Published:Updated:

பொட்டேட்டோ ரெசிப்பி

ஒட்டுமொத்த விகடனுக்கும் ஒரே ஷார்ட்கட்

Use App
சைனீஸ் உருளைக்கிழங்கு சேமியா உப்புமா
சைனீஸ் உருளைக்கிழங்கு சேமியா உப்புமா

ரெசிப்பிஸ் மற்றும் படங்கள்: பார்வதி

பிரீமியம் ஸ்டோரி

``சிறு வயதிலேயே எனக்கு சமையலின் மீதும் வித்தியாசமான உணவு வகைகள் மீதும் நிறைய ஆர்வம் உண்டு. அசைவ விரும்பியாகிய நான் பிறந்தது சைவ குடும்பத்தில். என் அம்மா சைவம் என்பதால் வீட்டில் நானே அசைவ உணவுகள் செய்ய ஆரம்பித்தேன். தொலைக்காட்சியில் வரும் உணவுகளை உடனுக்குடன் சமைப்பேன்.

உருளைக்கிழங்கு ரவை ஸ்டிக்ஸ்
உருளைக்கிழங்கு ரவை ஸ்டிக்ஸ்
பார்வதி
பார்வதி

சமையல் மற்றும் தமிழின் மீது எனக்கு இருந்த ஆர்வம் என்னை ரெசிப்பிகள் பகிரும் `குக்பேட்’ இணைய தளத்தில் இணைத்தது. இந்தியாவில் மட்டும் கிட்டத்தட்ட 2 லட்சம் வித்தியாசமான ரெசிப்பிகள் இருக்கின்றன. `குக்பேட்’ சமையல் ஆர்வலர்களை இணைக்கிறது. இதில் ரெசிப்பிகள் பகிர்ந்து பரிசு வெல்லலாம். சமையல், தமிழ் மற்றும் சக பெண்களை ஊக்குவிக்கும் இந்தப் பணியை மிகவும் விரும்பி செய்து வருகிறேன்’’ என்று கூறும் பார்வதி வழங்கும் உருளைக்கிழங்கு சமையல் வகைககள் இங்கே இடம்பெறுகின்றன.

உருளைக்கிழங்கு அல்வா

தேவையானவை:

  • உருளைக்கிழங்கு - 2

  • சர்க்கரை - 4 டேபிள்ஸ்பூன்

  • நெய் - 3 டேபிள்ஸ்பூன்

  • முந்திரி - 6

  • திராட்சை - 5

  • இனிப்பில்லாத கோவா - 2 டேபிள்ஸ்பூன்

  • பால் - கால் கப்

பொட்டேட்டோ ரெசிப்பி

செய்முறை:

உருளைக்கிழங்கைத் தோல் சீவி துருவி வைக்கவும். வாணலியில் சிறிதளவு நெய்விட்டு சூடானதும் முந்திரி, திராட்சை சேர்த்து வறுத்து தனியாக வைக்கவும். பிறகு மீண்டும் சிறிதளவு நெய்விட்டு சூடானதும் துருவிய உருளைக்கிழங்கு சேர்த்து நன்றாக வதக்கவும். பின்னர் காய்ச்சிய பால் சேர்த்து நன்கு கலந்து வேகவிடவும். பால் நன்கு சுண்டியதும் தீயைக் குறைத்து வைத்து, சர்க்கரை மற்றும் கோவாவை உதிர்த்து சேர்த்து நன்றாகக் கிளறவும். சேர்ந்து திரண்டு வரும்போது மீதமுள்ள நெய்யை ஊற்றி, வறுத்து வைத்துள்ள முந்திரி, திராட்சை சேர்த்து நன்கு கிளறவும்.

உருளைக்கிழங்கில் 4,000-க்கும் அதிகமான வகைகள் உண்டு.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

உருளைக்கிழங்கு டோனட்

தேவையானவை:

  • உருளைக்கிழங்கு - ஒன்று

  • டோனட் பன் அல்லது சாதா பன் - ஒன்று

  • சர்க்கரை - ஒரு டேபிள்பூன்

  • பட்டைத்தூள் - ஒரு சிட்டிகை

  • கண்டன்ஸ்டு மில்க் - ஒரு டேபிள்ஸ்பூன்

பொட்டேட்டோ ரெசிப்பி

செய்முறை:

உருளைக்கிழங்கை வேகவைத்து நன்கு மசித்துக்கொள்ளவும். ஒரு கிண்ணத்தில் மசித்த உருளைக்கிழங்கு, கண்டன்ஸ்டு மில்க், பட்டைத்தூள், சர்க்கரை சேர்த்து க்ரீம் போல் கலக்கவும். ஒரு டோனட் பன் அல்லது சாதா பன் எடுத்து அதில் நடுவில் ஓட்டை போட்டுக்கொள்ளவும். பின்னர் 10 நொடி அவனில் (oven) வைத்து எடுக்கவும். பின்னர் க்ரீம் போல செய்த உருளைக்கிழங்கு கலவையை அதன் மேல்புறத்தில் பிசிறு இல்லாமல் தடவி, தேவைப்பட்டால் சர்க்கரை தூவிப் பரிமாறவும்.

பன்னின் மேல் சாக்லேட் சிரப், ஃப்ரெஷ் க்ரீம், பொடித்த நட்ஸ் என எது வேண்டுமானாலும் சேர்த்துப் பரிமாறலாம். இதைக் குழந்தைகள் விரும்பி சாப்பிடுவார்கள். .

உலகில் ஒரு பில்லியனுக்கும் அதிகமான மக்கள் உருளைக்கிழங்கை உண்கின்றனர்.

உருளைக்கிழங்கு கீர்

தேவையானவை:

  • உருளைக்கிழங்கு - ஒன்று

  • பால் - 2 கப்

  • சர்க்கரை - 6 டேபிள்ஸ்பூன்

  • முந்திரி - 10

  • பாதாம் - 10

  • கண்டன்ஸ்டு மில்க் - 2 டேபிள்ஸ்பூன்

  • ஏலக்காய்த்தூள் - அரை டீஸ்பூன்

  • ரோஸ் வாட்டர் - சிறிதளவு (விருப்பப்பட்டால்)

  • உப்பு - ஒரு சிட்டிகை

  • நெய் - சிறிதளவு

பொட்டேட்டோ ரெசிப்பி

செய்முறை:

பாதாம் மற்றும் 5 முந்திரியைக் கொதிக்கும் நீரில் போட்டு 10 நிமிடங்கள் வரை ஊறவிடவும். பிறகு பாதாமை தோல் நீக்கிவிட்டு மிக்ஸியில் முந்திரி உடன் சேர்த்து சிறிதளவு பால் விட்டு அரைத்து எடுக்கவும். வாணலியில் நெய்விட்டு சூடானதும் மீதமுள்ள முந்திரியைச் சேர்த்து வறுத்து தனியாக வைக்கவும்.

உருளைக்கிழங்கைத் தோல் நீக்கிவிட்டு துருவி வைக்கவும். பின்னர் காய்ச்சிய பால் சேர்த்துக் கலந்து வேகவிடவும். உருளைக்கிழங்கு நன்கு வெந்ததும் சர்க்கரை சேர்த்துக் கிளறவும். இதனுடன் அரைத்த விழுதைச் சேர்த்து நன்கு கிளறவும். பிறகு கண்டன்ஸ்டு மில்க் சேர்த்துக் கிளறவும். பின்னர் ஏலக்காய்த்தூள், ரோஸ் ரோட்டர் மற்றும் உப்பு சேர்த்து நன்றாகக் கிளறி இறக்கவும். சிறிது நேரத்துக்குப் பின் ஃப்ரிட்ஜில் வைத்து அரை மணி நேரம் வரை குளிரவிடவும். ஜில்லென்று பரிமாறவும்.

7,000 ஆண்டுகளுக்கு முன்பே உருளைக்கிழங்கு பயிரிடப்பட்டிருக்கிறது.

ஹனி உருளைக்கிழங்கு நக்கட்ஸ்

தேவையானவை:

  • உருளைக்கிழங்கு - கால் கிலோ

  • மைதா மாவு - கால் கப்

  • கார்ன்ஃப்ளார் (சோள மாவு) - கால் கப்

  • மிளகுத்தூள் - அரை டீஸ்பூன்

  • பிரெட் கிரம்ஸ் - அரை கப்

  • தேன் - 3 டேபிள்ஸ்பூன்

  • வறுத்த எள் - சிறிதளவு

  • உப்பு - தேவைக்கேற்ப

  • ரீஃபைண்ட் ஆயில் - தேவையான அளவு

பொட்டேட்டோ ரெசிப்பி

செய்முறை:

முதலில் உருளைக்கிழங்கை முக்கால் பதம் வேகவைத்துக்கொள்ளவும். பின்னர் அதை தோலுரித்து துருவிக்கொள்ளவும். பிறகு ஒரு பவுலில் துருவிய கிழங்குடன் சிறிதளவு மைதா மாவு, கார்ன்ஃப்ளார், பிரெட் கிரம்ஸ், மிளகுத்தூள், உப்பு சேர்த்துப் பிசைந்துகொள்ளவும். ஒரு பவுலில் 3 டேபிள்ஸ்பூன் மைதா, 3 டேபிள்ஸ்பூன் கார்ன்ஃப்ளார், சிறிதளவு மிளகுத்தூள், உப்பு சேர்த்து நீர்க்கக் கரைத்துக்கொள்ளவும்.

கலந்துவைத்த மாவை சிறிது சிறிதாக பாப்கார்ன் அளவுக்கு கிள்ளி வைக்கவும். அதை முதலில் மைதா மாவுக் கலவையில் டிப் செய்து பிறகு பிரெட் கிரம்ஸில் புரட்டவும். பிறகு வாணலியில் எண்ணெய்விட்டுப் பொரித்தெடுக்கவும். பரிமாறும்போது தேவை யான அளவு தேனை பாப்கார்ன் மீது ஊற்றி, வறுத்த எள்ளைத் தூவவும். சுவையான ஸ்வீட் பொட்டேட்டோ ஹனி பாப்கார்ன் தயார்.

வன உருளைக்கிழங்கில் மட்டுமே 180 வகைகள் உண்டு.

பொட்டேட்டோ ஃப்ரை

தேவையானவை:

  • உருளைக்கிழங்கு ­- கால் கிலோ

  • மைதா மாவு - கால் கப்

  • கார்ன்ஃப்ளார் (சோள மாவு) - கால் கப்

  • மிளகுத்தூள் - அரை டீஸ்பூன்

  • ஓட்ஸ் - அரை கப்

  • மிளகாய்த்தூள் - கால் டீஸ்பூன்

  • இஞ்சி - பூண்டு விழுது - ஒரு டீஸ்பூன்

  • உப்பு - தேவையான அளவு

  • ரீஃபைண்ட் ஆயில் - தேவையான அளவு

பொட்டேட்டோ ரெசிப்பி

செய்முறை:

உருளைக்கிழங்கைத் தோல் சீவி துண்டுகளாக நறுக்கவும். ஒரு வாணலியில் நீரைக் கொதிக்கவிட்டு உருளைக்கிழங்கை அதில் போட்டு அரை வேக்காடு பதத்தில் வேகவைத்து தனியே எடுத்துக்கொள்ளவும்.

ஒரு கப்பில் மைதா, கார்ன் ஃப்ளார், மிளகுத்தூள், ஓட்ஸ், மிளகாய்த்தூள், உப்பு சேர்த்துக் கலக்கவும். வேகவைத்த உருளைக்கிழங்குத் துண்டுகளில் இஞ்சி - பூண்டு விழுது சேர்த்துக் கலக்கவும் பின்னர் அவற்றை மைதா கலவையில் பிசிறி எண்ணெயில் பொரித்தெடுத்தால், சுவையான பொட்டேட்டோ ஃப்ரை தயார்.

ஐரோப்பாவுக்கு அமெரிக்கர்கள் உருளைக்கிழங்கை ஸ்பெயின் வழியாக அறிமுகப்படுத்தினார்கள்.

செஷ்வான் உருளைக்கிழங்கு அவல்

தேவையானவை

  • கெட்டி அவல் - 2 கப்

  • உருளைக்கிழங்கு - கால் கிலோ

  • மிளகுத்தூள் - அரை டீஸ்பூன்

  • மிளகாய்த்தூள் ­- கால் டீஸ்பூன்

  • வெங்காயம் - ஒன்று

  • கடுகு, கறிவேப்பிலை - சிறிதளவு

  • உப்பு - தேவையான அளவு

  • ரீஃபைண்ட் ஆயில் - தேவையான அளவு

  • செஷ்வான் சட்னி - ­ ஒரு டேபிள்ஸ்பூன் (கடைகளில் கிடைக்கும்)

பொட்டேட்டோ ரெசிப்பி

செய்முறை:

உருளைக்கிழங்கைத் துருவி வைத்துக்கொள்ளவும். ஒரு பாத்திரத்தில் சிறிதளவு தண்ணீர், உப்பு சேர்த்து அவலை இரண்டு மணி நேரம் ஊறவைக்கவும். வாணலியில் எண்ணெய் சேர்த்து கடுகு தாளித்து, நறுக்கிய வெங்காயம் மற்றும் துருவிய உருளைக்கிழங்கைச் சேர்த்து நன்கு வதக்கவும். பின்னர் ஊறவைத்த அவலைச் சேர்த்துக் கிளறவும். அதில் செஷ்வான் சட்னி சேர்த்து, மிளகுத்தூள், மிளகாய்த்தூள், தேவையான உப்பு சேர்த்து நன்கு கிளறி, மேலும் சிறிது எண்ணெய் ஊற்றிக் கிளறி, கறிவேப்பிலை சேர்த்து இறக்கவும். தேவைப்பட்டால் வேறு காய்கறிகள் சேர்த்துக்கொள்ளலாம்.

இங்கிலாந்தில் 80 வகை உருளைக்கிழங்குகள் விற்பனையில் உள்ளன.

உருளைக்கிழங்கு வேர்க்கடலை பீட்சா

தேவையானவை:

  • கோதுமை மாவு - 100 கிராம்

  • மைதா - ஒரு டேபிள்ஸ்பூன்

  • கார்ன் ஃப்ளார் (சோள மாவு) - ஒரு டேபிள்ஸ்பூன்

  • கேரட் - ஒன்று

  • உருளைக்கிழங்கு - 2

  • பெரிய வெங்காயம் - ஒன்று

  • குடமிளகாய் - ஒன்று

  • கறி மசாலா பவுடர் - சிறிதளவு

  • பீட்சா சீஸ் ­- 2 டேபிள்ஸ்பூன்

  • மிளகுத்தூள் - தேவைக்கேற்ப

  • வேர்க்கடலைப் பொடி - ஒரு டேபிள்ஸ்பூன்

  • உப்பு - சிறிதளவு

  • எண்ணெய் - தேவையான அளவு

பொட்டேட்டோ ரெசிப்பி

செய்முறை:

கேரட், வெங்காயம், குடமிளகாய், ஓர் உருளைக்கிழங்கு முதலியவற்றை சன்னமாக நறுக்கிவைத்துக்கொள்ளவும். ஓர் உருளைக்கிழங்கை வேகவைத்து மசிக்கவும். நறுக்கிய காய்கறிகளுடன் கோதுமை மாவு, மைதா, கார்ன்ஃப்ளார், கறி மசாலா பவுடர், உப்பு, சிறிதளவு மிளகுத்தூள், வேகவைத்து மசித்த உருளைக்கிழங்கு மற்றும் வேர்க்கடலைப் பொடி சேர்த்து சிறிதளவு தண்ணீர் சேர்த்துப் பிசைந்துகொள்ளவும். தோசைக்கல்லை சூடாக்கி பிசைந்து வைத்த கலவையைச் சப்பாத்தி போன்று கல்லின் மேல் பரப்பி விடவும். எண்ணெய் ஊற்றி அதை வேக வைத்து, திருப்பிப் போடவும். பின்னர் அதன் மேல் பீட்சா சீஸைப் பரப்பிவிடவும். அதை மூடி வைத்து, சீஸ் வெந்து படரும் வரை வைத்திருந்து, அடுப்பை அணைத்து, மேலே சிறிதளவு மிளகுத்தூள் தூவிப் பரிமாறவும்.

சீனா, ஐரோப்பிய யூனியன், இந்தியா, ரஷ்யா, உக்ரைன், யு.எஸ்.ஏ ஆகியவையே உருளைக்கிழங்கு உற்பத்தியில் முன்னணியில் உள்ளன.

சைனீஸ் உருளைக்கிழங்கு சேமியா உப்புமா

தேவையானவை:

  • பெரிய உருளைக்கிழங்கு - 2

  • வெங்காயம் - ஒன்று (நறுக்கவும்)

  • மிளகுத்தூள் - அரை டீஸ்பூன்

  • மிளகாய்த்தூள் - கால் டீஸ்பூன்

  • அஜினமோட்டோ ­- அரை டீஸ்பூன்

  • சேமியா - ஒரு சிறிய பாக்கெட்

  • சோயா சாஸ் - ஒரு டீஸ்பூன்

  • சில்லி சாஸ் - ஒரு டீஸ்பூன்

  • கடுகு, கறிவேப்பிலை - சிறிதளவு

  • உப்பு - தேவையான அளவு

  • ரீஃபைண்ட் ஆயில் ­- தேவையான அளவு

பொட்டேட்டோ ரெசிப்பி

செய்முறை:

ஓர் உருளைக்கிழங்கைத் தோல் சீவி துருவி வைத்துக்கொள்ளவும். ஒரு பாத்திரத்தில் 2 கப் தண்ணீர் மற்றும் எண்ணெய் சேர்த்து நன்கு கொதிக்கவிடவும். பின்னர் அதில் உருளைக்கிழங்கு துருவல் மற்றும் சேமியா சேர்த்து வேகவைத்து தனியே எடுத்துக்கொள்ளவும். மற்றோர் உருளைக் கிழங்கை நீளமாக நறுக்கி, எண்ணெயில் பொரித்தெடுத்து வைத்துக்கொள்ளவும்.

வாணலியில் எண்ணெய் சேர்த்து கடுகு தாளித்து, வெங்காயம் சேர்த்து வதக்கி, சோயா சாஸ், சில்லி சாஸ், மிளகுத்தூள், மிளகாய்த்தூள், உப்பு, அஜினமோட்டோ சேர்த்து அதில் வேகவைத்த சேமியா - உருளைக்கிழங்கு சேர்த்து நன்கு கிளறவும். கறிவேப்பிலை சேர்த்து இறக்கவும். மேலும் சிறிது எண்ணெய் ஊற்றிக் கிளறவும். அதன் மேல் பொரித்த உருளைக்கிழங்கு சேர்த்து அலங்கரிக்கவும். தேவைப்பட்டால் வேறு காய்கறிகள் சேர்த்துக்கொள்ளலாம்.

உலகில் 4.6 கோடி ஏக்கர் நிலப்பரப்பில் உருளைக்கிழங்கு பயிரிடப்படுகிறது.

உருளைக்கிழங்கு ரவை ஸ்டிக்ஸ்

தேவையானவை:

  • உருளைக்கிழங்கு - 2

  • ரவை - ஒரு கப்

  • பச்சை மிளகாய் ­- 2 (பொடியாக நறுக்கவும்)

  • கொத்தமல்லித்தழை - சிறிதளவு

  • உப்பு - தேவைக்கேற்ப

  • எண்ணெய் - தேவையான அளவு

  • தண்ணீர் - ஒரு கப்

பொட்டேட்டோ ரெசிப்பி

செய்முறை:

முதலில் உருளைக்கிழங்கை வேக வைத்து மசித்து எடுத்துக்கொள்ளவும். பின்பு ஒரு பாத்திரத்தில் ஒரு கப் தண்ணீர் சேர்த்து அதில் ரவையைச் சேர்த்து நன்றாகக் கிளறிவிடவும் பின்பு அதில் ஒரு டீஸ்பூன் அளவுக்கு எண்ணெய் சேர்க்கவும். ரவையானது சப்பாத்தி மாவு பதத்துக்கு வந்த பிறகு அடுப்பை அணைக்கவும். அந்த ரவையில் மசித்துவைத்த உருளைக்கிழங்கு, பச்சை மிளகாய், கொத்தமல்லித்தழை, உப்பு சேர்த்து பிசைந்துகொள்ளவும். பின்பு அதை விரல் நீள ரோல்களாக உருட்டி எடுத்து வைத்துக் கொள்ளவும்.

ஒரு கடாயில் எண்ணெய்விட்டு சூடானதும் செய்து வைத்திருக்கும் உருளைக்கிழங்கு ஃபிங்கர் ரோல்களை எண்ணெயில் போட்டு பொன்னிறமாகும் வரை பொரித்தெடுக்கவும். இதற்கு தக்காளி சாஸ் தொட்டு சாப்பிட்டால் மிகவும் சுவையாக இருக்கும்.

ஒரு ஹெக்டேருக்கு 60 - 88 டன் உருளைக்கிழங்கு உற்பத்தி செய்ய முடியும் என நியூசிலாந்து விவசாயிகள் நிரூபித்துள்ளனர்.

பொரித்த உருளைக்கிழங்கு புதினா சாண்ட்விச்

தேவையானவை:

  • உருளைக்கிழங்கு - கால் கிலோ

  • மைதா - கால் கப்

  • கார்ன்ஃப்ளார் - கால் கப்

  • மிளகுத்தூள் - அரை டீஸ்பூன்

  • மிளகாய்த்தூள் - கால் டீஸ்பூன்

  • புதினா, கொத்தமல்லித்தழை - தலா ஒரு கப்

  • பச்சை மிளகாய் - ஒன்று

  • தேங்காய்த் துருவல் - 3 டேபிள்ஸ்பூன்

  • முட்டை - ஒன்று

  • உப்பு - தேவையான அளவு

  • ரீஃபைண்ட் ஆயில் - தேவையான அளவு

பொட்டேட்டோ ரெசிப்பி

செய்முறை:

உருளைக்கிழங்கை வட்டமாக நறுக்கிக் கொள்ளவும். ஒரு பாத்திரத்தில் தண்ணீர் ஊற்றிக் கொதிக்கவிடவும், கொதிக்கும் நீரில் உருளைக்கிழங்கு சேர்த்து அரை வேக்காடு பதத்தில் வேகவைக்கவும். புதினா மற்றும் கொத்தமல்லியைச் சேர்த்து வாணலியில் இரண்டு நிமிடங்கள் வதக்கவும். அதனுடன் பச்சை மிளகாய், தேங்காய்த் துருவல் சேர்த்து அரைத்து வைத்துக்கொள்ளவும்.

முட்டையை உடைத்து ஒரு கிண்ணத்தில் கலக்கி வைக்கவும். இன்னொரு பாத்திரத்தில் மைதா மற்றும் கார்ன்ஃப்ளார் சேர்த்து, மிளகுத்தூள், மிளகாய்த்தூள், உப்பு சேர்த்து, தண்ணீர் ஊற்றிக் கலக்கிக்கொள்ளவும். வேக வைத்த இரண்டு கிழங்கு துண்டுகளின் நடுவில் புதினா சட்னி தடவி முட்டையில் டிப் செய்து, மாவுக் கலவையில் புரட்டியெடுக்கவும். அதை எண்ணெயில் பொரித்தெடுத்தால், சுவையான பொரித்த உருளைக்கிழங்கு புதினா சாண்ட்விச் ரெடி.

உருளைக்கிழங்கைப் பயன்படுத்தி மதுபானங்களும் தயாரிக்கப்படுகின்றன.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு