Published:Updated:

சகலகலா சமோசா ரெசிப்பி

ஆலூ சமோசா
பிரீமியம் ஸ்டோரி
News
ஆலூ சமோசா

ரெசிப்பிஸ் மற்றும் படங்கள்: முத்துலட்சுமி மாதவகிருஷ்ணன்

``காஷ்மீரிலிருந்து கன்னியாகுமரி வரை அனைத்து மக்களும் விரும்பிச் சாப்பிடும் உணவு சமோசா. பஞ்சாபிகள் வசிக்கும் பல்வேறு வெளிநாடுகளிலும்கூட சமோசா பிரபலமான சிற்றுண்டியே. மழைக்காலங்களில் ஒரு கப் சூடான இஞ்சி டீயோடு ஒரு சூடான சமோசாவும் சேர்ந்த காம்பினேஷனை வேறு எந்த உணவும் வெல்ல முடியாது.

சகலகலா சமோசா ரெசிப்பி

வட இந்தியாவில் செய்யும் ஆலூ சமோசாவும் தென்னிந்தியாவில் செய்யும் ஆனியன் சமோசாவும் மிகவும் பிரபலமான வகைகளாகும். ஆலூ சமோசாவும் ஆனியன் சமோசாவும் ஒன்றுக்கு ஒன்றும் சளைத்ததல்ல. ஆறு வயதுக் குழந்தை முதல் அறுபது வயதுக் குழந்தை வரை வயது வித்தியாசம் இல்லாமல் அத்தனை பேரையும் தன் கட்டுப்பாட்டில் வைத்திருக்கும் ஒரே உணவு சமோசாதான். உழைக்கும் மக்களின் `பசிதாங்கி’யும் இந்த சமோசாவே’’ என்று கூறும் சென்னையைச் சேர்ந்த சமையற்கலைஞர் முத்துலட்சுமி மாதவகிருஷ்ணன் அழகிய படங்களுடன் வழங்கும் சமோசா வகைகள் இங்கே இடம்பெறுகின்றன.

தொகுப்பு: ஸ்ரீ லோபாமுத்ரா

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
சமோசா
சமோசா

சமோசா மாவு செய்முறை

சமோசாக்களில் பல வகைகள் உள்ளன. அதில் பெரும்பாலும் கூம்பு சமோசா மற்றும் முக்கோண சமோசா ஆகிய இரண்டும் பிரபலமான வகைகள் ஆகும். முதலில் கூம்பு சமோசா செய்முறையைப் பார்ப்போம். இங்கே ஆலூ சமோசா, சௌமீன் நூடுல்ஸ் சமோசா, பனீர் சமோசா மற்றும் பின் வீல் சமோசா ஆகிய சமோசா வகைகளுக்குக் கூம்பு சமோசா மாவை வைத்து செய்துள்ளேன்.

கூம்பு சமோசாவுக்கு...

தேவையானவை:

  • மைதா மாவு - 2 கப்

  • நெய் அல்லது எண்ணெய் - 4 டேபிள்ஸ்பூன்

  • ஓமம் - 2 டீஸ்பூன்

  • உப்பு, தண்ணீர் - தேவையான அளவு

சமோசா
சமோசா

செய்முறை:

அகலமான தாம்பாளத்தில் அல்லது பாத்திரத்தில் மைதா மாவு, ஓமம், தேவையான அளவு உப்பு மற்றும் நெய் சேர்த்துக் கொள்ளவும். பின்னர் கைகளால் நன்கு பிசிறி விடவும். மாவைக் கைகளில் சேர்த்தால் பிடிக்கும் அளவுக்குக் கலந்துகொள்ளவும். இப்போது தண்ணீரைச் சிறிது சிறிதாகத் தெளித்து, கெட்டியாகவும் ஒட்டாமலும் வரும் வரை பிசைந்துகொள்ளவும். பிசைந்த மாவை 30 முதல் 40 நிமிடங்கள் வரை மூடி வைக்கவும். பிறகு சிறிது நேரம் சப்பாத்தி கட்டையில் மென்மையாகும் வரை கைகளால் உருட்டிக்கொள்ளவும். உருட்டிய மாவிலிருந்து சிறு சிறு உருண்டைகளாக உருட்டிக்கொள்ளவும். பின்னர் கைகளால் வட்டமாகச் செய்து சிறிதளவு மாவைத் தூவி சிறிய நீள்வட்டமாகத் தேய்த்துக்கொள்ளவும். நீள்வட்டங்களில் நடுவில் ஒரு கத்தியால் வெட்டி அரை வட்டங்களாகச் செய்துகொள்ளவும். இதேபோல் மற்ற உருண்டைகளையும் செய்துகொள்ளவும். கூம்பு சமோசாவுக்கான அரை வட்டங்கள் தயார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

ஆலூ சமோசா

தேவையானவை:

  • உருளைக்கிழங்கு - 2

  • பச்சைப் பட்டாணி - கால் கப்

  • மஞ்சள்தூள் - அரை டீஸ்பூன்

  • மிளகாய்த்தூள் - கால் டீஸ்பூன்

  • மல்லித்தூள் (தனியாத்தூள்) - அரை டீஸ்பூன்

  • கரம் மசாலாத்தூள் - கால் டீஸ்பூன்

  • சீரகம் - அரை டீஸ்பூன்

  • பச்சை மிளகாய் - 2 (பொடியாக நறுக்கவும்)

  • பூண்டு - 4 பல் (பொடியாக நறுக்கவும்)

  • இஞ்சி - அரை அங்குலத் துண்டு (தோல் சீவி, பொடியாக நறுக்கவும்)

  • கொத்தமல்லி இலை - 2 டேபிள்ஸ்பூன் (பொடியாக நறுக்கவும்)

  • எண்ணெய், உப்பு - தேவையான அளவு

ஆலூ சமோசா
ஆலூ சமோசா

ஆலூ மசாலா செய்முறை:

பச்சைப் பட்டாணி மற்றும் உருளைக்கிழங்கை குக்கரில் 4 முதல் 6 விசில் வரும் வரை வேகவைத்துக்கொள்ளவும். பின்னர் உருளைக்கிழங்கின் தோலை உரித்து மசித்துக்கொள்ளவும். ஒரு கனமான கடாயில் எண்ணெய்விட்டு சூடானதும் அதில் சீரகம் சேர்த்து, பொரிந்ததும் பொடியாக நறுக்கிய இஞ்சி, பொடியாக நறுக்கிய பூண்டு மற்றும் பச்சை மிளகாய் சேர்த்து வதக்கவும். அவை வதங்கியதும் மஞ்சள்தூள், மிளகாய்த்தூள் மற்றும் மல்லித்தூள் சேர்த்து லேசாக நிறம் மாறியதும் வேகவைத்து மசித்த உருளைக்கிழங்கு மற்றும் பச்சைப் பட்டாணி சேர்த்து வதக்கவும். அதில் தேவையான அளவு உப்பு மற்றும் கரம் மசாலாத்தூள் சேர்த்துக் கலந்து கலவை நன்கு ஒட்டாமல் வரும் வரை வதக்கி, பொடியாக நறுக்கிய கொத்தமல்லி இலை சேர்த்து இறக்கவும்.

ஆலூ சமோசா செய்முறை:

இப்போது அரை வட்டங்களாகச் செய்தவற்றில் ஒன்றை எடுத்து ஒரு விளிம்பில் சிறிது தண்ணீர் தடவி மறுபாதி விளிம்பின் மேல் ஒட்டி கூம்பு வடிவில் செய்துகொள்ளவும். பின்னர், அதனுள்ளே தயாரித்த உருளைக்கிழங்கு மசாலா கலவையை வைத்து ஓரங்களில் சிறிது தண்ணீர் தடவி ஒட்டிவிடவும். கனமான கடாயில் எண்ணெய்விட்டு குறைந்த சூட்டில் வைத்து காயவிடவும். எண்ணெய் லேசாகச் சூடானதும் தயார் செய்த சமோசாக்களைச் சேர்த்துக் குறைந்த சூட்டிலேயே வைத்து இடையிடையே கரண்டியால் திருப்பிக் கொண்டே பொன்னிறமாகும் வரை பொரித்தெடுக்கவும். சுவையான ஆலூ சமோசா தயார்.

பெர்சியாவில்தான் சமோசாவின் வரலாறு தொடங்குகிறது. 11-ம் நூற்றாண்டில் வரலாற்று ஆசிரியர் அபுல் ஃபசல் பேய்ஹாகி இதுபற்றிக் குறிப்பிட்டுள்ளார்.

செளமீன் நூடுல்ஸ் சமோசா

தேவையானவை:

  • பிளெய்ன் நூடுல்ஸ் - 100 கிராம்

  • மெலிதாக நறுக்கிய முட்டைகோஸ் - கால் கப்

  • மெலிதாக நறுக்கிய கேரட் - கால் கப்

  • மெலிதாக நறுக்கிய பீன்ஸ் - கால் கப்

  • துருவிய இஞ்சி - ஒரு டேபிள்ஸ்பூன்

  • மிளகுத்தூள் - ஒரு டீஸ்பூன்

  • சில்லி சாஸ் - அரை டீஸ்பூன்

  • சோயா சாஸ் - கால் டீஸ்பூன்

  • தக்காளி சாஸ் - அரை டீஸ்பூன்

  • சர்க்கரை - அரை டீஸ்பூன்

  • பொடியாக நறுக்கிய வெங்காயத்தாள் - சிறிதளவு

  • எண்ணெய், உப்பு - தேவையான அளவு

செளமீன் நூடுல்ஸ் சமோசா
செளமீன் நூடுல்ஸ் சமோசா

மசாலா செய்முறை:

அகலமான பாத்திரத்தில் 5 கப் தண்ணீர் விட்டுக் கொதிக்கவிடவும். தண்ணீர் நன்கு கொதித்ததும் அதில் ஒரு சொட்டு எண்ணெய் ஊற்றிக் கலந்து பின் அதில் பிளெய்ன் நூடுல்ஸைச் சேர்த்து வேகவிடவும். நூடுல்ஸ் வெந்ததும் தண்ணீரை முழுவதும் வடித்துக்கொள்ளவும். ஒரு தட்டில் பரப்பி வைத்து ஆற வைத்துக்கொள்ளவும். வாணலியில் ஒரு டேபிள்ஸ்பூன் எண்ணெய்விட்டு, சூடானதும் அதில் துருவிய இஞ்சி சேர்த்து வதக்கவும். பின்னர் நறுக்கிய கோஸ், கேரட் மற்றும் பீன்ஸ் சேர்த்து வதக்கவும். காய்கறிகள் வதங்கியதும் அதில் சோயா சாஸ், தக்காளி சாஸ், சில்லி சாஸ் மற்றும் சர்க்கரை சேர்த்து வதக்கி, வேகவைத்த நூடுல்ஸைச் சேர்த்துக் கிளறவும். அதில் தேவையான அளவு உப்பு, மிளகுத்தூள் மற்றும் பொடியாக நறுக்கிய வெங்காயத்தாள் சேர்த்துக் கலந்து இறக்கவும்.

செளமீன் நூடுல்ஸ் சமோசா செய்முறை:

இப்போது அரை வட்டங்களாகச் செய்தவற்றில் ஒன்றை எடுத்து ஒரு விளிம்பில் சிறிது தண்ணீர் தடவி மறுபாதி விளிம்பின் மேல் ஒட்டி கூம்பு வடிவில் செய்துகொள்ளவும். பின் அதனுள்ளே தயாரித்த சௌமீன் நூடுல்ஸ் கலவையை வைத்து ஓரங்களில் சிறிது தண்ணீர் தடவி ஒட்டிவிடவும். கனமான கடாயில் எண்ணெய்விட்டு, குறைந்த சூட்டில் வைத்துக் காயவிடவும். எண்ணெய் லேசாக சூடானதும் தயார் செய்த சமோசாக்களைச் சேர்த்துக் குறைந்த தீயில் வைத்து இடை யிடையே கரண்டியால் திருப்பிக்கொண்டே பொன்னிறமாகும் வரை பொரித்தெடுக்கவும். சௌமீன் நூடுல்ஸ் சமோசாக்களை தக்காளி சாஸ் வைத்துப் பரிமாறவும்.

சமோசாவின் தொடக்க கால பெயர் `சம்பூசாஹ்’.

பனீர் சமோசா

தேவையானவை:

  • பனீர் - 150 கிராம்

  • வெங்காயம் - ஒன்று

  • இஞ்சி - பூண்டு விழுது - ஒரு டீஸ்பூன்

  • கஸூரி மேத்தி இலைகள் - ஒரு டேபிள்ஸ்பூன்

  • மஞ்சள்தூள் - அரை டீஸ்பூன்

  • மிளகாய்த்தூள் - கால் டீஸ்பூன்

  • மல்லித்தூள் (தனியாத்தூள்) - அரை டீஸ்பூன்

  • சீரகத்தூள் - கால் டீஸ்பூன்

  • கரம் மசாலாத்தூள் - அரை டீஸ்பூன்

  • உப்பு, எண்ணெய் - தேவையான அளவு

பனீர் சமோசா
பனீர் சமோசா

மசாலா செய்முறை:

பனீரைப் பொடியாக நறுக்கிக்கொள்ளவும். வெங்காயத்தையும் பொடியாக நறுக்கவும்.ஒரு பானில் (Pan) ஒரு டேபிள்ஸ்பூன் எண்ணெய் விட்டு சூடானதும் அதில் வெங்காயம் சேர்த்து வதக்கவும். வெங்காயம் வதங்கியதும் இஞ்சி - பூண்டு விழுது சேர்த்து வதக்கவும். பச்சை வாசனை போனதும் அதில் மஞ்சள்தூள், மிளகாய்த்தூள், மல்லித்தூள், சீரகத்தூள், கரம் மசாலாத்தூள் சேர்த்து லேசாக வதக்கவும். பின்னர் பொடியாக நறுக்கிய பனீர் துண்டுகளைச் சேர்த்து, தேவையான அளவு உப்பு சேர்த்து மெதுவாகக் கலந்து கஸூரி மேத்தி இலைகள் சேர்த்துப் புரட்டி இறக்கவும்.

பனீர் சமோசா செய்முறை:

இப்போது அரை வட்டங்களாக செய்தவற்றில் ஒன்றை எடுத்து ஒரு விளிம்பில் சிறிது தண்ணீர் தடவி மறுபாதி விளிம்பின் மேல் ஒட்டி கூம்பு வடிவில் செய்துகொள்ளவும். பின்னர் அதனுள்ளே தயாரித்த பனீர் கலவையை வைத்து ஓரங்களில் சிறிது தண்ணீர் தடவி ஒட்டிவிடவும். கனமான கடாயில் எண்ணெய்விட்டு குறைவான சூட்டில் வைத்து காயவிடவும். எண்ணெய் லேசாக சூடானதும் தயார் செய்த சமோசாக்களைச் சேர்த்துக் குறைந்த தீயில் வைத்து இடையிடையே கரண்டியால் திருப்பிக்கொண்டே பொன்னிறமாகும் வரை பொரித்தெடுக்கவும்.

பழங்காலந்தொட்டே குறிப்பிடத்தக்க அரண்மனை உணவாகத் திகழ்ந்திருக்கிறது சமோசா.

பின் வீல் சமோசா

தேவையானவை:

  • உருளைக்கிழங்கு - 2

  • மஞ்சள்தூள் - கால் டீஸ்பூன்

  • மிளகாய்த்தூள் - அரை டீஸ்பூன்

  • மல்லித்தூள் (தனியாத்தூள்) - அரை டீஸ்பூன்

  • கரம் மசாலாத்தூள் - அரை டீஸ்பூன்

  • சீரகத்தூள் - கால் டீஸ்பூன்

  • இஞ்சி - பூண்டு விழுது - அரை டீஸ்பூன்

  • கொத்தமல்லி இலை - 2 டேபிள்ஸ்பூன்

  • மைதா மாவு - 2 டேபிள்ஸ்பூன்

  • தண்ணீர் - அரை கப்

  • எண்ணெய், உப்பு - தேவையான அளவு

பின் வீல் சமோசா
பின் வீல் சமோசா

மசாலா செய்முறை:

உருளைக்கிழங்கைக் குக்கரில் நான்கு விசில் வரும் வேகவைத்துக்கொள்ளவும். பின்னர் தோலுரித்து மசித்துக்கொள்ளவும். வாணலியில் எண்ணெய்விட்டு சூடானதும் அதில் இஞ்சி - பூண்டு விழுதைச் சேர்த்து வதக்கவும். பிறகு அதில் மிளகாய்த்தூள், மஞ்சள்தூள், மல்லித்தூள், சீரகத்தூள், கரம் மசாலாத்தூள் மற்றும் பொடியாக நறுக்கிய கொத்தமல்லி இலை சேர்த்து வதக்கவும். பின்னர் மசித்த உருளைக்கிழங்கு மற்றும் தேவையான அளவு உப்பு சேர்த்துக் கலந்து இறக்கவும்.

பின் வீல் சமோசா செய்முறை:

கூம்பு சமோசாவுக்குக் குறிப்பிட்டுள்ள மாவில் ஆரஞ்சு பழ அளவில் உருண்டை எடுத்துக்கொண்டு உருட்டிக்கொள்ளவும். பின்னர் சிறிது மைதா மாவு தூவி பெரிய வட்டமாகத் தேய்த்துக்கொள்ளவும். அதில் தயார் செய்து வைத்துள்ள உருளைக்கிழங்கு மசாலாவைச் சமமாகப் பரப்பி வைக்கவும். பின்னர் ஓரங்களில் இருந்து ரோல் செய்து உருட்டிக்கொள்ளவும். ஒரு கத்தியால் அரை அங்குலத் துண்டுகளாக நறுக்கிக்கொள்ளவும்.

வாணலியில் எண்ணெய் ஊற்றி மிதமான சூட்டில் வைத்து காயவிடவும். ஒரு சிறிய கிண்ணத்தில் 2 டேபிள்ஸ்பூன் மைதா மாவுடன் அரை கப் தண்ணீர் ஊற்றிக் கரைத்துக் கொள்ளவும். இப்போது நறுக்கிய வட்டங்களை மைதா கரைசலில் இரண்டு பக்கமும் நன்கு தோய்த்து எண்ணெயில் போடவும். சிறிது நேரம் கழித்து மெதுவாக திருப்பிப் போட்டு பொன்னிறமாக மாறியதும் தட்டில் மாற்றிக்கொள்ளவும். புதினா கொத்தமல்லிச் சட்னி வைத்து சூடாகப் பரிமாறவும்.

கொத்துக்கொத்தாக வெட்டப்பட்ட இறைச்சி, பருப்பு வகைகள், உலர்பழங்கள் என அன்றைய சமோசாக்களில் அடைபட்டவை ஏராளம்.

முக்கோண சமோசாவுக்கு...

முக்கோண சமோசாவுக்கு நாம் முதலில் சமோசா தகடுகள் (பட்டி - Patti) செய்து கொள்ள வேண்டும். இங்கே ஸ்வீட் கார்ன் சமோசா, மினி ஆனியன் சமோசா, பீட்சா சமோசா மற்றும் வெஜிடபிள் சமோசாவுக்கு, சமோசா தகடுகள் செய்துள்ளேன். இப்போது அதன் செய்முறையைப் பார்ப்போம்.

தேவையானவை: மைதா மாவு - 2 கப் கோதுமை மாவு - அரை கப் எண்ணெய் - 6 டேபிள்ஸ்பூன் உப்பு, தண்ணீர் - தேவையான அளவு. சமோசா தகடுகள் நடுவே தூவுவதற்கு: மைதா மாவு - 2 டேபிள்ஸ்பூன் எண்ணெய் - 8 டீஸ்பூன்.

செய்முறை:

அகலமான தாம்பாளத்தில் அல்லது பாத்திரத்தில் மைதா மாவு, கோதுமை மாவு, தேவையான அளவு உப்பு மற்றும் எண்ணெய் சேர்த்துக் கலந்துகொள்ளவும். பின்னர் கைகளால் நன்கு பிசிறிவிடவும். மாவைச் சேர்த்துப் பிடித்தால் பிடிக்கும் அளவுக்குக் கலந்துகொள்ளவும். இப்போது தண்ணீரைச் சிறிது சிறிதாகச் சேர்த்து நன்கு பிசைந்துகொள்ளவும். மாவு ஒட்டாமல் வரும் வரை நன்கு கெட்டியாகப் பிசைந்துகொள்ளவும். பிசைந்த மாவை 30 நிமிடங்கள் மூடி வைக்கவும். பின் மீண்டும் ஒருமுறை மென்மையாகப் பிசைந்துகொள்ளவும். பிசைந்த மாவைச் சிறிய ஆரஞ்சு பழ அளவில் சமமான உருண்டைகளாக உருட்டிக்கொள்ளவும். உருண்டைகளை வட்டமாகத் தட்டி சிறிதளவு மாவு தூவி சப்பாத்திகளாகத் தேய்த்துக்கொள்ளவும். பிறகு ஒரு சப்பாத்தியின் மேல் ஒரு டீஸ்பூன் எண்ணெயை நன்கு பரப்பி தேய்த்துக்கொள்ளவும். அதில் சிறிதளவு மாவைத் தூவிக்கொள்ளவும். மற்றொரு சப்பாத்தியை மேலே வைத்து லேசாக அழுத்தவும். இரண்டாவது சப்பாத்தியின் மேலே அதேபோல் எண்ணெய் தடவி மாவைத் தூவி மற்றொரு சப்பாத்தியை வைத்து அடுக்கிக்கொள்ளவும். இதேபோல் செட் செட்டாகச் செய்து கொள்ளவும்.

சமோசா
சமோசா

இப்போது அடுக்கிய ஒரு செட்டை மீண்டும் ஒருமுறை மெலிதாக தேய்க்கவும். பின் ஒரு கத்தியால் நான்கு ஓரங்களையும் வெட்டி செவ்வக வடிவில் செய்துகொள்ளவும். ஒரு கனமான தோசைக்கல்லை மிதமான தீயில் வைத்துக் காயவிடவும். தோசைக்கல் சூடானதும் அடுக்கிய சப்பாத்தியை வைத்து லேசாக வாட்டம் செய்யவும். உங்களால் முடிந்தவரை விரைவாகப் புரட்டிப் புரட்டி எடுக்கவும். சப்பாத்தியின் மேல் சிறிய புள்ளிகள் வந்ததும் நிறம் மாறும்போது இறக்கவும். அவை லேசாக ஆறியதும் அடுக்குகளை மெதுவாகப் பிரிக்கவும். பின் ஒரு அகலமான தட்டில் வைத்து அவற்றை மூன்று செவ்வகங்களாக நறுக்கிக்கொள்ளவும். முக்கோண சமோசாவுக்கான சமோசா தகடுகள் தயார்.

ஸ்வீட் கார்ன் சமோசா

தேவையானவை:

  • உதிர்த்த ஸ்வீட் கார்ன் முத்துகள் - ஒரு கப்

  • வெங்காயம் - ஒன்று

  • பச்சை மிளகாய் - 2

  • மஞ்சள்தூள் - கால் டீஸ்பூன்

  • மிளகாய்த்தூள் - கால் டீஸ்பூன்

  • மிளகுத்தூள் - கால் டீஸ்பூன்

  • மல்லித்தூள் (தனியாத்தூள்) - கால் டீஸ்பூன்

  • கரம் மசாலாத்தூள் - கால் டீஸ்பூன்

  • அவல் - 2 டேபிள்ஸ்பூன்

  • கொத்தமல்லி இலை - ஒரு டேபிள்ஸ்பூன் (பொடியாக நறுக்கவும்)

  • எண்ணெய், உப்பு - தேவையான அளவு

மைதா கரைசல் செய்ய:

  • மைதா மாவு - 2 டேபிள்ஸ்பூன்

  • தண்ணீர் - 4 டேபிள்ஸ்பூன்

ஸ்வீட் கார்ன் சமோசா
ஸ்வீட் கார்ன் சமோசா

மசாலா செய்முறை:

ஒரு சிறிய மிக்ஸி ஜாரில் கால் கப் கார்ன் முத்துகளைத் தண்ணீர்விடாமல் அரைத்துக் கொள்ளவும். வெங்காயம் மற்றும் பச்சை மிளகாயைப் பொடியாக நறுக்கவும். கடாயில் எண்ணெய்விட்டு சூடானதும் அதில் பொடியாக நறுக்கிய வெங்காயம் மற்றும் பச்சை மிளகாய் சேர்த்து வதக்கவும். பின்னர் அரைத்த கார்னைச் சேர்த்து வதக்கவும். சிறிது வதங்கியதும் அதில் மீதமுள்ள கார்ன் முத்துகளைச் சேர்த்து வதக்கவும். கார்ன் நன்கு வதங்கியதும் மஞ்சள்தூள், மிளகாய்த்தூள், மல்லித்தூள், மிளகுத்தூள் மற்றும் தேவையான அளவு உப்பு சேர்த்து நன்கு கலந்துகொள்ளவும். கடைசியாக கரம் மசாலாத்தூள் மற்றும் பொடியாக நறுக்கிய கொத்தமல்லி இலை சேர்த்து இறக்கவும். அதில் அவலைச் சேர்த்து நன்கு கலந்துகொள்ளவும்.

ஸ்வீட் கார்ன் சமோசா செய்முறை:

ஒரு சிறிய கிண்ணத்தில் 2 டேபிள்ஸ்பூன் மைதா மாவுடன் 4 டேபிள்ஸ்பூன் தண்ணீர் ஊற்றிக் கெட்டியாகக் கரைத்துக்கொள்ளவும். ஒரு அகலமான தட்டில் தயார் செய்த சமோசா தகடுகளை எடுத்து வைத்துக்கொள்ளவும். முதலில் தகடுகளை முக்கோணமாக மடிக்கத் தொடங்குங்கள். பின்னர் அதை மேலும் ஒருமுறை மடித்து கூம்பு வடிவில் செய்துகொள்ளவும். இப்போது தயார் செய்த ஸ்வீட் கார்ன் கலவையை உள்ளே வைக்கவும். பிறகு மைதா கரைசலைத் தகடுகளின் ஓரங்களில் தடவி மடித்து முக்கோணமாகச் செய்துகொள்ளவும். முக்கோண கூம்புகளின் நுனியிலும் சிறிது மைதா கரைசலைத் தடவி நன்கு ஒட்டிக்கொள்ளவும். ஒரு அகலமான வாணலியில் எண்ணெய்விட்டு சூடானதும் அதில் தயார் செய்த முக்கோண சமோசாக்களைச் சேர்க்கவும். சிறிது நேரம் கழித்து மெதுவாகத் திருப்பிப் போட்டு இருபுறமும் நன்கு பொன்னிறமாகும் வரை பொரித்தெடுக்கவும்.

2000 ஆண்டுகளுக்கு முன் மத்திய ஆசியா வழியாக இந்தியாவுக்குள் சமோசா நுழைந்தது.

மினி ஆனியன் சமோசா

தேவையானவை:

  • வெங்காயம் - ஒன்று

  • பச்சை மிளகாய் - 2

  • கொத்தமல்லி இலை - 2 டேபிள்ஸ்பூன்

  • கறிவேப்பிலை - சிறிதளவு

  • அவல் - 4 டேபிள்ஸ்பூன்

  • மஞ்சள்தூள் - கால் டீஸ்பூன்

  • மிளகாய்த்தூள் - கால் டீஸ்பூன்

  • எண்ணெய், உப்பு - தேவையான அளவு

  • மைதா கரைசல் செய்ய:

  • மைதா மாவு - 2 டேபிள்ஸ்பூன்

  • தண்ணீர் - 4 டேபிள்ஸ்பூன்

மினி ஆனியன் சமோசா
மினி ஆனியன் சமோசா

வெங்காயக் கலவை செய்முறை:

வெங்காயம் மற்றும் பச்சை மிளகாயைப் பொடியாக நறுக்கிக்கொள்ளவும். ஒரு அகலமான பாத்திரத்தில் பொடியாக நறுக்கிய வெங்காயம், பச்சை மிளகாய், பொடியாக நறுக்கிய கொத்தமல்லி இலை, பொடியாக நறுக்கிய கறிவேப்பிலை, மஞ்சள்தூள், மிளகாய்த்தூள் மற்றும் தேவையான அளவு உப்பு சேர்த்துக் கைகளால் கலந்துகொள்ளவும். 10 நிமிடங்கள் மூடி வைக்கவும். பிறகு நன்கு பிழிந்து மற்றொரு பாத்திரத்தில் மாற்றி அதில் அவலை சேர்த்து நன்கு கலந்து மூடி வைக்கவும்.

மினி ஆனியன் சமோசா செய்முறை:

ஒரு சிறிய கிண்ணத்தில் 2 டேபிள்ஸ்பூன் மைதா மாவுடன் 4 டேபிள்ஸ்பூன் தண்ணீர்விட்டுக் கலந்துகொள்ளவும். இப்போது தயார் செய்த தகடுகளை 1.5 இன்ச் செவ்வங்களாக வெட்டுங்கள். வெட்டிய தகடுகளை ஓர் அகலமான தட்டில் வைத்துக்கொள்ளவும். ஓரத்தில் இருந்து முக்கோண வடிவில் மடிக்க ஆரம்பித்து, கூம்பு வடிவில் செய்து அதில் தயார் செய்த வெங்காய கலவையை நன்கு அழுத்தி வைக்கவும். பின்னர் ஓரங்களில் மைதா கரைசலைத் தடவி ஒட்டிவிடவும். வாணலியில் எண்ணெய்விட்டு காய்ந்ததும் தயார் செய்த மினி சமோசாக்களைச் சேர்க்கவும். சிறிது நேரம் கழித்து மெதுவாகத் திருப்பிப் போட்டு இருபுறமும் நன்கு முறுகலாகும் வரை பொரித்தெடுக்கவும்.

14-ம் நூற்றாண்டில் இந்தியா வந்திருந்த மொராக்கோ பயணி இபின் பட்டூடாவுக்கு முகம்மது பின் துக்ளக் அவையில் சமோசா பரிமாறப் பட்டிருக்கிறது.

வெஜிடபிள் சமோசா

தேவையானவை:

  • கேரட் - ஒன்று

  • பீன்ஸ் - 5

  • முட்டைகோஸ் - சிறிய துண்டு

  • வேகவைத்த பச்சைப் பட்டாணி - கால் கப்

  • வெங்காயம் - ஒன்று

  • இஞ்சி - பூண்டு விழுது - ஒரு டீஸ்பூன்

  • மஞ்சள்தூள் - கால் டீஸ்பூன்

  • மிளகாய்த்தூள் - கால் டீஸ்பூன்

  • கரம் மசாலாத்தூள் - அரை டீஸ்பூன்

  • கறிவேப்பிலை - சிறிதளவு

  • கொத்தமல்லி இலை - சிறிதளவு

  • அவல் - 2 டேபிள்ஸ்பூன்

  • எண்ணெய், உப்பு - தேவையான அளவு

  • மைதா கரைசல் செய்ய:

  • மைதா மாவு - 2 டேபிள்ஸ்பூன்

  • தண்ணீர் - 4 டேபிள்ஸ்பூன்

வெஜிடபிள் சமோசா
வெஜிடபிள் சமோசா

மசாலா செய்முறை:

வெங்காயம் மற்றும் காய்கறிகளை மிகவும் பொடியாக நறுக்கிக்கொள்ளவும். கடாயில் 2 டேபிள்ஸ்பூன் எண்ணெய்விட்டு சூடானதும் அதில் பொடியாக நறுக்கிய வெங்காயம் சேர்த்து வதக்கவும். வெங்காயம் வதங்கியதும் இஞ்சி - பூண்டு விழுதைச் சேர்த்து வதக்கவும். பிறகு கிள்ளிய கறிவேப்பிலை மற்றும் பொடியாக நறுக்கிய காய்கறிகளைச் சேர்த்து சிறிது நேரம் கைவிடாமல் வதக்கவும். காய்கறிகள் பாதியளவு வதங்கியதும் வேகவைத்த பச்சைப் பட்டாணி, மஞ்சள்தூள், மிளகாய்த்தூள், கரம் மசாலாத்தூள் மற்றும் தேவையான அளவு உப்பு சேர்த்துக் கலந்து, பொடியாக நறுக்கிய கொத்தமல்லி இலை சேர்த்து இறக்கவும். பின்னர் அதில் அவலைச் சேர்த்து நன்கு கலந்துவிடவும்.

மிக்ஸ்டு வெஜிடபிள் சமோசா செய்முறை:

ஒரு சிறிய கிண்ணத்தில் 2 டேபிள்ஸ்பூன் மைதா மாவுடன் 4 டேபிள்ஸ்பூன் தண்ணீர் ஊற்றிக் கெட்டியாகக் கரைத்துக்கொள்ளவும். அகலமான தட்டில் தயார் செய்த சமோசா தகடுகளை எடுத்து வைத்துக்கொள்ளவும். முதலில் சமோசா தகடுகளை முக்கோணமாக மடிக்கத் தொடங்குங்கள். பின்னர் அதை மேலும் ஒருமுறை மடித்து கூம்பு வடிவில் செய்துகொள்ளவும். இப்போது தயார் செய்த காய்கறி கலவையை உள்ளே வைக்கவும். பிறகு கரைத்து வைத்துள்ள மைதா கரைசலைத் தகடுகளின் ஓரங்களில் தடவி மடித்து முக்கோணமாகச் செய்துகொள்ளவும். முக்கோண கூம்புகளின் நுனியிலும் சிறிது மைதா கரைசலைத் தடவி நன்கு ஒட்டிக்கொள்ளவும். அகலமான வாணலியில் எண்ணெய்விட்டு சூடானதும் அதில் தயார் செய்த முக்கோண சமோசாக்களைச் சேர்க்கவும். மிதமான சூட்டில் வைத்து சிறிது நேரம் கழித்து மெதுவாகத் திருப்பிப் போட்டு இருபுறமும் நன்கு பொன்னிறமாகும் வரை பொரித்தெடுக்கவும்.

வெவ்வேறு விதமான உட்பொருள்கள் சமோசாவில் பயன்படுத்தப் பட்டாலும் வெளிப்புற மாவாகப் பெரும்பாலும் மைதாவே இடம்பெறுகிறது.

பீட்சா சமோசா

தேவையானவை:

  • வெங்காயம் - அரை கப் (பொடியாக நறுக்கியது)

  • தக்காளி - கால் கப் (நடுவில் இருக்கும் விதைகளை நீக்கி, பொடியாக நறுக்கியது)

  • குடமிளகாய் - கால் கப் (பொடியாக நறுக்கியது)

  • பூண்டு - 5 பல்

  • ஒரிகானோ - ஒரு டேபிள்ஸ்பூன்

  • மிளகுத்தூள் - ஒரு டீஸ்பூன்

  • சில்லி ஃப்ளேக்ஸ் - 2 டீஸ்பூன்

  • பீட்சா சாஸ் - 2 டேபிள்ஸ்பூன்

  • செடார் (cheddar) சீஸ் - ஒரு கப்

  • எண்ணெய், உப்பு - தேவையான அளவு

  • மைதா கரைசல் செய்ய:

  • மைதா மாவு - 2 டேபிள்ஸ்பூன்

  • தண்ணீர் - 4 டேபிள்ஸ்பூன்

பீட்சா சமோசா
பீட்சா சமோசா

கலவை செய்முறை:

ஒரு தட்டில் செடார் சீஸைப் பொடியாக துருவிக்கொள்ளவும். பூண்டுப் பற்களை நன்றாகத் தட்டிக்கொள்ளவும். ஒரு பவுலில் பொடியாக நறுக்கிய வெங்காயம், பொடியாக நறுக்கிய குடமிளகாய், பொடியாக நறுக்கிய தக்காளி, தட்டிய பூண்டு, சில்லி ஃப்ளேக்ஸ், மிளகுத்தூள், ஒரிகானோ மற்றும் சிறிது உப்பு சேர்த்து நன்கு கலந்துகொள்ளவும். பின் துருவிய செடார் சீஸ் மற்றும் பீட்சா சாஸ் சேர்த்து நன்கு கலந்துகொள்ளவும். இந்தக் கலவையை மூடி, ஃப்ரிட்ஜில் 30 நிமிடங்கள் வைக்கவும்.

பீட்சா சமோசா செய்முறை:

ஒரு சிறிய கிண்ணத்தில் 2 டேபிள்ஸ்பூன் மைதா மாவுடன் 4 டேபிள்ஸ்பூன் தண்ணீர் ஊற்றிக் கெட்டியாகக் கரைத்துக்கொள்ளவும். ஒரு அகலமான தட்டில் தயார் செய்த சமோசா தகடுகளை எடுத்து வைத்துக்கொள்ளவும். முதலில் தகடுகளை முக்கோணமாக மடிக்கத் தொடங்குங்கள். பின் அதை மேலும் ஒரு முறை மடித்து கூம்பு வடிவில் செய்துகொள்ளவும். இப்போது தயார் செய்த பீட்சா கலவையை உள்ளே வைக்கவும்.

பின்னர் மைதா கரைசலை சமோசா தகடுகளின் ஓரங்களில் தடவி மடித்து முக்கோணமாகச் செய்துகொள்ளவும். முக்கோணக் கூம்புகளின் நுனியிலும் சிறிது மைதா கரைசலைத் தடவி நன்கு ஒட்டிக்கொள்ளவும்.

அகலமான வாணலியில் எண்ணெய்விட்டு சூடானதும் அதில் தயார் செய்த முக்கோண சமோசாக்களைச் சேர்க்கவும். குறைந்த சூட்டில் வைத்து வேகவிடவும். சிறிது நேரம் கழித்து மெதுவாகத் திருப்பிப் போட்டு இருபுறமும் நன்கு பொன்னிறமாகும் வரை பொரித்தெடுக்கவும். சூடாகப் பரிமாறவும்.

சம்பூசா, சம்போசா, சமூசா, சோமாசி, சிங்கதா, சிங்கரா... இவை சமோசாவின் பல்வேறு பெயர்கள்.

சாக்லேட் சமோசா

தேவையானவை:

  • மைதா மாவு - ஒரு கப்

  • நெய் - 2 டேபிள்ஸ்பூன்

  • சர்க்கரை - 4 டேபிள்ஸ்பூன்

  • டார்க் சாக்லேட் - அரை கப்

  • பாதாம் பருப்பு - 7

  • பிஸ்தா பருப்பு - 10

  • சர்க்கரைப் பாகு செய்ய:

  • சர்க்கரை - அரை கப்

  • தண்ணீர் - ஒன்றரை கப்

சாக்லேட் சமோசா
சாக்லேட் சமோசா

சாக்லேட் சமோசாவுக்கான மாவு செய்முறை:

ஒரு அகலமான பாத்திரத்தில் மைதா மாவு, 2 டேபிள்ஸ்பூன் சர்க்கரை மற்றும் நெய் சேர்த்து நன்கு கலந்துகொள்ளவும். கைகளால் நன்கு பிசிறி, பிடிக்கும் அளவுக்கு வந்ததும் சிறிது தண்ணீர் ஊற்றிப் பிசைந்து கொள்ளவும். பிசைந்த மாவை 20 நிமிடங்கள் மூடி வைக்கவும்.

சாக்லேட் பூரணம் செய்முறை:

ஒரு தட்டில் டார்க் சாக்லேட்டைப் பொடியாக துருவிக்கொள்ளவும். பாதாம் பருப்பு மற்றும் பிஸ்தா பருப்பை ஒரு சிறிய மிக்ஸி ஜாரில் கொரகொரப்பாகப் பொடித்துக்கொள்ளவும். பின்னர் ஒரு பாத்திரத்தில் துருவிய சாக்லேட், பொடித்த பாதாம் மற்றும் பிஸ்தா பருப்பு, 2 டேபிள்ஸ்பூன் சர்க்கரை சேர்த்து நன்கு கலந்துகொள்ளவும்.

சாக்லேட் சமோசா செய்முறை:

பிசைந்த மாவை மீண்டும் ஒருமுறை மென்மையாகப் பிசைந்து சிறு சிறு உருண்டைகளாக உருட்டிக் கொள்ளவும். பின்னர் சிறு சிறு வட்டங்களாகச் செய்து

கொள்ளவும். பிறகு நடுவில் ஒரு கத்தியால் வெட்டி அரை வட்டங்களாகச் செய்துகொள்ளவும். இப்போது அரை வட்டத்தின் ஒரு விளிம்பில் சிறிது தண்ணீர் தடவி மறுபாதி விளிம்பின் மேல் ஒட்டி கூம்பு வடிவில் செய்துகொள்ளவும். பின்னர் கலந்து வைத்துள்ள சாக்லேட் பூரணத்தை நடுவில் வைத்து, ஓரங்களில் சிறிது தண்ணீர் தடவி ஒட்டிவிடவும்.

ஒரு பாத்திரத்தில் அரை கப் சர்க்கரை மற்றும் ஒன்றரை கப் தண்ணீர் ஊற்றி மிதமான சூட்டில் வைத்து ஒரு கம்பிப் பதத்தில் பாகு செய்துகொள்ளவும். வாணலியில் எண்ணெய் ஊற்றி மிதமான சூட்டில் வைத்து காய்ந்ததும் தயார் செய்த சமோசாக்களைச் சேர்த்து வேகவிடவும். சமோசாக்கள் பொன்னிறமாக மாறியதும் ஒரு தட்டில் மாற்றிக்கொள்ளவும். பிறகு சாக்லேட் சமோசாக்களை சர்க்கரைப் பாகில் சேர்த்து நன்றாகப் புரட்டியெடுக்கவும். விருப்பப்பட்டால் சிறிது துருவிய பாதாம்பருப்பு மற்றும் பிஸ்தா தூவிப் பரிமாறவும்.

உருளைக்கிழங்கு சமோசாவை 16-ம் நூற்றாண்டில் போர்ச்சுகீசிய வணிகர்கள் அறிமுகப் படுத்தினர்.

மினி ஸ்வீட் சமோசா ஃபாண்டு

தேவையானவை:

  • மைதா மாவு - ஒரு கப்

  • நெய் - 2 டேபிள்ஸ்பூன்

  • சர்க்கரை - 2 டேபிள்ஸ்பூன்

  • பால்கோவா - 50 கிராம்

  • முந்திரிப்பருப்பு - 5

  • பாதாம் பருப்பு - 5

  • பிஸ்தா பருப்பு - 10

  • ஏலக்காய்த்தூள் - ஒரு டீஸ்பூன்

  • சாக்லேட் சாஸ் - அரை கப்

  • எண்ணெய் - தேவையான அளவு

மினி ஸ்வீட் சமோசா ஃபாண்டு
மினி ஸ்வீட் சமோசா ஃபாண்டு

மினி ஸ்வீட் சமோசாவுக்கான மாவு செய்முறை:

அகலமான பாத்திரத்தில் மைதா மாவு, நெய் மற்றும் சர்க்கரை சேர்த்துக் கலந்துகொள்ளவும். பின்னர் தண்ணீர் ஊற்றிப் பிசைந்து கொள்ளவும். பிசைந்த மாவை 20 நிமிடங்கள் மூடி வைக்கவும்.

பூரணம் செய்முறை:

பாதாம் பருப்பு, முந்திரிப்பருப்பு மற்றும் பிஸ்தா பருப்பை லேசாகக் கொரகொரப்பாகப் பொடித்துக்கொள்ளவும். ஒரு தட்டில் பால்கோவாவைச் சேர்த்து கைகளால் உதிர்த்துக்கொள்ளவும். பிறகு அதில் ஏலக்காய்த்தூள் மற்றும் கொரகொரப்பாகப் பொடித்த பாதாம், முந்திரி மற்றும் பிஸ்தா சேர்த்து நன்கு கலந்துகொள்ளவும்.

மினி ஸ்வீட் சமோசா செய்முறை:

பிசைந்த மாவில் இருந்து சிறு சிறு உருண்டைகளாக உருட்டிக்கொள்ளவும். பிறகு சிறு சிறு பூரிகளாக தேய்த்துக்கொள்ளவும். பின்னர் நடுவில் வெட்டி அரை வட்டங்களாகச் செய்துகொள்ளவும். இப்போது அரை வட்டத்தின் ஒரு விளிம்பில் சிறிது தண்ணீர் தடவி மறுபாதி விளிம்பின் மேல் ஒட்டி கூம்பு வடிவில் செய்துகொள்ளவும். பின்னர் கலந்து வைத்துள்ள பால்கோவா பூரணத்தை நடுவில் வைத்து பின் ஓரங்களில் சிறிது தண்ணீர் தடவி ஒட்டிவிடவும். இதேபோல் அனைத்து உருண்டைகளையும் செய்துகொள்ளவும். வாணலியில் எண்ணெய் ஊற்றி குறைந்த சூட்டில் காய்ந்ததும் செய்து வைத்துள்ள சிறிய ஸ்வீட் சமோசாக்களைச் சேர்த்துப் பொரிக்கவும்.

மினி ஸ்வீட் சமோசா ஃபாண்டு செய்முறை

அகலமான பாத்திரத்தில் சாக்லேட் சாஸை ஊற்றி ஒரு ஸ்பூன் வைத்துக் கலந்துகொள்ளவும். பிறகு பொரித்த சமோசாக்களின் நடுவில் ஒரு டூத் பிக்கை மெதுவாக உள்ளே நுழைத்துக்கொள்ளவும். பின்னர் சாக்லேட் சாஸில் நன்றாக டிப் செய்து உடனே பரிமாறவும்.

சமோசாவில் அந்தந்த பகுதிகளுக்கேற்ப மஞ்சள், லவங்கம், பட்டை, பெருஞ்சீரகம் போன்ற நறுமணப் பொருள்கள் சேர்க்கப் படுகின்றன.

சமோசாக்கள் செய்வதற்கு முன் நாம் கவனத்தில் கொள்ளவேண்டிய சில முக்கியமான டிப்ஸ்...

  • மைதா மாவுடன் நெய் அல்லது எண்ணெயைச் சரியாக கலக்காமல் பிசைந்தால் சமோசாக்கள் மொறு மொறுப்பாக வராது. அதேபோல் பிசைந்த மாவை அதிக நேரம் அழுத்திப் பிசையக் கூடாது.

  • கூம்பு வடிவ சமோசா செய்யும்போது எண்ணெயின் வெப்பநிலை மிகவும் குறைவாக இருக்க வேண்டும். எண்ணெய் சரியான சூட்டில் உள்ளதா என்பதை சோதிக்க சிறிய அளவு உருண்டையைப் போடும்போது மெதுவாக மேலே வர வேண்டும், உடனடியாக அல்ல. பின் சமோசாக்களை மெதுவாகப் பொரித்தால் மிருதுவான சமோசாக்களை உருவாக்க உதவுகிறது. பொறுமையாக இருந்து பொரித்தால் சுவையான சமோசாக்களை அனுபவிக்க முடியும்.

  • முக்கோண வடிவ சமோசா செய்யும்போது மாவுடன் எண்ணெய் சேர்த்து நன்றாகக் கலந்து பின்னர் தண்ணீர் ஊற்றிக் கெட்டியாகப் பிசைந்துகொள்ளவும். தகடுகள் செய்வதற்கு முன் ஒவ்வொரு சப்பாத்தியின் நடுவிலும் எண்ணெயைச் சமமாகத் தடவி இருந்தால் எளிதாக பிரித்து விடலாம்

  • முக்கோண வடிவ சமோசா பொரிப்பதற்கு எண்ணெய் நன்றாக சூடான பின் மிதமான சூட்டில் வைத்து பொரித்தெடுக்கவும். சில இடங்களில் இந்த முக்கோண சமோசாக்களை இரண்டு முறை பொரித் தெடுப்பார்கள். அவை நீண்ட நேரம் மொறுமொறுப்பாக இருக்க உதவுகிறது.

  • முக்கோண வடிவ சமோசாவுக்குச் செய்யும் பூரணத்துக்கு ஒரு கைப்பிடி அளவு அவல் சேர்த்தால் மசாலாவில் இருக்கும் ஈரத் தன்மையை உறிஞ்சுவற்குப் பயன்படுகிறது. மேலும், பொரிக்கும்போது அதிக எண்ணெய் உறிஞ்சுவதைத் தடுக்கும்.