Published:Updated:

சிறுதானிய சிற்றுண்டிகள்!

உணவு: எஸ்.விஜயஷாலினி

சிறுதானிய சிற்றுண்டிகள்!

உணவு: எஸ்.விஜயஷாலினி

Published:Updated:

உணவு: எஸ்.விஜயஷாலினி

படங்கள்: சொ.பாலசுப்ரமணியன்

சிறுதானிய சிற்றுண்டிகள்!

ஒட்டுமொத்த விகடனுக்கும் ஒரே ஷார்ட்கட்!

தீபாவளி என்றால், அதில் பலகாரத்துக்குத் தனி இடம் உண்டு. குழந்தைகளுக்குப் பிடித்த முறுக்கு, தட்டை போன்ற பலகாரங்களை, வழக்கமாக அரிசியில் செய்வதற்குப் பதிலாக, பாரம்பர்ய சிறுதானிய வகைகளைப் பயன்படுத்தி, ஆரோக்கியமாகவும் அதே நேரத்தில் சுவையாகவும் செய்யலாமே!

சில தீபாவளி ஸ்பெஷல் பலகார வகைகளை சிறுதானியங்களைக் கொண்டு வீட்டிலேயே செய்யக் கற்றுத் தருகிறார் சமையல் கலை வல்லுநர் ரேவதி ஷண்முகம்.

சிறுதானிய சிற்றுண்டிகள்!

தினை லட்டு

தேவையானவை: தினை, சர்க்கரை - ஒரு கப், நெய் - தேவையான அளவு, ஏலக்காய் தூள் - அரை டீஸ்பூன் (விருப்பப்பட்டால்)

செய்முறை: தினையை வெறும் கடாயில் நன்கு வாசனை வரும்படி பொரிந்து வரும் அளவுக்கு வறுத்து எடுத்து, மிக்ஸியில் நைஸாக அரைத்துக்கொள்ளவும். சர்க்கரையையும் பொடித்துக்கொள்ளவும். தினை மாவையும் பொடித்த சர்க்கரையையும் ஒன்றாகக் கலந்து, அதில் நெய்யை சூடுசெய்து பரவலாக ஊற்றிக் கலந்து, சிறிய உருண்டைகளாகப் பிடிக்கவும்.

சிறுதானிய சிற்றுண்டிகள்!

வரகு தட்டை

தேவையானவை: வரகு அரிசி, பச்சரிசி - ஒரு கப், உளுந்து, உடைத்த கடலை - கால் கப், வறுத்து தோல் நீக்கிய வேர்க்கடலை - கால் கப், எள்ளு (அ) சீரகம் - 2 டீஸ்பூன், நெய் - ஒரு டேபிள் ஸ்பூன், பெருங்காய்த்தூள் - அரை டீஸ்பூன், பச்சை மிளகாய் - 4 (விழுதாக அரைத்தது), உப்பு, எண்ணெய் - தேவையான அளவு.

செய்முறை: வரகு அரிசியை சுத்தம் செய்துகொள்ளவும். பச்சரிசியை துணியால் நன்கு துடைத்துக்கொள்ளவும் (கழுவ வேண்டாம்). உளுந்தை நிறம் மாறாமல் வாசனை வரும் வரை வறுத்துக்கொள்ளவும்.

நான்கையும் சேர்த்து மிஷினில் கொடுத்து அரைத்துக் கொள்ளவும். பிறகு, நன்றாகச் சலித்துக்கொள்ளவும். அத்துடன் வேர்க்கடலையை ஒன்று இரண்டாகப் பொடித்துச் சேர்க்கவும். பச்சை மிளகாய் விழுது, பெருங்காய்த்தூள், நெய், உப்பு, எள்ளு ஆகியவற்றுடன் தேவையான தண்ணீர் சேர்த்து, கெட்டியாகப் பிசைந்துகொள்ளவும். கடாயில் எண்ணெயைக் காய வைத்துக்கொள்ளவும். பிசைந்த மாவில் சிறிதளவு எடுத்து ஒரு பிளாஸ்டிக் ஷீட்டில் தட்டைகளாகத் தட்டவும். அவற்றை சூடான எண்ணெய்யில் போட்டு, இருபுறமும் நன்கு திருப்பிவிட்டு மொறுமொறுப்பாகப் பொரித்து எடுக்கவும்.

சிறுதானிய சிற்றுண்டிகள்!

வரகு அரிசி பணியாரம்

தேவையானவை: வரகு அரிசி - ஒரு கப், பச்சரிசி, புழுங்கல் அரிசி - அரை கப், உளுந்து - கால் கப், வெந்தயம் - ஒரு டீஸ்பூன், உப்பு, எண்ணெய் - தேவையான அளவு.

தாளிக்க: கடுகு - 2 டீஸ்பூன், உளுந்து - 3 டீஸ்பூன், காய்ந்த மிளகாய் - 2, பச்சை மிளகாய் - 3 (பொடியாக நறுக்கியது), சின்ன வெங்காயம் - ஒரு கப், தேங்காய்த் துருவல் - அரை கப், மல்லித்தழை - கால் கப், கறிவேப்பிலை - சிறிதளவு.

செய்முறை: நான்கையும் ஒன்றாக ஒரு மணி நேரம் ஊற வைக்கவும். பிறகு, நைஸாக அரைத்துக்கொள்ளவும் (இட்லி மாவு பதம்). தேவையான உப்பு சேர்த்துக் கரைக்கவும். 3, 4 மணி நேரம் புளிக்கவைக்கவும்.

கடாயில் 2 டேபிள் ஸ்பூன் எண்ணெய் விட்டு, கடுகு, உளுத்தம்பருப்பு, காய்ந்த மிளகாய் தாளித்து, பொடியாக நறுக்கிய சின்ன வெங்காயம், பச்சை மிளகாய், கறிவேப்பிலை சேர்த்து, இரண்டு நிமிடம் வதக்கி, அதனுடன் தேங்காய்த் துருவல், கொத்தமல்லி சேர்த்து, ஒரு பிரட்டு பிரட்டி எடுத்து சூடாக மாவில் சேர்த்துக் கலக்கவும். மாவு பதம், இட்லி மாவைவிட சற்றுத் தளர இருக்க வேண்டும். பிறகு, குழிப்பணியார சட்டியில் எண்ணெய் விட்டு, பணியாரங்களாகச் சுட்டு எடுக்கவும். வெங்காய சட்னியுடன் பரிமாறவும்.

சிறுதானிய சிற்றுண்டிகள்!

தினை முறுக்கு

தேவையானவை: தினை அரிசி - ஒரு கப், புழுங்கல் அரிசி, உளுந்து - அரை கப், சீரகம் - ஒரு டீஸ்பூன், பெருங்காயத்தூள் - அரை டீஸ்பூன், நெய் - ஒரு டீஸ்பூன், உப்பு - தேவையான அளவு, எண்ணெய் - பொரிப்பதற்கு.

செய்முறை: தினை அரிசியை (சுத்தம் செய்தது) வெறும் கடாயில் லேசாக வறுத்து எடுக்கவும். பிறகு உளுந்தையும் நிறம் மாறாமல் வாசனை வரும் வரை வறுத்து எடுக்கவும். புழுங்கல் அரிசியை ஒரு துணியால் துடைக்கவும் (கழுவ வேண்டாம்). மூன்றையும் சேர்த்து, மிஷினில் அரைத்துக்கொள்ளவும். பிறகு, நன்கு சலித்துக்கொள்ளவும். அதனுடன் சீரகம், பெருங்காய்த்தூள், உப்பு, நெய் ஆகியவற்றுடன் தேவையான தண்ணீர் சேர்த்து, முறுக்கு மாவு பதத்துக்கு பிசைந்துகொள்ளவும். எண்ணைய்யை கடாயில் காய வைத்துக்கொள்ளவும். முறுக்கு அச்சில் (தேன்குழல்) போட்டு தேன்குழலாக நேரடியாகவோ அல்லது ஜல்லிக் கரண்டியில் பிழிந்தோ எண்ணெய்யில் பொரித்து எடுக்கவும்.

சிறுதானிய சிற்றுண்டிகள்!

சாமை அடை

தேவையானவை: சாமை அரிசி - ஒரு கப், துவரம் பருப்பு - முக்கால் கப், உளுந்து - அரை கப், கடலைப்பருப்பு, பச்சைப்பருப்பு - கால் கப், வெங்காயம் - ஒரு கப், தேங்காய்த் துருவல் - அரை கப், கொத்தமல்லி - சிறிதளவு, காய்ந்த மிளகாய் - 6, சோம்பு - 2 டீஸ்பூன், பெருங்காயம் - அரை டீஸ்பூன், கறிவேப்பிலை - சிறிதளவு, உப்பு, எண்ணெய் - தேவையான அளவு.

செய்முறை: பருப்பு வகைகளை ஒன்றாகச் சேர்த்து, ஒரு மணி நேரம் ஊறவைக்கவும். சாமை அரிசியுடன் காய்ந்த மிளகாய் சேர்த்து, ஒரு மணி நேரம் ஊறவைக்கவும். முதலில் மிக்ஸியில் சாமை அரிசி மற்றும் காய்ந்த மிளகாய் சேர்த்து ஒரு சுற்றுச் சுற்றி, பிறகு பருப்பு வகைகளைச் சேர்த்து அரைக்கவும். சாதாரண அடை மாவைவிட சற்று நைஸாக அரைக்கவும். எண்ணெய் தவிர்த்து மற்ற பொருட்களைச் சேர்த்து, இட்லி மாவு பதத்தில் கரைக்கவும். தோசைக்கல்லில் எண்ணெய் விட்டு அடையாக வார்த்து, மிதமான தீயில் சுட்டு எடுக்கவும். தேங்காய்ச் சட்னி அல்லது கொத்தமல்லி சட்னியுடன் பரிமாறவும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism