Published:Updated:

எண்ணெயில்லா ஸ்நாக்ஸ்

ஹசீனா செய்யது, படங்கள்: எல்.ராஜேந்திரன்

பிரீமியம் ஸ்டோரி

மைக்கும் உணவில் கூடுமானவரை எண்ணெய்யை தவிர்ப்பதே நல்லது. ஆனால் விதவிதமாகவும் சுவையாகவும் சமைப்பதென்றால் எண்ணெயில்லாமல் சமைப்பது எப்படி என்கிற குழப்பமே வேண்டாம்.

துளி எண்ணெய் இல்லாமல் ஆரோக்கியமாகவும் ருசியாகவும் சமைக்கக் கற்றுத்தருகிறார் திருநெல்வேலியைச் சேர்ந்த சமையல் கலைஞர் ஹசீனா செய்யது.

எண்ணெயில்லா ஸ்நாக்ஸ்

ஓட்ஸ் பிஸ்கட்

தேவையானவை:
ஓட்ஸ், கார்ன்ஃப்ளேக்ஸ் - தலா ஒரு கப்
ஓட்ஸ் - கால் கப்
(மாவு போன்று திரிக்கவும்)
பேக்கிங் பவுடர் - அரை டீஸ்பூன்
பட்டைத்தூள் - ஒரு டீஸ்பூன்
தேன் - அரை கப்
கிஸ்மிஸ் (உலர் திராட்சை) - கால் கப்

எண்ணெயில்லா ஸ்நாக்ஸ்

செய்முறை:
`அவனை’ 180 டிகிரி செல்ஷியஸில் ப்ரீ ஹீட் செய்யவும். உலர் திராட்சை தவிர மற்ற அனைத்துப் பொருள்களையும் ஒன்றாகச் சேர்த்துக் கலந்து, பின்னர் அதனுடன் உலர் திராட்சை  சேர்த்துக் கலக்கவும். இதுதான் பிஸ்கட் கலவை.

பேக்கிங் ட்ரேயில் பட்டர் பேப்பரை சரிசமமாக விரிக்கவும். பிஸ்கட் கலவையை ஒரு டேபிள்ஸ்பூன் எடுத்து, அரை இன்ச் இடைவெளிகளில் பட்டர் பேப்பர்மீது பிஸ்கட்டுகளாக ஊற்றவும். பின்னர் 15 நிமிடங்கள் `பேக்’ செய்யவும். அவனில் இருந்து வெளியே எடுத்து 10 நிமிடங்கள் ஆறவைத்துச் சுவைக்கவும்.

குறிப்பு: பிஸ்கட்டுகளை ஏர் டைட் கன்டெய்னரில் சேமித்துவைத்து ஐந்து நாள்கள் வரை சாப்பிடலாம்.

ரைஸ் பால்ஸ்

தேவையானவை:
பாஸ்மதி ரவை அரிசி - ஒரு கப்
கோழி இறைச்சி - 2 கப் (எலும்பு நீக்கி, அரைத்தது)
முட்டை வெள்ளைக்கரு - ஒன்று
லைட் சோயா சாஸ் - 3 டேபிள்ஸ்பூன்
சர்க்கரை - ஒரு டீஸ்பூன்
வினிகர் - ஒரு டேபிள்ஸ்பூன்
பச்சை மிளகாய் - 3 (ஒன்றிரண்டாகத் தட்டவும்)
பூண்டு - 2 பல் (தட்டவும்)
நறுக்கிய வெங்காயத்தாள் - 3 டேபிள்ஸ்பூன்
உப்பு - தேவைக்கேற்ப

எண்ணெயில்லா ஸ்நாக்ஸ்

செய்முறை:
பாஸ்மதி அரிசியை நன்றாகக் கழுவி 3 மணி நேரம் ஊறவைக்கவும். அரைத்த கோழி, முட்டை வெள்ளைக்கரு, லைட் சோயா சாஸ், சர்க்கரை, வினிகர், உப்பு, பூண்டு, பச்சை மிளகாய், வெங்காயத்தாள் ஆகியவற்றை ஒன்றாகச் சேர்த்து பிசைந்து வைக்கவும்.

கோழி இறைச்சிக் கலவையைச் சரிசமமாக எலுமிச்சை வடிவில் உருண்டைகளாக உருட்டவும். இந்த உருண்டைகளை ஊறவைத்த அரிசியின் மேல் முழுவதுமாக உருட்டி வைக்கவும். பின்னர் இட்லிப் பாத்திரத்தின் தண்ணீர் ஊற்றிக் கொதிக்கவிட்டு, இட்லித் தட்டு வைத்து, இட்லித் துணியை நனைத்து தட்டின் மேல் வைத்து, தட்டில் உருண்டைகளைக் குழிகளில் வைத்து 30 நிமிடங்கள் வேகவிட்டு எடுக்கவும். தக்காளி சாஸுடன் சூடாகப் பரிமாறவும்.

தஹி பிரெட் டிக்கி

தேவையானவை:
பிரெட் ஸ்லைஸ் - 8
தண்ணீர் - 2 கப்
புளிப்பில்லாத கெட்டித் தயிர் - 5 கப்
சர்க்கரை - 6 டேபிள்ஸ்பூன்
நறுக்கிய கொத்தமல்லித்தழை - சிறிதளவு
பூரணம் செய்ய:
வேகவைத்து, தோல் உரித்த உருளைக்கிழங்கு - 2
மிளகாய்த்தூள் - அரை டீஸ்பூன்
முளைகட்டி வேகவைத்த
பச்சைப் பயறு - 2 டேபிள்ஸ்பூன்
உப்பு - கால் டீஸ்பூன்
இனிப்புச் சட்னி செய்ய:
பேரீச்சம் பழம் - 8
(கொட்டை நீக்கி, நறுக்கவும்)
வெல்லம் - ஒரு டேபிள்ஸ்பூன்
கறுப்பு உப்பு - கால் டீஸ்பூன்
கெட்டியான புளிக்கரைசல் -  2 டேபிள்ஸ்பூன்
மிளகாய்த்தூள் - ஒரு டீஸ்பூன்
சீரகத்தூள் - அரை டீஸ்பூன்
உப்பு - தேவைக்கேற்ப
பச்சை சட்னி செய்ய:
பச்சை மிளகாய் - 10
கொத்தமல்லித்தழை - அரை கப்
புதினா இலை - கால் கப்
சீரகத்தூள் - அரை டீஸ்பூன்
சாட் மசாலாத்தூள் - கால் டீஸ்பூன்
எலுமிச்சைப் பழம் - அரை மூடி
உப்பு - தேவைக்கேற்ப

எண்ணெயில்லா ஸ்நாக்ஸ்

செய்முறை:
பூரணம் செய்யக் கொடுத்துள்ள பொருள்கள் அனைத்தையும் சேர்த்து, உப்பு, காரம் சரிபார்த்துப் பிசையவும். பிசைந்த மாவை எலுமிச்சை அளவு உருண்டைகளாக உருட்டவும். தண்ணீரில் உப்பு சேர்த்துக் கலக்கவும். ஒரு பிரெட் துண்டை 5 விநாடிகள் தண்ணீரில் முக்கி எடுத்து உள்ளங்கையில் வைத்துத் தண்ணீரை வடிக்கவும். நனைந்த பிரெட்டின் மேல் உருளைக்கிழங்கு பூரணத்தை நடுவில் வைத்து உருண்டை பிடித்து கட்லெட் போன்று தட்டி எடுக்கவும். இதேபோல  அனைத்து பிரெட் துண்டுகளையும் உருட்டி, தட்டி ஃப்ரிட்ஜில் வைக்கவும். அடுப்பில் வாணலி வைத்து, இனிப்புச் சட்னி செய்யக் கொடுத்துள்ள பொருள்கள் அனைத்தையும் சேர்த்து, சிறிது தண்ணீர் ஊற்றி 8 நிமிடங்கள் வேகவிடவும். பின்னர் நன்றாக ஆறவைத்து உப்பு, காரம், இனிப்பு, புளிப்பு சரிபார்க்கவும்.

பச்சை சட்னி செய்யக் கொடுத்துள்ள பொருள்களில் எலுமிச்சைச் சாறு தவிர மற்ற அனைத்தையும் மிக்ஸியில் ஒன்றாகச் சேர்த்து அரைக்கவும். அடுப்பில் வாணலியை வைத்து சட்னியைச் சேர்த்துச் சிறிதளவு தண்ணீர்விட்டு கொதிக்கவைத்து இறக்கவும். பச்சை வாசனை நீங்கியதும், அதனுடன் எலுமிச்சைச் சாறு சேர்த்துக் கலக்கி உப்பு, காரம் சரிபார்க்கவும்.

தயிர் மற்றும் சர்க்கரையை ஒன்றாகச் சேர்த்து நன்றாக அடித்து வாய் அகன்ற பாத்திரத்தில் ஊற்றவும். பரிமாறுவதற்குச் சற்று முன்பு பிரெட் உருண்டைகளைத் தயிரில் போட்டு பின்னர் அதன் மேல் இனிப்புச் சட்னி, பச்சை சட்னி சேர்த்து, நறுக்கிய கொத்தமல்லித்தழை தூவிப் பரிமாறவும்.

பனானா கேக்

தேவையானவை:
ரோபஸ்டா வாழைப்பழம் - ஒன்று (200 கிராம்)
முட்டை - 2
சர்க்கரை, மைதா மாவு - தலா 150 கிராம்
பால் - 100 மில்லி
பேக்கிங் பவுடர் - ஒரு டீஸ்பூன்
சோடா உப்பு - அரை டீஸ்பூன்
பாதாம் பருப்பு (வெந்நீரில் போட்டு
எடுத்து, தோல் உரித்துப் பொடியாக நறுக்கியது) - 2 டேபிள்ஸ்பூன்

எண்ணெயில்லா ஸ்நாக்ஸ்

செய்முறை:
முட்டையை பவுலில் உடைத்து ஊற்றி, சர்க்கரையைச் சேர்த்துக் கலந்து எலெக்ட்ரானிக் எக் பீட்டரால் நன்கு அடிக்கவும். மைதா மாவுடன் பேக்கிங் பவுடரையும் சோடா உப்பையும் கலந்துகொள்ளவும். ரோபஸ்டா வாழைப்பழத்தை முள்கரண்டி வைத்து மசித்து, அதனுடன் பால் சேர்த்துக் கலக்கவும். மைதா மாவு கலவையையும், வாழைப்பழம் - பால் கலவையையும் இரண்டு பாகங்களாகப் பிரித்து வைத்துக்கொள்ளவும்.

முதலில் சர்க்கரை - முட்டைக் கரைசலுடன் ஒரு பங்கு மைதா மாவு கலவை நன்றாகக் கலந்து, ஒரு பங்கு வாழைப்பழக் கலவையைச் சேர்க்கவும். இரண்டாவது பங்கு மைதா கலவையுடன், மீதமுள்ள வாழைப்பழக் கலவையைக் கலந்து, பாதம் பருப்பு துண்டுகளைச் சேர்க்கவும். 

கேக் `பேக்’ செய்யும் பாத்திரத்தில் வெண்ணெய் தடவி, கேக் கலவைகளை ஊற்றி, 175 டிகிரி செல்ஷியஸில் ப்ரீ ஹீட் செய்த அவனில் 50-60 நிமிடங்கள் மிடில் `ராக்’கில் வைத்து `பேக்’ செய்து பரிமாறவும்.

அப்பம் பாலிக்

தேவையானவை:
அப்பம் செய்ய...
மைதா மாவு - அரை கப்
பேக்கிங் பவுடர் - ஒரு டீஸ்பூன்
அரிசி மாவு - அரை கப்
முட்டை - ஒன்று
உப்பு - தேவைக்கேற்ப
தேங்காய்ப் பால், தண்ணீர் - தலா அரை கப்
பூரணம் செய்ய...
வறுத்த வேர்க்கடலை - முக்கால் கப் (தோலுரிக்கவும்)
சர்க்கரை - கால் கப்
கிரீம் ஸ்டைல் கார்ன், தேங்காய்த் துருவல் - தலா முக்கால் கப்

எண்ணெயில்லா ஸ்நாக்ஸ்

செய்முறை:
பூரணம் செய்ய கொடுத்துள்ள பொருள்களில் வேர்க்கடலை, கார்னை கொரகொரப்பாக பொடித்துக்கொள்ளவும். அப்பம் செய்ய கொடுக்கப்பட்டுள்ள பொருள்கள் அனைத்தையும் கட்டிவிழாமல் ஒன்றாகக் கலந்து தோசை மாவு பதத்துக்குக் கலக்கி 30 நிமிடங்கள் அப்படியே வைக்கவும். இந்த மாவை நான்ஸ்டிக் தோசைக்கல்லில் தோசை போன்று ஊற்றி மூடியிட்டு வேகவிடவும் (அடுப்பை மிதமான தீயில் வைக்கவும்). முக்கால் வெந்த பின்பு தோசையின் மேல்  சர்க்கரை தூவி, வேர்க்கடலை, கார்ன் தூவி, துருவிய தேங்காய் சேர்த்து, மூடிபோட்டு நன்றாக வேகவிட்டு, பின்னர் தோசையைப் பாதியாக மடித்து எடுத்து சூடாகப் பரிமாறவும்.

இறால் கொழுக்கட்டை

தேவையானவை:
பூரணத்துக்கு...
இறால் - ஒரு கப் (சுத்தம் செய்தது)
வெங்காயம் - 3
(பொடியாக நறுக்கவும்)
பச்சை மிளகாய் - 4
(பொடியாக நறுக்கவும்)
பூண்டு - 6 (பொடியாக நறுக்கவும்)
இஞ்சி - ஒரு இன்ச் துண்டு
(தோல் சீவி, பொடியாக நறுக்கவும்)
நறுக்கிய கொத்தமல்லித்தழை - சிறிதளவு
தக்காளி - 2 (பொடியாக நறுக்கவும்)
நறுக்கிய கறிவேப்பிலை - சிறிதளவு
மிளகாய்த்தூள், மல்லித்தூள் (தனியாத்தூள்), மஞ்சள்தூள் -
தலா ஒரு டீஸ்பூன்
கரம் மசாலாத்தூள் - அரை டீஸ்பூன்
உப்பு - தேவைக்கேற்ப
கொழுக்கட்டை செய்ய...
அரிசி மாவு - 3 கப் (இடியாப்ப மாவு)
சோம்புத்தூள் - ஒரு டீஸ்பூன்
வெந்நீர் - 3 கப்
தேங்காய்த்துருவல் - 2 கப்
உப்பு - தேவைக்கேற்ப

எண்ணெயில்லா ஸ்நாக்ஸ்

செய்முறை:
பூரணம் செய்யக் கொடுத்துள்ள பொருள்களை ஒன்றாகக் கலந்து தண்ணீர் சேர்க்காமல் வேகவிட்டு வதக்கி இறக்கவும். கொழுக்கட்டை செய்யக் கொடுத்துள்ள பொருள்களில் அரிசி மாவு, சோம்புத் தூள், உப்பு ஆகியவற்றை ஒன்றாகக் கலந்து வைக்கவும். பின்னர் சூடான நீரை ஊற்றி நன்றாகக் கையால் பிசைந்து மூடிவைக்கவும்.

கொழுக்கட்டை மாவை எலுமிச்சைப்பழ வடிவில் உருட்டி, பிறகு தட்டையாகத் தட்டி, இறால் மசாலா கலவையை (பூரணம்) நடுவில் வைத்து, கொழுக்கட்டை போன்று உருட்டி, தேங்காய்த் துருவலில் புரட்டி, இட்லி பாத்திரத்தில் வைத்து ஆவியில் வேகவிட்டு எடுக்கவும்.

குறிப்பு:
இறால் மசாலா கலவைக்குப் பதில் காய்கறி மசாலா கலவை கொண்டு சைவமாகவும் இதை சமைக்கலாம்.

மூங் தால் பேல்

தேவையானவை:
பாசிப்பருப்பு, துருவிய கேரட், மாதுளை முத்துகள், பெரிய வெங்காயம்
(நறுக்கியது) - தலா அரை கப்
மாங்காய் (நறுக்கியது) - கால் கப்
பச்சை மிளகாய் - 2 (பொடியாக நறுக்கவும்)
உருளைக்கிழங்கு - ஒன்று
(வேகவைத்து, தோலுரித்து, நறுக்கியது)
நறுக்கிய கொத்தமல்லித்தழை,
புதினா - தலா 2 டேபிள்ஸ்பூன்
எலுமிச்சைச் சாறு - 4 டீஸ்பூன்
சாட் மசாலாத்தூள் - ஒரு டீஸ்பூன்
வெள்ளரிக்காய் - ஒன்று
(பொடியாக நறுக்கவும்)

எண்ணெயில்லா ஸ்நாக்ஸ்

செய்முறை:
பாசிப்பருப்பை தண்ணீரில் அரை மணி நேரம் ஊறவைக்கவும். தண்ணீரில் உப்பு சேர்த்து, கொதிக்கவைத்து அதில் பருப்பைச் சேர்த்து அரை வேக்காடாக வேகவைக்கவும். பிறகு, நீரை வடிகட்டி, பசிப்பருப்பை எடுத்து ஆறவிடவும். மற்ற அனைத்துப் பொருள்களையும் இதனுடன் சேர்த்துக் கலந்து பரிமாறவும்.

தண்ணீர் பக்கோடா

தேவையானவை:
கடலை மாவு - 3 டேபிள்ஸ்பூன்
மஞ்சள்தூள் - அரை டீஸ்பூன்
மிளகாய்த்தூள் - கால் டீஸ்பூன்
உப்பு - தேவைக்கேற்ப
ஓமம் - ஒரு சிட்டிகை
தண்ணீர் - தேவையான அளவு

எண்ணெயில்லா ஸ்நாக்ஸ்

செய்முறை:
தண்ணீரைத் தவிர்த்து மற்ற அனைத்துப் பொருள்களையும் நன்றாகக் கலந்து, சிறிதளவு தண்ணீர் சேர்த்து கெட்டியாக பக்கோடா மாவு பதத்துக்குப் பிசைந்துக்கொள்ளவும். பக்கோடா மாவு பதம் சரியாக உள்ளதா என்று பார்க்க, ஒரு டம்ளரில் தண்ணீர் எடுத்து அதில் மாவைப் போட்டால் மிதக்க வேண்டும். அப்படி மிதந்தால் மாவு தயார். இல்லையென்றால் மாவைச் சிறிது நேரம் ஊறவிடவும்.

பக்கோடா பொரிக்கத் தேவையான அளவு தண்ணீரை வாணலியில் ஊற்றிக் கொதிக்கவிடவும். கொதிக்கும் நீரில் சிறிதளவு உப்பு சேர்க்கவும். மாவை சிறிய பக்கோடாக்கள் போல் கிள்ளி எடுத்து  கொதிக்கும் நீரில் போட்டு
5 முதல் 7 நிமிடங்கள் கழித்து எடுக்கவும். இதை தக்காளி சாஸ், கார சட்னியுடன் பரிமாறலாம்.

வேகவைத்த தயிர் வடை

தேவையானவை:
வடை செய்ய...
உளுந்து, பாசிபருப்பு - தலா 150 கிராம்
பெருங்காயத்தூள் - ஒரு சிட்டிகை
ஃப்ரூட் சால்ட் - அரை டீஸ்பூன்
இஞ்சி - ஒரு துண்டு (தோல் சீவி, துருவவும்)
உப்பு - தேவைக்கேற்ப
தயிருக்கு...
கட்டித் தயிர் - இரண்டரை கப்
முந்திரிப்பருப்பு - 2 டேபிள்ஸ்பூன்
கசகசா - ஒரு டீஸ்பூன்
பச்சை மிளகாய் - பாதியளவு
(பொடியாக நறுக்கவும்)
கேரட் (சிறியது) - ஒன்று (துருவவும்)
நறுக்கிய கொத்தமல்லித்தழை - சிறிதளவு
சீரகத்தூள் - அரை டீஸ்பூன்
மிளகாய்த்தூள் - கால் டீஸ்பூன்
சர்க்கரை - ஒரு டீஸ்பூன்
உப்பு - தேவைக்கேற்ப

எண்ணெயில்லா ஸ்நாக்ஸ்

செய்முறை:
உளுந்தையும் பாசிப்பருப்பையும் நன்றாகக் கழுவி தனித்தனியாக ஊறவைக்கவும். பின்னர் நீரை வடித்து, இரண்டையும் மிக்ஸியில் போட்டு கொரகொரப்பாக அரைத்துக்கொள்ளவும். இதனுடன், உப்பு, இஞ்சித் துருவல், பெருங்காயத்தூள் சேர்த்து நன்கு கலந்துகொள்ளவும். பிறகு, ஃப்ரூட் சால்ட் சேர்த்து நன்கு கலக்கவும். இப்போது மாவு நன்கு பொங்கும். ஒரு கரண்டி மாவை ஈரமான கைகளால் எடுத்து வடை போல் தட்டி, இட்லித்தட்டில் வைக்கவும். மாவு முழுவதையும் இதேபோல் செய்யவும். 10 நிமிடங்கள் ஆவியில் வேகவைத்து எடுக்கவும்.

முந்திரிப்பருப்பு, பச்சை மிளகாய், கசகசாவைச் சேர்த்து மைபோல் அரைத்து எடுக்கவும். இதனுடன் தயிர், சர்க்கரை சேர்த்து நன்கு அடித்துக்கொள்ளவும். பின்னர், அரைத்த முந்திரி விழுதைச் சேர்த்துத் தயிர் வடை பதத்துக்கு ஏற்ப கலந்துகொள்ளவும் (தண்ணீர் தேவைப்பட்டால் சேர்க்கலாம்). உப்பு சரி பார்க்கவும். மசாலா தயிர் தயார்.

வேகவைத்த  வடையைத் தண்ணீரில் போட்டு, பிழிந்து எடுத்து மசாலா தயிரில் போடவும்.  மிளகாய்த்தூள், சீரகத்தூள், துருவிய கேரட், நறுக்கிய கொத்தமல்லித்தழை தூவிப் பரிமாறவும்.

ஆப்பிள் சிப்ஸ்

தேவையானவை:
ஆப்பிள் - 2
பட்டைத்தூள் - ஒரு சிட்டிகை
பொடித்த சர்க்கரை - அரை டீஸ்பூன்

எண்ணெயில்லா ஸ்நாக்ஸ்

செய்முறை:
`அவனை’ 120 டிகிரி செல்ஷியஸில் 10 நிமிடங்கள்  பிரி ஹீட் செய்யவும். ஆப்பிளை நன்றாகக் கழுவி,  மெல்லிய ஸ்லைஸ்களாக வட்ட வடிவில் நறுக்கிக் கொள்ளவும். பின்னர் ஒரு பேக்கிங் ட்ரேயில் பட்டர் பேப்பர் வைத்து, அதில் வட்ட வட்டமாக வெட்டிய ஆப்பிளைப் பரப்பவும்.

ட்ரேயை `அவனில்’ வைத்து 45 நிமிடங்கள் முதல் ஒரு மணி நேரம் வரை `பேக்’ செய்து எடுத்து, ஆறவைத்து, பிறகு பட்டைத்தூள், பொடித்த சர்க்கரை தூவிப் பரிமாறவும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு