Published:Updated:

சமையல் சந்தேகங்கள்: அடுத்த விருந்து எப்போ? இதோ இப்போ!

சஃப்ரானி புலாவ்
பிரீமியம் ஸ்டோரி
News
சஃப்ரானி புலாவ்

10, +2 தேர்வுகள் நெருங்கும் இந்த நேரத்தில் படிக்கும் மாணவர் களுக்கு என்னென்ன சத்தான, பசிதாங்கக்கூடிய உணவு

திருமண விருந்து என்றாலே தனிச் சிறப்புதான். இலையில் வரிசையாக வைக்கப்படும் உணவுப் பொருள்களைப் பார்க்கும்போதே பாதி வயிறும் மனமும் நிறைந்துவிடும். பிறகு ஒவ்வொன்றாக ருசி பார்த்து மிகவும் பிடித்தவற்றை `ஒன்ஸ்மோர்’ கேட்டு சாப்பிட்டு எழும்போது, அடுத்த விருந்து எப்போது என்று மனம் கணக்குப்போடும். திருமண வீடுகளில் பரிமாறப்படும் உணவுகளைச் சாப்பிட்டதும் `நாமும் நமது வீட்டில் இவ்வாறு செய்து சுவைக்க முடியுமா... இவற்றை எப்படிச் சமைப்பது?’ என்ற சந்தேகங்கள் எழும்.

சமையல் சந்தேகங்கள்: அடுத்த விருந்து எப்போ? இதோ இப்போ!

10, +2 தேர்வுகள் நெருங்கும் இந்த நேரத்தில் படிக்கும் மாணவர் களுக்கு என்னென்ன சத்தான, பசிதாங்கக்கூடிய உணவுகளை, எளிதில் ஜீரணமாகக்கூடிய உணவுகளை சமைத்துக் கொடுப்பது என்ற சந்தேகங்கள் பெற்றோர்களுக்கு வந்துவிடும். இந்த இரு சந்தேகங்களுக்கான விடைகள் இங்கே…

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
சமையல் சந்தேகங்கள்
சமையல் சந்தேகங்கள்

கோதுமை ரவை அல்வா செய்வது எப்படி?

எந்த கப்பில் கோதுமை ரவை எடுத்தாலும் அதைப்போல மூன்று மடங்கு தண்ணீர்விட்டு மூன்று மணி நேரம் ஊறவிடவும். ஊறியதும் ஒரு துணியில் வடிகட்டவும். துணியின் மேலே தங்கிய சக்கையில் மேலும் 2 கப் நீர்விட்டு நன்கு கைகளால் கலக்கி மீண்டும் துணியில் வடிகட்டவும். சக்கையை எடுத்துவிட்டு முதலில் வடிகட்டிவைத்துள்ள பால், இரண்டாவது வடிகட்டிவைத்துள்ள பால் இரண்டையும் சேர்த்துக் கலந்து ஒரு கப்பில் ஊற்றி அளக்கவும். எவ்வளவு பால் உள்ளதோ அதில் பாதி அளவு சர்க்கரையைச் சேர்த்து பாலில் கலந்து அடிகனமான பாத்திரத்தில் ஊற்றி, அடுப்பை `சிம்’மில் வைத்து, கைவிடாமல் கிளறவும். அல்வா பவுடர் சிறிதளவு சேர்க்கவும். ஏலக்காய்த்தூள் சேர்க்கவும். இடையிடையே நெய் சேர்க்கவும். ஒரு டேபிள்ஸ்பூன் நெய்யில் ஒரு டேபிள்ஸ்பூன் முந்திரித் துண்டுகளை வறுத்துச் சேர்க்கவும்.

கோதுமை ரவை அல்வா
கோதுமை ரவை அல்வா

அல்வா பவுடருக்குப் பதில் 2 டேபிள்ஸ்பூன் சர்க்கரையை கறுக வறுத்து ஒரு டீஸ்பூன் நீர்விட்டு நன்கு கொதிக்கவிட்டு அதைச் சேர்க்கலாம்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

கல்யாண ரசம் தயாரிப்பது எப்படி? அதில் என்னென்ன பொருள்கள் விசேஷமாகச் சேர்க்கப் வேண்டும்?

கல்யாண வீடுகளில் தயாரிக்கப்படும் ரசம் புளி குறைவாகச் சேர்க்கப்பட்டு தக்காளி அதிகமாகச் சேர்க்கப்படுகிறது. ரசம் தயாரித்து முடித்ததும் தாளிப்பு (எண்ணெய்க்குப் பதில்) நெய்யில் வறுத்துச் சேர்க்கப்படுகிறது.

கல்யாண ரசம்
கல்யாண ரசம்

செய்முறை: வெறும் வாணலியில் தனியா - 2 டீஸ்பூன், மிளகு - ஒரு ஸ்பூன், சீரகம் - ஒரு டீஸ்பூன், கறிவேப்பிலை - 6 இதழ்கள் வறுத்து மிக்ஸியில் கொரகொரப்பாகப் பொடிக்க வேண்டும். அடுத்து வாணலியில் ஒரு டேபிள்ஸ்பூன் எண்ணெய்விட்டு நறுக்கிய தக்காளி - 2, நறுக்கிய பூண்டுப் பல் - ஒன்று, கறிவேப்பிலை இலைகள் 3 சேர்த்து வறுக்கவும். புளிக்கரைசல் - கால் கப், மஞ்சள்தூள் - ஒரு டீஸ்பூன், தேவையான அளவு நீர்விட்டு இரண்டு கொதிவிட்டு கால் கப் வெந்து மசிந்த துவரம்பருப்புக் கரைசல் ஊற்றி ஒரு கொதி வந்ததும் பொடித்துவைத்துள்ள பொடியைத் தூவி, இறுதியில் உப்பு சேர்க்கவும். வாணலியில் ஒரு டேபிள்ஸ்பூன் நெய்விட்டு கடுகு - ஒரு டீஸ்பூன், காய்ந்த மிளகாய் - 2, சீரகம் - கால் டீஸ்பூன், பெருங்காயத்தூள் - கால் டீஸ்பூன், கறிவேப்பிலை 3 இதழ்கள் வறுத்து கொதிக்கும் ரசத்தில் சேர்த்து இறக்கவும். பொடியாக நறுக்கிய கொத்தமல்லித்தழை சிறிதளவு தூவவும்.

திருமண வீடுகளில் பரிமாறப்படும் சஃப்ரானி புலாவ் (Zafrani Pulao) செய்வது எப்படி? இதைக் குங்குமப்பூவின் சரியான நிறம் வெளிப்படும் வகையில் செய்வது எப்படி?

வாணலியைச் சூடாக்கி அடுப்பை அணைத்துவிடவும். அதில் ஒரு டீஸ்பூன் குங்குமப்பூவை ஐந்து நிமிடங்கள் போட்டு ஒரு கரண்டி யால் நசுக்கி 4 டேபிள்ஸ்பூன் வெதுவெதுப்பான பாலை ஊற்றி 10 நிமிடங்கள் வைத்திருக்கவும். புலாவ் தயாரிக்கும்போது புலாவை இறக்குவதற்கு ஐந்து நிமிடங்கள் முன்பு இதைச் சேர்த்துக் கிளறிவிடவும். சரியான நிறத்தில் சஃப்ரானி புலாவ் செய்யலாம்.

சஃப்ரானி புலாவ்
சஃப்ரானி புலாவ்

புலாவ் செய்வதற்குத் தேவையான பொருட்கள்:

  • பாஸ்மதி அரிசி - ஒரு கப்

  • நெய் - 6 டேபிள்ஸ்பூன்

  • பாதாம், முந்திரி, உலர் திராட்சை - தலா 3 டேபிள்ஸ்பூன்

  • மெலிதாக நீளவாக்கில் நறுக்கிய

  • பெரிய வெங்காயம் - 5 டேபிள்ஸ்பூன்

  • பச்சை மிளகாய் - 2 (நறுக்கவும்)

  • ஏலக்காய் - ஒன்று

  • பிரியாணி இலை - ஒன்று

  • பட்டை - ஒரு சிறிய துண்டு

  • எண்ணெய் - 6 டேபிள்ஸ்பூன்

  • உப்பு - தேவைக்கேற்ப

செய்முறை:

வாணலியில் 6 டேபிள்ஸ்பூன் நெய் ஊற்றி பாதாம், முந்திரி, திராட்சையை வறுத்துத் தனியே வைக்கவும். அதே வாணலியில் வெங்காயத்தைப் பொரித்துத் தனியே வைக்கவும். எண்ணெயில் ஏலக்காய், பிரியாணி இலை, பட்டை, பச்சை மிளகாய் ஆகியவற்றை வதக்கி பாஸ்மதி அரிசியைக் கழுவிச் சேர்த்து வதக்கி 2 கப் நீர் விட்டு உப்பு சேர்த்து வேகவிடவும். எல்லாமாகச் சேர்த்து முக்கால் பதம் வெந்ததும் கரைத்து வைத்துள்ள குங்குமப்பூவைப் பாலுடன் சேர்த்துக் கலந்து, வறுத்து வைத்துள்ள பாதாம், முந்திரி, திராட்சையைச் சேர்த்துக் கலந்து பொரித்து வைத்துள்ள வெங்காயம் சேர்த்து, முழுவதுமாக வெந்ததும் இறக்கவும். சஃப்ரானி புலாவ் தயார்.

பீன்ஸ், கொத்தவரை பருப்பு உசிலி சாப்பிட்டிருக்கிறோம். மூவண்ண குடமிளகாய் பருப்பு உசிலி செய்வது எப்படி?

தேவையானவை:

  • கடலைப்பருப்பு - ஒரு கப்

  • காய்ந்த மிளகாய் - 2

  • பெருங்காயத்தூள் - ஒரு டீஸ்பூன்

  • தேங்காய்த் துருவல் - 4 டேபிள்ஸ்பூன்

  • மஞ்சள்தூள் - ஒரு டீஸ்பூன்

  • கடுகு - ஒரு டீஸ்பூன்

  • உளுத்தம்பருப்பு - ஒரு டேபிள்ஸ்பூன்

  • மஞ்சள், பச்சை, சிவப்பு குடமிளகாய்கள் (நறுக்கியது) - தலா அரை கப்

  • எண்ணெய் - 5 டேபிள்ஸ்பூன்

  • உப்பு - தேவைக்கேற்ப

மூவண்ண குடமிளகாய் பருப்பு உசிலி
மூவண்ண குடமிளகாய் பருப்பு உசிலி

செய்முறை:

கடலைப்பருப்பைக் கழுவி நீர்விட்டு காய்ந்த மிளகாயுடன் சேர்த்து ஒரு மணி நேரம் ஊறவிடவும். ஊறியதும் நீரை வடிகட்டி உப்பு சேர்த்து கொரகொரப்பாக அரைக்கவும். அரைத்த விழுதில் மஞ்சள்தூள், பெருங்காயத்தூள் சேர்க்கவும். வாணலியில் 2 டேபிள்ஸ்பூன் எண்ணெய்விட்டு அரைத்த விழுதை வதக்கி நன்றாக உதிர்த்துவிடவும். தனியே வைக்கவும். வாணலியில் மீதியுள்ள 3 டேபிள்ஸ்பூன் எண்ணெய்விட்டு கடுகு, உளுத்தம் பருப்பு தாளித்து நறுக்கிய குடமிளகாய்களை வதக்கி, உப்பு சேர்த்து, உதிர்த்த கடலைப் பருப்பைச் சேர்த்துப் புரட்டி தேங்காய்த் துருவல் தூவி இறக்கவும். எல்லாவற்றையும் நன்றாகக் கலந்து விடவும். மூவண்ண குடமிளகாய் உசிலி தயார்.

விரதத்தின்போது சாப்பிடவும், பகவானுக்குப் படைக்கவும் ஏற்ற கேரட் கோசம்பரி செய்வது எப்படி?

தேவையானவை:

  • துருவிய கேரட் - ஒரு கப்

  • பொடியாக நறுக்கிய பச்சை மிளகாய் - ஒரு டீஸ்பூன்

  • ஊறவைத்து வடிகட்டிய பயத்தம்பருப்பு - 4 டேபிள்ஸ்பூன்

  • மாதுளை முத்துகள் - 3 டேபிள்ஸ்பூன்

  • நறுக்கிய வெள்ளரிப் பிஞ்சு - 2 டேபிள்ஸ்பூன்

  • தேங்காய்த்துருவல் - 2 டேபிள்ஸ்பூன்

  • எலுமிச்சைச்சாறு - 1 டேபிள்ஸ்பூன்

  • கொத்தமல்லித்தழை - 2 டேபிள்ஸ்பூன்

  • உப்பு - தேவைக்கேற்ப

செய்முறை:

கொடுக்கப்பட்டுள்ள பொருள்கள் அனைத்தை யும் ஒரு பாத்திரத்தில் சேர்த்துக் கலக்கவும். பகவானுக்குப் படைத்த பின்பு உண்ணவும். விரத நாள்களுக்கு ஏற்ற உணவு இது.

திருமண வீடுகளில் பரிமாறப்படும் தஹி பாலே (Dahi Bhalle) எப்படித் தயாரிப்பது?

தேவையானவை:

  • முழு வெள்ளை உளுந்து - முக்கால் கப்

  • பயத்தம்பருப்பு - கால் கப்

  • பெருங்காயத்தூள் - ஒரு டீஸ்பூன்

  • கெட்டித் தயிர் - ஒரு கப்

  • புதினாச் சட்னி - 5 டேபிள்ஸ்பூன்

  • புளிச் சட்னி - 3 டேபிள்ஸ்பூன்

  • மாதுளை முத்துகள் - 4 டேபிள்ஸ்பூன்

  • காராபூந்தி - 4 டேபிள்ஸ்பூன்

  • மிளகாய்த்தூள் - ஒரு டேபிள்ஸ்பூன்

  • சீரகத்தூள் - ஒரு டீஸ்பூன்

  • உலர்திராட்சை - 2 டேபிள்ஸ்பூன்

  • பச்சை மிளகாய் - 2

  • சீரகம் - ஒரு டீஸ்பூன்

  • உப்பு - தேவைக்கேற்ப

  • எண்ணெய் - பொரிப்பதற்குத் தேவையான அளவு

தஹி பாலே
தஹி பாலே

செய்முறை :

உளுந்து, பயத்தம்பருப்பு இரண்டையும் தனித்தனியாக நீர்விட்டு ஒரு மணி நேரம் ஊறவிடவும். பிறகு நீரை வடிகட்டி இரண்டையும் தனித்தனியாக அரைக்கவும். அரைத்ததும் இரண்டையும் ஒரு பாத்திரத்தில் போட்டு நன்றாகக் கலந்து `விஸ்க்’கால் ஒருமுறை அடித்து உலர்திராட்சை, சீரகம், நறுக்கிய பச்சை மிளகாய் சேர்ந்து எல்லா வற்றையும் நன்கு கலக்கவும். வாணலியில் எண்ணெயை காயவைத்து, மாவைக் கிள்ளிப் போட்டு போண்டாக்களாகப் பொரித்தெடுக்கவும். எண்ணெயை வடிய விடவும். ஒரு பாத்திரத்தில் போண்டாக்கள் மூழ்கும் அளவு நீர் ஊற்றி அதில் உப்பு, பெருங்காயத்தூள் சேர்த்துக் கலந்து பொரித்த போண்டாக்களைச் சேர்த்து 20 நிமிடங்கள் ஊறவிடவும். பிறகு ஒரு தட்டில் ஒவ்வொரு போண்டாவாக எடுத்துவைத்து அதன் மேலே தயிரைப் பரவலாக ஊற்றி, மேலே சீரகத்தூள், மிளகாய்த்தூள், பரவலாக உப்பு, புளி சட்னி, புதினா சட்னி, அதன் மேலே காராபூந்தியில் சிறிது தண்ணீர் தெளித்த பிறகு தூவி, அதன் மேலே மாதுளை முத்துகளைத் தூவவும். தஹி பாலே தயார்.

தேர்வு எழுதும் மாணவர்களுக்குச் சத்தான ஓட்ஸ் ஸ்மூத்தி செய்வது எப்படி?

தேவையானவை:

  • ஓட்ஸ் - கால் கப்

  • ஆப்பிள் - ஒன்று

  • பேரீச்சை (விதை நீக்கியது) - 4

  • பால் - ஒரு கப்

  • தேன் - ஒரு டேபிள்ஸ்பூன்

மேலே தூவுவதற்கு:

  • மெலிதாகச் சீவிய பாதாம் - 2 டேபிள்ஸ்பூன்

ஓட்ஸ் ஸ்மூத்தி
ஓட்ஸ் ஸ்மூத்தி

செய்முறை:

ஒரு பாத்திரத்தில் ஓட்ஸ் போட்டு வெதுவெதுப்பான பால் ஊற்றி, பொடியாக நறுக்கிய ஆப்பிள், பொடியாக நறுக்கிய பேரீச்சை சேர்த்து 20 நிமிடங்கள் ஊறவிடவும். ஊறியதும் ஒரு டேபிள்ஸ்பூன் தேனையும் சேர்த்து பிளெண்டர் (அ) மிக்ஸியில் போட்டு அடிக்கவும். தேவைப்பட்டால் மேலும் அரை கப் குளிர்ந்த பாலையும் சேர்த்துக் கலக்கவும். மேலே சீவிய பாதாம் சேர்த்துப் பரிமாறவும். பாதாம் நினைவாற்றலையும் மற்ற பொருள்கள் இரும்புச்சத்து, வைட்டமின் சி இன்னும் பல சத்துகளையும் அளித்து தேர்வுக்குத் தயாராகும் மாணவர்களுக்கு எனர்ஜி பூஸ்டராக உதவும்.

தேர்வு எழுதும் மாணவர்களுக்கு கேழ்வரகு வெஜிடபிள் அடை செய்து கொடுப்பது எப்படி?

தேவையானவை:

  • கேழ்வரகு மாவு - 2 கப்

  • கொரகொரப்பாக பொடித்த மிளகு - சீரகத்தூள் - ஒரு டீஸ்பூன்

  • நெய் (அ) எண்ணெய் - 4 டேபிள்ஸ்பூன்

  • உப்பு - தேவைக்கேற்ப

  • மெலிதாக, பொடியாக நறுக்கிய கேரட், பீன்ஸ், முட்டைகோஸ், பெரிய வெங்காயம் - (எல்லாம் சேர்த்து) - ஒரு கப்.

கேழ்வரகு வெஜிடபிள் அடை
கேழ்வரகு வெஜிடபிள் அடை

செய்முறை:

ஒரு பாத்திரத்தில் 4 கப் தண்ணீரைக் கொதிக்க வைத்து உப்பு, மிளகு - சீரகத்தூள் சேர்த்து, கேழ்வரகு மாவைச் சேர்த்து நறுக்கிய காய்கறிகள் சேர்த்து வேகவிடவும். மாவு, காய்கறிகள் வெந்து எல்லாமாகச் சேர்த்து வந்ததும் தேவையான அளவு மாவை எடுத்து தவாவில் அடைகளாகத் தட்டவும். ஓரங்களில் நெய் (அ) எண்ணெய் ஊற்றி ஒருபுறம் வெந்ததும் திருப்பிப் போட்டு மறுபுறமும் வெந்ததும் எடுக்கவும். இதற்குத் தொட்டுக்கொள்ள எதுவுமே தேவையில்லை. தேர்வு எழுதும் மாணவர் களுக்கு இந்த கேழ்வரகு வெஜிடபிள் அடை நல்ல எனர்ஜியைக் கொடுக்கும்.