புரட்டாசி நைவேத்தியம்

க ன்யா மாதமான புரட்டாசி பெருமாளுக்குரிய மாதம். நவராத்திரி தொடங்கும் அற்புத வெற்றி கொடுக்கும் மாதமும் இதுவே. கேதார கௌரி விரத ஆரம்பம், ஸித்தி விநாயக விரதம், தூர்வாஷ்டமி விரதம், மகாலட்சுமி விரதம், அமுக்தாபரண விரதம், ஜேஷ்டா விரதம், சஷ்டி - லலிதா விரதம், கபிலா சஷ்டி விரதம், மஹாளய பட்ச ஆரம்பம் என விரதங்கள் அதிகம் அனுஷ்டிக்கப்படும் மாதமும் புரட்டாசியே.

. விரதங்கள் அதிகம் இருந்தாலும் நவராத்திரி பண்டிகை நாள்களும் புரட்டாசி சனிக்கிழமைகளும் வருவதால் இந்த மாதத்திலும் அநேக பட்சணங்கள் செய்து ஆண்டவனுக்கு நைவேத்தியமாகப் படைப்பது வழக்கம். பாலும் பருப்பும் அவலும் அதிகம் பயன்படுத்தி பெருமாளை ஆராதித்தால் அந்த வேங்கடமுடையான் எந்நாளும் விலகாத செல்வங்களை அள்ளித்தருவான் என்பது நம்பிக்கை.

. புரட்டாசி மாதத்துக்குரிய நைவேத்தியங்களை நமக்குச் செய்து காட்டுகிறார் அவள் விகடன் வாசகியான சென்னை திருவான்மியூரைச் சேர்ந்த நதியா. சமையற்கலையில் கைதேர்ந்த இவரின் பக்குவத்தில் நைவேத்தியங்களைச் செய்து படைத்து பகவானின் அருளைப் பெறுவோம்!

. கைக்குத்தல் அவல் லட்டு

ஒரு பிடி அவலுக்கு குசேலனுக்கு செல்வ வளங்களையெல்லாம் அள்ளித்தந்த அந்த மாதவனை எண்ணி புரட்டாசி சனிக்கிழமைகளில் இந்தக் கைக்குத்தல் அவல் லட்டுவை செய்து சமர்ப்பிப்பது சிறப்பானது. கைக்குத்தல் அவல் உடல் உறுதிக்கு நலம் சேர்ப்பதும்கூட.

தேவையானவை:

கைக்குத்தல் அவல் - 200 கிராம்

பொடியாக நறுக்கிய தேங்காய் - கைப்பிடி அளவு

பேரீச்சைத் துண்டுகள் - கைப்பிடி அளவு

ஏலக்காய்த்தூள் - ஒரு டீஸ்பூன்

வெல்லம் - 100 கிராம்

வெண்ணெய் - ஒரு டீஸ்பூன்

நெய் - 50 கிராம்

. செய்முறை:

நறுக்கிய தேங்காயை ஒரு டீஸ்பூன் நெய்யில் வதக்கி எடுத்துக்கொள்ளவும். அகன்ற பாத்திரத்தில் மீதி நெய் சேர்த்து சூடானதும் அவலை நன்கு வறுக்கவும். வறுத்த அவலுடன் வறுத்த தேங்காய், ஏலக்காய்த்தூள், பேரீச்சைத் துண்டுகள், வெண்ணெய் சேர்த்து நன்கு கிளறவும். வேறொரு பாத்திரத்தில் வெல்லம், தேவையான அளவு நீர் சேர்த்து லேசான சூட்டில் தேன் பதத்துக்குக் காய்ச்சவும். இதில் அவல் கலவையைச் சேர்த்துக் கிளறவும். மிதமான சூட்டில் உருண்டைகளாகப் பிடித்து பெருமாளுக்குப் படைக்கவும். மேலும் சுவையாகச் செய்ய விரும்பினால் வறுத்த வேர்க்கடலை அல்லது முந்திரியை உடைத்து சேர்க்கலாம்.

. அதிரசம்

பெருமாளுக்குரிய நைவேத்தியங்களில் அதிரசம் விசேஷமானது. ஸ்ரீனிவாசப்பெருமாள் - பத்மாவதி திருமணத்தில் வகுளாதேவி அன்னையே இந்த அதிரசத்தைச் செய்து சமர்ப்பித்தாள் என்று புராணங்கள் கூறுகின்றன. தமிழர்களின் தொன்மையான பலகாரமான இந்த அதிரசம் இல்லாத பண்டிகைகள், விசேஷங்கள் ஏது?

தேவையானவை :

பச்சரிசி மாவு - 500 கிராம்

வெல்லம் - 500 கிராம்

எண்ணெய் - ஒரு கிலோ

ஏலக்காய்த்தூள் - ஒரு டீஸ்பூன்

. செய்முறை:

வெல்லத்தைக் கரைத்து வடிகட்டி, சுத்தப்படுத்தவும். பிறகு அடிகனமான பாத்திரத்தில் ஊற்றிப் பாகு காய்ச்சவும். கனமான கம்பிப் பதம் வந்ததும் இறக்கி வைத்துக்கொள்ளவும். சலித்த அரிசி மாவைக் கொஞ்சம் கொஞ்சமாகப் பாகில் கொட்டி கைவிடாமல் கிளற வேண்டும். கிளறும்போதே ஏலக்காய்த்தூள் சேர்த்து உருட்டி சப்பாத்தி மாவு போல பிசைந்து வெள்ளைத் துணி போட்டு பாத்திரத்தை மூடிவைக்கவும். ஒருநாள் கழித்து அந்த மாவை எடுத்து உருட்டி, வாழையிலையில் வைத்து வட்டமாக தட்டவும். தட்டிய அதிரசத்தை எண்ணெயில் போட்டு நன்கு சிவந்தவுடன் எடுக்கவும். வெல்லத்துக்குப் பதிலாக சர்க்கரை சேர்த்தும் அதிரசம் செய்யலாம். அது, சற்றுக் கெட்டியாக இருக்கும்.

. சோளச் சுண்டல்

நவராத்திரி மாலை வேளைகளில் முப்பெரும் தேவியருக்கும் விதவிதமான நைவேத்தியங்கள் செய்து படைப்பது வழக்கம். அதிலும் ஒன்பது நாளும் ஒன்பது விதமான சுண்டல்கள் செய்து படைத்து எல்லோருக்கும் விநியோகிப்பது அவசியம். ஏராளமான சத்துகள்கொண்ட சோளத்தில் சுண்டல் செய்து உண்பது என்பது வித்தியாசமானதும் சுவையானதும்கூட.

தேவையானவை:

அதிகம் முற்றாத சோளம் - ஒன்று

மிளகு - ஒரு டீஸ்பூன்

தேங்காய்த் துருவல் - அரை கப்

எண்ணெய் - 3 டீஸ்பூன்

உப்பு - 2 சிட்டிகை

. செய்முறை:

சோளத்தை உரித்து முத்துகளை எடுத்து அலசி உப்பு சேர்த்து வேகவைத்துக்கொள்ளவும். கடாயில் எண்ணெயில்லாமல் தேங்காய்த் துருவலை வறுத்து எடுத்துக்கொள்ளவும். அதே கடாயில் எண்ணெய்விட்டு சோள முத்துகளைப் போட்டு வதக்கி, பொடித்த மிளகைச் சேர்த்துக் கிளறி இறக்கவும். இதில் தேங்காய்த் துருவல் தூவிக் கலந்து அம்பிகைக்குப் படைக்கலாம். மாங்காய்த் துருவல், கொத்தமல்லித்தழை தூவினால் இன்னும் சுவை கூடும்.

. கல்கண்டு சாதம்

நவராத்திரியில் சரஸ்வதி பூஜைக்கு, கல்கண்டு சாதம் படைப்பது அநேக பக்தர்களின் வழக்கம். நான்முகன் தேவியான நாமகளுக்கு, கல்கண்டு சாதம் படைத்து வழிபட்டால் இனிய சொல்கொண்டு நம்மைக் காப்பாள் என்பது நம்பிக்கை. ஞானமழை முகிலான வாணிக்குப் பிரியமான நைவேத்தியத்தைப் படைத்து நலங்கள் யாவும் பெறுவோம்.

தேவையானவை:

பச்சரிசி - ஒரு கப்

பால் - ஒரு கப்

டைமண்டு கல்கண்டு - ஒரு கப்

கிராம்பு - 5

ஏலக்காய்த்தூள் - ஒரு டீஸ்பூன்

முந்திரி - 10

திராட்சை - 10

நெய் - 50 கிராம்

. செய்முறை:

கழுவிக் களைந்த அரிசியைக் கொதிக்கும் பாலில் சேர்த்து நன்கு குழைய வேகவைக்கவும். சாதம் இறுக ஆரம்பிக்கும்போது கல்கண்டு களைக் கொட்டிக் கிளறவும். இப்போது சாதம் இளகும். இதில் நெய்யில் வறுத்த முந்திரி, திராட்சை, கிராம்பு சேர்த்துக் கிளறவும். மீதமிருக்கும் நெய்யைச் சேர்த்து அடிபிடிக்காமல் கிளறவும். இறுதியாக ஏலக்காய்த்தூள் சேர்த்து இறக்கவும். கொஞ்சம் கல்கண்டுகளை மேலாகத் தூவி படைக்கலாம். தேங்காய்த் துருவல், குங்குமப்பூ தூவி அலங்கரித்தும் படைக்கலாம்.

. ரவை பாயசம்

விதவிதமான பாயசங்களுக்குப் புகழ்பெற்றது நவராத்திரி. பால், பருப்புப் பாயசங்களுக்கு நிகரான சுவை கொண்டது இந்த ரவை - தேங்காய்ப்பால் பாயசம். பாயசப் பிரியையான திருமகளுக்கு இதைப் படைத்து அவளின் திருவருளைப் பெறலாம். திருமகள் அருளிருந்தால் செல்வ வளத்தோடு செழிப்பான வாழ்க்கையையும் பெறலாம்.

தேவையானவை:

ரவை - 200 கிராம்

சர்க்கரை - 300 கிராம்

முதல் தேங்காய்ப்பால் - ஒரு கப்

இரண்டாம் தேங்காய்ப்பால் - 2 கப்

பாதாம் - 20

திராட்சை - 20

முந்திரி - 20

நெய் - 50 கிராம்

. செய்முறை:

தேங்காயைத் துருவி மிக்ஸியில் போட்டு வடிகட்டி கெட்டியான முதல் பாலை எடுத்து வைத்துக்கொள்ளவும். பிறகு அதே தேங்காய் திப்பியில் மீண்டும் நீர்விட்டு இரண்டாவதாகப் பிழிந்த பாலையும் எடுத்து வைத்துக்கொள்ளவும்.

கடாயை அடுப்பில் வைத்து, மெல்லிய சூட்டில் ரவையைப் பொன்னிறமாக வறுத்தெடுத்துக்கொள்ளவும். வறுத்த ரவையை அடிகனமான பாத்திரத்தில் போட்டு அதில் இரண்டாம் தேங்காய்ப்பால் ஊற்றிக் கொதிக்கவைக்கவும். ரவை வெந்து கொதிக்கும்போது அதில் சர்க்கரையைப் போட்டு அடிபிடிக்காமல் கிளறவும். சர்க்கரை கரைந்து இளகிவரும்போது முதல் தேங்காய்ப்பாலை ஊற்றி ஒரு கொதிவிட்டு இறக்கவும். இதன் மீது வறுத்த முந்திரி, பாதாம், திராட்சையை அப்படியே நெய்யோடு கொட்டிக் கிளறவும். கமகம வாசனையோடு தயாரான இந்தப் பாயசத்தில் பொடித்த பேரீச்சை போன்ற உலர் பழங்களையும் சேர்க்கலாம். சுவை கூடும்.

புரட்டாசி நைவேத்தியம்

மு.ஹரி காமராஜ்

சி.ரவிக்குமார்