Published:Updated:

சரித்திர விலாஸ் - இன்றைய மெனு: புத்தாண்டு அதிர்ஷ்ட உணவுகள்

புத்தாண்டு அதிர்ஷ்ட உணவுகள்
பிரீமியம் ஸ்டோரி
News
புத்தாண்டு அதிர்ஷ்ட உணவுகள்

ஸ்பெயின் மக்கள் புத்தாண்டுக்கு அதிர்ஷ்டத்தை அள்ளித்தரும் கனியாக திராட்சையைக் கொண்டாடுகிறார்கள்.

ந்த ஒரு விஷயத்தின் ஆரம்பமும் நல்லபடியாக அமைய வேண்டும் என்று நினைப்போம். குறிப்பாகப் புத்தாண்டின் தொடக்கமும் நல்லவிதமாக அமையட்டும் என்று பிரார்த்தனை செய்வோம். புத்தாண்டை இனிப்புடன் சந்தோஷமாகத் தொடங்குவோம். அப்படி ஆரம்பித்தால், அந்த வருடம் முழுக்க இனிமையாக, வளமையாக, அதிர்ஷ்டகரமாக அமையும் என்பது நம் நம்பிக்கை. உலகம் முழுக்க இந்த நம்பிக்கை உண்டு. புத்தாண்டு பிறக்கும் வேளையில் என்ன சாப்பிட வேண்டும் என்று ஒவ்வோர் இன மக்களும் ஒவ்வொரு விஷயத்தை வைத்திருக்கிறார்கள். புத்தாண்டு விருந்தில் என்னென்ன உணவுகளைச் சேர்த்துக்கொண்டால் அந்த வருடம் செழிப்பாக, அதிர்ஷ்டத்தைக் கொட்டிக் கொடுப்பதாக இருக்குமென்று ஒவ்வொரு கலாசாரத்திலும் சில விஷயங்கள் கடைப்பிடிக்கப்படுகின்றன. கனியிலிருந்து தொடங்கலாம்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

ஸ்பெயின் மக்கள் புத்தாண்டுக்கு அதிர்ஷ்டத்தை அள்ளித்தரும் கனியாக திராட்சையைக் கொண்டாடுகிறார்கள். புத்தாண்டு பிறக்கும் தருணத்தில், கடிகாரத்தில் மணி பன்னிரண்டை நெருங்கும்போது, ஸ்பெயின் மக்கள் கையில் திராட்சையுடன் தயாராக இருப்பார்கள். ‘டொய்ங்… டொய்ங்…’ என்று ஒவ்வொரு மணி அடிக்கும்போதும் ஒவ்வொரு திராட்சைப் பழத்தை வாயில் போட்டுக் கொள்வார்கள். பன்னிரண்டாவது மணி அடித்து முடிக்கும்போது, வாய் நிறைய திராட்சைகளுடன் புத்தாண்டு வாழ்த்துகளைப் பகிர்ந்துகொள்வார்கள். பன்னிரண்டு திராட்சைகள் என்பது பன்னிரண்டு மாதங்களைக் குறிப்பது. முதல் மூன்று திராட்சைகள் இனிப்பாக இருந்த தென்றால் ஜனவரி டு மார்ச் இனிமையாக இருக்கும். நான்காவது மற்றும் எட்டாவது திராட்சைகள் புளிப்பாக இருந்ததென்றால், ஏப்ரல் மாதமும் ஆகஸ்ட் மாதமும் அவ்வளவு சரியாக இருக்காது. இப்படி திராட்சையைக்கொண்டு, புதிய ஆண்டு தங்களுக்கு எப்படி இருக்கும் என்று கணித்துக்கொள்கிறார்கள்.

சரித்திர விலாஸ் - இன்றைய மெனு: புத்தாண்டு அதிர்ஷ்ட உணவுகள்

இந்த திராட்சை மெல்லும் பழக்கம், கி.பி 1909-ல் ஸ்பெயினின் அலிகேன்டி பகுதியைச் சேர்ந்த திராட்சை விவசாயி களால் அறிமுகப்படுத்தப்பட்டது. அப்படியே போர்ச்சுகல், வெனிசுலா, கியூபா, மெக்ஸிகோ, பெரு எனப் பல நாடுகளுக்கும் பரவியது. இன்றைக்கும் இந்த நாடுகளில் மக்கள் புத்தாண்டு பிறக்கும் தருணத்தில் வாயில் திராட்சைகளுடனேயே கொண்டாடுகிறார்கள். சில நாடுகளில் திராட்சைக்குப் பதிலாக மாதுளை முத்துகளைச் சுவைக்கிறார்கள். ஒரு சில நாடுகளில் அத்திப்பழங்களை வாயில் போட்டுக்கொள்கிறார்கள். புத்தாண்டு பிறக்கும்போது இனிப்பான பழத்தைச் சாப்பிட வேண்டும் என்பதுதான் பொதுவான நம்பிக்கை. ஜனவரி பிறப்பில் நாம் பழங்களைத் தேடி உண்பதில்லை. ஆனால், சித்திரை வருடப் பிறப்புக்கு தென்னிந்தியாவில் ‘கனி நோக்குதல்’ வழக்கமாக இருப்பதைக் குறிப்பிட்டாக வேண்டும்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

புத்தாண்டையும் கேக்கையும் பிரிக்கவே முடியாது. கேக் வெட்டி புத்தாண்டு கொண்டாடுவதும் பல்வேறு தேசங்களில் கடைப்பிடிக்கப்படும் பாரம்பர்ய வழக்கம். அதிலும் குறிப்பாக வட்ட வடிவிலான அல்லது மோதிர வடிவிலான கேக் என்பது விசேஷம். புத்தாண்டின் காலை உணவில் மோதிர வடிவிலான அல்லது வட்ட வடிவிலான ஏதாவது ஒன்றை உண்பது அவசியம் என்று ஐரோப்பிய மக்கள் விரும்புகிறார்கள். ஏனென்றால், இந்த வடிவங்கள் முழுமையைக் குறிக்கின்றன. முழுமையான சந்தோஷத்தை புதிய வருடம் கொடுக்கும்; இந்த ஆண்டில் முழுமையாக வாழ்வோம் என்று உணர்த்தும்விதமாகத்தான் அப்படி உண்கிறார்கள்.

புத்தாண்டு அதிர்ஷ்ட உணவுகள்
புத்தாண்டு அதிர்ஷ்ட உணவுகள்

மாவினுள்ளே நாணயத்தைப் புதைத்து வைத்து கேக் தயாரிக்கும் பழக்கம் அமெரிக்க, ஐரோப்பிய நாடுகளில் உள்ளது. கேக்கை வெட்டிப் பரிமாறும்போது, யாருக்கு அந்த நாணயம் வருகிறதோ, அவர்களுக்கு அந்த வருடம் மிகவும் அதிர்ஷ்டகரமாக அமையும், திருமணம் ஆகாதவர்களுக்குத் திருமணம் ஆகும், குழந்தை பாக்கியம் கிட்டும், வேலை கிடைக்கும் என்பன போன்ற பல்வேறு நம்பிக்கைகள் உண்டு.

போலந்து, ஹங்கேரி, நெதர்லாந்து, ஹாலந்து மக்கள் மோதிர வடிவிலான டோனட்டுகளை (Donut) புத்தாண்டு உணவில் அவசியம் சேர்த்துக் கொள்கிறார்கள். இந்த டோனட்டுக்கான விளக்கத்தை நமக்குப் பரிச்சயமான வார்த்தைகளில் சொல்ல வேண்டுமென்றால், பொரித்தெடுக்கப்பட்ட இனிப்பு மெதுவடை போன்ற பதார்த்தம். இந்த Doughnut அல்லது Donut-ன் வரலாறு என்ன?

புத்தாண்டு அதிர்ஷ்ட உணவுகள்
புத்தாண்டு அதிர்ஷ்ட உணவுகள்

துல்லியமான சரித்திரக் குறிப்புகள் எல்லாம் கிடையாது. ஆனால், சரித்திரத்தில் டோனட் பற்றிய சில சம்பவங்கள் உண்டு. டச்சுக்காரர்கள் மாவில் இனிப்பு சேர்த்து அதைப் பன்றியின் கொழுப்பில் பொரித்தெடுப்பார்கள். பொன்னிறமான அந்த கேக்குகளுக்கான டச்சுப் பெயர், Olykoeks. ஆயில் கேக்ஸ் என்று சொல்லலாம். 18-ம் நூற்றாண்டில் அமெரிக்காவில் டச்சுக் குடியேற்றங்கள் நிகழ்ந்தபோது இந்த Olykoeks அமெரிக்காவிலும் பரவியது.

டோனட்
டோனட்

ஆரம்பக் காலத்தில் இந்த ஆயில் கேக்கின் நடுவில் ஓட்டை கிடையாது. அதில் ஓட்டை போடும் பழக்கம் எப்படி வந்தது? அதற்குப் 19-ம் நூற்றாண்டின் மத்தியில் நடந்த ஒரு சம்பவம் விளக்கமாகச் சொல்லப்படுகிறது.

இங்கிலாந்தைச் சேர்ந்த எலிசபெத் கிரகோரி என்ற பெண், சுவையான டோனட்டுகளைத் தயாரிப்பதில் கைதேர்ந்த வராகயிருந்தார். அவர், கப்பலில் கேப்ட னாகப் பணியாற்றிக்கொண்டிருந்த தன் மகன் ஹன்சென் கிரகோரிக்கு டோனட் தயாரித்துக்கொடுத்து அனுப்புவது வழக்கம். கப்பல் ஏறிவிட்டால் கரையிறங்க நீண்ட காலம் ஆகும். எனவே, ஹன்செனும் ஒரு டின் நிறைய டோனட்டுகளுடனேயே கப்பல் ஏறுவார். கடலின் நடுவே, டோனட்டுகளைச் சுவைக்கும்போது அம்மாவும் உடனிருப்பதுபோல ஹன்செனுக்குத் தோன்றும். ஆனால், அதில் ஒரு பிரச்னையும் இருந்தது. டோனட் மாவைப் பொரித்தெடுக்கும்போது, அதன் நடுப்பகுதி சரியாக வேகாமல் இருந்தது. அது டோனட் கெட்டுப்போவதற்கு வாய்ப்பாக அமைந்தது.

வடை
வடை

இதைத் தவிர்க்க என்ன செய்யலாம் என்று ஹன்சென் யோசித்தார். தீவிர யோசனைக்குப் பிறகு அவருக்கு பளீர் என்று ஒரு தீர்வு புலப்பட்டது. வேறு ஒன்றும் இல்லை. டோனட்டின் நடுவில் ஓட்டை போடுவதுதான். தன் தாயிடம் யோசனையைச் சொன்னார். எலிசபெத், ஓட்டையுள்ள டோனட்டுகளைத் தயாரிக்க ஆரம்பித்தார். நடுவில் வேகாத பிரச்னை தீர்ந்தது. நாள்கள் ஆன பிறகும் நடுக்கடலிலும் டோனட் கெட்டுப்போகவில்லை.

ஹன்சென் கப்பலை இயக்கும் சக்கரத்தைப் பார்த்தபடியே யோசித்த போதுதான் டோனட்டுக்கு ஓட்டை போடும் யோசனை தோன்றியது என்கிறார்கள். இல்லையில்லை, அவரது கனவில் தேவதை ஒன்று தோன்றி இந்த யோசனையைச் சொல்லியது என்றும் சிலிர்க்கிறார்கள்.

`அடப் போங்கய்யா, எங்கள் முன்னோர் ஒன்றும் முட்டாள் இல்லை. அவர்கள் எப்போதோ வடையின் நடுவில் ஓட்டையைப் போடும் தொழில்நுட்பத்தைக் கண்டுபிடித்துவிட்டார்கள்’ என்று நாமும் நெஞ்சை நிமிர்த்திக்கொள்ளலாம். எப்படியோ... டோனட்டில் ஓட்டை போட்டவர் என்ற வரலாற்றுப் பெருமை ஹன்சென் கிரகோரிக்குக் கிடைத்துவிட்டது. அதன்பிறகு ரிங் போன்ற வடிவம், டோனட் டின் க்ளாஸிக் வடிவமாகவும் மாறிப்போனது.

சரித்திர விலாஸ் - இன்றைய மெனு: புத்தாண்டு அதிர்ஷ்ட உணவுகள்

Dough knots என்ற சொற்களிலிருந்துதான் Doughnut என்ற பெயர் வந்தது என்ற ஒரு கருத்து உண்டு. மாவில் உலர்ந்த பருப்புகளைச் சேர்த்து சுட்ட பண்டம் என்பதால் Dough + Nut = Doughnut என்ற பெயர் அமைந்த தாகவும் சொல்கிறார்கள். இன்றைக்கு மோதிர வடிவ டோனட், உருண்டை வடிவ டோனட், டாப்பிங்ஸ் கொண்ட டோனட், மோதிர வடிவ ஓட்டையின் நடுவில் க்ரீம், நட்ஸ் நிரப்பப்பட்ட Filled Donuts என்று இதில் பலவகை இருக்கின்றன. உலகமெங்கும் விதவிதமான டோனட்கள், வகைவகையான பெயர்களில் கிடைக்கின்றன. உலக அளவில் டோனட் அதிகம் விற்பனையாகும் நாடு அமெரிக்காதான். அங்கே பலரது காலை உணவாகக்கூட இது இருக்கிறது. ‘தேசிய டோனட் தினம்’கூட அங்கே கொண்டாடப்படுகிறது. அமெரிக்கர்களின் புத்தாண்டு மெனுவில் டோனட்டுகளுக்கும் முக்கிய இடம் உண்டு.

புத்தாண்டின் இன்னோர் அதிர்ஷ்ட உணவு - மீன். பல நாடுகளிலும் புத்தாண்டு விருந்தில் மீன் இடம்பெறுகிறது. Mark Kurlansky என்ற அமெரிக்க எழுத்தாளர் எழுதியிருக்கும் Cod: A Biography of the Fish that Changed the World என்ற புத்தகத்தில், அதிர்ஷ்ட உணவாகப் பலரும் கருதும் Cod இன மீன்கள் குறித்து எழுதியிருக்கிறார். புதுவருட உணவாக டென்மார்க் மக்கள் இந்த மீனை வேகவைத்து உண்கிறார்கள். இத்தாலியர் கருவாடாகப் பதப்படுத்தப்பட்ட இந்த மீனை கிறிஸ்துமஸ் தொடங்கி புத்தாண்டு வரை பலவிதமாகச் சமைத்துச் சாப்பிடுகிறார்கள். சுவீடன் மக்களது புது வருட உணவில் மீன் சாலட் பிரதானமானது. ஜெர்மானியர் புது வருடத்தில் அதிர்ஷ்டத்துக்காக மீனின் செதில்களைக் கொஞ்சமாக எடுத்து தங்களது பர்ஸ், கைப்பைகளில் வைத்துக் கொள்கிறார்கள்.

pork
pork

மீனுக்கு அடுத்த இடத்தில் இருக்கும் அதிர்ஷ்ட உணவு, Pork எனப்படும் வெண்பன்றி இறைச்சி. பொதுவாகப் பன்றிகள் பின்னோக்கி நகராது. அதனால், ஐரோப்பியர் பன்றிகளை முன்னேற்றத்தின் அடையாளமாகக் கருதுகிறார்கள். அதனால் இதைப் புதுவருட உணவில் சேர்த்துக் கொள்கிறார்கள். ஆஸ்திரியா, கியூபா, ஸ்பெயின், போர்ச்சுகல், ஹங்கேரி, ஜெர்மனி ஆகிய நாடுகளில் வெண்பன்றி ரோஸ்ட், புது வருட விருந்தின் முக்கியமான பதார்த்தமாக இடம்பெறுகிறது. சுவீடன் மக்கள் சமைக்கப்பட்ட வெண் பன்றியின் கால் பகுதிகளை விரும்பி உண்கிறார்கள். வெண்பன்றி இறைச்சியை விரும்பாத சில ஐரோப்பியர்கூட, புது வருடம் அன்று அதிர்ஷ்டம் வேண்டி பன்றி வடிவிலான பிஸ்கட்டுகளை உண்ணும் வழக்கத்தைக் கொண்டிருக்கிறார்கள்.

cotechino con lenticchie
cotechino con lenticchie

புது வருடத்துக்கு அதிர்ஷ்டம் தரும் உணவுப்பொருள்களில் தானியங்களுக்கும் இடம் உண்டு. தானியங்கள் நாணயங்களின் அடையாளமாகக் கருதப்படுகின்றன. இத்தாலியர் புது வருடம் பிறக்கும் தருணத்தில் Cotechino con lenticchie என்ற பதார்த்தத்தை உண்கிறார்கள். தானியங்கள் சேர்த்துச் சமைக்கப்பட்ட பன்றி இறைச்சி அது. பிரேசில் மக்கள், புது வருட விருந்தில் அவித்த தானியங்கள், தானியங்கள் கலந்த சூப் சேர்த்துக் கொள்கிறார்கள். ஜப்பானி யரின் புதுவருடக் கொண்டாட்டத்தில் பரிமாறப்படும் இனிப்புகள் Osechi-ryori என்று அழைக்கப்படுகின்றன. அதில் இனிப்பு சேர்க்கப்பட்ட கறுப்பு பீன்ஸ் பிரதானமானது.

Black-Eyed Peas என்று சொல்லப்படும் கறுப்புக்கண் காராமணி, அமெரிக்கர் களுக்குப் பிடித்தமானது. குறிப்பாக அமெரிக்காவின் தெற்குப் பகுதியில் இதைக்கொண்டு, Skippin’ Jenny என்ற சாதமும் சுண்டலும் கலந்த உணவைப் புத்தாண்டு விருந்தாகச் சமைக்கிறார்கள். இந்த உணவுக்கு Hoppin John என்ற பெயரும் உண்டு. இதைத் தட்டில் பரிமாறும்போது, சாதத்துடன் குறைந்தபட்சம் மூன்று தானியங்களாவது வரும்படி பார்த்துக் கொள்கிறார்கள். மூன்று என்பது செல்வம், ஆரோக்கியம், காதல் ஆகியவற்றைக் குறிப்பது. சிலர் இந்தச் சுண்டலைச் செல்வத் தின் அடையாளமாகவும் பார்க்கிறார்கள். தட்டில் எவ்வளவு எண்ணிக்கையிலான தானியங்கள் விழுகிறதோ அவ்வளவு செல்வம் அந்த ஆண்டில் சேரும் என்ற நம்பிக்கையும் உண்டு.

Skippin’ Jenny
Skippin’ Jenny

சோள மாவினாலான ரொட்டியும் அமெரிக்கர்களது பாரம்பர்ய உணவு. பொன்னிறத்தில் ஜொலிஜொலிக்கும் அந்த ரொட்டியைப் புத்தாண்டு தினத்தில் சாப்பிட்டால் செல்வம் பெருகும் என்பதும் அவர்களது நம்பிக்கை. பச்சை இலைகள், பச்சை நிறக் காய்கறிகள், அமெரிக்க டாலர் நோட்டின் அடையாளமாகப் பார்க்கப் படுகின்றன. ஆகவே, அவற்றுக்கும் மெனுவில் இடமுண்டு. தேசத்தின் பொருளா தாரம் செழிப்பாக இருக்க வேண்டுமென முட்டைகோஸ், பரட்டைக்கீரை (Kale) உள்ளிட்ட பலவிதமான பச்சைக்கீரை வகை களை உணவில் சேர்த்துக்கொள்கிறார்கள்.

சீனர்களுக்குப் பிரியமான நூடுல்ஸும் சீனப் புத்தாண்டின் முக்கியமான அதிர்ஷ்ட உணவாகக் கொண்டாடப்படுகிறது. குறிப்பாக E-Fu நூடுல்ஸ் என்று சீனர்களால் அழைக்கப்படும் நீளமான நூடுல்ஸ், அவர்களது புத்தாண்டு விருந்தில் தவறாமல் இடம் பெறுகிறது. புத்தாண்டில் கிடைக்கும் மகிழ்ச்சி, அந்த ஆண்டு முழுக்க நிலைத்திருக்க வேண்டும் என்று நினைத்து, நீள நூடுல்ஸை வெட்டாமல் அப்படியே சமைத்துச் சாப்பிடுகிறார்கள்.

Toshikoshi Soba
Toshikoshi Soba

ஜப்பானியர் டிசம்பர் 31-ன் இரவு உணவாக Toshikoshi Soba என்ற நீள நூடுல்ஸை உண்ணும் வழக்கம் கொண்டிருக்கிறார்கள். இதை ஆங்கிலத்தில் Year-end Noodles என்றழைக்கிறார்கள். 17-ம் நூற்றாண்டின் ஆரம்பத்திலிருந்தே இந்த வழக்கம் ஜப்பானில் கடைப்பிடிக்கப் படுகிறது. நீள நூடுல்ஸை வெட்டி உண்பதன் மூலம், அதுவரையிலான துரதிர்ஷ்டங்களை எல்லாம் கழித்துவிடுவதாக ஜப்பானியர்கள் நம்புகிறார்கள்.

E-Fu
E-Fu

அதிர்ஷ்டம், துரதிர்ஷ்டமெல்லாம் கிடக்கட்டும். பசித்த ஒரு வயிற்றுக்கு உணவு கிடைக்கச் செய்தால், அவர்களது முகத்தில் புன்னகையை மீட்டெடுத்தால் அதைவிடச் சிறந்த புத்தாண்டு மகிழ்ச்சி வேறென்ன இருந்துவிடப் போகிறது!

புத்தாண்டில் உண்ணக்கூடாதவை!

புது வருட அதிர்ஷ்டத்துக்கான உணவுகள் என்று பெரிய பட்டியல் இருப்பதுபோல, அன்றைக்கு ஒதுக்க வேண்டிய உணவுகள் எவை என்றும் ஒரு பட்டியல் இருக்கிறது. ஐரோப்பிய நாடுகளில் புத்தாண்டு என்றாலே கோழிகள் குஷியாகத் திரியும். காரணம், கோழிகள் பின்னோக்கி நகரும் பழக்கம் கொண்டவை. எனவே ‘பின்னேற்றம்’ வந்துவிடக் கூடாது என்று புத்தாண்டு விருந்தில் பெரும்பாலும் சிக்கனைத் தவிர்த்துவிடுகிறார்கள். பெரும்பாலான பறவையினங்கள் புத்தாண்டு விருந்தில் தவிர்க்கப்படுகின்றன. காரணம் விநோதமானது. இறக்கையுள்ள பறவையைக் கொன்று விருந்து உண்டால், அந்தப் புத்தாண்டின் அதிர்ஷ்டமானது நம்மை விட்டுப் பறந்துபோய்விடுமாம்! இறாலும் அதிர்ஷ்ட உணவாகக் கருதப்படுவதில்லை.

புத்தாண்டு நம்பிக்கைகள்!

புது வருட விருந்து உண்டு முடிக்கும்போது, தட்டில் கொஞ்சமாவது மிச்சம் வைக்க வேண்டும் என்றொரு நம்பிக்கை உண்டு. அப்போதுதான் அந்த வருடம் முழுக்க உணவு கிடைக்கும் என்பது ஜெர்மானியர்களின் நம்பிக்கை. புத்தாண்டு பிறக்கும் நேரத்தில் உணவு மேஜையில் பாத்திரங்கள் காலியாக இருக்கக் கூடாது. அதில் கண்டிப்பாகக் கொஞ்சமாவது உணவுகள் மிச்சம் இருக்க வேண்டும் என்பது ஃபிலிப்பைன்ஸ் மக்களின் நம்பிக்கை.

Puerto Rico என்ற கரிபீயன் கடல் பகுதியில் அமைந்திருக்கும் தீவில், புத்தாண்டு பிறக்கும் போது குழந்தைகள் வீட்டு ஜன்னல் வழியாகப் பால் பாத்திரங்களை வெளியில் தண்ணீருக்குள் வீசி எறியும் வழக்கம் உள்ளது. அப்படிச் செய்தால் துர்சக்திகள் வீட்டை அண்டாது என்பது அவர்களது நம்பிக்கை.

சுவிட்சர்லாந்து மக்கள் புத்தாண்டு அன்று அதிர்ஷ்டத்துக்காகத் தரையில் ஒரு துளி க்ரீமைச் சிதற விடுகிறார்கள். அர்மேனியர்கள், ரொட்டி யிலும் கேக்கிலும் நல்ல வாசகங்களை, வாழ்த்துகளைப் பதிக்கிறார்கள்.

டென்மார்க் மக்களது நம்பிக்கை கொஞ்சம் விநோதமானது. புது வருடம் அன்று காலையில் வீட்டுக் கதவைத் திறந்து பார்க்கும்போது சாப்பிடும் தட்டுகளும், கண்ணாடி தம்ளர்களும் நிறைய உடைந்து கிடந்தால், அவர்களுக்கு அந்த வருடம் அமோகமாக இருக்கும் என்பது நம்பிக்கை. காரணம், கண்ணாடி உடைவதை டென்மார்க் மக்கள் அதிர்ஷ்டமான விஷயமாக நினைக்கிறார்கள். அதனால் புத்தாண்டு பிறக்கும் இரவில், அவர்களுக்கு வேண்டிய உற்றார், உறவினர், நண்பர்கள் வீடுகளுக்குச் சென்று, வாசலில் கண்ணாடி தட்டு, தம்ளர்களை எல்லாம் வீசி எறிந்துவிட்டு வருகிறார்கள்.