Published:Updated:

30 வகை கீரை ரெசிப்பி

30 வகை கீரை ரெசிப்பி
பிரீமியம் ஸ்டோரி
News
30 வகை கீரை ரெசிப்பி

30 வகை கீரை ரெசிப்பி

30 வகை கீரை ரெசிப்பி

ச்சைப்பசேல் என அடுக்கிவைக்கப்பட்டிருக்கும் கீரை வகைள், பார்க்கும்போதே கண்களைக் கவர்ந்து வாங்கத் தூண்டும். பர்ஸையும் பதம் பார்க்காமல், சத்துகளையும் கொண்டுவந்து குவித்து `டூ இன் ஒன்’னாக சமையலில் கைகொடுத்து உதவும் கீரையில் கிரேவி, பொரியல் என்று மட்டுமல்லாமல்... புட்டு, நூடுல்ஸ், சூப், ஸ்பிரிங் ரோல் என்று 30 வகை ரெசிப்பிகளை இங்கே வழங்குகிறார் சமையல் கலைஞர் ஜலீலா பானு.    

30 வகை கீரை ரெசிப்பி

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

முருங்கைக்கீரை - முந்திரி பக்கோடா

தேவையானவை:
முருங்கைக்கீரை – ஒரு கப், கடலை மாவு – ஒரு கப், அரிசி மாவு - கால் கப், மிளகாய்த்தூள் - ஒரு டீஸ்பூன், சமையல் சோடா - அரை டீஸ்பூன், வனஸ்பதி – கால் கப், நறுக்கிய கறிவேப்பிலை - சிறிதளவு, வெங்காயம் – ஒன்று (நீளவாக்கில் நறுக்கவும்), பச்சை மிளகாய் – 3 (பொடியாக நறுக்கவும்), முந்திரி - 50 கிராம் (இரண்டாக உடைக்கவும்), தண்ணீர் – சிறிதளவு, எண்ணெய் – தேவையான அளவு, உப்பு - ஒரு டீஸ்பூன்.     

30 வகை கீரை ரெசிப்பி

செய்முறை: முந்திரிப்பருப்பை வெறும் வாணலியில் வறுத்து எடுக்கவும். பாத்திரத்தில் உப்பு, சமையல் சோடா, அரிசி மாவு, கடலை மாவு, மிளகாய்த்தூள் சேர்த்துக் கலக்கவும். வனஸ்பதியைச் சூடுபடுத்தி கடலை மாவு கலவையில் ஊற்றிக் கலக்கவும். இதனுடன் பச்சை மிளகாய், முருங்கைக்கீரை, கறிவேப்பிலை, வெங்காயம், வறுத்த முந்திரி சேர்த்துக் கலந்து, தண்ணீர் தெளித்து கெட்டியாகப் பிசிறவும். ஐந்து நிமிடங்கள் அப்படியே ஊறவிடவும். வாணலியில் எண்ணெயைக் காயவிட்டு, முந்திரிக் கலவையை சிறிது சிறிதாக கிள்ளிப் போட்டு, பொன்னிறமாகப் பொரித்தெடுக்கவும்.

மினி கிரீன் தானிய அடை    

30 வகை கீரை ரெசிப்பி

தேவையானவை: குதிரைவாலி, வரகு, தினை, சாமை - தலா கால் கப், கடலைப்பருப்பு – அரை கப், பாலக்கீரை (பசலைக்கீரை) – அரை கட்டு (பொடியாக நறுக்கவும்), பச்சை மிளகாய் – ஒன்று, தோல் சீவிய இஞ்சி – ஒரு சிறிய துண்டு, கறிவேப்பிலை – அரை கப், நல்லெண்ணெய், நெய், உப்பு –  தேவையான அளவு.

செய்முறை: சிறுதானிய அரிசி வகைகளைத் தனியாக ஒரு மணி நேரம் ஊறவைக்கவும்.  கடலைப்பருப்பைத் தனியாக ஒரு மணி நேரம் ஊறவைக்கவும். கடலைப்பருப்பைத் தனியாக மிக்ஸியில் தண்ணீர் விடாமல் கொரகொரப்பாக அரைத்து எடுக்கவும். பிறகு இஞ்சி, பாலக்கீரை, கறிவேப்பிலை, பச்சை மிளகாய், உப்பு, அரிசி வகைகளைச் சேர்த்து, தண்ணீர் தெளித்து, நைஸாக அரைக்கவும்.  இதனுடன் அரைத்த கடலைப்பருப்பை சேர்த்துக் கலக்கவும். தோசைக்கல்லைக் காயவிட்டு, மாவை சிறிய அடைகளாக ஊற்றி, சுற்றிலும் சிறிதளவு நல்லெண்ணெய், நெய்விட்டு  இருபுறமும் வேகவைத்து எடுக்கவும்.

கம்பு - பாலக் கொழுக்கட்டை    

30 வகை கீரை ரெசிப்பி

தேவையானவை: கம்பு மாவு - 150 கிராம், அரிசி மாவு, ரவை – தலா 50 கிராம், பொடியாக நறுக்கிய பாலக்கீரை - அரை கப், தண்ணீர் - தேவையான அளவு, தேங்காய்த் துருவல் –  அரை கப், பச்சை மிளகாய் - ஒன்று (பொடியாக நறுக்கவும்), வெங்காயம் - ஒன்று (பொடியாக நறுக்கவும்), மிளகுத்தூள் - அரை டீஸ்பூன், நெய் - ஒரு டீஸ்பூன், உப்பு - தேவையான அளவு.

செய்முறை: கம்பு மாவை வெறும் வாணலியில் லேசாக வறுக்கவும். தேவையான அளவு தண்ணீரைக் கொதிக்கவிட்டு, நெய், உப்பு சேர்த்துக் கலக்கவும். கம்பு மாவுடன்  அரிசி மாவு, ரவை, வெங்காயம், பாலக்கீரை, பச்சை மிளகாய், தேங்காய்த் துருவல், மிளகு சேர்த்துக் கலக்கவும். பிறகு, சூடான நீரை சிறிது சிறிதாகச் சேர்த்து நன்கு பிசைந்து, 10 நிமிடங்கள் ஊறவைக்கவும். மாவை சிறிய கொழுக்கட்டைகளாகப் பிடித்து ஆவியில் வேகவைத்து எடுக்கவும்.

குறிப்பு: கம்பு எலும்புகளைப் பலப்படுத்தும்; வயிற்றில் ஏற்படும் புண்ணை ஆற்றும்.

ஸ்பினச் பக்கோடா      

30 வகை கீரை ரெசிப்பி

தேவையானவை:  ஏதாவது ஒரு வகை கீரை – ஒரு கட்டு (பொடியாக நறுக்கவும்), கடலை மாவு – 150 கிராம், அரிசி மாவு – 50 கிராம், பூண்டு – 2 பல், பெருங்காயத்தூள் – ஒரு சிட்டிகை, சிவப்பு ஃபுட் கலர் – ஒரு சிட்டிகை (விரும்பினால்), வெங்காயம் – ஒன்று (பொடியாக நறுக்கவும்), சமையல்  சோடா – ஒரு சிட்டிகை, தண்ணீர் – 2 டேபிள்ஸ்பூன், எண்ணெய், உப்பு – தேவையான அளவு.

செய்முறை: அகலமான பாத்திரத் தில் கடலை மாவு, அரிசி மாவு, கீரை, பூண்டு, பெருங்காயத்தூள், உப்பு, வெங்காயம், ஃபுட் கலர், சமையல் சோடா சேர்த்துக் கலக்கவும். இதனுடன் தண்ணீர் தெளித்து பிசிறவும். வாணலியில் எண்ணெயைக் காயவிட்டு, மாவை சிறிது சிறிதாக கிள்ளிப் போட்டு, பொன்னிறமாகப் பொரித்தெடுக்கவும்.

தேங்காய் - பாலக் புட்டு   

30 வகை கீரை ரெசிப்பி

தேவையானவை: சிவப்பு அரிசி மாவு – 200 கிராம் (வறுக்கவும்), பாலக்கீரை விழுது – முக்கால் கப், முளைக்கட்டிய பச்சைப் பயறு – 2 டேபிள்ஸ்பூன், தேங்காய் - ஒன்று (துருவிக்கொள்ளவும்), உப்பு, நெய் – தேவையான அளவு, வாழைப்பழம் – தேவையான அளவு (சிறிய துண்டுகளாக்கவும்).

செய்முறை: வறுத்த அரிசி மாவுடன் பாலக் விழுது, சிறிதளவு உப்பு சேர்த்து நன்கு உதிர் உதிராக கலந்து 10 நிமிடங்கள் ஊறவைக்கவும். புட்டுக்குழலில் சிறிதளவு முதல் லேயராக பிசிறிய மாவு போடவும். அதன் மேலே தேங்காய்த் துருவல், முளைகட்டிய பயறு என ஒவ்வொரு லேயராக நிரப்பி ஆவியில் வேகவைத்து எடுக்கவும். இதனுடன் நெய், வாழைப்பழத் துண்டுகள் சேர்த்துப் பரிமாறவும்.

குறிப்பு: ஒரு கப் பாலக்கீரையுடன் தேவையான அளவு தண்ணீர் சேர்த்து வேக வைத்து, ஆறிய பிறகு மிக்ஸியில் விழுதாக அரைக்கவும். இதுவே பாலக் விழுது.

மூங்தால் - பொன்னாங்கண்ணிக் கீரை கூட்டு     

30 வகை கீரை ரெசிப்பி

தேவையானவை: பாசிப்பருப்பு - கால் கப், பொன்னாங்கண்ணிக் கீரை – அரை கட்டு (பொடியாக நறுக்கவும்), தக்காளி - ஒன்று, மஞ்சள்தூள் - கால் டீஸ்பூன், சீரகம் – அரை டீஸ்பூன், கடுகு – ஒரு டீஸ்பூன், வெங்காயம் – ஒன்று (பொடியாக நறுக்கவும்), இஞ்சி - பூண்டு விழுது - சிறிதளவு, மிளகாய்த்தூள் – அரை டீஸ்பூன், எண்ணெய் – 2 டீஸ்பூன், உப்பு – தேவையான அளவு.

செய்முறை:
பாசிப்பருப்புடன் தக்காளி, மஞ்சள்தூள், சீரகம் சேர்த்து வேகவைக்கவும். மண்சட்டியில் எண்ணெய்விட்டு சூடாக்கி, கடுகு தாளித்து... வெங்காயம், இஞ்சி - பூண்டு விழுது சேர்த்து, பச்சை வாசனை போக வதக்கவும். பிறகு கீரை, மிளகாய்த்தூள், உப்பு சேர்த்து சிறிது நேரம் வதக்கவும். இறுதியாக வேகவைத்த பருப்புக் கலவையைச் சேர்த்து நன்கு கொதிக்கவிட்டு இறக்கவும்.

பருப்புக்கீரை வெஜ் நூடுல்ஸ்     

30 வகை கீரை ரெசிப்பி

தேவையானவை: நூடுல்ஸ் – ஒரு பாக்கெட், நறுக்கிய பருப்புக்கீரை - அரை கப், நறுக்கிய வெங்காயத்தாள் – சிறிதளவு, நீளவாக்கில் நறுக்கிய கேரட், முட்டைகோஸ் - சிறிதளவு, பச்சைப் பட்டாணி - சிறிதளவு, வெண்ணெய் – ஒரு டேபிள்ஸ்பூன், நறுக்கிய பூண்டு  – ஒரு டீஸ்பூன், முட்டை – ஒன்று (விருப்பப்பட்டால்), சில்லி கார்லிக் டொமேட்டோ கெட்சப் – ஒரு டீஸ்பூன், சில்லி சாஸ் – அரை டீஸ்பூன், சோயா சாஸ் – ஒரு டீஸ்பூன், வெள்ளை மிளகுத்தூள் – கால் டீஸ்பூன், உப்பு – தேவையான அளவு.

செய்முறை: நூடுல்ஸை அதனுள் இருக்கும் மசாலா சேர்த்து உதிர் உதிராக வேகவைத்து எடுக்கவும்.  அகலமான வாணலியில் வெண்ணெய்விட்டு உருக்கி... பூண்டு, கேரட், முட்டைகோஸ், பச்சைப் பட்டாணி சேர்த்து, முட்டையை உடைத்து ஊற்றி வதக்கவும். இதனுடன் வெங்காயத்தாள், பருப்புக்கீரை சேர்த்து நன்கு வதக்கவும். பிறகு சில்லி கார்லிக் டொமேட்டோ கெட்சப், சில்லி சாஸ், சோயா சாஸ், மிளகுத்தூள், நூடுல்ஸ் சேர்த்துக் கிளறி இறக்கவும்.

குறிப்பு:
பாலக்கீரை, வெந்தயக்கீரை சேர்த்தும் செய்யலாம்.

சிவப்பு பாலக்கீரை ஸ்பிரிங் ரோல்      

30 வகை கீரை ரெசிப்பி

தேவையானவை - ஸ்டஃபிங் செய்ய: நறுக்கிய சிவப்பு பாலக்கீரை – அரை கப், பீட்ரூட் துருவல் – அரை கப், நறுக்கிய வெங்காயத்தாள் – அரை கப், கேரட்  துருவல் - அரை கப், ஸ்வீட் சோயா சாஸ் – ஒரு டீஸ்பூன், வெள்ளை மிளகுத்தூள் – அரை டீஸ்பூன், கறுப்பு மிளகுத்தூள் – கால் டீஸ்பூன், சில்லி டொமேட்டோ கெட்சப் – ஒரு டீஸ்பூன், எலுமிச்சைச் சாறு – அரை டீஸ்பூன், பூண்டு, வெண்ணெய், ஆலிவ் எண்ணெய் – தலா ஒரு டீஸ்பூன், உப்பு – அரை டீஸ்பூன்.

மேல் மாவு செய்ய: 
மைதா மாவு – ஒரு கப், நெய் – ஒரு டீஸ்பூன், சர்க்கரை – அரை டீஸ்பூன், உப்பு - அரை டீஸ்பூன், தண்ணீர் - அரை கப்.

செய்முறை: வாணலியில் ஸ்டஃபிங் செய்யக் கொடுத்துள்ள பொருள்களை ஒவ்வொன்றாகச் சேர்த்து, வதக்கவும். முக்கால் பாகம் வெந்த பிறகு இறக்கி ஆறவிடவும். மைதா மாவுடன் நெய், சர்க்கரை,  உப்பு சேர்த்துக் கலக்கவும். இதனுடன் சிறிது சிறிதாக தண்ணீரை ஊற்றி, கெட்டியாகப் பிசைந்து 10 நிமிடங்கள் ஊறவைக்கவும். பிறகு, மாவைச்  சிறிய பூரிகளாகத் திரட்டி, நடுவே வதக்கிய கலவை சிறிதளவு வைத்து, ஓரங்களை மடித்து சிலிண்டர் வடிவில் உருட்டவும்.  வாணலியில் எண்ணெய்யைக் காயவிட்டு, உருட்டி வைத்தவற்றைப் போட்டு பொன்னிறமாகப்  பொரித்தெடுக்கவும். ஸ்பிரிங் ரோல்ஸ் ரெடி. இவற்றை இரண்டாக நறுக்கி கெட்சப் உடன் பரிமாறவும்.

பாலக்  டோக்ளா    

30 வகை கீரை ரெசிப்பி

தேவையானவை: பாலக்கீரை - அரை கட்டு (பொடியாக நறுக்கவும்), இட்லி மாவு – ஒரு கப், கடலைப்பருப்பு – 100 கிராம், தயிர் – ஒரு கப், பச்சை மிளகாய் – 2, தோல் சீவிய இஞ்சி – ஒரு இன்ச் துண்டு, சமையல் சோடா – கால் டீஸ்பூன், கடுகு, உளுத்தம்பருப்பு – தலா அரை டீஸ்பூன், கறிவேப்பிலை - சிறிதளவு, காய்ந்த மிளகாய் – 2, எண்ணெய், உப்பு – தேவையான அளவு.

செய்முறை: கடலைப்பருப்பை ஊறவைக்கவும். பாலக்கீரையைக் கொதிக்கும் நீரில் போட்டு ஒரு நிமிடம் கழித்து எடுத்து வடிகட்டவும். இதனுடன் பச்சை மிளகாய், இஞ்சி சேர்த்து  அரைத்து எடுக்கவும். கடலைப்பருப்பைத் தனியாக அரைத்து எடுக்கவும். பாத்திரத்தில் இட்லி மாவு, அரைத்த கடலைப்பருப்பு, அரைத்த கீரை கலவை, உப்பு, சமையல் சோடா, தயிர் சேர்த்துக் கலக்கவும். இந்த மாவை பெரிய தட்டில் ஊற்றி 10 நிமிடங்கள் ஆவியில் வேகவைத்து எடுக்கவும். ஆறிய பிறகு  விரும்பிய வடிவில் துண்டுகளாக்கவும். இதுதான் டோக்ளா. வாணலியில் சிறிதளவு எண்ணெய்விட்டு கடுகு, உளுத்தம்பருப்பு, கறிவேப்பிலை, காய்ந்த மிளகாய் தாளித்து, டோக்ளா மேலே பரவலாக ஊற்றவும். விருப்பமான சட்னியுடன் பரிமாறவும்.

பாலக் பணியாரம்    

30 வகை கீரை ரெசிப்பி

தேவையானவை: இட்லி மாவு – ஒரு கப், பாலக்கீரை – அரை கட்டு (பொடியாக நறுக்கவும்), முந்திரி – 6 (பொடியாக நறுக்கவும்), வெங்காயம் – ஒன்று (பொடியாக நறுக்கவும்), பச்சை மிளகாய் – 2 (பொடியாக நறுக்கவும்), கறிவேப்பிலை – சிறிதளவு, தேங்காய்த் துருவல் – 2 டேபிள்ஸ்பூன், எண்ணெய், உப்பு – தேவையான அளவு.

செய்முறை: வாணலியில் ஒரு டேபிள்ஸ்பூன் எண்ணெய்விட்டு முந்திரியை வறுக்கவும். இதனுடன் வெங்காயம், பச்சை மிளகாய், கறிவேப்பிலை சேர்த்து வதக்கவும். பிறகு, பாலக்கீரை, தேங்காய்த் துருவல், உப்பு சேர்த்து 5 நிமிடங்கள் வதக்கி இறக்கவும். இந்தக் கலவையை இட்லி மாவுடன் சேர்த்துக் கலக்கவும். பணியாரக்கல்லைக் காயவைத்து, அடுப்பை சிறு தீயில் வைத்து, குழிகளில் சிறிதளவு எண்ணெய் விட்டு, மாவைப் பணியாரக் குழிகளில் ஊற்றி, மூடி போட்டு வேகவிடவும். ஒருபக்கம் வெந்ததும் திருப்பிப் போட்டு, மீண்டும் சிறிதளவு எண்ணெய்விட்டு வேகவிட்டு எடுக்கவும்.

பொன்னாங்கண்ணிக் கீரை பக்கோடா     

30 வகை கீரை ரெசிப்பி

தேவையானவை: பொன்னாங்கண்ணிக் கீரை – ஒரு கட்டு, வெங்காயம் – 3 (நீளவாக்கில் நறுக்கவும்),  பூண்டு – 3 பல் (தட்டவும்), தோல் சீவி, துருவிய இஞ்சி – ஒரு டீஸ்பூன், பச்சை மிளகாய் – ஒன்று (பொடியாக நறுக்கவும்), கடலை மாவு – 175 கிராம், வறுத்த ரவை – 25 கிராம், கறிவேப்பிலை - சிறிதளவு, முந்திரி – 5 (பொடியாக நறுக்கவும்), எண்ணெய், உப்பு –  தேவையான அளவு.

செய்முறை: பொன்னாங்கண்ணிக் கீரையை ஆய்ந்து, கழுவி வெங்காயம், பூண்டு, இஞ்சி, பச்சை மிளகாய், கறிவேப்பிலை, உப்பு, முந்திரி, ஒரு டீஸ்பூன் எண்ணெய் சேர்த்துப் பிசிறவும். இதனுடன் கடலை மாவு, ரவை சேர்த்துக் கலக்கவும். பிறகு, சிறிதளவு தண்ணீர் தெளித்து கெட்டியாகப் பிசையவும். வாணலியில் எண்ணெய் யைக் காயவைத்து, கீரைக் கலவையைச் சிறிது சிறிதாக கிள்ளிப் போட்டு பொன்னிறமாக பொரித்தெடுக்கவும்.

தண்டுக்கீரை புளி கடைசல்      

30 வகை கீரை ரெசிப்பி

தேவையானவை: தண்டுக்கீரை – ஒரு கட்டு (பொடியாக நறுக்கவும்), வெங்காயம், தக்காளி, பச்சை மிளகாய் – தலா 2 (பொடியாக நறுக்கவும்), பூண்டு – 2 பல், புளி – எலுமிச்சை அளவு, தாளிப்பு வடகம் - சிறிதளவு, காய்ந்த மிளகாய் - 2, கறிவேப்பிலை – சிறிதளவு, எண்ணெய் - சிறிதளவு, உப்பு – தேவையான அளவு.

செய்முறை:  புளியை ஊறவைத்து கரைத்து வடிகட்டவும். கழுவிய தண்டுக்கீரை, வெங்காயம் தக்காளி, பச்சை மிளகாய், பூண்டு, புளிக்கரைசல், உப்பு ஆகியவற்றை குக்கரில் சேர்த்து, தேவையான அளவு தண்ணீர் ஊற்றி மூடி, 2 விசில் விட்டு இறக்கவும். கீரைக் கலவை ஆறிய பின்பு  மிக்ஸியில்  விழுதாக  அரைத்து மீண்டும் கொதிக்கவிடவும். வாணலியில் சிறிதளவு  எண்ணெய்விட்டு சூடாக்கி வடகம், காய்ந்த மிளகாய், கறிவேப்பிலை தாளித்து, கீரைக் கலவையில் சேர்த்து, ஒரு கொதிவிட்டு இறக்கவும். சூப்பர் சுவையில் தண்டுக்கீரை புளி கடைசல் ரெடி.

தேங்காய்ப்பால் கீரை     

30 வகை கீரை ரெசிப்பி

தேவையானவை: தேங்காய் – ஒன்று, சிறுகீரை - ஒரு கட்டு (பொடியாக நறுக்கவும்), தோலுரித்த சின்ன வெங்காயம் – 20 (இரண்டாக நறுக்கவும்), மஞ்சள்தூள் - அரை டீஸ்பூன், பச்சை மிளகாய் – 3 (பொடியாக நறுக்கவும்), சீரகத்தூள் - ஒரு டீஸ்பூன், எண்ணெய், உப்பு – தேவையான அளவு.

செய்முறை: தேங்காயைத் துருவி பால் எடுக்கவும். கால் கப் பாலை தனியாக எடுத்துவைக்கவும். குக்கரில் எண்ணெய்விட்டு, சின்ன வெங்காயம் சேர்த்து வதக்கவும். இதனுடன் கீரை, மீதமுள்ள தேங்காய்ப்பால், பச்சை மிளகாய், சீரகத்தூள், உப்பு, மஞ்சள்தூள் சேர்த்து  மூடி, 4 விசில்விட்டு இறக்கவும். ஆறிய பின் குக்கரைத் திறந்து, தனியாக எடுத்துவைத்த தேங்காய்ப்பாலை ஊற்றி, அடுப்பை சிறு தீயில் வைத்து, ஒரு கொதிவிட்டு இறக்கவும்.

பாலக் பாஸ்தா     

30 வகை கீரை ரெசிப்பி

தேவையானவை: பாஸ்தா – 300 கிராம், பாலக்கீரை - ஒரு கட்டு (பொடியாக நறுக்கவும்), மிளகாய்த்தூள் – அரை டீஸ்பூன், மிளகுத்தூள் – கால் டீஸ்பூன், சர்க்கரை – ஒரு சிட்டிகை, வெங்காயம் – ஒன்று (பொடியாக நறுக்கவும்), இஞ்சி - பூண்டு விழுது –  ஒரு டீஸ்பூன், பச்சை  மிளகாய் – ஒன்று, எண்ணெய், வெண்ணெய் – தலா ஒரு டீஸ்பூன், உப்பு – தேவையான அளவு.

செய்முறை: குக்கரில் ஒரு டீஸ்பூன் எண்ணெய் விட்டு, பாஸ்தாவைச் சேர்த்து, அது மூழ்கும் அளவு தண்ணீர்விட்டு, உப்பு போட்டு, குக்கரை மூடி, 5 விசில் விட்டு இறக்கி, நீரை வடியவிடவும். கீரையுடன் பச்சை மிளகாய் சேர்த்து விழுதாக அரைக்கவும். வாணலியில் எண்ணெய், வெண்ணெய் சேர்த்து சூடாக்கி, இஞ்சி - பூண்டு விழுது, வெங்காயம், அரைத்த கீரை, மிளகாய்த்தூள், மிளகுத்தூள், உப்பு, சர்க்கரை சேர்த்து 5 நிமிடங்கள் கொதிக்கவிடவும். இதனுடன் வேகவைத்த பாஸ்தாவைச் சேர்த்து மீண்டும் 5 நிமிடங்கள் கொதிக்கவிட்டு இறக்கவும். சுவையான, சத்தான பாலக்கீரை பாஸ்தா ரெடி.

மூங் தால் - பாலக் கபாப்      

30 வகை கீரை ரெசிப்பி

தேவையானவை: வேகவைத்த பச்சைப் பயறு - அரை கப், பொடியாக நறுக்கிய பாலக்கீரை - ஒரு கப், நறுக்கிய இஞ்சி, பூண்டு – தலா ஒரு டேபிள்ஸ்பூன், மிளகாய்த்தூள், ஆம்சூர் பவுடர் (மாங்காய்த்தூள்) – தலா அரை டீஸ்பூன், கரம் மசாலாத்தூள் – கால் டீஸ்பூன், வெங்காயம், பச்சை மிளகாய் - தலா ஒன்று (பொடியாக நறுக்கவும்), நறுக்கிய கொத்தமல்லித்தழை - 2 டேபிள்ஸ்பூன், பிரெட் கிரம்ஸ் - அரை கப், பொட்டுக்கடலை மாவு – ஒரு டேபிள்ஸ்பூன், எண்ணெய், உப்பு –  தேவையான அளவு.

செய்முறை: பச்சைப் பயறுடன் பாலக்கீரை, உப்பு, மிளகாய்த்தூள், ஆம்சூர் பவுடர், கரம் மசாலாத்தூள் சேர்த்துப் பிசிறவும். இதனுடன் பச்சை மிளகாய், இஞ்சி, பூண்டு, வெங்காயம், பிரெட் கிரம்ஸ், கொத்த மல்லித்தழை, பொட்டுக்கடலை மாவு சேர்த்து நன்கு பிசிறி வடைகள் போல் தட்டி வைக்கவும். தோசைக் கல்லைக் காயவைத்து எண்ணெய்விட்டு தட்டிய வடைகளை போட்டு பொரித்து எடுக்கவும்.

குறிப்பு: இதை கபாப் போல் நீளமாக உருட்டி கிரில்லில் சுட்டும் எடுக்கலாம். கபாப்களை சாண்ட்விச் போல பிரெட்டில் வைத்தும் சுவைக்கலாம்.

சிவப்பு பாலக் கீரை சோம்பு பொரியல்     

30 வகை கீரை ரெசிப்பி

தேவையானவை: சிவப்பு பாலக்கீரை - ஒரு கட்டு (பொடியாக நறுக்கவும்), சோம்பு – ஒரு டீஸ்பூன்,  காய்ந்த மிளகாய் - 2, உளுத்தம்பருப்பு – ஒரு டீஸ்பூன், பூண்டு – 2 பல் (தட்ட வும்), பொடியாக நறுக்கிய வெங்காயம் – அரை கப், தேங்காய்த் துருவல் – 2 டேபிள்ஸ்பூன், எண்ணெய் – 2 டீஸ்பூன், உப்பு – தேவையான அளவு.

செய்முறை: வாணலியில் எண்ணெய்விட்டு சோம்பு, உளுத்தம் பருப்பு, காய்ந்த மிளகாய், பூண்டு சேர்த்து வதக்கவும். இதனுடன் வெங் காயம், கீரை, உப்பு சேர்த்து வதக்கி, தண்ணீர் தெளித்து மூடி, அடுப்பை சிறு தீயில் வைத்து, 5 நிமிடங்கள் வேகவிடவும். பிறகு, தேங்காய்த் துருவலை சேர்த்து வதக்கி இறக்கவும்

பாலக் கீரை புளி கடைசல்       

30 வகை கீரை ரெசிப்பி

தேவையானவை: பாலக்கீரை - அரை கட்டு, வேகவைத்த துவரம்பருப்பு – கால் கப், புளிக்கரைசல் - ஒரு டேபிள்ஸ்பூன், தோலுரித்த சின்ன வெங்காயம் – 5, தக்காளி – பாதியளவு (பொடியாக நறுக்கவும்), பச்சை மிளகாய் – ஒன்று (சிறியது), மிளகாய்த்தூள், தனியாத்தூள் (மல்லித்தூள்), சீரகத்தூள் – தலா கால் டீஸ்பூன், நெய் – 2 டீஸ்பூன், கடுகு, உளுத்தம்பருப்பு – தலா அரை டீஸ்பூன், கறிவேப்பிலை – சிறிதளவு, எண்ணெய் – ஒரு டீஸ்பூன், உப்பு – தேவையான அளவு.

செய்முறை: வாணலியில் எண்ணெய்விட்டு வெங்காயம், தக்காளி, பச்சை மிளகாய், கீரை சேர்த்து வதக்கி ஆறவைத்து விழுதாக அரைக்கவும். இதனுடன் புளிக்கரைசல், வேகவைத்த துவரம்பருப்பு, மிளகாய்த்தூள், தனியாத்தூள், சீரகத்தூள், உப்பு சேர்த்துக் கொதிக்கவிடவும். மற்றொரு வாணலியில் நெய் விட்டு உருக்கி கடுகு, உளுத்தம்பருப்பு, கறிவேப்பிலை தாளித்து, கொதிக்கும் கீரையுடன் சேர்த்து, ஒரு கொதிவிட்டு இறக்கவும்.

பாலக் பட்டாணி சூப்   

30 வகை கீரை ரெசிப்பி

தேவையானவை: பாலக்கீரை – அரை கட்டு (பொடியாக நறுக்கவும்), பச்சைப் பட்டாணி – 25 கிராம், வெங்காயம் – ஒன்று (பொடியாக நறுக்கவும்), பூண்டு – ஒரு பல், வெஜிடபிள் ஸ்டாக் பவுடர் – கால் டீஸ்பூன், சோள மாவு (கார்ன் ஃப்ளார்) – ஒரு டேபிள்ஸ்பூன், ஆலிவ் எண்ணெய் – ஒரு டீஸ்பூன், பொரித்த பிரெட் துண்டுகள், மிளகுத்தூள், உப்பு - தேவையான அளவு.

செய்முறை: குக்கரில் ஆலிவ் எண்ணெய் ஊற்றி வெங்காயம், பூண்டு, கீரை, பச்சைப் பட்டாணி சேர்த்து வதக்கி, 2 கப் தண்ணீர், உப்பு, வெஜிடபிள் ஸ்டாக் பவுடர் சேர்த்து மூடி இரண்டு விசில் விட்டு இறக்கவும். ஆறிய பின் விழுதாக அரைக்கவும். ஒரு கப் தண்ணீரில் சோள மாவு சேர்த்து கரைக்கவும். இதனுடன் அரைத்த விழுது சேர்த்துக் கொதிக்கவிட்டு இறக்கவும். மேலே மிளகுத்தூள் தூவி, பொரித்த பிரெட் துண்டுகள் சேர்த்து சூடாகப் பரிமாறவும்.

சிறுகீரை வெஜ்ஜி கிரேவி    

30 வகை கீரை ரெசிப்பி

தேவையானவை: சிறுகீரை – ஒரு கட்டு (பொடியாக நறுக்கவும்), வெங்காயம், தக்காளி – தலா 2 (பொடியாக நறுக்கவும்), இஞ்சி - பூண்டு விழுது – அரை டீஸ்பூன், மிளகாய்த்தூள் - ஒரு டீஸ்பூன், மஞ்சள்தூள் – ஒரு சிட்டிகை, பச்சை மிளகாய் – ஒன்று, பொடியாக நறுக்கிய முட்டைகோஸ், கேரட், பீன்ஸ்  கலவை - அரை கப், தேங்காய் – 2 பத்தை, கடுகு – அரை டீஸ்பூன், காய்ந்த மிளகாய் – 3, எண்ணெய், நெய் – தலா ஒரு டீஸ்பூன், உப்பு - தேவையான அளவு.

செய்முறை:
தேங்காய் பத்தையை விழுதாக அரைத்து எடுக்கவும். வாணலியில் எண்ணெய்விட்டு  வெங்காயம், இஞ்சி - பூண்டு விழுது, தக்காளி, பச்சை மிளகாய், மிளகாய்த்தூள், உப்பு, மஞ்சள்தூள்  சேர்த்து நன்கு வதக்கவும். இதனுடன் கீரை, முட்டைகோஸ், கேரட், பீன்ஸ் சேர்த்து வதக்கி, சிறிதளவு தண்ணீர்விட்டு, அடுப்பை சிறு தீயில் வைத்து, வேகவிடவும். பிறகு, அரைத்த தேங்காய் விழுதைச் சேர்த்து கொதிக்க வைக்கவும். மற்றொரு வாணலியில் நெய்விட்டு கடுகு, காய்ந்த மிளகாய் தாளித்து, கொதிக்கும் கீரை - வெஜ் கிரேவியில் சேர்த்து ஒரு கொதிவிட்டு இறக்கவும்.

பாலக் - வெண்டைக்காய் மோர்க்குழம்பு     

30 வகை கீரை ரெசிப்பி

தேவையானவை: கடலைப்பருப்பு, அரிசி –  தலா 2 டீஸ்பூன், நறுக்கிய பாலக்கீரை – அரை கப், பொடியாக நறுக்கிய தேங்காய்ப் பல் – 2 டேபிள்ஸ்பூன், பச்சை மிளகாய் – 2 (பொடியாக நறுக்கவும்), சீரகம் – ஒரு டீஸ்பூன், வெண்டைக்காய் – 100 கிராம் (ஒரு இன்ச் துண்டுகளாக நறுக்கவும்), மோர் – ஒரு கப், தயிர் – கால் கப், மஞ்சள்தூள் – கால் டீஸ்பூன், எண்ணெய்  – ஒரு  டீஸ்பூன், உப்பு - தேவையான அளவு.

தாளிக்க: எண்ணெய் – ஒரு டீஸ்பூன், கடுகு, உளுத்தம்பருப்பு, சீரகம் – தலா அரை டீஸ்பூன், கறிவேப்பிலை – சிறிதளவு.

செய்முறை: தயிருடன் சிறிதளவு தண்ணீர் சேர்த்துக் கடையவும். கடலைப்பருப்புடன் அரிசி சேர்த்து 15 நிமிடம் ஊறவைத்து அரைக்கவும். வாணலியில் எண்ணெய்விட்டு பாலக்கீரை, பச்சை மிளகாய், தேங்காய், சீரகம் சேர்த்து வதக்கி ஆறவைத்து மிக்ஸியில் விழுதாக அரைக்கவும். அரைத்த விழுதுடன் ஒன்றரை கப் தண்ணீர், அரைத்த அரிசி - பருப்பு, உப்பு, மஞ்சள்தூள் சேர்த்து 7 நிமிடங்கள் கொதிக்கவிடவும். இதனுடன் மோர், தயிர், கறிவேப்பிலை சேர்த்து இரண்டு நிமிடங்கள் சூடாக்கி இறக்கவும். (அதிக நேரம் கொதிக்கவிட வேண்டாம்). மற்றொரு வாணலியில் ஒரு டீஸ்பூன் எண்ணெய்விட்டு வெண்டைக்காய், உப்பு சேர்த்து வதக்கி, குழம்புடன் சேர்க்கவும். அதே வாணலியில் தாளிக்கக் கொடுத்துள்ள பொருள்களைச் சேர்த்து தாளித்து குழம்புடன் சேர்த்துப் பரிமாறவும்.

பாலக் ரைஸ் டிக்கி     

30 வகை கீரை ரெசிப்பி

தேவையானவை: பாலக்கீரை - ஒரு கட்டு (பொடியாக நறுக்கவும்), கடலை மாவு – கால் கப், வேகவைத்த சாதம் – அரை கப், உருளைக்கிழங்கு – ஒன்று (வேகவைக்கவும்), பொடியாக நறுக்கிய கேரட் – ஒரு டேபிள்ஸ்பூன், தோல் சீவி, துருவிய இஞ்சி - ஒரு டேபிள்ஸ்பூன், பச்சை மிளகாய் – 2 (பொடியாக நறுக்க வும்), எண்ணெய், உப்பு – தேவை யான அளவு.

செய்முறை: சாதத்துடன் பாலக் கீரை, உருளைக்கிழங்கு, கேரட், பச்சை மிளகாய், இஞ்சி, கடலை மாவு, உப்பு சேர்த்துப் பிசையவும். வாணலியில் எண்ணெயைக் காய விட்டு, மாவை சிறிய வடைகளாகத் தட்டிப் போட்டு, பொன்னிறமாகப் பொரித்தெடுக்கவும்.

பாலக் - பருப்பு பொரியல்    

30 வகை கீரை ரெசிப்பி

தேவையானவை: பாலக்கீரை - ஒரு கட்டு (பொடியாக நறுக்கவும்), துவரம்பருப்பு - கால் கப், மஞ்சள்தூள் – ஒரு சிட்டிகை, கடுகு - கால் டீஸ்பூன், காய்ந்த மிளகாய் - 3, தோலுரித்த சின்ன வெங்காயம் - 10, இஞ்சி - பூண்டு விழுது - அரை டீஸ்பூன், கறிவேப்பிலை - சிறிதளவு, தக்காளி – ஒன்று (பொடியாக நறுக்கவும்), நெய் – ஒரு டீஸ்பூன், எண்ணெய் - 2 டீஸ்பூன், உப்பு - அரை டீஸ்பூன்.

செய்முறை: பருப்புடன் மஞ்சள்தூள், நெய் சேர்த்து வேகவைத்து மசிக்கவும்.  வாணலியில் எண்ணெய்விட்டு கடுகு, காய்ந்த மிளகாய் தாளித்து, வெங்காயம், கறிவேப்பிலை, இஞ்சி – பூண்டு விழுது சேர்த்துக் கிளறவும். இதனுடன் தக்காளி, பாலக்கீரை, உப்பு சேர்த்து நன்கு வதக்கவும். பிறகு, மசித்த பருப்பைச் சேர்த்து நன்கு கிளறி இறக்கவும்.

முடக்கத்தான்கீரை சப்பாத்தி      

30 வகை கீரை ரெசிப்பி

தேவையானவை: முடக்கத்தான் கீரை - ஒரு சிறிய கட்டு (பொடியாக நறுக்கவும்), கோதுமை மாவு – ஒரு கப், சத்து மாவு – கால் கப், சர்க்கரை – 3 டீஸ்பூன், எண்ணெய், உப்பு – தேவையான அளவு.

செய்முறை: கோதுமை மாவு, சத்து மாவு, சர்க்கரை, உப்பு ஆகியவற்றைச் சேர்த்துக் கலக்கவும். இதனுடன்  முடக்கத்தான்கீரை, எண்ணெய் சேர்த்துக் கலந்து, சூடான தண்ணீரைக் கொஞ்சம் கொஞ்சமாக தெளித்து, மாவை நன்கு பிசைந்து, 10 நிமிடங்கள் ஊறவைக்கவும். பிறகு, மாவை சிறிய உருண்டைகளாக்கி திரட்டி, சதுர வடிவமாக மடித்து மீண்டும் திரட்டவும். தோசைக்கல்லைக் காயவைத்து திரட்டிய சப்பாத்திகளைப் போட்டு, சுற்றிலும் எண்ணெய்விட்டு, இருபுறமும் வேகவைத்து எடுக்கவும்.

கார்லிக் - பார்சிலி சூப்    

30 வகை கீரை ரெசிப்பி

தேவையானவை:  பூண்டு - 12 பல், தோலுரித்த சின்ன வெங்காயம் – 10 (பொடியாக நறுக்கவும்), கொத்தமல்லித்தழை, பார்சிலி, சோம்புக் கீரை – சிறிதளவு, பச்சை மிளகாய் – ஒன்று (பொடியாக நறுக்கவும்), தேங்காய்ப்பால் – 2  கப், வெண்ணெய் – ஒரு டேபிள்ஸ்பூன், உப்பு, மிளகுத்தூள் - தேவையான அளவு.

செய்முறை:
பூண்டை சுட்டுப் பொடியாக நறுக்கவும். பாத்திரத்தில் வெண்ணெய்விட்டு உருக்கி, பச்சை மிளகாய், பூண்டு, வெங்காயம் சேர்த்து வதக்கவும். இதனுடன் கொத்த மல்லித்தழை, பார்சிலி, சோம்புக் கீரை, தேவையான அளவு தண்ணீர் சேர்த்து வேகவைத்து இறக்கவும். ஆறிய பின்  மிக்ஸியில் விழுதாக அரைத்து தேங்காய்ப்பால், உப்பு, மிளகுத்தூள் சேர்த்து, ஒரு கொதிவிட்டு இறக்கவும்.

ஸ்பைசி பஞ்சாபி மலாய் பாலக்    

30 வகை கீரை ரெசிப்பி

தேவையானவை: பொடியாக நறுக்கிய பாலக்கீரை – 2 கப், கடலைப்பருப்பு – 100 கிராம், மஞ்சள்தூள் – அரை டீஸ்பூன், தோல் சீவி, பொடியாக நறுக்கிய இஞ்சி – அரை டீஸ்பூன், பச்சை மிளகாய் – ஒன்று (பொடியாக நறுக்கவும்), வெங்காயம் – ஒன்று (பொடியாக நறுக்கவும்), மிளகாய்த்தூள் – அரை டீஸ்பூன், தால் மசாலாத்தூள் – 2 டீஸ்பூன், கரம் மசாலாத்தூள் – கால் டீஸ்பூன், எண்ணெய், நெய் (சேர்த்து) – 2 டீஸ்பூன், உப்பு – தேவையான அளவு.

செய்முறை: கடலைப்பருப்புடன் இஞ்சி, பச்சை மிளகாய், கால் டீஸ்பூன் மஞ்சள்தூள் சேர்த்து வேகவைத்து லேசாக மசிக்கவும். வாணலியில் எண்ணெய் - நெய் விட்டு வெங்காயம், கீரை சேர்த்து வதக்கவும். இதனுடன் மிளகாய்த்தூள், தால் மசாலா, உப்பு, கால் டீஸ்பூன் மஞ்சள்தூள் சேர்த்து வதக்கி, நன்கு வேகவைக்கவும். பின்னர் வேகவைத்த பருப்பு, கரம் மசாலாத்தூள் சேர்த்துக் கலந்து கொதிக்கவிட்டு இறக்கவும்.

பாலக் ஹமூஸ்     

30 வகை கீரை ரெசிப்பி

தேவையானவை: பாலக்கீரை – முக்கால் கட்டு (பொடியாக நறுக்கவும்), வெங்காயம் – ஒன்று (பொடியாக நறுக்கவும்), வெள்ளை மிளகுத்தூள் - அரை டீஸ்பூன், வேகவைத்த கொண்டைக்கடலை - 25 கிராம், எலுமிச்சைச் சாறு - ஒரு டீஸ்பூன், வறுத்த வெள்ளை எள் – ஒரு டேபிள்ஸ்பூன், பூண்டு – 3 பல், உப்பு, ஆலிவ் எண்ணெய் – தேவையான அளவு.

செய்முறை: பாத்திரத்தில் பாலக்கீரை, சிறிதளவு தண்ணீர், பூண்டு, வெங்காயம் சேர்த்து ஒரு கொதிவிட்டு இறக்கி வடிகட்டவும். ஆறிய பின் இதனுடன் பாதி கொண்டைக் கடலை, வெள்ளை எள், உப்பு, எலுமிச்சைச் சாறு சேர்த்து மிக்ஸியில் விழுதாக அரைக்கவும். இதுவே ஹமூஸ். பரிமாறும் தட்டில் ஹமமூஸை ஊற்றி, மேலே ஆலிவ் எண்ணெயைப் பரவலாக ஊற்றி, மீதமுள்ள கொண்டைக்கடலையை சேர்த்து, வெள்ளை மிளகுத்தூள் தூவிப் பரிமாறவும். 

குறிப்பு: இதை கிரில் வகைகள், ஸ்நாக்ஸ் வகைகள், ரொட்டி, சப்பாத்திக்குத் தொட்டுக் கொள்ளலாம். சாண்ட்விச் செய்யும்போது மயோனைஸ் ஸ்ப்ரெட் ஆகவும் பயன்படுத்தலாம்.

பாலக் மினி ரொட்டி      

30 வகை கீரை ரெசிப்பி

தேவையானவை: கோதுமை மாவு – 2  கப், பாலக்கீரை – ஒரு  கட்டு (பொடியாக நறுக்கவும்), சர்க்கரை – ஒரு டீஸ்பூன், தோல் சீவிய இஞ்சி – ஒரு சிறிய துண்டு, பச்சை மிளகாய் – ஒன்று, எண்ணெய், உப்பு – தேவையான அளவு.

செய்முறை: பாலக்கீரையைச் சுடுநீரில் ஒரு நிமிடம் போட்டு எடுத்து நீரை வடியவிடவும். இதனுடன் இஞ்சி, பச்சை மிளகாய், சிறிதளவு தண்ணீர் சேர்த்து விழுதாக அரைக்கவும். கோதுமை மாவுடன் அரைத்த கீரை, சர்க்கரை, உப்பு, சிறிதளவு எண்ணெய், சூடான தண்ணீர் சேர்த்து நன்கு பிசைந்து 5 நிமிடங்கள் ஊறவைக்கவும். பிசைந்த மாவை சிறிய உருண்டைகளாக்கி வட்ட வடிவமாக திரட்டி, அதன்மீது சிறிதளவு எண்ணெய் தடவி மடிப்பு கொசுவம் வைத்து, பரோட்டாவுக்கு சுருட்டுவது போல் சுருட்டி, மீண்டும் வட்ட வடிவமாக உள்ளங்கை அளவுக்கு தேய்க்கவும். தோசைக்கல்லைக் காயவைத்து, திரட்டிய ரொட்டிகளைப் போட்டு, சுற்றிலும் எண்ணெய்விட்டு இருபுறமும் வேகவைத்து எடுக்கவும்.

அரைக்கீரை மசூர் தால்    

30 வகை கீரை ரெசிப்பி

தேவையானவை: அரைக்கீரை – ஒரு கட்டு, மைசூர் பருப்பு (மசூர் தால்) – 200 கிராம், வெங்காயம் – 2 (பொடியாக நறுக்கவும்), தக்காளி – 2 (பொடியாக நறுக்கவும்), பச்சை மிளகாய் – 4 (பொடியாக நறுக்கவும்), மஞ்சள்தூள் – ஒரு சிட்டிகை, சாம்பார் பொடி – ஒரு டீஸ்பூன், கரம் மசாலாத்தூள் – அரை டீஸ்பூன், உப்பு – தேவையான அளவு.

தாளிக்க:  எண்ணெய் – 3 டீஸ்பூன், சீரகம் – அரை டீஸ்பூன், வெங்காயம் – பாதியளவு (பொடியாக நறுக்கவும்), பூண்டு – 4 பல் (பொடியாக நறுக்கவும்).

செய்முறை: கழுவிய பருப்புடன் கீரை, தக்காளி, பச்சை மிளகாய், வெங்காயம், மஞ்சள் தூள், கரம் மசாலாத்தூள், சாம்பார் பொடி, 2 கப் தண்ணீர் சேர்த்து நன்கு வேகவைக்கவும். வாணலியில் எண்ணெய்விட்டு சீரகம் தாளித்து பூண்டு, நறுக்கிய வெங்காயம் சேர்த்து வதக்கி, வேகவைத்த கீரையில் சேர்க்கவும்.

பாலக்கீரை சிறுபருப்பு கடைசல்     

30 வகை கீரை ரெசிப்பி

தேவையானவை: பாலக்கீரை – ஒரு கட்டு (பொடியாக நறுக்கவும்), பாசிப்பருப்பு (சிறுபருப்பு) - கால் கப், தக்காளி – ஒன்று (அரைத்துக்கொள்ளவும்), மிளகாய்த்தூள், தனியாத்தூள் (மல்லித்தூள்), மஞ்சள்தூள், கரம் மசாலாத்தூள் - தலா கால் டீஸ்பூன், தேங்காய்த் துருவல் – கால் கப், உப்பு -  தேவையான அளவு.

தாளிக்க: எண்ணெய் – ஒரு டீஸ்பூன், காய்ந்த மிளகாய் (நீளமானது) – 2, சீரகம், உளுந்து – தலா ஒரு டீஸ்பூன், வெங்காயம் – ஒன்று (பொடியாக நறுக்கவும்), பூண்டு – 2 பல் (தட்டிக்கொள்ளவும்), நெய் – ஒரு டீஸ்பூன்.

செய்முறை: பாசிப்பருப்பை லேசாக வறுத்து ஊற வைக்கவும். குக்கரில் எண்ணெயைக் காயவைத்து தாளிக்க வேண்டியவற்றைத் தாளித்து வெங்காயம், பூண்டு சேர்த்து வதக்கவும். பிறகு அரைத்த தக்காளி, கீரை, மிளகாய்த்தூள், தனியாத்தூள் (மல்லித்தூள்), மஞ்சள்தூள், கரம் மசாலாத்தூள், உப்பு சேர்த்துக் கிளறி, பிறகு ஊறவைத்த பருப்பு, தேங்காய்த் துருவல் சேர்த்து, அரை டம்ளர் தண்ணீர் ஊற்றி குக்கரை மூடி இரண்டு விசில்விட்டு இறக்கவும். ஆவி அடங்கியதும் நெய் சேர்க்கவும். இதை குக்கரில் ஐந்தே நிமிடங்களில் செய்து விடலாம்.

மேத்தி பாலக் குஸ்கா      

30 வகை கீரை ரெசிப்பி

தேவையானவை: பாஸ்மதி அரிசி – 100 கிராம், பாலக் கீரை – கால் கப் (பொடியாக நறுக்கவும்), கஸூரி மேத்தி (உலர்ந்த வெந்தயக்கீரை) – ஒரு டேபிள்ஸ்பூன், வெங்காயம் – ஒன்று (பொடியாக நறுக்கவும்), இஞ்சி - பூண்டு விழுது – ஒரு டீஸ்பூன், ஊறவைத்த கடலைப்பருப்பு – 25 கிராம், பச்சை மிளகாய் - ஒன்று, எண்ணெய், நெய் (சேர்த்து) – 3 டீஸ்பூன், பட்டை, கிராம்பு, ஏலக்காய், பிரிஞ்சி இலை, அன்னாசிப்பூ – தலா ஒன்று, உப்பு - தேவையான அளவு.

செய்முறை: பாஸ்மதி அரிசியை 20 நிமிடங்கள் ஊறவைக்கவும். குக்கரில் எண்ணெய், நெய்விட்டு பட்டை, கிராம்பு, ஏலக்காய், பிரிஞ்சி இலை, அன்னாசிப்பூ ஆகியவை சேர்த்து கறுகாமல் பொரியவிட்டு, அதில் இஞ்சி - பூண்டு விழுது சேர்த்து வதக்கிய பிறகு, வெங்காயம் சேர்த்து நன்கு வதக்கவும். அதில் ஊறவைத்த கடலைப்பருப்பு, பாலக்கீரை, கஸூரி மேத்தி சேர்த்து வதக்கி, ஊறவைத்த அரிசியைச் சேர்த்து, ஒரு டம்ளர் தண்ணீர் விட்டு, உப்பு சேர்த்துக் கலக்கி, குக்கரை மூடி  மூன்றாவது விசில் வரும்போது அடுப்பைவிட்டு இறக்கி, ஆவி அடங்கியதும் குக்கரை திறந்து, ஒரு ஸ்பூனால் கிளறிவிட்டு, புதினா சட்னியோடு பரிமாறவும்.

குறிப்பு:
கடலைப்பருப்புக்குப் பதில் பாசிப்பருப்பும் சேர்த்துச் செய்யலாம்.