Published:Updated:

கர்நாடகா ஸ்பெஷல் ரெசிப்பிக்கள்

கர்நாடகா ஸ்பெஷல் ரெசிப்பிக்கள்

• மங்க‌ளூர் மீனு கறி  

• மதூர் வடா  

• வாங்கி பாத்

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
கர்நாடகா ஸ்பெஷல் ரெசிப்பிக்கள்

மங்க‌ளூர் மீனு கறி

தேவையானவை:

தேங்காய் எண்ணெய் - 2 டேபிள்ஸ்பூன்

பெரிய வெங்காயம் - 2 (நீளமாக நறுக்கவும்)

பூண்டு - 6 பல்

கறிவேப்பிலை - சிறிதளவு

புளி - 2 டேபிள்ஸ்பூன்

மீன் துண்டுகள் - 150 கிராம்

உப்பு - தேவையான அளவு

பெருங்காயத்தூள் - அரை டீஸ்பூன்

வறுத்து அரைக்க:

மல்லித்தூள் (தனியாத்தூள்) - 1 டேபிள்ஸ்பூன்

சீரகம் - 1 டேபிள்ஸ்பூன்

கடுகு - அரை டேபிள்ஸ்பூன்

தேங்காய் - அரை மூடி

மிளகு - 8  சிறிதளவு

மஞ்சள்தூள் - கால் டீஸ்பூன்

கர்நாடகா ஸ்பெஷல் ரெசிப்பிக்கள்

செய்முறை:

புளியை ஐந்து டம்ளர் தண்ணீரில் 20 நிமிடம் ஊற வைத்துக் கரைத்து வடிகட்டவும். அடுப்பில் வாணலியை வைத்து அரைக்கக் கொடுத்தவற்றை எண்ணெய் விடாமல் வறுக்கவும். இதனுடன், பாதியளவு வெங்காயம், மூன்று பூண்டுப்பல் சேர்த்து, சிறிதளவு தண்ணீர் ஊற்றி மிக்ஸியில் மைய அரைக்கவும். அடுப்பில் ஒரு பேனை வைத்து எண்ணெய் ஊற்றி மீதம் இருக்கும் வெங்காயம், பூண்டு, கறிவேப்பிலை போட்டு சிவக்க வறுக்கவும். அரைத்த மசாலாவை இதில் சேர்த்து லேசாகக் கிளறி, புளிக்கரைசலை ஊற்றி ஐந்து நிமிடம் அதிக தீயில் நன்கு கொதிக்க விடவும். இனி, தீயை மிதமாக்கி மீன், உப்பு, பெருங்காயத்தூள் சேர்த்து, மீன் வெந்ததும் இறக்கிப் பரிமாறவும்.

* இந்த ரெசிப்பிக்களை வழங்கியவர் செஃப் ராஜ்மோகன்

மதூர் வடா

மதூர் என்பது கர்நாடகா மாநிலம், மாண்டியா மாவட்டத்தில் உள்ள ஒரு ஊரின் பெயர். அந்த ஊரின் ஃபேமஸான வடை ரெசிப்பிதான் இந்த மதூர் வடா.
 
தேவையானவை:

மைதாமாவு - 150 கிராம்

அரிசிமாவு - 25 கிராம்

ரவை - 60 கிராம்,

உப்பு - தேவையான அளவு

பொடியாக நறுக்கிய பெரிய வெங்காயம் - 1

நறுக்கிய பச்சை மிளகாய் - 1

சீரகம் - கால் டீஸ்பூன்

கறிவேப்பிலை - சிறிதளவு

பெருங்காயத்தூள் - அரை டீஸ்பூன்

நறுக்கிய இஞ்சி - ஒரு டீஸ்பூன்

மிளகு - 6

எண்ணெய் - பொரிக்க‌

கர்நாடகா ஸ்பெஷல் ரெசிப்பிக்கள்

செய்முறை:

அடுப்பில் வாணலியை வைத்து எண்ணெய் விடாமல் ரவையைச் சேர்த்து லேசாக வறுக்கவும். இதை மைதா மற்றும் அரிசி மாவோடு சேர்த்துக் கலக்கவும். இந்தக் கலவையில் இரண்டு டேபிள்ஸ்பூன் எண்ணெயைச் சூடாக ஊற்றி, கைகளால் பிடிக்கும் பதம் வந்ததும் மாவுக் கலவையை நன்கு தேய்க்கவும். எண்ணெய் நீங்கலாக உள்ள மற்ற பொருட்களை மாவோடு சேர்த்துக் கலக்கவும். இதில் சிறிதளவு த‌ண்ணீர் ஊற்றி மிருதுவான மாவாகப் பிசையவும். இந்தக் கலவையை வ‌டை போல தட்டி வைக்கவும். அடுப்பில் வாணலியை வைத்து, மிதமான தீயில் எண்ணெயைச் சூடாக்கவும். சூடானதும் வடையைப் போட்டு பொரித்து எடுக்கவும். இதற்கு தேங்காய் சட்னி அருமையான சைட் டிஷ்.

வாங்கி பாத்

தேவையானவை:

பொடியாக‌ நறுக்கிய பெரிய வெங்காயம் -ஒன்று

மஞ்சள்தூள் - அரை டீஸ்பூன்

வாங்கி பாத் பொடி - 2 டீஸ்பூன்

பதமாக வேக வைத்த பாஸ்மதி சாதம் - அரை கிலோ

உப்பு - தேவையான அளவு

மீடியமாக நறுக்கிய கத்திரிக்காய் - 4

வாங்கி பாத் பொடி செய்ய:

கடலைப்பருப்பு - 3 டீஸ்பூன்

உளுந்து - 3 டீஸ்பூன்

காய்ந்த மிளகாய் - 3

கறிவேப்பிலை சிறிது

புளி - 10 கிராம்

வெல்லம் - 20 கிராம்

மஞ்சள்தூள் - கால் டீஸ்பூன்

சீரகம் - அரை டீஸ்பூன்

மல்லி (தனியா) - 3 டேபிள்ஸ்பூன்

வெள்ளை எள் - 1 டீஸ்பூன்.

கர்நாடகா ஸ்பெஷல் ரெசிப்பிக்கள்

தாளிக்க:

எண்ணெய் - 2 டேபிள்ஸ்பூன்

கடுகு - அரை டீஸ்பூன்

சீரகம் - கால் டீஸ்பூன்

சிவப்பு மிளகாய் - 2

முந்திரி - 1 டேபிள்ஸ்பூன்

வறுத்த‌ வேர்க்கடலை - 1 டேபிள்ஸ்பூன்

கறிவேப்பிலை - சிறிது

செய்முறை:

அடுப்பில் வாணலியை வைத்து வாங்கிபாத் பொடி செய்யத் தேவையானவற்றை எல்லாம் எண்ணெய் விடாமல் வறுத்து, ஆறியதும் மிக்ஸியில் பொடி செய்து வைக்கவும். அடுப்பில் வாணலியை வைத்து எண்ணெய் விட்டு தாளிக்கக் கொடுத்த பொருட்களைப் போட்டுத் தாளித்து வெங்காயத்தைப் போட்டு வதக்கவும். பொன்னிறமாக வதங்கியதும் கத்திரிக்காய், தேவையான அளவு உப்பு சேர்த்துத் தீயை மிதமாக்கி வதக்கவும். கத்திரிக்காய் ஓரளவு வதங்கியதும் மஞ்சள்தூள், அரைத்த வாங்கிபாத் பொடி 2 டீஸ்பூன் சேர்த்துக் கலக்கவும். இதில் வேக வைத்த சாதம் சேர்த்துக் கிளறிப் பரிமாறவும்.

- அதிதி