Published:Updated:

சமையல் சந்தேகங்கள்

சமையல் சந்தேகங்கள்
பிரீமியம் ஸ்டோரி
சமையல் சந்தேகங்கள்

எஸ்.ராஜகுமாரி

சமையல் சந்தேகங்கள்

எஸ்.ராஜகுமாரி

Published:Updated:
சமையல் சந்தேகங்கள்
பிரீமியம் ஸ்டோரி
சமையல் சந்தேகங்கள்

டிப்பெருக்கு, ஆடிப்பூரம், வரலட்சுமி விரதம், ஆவணி அவிட்டம், கோகுலாஷ்டமி, ஆடிக்கிருத்திகை, ஆடி அமாவாசை என ஆகஸ்ட் மாதத்தில் பெரும்பான்மையான பண்டிகைகள் வந்துவிடும். இப்படி பண்டிகைகள் அணிவகுக்கும்போது... மாவிளக்கு போடுதல், ஆடிக்கூழ் ஊற்றுதல், பட்சணங்கள் தயாரித்தல் போன்றவை தொடர்பாக சந்தேகங்கள் வரத்தானே செய்யும்! அவற்றுக்கான பதில்களை அக்கறையுடன் வழங்குகிறார் சமையல் கலைஞர் எஸ்.ராஜகுமாரி.

சமையல் சந்தேகங்கள்

மாவிளக்கை முன்கூட்டியே (முதல் நாளே) தயாரித்துவைத்தால் அதை மறுநாள் படைக்கும்போதும், இரண்டு நாள்கள் கழித்து நாம் உண்ணும் போதும் கெடாமல் இருக்க என்ன செய்வது?

மாவிளக்கு போடுவதற்கு உலர் அரிசி மாவு தயாரிக்க வேண்டும் (அரிசியை ஊறவைத்து, வடிகட்டி துணியில் போட்டு நிழலில் உலர்த்தி அரைக்கவும்). அரை கிலோ அரிசி மாவு என்றால் 50 கிராம் நெய் சேர்க்க வேண்டும். அரிசி மாவு, தேவையான வெல்லம் (பொடித்தது), நெய் சேர்த்துப் பிசைந்து (சிறிதளவு மட்டும் நீர் சேர்த்து) நாம் கைகளால் பிசையப் பிசைய வெல்லம், நெய் இரண்டுமே கரைந்து மாவைப் பிசைவதற்கு வேண்டிய ஈரப்பதத்தைக் கொடுத்துவிடும். இந்த முறையில் மாவிளக்கு தயாரித்தால் சுவையும் கூடும்; கெடாமலும் இருக்கும்.

ஒட்டுமொத்த விகடனுக்கும் ஒரே ஷார்ட்கட்!

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

ஆடிக்கூழின் சுவையைக் கூட்ட என்ன செய்ய வேண்டும்?

மண்பாத்திரத்தில் அரிசி நொய்யை வேகவிட்டு, கரைத்த கேழ்வரகு மாவைச் சேர்த்து அகப்பை அல்லது மரத்துடுப்புக்கொண்டு கிளறி வேகவிடவும். இதை முதல்நாள் இரவே செய்து மறுநாள் காலை கரைத்து மோர் சேர்த்துப் படைக்க வேண்டும். வேகும்போது கைகளால் தொட்டுப்பார்த்தால் ஒட்டாமல் வந்தால் மாவு வெந்துவிட்டதாக அடையாளம். மாவு புளித்திருந்தால்தான் சுவை அதிகமாக இருக்கும்.

ஆடிப்பெருக்கு அன்று செய்து படைக்கும் கலவை சாதங்கள் உதிர் உதிராக வரவும் சுவையை அதிகப்படுத்தவும் என்ன செய்யலாம்?

சாதம் வேகும்போது ஒரு ஸ்பூன் நல்லெண்ணெய் சேர்க்கலாம் அல்லது வெந்த சாதத்தைத் தட்டில் கொட்டி அதன்மேல் ஒரு ஸ்பூன் நல்லெண்ணெயைப் பரவலாகத் தடவலாம். உதிர் உதிரான சாதம் தயார். எலுமிச்சை, தேங்காய் சாதம் தயாரிக்கும்போது பச்சை மிளகாய் பாதி, காய்ந்த மிளகாய் பாதி சேர்த்துத் தாளித்தால் சுவை அதிகமாகும். எள் சாதம் தயாரிக்கும்போது காய்ந்த மிளகாய், உளுந்து, தேங்காய்த் துருவல் சிறிதளவு ஆகியவற்றை வறுத்து, எள்ளை வறுத்து அனைத்தையும் பொடித்து, உப்பு, பெருங்காயத்தூள் சேர்த்துக் கலந்தால் எள் சாதத்தின் சுவை கூடுதலாக இருக்கும்.

சமையல் சந்தேகங்கள்

ஆடிப்பூரத்துக்குத் தயாரிக்கும் புட்டின் பதம் எப்படி இருக்க வேண்டும்?

அரிசி மாவில் உப்புத் தண்ணீர் சேர்த்துப் பிசிறி ஆவியில் வேகவைக்கும்போது மாவின் பதம் கைகளால் பிடித்தால் பிடிக்கும் விதத்தில் இருக்க வேண்டும். அந்த மாவை உதிர்த்தால் உதிர வேண்டும். இதுதான் சரியான பதம். பாகு வைக்கும்போது பாதியளவு வெல்லம், பாதியளவு சர்க்கரை சேர்த்துப் பாகுவைத்தால் புட்டின் சுவை அதிகரிக்கும்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

ஆடி அமாவாசை, முன்னோர்களின் திதி அன்று செய்து படைக்கும் மோர்க்குழம்பில் போடும் வடை கரையாமலும் நன்றாக ஊறியும் இருக்க என்ன செய்ய வேண்டும்?

உளுந்து, துவரம்பருப்பு இரண்டையும் சம அளவில் எடுத்து ஒன்றாகச் சேர்த்து ஊறவைத்து, ஊறியதும் காய்ந்த மிளகாய், உப்பு சேர்த்து கொரகொரப்பாக அரைத்து வடைகளாகத் தட்டி சூடான எண்ணெயில் போட்டுப் பொரித்து எடுக்கவும். பொரித்த வடைகளை வெந்நீரில் முக்கியெடுத்து, பிறகு நாம் தயாரித்த மோர்க்குழம்பில் சேர்க்கவும். இரண்டு மணி நேரம் ஊறியதும் எடுத்துப் பரிமாறினால், வடை கரையாமலும் நன்றாக ஊறியும் இருக்கும்.

சமையல் சந்தேகங்கள்

ஆவணி அவிட்டத்துக்குச் செய்யும் அப்பம், போளி பதம் எப்படி இருக்க வேண்டும்?

  • அப்பத்துக்கு வெல்லத்தின் அளவு சற்றுக் கூடினாலும் எண்ணெயில் பிரிய ஆரம்பிக்கும். மாவின் அளவுக்குத் தேவையான வெல்லத்தைச் சிறிதளவு குறைத்துப் போட்டு ஒரு டீஸ்பூன் உப்பைச் சேர்த்துக் கலந்தால் வெல்லத்தின் சுவையைத் தூக்கிக்காட்டும். எண்ணெயிலும் பிரியாது.

  • போளிக்கு மேல் மாவு பிசையும்போது மைதாவுடன், ஒரு கப் மைதாவுக்கு 2 டேபிள்ஸ்பூன் வெண்ணெய், ஒரு டேபிள்ஸ்பூன் ரவை சேர்த்து சப்பாத்தி மாவைவிட சற்றுத் தளர்வாகப் பிசைந்து ஒரு மணி நேரம் ஊற விட்டு பிறகு போளி தயாரிக்க வேண்டும்.

  • வெல்லம், தேங்காய், கடலைப்பருப்பு சேர்ந்து வேகவிட்டு சற்றுக் கொரகொரப்பாக அரைக்கவும். பூரணம் தயார். கொரகொரப்பாக அரைத்தால்தான் மேல் மாவில் பூரணத்தை வைத்து போளி தயாரித்தால் சுவையாக இருக்கும்.

  • வாழையிலையில் எண்ணெய் தடவி போளி தயாரித்தாலும் சுவை சற்றுக் கூடுதலாக இருக்கும்.

கோகுலாஷ்டமிக்கு படைப்பதற்குத் தயாரிக்கும் தட்டை, முறுக்கு, தேன்குழல், சீடைகள், அவல் பலகாரங்களின் சுவையைக் கூட்ட ஸ்பெஷல் டிப்ஸ் உண்டா...

  • தட்டை தயாரித்தவுடன் எண்ணெயில் போடுவதற்கு முன்பு தட்டையை 4, 5 இடங்களில் ஃபோர்க்கால் குத்திவிட்டு பிறகு பொரித்தால் எண்ணெய் முழுவதுமாகப் பரவி தட்டை நன்றாக வெந்து கரகரப்பாக, சுவையாக இருக்கும்.

  • தேன்குழல் தயாரிக்கும்போது வெண் ணெயை மாவுடன் சேர்த்துப் பிசைவதற்குப் பதிலாக சூடான எண்ணெய் 4 டேபிள்ஸ்பூன் சேர்த்துப் பிசைந்து தேன்குழல் செய்தால், தேன்குழல் கம்பிகள் எண்ணெயில் பிரியாமல் முழு தேன்குழலாக வரும்.

சமையல் சந்தேகங்கள்
  • முறுக்கு மாவு பிசையும்போது மாவை மொத்தமாகத் தண்ணீர்விட்டுப் பிசைந்து வைத்தால் மாவு புளித்து முறுக்கு சிவந்துவிடும். மொத்த மாவை நான்கு பாகங்களாகப் பிரித்து ஒரு பாகத்துடன் தேவையான அளவு உப்பு, வெண்ணெய், சீரகம் சேர்த்து அளவாக நீர்விட்டு பெருங்காயத்தூள் சேர்த்துப் பிசைந்து பொரித்தெடுத்தால் முறுக்கு வெண்மையாகவும், கரகரப்பாகவும் இருக்கும். இதே மாதிரி மீதியுள்ள ஒவ்வொரு பாகத்தையும் தயாரித்து (ஒரு பங்கு தயாரித்து முடித்தவுடன்) எண்ணெயில் பொரித்து எடுக்கவும்.

  • கார முறுக்கு தயாரிக்கும்போது மிளகாய்த்தூள் சேர்த்தால் சிவந்துவிடும். தேவையான மிளகாய்களை (காய்ந்த மிளகாய்) நீரில் அரை மணி நேரம் ஊறவைத்து உப்பு, பெருங்காயம் சேர்த்து அரைத்து மாவில் சேர்த்துக் கலந்து முறுக்கு பிழிந்தால் முறுக்கு சிவக்காமல் அதிக சுவையுடன் இருக்கும்.

  • கிருஷ்ண ஜயந்தி அன்று அவல் பாயசம் செய்யும்போது அவலை நெய்யில் வறுத்து, மிக்ஸியில் ஒரு சுற்று சுற்றி எடுத்து, பாலில் வேகவைத்து சர்க்கரை, ஏலக்காய், உலர் பருப்புகள் வறுத்துச் சேர்த்தால் பாயசம் பார்ப்ப தற்கு நன்றாகவும், மிகுந்த சுவையுடனும் இருக்கும்.

  • சீடை செய்து துணியில் அரை மணி நேரம் உலர்த்திய பிறகுதான் நிறைய எண்ணெய் வைத்து நிறைய சீடைகள் மூழ்கும் அளவு போட வேண்டும். குறைந்த சீடைகளை நிறைய எண்ணெயில் போட்டால் சீடை வெடிக்கும். சீடைகளை உருட்டும்போது அழுத்தி வழவழப்பாக உருட்டக் கூடாது. லேசாக கைகளால் உருட்டி அப்படியே போட வேண்டும்.

வரலட்சுமி விரதத்துக்குச் செய்து படைக்கும் கர்ஜிக்காயின் பூரணம் சரியான பதத்தில் எப்படி செய்வது?

எள்ளை வெறும் வாணலியில் சிவக்க வறுத்து மிக்ஸியில் சேர்த்து நிறுத்தி, நிறுத்தி குறைந்த வேகத்தில் இயக்க வேண்டும் (அதிக வேகத்தில் மிக்ஸியை ஓடவிட்டால் எள்ளில் இருக்கும் எண்ணெய் கிளம்பி எள் மிக்ஸி ஜாரில் ஒட்டிக்கொள்ளும்). இறுதியில் வெல்லத்தைத் தூளாக்கி எள்ளில் சேர்த்து மீண்டும் ஒருமுறை சுற்றினால் உலர் பூரணம் தயார்.

ஆடிப்பெருக்கு அன்று படைக்கும் சுருள் அரிசி வெல்லத்தில் நன்றாக ஊறாமல் நறுக்கென்று இருக்கிறதே... என்ன செய்ய?

அரிசியை வெறும் வாணலியில் வறுத்து ரவை பதத்துக்கு உடைத்து, அதை ஒரு தட்டில் பரப்பி சூடான வெந்நீரைச் சிறிதளவு எடுத்து உடைத்த அரிசி ரவையின் மேல் தெளிக்கவும். 5 நிமிடங்கள் கழித்து அந்த அரிசியை கைகளால் மேலும் கீழுமாகப் புரட்டிவிட்டு மீண்டும் சிறிதளவு வெந்நீரைத் தெளித்து மூடிவைக்கவும். பிறகு 10 நிமிடங்கள் கழித்து வெல்லம், தேங்காய், பொட்டுக்கடலை சேர்த்து வைத்த பாகை இறக்கிவைத்து, பாதி ஆறியபின் அரிசி ரவையைச் சேர்த்துக் கலந்துவிடவும். காலையில் இதைச் செய்தால் மாலையில் பதமாக நன்றாக ஊறிவிடும்.

ஆடிக்கிருத்திகைக்கு வெங்காயம் சேர்க்காமல் வடை செய்யும்போது சுவைகூட்ட என்னென்ன சேர்க்க வேண்டும்?

வடை மாவுடன் ஒன்றிரண்டாக உடைத்த மிளகு, துருவிய இஞ்சி, கறிவேப்பிலை, கொத்த மல்லித்தழை, பெருங்காயத்தூள், மிகப்பொடியாக நறுக்கிய தேங்காய்க் கீறல்கள் சேர்த்துப் பிசைந்து, பொடியாக நறுக்கிய பச்சை மிளகாய் கலந்து (மிளகு சேர்ப்பதால், பச்சை மிளகாயின் அளவைக் குறைத்துக்கொள்ளலாம்), வடைகளாகத் தட்டிப்போட்டு எடுத்துக் கடவுளுக்குப் படைக்கலாம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism