ஆடி மாதம் ஆரம்பித்துவிட்டாலே, பண்டிகைகள் வரிசைகட்டி நிற்கும்.  அடுத்தடுத்து வரக்கூடிய ஆடி வெள்ளி, ஆடிச் செவ்வாய், ஆடிக் கிருத்திகை, ஆடி அமாவாசை, ஆடிப்பூரம், நாகபஞ்சமி, கருடபஞ்சமி, ஹயக்ரீவர் ஜெயந்தி, ஆவணி அவிட்டம், கோகுலாஷ்டமி போன்ற பண்டிகைகளுக்கு ஏற்ற பலகாரங்களைச் செய்து வழங்குகிறார், சமையல் கலைஞர் எஸ்.ராஜகுமாரி.  

ஆடிப்பால்

தேவையானவை: தேங்காய் - ஒன்று, துருவிய வெல்லம் - அரை கப், ஏலக்காய்த்தூள் - ஒரு டீஸ்பூன், பச்சரிசி (அ) வறுத்த பாசிப்பருப்பு - ஒரு டேபிள்ஸ்பூன்.            

செய்முறை: தேங்காயைத் துருவி, வறுத்த பாசிப்பருப்பு (அ) பச்சரிசி சேர்த்து நீர்விட்டு மிக்ஸியில் அரைத்து வடிகட்டி பால் எடுக்கவும். அந்தச் சக்கையைச் சிறிதளவு நீர்விட்டு மீண்டும் அரைத்து வடிகட்டி பால் எடுக்கவும். மீண்டும் ஒருமுறை இதேபோல் செய்யவும். மொத்தம் மூன்று முறை எடுத்த பாலையும் ஒன்றாகச் சேர்த்துக் கலந்துவைக்கவும். அடிகனமான பாத்திரத்தில் வெல்லத்தைப் போட்டு நீர்விட்டு (சிறிதளவுவிட்டால் போதும்) அடுப்பில் ஏற்றிக் கரையவிடவும். வெல்லம் கரைந்ததும் தேங்காய்ப்பாலை ஊற்றி ஏலக்காய்த்தூள் சேர்த்து நுரைத்துவரும்போதே இறக்கிவிடவும்.

குறிப்பு: புதிதாகத் திருமணமான மணப்பெண் - மாப்பிள்ளையை ஆடிக்கு அழைத்து, ஆடி மாதம் முதல் தேதியன்று இந்த ஆடிப்பாலைக் கொடுப்பது வழக்கம்.

மாவிளக்கு    

தேவையானவை: பச்சரிசி - ஒரு கப், துருவிய வெல்லம் - ஒன்றரை கப், நெய் - 6 டேபிள்ஸ்பூன்,

செய்முறை: பச்சரிசியை நீர்விட்டு ஒரு மணி நேரம் ஊறவிடவும். ஊறியதும் வடிகட்டி நிழலில் உலர்த்தவும். ஓரளவு உலர்ந்ததும் மிக்ஸியில் நைஸாக அரைக்கவும். அதை ஒரு பாத்திரத்தில் போடவும். பிறகு, வெல்லத்தை மிக்ஸியில் ஒரு சுற்று சுற்றி எடுக்கவும். அதை பாத்திரத்தில் உள்ள மாவில் சேர்க்கவும். 4 டேபிள்ஸ்பூன் நெய்யையும் சேர்க்கவும். மூன்றையும் நன்றாகக் கலந்து உருண்டையாக உருட்டி, நடுவில் குழி செய்து நெய்விட்டு திரி போட்டு மாவிளக்காக ஏற்றவும்.

குறிப்பு: ஆடி வெள்ளி, ஆடிச் செவ்வாய்க்கிழமைகளில் வீட்டில் மாவிளக்கு ஏற்றுவது வழக்கம். குலதெய்வத்தை வழிபடும்போதும், ஆடி மாதம் கோயில்களிலும் இந்த மாவிளக்கை ஏற்றுவர்.

ஆடிக்கூழ்      

தேவையானவை: அரிசி நொய் - ஒரு கைப்பிடி அளவு, கேழ்வரகு மாவு - 2 கைப்பிடி அளவு, சின்ன வெங்காயம் - 10, தயிர் - ஒரு கப், உப்பு - தேவைக்கேற்ப.

செய்முறை: ஒரு கைப்பிடி அளவு நொய்யை ஒரு டம்ளர் நீர்விட்டு வேகவிட்டு, கேழ்வரகு மாவை 2 டம்ளர் நீர்விட்டு கரைத்து அதில் சேர்த்து வேகவிடவும். பிறகு உப்பு சேர்க்கவும். வெந்ததும் இறக்கி, ஆறியதும் தயிரைக் கடைந்து அதில் சேர்க்கவும்.

குறிப்பு: சின்ன வெங்காயம் தொட்டு இதைச் சாப்பிடலாம். ஆடி மாதம் அம்மனுக்கு இந்தக் கூழைச் செய்து படைத்து பின்னர் விநியோகிப்பது வழக்கம்.

துள்ளுமா     

தேவையானவை: பச்சரிசி - ஒரு கப், துருவிய வெல்லம் - அரை கப், ஏலக்காய்த்தூள் - ஒரு டீஸ்பூன்.

செய்முறை: பச்சரிசியை ஒரு மணி நேரம் ஊறவைத்து, நீரை வடிகட்டி, துணியில் உலர்த்தவும். ஓரளவு உலர்ந்ததும் மிக்ஸியில் கொரகொரப்பாக அரைக்கவும். அரைத்த மாவுடன் ஏலக்காய்த்தூள், வெல்லம் சேர்த்துக் கலக்கவும். கைகளால் பிடித்தால் துள்ளி எழும்பும். அதனால்தான் இதன் பெயர் துள்ளுமா.

குறிப்பு: இதை காளியம்மன், மாரியம்மன் போன்ற பெண் தெய் வங்களுக்குப் படைத்து கோயிலில் பிரசாதமாக வழங்கலாம். ஆடி மாதம் கூழ் ஊற்றும்போது இதையும் செய்து வீட்டில் படைப்பர்.

முருங்கைக்கீரைப் பொரியல்    

தேவையானவை: சுத்தம் செய்த முருங்கைக்கீரை - 2 கப், உதிர் உதிராக வேகவைத்த பாசிப்பருப்பு - 2 டேபிள் ஸ்பூன், தேங்காய்த் துருவல் - 4 டேபிள்ஸ்பூன், கடுகு - ஒரு டீஸ்பூன், பெருங்காயத் தூள் - கால் டீஸ்பூன், காய்ந்த மிளகாய் - 2, எண்ணெய் - ஒரு டேபிள்ஸ்பூன், உப்பு - தேவைக்கேற்ப.

செய்முறை: வாணலியில் எண்ணெய் விட்டு கடுகு, பெருங்காயத்தூள், காய்ந்த மிளகாய் தாளித்து, முருங்கைக்கீரை போட்டு வதக்கி, உப்பு சேர்த்து, சிறிதளவு நீர்விட்டு மூடிவைக்கவும். கீரை வெந்ததும் பாசிப்பருப்பைச் சேர்த்து, தேங்காய்த் துருவலையும் சேர்த்துக் கிளறி இறக்கவும்.

குறிப்பு: ஆடிக்கூழுடன் இந்த முருங்கைக்கீரைப் பொரியலையும் சேர்த்து அனைவருக் கும் கொடுத்து, வழங்குபவர்களும் உண்டு மகிழ்வர்.

அரிசி - பருப்பு பாயசம்    

தேவையானவை: பச்சரிசி - ஒரு கப், கடலைப்பருப்பு - 4 டேபிள்ஸ்பூன், பாசிப்பருப்பு, துருவிய தேங்காய் - தலா கால் கப், துருவிய வெல்லம் - ஒன்றரை கப், நெய் - 4 டேபிள்ஸ்பூன், உடைத்த முந்திரித் துண்டுகள் - 2 டேபிள்ஸ்பூன், ஏலக்காய்த்தூள் - கால் டீஸ்பூன்.

செய்முறை: வெறும் வாணலியில் அரிசி, பருப்புகளை வறுத்து ரவை பதத்துக்கு உடைக்கவும். உடைத்தவற்றை குக்கரில் சேர்த்து 3 கப் நீர்விட்டு வேகவைக்கவும். துருவிய வெல்லத்தை வெந்தவற்றுடன் சேர்த்து மேலும் ஒரு கொதிவிடவும். வாணலியில் 3 டேபிள்ஸ்பூன் நெய்விட்டு, தேங்காய்த் துருவலை வறுத்து இதனுடன் சேர்த்து மேலும் ஒரு கொதிவிடவும். மீதியுள்ள ஒரு டேபிள்ஸ்பூன் நெய்யில் முந்திரியை வறுத்து கொதிக்கும் பாயசத்தில் சேர்த்து, ஏலக்காய்த்தூள் சேர்த்து இறக்கி, எல்லாவற்றையும் நன்றாகக் கலந்துவிடவும்.

குறிப்பு: ஆடிக்கிருத்திகை அன்று முருகப் பெருமானுக்கு இந்தப் பாயசத்தை செய்து படைப்பர்.

அக்கார அடிசில்          

தேவையானவை: பச்சரிசி - 250 கிராம், பால் - 600 மில்லி, வெல்லம் - 400 கிராம், நெய் - 100 கிராம், ஏலக்காய்த்தூள், குங்குமப்பூ - தலா ஒரு டீஸ்பூன், முந்திரி, திராட்சை - தலா 10 கிராம்.

செய்முறை: 2 டேபிள்ஸ்பூன் நெய்யை எடுத்துத் தனியே வைக்கவும். அரிசியைக் களைந்து பால் சேர்த்து குக்கரில் குறைந்த தீயில் நன்கு வேகவிடவும். வெல்லத்தைச் சிறிதளவு நீர்விட்டு கம்பிப்பதத்துக்கு பாகு வைக்கவும். அந்தப் பாகில் வெந்த கலவையைப் போட்டு நன்றாகக் கிளறி, இடையிடையே நெய் விட்டு, ஏலக்காய்த்தூள் சேர்த்து, ஒரு ஸ்பூன் நீரில் குங்குமப்பூவைக் கரைத்துச் சேர்க்கவும். தனியாக எடுத்துவைத்த நெய்யில் முந்திரி, திராட்சையை வறுத்துச் சேர்த்து இறக்கவும். எல்லாவற்றையும் நன்றாகக் கலந்துவிடவும்.

குறிப்பு: ஆடி அமாவாசை அன்று இதைச் செய்து முன்னோர்களுக்குப் படைப்பது வழக்கம்.

முப்பருப்பு வடை      

தேவையானவை: துவரம்பருப்பு, கடலைப்பருப்பு - தலா ஒரு கப், உளுத்தம்பருப்பு - அரை கப், காய்ந்த மிளகாய் - 6, பெருங்காயத்தூள் - ஒரு டீஸ்பூன், எண்ணெய் - பொரிப்பதற்குத் தேவையான அளவு, உப்பு - தேவைக்கேற்ப.

செய்முறை: மூன்று பருப்புகளையும் நன்றாகக் கழுவி நீர்விட்டு, மிளகாயையும் சேர்த்து ஒரு மணி நேரம் ஊறவிடவும். பிறகு, நீரை வடிகட்டி, உப்பு சேர்த்து கொரகொரப்பாக அரைக்கவும். பெருங்காயத்தூள் சேர்த்துக் கலக்கவும். வாணலியில் எண்ணெய் ஊற்றி, காய்ந்ததும் பிசைந்த மாவை உருட்டி வடைகளாகத் தட்டிப்போட்டு, ஒருபுறம் வெந்ததும் திருப்பிப்போட்டு, மறுபுறமும் வெந்ததும் எடுத்து எண்ணெய் வடிகட்டியில் போட்டு எண்ணெயை வடியவிடவும்.

குறிப்பு: ஆடி அமாவாசை அன்று இந்த முப்பருப்பு வடையையும் சேர்த்து முன்னோர்களுக்குப் படைப்பார்கள்.

வாழைக்காய் கறியமுது       

தேவையானவை: பெரிய வாழைக்காய் - ஒன்று, மஞ்சள்தூள் - அரை டீஸ்பூன், புளி - சிறிதளவு, கடலைப்பருப்பு, உளுத்தம்பருப்பு - தலா ஒரு டேபிள்ஸ்பூன், காய்ந்த மிளகாய் - 3, கறிவேப்பிலை - சிறிதளவு, பெருங்காயத்தூள்  சிறிதளவு, கடுகு - ஒரு டீஸ்பூன், தேங்காய்த் துருவல் - கால் கப், எண்ணெய் - 2 டேபிள்ஸ்பூன், உப்பு - தேவைக்கேற்ப.

செய்முறை: வாழைக்காயைத் தோல் சீவி சிறிய கனமான துண்டுகளாக நறுக்கவும். ஒரு பாத்திரத்தில் புளியைக் கரைத்து அளவாக நீர் ஊற்றி உப்பு, மஞ்சள்தூள் போட்டு வாழைக்காயை அதில் போட்டு வேகவிடவும். வாணலியில் எண்ணெய்விட்டு கடுகு, பெருங்காயத்தூள், கடலைப்பருப்பு, உளுத்தம்பருப்பு, காய்ந்த மிளகாய், கறிவேப்பிலை தாளித்து, வெந்த வாழைக்காய் சேர்த்துக் கிளறி, தேங்காய்த் துருவல் தூவிக் கலந்து இறக்கவும்.

குறிப்பு: ஆடி அமாவாசையன்று வாழைக்காய் கறியமுது செய்வது வழக்கம்.   

எள்ளுச்சிமிழி    

தேவையானவை: எள் - அரை கப், துருவிய வெல்லம் - கால் கப், ஏலக்காய்த்தூள் - கால் டீஸ்பூன்.

செய்முறை: எள்ளைத் தண்ணீரில் போட்டு அலசி கல் நீக்கி மிக்ஸியில் சேர்த்து ஒரு சுற்று சுற்றி எடுத்து, வெல்லத்தூளைக் கலந்து, ஏலக்காய்த்தூள் சேர்த்துக் கலக்கவும். எள்ளை வறுக்காமல்தான் இதை செய்ய வேண்டும்.

குறிப்பு: நாகபஞ்சமியன்று பெண்கள் எள்ளுச்சிமிழி செய்வதுடன் நாகப்புற்றுக்குச் சென்று பால் தெளித்து வழிபட்டால் நல்லது நடக்கும்; தோஷங்கள் அகலும் என்பது ஐதீகம்.

புட்டு      

தேவையானவை: பச்சரிசி, துருவிய வெல்லம் - தலா ஒரு கப், துருவிய தேங்காய் - கால் கப், நெய் - 2 டேபிள்ஸ்பூன், உடைத்த முந்திரித் துண்டுகள் - 10, ஏலக்காய்த்தூள் - ஒரு டீஸ்பூன், மஞ்சள்தூள் - அரை டீஸ்பூன்.

செய்முறை: அரிசியை நன்கு களைந்து நீரை வடிகட்டவும். தண்ணீர் நன்றாக வடிந்ததும் அரிசியைக் கொஞ்சம் கொஞ்சமாக வெறும் வாணலியில் போட்டு சிவக்க வறுத்து, ஆறியதும் மிக்ஸியில் பொடிக்கவும். இந்த மாவில் வெந்நீர் தெளித்து, மஞ்சள்தூள் சேர்த்துப் பிசிறவும் (மாவைப் பிடித்துப் பார்த்தால் பிடிக்கிற பதம்; உதிர்த்துப் பார்த்தால் உதிர்க்கிற பதம் இருக்க வேண்டும்). விருப்பப்பட்டால் வெந்நீரிலேயே மஞ்சள்தூளும் கலந்து பிசிறலாம். இந்த மாவைத் துணியில் மூட்டையாகக் கட்டி இட்லித்தட்டில் வைத்து ஆவியில் 10 நிமிடங்கள் வேகவிட்டு எடுக்கவும். வெந்ததும் ஒரு தட்டில் கொட்டி, கட்டி இல்லாமல் உதிர்த்துக்கொள்ளவும். அடிகனமான பாத்திரத்தில் வெல்லத்தைப் போட்டு சிறிதளவு நீர் ஊற்றி பாகு காய்ச்சவும். பாகு காயும்போது தேங்காய்த் துருவல், ஏலக்காய்த்தூள் சேர்க்கவும். உருட்டும் பதம் வந்ததும் அடுப்பை அணைத்துவிட்டு, பாகை மாவில் கொட்டி நன்றாகக் கலந்து, நெய்யில் முந்திரியை வறுத்துப் போட்டு நன்றாகக் கலக்கி மூடி வைக்கவும். அரை மணி நேரத்தில் சுவையான புட்டு தயார்.

குறிப்பு: ஆண்டாள் அவதரித்த ஆடிப்பூரத் திருநாளில் இதை நைவேத்தியம் செய்து வழிபட்டால் எல்லா நன்மைகளும் கிடைக்கும்.

கும்மாயம்     

தேவையானவை: உளுந்து - ஒரு கப், பச்சரிசி - ஒரு டேபிள்ஸ்பூன், பாசிப்பருப்பு - கால் கப், வெல்லம் - ஒன்றரை கப், நெய் - தேவைக்கேற்ப.

செய்முறை: உளுந்து, பச்சரிசி, பாசிப்பருப்பு ஆகியவற்றை வெறும் வாணலியில் தனித்தனியாக வறுத்து, ஆறியதும் மிக்ஸியில் எல்லாவற்றையும் போட்டு பவுடராக்கவும். அந்த பவுடரை நீர்விட்டுக் கட்டியில்லாமல் கரைக்கவும் (கெட்டியான மோர் பதம்). அடிகனமான பாத்திரத்தில் வெல்லத்தை நீர்விட்டுக் கரைத்துக் கொதிக்கவிட்டு, ஏற்கெனவே கரைத்து வைத்துள்ள கலவையையும் சேர்த்து இடைவிடாமல் கிளறி, இடையிடையே நெய்யையும்விட்டு எல்லாம் சேர்ந்து வந்ததும் இறக்கவும்.

குறிப்பு: ஆடி மாதத்தில் இந்தக் கும்மாயம் செய்வது வழக்கம்.

சுருள் அரிசி    

தேவையானவை: பச்சரிசி - 2 கப், துருவிய வெல்லம் - ஒன்றரை கப், துருவிய தேங்காய் - கால் கப், ஏலக்காய்த்தூள் - ஒரு டீஸ்பூன், பொட்டுக்கடலை - 2 டேபிள்ஸ்பூன்.

செய்முறை: பச்சரிசியைக் கழுவி நீரை வடித்து துணியில் உலர்த்தவும். பாதி உலர்ந்ததும் வெறும் வாணலியில் மிதமாக வறுக்கவும். மிக்ஸியில் ரவை பதத்துக்கு உடைக்கவும். வெல்லத்துடன் நீர் சேர்த்து சூடாக்கி, ஒரு கொதி வந்ததும் இறக்கி வடிகட்டி, மீண்டும் அடுப்பிலேற்றி பாகு காய்ச்சவும். பாகு கொதிக்கும்போது தேங்காயைத் துருவலை அதில் போட்டு, பொட்டுக்கடலையும் சேர்த்து ஒரு கம்பிப் பதம் பாகு வந்ததும் இறக்கி வைத்துவிடவும். ஏலக்காய்த்தூள் சேர்க்கவும். ஆறியதும் உடைத்த அரிசி ரவையை அதில் போட்டுக் கிளறவும். சுருள் அரிசி தயார்.

குறிப்பு: ஆடிப்பெருக்கு அன்று இந்தச் சுருள் அரிசி செய்து பலவித சாதங்களுடன் ஆற்றுக்குச் சென்று படைப்பது வழக்கம்.

மாங்காய் சாதம்     

தேவையானவை: பச்சரிசி - 2 கப், கிளி மூக்கு மாங்காய் - ஒன்று, தேங்காய்த் துருவல் - 3 டேபிள்ஸ்பூன், குடமிளகாய் - பாதியளவு, மஞ்சள்தூள் - அரை டீஸ்பூன், காய்ந்த மிளகாய் - 2, வேர்க்கடலை, உடைத்த முந்திரித் துண்டுகள் - 2 டேபிள்ஸ்பூன், நறுக்கிய கொத்தமல்லித்தழை - 2 டேபிள்ஸ்பூன், எண்ணெய் - 4 டேபிள்ஸ்பூன், உப்பு - தேவைக்கேற்ப.

செய்முறை: பச்சரிசியை 4 கப் நீர்விட்டு உதிர் உதிராக வேகவைத்து ஆறவிடவும். குடமிளகாயை மெல்லியதாக, நீளவாக்கில் நறுக்கிக்கொள்ளவும். மாங்காயைத் தோல் சீவி, கேரட் துருவியில் துருவிக்கொள்ளவும். வாணலியில் எண்ணெய் விட்டு வேர்க்கடலை, காய்ந்த மிளகாய், முந்திரிப்பருப்பை போட்டு வறுத்து மாங்காய்த் துருவல், தேங்காய்த் துருவல் ஆகியவற்றைச் சேர்த்து வதக்கவும். பின்னர் உப்பு, மஞ்சள்தூள், நறுக்கிய குடமிளகாய் சேர்த்து வதக்கி இறக்கவும். பிறகு உதிர் உதிரான சாதத்தைச் சேர்த்துக் கிளறி, பொடியாக நறுக்கிய கொத்தமல்லித்தழை தூவி அலங்கரித்துப் பரிமாறவும்.

குறிப்பு: ஆடிப்பெருக்கு அன்று இந்த சாதத்தை செய்து படைக்கலாம்.

நெல்லிக்காய் சாதம்     

தேவையானவை: பெரிய நெல்லிக்காய் - 8, பச்சரிசி - 2 கப், எண்ணெய் - 2 டேபிள்ஸ்பூன், உப்பு - தேவைக்கேற்ப.

வறுத்துப் பொடிக்க: எண்ணெய் - 2 டீஸ்பூன், துவரம்பருப்பு, தேங்காய்த் துருவல் - தலா 3 டேபிள்ஸ்பூன், உளுத்தம்பருப்பு - ஒரு டேபிள்ஸ்பூன்.

செய்முறை: வாணலியில் 2 டீஸ்பூன் எண்ணெய்விட்டு வறுக்கக் கொடுத்தவற்றை வறுத்து கொரகொரப்பாகப் பொடிக்கவும். நெல்லிக்காயை கேரட் துருவியில் துருவிக்கொள்ளவும். 2 கப் பச்சரிசியுடன் 4 கப் நீர் விட்டு உதிர் உதிராக வேகவைத்துக்கொள்ளவும். வாணலியில் 2 டேபிள்ஸ்பூன் எண்ணெய்விட்டு, துருவிய நெல்லிக்காயை வதக்கவும். இதனுடன் உப்பு சேர்க்கவும். நெல்லிக்காயின் நீர் வற்றி வதங்கியதும் வறுத்துப் பொடித்த பொடியைத் தூவி, வேகவைத்த சாதத்தையும் சேர்த்துக் கிளறி இறக்கவும்.

குறிப்பு: ஆடிப்பெருக்கு அன்று இந்த சாதத்தை செய்து படைக்கலாம்.

புளிச்சக்கீரை சாதம்     

தேவையானவை: பச்சரிசி - 2 கப், நல்லெண்ணெய் - ஒரு டேபிள்ஸ்பூன், உப்பு - தேவைக்கேற்ப.

வறுத்துப் பொடிக்க: சுத்தம் செய்த கோங்கூரா (புளிச்சக்கீரை) - 2 கப், காய்ந்த மிளகாய் - 3, மல்லி (தனியா), உளுத்தம்பருப்பு, கடலைப்பருப்பு - தலா 2 டேபிள்ஸ்பூன், பெருங்காயத்தூள் - ஒரு டீஸ்பூன், எண்ணெய் - 2 டேபிள்ஸ்பூன். 

செய்முறை: வறுக்கக் கொடுத்துள்ளவற்றை வறுத்து கொரகொரப்பாகப் பொடிக்கவும். பச்சரிசியை 4 கப் நீர்விட்டு உதிர் உதிராக வடிக்கவும். வாணலியில் நல்லெண்ணெய்விட்டு, உப்பு சேர்த்து பொடித்த பொடியைச் சேர்த்து ஒரு புரட்டு புரட்டி, உதிர் உதிரான சாதத்தையும் போட்டு நன்றாகக் கிளறி இறக்கவும்.

குறிப்பு: முதலில் கோங்கூராவை நறுக்கி எண்ணெயில் மொறுமொறுப்பு வரும்வரை வறுத்துத் தனியாக வைத்துக்கொண்டு, பிறகு தனியா, பருப்புகளை வறுக்க வேண்டும். மிக்ஸியில் சுற்றும்போது முதலில் பருப்புகளை ஒரு சுற்று சுற்றிவிட்டு, பிறகு கீரையைப் போட்டுச் சுற்ற வேண்டும்.

அவல் பகாளாபாத்      

தேவையானவை: பச்சரிசி - ஒரு கப், கெட்டி அவல், பால் - தலா அரை கப், தயிர் - ஒரு கப், உப்பு - தேவைக்கேற்ப.

தாளிக்க: கடுகு, எண்ணெய் - தலா ஒரு டீஸ்பூன், பெருங்காயத்தூள் - அரை டீஸ்பூன், கறிவேப்பிலை - சிறிதளவு, பச்சை மிளகாய் - 2 (பொடியாக நறுக்கவும்).

அலங்கரிக்க: கேரட் துருவல், உலர் திராட்சை, நறுக்கிய கொத்தமல்லித்தழை, உடைத்த முந்திரித் துண்டுகள் - தலா 2 டேபிள்ஸ்பூன்.

செய்முறை: அவல், பச்சரிசி இரண்டையும் கழுவிக் களைந்து அரை கப் பால், 2 கப் தண்ணீர்விட்டு குழைய வேகவிடவும். வெந்ததும் உப்பு, தயிர் சேர்த்து நன்றாகக் கலக்கவும். தாளிக்கக் கொடுத்தவற்றைத் தாளித்துச் சேர்க்கவும். அலங்கரிக்கக் கொடுத்துள்ளவற்றால் அலங்கரிக்கவும்.

மரவள்ளிக்கிழங்கு வடை    

தேவையானவை: மரவள்ளிக்கிழங்கு - ஒன்று, புழுங்கல் அரிசி - 2 கப், காய்ந்த மிளகாய் - 4, துவரம்பருப்பு - கால் கப், கறிவேப்பிலை - சிறிதளவு, நறுக்கிய கொத்தமல்லித்தழை - 2 டேபிள்ஸ்பூன், பெருங்காயத்தூள் - ஒரு டீஸ்பூன், எண்ணெய் - பொரிப்பதற்குத் தேவையான அளவு, உப்பு - தேவைக்கேற்ப.

செய்முறை: புழுங்கல் அரிசி, துவரம்பருப்பு, காய்ந்த மிளகாய் மூன்றையும் ஒரு மணி நேரம் ஊறவைத்து உப்பு சேர்த்து கெட்டியாக, கொரகொரப்பாக அரைக்கவும். மரவள்ளிக்கிழங்கைத் தோல் சீவி கேரட் துருவியால் துருவி, அதை அரைத்த மாவில் சேர்த்து கறிவேப்பிலை, கொத்தமல்லித்தழை, பெருங்காயத்தூள் சேர்த்துக் கலக்கவும். வாணலியில் எண்ணெயைக் காயவைத்து கலந்த மாவை வடைகளாகத் தட்டிப் போட்டு, ஒருபுறம் வெந்ததும் திருப்பிப்போட்டு, மறுபுறமும் வெந்ததும் எடுக்கவும்.

குறிப்பு: ஆடிப்பெருக்கு அன்று சுருள் அரிசி, 5 வித சாதங்கள், வடை இவற்றை ஆறு, மற்றும் நீர் நிலைகள் உள்ள இடங்களுக்கு எடுத்துச் சென்று வழிபட்டு அனைவருடனும் சேர்ந்து உண்டு மகிழ்வர்.

போளி     

தேவையானவை: கடலைப்பருப்பு - ஒரு கப், துருவிய வெல்லம் - ஒன்றரை கப், மைதா மாவு - ஒரு கப், நல்லெண்ணெய் - ஒரு டேபிள்ஸ்பூன், ஏலக்காய்த்தூள் - ஒரு டீஸ்பூன், கேசரி கலர் - சிறிதளவு, தேங்காய்த் துருவல் - கால் கப், வெண்ணெய் - ஒரு டேபிள்ஸ்பூன், நெய் - 3 டேபிள்ஸ்பூன்.

செய்முறை: மைதா மாவு, வெண்ணெய், நல்லெண்ணெய் இவற்றுடன் நீர் சேர்த்து, கேசரி கலரையும் சேர்த்து, சப்பாத்தி மாவு பதத்துக்குப் பிசைந்து அரை மணி நேரம் ஊறவிடவும். கடலைப்பருப்பை அளவான நீர்விட்டு வேகவிடவும். வெந்ததும் அதில் இருக்கும் சிறிதளவு நீரிலேயே வெல்லத்தையும் போட்டு ஒரு கொதி வந்தவுடன் தேங்காய்த் துருவல், ஏலக்காய்த்தூள் சேர்த்து மீண்டும் ஒரு கொதிவந்தவுடன் இறக்கி, ஆறியதும் மிக்ஸியில் ஒரு சுற்று சுற்றவும். பூரணம் தயார் (பூரணம் தளர்வாக இருந்தால், ஒரு ஸ்பூன் நெய்விட்டு பாத்திரத்தில் போட்டு அடுப்பிலேற்றிக் கிளறவும். பூரணம் கெட்டியாகிவிடும்).

பிசைந்து வைத்த மைதா மாவிலிருந்து ஒரு நெல்லிக்காய் அளவு எடுத்து அப்பளம் போல் தட்டி அதன்மீது எலுமிச்சை அளவு பூரணம் வைத்து  மூடி போளியாகத் தட்டவும். போளியை தோசைக்கல்லில் போட்டு ஓரத்தில் சிறிதளவு நெய் ஊற்றி, ஒருபுறம் வெந்ததும் திருப்பிப்போட்டு, மறுபுறமும் வெந்ததும் எடுக்கவும்.

குறிப்பு: வரலட்சுமி விரதத்தன்று இந்தப் போளியைச் செய்து படைத்து, மற்றவர்களுக்குக் கொடுத்து தாங்களும் உண்டு மகிழ்வர்.

கஜூர்க்காய்    

தேவையானவை: மைதா மாவு - ஒரு கப், துருவிய வெல்லம் - 2 கப், வெள்ளை ரவை, தேங்காய்த் துருவல், பொட்டுக்கடலை - தலா கால் கப், வெண்ணெய் -  ஒரு டேபிள்ஸ்பூன், வெள்ளை எள், உடைத்த முந்திரித் துண்டுகள் -  தலா 3 டேபிள்ஸ்பூன், ஏலக்காய்த்தூள் - ஒரு டீஸ்பூன், எண்ணெய் - பொரிப்பதற்குத் தேவையான அளவு.

செய்முறை: வெறும் வாணலியில் தேங்காய்த் துருவலைப் போட்டு வறுத்துக்கொள்ளவும். பொட்டுக்கடலையை ரவை பதத்துக்கு உடைக்கவும். வெள்ளை எள்ளை வெறும் வாணலியில் வறுத்து ஒன்றிரண்டாகப் பொடிக்கவும். அகலமான பாத்திரம் ஒன்றில் மைதா மாவு, ரவை, வெண்ணெய் ஆகியவற்றை ஒன்றாகச் சேர்த்து சிறிதளவு தண்ணீர் ஊற்றி பூரி மாவு பதத்துக்குப் பிசைந்து கால் மணி நேரம் ஊறவிடவும். பின்னர் சிறிய உருண்டைகளாக உருட்டி வட்டமாக திரட்டிக்கொள்ளவும். துருவிய வெல்லத்துடன், உடைத்த பொட்டுக்கடலை, வறுத்த தேங்காய்த் துருவல், வறுத்துப் பொடித்த எள், ஏலக்காய்த்தூள், முந்திரித் துண்டுகள் சேர்த்து நன்றாகக் கலந்தால் பூரணம் தயார். திரட்டி வைத்துள்ள வட்டங்களின் நடுவே 2 டீஸ்பூன் அளவு பூரணத்தை வைத்து மூடி ‘மோதகம்’ வடிவில் செய்யவும். வாணலியில் எண்ணெயைக் காயவைத்து மோதகங்களை போட்டுப் பொரித்து எடுக்கவும்.

குறிப்பு வரலட்சுமி விரதத்தன்று இந்த கஜூர்க்காயை அம்மனுக்கு நைவேத்தியம் செய்தால் வீட்டில் லட்சுமி கடாட்சம் பெருகும்.

அப்பம்   

தேவையானவை: பச்சரிசி - ஒரு கப், உளுத்தம்பருப்பு, துவரம்பருப்பு - தலா 2 டேபிள்ஸ்பூன், வெந்தயம் - ஒரு டீஸ்பூன், துருவிய வெல்லம் - முக்கால் கப், துருவிய தேங்காய் - கால் கப், ஏலக்காய்த்தூள் - ஒரு டீஸ்பூன், எண்ணெய் - தேவையான அளவு.

செய்முறை: அரிசி, உளுத்தம்பருப்பு, துவரம்பருப்பு, வெந்தயம் ஆகியவற்றைக் கழுவி ஒரு மணி நேரம் ஊறவிடவும். ஊறியதும் தேங்காயையும் சேர்த்து நைஸாக அரைக்கவும். பிறகு, வெல்லம், ஏலக்காய்த்தூள் சேர்த்து அரைக்கவும். வாணலியில் எண்ணெய் ஊற்றி, காய்ந்ததும் இந்த மாவைக் கரண்டியால் எடுத்து கொஞ்சம் ஊற்றி, ஒருபக்கம் வெந்ததும், மறுபக்கம் திருப்பிப்போட்டு வெந்தவுடன் எண்ணெயை வடியவிட்டு எடுக்கவும்.

குறிப்பு: ஆவணி அவிட்டத்துக்கு இந்த அப்பம் செய்து படைப்பது வழக்கம்.

கடலைப்பருப்பு இனிப்பு சுண்டல்    

தேவையானவை: கடலைப்பருப்பு - ஒரு கப், துருவிய தேங்காய் - கால் கப், துருவிய வெல்லம் - அரை கப், ஏலக்காய்த்தூள் -  ஒரு டீஸ்பூன்.

செய்முறை: கடலைப்பருப்பை குழையாமல் வேகவைத்துக் கொள்ளவும். வெந்த பருப்பில் உள்ள நீரை வடிகட்டிவிட்டு சூடாக இருக்கும்போதே துருவிய வெல்லம், துருவிய தேங்காய், ஏலக்காய்த்தூள் சேர்த்துக் கிளறவும். கடலைப்பருப்பு இனிப்பு சுண்டல் தயார்.

குறிப்பு: கல்விக்கு அதிபதியான ஹயக்ரீவர் ஜெயந்தி அன்று இந்தச் சுண்டலைச் செய்து ஹயக்ரீவருக்குப் படைத்து, குழந்தைகளுக்கு அதைக் கொடுத்தால் குழந்தைகள் நன்கு படிப்பார்கள்.

வெள்ளிப்பிள்ளையார் கொழுக்கட்டை          

தேவையானவை: பச்சரிசி - ஒரு கப், பாசிப்பருப்பு - 6 டேபிள்ஸ்பூன், தேங்காய்த் துருவல் - கால் கப், ஏலக்காய்த்தூள் - ஒரு டீஸ்பூன், துருவிய வெல்லம் - ஒன்றரை கப், நெய் - 2 டேபிள்ஸ்பூன்.

செய்முறை: அரிசி, பாசிப்பருப்பு இரண்டையும் வெறும் வாணலியில் வறுத்து ரவை பதத்துக்கு உடைக்கவும். அடிகனமான பாத்திரத்தில் வெல்லத்தைப் போட்டு 2 கப் நீர்விட்டு ஒரு கொதி விடவும். பின்னர் இறக்கி கல், மணல் போக வடிகட்டி மீண்டும் அடுப்பிலேற்றி தேங்காய்த் துருவல், ஏலக்காய்த்தூள் சேர்த்து உடைத்த ரவையைச் சேர்க்கவும். பாதி வெந்ததும் இறக்கி கைகளில் நெய் தொட்டுக்கொண்டு உருண்டைகளாக உருட்டி இட்லித்தட்டில் வைத்து ஆவியில் 8 நிமிடங்கள் வேகவிட்டு எடுக்கவும்.

குறிப்பு: ஆடி மாதம் வெள்ளிக்கிழமையில் வெள்ளி முளைக்கும் அதிகாலையில் வெள்ளியில் செய்த பிள்ளையாரை வைத்து இந்தக் கொழுக்கட்டையும் செய்து படைப்பது குடும்பத்துக்கு மிகவும் நன்மை தரும்.

ஔவையார் நோன்புக் கொழுக்கட்டை     

தேவையானவை: பச்சரிசி - ஒரு கப், நல்லெண்ணெய் - ஒரு டேபிள்ஸ்பூன்.

செய்முறை: பச்சரிசியை ஒரு மணி நேரம் ஊறவைத்து நீரை வடிகட்டி, அரிசியை உலர்த்தி, மிக்ஸியில் அரைக்கவும். 2 கப் நீர்விட்டு மாவை வேகவிடவும். வெந்ததும் கைகளால் பிடித்துக் கொழுக்கட்டைகளாகச் செய்து இட்லித்தட்டில் வாழை இலையில் எண்ணெய் தடவி வைத்து 10 நிமிடங்கள் வேகவிட்டு எடுக்கவும்.

குறிப்பு: ஆடி மாதம் செவ்வாய்க்கிழமை இரவில் இந்தக் கொழுக்கட்டை செய்து படைப்பர். இதை ஆண்கள் பார்க்கவும் கூடாது; கொழுக்கட்டையைச் சுவைக்கவும் கூடாது. இந்தக் கொழுக்கட்டையை அன்று இரவு படைக்கும் தேங்காயுடன் சேர்த்து சாப்பிட வேண்டும்.

உப்பு சீடை    

தேவையானவை: பச்சரிசி - 2 கப், வெள்ளை உளுந்து, பொட்டுக்கடலை - தலா 5 டேபிள்ஸ்பூன், பெருங்காயத்தூள் - அரை டீஸ்பூன், உப்பு - தேவைக்கேற்ப, எண்ணெய் - பொரிப்பதற்குத் தேவையான அளவு.

செய்முறை: பச்சரிசியை 20 நிமிடங்கள் ஊறவைத்து வடிகட்டி நிழலில் உலர்த்தவும். பாதிக்கு மேல் உலர்ந்ததும் உளுந்து, பொட்டுக்கடலையையும் சேர்த்து மெஷினில் கொடுத்து நைஸாக அரைக்கவும். அரைத்த மாவை வெறும் வாணலியில் போட்டு மிதமாக வறுத்து, ஆறவைத்து சலித்துக்கொள்ளவும். பின்னர் தேவையான அளவு மாவை எடுத்து உப்பு, பெருங்காயத்தூள், தேவையான அளவு தண்ணீர் சேர்த்து கெட்டியாகப் பிசைந்துகொள்ளவும். மாவை சிறு சிறு சீடைகளாக உருட்டவும். அடிகனமான வாணலியில் எண்ணெயைக் காயவைத்து, சீடைகளைப் போட்டு பொரித்து எடுக்கவும்.

குறிப்பு: கிருஷ்ண ஜெயந்தி அன்று இந்தச் சீடை செய்து கிருஷ்ணருக்குப் படைத்து சிறுவர்களுக்குக் கொடுப்பது வழக்கம்.

வெல்ல சீடை       

தேவையானவை: பச்சரிசி - 2 கப், பொட்டுக்கடலை, உளுந்து - தலா 5 டேபிள்ஸ்பூன்,  துருவிய வெல்லம் - 2 கப், தேங்காய்த் துருவல் - அரை கப், எண்ணெய் - பொரிப்பதற்குத் தேவையான அளவு.

செய்முறை: பச்சரிசியை 20 நிமிடங்கள் ஊறவைத்து வடிகட்டி நிழலில் உலர்த்தவும். பாதிக்கு மேல் உலர்ந்ததும் உளுந்தையும், பொட்டுக்கடலையையும் சேர்த்து மெஷினில் கொடுத்து நைஸாக அரைக்கவும். அரைத்த மாவை வெறும் வாணலியில் போட்டு மிதமாக வறுத்து, ஆறவைத்து சலித்துக்கொள்ளவும். பின்னர் தேவையான அளவு மாவை எடுத்து தண்ணீர் சேர்த்து கெட்டியாகப் பிசைந்துகொள்ளவும்.   அடிகனமான வாணலியில் வெல்லத்தைப் போட்டு ஒரு கப் நீர்விட்டு ஒரு கொதி வந்ததும் இறக்கி கல், மணல் போக வடிகட்டி, மீண்டும் அடுப்பில் ஏற்றி தேங்காய்த் துருவல் சேர்த்து மீண்டும் ஒரு கொதி வந்ததும் தயாரித்த மாவைச் சேர்த்துக் கிளறி எல்லாமாகச் சேர்ந்து வந்ததும் இறக்கவும் (மாவு நன்கு வெந்துவிடக் கூடாது). இந்த மாவை சிறு சிறு சீடைகளாகச் செய்யவும். அடிகனமான வாணலியில் எண்ணெயைச் சூடாக்கி, சீடைகளைப் போட்டு பொரித்து எடுக்கவும்.

குறிப்பு: கிருஷ்ண ஜெயந்தி அன்று இந்த சீடை செய்து கிருஷ்ணருக்குப் படைக்கவும். வெல்ல சீடை, உப்பு சீடை இரண்டுமே படைத்து குழந்தைகளுக்குக் கொடுக்கவும்.

கைமுறுக்கு     

தேவையானவை: புழுங்கல் அரிசி - 2 கப், பொட்டுக்கடலை - கால் கப், வெண்ணெய் - 3 டேபிள்ஸ்பூன், எள் - ஒரு டேபிள்ஸ்பூன், தேங்காய்த் துருவல் - 3 டேபிள்ஸ்பூன், பெருங்காயத்தூள் - ஒரு டீஸ்பூன், உப்பு - தேவைக்கேற்ப, எண்ணெய் - பொரிப்பதற்குத் தேவையான அளவு.

செய்முறை: புழுங்கல் அரிசியை ஒரு மணி நேரம் ஊறவைக்கவும். பிறகு உப்பு, தேங்காய்த் துருவல் சேர்த்து நைஸாக, கெட்டியாக அரைக்கவும். பொட்டுக்கடலையை மிக்ஸியில் சேர்த்து நீர் விடாமல் அரைக்கவும். இதை கெட்டியாக அரைத்த அரிசி மாவில் கலந்து வெண்ணெய், எள், பெருங்காயத்தூள் சேர்த்துப் பிசைந்துகொள்ளவும். தேவையான அளவு மாவை எடுத்து மூன்று சுற்று அல்லது விரும்பிய அளவில் முறுக்காகச் சுற்றவும். வாணலியில் எண்ணெயைக் காயவைத்து, முறுக்குகளைப் போட்டு பொன்னிறமாகப் பொரித்து எடுக்கவும்.

குறிப்பு: கிருஷ்ண ஜெயந்தி அன்று கைமுறுக்கு செய்து கிருஷ்ணருக்குப் படைப்பது வழக்கம்.

அவல் பொரி     

தேவையானவை: கெட்டி அவல் - ஒரு கப், துருவிய வெல்லம் - ஒன்றரை கப், பல்லு பல்லாகக் கீறிய தேங்காய் - கால் கப்.

செய்முறை: அவலை வெறும் வாணலியில் கொஞ்சம் கொஞ்சமாகப் போட்டு பொரிக்கவும். அடிகனமான பாத்திரத்தில் வெல்லத்தைப் போட்டு சிறிதளவு நீர்விட்டு பல்லு பல்லாகக் கீறிய தேங்காயைச் சேர்த்து கெட்டிப்பாகு காய்ச்சி இறக்கவும். பொரித்த அவலை அதில் சேர்த்துக் கலக்கவும்.

குறிப்பு: கிருஷ்ண ஜெயந்தி அன்று பகவான் கிருஷ்ணருக்கு மிகவும் பிடித்த இந்த அவல் பொரியைச் செய்து படைத்து சிறுவர்களுக்கும் மற்றவர்களுக்கும் கொடுத்து மகிழ்வர்.

தட்டை     

தேவையானவை: பச்சரிசி - அரை கிலோ, உளுத்தம்பருப்பு - 50 கிராம், எள் - ஒரு டேபிள்ஸ்பூன், கடலைப்பருப்பு - 50 கிராம், பல்லு பல்லாகக் கீறிய தேங்காய் - கால் கப், மிளகாய்த்தூள் - 2 டேபிள்ஸ்பூன், பெருங்காயத்தூள் - ஒரு டீஸ்பூன், உப்பு - தேவைக்கேற்ப, எண்ணெய் - பொரிக்கத் தேவையான அளவு.

செய்முறை: கடலைப்பருப்பை அரை மணி நேரம் ஊறவைத்து நீரை வடிகட்டவும். உளுத்தம்பருப்பைச் சிவக்க வறுத்து மாவாக்கவும். பச்சரிசியை ஊறவைத்துக் களைந்து, காயவைத்து மாவாக்கிக்கொள்ளவும். அதை வெறும் வாணலியில் போட்டு வறுக்கவும். அந்த மாவு ஆறிய பின், உளுத்த மாவு, எள், கடலைப்பருப்பு, பெருங்காயத்தூள், உப்பு, மிளகாய்த்தூள், தேங்காய் கீற்றுகள் எல்லாவற்றையும் சேர்த்து சிறிது சிறிதாகத் தண்ணீர் சேர்த்து கெட்டியாகப் பிசையவும். தேவையான அளவு மாவை எடுத்து வாழை இலையிலோ பிளாஸ்டிக் பேப்பரிலோ தட்டையாகத் தட்டவும். அடிகனமான வாணலியில் எண்ணெயைக் காயவைத்து தட்டைகளைப் போட்டு பொரித்து எடுக்கவும்.

குறிப்பு: கிருஷ்ண ஜெயந்தியன்று இதை செய்து படைப்பது வழக்கம்.

பைனாப்பிள் பொங்கல்    

தேவையானவை: பச்சரிசி - 2 கப், பாசிப்பருப்பு - கால் கப், பொடியாக நறுக்கிய பைனாப்பிள் துண்டுகள் - அரை கப், சர்க்கரை, துருவிய வெல்லம் - தலா கால் கப், நெய் - 6 டேபிள்ஸ்பூன், ஏலக்காய்த்தூள் - ஒரு டீஸ்பூன், உடைத்த முந்திரித் துண்டுகள் - 2 டேபிள்ஸ்பூன்.

செய்முறை: அரிசி, பாசிப்பருப்பு இரண்டையும் வெறும் வாணலியில் வறுக்கவும். பைனாப்பிள் துண்டுகளை மிக்ஸியில் சேர்த்து, நீர்விட்டு அரைத்து வடிகட்டி பைனாப்பிள் சாற்றை எடுத்துக்கொள்ளவும் (சக்கையைத் தனியே போட்டுவிடவும்). அரிசி, பருப்பைக் கழுவி குக்கரில் சேர்த்து, 4 கப் தண்ணீர் பைனாப்பிள் சாறு சேர்த்துக் குழைய வேகவிடவும். வெல்லம், சர்க்கரை இரண்டையும் கால் கப் நீர் விட்டு ஒரு கம்பிப் பதத்துக்கு பாகு காய்ச்சவும். வேகவைத்ததை அதில் சேர்த்துக் கலக்கி, இடையிடையே நெய்விட்டு, ஏலக்காய்த்தூள் தூவி, ஒரு டேபிள்ஸ்பூன் நெய்யில் முந்திரித் துன்டுகளை வறுத்துச் சேர்த்து இறக்கவும்.

குறிப்பு: ஆடிப்பெருக்கு அன்று இதைச் செய்து மகிழுங்கள்.

படங்கள்:தே.அசோக்குமார்