Published:Updated:

சிறுதானியச் சிறப்பு ரெசிப்பி

ஒட்டுமொத்த விகடனுக்கும் ஒரே ஷார்ட்கட்

Use App
சிறுதானியச் சிறப்பு ரெசிப்பி
சிறுதானியச் சிறப்பு ரெசிப்பி

படங்கள்: ஜெ.வேங்கடராஜ், தே.அசோக்குமார்

பிரீமியம் ஸ்டோரி
சிறுதானியச் சிறப்பு ரெசிப்பி

ழந்தமிழர் உணவில் பெரும்பங்கு வகித்தவை சிறுதானியங்களே. உடலுக்குத் தேவையான  ஊட்டச்சத்துகளைச் சிறுதானியங்கள் சிறப்பான முறையில் அளிக்கின்றன. வரகு, கேழ்வரகு, கம்பு, தினை ஆகிய சிறுதானியங்களிலிருந்து சுவையான இனிப்பு, காரம், பானம் ஆகியவற்றைத் தயாரிக்கும் ரெசிப்பிகளை அளிக்கிறார், சென்னையைச் சேர்ந்த சமையல் கலைஞர்  ஜெ.கலைவாணி.

சிறுதானியச் சிறப்பு ரெசிப்பி

வரகு காரத் தட்டை

தேவையானவை:

 வரகு அரிசி - 2 கப்
 பொட்டுக்கடலை - அரை கப் 
 கடலைப் பருப்பு - கால் கப்
 தேங்காய் - அரை மூடி (துருவியது)
 மிளகாய்த்தூள் - 2 டீஸ்பூன்
 பெருங்காயத்தூள் - அரை டீஸ்பூன்
 எண்ணெய், உப்பு - தேவையான அளவு 

சிறுதானியச் சிறப்பு ரெசிப்பி

செய்முறை:

வரகு அரிசியை இரண்டு மணி நேரம் ஊறவைத்து உப்பு சேர்த்து, கிரைண்டரில் கெட்டியாக அரைத்துக்கொள்ளவும். கடலைப் பருப்பை அரை மணி நேரம் ஊறவைக்கவும். பொட்டுக்கடலையை மிக்ஸியில் பவுடராக்கிச் சலித்து எடுக்கவும். தேங்காயைத் துருவிக்கொள்ளவும். அரைத்த வரகு அரிசி மாவு, பொட்டுக்கடலை மாவு, ஊறவைத்த கடலைப்பருப்பு, தேங்காய்த் துருவல், மிளகாய்த்தூள், பெருங்காயத்தூள், உப்பு ஆகியவற்றை ஒரு பாத்திரத்தில் சேர்த்து, லேசாக தண்ணீர் தெளித்து நன்றாகப் பிசையவும். அதை சிறு உருண்டைகளாக உருட்டி பிளாஸ்டிக் பேப்பரில் வைத்துத் தட்டைகளாகத் தட்டவும். வாணலியில் எண்ணெயைக் காயவைத்து, தட்டைகளைப் போட்டு பொன்னிறமாகப் பொரித்து எடுக்கவும்.

வேர்க்கடலை - கம்பு சிப்ஸ்

தேவையானவை:

 கம்பு - ஒரு கப்
 வேர்க்கடலை - அரை கப்
 கோதுமை மாவு - அரை கப்
 பொட்டுக்கடலை - கால் கப்
 பொடித்த மிளகு - சீரகம் -
ஒரு டீஸ்பூன்
 வெண்ணெய் - 2 டீஸ்பூன்
 எண்ணெய், உப்பு - தேவையான அளவு 

சிறுதானியச் சிறப்பு ரெசிப்பி

செய்முறை:

கம்பு, வேர்க்கடலையைத் தனித்தனியே வறுத்து மிக்ஸியில் மாவாக்கவும். பொட்டுக் கடலையையும் மாவாக்கிக்கொள்ளவும். இவற்றுடன் பொடித்த மிளகு - சீரகம், கோதுமை மாவு, வெண்ணெய், உப்பு  சேர்த்து, தண்ணீர் தெளித்துச் சப்பாத்தி மாவு பதத்துக்குப் பிசைந்துகொள்ளவும்.

சிறிதளவு மாவை எடுத்து உருண்டையாக்கி, சற்று கனமான சப்பாத்தியாக இட்டு வட்டம், சதுரம் எனத் தேவையான வடிவில் சிப்ஸாகச் செய்து, எண்ணெயில் பொரித்து எடுக்கவும். மாவு முழுவதையும் இதுபோல செய்து கொள்ளவும். சுவையான, கரகரப்பான வேர்க்கடலை - கம்பு சிப்ஸ் ரெடி.

கேழ்வரகு இனிப்புப் புட்டு

தேவையானவை:

 கேழ்வரகு மாவு - ஒரு கப்
 நாட்டுச் சர்க்கரை - முக்கால் கப்
 தேங்காய்த் துருவல் - அரை கப்
 ஏலக்காய் - ஒன்று (தூளாக்கவும்)
 நெய் - 2 டீஸ்பூன்
 தண்ணீர் - கால் டம்ளர்
 உப்பு - அரை டீஸ்பூன்

சிறுதானியச் சிறப்பு ரெசிப்பி

செய்முறை:

கேழ்வரகு மாவுடன் சிறிதளவு உப்பு கலந்த நீரைத் தெளித்துப் பிசையவும். கட்டிகள் இல்லாதவாறு நன்கு உதிர்த்து எடுக்கவும். அனைத்து மாவும் நீருடன் கலந்து மென்மைத் தன்மை வந்ததும், காட்டன் துணியை நனைத்து நன்கு பிழிந்துவிட்டு, அதில் இந்த மாவைக் கொட்டி, மூடி இட்லித் தட்டில் வைத்து, 20 நிமிடங்கள் ஆவியில் வேகவைக்கவும். இதை முதல்நாள் இரவு செய்து வைத்து கொள்ளவும். அடுத்த நாள் காலை மீண்டும் இந்த மாவில் உப்பு கலந்த நீரைத் தெளித்து, உதிர்த்துக் கலந்து, 20 நிமிடத்தில் ஆவியில் வேகவிட்டு எடுக்கவும். அதில் தேங்காய்த் துருவல், நாட்டுச் சர்க்கரை,  ஏலக்காய்த்தூள் சேர்த்துக் கலந்து நெய்விட்டுப் பரிமாறவும்.

குறிப்பு:

முளைகட்டிய கேழ்வரகு மாவாக இருந்தால் கூடுதல் சத்து கிடைக்கும். உடனே சாப்பிட வேண்டும் என்றால் ஒருமுறை ஆவியில் வேகவைத்தால் போதுமானது. இருமுறை வேகவைப்பதால் சுவை அதிகரிப்பதுடன் புட்டு, பூ போன்று மென்மையாகும்.

தினை அப்பம்

தேவையானவை:

 தினை - 2 கப்
 தேங்காய் - அரை  மூடி
 பொடித்த வெல்லம் - ஒரு கப்
 வாழைப்பழம் - ஒன்று
 ஏலக்காய்த்தூள் - ஒரு டீஸ்பூன்
 நெய் - பொரிக்கத் தேவையான அளவு

சிறுதானியச் சிறப்பு ரெசிப்பி

செய்முறை:

தேங்காயைத் துருவி கெட்டியாகப் பால் எடுத்துக்கொள்ளவும். தினை அரிசியை வறுத்து மாவாக அரைக்கவும். வெல்லத்தைக் கரைத்து வடிகட்டி, அதனுடன் தேங்காய்ப்பால், தினை மாவு, ஏலக்காய்த்தூள், வாழைப்பழம் சேர்த்து நன்கு கெட்டியாகக் கரைக்கவும். பணியாரக் கல்லில் நெய்விட்டு ஒவ்வொரு குழியிலும் மாவை ஊற்றி, அடுப்பை மிதமான தீயில் வைத்து, மூடிவைத்து இருபுறமும் வேகவிட்டு எடுக்கவும்.

கம்பு - தேன் லட்டு

தேவையானவை:

 கம்பு மாவு - 1 கப்
 கேழ்வரகு மாவு - கால் கப்
 பொட்டுக்கடலை மாவு - கால் கப்
 தேன் - முக்கால் கப்
 ஏலப்பொடி - அரை டீஸ்பூன்
 நெய் - கால் கப்
 முந்திரி, திராட்சை - தலா 2 டீஸ்பூன் (நறுக்கியது)

சிறுதானியச் சிறப்பு ரெசிப்பி

செய்முறை:

கம்பு மாவு, கேழ்வரகு மாவு, பொட்டுக்கடலை மாவு மூன்றையும் கலந்துகொள்ளவும். வாணலியில் நெய் ஊற்றி முந்திரி, திராட்சை சேர்த்து லேசாக வதங்கியதும் மாவையும் சேர்த்து வறுத்து இறக்கி, சில நிமிடங்கள் ஆறவிடவும். சூடு குறைவதற்குள் மேலும் சிறிது நெய் விட்டு கலந்து, தேனும் ஊற்றி மாவை உருண்டையாகப் பிடித்து வைக்கவும். ஆறவிட்டு டப்பாவில் அடைத்து வைத்துக்கொண்டால் ஒரு வாரம் வரை கெடாது. காலை நேரப் பசிக்கு மிகவும் ஏற்றது.

வரகு இலை அடை

தேவையானவை:

 வரகு மாவு - 1 கப்
 வெல்லம் - 200 கிராம்
 நெய் - 2 டீஸ்பூன்
 துருவிய தேங்காய் - 1 கப்
 ஏலக்காய்த்தூள் - அரை டீஸ்பூன்
 வாழை இலை - 5 சதுரங்கள்
 உப்பு - அரை டீஸ்பூன்

சிறுதானியச் சிறப்பு ரெசிப்பி

செய்முறை:

அகன்ற பாத்திரத்தில் தண்ணீர் ஊற்றி வெல்லத்தைப் போட்டுக் கொதிக்கவிடவும். நன்கு கொதித்தவுடன் வடிவட்டி வைக்கவும். வாணலியில் நெய்விட்டு தேங்காய்த் துருவலைப் போடவும். நன்கு பொன்னிறமாக வறுத்துக் கொள்ளவும். அதில் வெல்லத்தை ஊற்றவும். நன்கு கொதிக்கவிடவும். ஏலக்காய்த்தூள் போட்டு நன்கு சுண்டி வரும்வரை கொதிக்க விட்டு கெட்டி பதம் வந்ததும் நெய்விட்டு பூர்ணமாக்கி இறக்கிவிட்டு ஆறவிடவும்

வாணலியில் ஒரு கப் தண்ணீர் ஊற்றி உப்பு சேர்த்துக் கொதிக்கவிடவும். ஒரு பாத்திரத்தில் வரகு மாவை இட்டு அதில் நெய்விட்டு, கொதிக்கும் நீரை வேண்டிய அளவு ஊற்றி வேகமாகக் கிளறவும். மாவு இறுக்கமாக கொழுக்கட்டைப் பிடிக்கும் பதம் வந்ததும் நெய் தடவிக்கொண்டு, பந்து போல் பிடித்து வைக்கவும். வாழை இலையில் நெய் தடவி வரகு பந்தை வைத்து வட்டமாகத் தட்டிக் கொள்ளவும். அதன் நடுவில் தேங்காய் பூர்ணத்தை வைத்து இலையோடு சேர்த்து மடித்து வைத்துக்கொள்ளவும். இட்லிக் குக்கரில் 20 நிமிடங்கள் வேகவிட்டு எடுக்க வாசமான வரகு இலை அடை ரெடி.

தினை மில்க் ஷேக்

தேவையானவை:

 தினை மாவு - அரை கப்
 தண்ணீர் - ஒரு கப்
 பால் - 1 கப்
 பேரீச்சம் பழம் - 5
 ஏலத்தூள் - அரை டீஸ்பூன்
 சர்க்கரை அல்லது நாட்டுச்
சர்க்கரை - அரை கப்

சிறுதானியச் சிறப்பு ரெசிப்பி

செய்முறை:

ஒரு பாத்திரத்தில் தினை மாவைப் போட்டுத் தண்ணீர் ஊற்றி கலந்து வேகவைக்கவும். நன்கு வெந்ததும் ஆறவிட்டு 20 நிமிடங்கள் ஃப்ரீசரில் வைக்கவும். பின்னர், எடுத்து அதில் ஏலத்தூள், பேரீச்சம் பழம், நாட்டுச் சர்க்கரை, பால், தண்ணீர் சேர்த்து ஜூஸரில் நன்கு அரைத்து ஐஸ் க்யூப் சேர்த்து கண்ணாடி டம்ளரில் ஊற்றி, பரிமாறவும். சுவைகேற்ப சர்க்கரையின் அளவைக் கூட்டிக்கொள்ளவும்.

கேழ்வரகு கொள்ளு கருப்பட்டி பானம்

தேவையானவை:

 கேழ்வரகு - கால் கப்
 கொள்ளு மாவு - கால் கப்
 கருப்பட்டி - 1 கப் (தூளாக்கியது)
 ஏலத்தூள் - அரை டீஸ்பூன்
 தண்ணீர் - தேவையான அளவு

சிறுதானியச் சிறப்பு ரெசிப்பி

செய்முறை:

குக்கரில் கேழ்வரகு மாவு, கொள்ளு மாவு, கருப்பட்டி, ஏலத்தூள் சேர்த்து நன்கு கலந்து தேவையான அளவு தண்ணீர்விட்டு கரைத்து, குக்கரை மூடி 3 முதல் 4 விசில் விட்டு வேகவைத்து எடுக்க, சுவையான கேழ்வரகு - கொள்ளு - கருப்பட்டி பானம் ரெடி

தினை பாயசம்

தேவையானவை:

 தினை மாவு - 1 கப்
 வெல்லம் - 1 கப்
 பாசிப்பருப்பு - கால் கப்
 ஏலத்தூள் - அரை டீஸ்பூன்
 நெய் - 2 டீஸ்பூன்
 முந்திரி, திராட்சை - தலா 1 டீஸ்பூன்

சிறுதானியச் சிறப்பு ரெசிப்பி

செய்முறை:

வெல்லத்தைப் பொடித்து நீரில் கரைத்து அடுப்பில் வைக்கவும். முழுவதும் கரைந்தவுடன் வடிகட்டிக்கொள்ளவும். பாசிப்பருப்பை வேகவிடவும். பருப்பு பாதி வெந்ததும் தினை மாவை வெல்லத்துடன் கலந்து அதில் சேர்க்கவும். இரண்டும் சேர்ந்து வெந்து வரும்போது, ஏலத்தூள் தூவி, நெய்யில் முந்திரி, திராட்சையை வறுத்துச் சேர்க்கவும்.

தினை பூரணக் கொழுக்கட்டை

தேவையானவை:

 தினை மாவு - ஒரு கப்
 பச்சரிசி மாவு - கால் கப்
 உப்பு - கால் டீஸ்பூன்
 சுடுநீர் – தேவையான அளவு

சிறுதானியச் சிறப்பு ரெசிப்பி

பூரணம் செய்ய:

 வறுத்த எள் - ஒரு கைப்பிடி அளவு
 தேங்காய் - அரை மூடி (துருவவும்)
 வெல்லம் – அரை கப்

செய்முறை:

தினை மாவுடன் பச்சரிசி மாவு, உப்பு, சுடுநீர் சேர்த்து நன்கு கொழுக்கட்டை பிடிக்கும் பதத்துக்குப் பிசையவும். எள்ளுடன் தேங்காய்த் துருவல், வெல்லம் சேர்த்து மிக்ஸியில் அரைத்து எடுக்கவும். இதுவே பூரணம். பிசைந்து வைத்த மாவைச் சிறிய உருண்டைகளாக்கித் தட்டி, நடுவே சிறிதளவு பூரணம் வைத்து மூடி, ஆவியில் வேகவைத்து எடுக்கவும்.
 
குறிப்பு: வெல்லத்துடன் சிறிதளவு தண்ணீர்விட்டு, ஒரு கொதிவிட்டு கரைந்தபின் வடிகட்டி, அதிலும் மாவைப் பிசைந்துச் செய்யலாம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு