Published:Updated:

ஐரோப்பியப் பழரச பானங்கள்

த.கதிரவன், படங்கள்: பா.காளிமுத்து

பிரீமியம் ஸ்டோரி

சுவையான பழரசங்கள் நம் தாகத்தைத் தணிப்பதோடு, உடலின் நீர்ச்சத்தையும் இழக்காமல் வைத்திருக்க உதவுகின்றன. அந்தவகையில், சென்னையின் புகழ்பெற்ற கஃபே பிளாசமில் (Cafe Blossom) தயாரிக்கப்படும் ஐரோப்பிய ஸ்பெஷல் பழரச வகைகளின் செய்முறைகளை நமக்காகத் தருகிறார் செஃப் சிவா!

ஐரோப்பியப் பழரச பானங்கள்

எனர்ஜைஸர்

தேவையானவை:

 கிவிப்பழம் -  2 (தோல் சீவி, துண்டுகளாக்கவும்)
 ஸ்ட்ராபெர்ரி - 6 (இலை, தண்டுப் பாகங்களை நீக்கவும்)
 ஃப்ளூ பெர்ரி - 6
 சர்க்கரை - தேவையான அளவு
 ஐஸ் கட்டிகள் - தேவையான அளவு

ஐரோப்பியப் பழரச பானங்கள்

செய்முறை:

கிவித் துண்டுகளுடன் ஸ்ட்ராபெர்ரி, ஃப்ளூ பெர்ரி பழங்களைச் சேர்த்து மிக்ஸியில் தண்ணீர் சேர்க்காமல் கெட்டியாக அரைத்தெடுக்கவும் (விரும்பினால் தண்ணீர் விட்டும் அரைக்கலாம்).  அதனுடன் சர்க்கரை, ஐஸ் கட்டிகளைச் சேர்த்து மீண்டும் மிக்ஸியில் ஒரு சுற்று அடித்து எடுத்தால், சுவையான எனர்ஜைஸர் ரெடி.

கிவி பிளாஸ்ட்

தேவையானவை:

 கிவிப்பழம் - 2 (தோல் சீவி, துண்டுகளாக்கவும்)
 ஆப்பிள் - 150 கிராம் (தோல் சீவி, துண்டுகளாக்கவும்)
 பைனாப்பிள் (அன்னாசிப்பழம்) - 100 கிராம் (தோல் சீவி, துண்டுகளாக்கவும்)
 தண்ணீர் - 50 மில்லி முதல் 100 மில்லி வரை
 சர்க்கரை - தேவையான அளவு
 ஐஸ் கட்டிகள் - தேவையான அளவு

ஐரோப்பியப் பழரச பானங்கள்

செய்முறை:

கிவித் துண்டுகளுடன்  பைனாப்பிள் துண்டுகள், ஆப்பிள் துண்டுகள், சர்க்கரை, தண்ணீர் சேர்த்து மிக்ஸியில் 3 நிமிடங்கள் அரைத்து எடுக்கவும். அதனுடன் ஐஸ் கட்டிகளைச் சேர்த்து மீண்டும் ஒருமுறை மிக்ஸியில் அடித்து எடுத்தால்... கிவி  பிளாஸ்ட் ரெடி!

லிச்சி ஃப்யூயல்

தேவையானவை:

 லிச்சிப்பழம் - 150 கிராம் (தோல், கொட்டைகளை நீக்கவும்)
 ஸ்ட்ராபெர்ரி - 3  (இலை, காம்பை நீக்கவும்)
 பைனாப்பிள் (அன்னாசிப்பழம்) - 100 கிராம் (தோல், தண்டு நீக்கித் துண்டுகளாக்கவும்)
 எலுமிச்சைப்பழம் - அரை மூடி
 தண்ணீர் - 75 மில்லி
 சர்க்கரை - தேவையான அளவு
 ஐஸ் கட்டிகள் - தேவையான அளவு

ஐரோப்பியப் பழரச பானங்கள்

செய்முறை:

எலுமிச்சைப்பழத்தைச் சாறு பிழியவும். லிச்சிப்பழத்துடன் ஸ்ட்ராபெர்ரி, பைனாப்பிள் துண்டுகள், தண்ணீர் சேர்த்து மிக்ஸியில் 2 நிமிடங்கள் அரைத்தெடுக்கவும். அதனுடன் எலுமிச்சைச்சாறு, சர்க்கரை, ஐஸ் கட்டிகளைச் சேர்த்து மிக்ஸியில் மீண்டும் ஒரு சுற்று அடித்து எடுத்தால்... லிச்சி ஃப்யூயல் ஜூஸ் ரெடி.

கேரட் செலரி ஜூஸ்

தேவையானவை:

 ஃப்ரெஷ் கேரட் - 200 கிராம் (தோல் சீவி, சிறிய துண்டுகளாக்கவும்)
 செலரித் தண்டு - 150 கிராம் (இலைகளை நீக்கி, துண்டுகளாக்கவும்)
 எலுமிச்சைப்பழம் - அரை மூடி
 சர்க்கரை - தேவையான அளவு
 ஐஸ் கட்டிகள் - தேவையான அளவு

ஐரோப்பியப் பழரச பானங்கள்

செய்முறை:

எலுமிச்சைப்பழத்தைச் சாறு பிழியவும். கேரட்டைத் தண்ணீர் சேர்க்காமல் மிக்ஸியில் அரைத்து வடிகட்டி சாறு எடுக்கவும் (வாடிப்போகாத, நல்ல தண்ணீர் சத்துடன் கூடிய ஃப்ரெஷ்ஷான கேரட்டில் இருந்துதான் சாறு எடுக்க முடியும்). செலரித் துண்டுகளைத் தண்ணீர் சேர்க்காமல் மிக்ஸியில் அரைத்து வடிகட்டிச் சாறு எடுக்கவும் (தண்ணீர் சேர்த்தால் சுவை குறைந்துவிடும்). பிறகு கேரட் சாற்றுடன், செலரிச்சாறு, எலுமிச்சைச்சாறு, சர்க்கரை, ஐஸ் கட்டிகளைச் சேர்த்துக் கலக்கவும். மிக்ஸியில் அடித்துக் கலக்கக் கூடாது.

ரெட் அண்ட் கிரீன்

தேவையானவை:

 பீட்ரூட் - 200 கிராம் (தோல் சீவி, துருவவும்)
 கிரீன் ஆப்பிள் - பாதியளவு (தோல் சீவி, சிறிய துண்டுகளாக்கவும்)
 செலரித் தண்டு - 100 கிராம்   (இலைகளை நீக்கி, துண்டுகளாக்கவும்)
 சர்க்கரை - தேவையான அளவு
 ஐஸ் கட்டிகள் - தேவையான அளவு

ஐரோப்பியப் பழரச பானங்கள்

செய்முறை:

பீட்ரூட் துருவல், ஆப்பிள் துண்டுகள், செலரித் துண்டுகளைத் தனித்தனியே மிக்ஸியில் அரைத்து வடிகட்டிச் சாறு எடுக்கவும். பிறகு சாறு வகைகளை ஒன்றாகக் கலந்து மிக்ஸியில் ஒரு சுற்று விட்டு எடுக்கவும். அதனுடன் சர்க்கரை,  ஐஸ் கட்டிகளைச் சேர்த்துக் கலக்கவும். 

குறிப்பு:

பீட்ரூட், கிரீன் ஆப்பிள் ஆகியவற்றில் இனிப்புச் சுவை இருப்பதால் விரும்பினால் மட்டும் சர்க்கரையைச் சேர்க்கவும்.

வாட்டர் மெலன் கூலர்

தேவையானவை:

 தர்பூசணி - 300 கிராம்  (தோல், விதை நீக்கி சிறிய துண்டுகளாக்கவும்)
 கேரட் - 150 கிராம் (தோல் சீவி, துருவவும்)
 எலுமிச்சைப்பழம் - பாதியளவு
 சர்க்கரை - தேவையான அளவு
 ஐஸ் கட்டிகள் - தேவையான அளவு

ஐரோப்பியப் பழரச பானங்கள்

செய்முறை:

எலுமிச்சைப்பழத்தைச் சாறு பிழியவும். தர்பூசணி, கேரட்டைத் தனித்தனியாக மிக்ஸியில் அரைத்தெடுக்கவும். தர்பூசணி கூழுடன் அரைத்த கேரட் விழுது, எலுமிச்சைச்சாறு சேர்த்து மிக்ஸியில் ஒரு சுற்று அடித்தெடுக்கவும். அதனுடன்  சர்க்கரை, ஐஸ் கட்டிகளைச் சேர்த்துக் கலக்கவும்.

குறிப்பு:

தர்பூசணி, கேரட்டில் இனிப்புச் சுவை இருப்பதால் சர்க்கரையை விரும்பினால் மட்டுமே சேர்க்கவும்.

செலரி ப்ளாஸ்ட்

தேவையானவை:

 செலரித் தண்டு - 200 கிராம் (இலைகளை நீக்கி, சிறிய துண்டுகளாக்கவும்)
 வெள்ளரிக்காய் - 150 கிராம் (தோல் சீவி, சிறிய துண்டுகளாக்கவும்)
 கிரீன் ஆப்பிள் - பாதியளவு (தோல் சீவி, சிறிய துண்டுகளாக்கவும்)
 தண்ணீர் - 70 மில்லி முதல் 80 மில்லி வரை
 சர்க்கரை - தேவையான அளவு
 ஐஸ் கட்டிகள் - தேவையான அளவு

ஐரோப்பியப் பழரச பானங்கள்

செய்முறை:

செலரித் தண்டுகளுடன் வெள்ளரித் துண்டுகள், ஆப்பிள் துண்டுகள், தண்ணீர் சேர்த்து மிக்ஸியில் அரைத்து வடிகட்டவும். அதனுடன்  சர்க்கரை, ஐஸ் கட்டிகளைச் சேர்த்துக் கலக்கவும்.

ஆரஞ்ச் ரெஃப்ரெஷர்

தேவையானவை:

 ஆரஞ்சு - 2 (தோல், விதைகளை நீக்கவும்)
 கேரட் - 150 கிராம் (தோல் சீவி, சிறிய துண்டுகளாக்கவும்)
 எலுமிச்சைப்பழம் - பாதியளவு
 சர்க்கரை - தேவையான அளவு
 ஐஸ் கட்டிகள் - தேவையான அளவு

ஐரோப்பியப் பழரச பானங்கள்

செய்முறை: 

எலுமிச்சைப்பழத்தைச் சாறு பிழியவும். ஆரஞ்சு சுளைகளை மிக்ஸியில் அரைத்து வடிகட்டிச் சாறு எடுக்கவும். கேரட்டை மிக்ஸியில் அரைத்து வடிகட்டிச் சாறு எடுக்கவும். ஆரஞ்சு சாற்றுடன், கேரட் சாறு, எலுமிச்சைச்சாறு சேர்த்து சில விநாடிகள் மிக்ஸியில் அடித்தெடுக்கவும். அதனுடன் ஐஸ் கட்டிகள், சர்க்கரை சேர்த்துக் கலக்கவும்.
 
குறிப்பு:

ஆரஞ்சு, கேரட்டில் இனிப்புச் சுவை இருப்பதால் சர்க்கரையை விரும்பினால் மட்டுமே சேர்க்கவும்.

ரைஸ் அண்ட் ஷைன்

தேவையானவை:

 கிரீன் ஆப்பிள் - ஒன்று (தோல், விதை நீக்கி துண்டுகளாக்கவும்)
 பைனாப்பிள் (அன்னாசிப்பழம்) - 200 கிராம் (தோல் சீவி, சிறிய துண்டுகளாக்கவும்)
 இஞ்சி - 25 கிராம் (தோல் சீவி, சிறிய துண்டுகளாக்கவும்)
 தண்ணீர் - 75 மில்லி
 சர்க்கரை - தேவையான அளவு
 ஐஸ் கட்டிகள் - தேவையான அளவு

ஐரோப்பியப் பழரச பானங்கள்

செய்முறை:

ஆப்பிள் துண்டுகளுடன் பைனாப்பிள் துண்டுகள், இஞ்சித் துண்டுகள் சேர்த்து மிக்ஸியில் 3 நிமிடங்கள்  அரைத்தெடுக்கவும் (75 மில்லி தண்ணீரையும் சிறிது சிறிதாகச் சேர்த்துக்கொண்டே அரைத்தெடுக்க வேண்டும்). அதனுடன் ஐஸ் கட்டிகள்,  சர்க்கரை சேர்த்து, சில விநாடிகள் அடித்தெடுக்கவும்.

கிவி பெர்ரி

தேவையானவை:

 கிவிப்பழம் -  2 (தோல் சீவி, சிறிய துண்டுகளாக்கவும்) 
 ஃப்ளு பெர்ரி - 50 கிராம்  விதையில்லாத கறுப்புத் திராட்சை - 50 கிராம்
 விதையில்லாத பச்சை திராட்சை - 50 கிராம்
 தண்ணீர் - 75 மில்லி
 சர்க்கரை - தேவையான அளவு
 ஐஸ் கட்டிகள் - தேவையான அளவு

ஐரோப்பியப் பழரச பானங்கள்

செய்முறை:

கிவித் துண்டுகளுடன் ஃப்ளு பெர்ரி, கறுப்புத் திராட்சை,  கிரீன் திராட்சை சேர்த்து மிக்ஸியில் 3 நிமிடங்கள் அரைத்தெடுக்கவும். (75 மில்லி தண்ணீரையும் சிறிது சிறிதாக இடையிடையே சேர்த்துக்கொண்டு அரைக்க வேண்டும்). 3 நிமிடங்களைத் தாண்டியும் அரைத்தால், ஜூஸின் சுவை மாறிவிடும் என்பதால் கவனம் தேவை. அரைத்த சாற்றுடன் ஐஸ் கட்டிகள், சர்க்கரை சேர்த்துக் கலக்கவும்.

குறிப்பு:

ஃப்ரெஷ்ஷான ப்ளூ பெர்ரிகள்  கிடைக்காவிட்டால், பதப்படுத்தப்பட்ட காய்ந்த பெர்ரிகளைப் பயன்படுத்தலாம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு