ரயில் பயணங்களில் சப்பாத்தி, பிரெட் போன்றவற்றை எடுத்துச் செல்லும்போது, சைட் டிஷ் தீர்ந்துவிடலாம். உப்பு கலந்த மிளகுத்தூள், சில தக்காளிப் பழங்களை கையோடு எடுத்துச் சென்றால்... தக்காளியைத் துண்டுகளாக்கி, சப்பாத்தி அல்லது பிரெட்டின் நடுவில் வைத்து மிளகுத்தூள் தூவி சாப்பிடலாம்.

- எஸ்.ஜெயலட்சுமி சம்பத், சென்னை-88

உப்பு பிஸ்கட் வீட்டில் இருந்தால், பஜ்ஜி தயாரிக்கும்போது, பிஸ்கட்டுகளை மாவில் தோய்த்து எண்ணெயில் பொரித்தெடுங்கள். உள்ளே மிருதுவாக வும், மேல்புறம் மொறுமொறுவென்றும் பிஸ்கட் பஜ்ஜி பிரமாதமாக ருசிக்கும்.

- கௌரி ஷர்மா, சென்னை-88

மகளின் திருமணத்துக்கு தங்கத்தை நகைகளாக மட்டுமே கொடுக்காமல், தங்கக் காசுகளாகவும் கொடுக்கலாமே! தேவைப்படும்போது, அப்போதைய டிரெண்டுக்கு ஏற்ப புது டிசைன்களில் நகை செய்து கொள்வார்கள். பழைய நகைகளை மாற்றும்போது ஏற்படும் நஷ்டத்தையும் தவிர்க்கலாம்.

- பானுமதி ராமதாஸ், தஞ்சாவூர்-7

பூசு மஞ்சள்தூளை... காலி ஷாம்பூ பாட்டில் அல்லது மூடியில் துளையிட்ட ஒரு பாட்டிலில் போட்டு வைத்துக் கொண்டால்... பயன்படுத்த எளிதாக இருக்கும். தண்ணீர் பட்டு நிறம் மாறாமலும், கீழே சிந்தாமலும் இருக்கும்.

- ஆர்.ஜெயஸ்ரீ, ஸ்ரீரங்கம்

விருந்தாளிகள் வந்தால், அதிகமாக காபி டிகாக்ஷன் தேவைப்படும். அதை விரைவாகத் தயாரிக்க ஒரு ஐடியா. அகலமான பாத்திரத்தில் பெரிய துளைகளுள்ள மெட்டல் வடிக்கட்டியை (காய்கறி வடிய விடும் தட்டு போன்றது) வைத்து, அதன்மேல் சுத்தமான வெள்ளைத் துணியைப் பரப்புங்கள். அதில் காபி பொடியைப் போட்டு லேசாக அழுத்தி, கொதிக் கும் தண்ணீரை மெதுவாக ஊற்றினால் நொடியில் ஸ்டிராங் டிகாக்ஷன் தயார்.

- மகாலஷ்மி சுப்ரமணியன், காரைக்கால்

அப்பளம், வடகம் பொரிப்பதற்குமுன் எண்ணெயில் சிறிது மஞ்சள் தூளை தூவி, பிறகு பொரித்துப் பாருங்கள். நிறம், மணம், சுவையுடன் சூப்பராக இருக்கும்.

- உஷா ராமானுஜம், மும்பை-80

வீட்டிலுள்ளவர்கள் பயன்படுத்தும் டூத் பிரெஷ் ஒரே நிறத்தில் இருந்தால் குழப்பம்தான் வரும். எந்தக் கம்பெனி பிரெஷ் வாங்கினாலும், அப்பாவுக்கு சிவப்பு, அம்மாவுக்கு நீலம், குழந்தைக்கு ரோஸ் என்று நிறத்தை தீர்மானித்துக் கொண்டு வாங்கினால், பிரெஷ் மாறிப் போக 'வாய்'ப்பே இருக்காது.

- ஏ.சரவணலதா, பாளையங்கோட்டை