Published:Updated:

வீட்டுல ஸ்வீட்டு !

எஸ்.விஜயஷாலினி படங்கள்: ப.சரவணகுமார்

வீட்டுல ஸ்வீட்டு !

எஸ்.விஜயஷாலினி படங்கள்: ப.சரவணகுமார்

Published:Updated:
வீட்டுல ஸ்வீட்டு !
வீட்டுல ஸ்வீட்டு !

என்னதான் கடைகளில் விதவிதமாகவும் கலர் கலராகவும் இனிப்பு வகைகள் கிடைத்தாலும், நம் வீட்டில் நம் கையால் செய்யும் இனிப்புக்கு தனி சுவை உண்டு. அதுவும் குழந்தைகள் 'அம்மா... நீ பண்ண ஸ்வீட் சூப்பரா இருக்குமா’ என்று ஒரு வார்த்தை சொல்லிவிட்டால், அம்மாக்களின் சந்தோஷத்துக்கு அளவே இல்லை. 'இந்த வருஷம் தீபாவளிக்கு புதுசா என்ன ஸ்வீட் செய்யலாம்?’ என்று யோசிக்கும் அம்மாக்களுக்கு வெரைட்டியாகவும் புதுசாவும் சில இனிப்பு வகைகளை கற்றுத்தருகிறார் சமையல் கலை வல்லுநர் மெனு ராணி செல்லம். இனிப்பு வகைகளை எப்படிச் செய்வது என்பதைப் பார்ப்பதற்கு முன், பனீர் செய்முறையைத் தெரிந்துகொள்வோமா?

ஒட்டுமொத்த விகடனுக்கும் ஒரே ஷார்ட்கட்!

பனீர் செய்முறை:

ஸ்வீட்டுகளுக்குச் சேர்க்கும் பனீர் தயாரிக்கும்போது பாலில் தயிர் விட்டோ, எலுமிச்சை சாறு விட்டோ பாலைத் திரிக்கக் கூடாது. ஏற்கெனவே பாலைத் திரித்து பனீர் செய்த தண்ணீரைக் கீழே கொட்டாமல், 4 அல்லது 5 நாட்கள் புளிக்க வைக்கவும். இந்தத் தண்ணீருக்கு வே வாட்டர் (ஷ்லீமீஹ் ஷ்ணீtமீக்ஷீ) என்று பெயர். இந்தப் புளித்த தண்ணீரை, பொங்கி வரும் பசும்பாலில் விட்டு பாலைத் திரித் தால், அதில் இருந்து வரும் பனீர் மிகவும் மிருதுவாக இருக் கும். இந்த முறையில் தயாரித்த பனீரைக் கொண்டு பின்வரும் இனிப்பு வகைகளைத் தயாரித் தால்தான் அவற்றின் பதமும், சுவையும் சரியாக வரும்.

வீட்டுல ஸ்வீட்டு !

தேவையானவை: (மஞ்சள்)        பயத்தம் பருப்பு (உடைத்தது)- 2 கப், நெய்- அரை கப், முந்திரிப் பருப்பு- 50 கிராம், பொடித்த ஏலக்காய்- அரை டீஸ்பூன், சர்க்கரை சேர்க்காத கோவா- அரை கப், சர்க்கரை- 2 கப்

செய்முறை: பயத்தம் பருப்பை நெய்யில் (சிறிதளவு போதும்) லேசாக வறுத்துக்கொண்டு, அளவான தண்ணீர் விட்டு வேகவிடவும். ப்ரெஷர் குக்கரில் வேகவிட்டால் மிகவும் குழைந்துவிடும். பாத்திரத்தில் வேகவிட்டால் நன்றாக வெந்தி ருக்கும்; அதே நேரத்தில் குழையாது. வெந்த பருப்புடன் சர்க்கரை  (பொடிக்கத் தேவையில்லை), கோவா, ஏலக்காய் பொடி ஆகிய வற்றைக் கலந்து கிளறவும். நன்றாகக் கலந்து சுருள வந்தவுடன் நெய்விட்டு ஒரு தடவை கிளறவும். முந்திரிப் பருப்புகள், திராட்சை ஆகியவற்றை நெய்யில் வறுத்துப் போட்டுப் பரிமாறவும்.

வீட்டுல ஸ்வீட்டு !

தேவையானவை: பனீர்- ஒரு கப், நன்கு சுண்டக் காய்ச்சிய பால்- 2 கப், சர்க்கரை- ஒரு கப்.

அலங்கரிக்க : பிஸ்தா, பாதாம் சிறிதளவு.

செய்முறை: சுண்டக் காய்ச்சிய பாலுடன் தயாராக வைத்துள்ள பனீரைக் கலந்து ஒரு கனமான பாத்திரத்தில், மிதமான தீயில் வைத்து கிளறிக்கொண்டே இருக்கவும். சுருள வரும்போது, சர்க்கரை சேர்த்துக் கிளறவும். பின், சர்க்கரை கரைந்து பாத்திரத்தில் ஒட்டாமல் உருண்டு வரும்போது, ஒரு தட்டில் கொட்டிப் பரப்பவும். சூடாக இருக்கும்போதே மெல்லியதாக நறுக்கிய பிஸ்தா, பாதாம் தூவி அலங்கரிக் கவும். சற்று ஆறிய பின் விருப்பமான வடிவில் வெட்டிப் பரிமாறவும்.

வீட்டுல ஸ்வீட்டு !

தேவையானவை: பயத்தம் பருப்பு- ஒரு கப், கோதுமை மாவு- ஒரு கப், சர்க்கரை- 3 கப், பொடித்த ஏலக்காய்- ஒரு டீஸ்பூன், நறுக்கிய முந்திரி, பாதாம்- ஒரு பிடி, நெய்- ஒரு கப், கேசரி கலர் விருப்பப்பட்டால் சிறிதளவு.

செய்முறை: சிறிதளவு நெய்யில் (கால் கப்), கோதுமை மாவை வாசம் வரும் வரை, சிறிதளவு நிறம் மாறும்வரை வறுக்கவும். அத்துடன் முந்திரி, பாதாம் ஆகியவற்றையும் சேர்த்து வறுத்துக் கொள்ளவும். பயத்தம் பருப்பை குக்கரில் மூன்று விசில் வரும் அரைப் பதமாக வேக வைக்கவும். குழையக்கூடாது. அதிகம் தண்ணீர் விடவேண்டாம். பின்பு வெந்த பருப்பு, வறுத்த கோதுமை மாவு, சர்க்கரை ஆகியவற்றைச் சேர்த்து, கைவிடாமல் கிளறவும். பின்பு நெய் சேர்த்துக் கிளறவும். ஏலக்காய் சேர்க்கவும். பாத்திரத்தில் ஒட்டாமல் வரும்போது எடுத்து, ஒரு தட்டில் கொட்டி, முந்திரிப் பருப்பைத் தூவி பரிமாறவும்.

வீட்டுல ஸ்வீட்டு !

மோகன் தால்

தேவையானவை: நெய்- 3 கப், கடலை மாவு- ஒரு கப், சர்க்கரை- 2 கப், பால்கோவா- ஒரு கப்.

செய்முறை: ஒரு பாத்திரத்தில் கடலை மாவு, பால்கோவா இரண்டையும் சேர்த்துக் கலக்கவும். சர்க்கரையில் ஒரு கப் நீரைச் சேர்த்துப் பாகு செய்யவும். பாகு கம்பிப் பதத்தில் இருக்க வேண்டும். இப்போது பாகில் கடலை மாவு, கோவா கலவையை சிறிது சிறிதாகப் போட்டுக் கலந்து, தொடர்ந்து கிளறவும். சுருள வந்தவுடன் நெய் சேர்த்து, கொதித்து வரும் சமயம் உடனே இறக்கி தட்டில் கொட்டி பரப்பவும். பின்னர் வில்லை களாக வெட்டிப் பரிமாறவும்.

குறிப்பு: அதிகம் கிளறினால் தூள் தூளாகிவிடும்.

வீட்டுல ஸ்வீட்டு !

தேவையானவை: பனீர், மைதா- 2 கப், சர்க்கரை சேர்க்காத கோவா- 2 கப், பொடியாக நறுக்கிய பிஸ்தா, பாதாம்- கால் கப்

பொரிக்க: எண்ணெய் அல்லது நெய் - அரை கிலோ

சர்க்கரைப்பாகு செய்ய: சர்க்கரை 250 கிராம்.

செய்முறை: சர்க்கரையை ஒரு டம்ளர் தண்ணீர் கலந்து கொதிக்க வைக்கவும். பிசுக்குப் பதம் வந்தவுடன் கீழே இறக்கி வைக்கவும்.

மைதா, கோவா, பனீர் இவை மூன்றையும் சேர்த்துப் பிசைந்து சிறு சிறு உருண்டைகளாக உருட்டிக்கொள்ளவும். பொடித்த பாதாம் முந்திரியை உள்ளே வைத்து உருட்டவும். பின்பு, மிதமான சூடான எண்ணெய்யில் நான்கு நான்காகப் போட்டு பொன்னிறமாக பொரித்து எடுக்கவும். தயாராக வைத்துள்ள சர்க்கரைப் பாகில் உடனே போடவும். சுமார் 2, 3 மணி நேரம் ஊறிய பின், பரிமாறவும்.

வீட்டுல ஸ்வீட்டு !

தேவையானவை:

பனீர் செய்ய: சுத்தமான பசும்பால்- இரண்டரை லிட்டர், வே வாட்டர்- 2 கப்.

சர்க்கரைப்பாகு செய்ய: சர்க்கரை- 2 கிலோ, தண்ணீர்- 10 கப்.

ஸ்டஃப்பிங்: முந்திரி, பாதாம், பிஸ்தா- 25 கிராம், சர்க்கரை- ஒரு டேபிள் ஸ்பூன், ஏலக்காய் பொடி- ஒரு சிட்டிகை.

அலங்கரிக்க: குங்குமப்பூ 2 சிட்டிகை, பால் - ஒரு டேபிள் ஸ்பூன்.

செய்முறை: பாலில் வே வாட்டர் விட்டுத் திரித்து, பனீர் தயாரித்துக்கொள்ளவும். குங்குமப்பூவில் சிறிதளவு பால் விட்டு அரைத்து, அரைத்த குங்குமப்பூவையும் பனீருடன் சேர்த்துப் பிசைந்துகொள்ளவும். பருப்பு வகைகளைக் கரகரப்பாகப் பொடித்துக் கொண்டு, ஏலக்காய் பொடி, சிறிதளவு குங்குமப்பூ, பால் இவற்றைச் சேர்த்துப் பிசைந்து சிறு உருண்டைகளாக உருட்டி வைக்கவும். பனீரையும் எலுமிச்சை அளவு உருண்டைகளாக உருட்டிக்கொள்ளவும். சிறிதளவு நீளமாகவும் ஷேப் செய்யலாம். பின் இந்தப் பனீர் உருண்டைக்குள் பருப்பு உருண்டையை ஸ்டஃப் செய்யவும்.

இப்போது, சர்க்கரைப் பாகு தயாரிக்கவும். பிசுக்கு பதத்துக்கு பாகு தயாரானவுடன், தயாரித்த ராஜ்போக் உருண்டைகளைப் போட்டு, ஒரு மூடியால் லேசாக மூடி, உருண்டைகள் இரு மடங்கு சைஸ் ஆகும் வரை சுமார் அரை மணி நேரம் கொதிக்க விடவும்.

குறிப்பு: சர்க்கரைப்பாகு கெட்டியாகி விட்டால், ராஜ்போக் மிருதுவாக இருக்காது. அதனால், சர்க்கரைப்பாகில் ராஜ்போக் கொதிக்கும்போது அவ்வப்போது தண்ணீர் தெளித்துவிடவும். வெந்த ராஜ்போக்கை எடுத்து ஒரு பாத்திரத்தில் வைத்து 2, 3 கரண்டி சர்க்கரைப்பாகை மேலே ஊற்றி, குங்குமப்பூ தூவி ஃபிரிட்ஜில் வைத்து, குளிர்ந்த பின் பரிமாறவும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism