப்பு - தேவையான அளவு.வறுப்பதற்கு: காய்ந்த மிளகாய் – 10 விரளி மஞ்சள் (சிறியது) ஒன்று (உடைத்துக்கொள்ளவும்) மல்லி (தனியா), வெந்தயம், எண்ணெய் – தலா ஒரு டேபிள்ஸ்பூன்.தாளிப்பதற்கு: எண்ணெய் – ஒரு டேபிள்ஸ்பூன் காய்ந்த மிளகாய் – 6 (கிள்ளி வைக்கவும்) கடலைப்பருப்பு – ஒரு டேபிள்ஸ்பூன் கடுகு – ஒரு டேபிள்ஸ்பூன் வறுத்த வேர்க்கடலை – 100 கிராம் பெருங்காயத்தூள் – சிறிதளவு கறிவேப்பிலை – ஒரு கைப்பிடி அளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: வறுக்கக்கொடுத்துள்ள பொருள்களை எண்ணெய்விட்டு தனித்தனியாக வறுத்து மிக்ஸியில் பொடித்துக்கொள்ளவும். அரிசியை ஒரு பங்குக்கு இரு பங்கு தண்ணீர்விட்டு குக்கரில் வைத்து இரண்டு விசில்விட்டு இறக்கவும். புளியை 300 மில்லி தண்ணீர்விட்டு கரைத்து வடிகட்டவும். வாணலியில் எண்ணெய்விட்டு சூடாக்கி, கடுகு தாளித்து, கிள்ளிய காய்ந்த மிளகாயைப் போட்டு, கடலைப்பருப்பு, வறுத்த வேர்க்கடலை, கறிவேப்பிலை சேர்த்து வறுக்கவும். தேவையான உப்பு சேர்க்கவும். பின்னர், புளிக்கரைலைச் சேர்த்து, நன்றாகக் கொதித்து சிறிது கெட்டியாக வந்ததும் வறுத்துப் பொடித்ததைப் போட்டு, பெருங்காயத்தூள் சேர்த்து, நல்லெண்ணெய்விட்டு கெட்டியாக வரும் வரை கொதிக்கவிட்டு இறக்கவும். அகலமான பாத்திரத்தில் சாதத்தைப் போட்டு எண்ணெய் சிறிதளவுவிட்டு புளிக்காய்ச்சலைச் சேர்த்து நன்கு கலக்கவும்.

குறிப்பு: சாப்பிடுவதற்கு ஒரு மணி நேரம் முன்பு கலந்துவைத்து சாப்பிட்டால் நன்கு ஊறி ருசியாக இருக்கும்.

பாசிப்பருப்பு லட்டு

தேவை: பாசிப்பருப்பு – 200 கிராம் சர்க்கரை – 400 கிராம் நெய் – 100 மில்லி முந்திரிப்பருப்பு – 10 (உடைத்துப் போட்டு நெய்யில் வறுக்கவும்) ஏலக்காய்த்தூள் – சிறிதளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: பாசிப்பருப்பை வெறும் வாணலியில் பொன்னிறமாக வறுத்து மிக்ஸியில் அரைத்துச் சலிக்கவும். சர்க்கரையும் மிக்ஸியில் பொடித்து சலித்து, பாசிப்பருப்பு மாவுடன் ஒன்றாகக் கலக்கவும். இதனுடன் முந்திரிப்பருப்பு, ஏலக்காய்த்தூள் சேர்க்கவும். நெய்யை உருக்கி மாவில் சேர்த்து நன்கு கலந்து உருண்டைகளாகப் பிடிக்கவும்.

சீரக சாதம்

தேவை: பாஸ்மதி அரிசி – 200 கிராம் சீரகம் - ஒரு டேபிள்ஸ்பூன் மிளகு - ஒரு டேபிள்ஸ்பூன் (மிக்ஸியில் உடைக்கவும்) தோல் சீவி, பொடியாக நறுக்கிய இஞ்சி – ஒரு டேபிள்ஸ்பூன் கடுகு – ஒரு டேபிள்ஸ்பூன் பொடியாக நறுக்கிய கொத்தமல்லித்தழை – சிறிதளவு நெய் – 4 டேபிள்ஸ்பூன் உப்பு – தேவையான அளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: அரிசியுடன் ஒரு பங்குக்கு இரு பங்கு தண்ணீர்விட்டு குக்கரில் வைத்து இரண்டு விசில்விட்டு இறக்கவும். வாணலியில் நெய்விட்டு கடுகு தாளித்து, மிளகு, சீரகம், இஞ்சியையும் சேர்த்துக் கிளறவும். வேகவைத்த சாதத்தில் தாளித்ததைப் போட்டு, தேவையான உப்பு சேர்த்து, நறுக்கிய கொத்தமல்லித்தழையையும் சேர்த்துக் கலக்கவும்.

புதினா சாதம்

தேவை: பாஸ்மதி அரிசி – 200 கிராம் புதினா – ஒரு கட்டு (பொடியாக நறுக்கவும்) கடுகு - ஒரு டீஸ்பூன் சீரகம் – ஒரு டேபிள்ஸ்பூன் வறுத்த வேர்க்கடலை – 100 கிராம் மிளகுத்தூள் - ஒரு டீஸ்பூன் நெய் – 2 டேபிள்ஸ்பூன் உப்பு – தேவையான அளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: அரிசியுடன் ஒரு பங்குக்கு இரு பங்கு தண்ணீர் அளந்துவிட்டு குக்கரில்வைத்து இரண்டு விசில்விட்டு இறக்கவும். வாணலியில் நெய்விட்டு கடுகு, சீரகம் தாளித்து, நறுக்கிய புதினாவைச் சேர்த்து வதக்கவும். அகலமான பாத்திரத்தில் சாதத்தைப் போட்டு, தாளித்து வதக்கியதைச் சேர்த்து, தேவையான உப்பு, வறுத்த வேர்க்கடலை, மிளகுத்தூள் சேர்த்து நன்றாகக் கலக்கவும்.

குறிப்பு: அப்பளம் இதற்குச் சிறந்த காம்பினேஷன். பண்டிகை நாள்களில் வெங்காயம் சேர்க்காமலும் மற்ற நாள்களில் வெங்காயம் சேர்த்தும் இந்த சாதத்தைச் செய்யலாம்.

எள்ளு சாதம்

தேவை: பாஸ்மதி அரிசி – 200 கிராம் கறுப்பு எள் – 100 கிராம் உளுத்தம்பருப்பு – 2 டேபிள்ஸ்பூன் காய்ந்த மிளகாய் (நீட்டு மிளகாய்) – 4 பெருங்காயத்தூள் – சிறிதளவு நல்லெண்ணெய் – 2 டேபிள்ஸ்பூன் உப்பு – தேவையான அளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: அரிசியுடன் ஒரு பங்குக்கு இரு பங்கு தண்ணீர்விட்டு குக்கரில் சேர்த்து இரண்டு விசில்விட்டு இறக்கவும். வெறும் வாணலியில் எள்ளைத் தனியாக வறுத்துக்கொள்ளவும். உளுத்தம்பருப்பு, காய்ந்த மிளகாய் சேர்த்து வறுக்கவும். முதலில் உளுத்தம்பருப்பு, காய்ந்த மிளகாயை மிக்ஸியில் ஒரு சுற்று சுற்றி, பின்பு வறுத்த எள்ளையும் போட்டு ஒரு சுற்று சுற்றி எடுத்து, தேவையான உப்பு சேர்த்து, பெருங்காயத்தூளையும் சேர்த்துக் கலக்கவும். அகலமான பாத்திரத்தில் சாதத்தைப் போட்டு பொடித்த எள்ளுப் பொடியும் போட்டு எண்ணெய்விட்டு நன்றாகக் கலக்கவும்.

குறிப்பு: மோர்க்குழம்பு இதற்கு சிறந்த காம்பினேஷன்.

பாஸ்மதி தயிர் சாதம்

தேவை: பாஸ்மதி அரிசி – 200 கிராம் புளிக்காத தயிர் – 200 மில்லி பால் – 100 மில்லி மாதுளம்பழ முத்துகள் – ஒரு சிறிய கப் பொடியாக நறுக்கிய மாங்காய் – 2 டேபிள்ஸ்பூன் வெண்ணெய் – ஒரு டேபிள்ஸ்பூன் முந்திரிப்பருப்பு – 10 (நெய்யில் வறுக்கவும்) நெய் – ஒரு டேபிள்ஸ்பூன் உப்பு – தேவையான அளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: அரிசியுடன் ஒரு பங்குக்கு இரண்டு பங்கு தண்ணீர்விட்டு குக்கரில் நான்கு விசில்விட்டு இறக்கவும். சாதத்தை ஆறவைத்து நன்கு மசித்து பால், தயிர், வெண்ணெய் சேர்த்துப் பிசையவும். இதனுடன் தேவையான உப்பு, மாதுளம்பழ முத்துகள், மாங்காய், வறுத்த முந்திரிப்பருப்பு சேர்த்துக் கலந்து வைக்கவும்.

குறிப்பு: மாதுளம்பழம், மாங்காய், முந்திரி ருசியுடன் சாப்பிட மிகவும் சுவையாக இருக்கும். தொட்டுக்கொள்ள எதுவும் தேவையில்லை.

உளுந்து வடை

தேவை: உளுத்தம்பருப்பு – 200 கிராம் மிளகு – ஒரு டேபிள்ஸ்பூன் இஞ்சி – ஒரு சிறிய துண்டு (தோல் சீவி, நறுக்கவும்) பெருங்காயத்தூள் – சிறிதளவு உப்பு – தேவையான அளவு எண்ணெய் – 250 மில்லி.

ஆடி, ஆவணி 30 வகை பண்டிகை ரெசிப்பிகள்

செய்முறை: உளுத்தம்பருப்பை ஒரு மணி நேரம் ஊறவைத்துக் களைந்து, தண்ணீர் வடித்து மிளகு, இஞ்சி சேர்த்து, மிக்ஸியில் கெட்டியாக அரைக்கவும் (தண்ணீர்விடக் கூடாது). இதனுடன் பெருங்காயத்தூள், தேவையான உப்பு சேர்த்துப் பிசையவும். வாணலியில் எண்ணெய்விட்டு சூடாக்கி, மாவை வடைகளாகத் தட்டிப் போட்டு இருபுறமும் பொன்னிறமாக வேகவிட்டு எடுக்கவும்.

குறிப்பு: பண்டிகை நாள்கள் தவிர மற்ற நாள்களில் வெங்காயம் நறுக்கிப் போட்டு மாவு பிசைந்து வடைகள் செய்யலாம். சட்னி, சாம்பார் இதற்குச் சிறந்த காம்பினேஷன்

பருப்பு வடை

தேவை: துவரம்பருப்பு – ஒரு சிறிய கப் கடலைப்பருப்பு – ஒன்றரை கப் காய்ந்த மிளகாய் (நீட்டு மிளகாய்) – 2 மஞ்சள்தூள் – ஒரு சிட்டிகை பெருங்காயத்தூள் – சிறிதளவு பொடியாக நறுக்கிய கறிவேப்பிலை – சிறிதளவு எண்ணெய் – 500 மில்லி உப்பு – தேவையான அளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: துவரம்பருப்பு, கடலைப்பருப்பு, காய்ந்த மிளகாயை ஒன்று சேர்த்து ஒரு மணி நேரம் ஊறவைத்துக் களைந்து, தண்ணீர் வடித்து மிக்ஸியில் கொரகொரப்பாகக் கெட்டியாக அரைக்கவும். மாவுடன் மஞ்சள்தூள், பெருங்காயத்தூள், கறிவேப்பிலை, உப்பு சேர்த்துப் பிசைந்து கொள்ளவும். வாணலியில் எண்ணெய்விட்டு சூடாக்கி மாவை உருட்டி சிறு வடைகளாக தட்டிப் போட்டு இருபுறமும் பொன்னிறமாக வேகவிட்டு எடுக்கவும்.

குறிப்பு: பண்டிகை நாள்களில் வெங்காயம் சேர்க்காமலும் மற்ற நாட்களில் வெங்காயம் சேர்த்தும் வடை தட்டலாம். இதற்குச் சட்னி சிறந்த காம்பினேஷன்.

கொண்டைக்கடலை சுண்டல்

தேவை: கொண்டைக்கடலை – 100 கிராம் காய்ந்த மிளகாய் (நீட்டு மிளகாய்) – ஒன்று கறிவேப்பிலை – சிறிதளவு தேங்காய்த் துருவல் – ஒரு டேபிள்ஸ்பூன் பெருங்காயத்தூள் – சிறிதளவு கடுகு – ஒரு டீஸ்பூன் எண்ணெய் – ஒரு டீஸ்பூன் உப்பு – தேவையான அளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: கொண்டைக்கடலையை முதல் நாள் இரவு ஊறவைக்கவும். காலையில் நன்கு கழுவி சிறிதளவு தண்ணீர்விட்டு குக்கரில் வைத்து இரண்டு விசில்விட்டு இறக்கி நீரை வடிக்கவும். வாணலியில் எண்ணெய்விட்டு கடுகு, காய்ந்த மிளகாய், பெருங்காயத்தூள் தாளிக்கவும். இதனுடன் வேகவைத்த கொண்டைக்கடலையைச் சேர்த்து, கறிவேப்பிலை, உப்பு, தேங்காய்த் துருவல் போட்டு நன்கு கிளறி இறக்கவும்.

குறிப்பு: விசேஷ தினங்களில் முக்கியமாக இடம்பெறும் நைவேத்தியங்கள் - சுண்டல், வடை, சர்க்கரைப் பொங்கல். சுண்டலுக்கு மேலும் சுவைகூட்ட ஒரு டேபிள்ஸ்பூன் தனியா, 2 காய்ந்த மிளகாய், ஒரு டேபிள்ஸ்பூன் கடலைப்பருப்பை வெறும் வாணலியில் வறுத்துப் பொடித்து சுண்டல் மேலே தேவையான அளவு தூவிக் கலக்கலாம்.

காராமணி இனிப்பு சுண்டல்

தேவை: சிவப்புக் காராமணி, வெல்லம் (பொடித்தது) – தலா 200 கிராம் ஏலக்காய்த்தூள் – சிறிதளவு தேங்காய்த் துருவல் – ஒரு டேபிள்ஸ்பூன்.

ஆடி, ஆவணி 30 வகை பண்டிகை ரெசிப்பிகள்

செய்முறை: சிவப்புக் காராமணியை வெறும் வாணலியில் வறுத்து ஒரு மணி நேரம் ஊறவைத்து, குக்கரில் வைத்து தேவையான தண்ணீர் சேர்த்து இரண்டு விசில்விட்டு இறக்கி, நீரை வடிக்கவும்.வெல்லத்தைக் கரைத்து வடிகட்டி கெட்டியாகப் பாகு காய்ச்சவும். வேகவைத்த காராமணியை பாகுடன் சேர்த்து தேங்காய்த் துருவல், ஏலக்காய்த்தூள் சேர்த்துக் கிளறி இறக்கவும்.

குறிப்பு: வெல்லத்துக்குப் பதில் உப்பு சேர்த்தும் இந்தச் சுண்டலைத் தயாரிக்கலாம்.

மாவிளக்கு

தேவை: பச்சரிசி – 200 கிராம் வெல்லம் (பொடித்தது) – 100 கிராம் ஏலக்காய்த்தூள் – சிறிதளவு தேங்காய்த் துருவல், நெய் – தலா 2 டேபிள்ஸ்பூன் திரிநூல் – 2 நுனி இலை - ஒன்று தேங்காய் - ஒன்று குங்குமம், வெற்றிலைப் பாக்கு, பழம், பூ - தேவைக்கேற்ப.

ஆடி, ஆவணி 30 வகை பண்டிகை ரெசிப்பிகள்

செய்முறை: பச்சரிசியை 2 மணி நேரம் ஊறவைத்து களைந்து நீரை வடிகட்டவும். இதை சுத்தமான துணியில் போட்டு நிழலில் சிறிது நேரம் உலர்த்தவும். பிறகு மிக்ஸியில் பொடித்து மாவு சல்லடையில் சலிக்கவும். மாவுடன் பொடித்த வெல்லம், ஏலக்காய்த்தூள், தேங்காய்த் துருவல் சேர்த்துப் பிசைந்து இரண்டு உருண்டைகளாக உருட்டவும். நடுவில் குழிசெய்து நெய்விட்டு இலையில் வைத்து திரிநூல் போட்டு விளக்கு ஏற்றவும். குங்குமம், வெற்றிலைப் பாக்கு, பழம் வைத்து, தேங்காய் உடைத்து வைத்து, பூ சுற்றி மாவிளக்கைத் தயார் செய்யவும்.

குறிப்பு: ஆடி வெள்ளி, செவ்வாய் ஆகிய இரு கிழமைகளிலும் கோயில் களிலும், வீடுகளிலும் மாவிளக்கு போட்டு அம்மனை மனமுருகி வேண்டி அருள்பெறுவது பாரம்பர்ய வழக்கத்தில் உள்ளது. விளக்கு மாவை பிரசாதமாகத் தரலாம். நீர் மோர், பானகமும் தயாரித்து வைக்கலாம்.

பால் பாயசம்

தேவை: பாஸ்மதி அரிசி – 100 கிராம் பால் – ஒன்றரை லிட்டர் ஏலக்காய்த்தூள் – சிறிதளவு சர்க்கரை – 200 கிராம் வறுத்த முந்திரிப்பருப்பு – 10 குங்குமப்பூ - சிறிதளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: பாஸ்மதி அரிசியை மிக்ஸியில் ரவை பதத்துக்கு உடைத்து பாலுடன் சேர்த்துக் குழைவாக வேகவிடவும். நன்கு வெந்தும் சர்க்கரை சேர்த்துக் கொதிக்கவிடவும். சர்க்கரை கரைந்ததும் ஏலக்காய்த்தூள், வறுத்த முந்திரிப்பருப்பு, குங்குமப்பூ சேர்த்துக் கலக்கி இறக்கவும்..

சிறப்பு: பூஜை பிரசாதத்தில் பால் பாயசம் நிச்சயம் இடம்பெறும்.

முறுக்கு

தேவை: அரிசி மாவு – 100 கிராம் கடலை மாவு – 300 கிராம் சீரகம் - ஒரு டேபிள்ஸ்பூன் வெண்ணெய் – ஒரு டேபிள்ஸ்பூன் எண்ணெய் – 500 மில்லி உப்பு – தேவையான அளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: அரிசி மாவுடன் கடலை மாவு, சீரகம், உப்பு, வெண்ணெய் சேர்த்து சிறிதளவு தண்ணீர் விட்டு கெட்டியாகப் பிசையவும். வாணலியில் எண்ணெயைக் காயவிட்டு, முறுக்கு அச்சில் மாவைப் போட்டு பிழிந்து, இருபுறமும் பொன்னிறமாக வேகவிட்டு எடுக்கவும்.

ரவா லட்டு

தேவை: ரவை – 200 கிராம் சர்க்கரை – 400 கிராம் ஏலக்காய்த்தூள் – சிறிதளவு வறுத்த முந்திரிப்பருப்பு – 10 நெய் – 100 மில்லி.

ஆடி, ஆவணி 30 வகை பண்டிகை ரெசிப்பிகள்

செய்முறை: ரவையை வெறும் வாணலியில் பொன்னிறமாக வறுத்து மிக்ஸியில் நைஸாக அரைத்துச் சலித்துக்கொள்ளவும். சர்க்கரையும் தனியாக அரைத்துச் சலிக்கவும். சலித்த ரவையுடன் சர்க்கரைப் பொடி, ஏலக்காய்த்தூள், உடைத்து வறுத்த முந்திரிப்பருப்பு சேர்க்கவும். நெய்யை உருக்கி இதனுடன் சேர்த்து நன்றாகக் கலந்து உருண்டைகளாகப் பிடிக்கவும்.

குறிப்பு: ரவா லட்டு குழந்தைகளுக்கு மிகவும் பிடிக்கும்.

வேர்க்கடலை உருண்டை

தேவை: உப்பு சேர்க்காத வறுத்த வேர்க்கடலை – 250 கிராம் பொடித்த பாகு வெல்லம் – 200 கிராம்.

ஆடி, ஆவணி 30 வகை பண்டிகை ரெசிப்பிகள்

செய்முறை: வேர்க்கடலையைத் தோல் நீக்கி சுத்தம் செய்து வைத்துக்கொள்ளவும். வெல்லத்தை தண்ணீர்விட்டுக் கரைத்து வடிகட்டி உருட்டு பதத்தில் பாகு காய்ச்சவும் (சிறிதளவு பாகை எடுத்து தண்ணீரில்விட்டு பார்த்தால் கெட்டியாக உருட்ட வரும். அதுதான் சரியான பதம்). அகலமான பாத்திரத்தில் வேர்க்கடலையைப் போட்டு வெல்லப்பாகை ஊற்றி நன்றாகக் கலந்து, சிறிது ஆறியதும் உருண்டைகளாகப் பிடிக்கவும்.

இனிப்பு சீடை

தேவை: பச்சரிசி – 250 கிராம் வெல்லம் (பொடித் தது) – 200 கிராம் ஏலக்காய்த்தூள் – சிறிதளவு எள் – ஒரு டீஸ்பூன் தேங்காய்த் துருவல் – 2 டேபிள்ஸ்பூன் வறுத்து அரைத்த உளுத்தம் மாவு – ஒரு டேபிள்ஸ்பூன் எண்ணெய் – 500 மில்லி.

ஆடி, ஆவணி 30 வகை பண்டிகை ரெசிப்பிகள்

செய்முறை: பச்சரிசியை 2 மணி நேரம் ஊறவைத்துக் களைந்து, வடிக்கட்டவும். இதைச் சுத்தமான துணியில் போட்டு நிழலில் சிறிது நேரம் உலர்த்தவும். பிறகு மிக்ஸியில் அரைத்து, மாவு சல்லடையில் சலிக்கவும். சலித்த மாவை வெறும் வாணலியில் லேசாக சூடுவரும் வரை வறுத்துக்கொள்ளவும். வெல்லத்தைச் சிறிது தண்ணீர்விட்டு காய்ச்சி வடிக்கட்டி உருட்டு பதத்தில் பாகு காய்ச்சவும் (வெல்லப்பாகை சிறிதளவு எடுத்து தண்ணீரில் விட்டால் லேசாக உருட்ட வரும். அதுதான் சரியான பதம்). பாகுடன் வறுத்து வைத்த மாவு, ஏலக்காய்த்தூள் சேர்த்து நன்கு கலக்கவும். எள்ளை வெறும் வாணலியில் வறுத்து மாவுடன் சேர்க்கவும். இதனுடன் வறுத்து அரைத்த உளுத்தம் மாவு, தேங்காய்த் துருவல் சேர்த்துக் கலந்து ஒரு மணி நேரம் அப்படியே வைக்கவும். பிறகு நன்கு பிசைந்து நெல்லிக்காய் அளவு சீடைகளாக உருட்டவும். வாணலியில் எண்ணெய்விட்டு, அடுப்பை மிதமான தீயில் வைத்து நான்கு ஐந்து சீடைகளாகப் போட்டு மெதுவாகத் திருப்பிப் போட்டு வேகவிட்டு எடுக்கவும்.

குறிப்பு: மாவை வெல்லப்பாகில் போட்டு மறுநாள்கூட எண்ணெயில் சீடைகளை உருட்டிப் போடலாம்.

கைமுறுக்கு

தேவை: பச்சரிசி – 250 கிராம் வறுத்து அரைத்து சலித்த உளுத்தம் மாவு – ஒரு டேபிள்ஸ்பூன் வெண்ணெய் – ஒரு டேபிள்ஸ்பூன் சீரகம் – ஒரு டேபிள்ஸ்பூன், பெருங்காயத்தூள் – சிறிதளவு எண்ணெய் – 500 மில்லி, உப்பு – தேவையான அளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: அரிசியை 2 மணி நேரம் ஊற வைத்துக் களைந்து வடிகட்டவும். இதை சுத்தமான துணியில் சிறிது நேரம் உலர்த்தி, மிக்ஸியில் அரைத்து மாவு சல்லடையில் சலித்து மாவு தயார் செய்யவும். சலித்த மாவுடன், உளுத்தம் மாவு, வெண்ணெய், சீரகம், உப்பு, பெருங்காயத்தூள் சேர்த்து சிறிதளவு தண்ணீர் தெளித்துக் கெட்டியாகப் பிசையவும். கைவிரல்களில் சிறிது எண்ணெய் தொட்டுக்கொண்டு மாவைக் கையிலெடுத்து விரல்களால் மெல்லிய இழைகளாக முறுக்கி சிறிய வட்டமாக முறுக்கைச் சுற்ற வேண்டும். வாணலியில் எண்ணெய்விட்டு சூடானதும் சுற்றிவைத்த முறுக்குகளை உடையாமல் கவனமாக தோசை திருப்பியின் உதவியால் எடுத்து எண்ணெயில் போட்டு இருபுறமும் பொன்னிறமாக வேகவிட்டு எடுக்கவும்.

வெண்ணெய் சீடை

தேவை: அரிசி மாவு – 200 கிராம் வெண்ணெய் – ஒரு டேபிள்ஸ்பூன் வறுத்து அரைத்த உளுத்தம் மாவு – ஒரு டேபிள்ஸ்பூன் எண்ணெய் – 250 மில்லி உப்பு – தேவையான அளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: அரிசி மாவுடன் வெண்ணெய், உளுத்தம் மாவு, உப்பு சேர்த்து சிறிதளவு தண்ணீர்விட்டு கெட்டியாகப் பிசைந்து சிறு உருண்டைகளாக உருட்டிப் போடவும். வாணலியில் எண்ணெய்விட்டு சூடானதும் உருட்டிவைத்த சீடைகளைப் போட்டு, இருபுறமும் வேகவிட்டு, எண்ணெய் ஓசை அடங்கியதும் எடுக்கவும்.

சிறப்பு: குழந்தைகள்கூட சாப்பிடலாம். மிகவும் ருசியாகவும் கரகரப்பாகவும் இருக்கும்.

உப்பு சீடை

தேவை: பச்சரிசி – 250 கிராம் வறுத்து அரைத்த உளுத்தம் மாவு – ஒரு டேபிள்ஸ்பூன் வெண்ணெய் – 2 டேபிள்ஸ்பூன் சீரகம் – ஒரு டேபிள்ஸ்பூன் மிளகு (உடைத்தது) – ஒரு டேபிள்ஸ்பூன் கொப்பரைத் தேங்காய் – ஒரு மூடி பெருங்காயத்தூள் – சிறிதளவு எண்ணெய் – 500 மில்லி உப்பு – தேவையான அளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: பச்சரிசியை 2 மணி நேரம் ஊறவைத்து களைந்து நீரை வடிகட்டவும். இதைச் சுத்தமான துணியில் போட்டு நிழலில் சிறிது நேரம் உலர்த்தவும். பிறகு மிக்ஸியில் பொடித்து மாவு சல்லடையில் சலிக்கவும். அரிசி மாவை வெறும் வாணலியில் லேசாக சூடுவரும் வரை வறுக்கவும். இதனுடன் உளுத்தம் மாவு ஒரு டேபிள்ஸ்பூன் சேர்த்து, வெண்ணெய், உப்பு, மிளகு, சீரகம், பெருங்காயத்தூள் சேர்க்கவும். கொப்பரைத் தேங்காயை நறுக்கி மிக்ஸியில் போட்டு ஒரு சுற்று சுற்றி மாவுடன் கலந்து சிறிதளவு தண்ணீர் தெளித்து கெட்டியாகப் பிசையவும். மாவைச் சிறிது சிறிதாகக் கிள்ளி சீடைகளாக லேசாக உருட்டவும் (நன்கு உருட்ட வேண்டாம்). வாணலியில் எண்ணெயை ஊற்றிக் காயவிட்டு சீடைகளைப் போட்டு, உடனே கிளறாமல் சிறிது நேரம் பொறுத்து நன்கு கிளறி, பொன்னிறமாக வேகவிட்டு எடுக்கவும்.

குறிப்பு: மாவை நன்கு சலித்துவிட்டால் சீடை வெடிக்காது.

பருப்புப் பாயசம்

தேவை: பாசிப்பருப்பு, வெல்லம் (பொடித்தது) – தலா 200 கிராம் ஏலக்காய்த்தூள் – சிறிதளவு வறுத்த முந்திரிப்பருப்பு – 10 பால் – ஒரு லிட்டர் பலாச்சுளை – 4 (பொடியாக நறுக்கி நெய்யில் வதக்கவும்) நெய் – ஒரு டீஸ்பூன்.

ஆடி, ஆவணி 30 வகை பண்டிகை ரெசிப்பிகள்

செய்முறை: பாசிப்பருப்பை லேசாகச் சூடாகும் வரை வறுக்கவும். வறுத்த பருப்பை பால்விட்டு குழைவாக வேகவைத்து, பொடித்த வெல்லம், ஏலக்காய்த்தூள் சேர்த்துக் கொதிக்கவிடவும். வறுத்த முந்திரிப்பருப்பை போட்டுக் கலந்து, வதக்கிய பலாச்சுளையை சேர்த்துக் கலக்கவும்.

குறிப்பு: பாலும் பருப்பும் சேர்ந்து பலாச்சுளை இனிப்புடன் இந்தப் பருப்பு பாயசம் மிகவும் ருசியுடன் இருக்கும். பலாச்சுளை கிடைக்காத நேரத்தில் வாழைப்பழத்தைப் பொடியாக நறுக்கி அப்படியே கலக்கலாம்.

தட்டை

தேவை: அரிசி மாவு – 200 கிராம் வறுத்து அரைத்த உளுத்தம் மாவு, மிளகாய்த்தூள், வெண்ணெய், பொட்டுக்கடலை, பாசிப்பருப்பு, எள், உடைத்த உளுத்தம்பருப்பு – தலா ஒரு டேபிள்ஸ்பூன் எண்ணெய் – 500 மில்லி பொடியாக நறுக்கிய கறிவேப்பிலை – 2 டேபிள்ஸ்பூன் பெருங்காயத்தூள் – சிறிதளவு உப்பு – தேவையான அளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: பாசிப்பருப்பையும் உளுத்தம்பருப்பையும் அரை மணி நேரம் ஊறவைத்து நீரை வடிக்கவும். அரிசி மாவுடன் உளுத்தம் மாவு, வெண்ணெய், எள், மிளகாய்த்தூள், நறுக்கிய கறிவேப்பிலை சேர்க்கவும். பொட்டுக்கடலையை ஒன்றிரண்டாக உடைத்து மாவுடன் சேர்க்கவும். இதனுடன் பாசிப்பருப்பு, உளுத்தம்பருப்பு, பெருங்காயத்தூள் சேர்த்து, சிறிதளவு தண்ணீர்விட்டு, தேவையான உப்பு சேர்த்து கெட்டியாகப் பிசையவும். ஒரு பிளாஸ்டிக் பேப்பரில் எண்ணெய் தடவி, மாவைச் சிறு உருண்டைகளாக உருட்டி அதில் வைத்து தட்டைகளாகத் தட்டவும். வாணலியில் எண்ணெய்விட்டு சூடாக்கி தட்டைகளை எடுத்துப் போட்டு இருபுறமும் நன்றாக வேகவிட்டு எடுக்கவும். ஒருமுறைக்கு பத்து தட்டைகள் வீதம் போட்டு எடுக்கலாம்.

குறிப்பு : இதை 15 நாள்கள் வரை வைத்திருந்து சாப்பிடலாம்.

கோலா வடை சீப்பி

தேவை: அரிசி மாவு – 200 கிராம் வெண்ணெய் - ஒரு டேபிள்ஸ்பூன் வறுத்து அரைத்த உளுத்தம் மாவு – ஒரு டேபிள்ஸ்பூன் எண்ணெய் – 500 மில்லி உப்பு – தேவையான அளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: அரிசி மாவுடன் வெண்ணெய், உப்பு, உளுத்தம் மாவு சேர்த்து சிறிதளவு தண்ணீர்விட்டு கெட்டியாகப் பிசையவும். மாவை இரண்டாகப் பிரிக்கவும். ஒரு பங்கு மாவிலிருந்து கொஞ்சம் கொஞ்சமாக எடுத்து நீளவாக்கில் உருட்டி முனைகளை மடக்கி ஒட்டி கோலா வடை (வளைந்தது) தயாரிக்கவும். மற்றொரு பங்கு மாவை நீளவாக்கில் உருட்டி சீப்பிகள் (நீண்டது) தயாரிக்கவும். வாணலியில் எண்ணெய்விட்டு சூடாக்கி, அடுப்பை மிதமான தீயில் வைக்கவும். இவற்றை எண்ணெயில் போட்டு இருபுறமும் வேகவிட்டு எடுக்கவும்.

பொட்டுக்கடலை உருண்டை

தேவை: பொட்டுக்கடலை – 250 கிராம் வெல்லம் (பொடித்தது) – 200 கிராம் ஏலக்காய்த்தூள் – சிறிதளவு.

ஆடி, ஆவணி 30 வகை பண்டிகை ரெசிப்பிகள்

செய்முறை: வெல்லத்தை தண்ணீர்விட்டுக் கரைத்து வடிகட்டி உருட்டு பதத்தில் பாகு காய்ச்சவும் (சிறிதளவு பாகை எடுத்து தண்ணீரில்விட்டுப் பார்த்தால் கெட்டியாக உருட்ட வரும். அதுதான் சரியான பதம்). அகலமான பாத்திரத்தில் பொட்டுக்கடலையைப் போட்டு பாகை ஊற்றி, ஏலக்காய்த்தூள் சேர்த்துக் கலந்து, சிறிது ஆறியதும் உருண்டைகளாகப் பிடிக்கவும்.

சர்க்கரைப் பொங்கல் (அக்கார அடிசில்)

தேவை: பாஸ்மதி அரிசி – 200 கிராம் பாகு வெல்லம் (உடைத்தது) – 400 கிராம் உலர்திராட்சை, முந்திரிப்பருப்பு – தலா 20 நெய் – 100 மில்லி ஏலக்காய்த்தூள் – சிறிதளவு குங்குமப்பூ – ஒரு சிட்டிகை பால் – 500 மில்லி.

ஆடி, ஆவணி 30 வகை பண்டிகை ரெசிப்பிகள்

செய்முறை: ஒரு பங்கு அரிசிக்கு நான்கு பங்கு தண்ணீர் அளந்துவிட்டு குக்கரில் வைத்து ஐந்து விசில்விட்டு இறக்கவும். வெல்லத்தைச் சிறிதளவு தண்ணீர்விட்டு கொதிக்கவைத்து வடிகட்டி, மீண்டும் அடுப்பில்வைத்து கெட்டியாகப் பாகு காய்ச்சவும். பாலை கோவா பதத்துக்குக் காய்ச்சவும். திராட்சையை நெய்விட்டு வறுக்கவும். முந்திரிப்பருப்பைக் கிள்ளி நெய்யில் வறுக்கவும். வேகவைத்த சாதத்துடன் வறுத்த முந்திரி, காய்ச்சிய பால், வெல்லப்பாகு, நெய்யில் பொரித்த திராட்சை, குங்குமப்பூ, ஏலக்காய்த்தூள் சேர்த்து மீதமுள்ள நெய்விட்டு நன்றாகக் கலக்கவும்.

மனோகர உருண்டை

தேவை: அரிசி மாவு – 200 கிராம் வெல்லம் (பொடித்தது) – 300 கிராம் ஏலக்காய்த்தூள் – சிறிதளவு வறுத்து அரைத்த உளுத்தம் மாவு – ஒரு டேபிள்ஸ்பூன் வெண்ணெய் – ஒரு டேபிள்ஸ்பூன் எண்ணெய் – 500 மில்லி.

ஆடி, ஆவணி 30 வகை பண்டிகை ரெசிப்பிகள்

செய்முறை: அரிசி மாவுடன் வெண்ணெய், உளுத்தம் மாவு சேர்த்து சிறிதளவு தண்ணீர்விட்டு கெட்டியாகப் பிசையவும். வாணலியில் எண்ணெயைக் காயவிட்டு முறுக்கு அச்சில் மாவைப் போட்டு பிழிந்து வேகவிட்டு எடுத்துக்கொள்ளவும். வெல்லத்தைத் தண்ணீர்விட்டு கரைத்து வடிகட்டி உருட்டு பதத்தில் பாகு காய்ச்சவும் (சிறிதளவு பாகை எடுத்து தண்ணீரில்விட்டுப் பார்த்தால் கெட்டியாக உருட்ட வரும். அதுதான் சரியான பதம்). முறுக்கை பாத்திரத்தில் போட்டு கைகளால் நொறுக்கி, வெல்லப்பாகை ஊற்றி, ஏலக்காய்த்தூள் சேர்த்துக் கிளறி கைபொறுக்கும் சூட்டில் உருண்டைகளாகப் பிடிக்கவும்.

பூரண போளி

தேவை: மைதா மாவு, கடலைப்பருப்பு – தலா 100 கிராம் வெல்லம் (பொடித்தது) – 200 கிராம் தேங்காய் – ஒரு மூடி (துருவிக்கொள்ளவும்) ஏலக்காய்த்தூள் – சிறிதளவு நெய் – 100 மில்லி கேசரி பவுடர் – ஒரு சிட்டிகை நல்லெண்ணெய் – ஒரு டேபிள்ஸ்பூன்.

ஆடி, ஆவணி 30 வகை பண்டிகை ரெசிப்பிகள்

செய்முறை: மைதா மாவுடன் நல்லெண்ணெய், கேசரி பவுடர் சேர்த்து, சிறிதளவு தண்ணீர்விட்டு பிசைந்துகொள்ளவும். கடலைப்பருப்பை வெறும் வாணலியில் பொன்னிறமாக வறுத்து ஒரு மணி நேரம் ஊறவைத்து வேகவிடவும். தண்ணீர் வடித்து தேங்காய்த் துருவல் சேர்த்து கெட்டியாக அரைக்கவும். வெல்லத்தை சிறிதளவு தண்ணீர்விட்டு கரைத்து கொதிக்கவிட்டு வடிக்கட்டி பாகு காய்ச்சவும். வெல்லம் காய்ந்து சிறிதளவு கெட்டியானதும் அரைத்த விழுதைச் சேர்த்து நன்றாகக் கிளறி ஏலக்காய்த்தூள் சேர்த்துக் கலந்து வைக்கவும். இதுதான் பூரணம். பிசைந்த மைதா மாவை சிறு உருண்டைகளாக உருட்டவும். வாழையிலையில் நெய் தடவி மாவு உருண்டையை வைத்து பரவலாக சப்பாத்தி வடிவில் கைகளால் தட்டி உள்ளே பூரணத்தை சிறு உருண்டையாக உருட்டி வைத்து மூடி போளியாக தட்டவும். தோசைக்கல்லைச் சூடாக்கி, அடுப்பை மிதமான தீயில் வைத்து, போளியைப் போட்டு, இருபுறமும் சிறிதளவு நெய் தடவி வாட்டி எடுக்கவும்.

நெய் அப்பம்

தேவை: கோதுமை ரவை – 2 கப் அரிசி – ஒரு கப் ஏலக்காய்த்தூள் – சிறிதளவு தேங்காய்த் துருவல் – 2 டேபிள்ஸ்பூன் வெல்லம் (பொடித்தது) – ஒரு கப்.

ஆடி, ஆவணி 30 வகை பண்டிகை ரெசிப்பிகள்

செய்முறை: கோதுமை ரவையையும் அரிசியையும் ஒன்றாக ஒரு மணி நேரம் ஊறவைத்து வெல்லம், தேங்காய்த் துருவல் சேர்த்து, சிறிதளவு தண்ணீர்விட்டு தோசை மாவு பதத்துக்கு அரைக்கவும். மாவுடன் ஏலக்காய்த்தூள் சேர்த்துக் கலக்கவும். பணியாரக்கல்லில் நெய்விட்டு, அடுப்பை மிதமான தீயில் வைத்து, ஒரு சிறு கரண்டியால் மாவை ஊற்றி, ஒருபுறம் வெந்ததும் ஒரு குச்சியால் திருப்பிப் போட்டு, மறுபுறமும் வேகவிட்டு எடுக்கவும்.

உப்பு காரம் இனிப்பு கொழுக்கட்டைகள்

தேவை: கொழுக்கட்டை மாவு தயாரிக்க: பச்சரிசி மாவு – 250 கிராம் (அரிசியை ஊறவைத்து, வடிகட்டி, நிழலில் உலத்தி அரைத்த மாவு) நல்லெண்ணெய் - ஒரு டீஸ்பூன் உப்பு - ஒரு சிட்டிகை.

இனிப்பு பூரணம் தயாரிக்க: தேங்காய் – ஒரு மூடி வெல்லம் (பொடித்தது) – ஒரு கப் ஏலக்காய்த்தூள் – சிறிதளவு

உப்பு பூரணம் தயாரிக்க: உளுத்தம்பருப்பு – 100 கிராம் காய்ந்த மிளகாய் – 2 எண்ணெய் - ஒரு டீஸ்பூன் கடுகு - ஒரு டீஸ்பூன் உப்பு – தேவையான அளவு.

அம்மணி கொழுக்கட்டை தயாரிக்க: இட்லி மிளகாய்ப்பொடி - ஒரு டீஸ்பூன் தேங்காய்த் துருவல் - ஒரு டேபிள்ஸ்பூன் கடுகு, எண்ணெய், பெருங்காயத்தூள் - சிறிதளவு உப்பு - ஒரு சிட்டிகை.

ஆடி, ஆவணி 30 வகை பண்டிகை ரெசிப்பிகள்

செய்முறை: ஒரு பங்கு மாவுக்கு ஒன்றரை மடங்கு தண்ணீர் அளந்துவிட்டு ஒரு டீஸ்பூன் நல்லெண்ணெய், ஒரு சிட்டிகை உப்பு சேர்த்து தண்ணீர் கொதித்ததும் மாவைத் தூவி கிளறி இறக்கவும். தேங்காயைத் துருவி வெல்லம் சேர்த்து மிக்ஸியில் அரைத்து, வாணலியில் போட்டு கெட்டியாகக் கிளறி, ஏலக்காய்த்தூள் சேர்த்து இறக்கவும். உளுத்தம்பருப்பை ஒரு மணி நேரம் ஊறவைத்து தண்ணீர் வடித்து காய்ந்த மிளகாய் சேர்த்து, தேவையான உப்பு சேர்த்து மிக்ஸியில் கெட்டியாக அரைத்து, இட்லித் தட்டில் வேகவைத்து எடுத்து உதிர்த்து, கடுகு தாளித்து பெருங்காயத்தூள் சேர்த்துக் கலந்து வைக்கவும். கிளறிய அரிசி மாவை மூன்று பங்குகளாகப் பிரிக்கவும். ஒரு பங்கு மாவை நன்கு பிசைந்து சிறு உருண்டைகளாக உருட்டி சிறு கிண்ணம் போல சொப்பு செய்யவும். தேங்காய் பூரணத்தை சிறு உருண்டைகளாக உருட்டி உள்ளே வைத்து மூடி இட்லி தட்டில் வைத்து வேகவிடவும். இன்னொரு பங்கு அரிசி மாவைச் சிறு உருண்டைகளாக உருட்டி சொப்பு செய்து உள்ளே உளுத்தம் பூரணம் வைத்து நீளவாக்கில் மூடவும். மீதமுள்ள அரிசி மாவுடன் இட்லி மிளகாய்ப்பொடி, தேங்காய்த் துருவல், பெருங்காயத்தூள் சேர்த்து கடுகு தாளித்து நன்கு பிசைந்து சீடைபோல உருட்டி இட்லி தட்டில் வேகவைத்து எடுக்கவும். இப்படி தயாரிக்கும் கொழுக்கட்டையை அம்மணிக் கொழுக்கட்டை என்பார்கள்.

சிறப்பு: இனிப்பு, காரம், உப்பு மூன்று கலவையுடன் இந்த கொழுக்கட்டைகள் மிகவும் ருசியாக இருக்கும்.

பண்டிகைக் கோலாகலம்!

டி வெள்ளி, ஆடிப்பெருக்கு, கிருஷ்ண ஜயந்தி, விநாயகர் சதுர்த்தி, ஆவணி அவிட்டம் என பண்டிகைகள் வரிசைகாட்டி நிற்கும் நேரம் ஆடி, ஆவணி மாதங்கள். பண்டிகைகளின்போது நைவேத்தியங்களை நம் கைப்படத் தயாரித்து கடவுளுக்குப் படைத்து, குடும்பத்தினர், அக்கம்பக்கத்தினர், உறவுகளுக்கு அளித்து மகிழும்போது கிடைக்கும் மன நிறைவே அலாதிதான்! அந்த மன நிறைவு உங்களுக்கு முழுமையாகக் கிடைக்கும் விதத்தில் பண்டிகைகளின்போது செய்யக்கூடிய உணவு வகைகளைத் தயாரிக்க உதவிக்கரம் நீட்டுகிறார் சென்னையைச் சேர்ந்த சமையற்கலைஞர் நங்கநல்லூர் பத்மா.

ஆடி, ஆவணி 30 வகை பண்டிகை ரெசிப்பிகள்

கலந்த சாதம், பாயசம், மாவிளக்கு, லட்டு, சீடை, முறுக்கு, கொழுக்கட்டை, தேன்குழல், அக்கார அடிசில் எனப் பல்வேறு பிரசாதங்களை இங்கே வழங்கும் பத்மா, ``இந்தப் பண்டிகைக் காலத்தில் உங்கள் இல்லங்களிலும் உள்ளங்களிலும் மகிழ்ச்சி நிறைந்திருக்க எல்லாம் வல்ல ஆண்டவனை வேண்டிக் கொள்கிறேன்’’ என்று மனம் நெகிழ்ந்து கூறுகிறார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism