Published:Updated:

லட்டு / உருண்டை ரெசிப்பி

லட்டு / உருண்டை ரெசிப்பி

பிரீமியம் ஸ்டோரி

ந்தியாவின் பாரம்பர்ய இனிப்பு வகைகளில் லட்டுக்கு எப்போதும் தனி இடமுண்டு. வீட்டின் சுப நிகழ்வுகள் மற்றும் பண்டிகை கொண்டாட்டங்களில் `லட்டு’ எப்போதும் முதல் இடத்தில் இருக்கும்.

லட்டு / உருண்டை ரெசிப்பி

குழந்தைகள் முதல் பெரியவர்கள் வரை அனைவரும் விரும்பிச் சாப்பிடும் இனிப்பான லட்டில்தான் எத்தனை வகை? பார்க்கும்போதே சுவைக்கத் தூண்டும் அழகான படங்களுடன் லட்டு மற்றும் உருண்டை ரெசிப்பிகளை வழங்குகிறார் தர்மபுரியைச் சேர்ந்த சமையல் கலைஞர் ஸ்வாதி நந்தினி.

ரவா லட்டு வித் கண்டன்ஸ்டு மில்க்

தேவையானவை:

 ரவை - ஒரு கப்
 கண்டன்ஸ்டு மில்க் - அரை கப்
 தேங்காய்த் துருவல் - 1/3 கப்
 ஏலக்காய்த்தூள் - அரை டீஸ்பூன்
 பால் - 2 டேபிள்ஸ்பூன்
(காய்ச்சி ஆறவைத்தது)
 நெய் - 2  டீஸ்பூன்
 முந்திரி, திராட்சை - தலா 10

லட்டு / உருண்டை ரெசிப்பி

செய்முறை:

வாணலியில் நெய்விட்டு முந்திரி,  திராட்சையை வறுத்துத் தனியாக எடுத்து வைக்கவும். அதே வாணலியில் ரவையைச் சேர்த்துப் பொன்னிறமாக வறுக்கவும். அதனுடன் தேங்காய்த் துருவல், ஏலக்காய்த்தூள் சேர்த்து ஒரு நிமிடம் வறுக்கவும்.

பிறகு, கண்டன்ஸ்டு மில்க் சேர்த்து மிதமான தீயில் வைத்துக் கிளறவும்.  கலவை சுருண்டு வரும்போது பால், முந்திரி, திராட்சை சேர்த்துக் கிளறி இறக்கவும். ஆறியதும் சிறிய உருண்டைகளாக உருட்டவும். சுவையான ரவா லட்டு தயார்.

பேசன் லட்டு வித் ஆலிவ் ஆயில்

தேவையானவை:

 கடலை மாவு - 2 கப்
 சர்க்கரை - ஒரு கப்
 ஆலிவ் எண்ணெய் - 1/3 கப்
 ஏலக்காய் - 2

லட்டு / உருண்டை ரெசிப்பி

செய்முறை:

சர்க்கரையுடன் ஏலக்காய் சேர்த்து மிக்ஸியில் பவுடராக அரைத்து எடுக்கவும். அடிகனமான பாத்திரத்தில் ஆலிவ் எண்ணெய் ஊற்றி, சூடானதும் கடலை மாவு சேர்த்து மிதமான தீயில் வைத்துப் பொன்னிறமாக வறுக்கவும். இதனுடன் பொடித்த சர்க்கரை சேர்த்து,  2 நிமிடங்கள் குறைந்த தீயில் நன்கு கிளறவும்.

சர்க்கரை உருகி மாவுடன் நன்கு சேர்ந்து வரும்போது இறக்கி ஆறவிடவும்.   பிறகு, ஆறிய கலவையை விரும்பிய வடிவில் உருண்டைகளாக உருட்டவும். ஆரோக்கியமான கடலை மாவு(பேசன்) லட்டு தயார்.

தட்டப்பயறு உருண்டை

தேவையானவை:

 தட்டப்பயறு - ஒரு கப்
 வெல்லம் - ஒரு கப்
 தண்ணீர் - 2 கப்
 ஏலக்காய்த்தூள் - ஒரு சிட்டிகை
 சுக்குத்தூள் - கால் டீஸ்பூன்
 எண்ணெய் -  தேவையான அளவு

லட்டு / உருண்டை ரெசிப்பி

செய்முறை:

தட்டப்பயறைக் கழுவி 2 கப் தண்ணீரில் ஒரு மணி நேரம் ஊறவைக்கவும். பிறகு, களைந்து தண்ணீர் தெளித்து மிக்ஸியில் கெட்டியாக அரைத்து எடுக்கவும். வெல்லத்துடன் மூழ்கும் அளவு தண்ணீர் சேர்த்து ஒரு கொதிவிட்டு இறக்கி வடிகட்டவும். இதனுடன் ஏலக்காய்த்தூள், சுக்குத்தூள் சேர்த்துக் கெட்டியாகும் வரை கொதிக்கவிட்டு இறக்கவும். வாணலியில் எண்ணெயைக் காயவிட்டு அரைத்த விழுதைச் சிறிய போண்டாக்களாக உருட்டிப் போட்டுப் பொன்னிறமாக பொரித்தெடுக்கவும். பொரித்த உருண்டைகளைப் வெல்லப்பாகில் இரண்டு மணி நேரம் ஊறவைத்து எடுத்துப் பரிமாறவும்.

அத்தி - தேங்காய் லட்டு

தேவையானவை:

 பேரீச்சம்பழம் - 15 (கொட்டை நீக்கி சிறிய துண்டுகளாக நறுக்கவும்)
 உலர் அத்திப்பழம் - 15
 தேங்காய்த் துருவல் - கால் கப்புக்குச் சற்று அதிகமாக
 ஏலக்காய்த்தூள் - ஒரு டீஸ்பூன்
 நெய் - ஒரு டீஸ்பூன்

லட்டு / உருண்டை ரெசிப்பி

அலங்கரிக்க:

தேங்காய்த் துருவல் – 2 டீஸ்பூன்

செய்முறை:

பேரீச்சம், அத்திப்பழங்களுடன் சிறிதளவு தண்ணீர்விட்டு விழுதாக அரைத்து எடுக்கவும். வாணலியில் நெய்விட்டு உருக்கி, அதில் அரைத்த கலவை, ஏலக்காய்த்தூள் சேர்த்துச் சிறிது நேரம் கிளறவும். இதனுடன் தேங்காய்த் துருவல் சேர்த்து நன்றாகக் கிளறி இறக்கி ஆறவிடவும். பிறகு, இந்தக் கலவையைச் சிறு உருண்டைகளாக உருட்டவும்.    இதன் மேலே தேங்காய்த் துருவல் தூவி அலங்கரித்துப் பரிமாறவும்.

முந்திரிக் கொத்து

தேவையானவை:

 பச்சைப்பயறு - அரை கப்
 வெல்லம் - 1/3 கப்
 தேங்காய்த் துருவல் - அரை கப்
 ஏலக்காய்த்தூள் - ஒரு டீஸ்பூன்
 சோள மாவு (கார்ன்ஃப்ளார்) - 3 டேபிள்ஸ்பூன்
 அரிசி மாவு - 2 டேபிள்ஸ்பூன்
 மஞ்சள்தூள் - கால் டீஸ்பூன்
 எண்ணெய், உப்பு - தேவையான அளவு

லட்டு / உருண்டை ரெசிப்பி

செய்முறை:

சோள மாவுடன் அரிசி மாவு, மஞ்சள்தூள், உப்பு, தேவையான தண்ணீர்விட்டுக் கெட்டியாகக் கரைக்கவும். வெறும் வாணலியில் பச்சைப்பயறு சேர்த்து மிதமான தீயில் பொன்னிறமாக வறுத்து எடுக்கவும். அதே வாணலியில் தேங்காய்த் துருவல் சேர்த்துப் பொன்னிறமாக வறுத்து எடுக்கவும். பச்சைப்பயறு ஆறியதும், மிக்ஸியில் பவுடராக அரைத்து எடுக்கவும். அடிகனமான பாத்திரத்தில் வெல்லத்துடன் மூழ்கும் அளவு தண்ணீர் சேர்த்துக் கொதிக்கவிடவும். வெல்லம் கரைந்ததும் ஏலக்காய்த்தூள், பச்சைப்பயறு பவுடர், தேங்காய்த் துருவல் சேர்த்துக் கிளறவும்.

கலவை ஒன்றாகச் சேர்ந்து சுருண்டு வரும்போது இறக்கவும். ஆறியதும் உருண்டைகளாக உருட்டவும். வாணலியில் எண்ணெயைக் காயவிட்டு உருண்டைகளை மாவுக் கலவையில் முக்கி எடுத்துப் போட்டு, மிதமான தீயில் பொன்னிறமாகப் பொரித்தெடுக்கவும்.  ஆறியதும் பரிமாறவும்.

மோடிச்சூர் லட்டு

தேவையானவை:

 கடலை மாவு - 2 கப்
 மஞ்சள் ஃபுட் கலர் - ஒரு சிட்டிகை
 உலர்ந்த திராட்சை, முந்திரி -  தலா 10
 நெய் - 2 டீஸ்பூன்
 சர்க்கரை - 2 கப்
 ஏலக்காய்த்தூள் - ஒரு டீஸ்பூன்
 குங்குமப்பூ - ஒரு சிட்டிகை
 எண்ணெய் – தேவையான அளவு

லட்டு / உருண்டை ரெசிப்பி

செய்முறை:

கடலை மாவுடன், ஃபுட் கலர், ஒரு கப் தண்ணீர் சேர்த்துக் கரைக்கவும். சர்க்கரையுடன் ஒரு கப் தண்ணீர் சேர்த்துக் கொதிக்கவிடவும். சர்க்கரை கரைந்ததும் ஏலக்காய்த்தூள், குங்குமப்பூ சேர்த்து ஒரு கம்பி பதம் வரும் வரை பாகு காய்ச்சி இறக்கவும். வாணலியில் எண்ணெயைக் காயவிட்டு, பூந்திக் கரண்டியை எண்ணெய்க்கு மேலாகப் பிடித்து கடலை மாவுக் கலவையை ஊற்றி லேசாக தேய்த்துப் பொரித்தெடுக்கவும். பிறகு, பூந்திகளைச் சர்க்கரைப் பாகில் நன்றாக ஊறவிடவும். கலவை ஆறியதும் மிக்ஸியில் போட்டு ஒரு சுற்று சுற்றி எடுக்கவும். அரைத்த கலவையுடன் சிறிதளவு நெய்விட்டு உலர்ந்த திராட்சை, முந்திரி சேர்த்து உருண்டைகளாக உருட்டவும்.

சப்பாத்தி லட்டு

தேவையானவை:

 சப்பாத்தி -  3 (சிறிய துண்டுகளாக நறுக்கவும்)
 சர்க்கரை - 2 டேபிள்ஸ்பூன்
 ஏலக்காய் - 3
 பாதாம் - 6 (பொடியாக நறுக்கவும்)
 தேங்காய்த் துருவல் – சிறிதளவு

லட்டு / உருண்டை ரெசிப்பி

செய்முறை:

சப்பாத்தி துண்டுகளுடன் சர்க்கரை, ஏலக்காய் சேர்த்து மிக்ஸியில் அரைத்து எடுக்கவும். இதனுடன் பாதாம் சேர்த்துக் கலக்கவும். இந்தக் கலவையைச் சிறிய உருண்டைகளாக உருட்டவும்.  மேலே தேங்காய்த் துருவல் தூவி அலங்கரித்துப் பரிமாறவும்.

ஓட்ஸ் - தேங்காய் லட்டு

தேவையானவை:

 ஓட்ஸ் - ஒரு கப்
 வெல்லம் - முக்கால் கப்
 ஏலக்காய் - 3
 தேங்காய்த் துருவல் - கால் கப்
 முந்திரி, திராட்சை - தலா 10
 நெய் - தேவையான அளவு

லட்டு / உருண்டை ரெசிப்பி

செய்முறை:

வெறும் வாணலியில் ஓட்ஸை 2  நிமிடங்கள் மிதமான தீயில் நிறம் மாறாமல் வறுத்து எடுத்து ஆறவிடவும். அதே வாணலியில் நெய்விட்டு முந்திரி, திராட்சையைச் சேர்த்து வறுத்து எடுக்கவும். ஆறிய ஓட்ஸுடன் வெல்லம், ஏலக்காய் சேர்த்து மிக்ஸியில் பொடித்து எடுக்கவும்.

இதனுடன் தேங்காய்த் துருவல்,  முந்திரி, திராட்சை சேர்த்துக் கலக்கவும். இந்தக் கலவையுடன் உருக்கிய நெய்யைக் கொஞ்சம் கொஞ்சமாகச் சேர்த்துக் கலந்து சிறிய உருண்டைகளாகப் பிடிக்கவும். ருசியான ஓட்ஸ் - தேங்காய் லட்டு தயார்.

ரவை - பேரீச்சம்பழ லட்டு

தேவையானவை:

 ரவை - ஒரு கப்
 தேங்காய்த் துருவல் - அரை கப்
 சர்க்கரை - அரை கப்
 நறுக்கிய பேரீச்சம்பழத் துண்டுகள் - கால் கப்
 ஏலக்காய் - 3
 பால் - சுமார் 4 டீஸ்பூன் (காய்ச்சி ஆற வைத்தது)

லட்டு / உருண்டை ரெசிப்பி

செய்முறை:

வெறும் வாணலியில் ரவையைச் சேர்த்து நிறம் மாறாமல் வறுத்து எடுக்கவும். சர்க்கரையுடன் ஏலக்காய் சேர்த்து மிக்ஸியில் பவுடராக அரைத்து எடுக்கவும். ரவையுடன் பொடித்த சர்க்கரை, தேங்காய்த் துருவல், பேரீச்சம்பழத் துண்டுகள் சேர்த்துக் கலக்கவும். இதனுடன் பாலைக் கொஞ்சம் கொஞ்சமாக  ஊற்றிப் பிசையவும். ஆறியதும் உருண்டைகளாக உருட்டவும்.  

பேசன் தேங்காய் லட்டு

தேவையானவை:

 கடலை மாவு - 2 கப்
 பால் - ஒரு கப் (காய்ச்சி ஆறவைத்தது)
 சர்க்கரை - ஒரு கப்
 தேங்காய்த் துருவல் - ஒரு கப்
 நெய் - அரை கப்
 உடைத்த நட்ஸ் கலவை - கால் கப் (விரும்பினால்)

லட்டு / உருண்டை ரெசிப்பி

செய்முறை:

வாணலியில் நெய் ஊற்றி, கடலை மாவு சேர்த்துச் சிறிது நேரம் வறுக்கவும். இதனுடன் தேங்காய்த் துருவல் சேர்த்து நன்கு வறுக்கவும். பிறகு சர்க்கரை, பால் சேர்த்து சர்க்கரை உருகும் வரை நன்கு கலக்கவும். இறுதியாக நெய் சேர்த்துக் கிளறி, கலவை சுருண்டு வரும்போது இறக்கி, நட்ஸ் சேர்த்துக் கலந்து ஆறவிடவும். கலவை ஆறியதும் சிறிய உருண்டைகளாகப் பிடிக்கவும்.

மலாய் லட்டு

தேவையானவை:

 உதிர்த்த பனீர் - 2 கப்
 சர்க்கரை - 4 டேபிள்ஸ்பூன்
 ஏலக்காய்த்தூள் - அரை டீஸ்பூன்
 குங்குமப்பூ - ஒரு சிட்டிகை
 தண்ணீர் - 2 டேபிள்ஸ்பூன்
 நெய் -  2 டீஸ்பூன்
 ரோஸ் வாட்டர் - 2 டேபிள்ஸ்பூன்

லட்டு / உருண்டை ரெசிப்பி

செய்முறை:

உதிர்த்த பனீருடன் குங்குமப்பூ, ஏலக்காய்த்தூள், சர்க்கரை, தண்ணீர் சேர்த்து விழுதாக அரைத்து எடுக்கவும். அடிகனமான பாத்திரத்தில் ஒரு டீஸ்பூன் நெய்விட்டு உருக்கி, அரைத்த பனீர் விழுது சேர்த்து அடுப்பைக் குறைந்த தீயில் வைத்துக் கிளறவும். இதனுடன் ரோஸ் வாட்டர் சேர்த்துக் கிளறி, கலவை சுருண்டு வரும்போது இறக்கி ஆறவிடவும்.  மீதமுள்ள நெய்யைக் கைகளில் தடவிக்கொண்டு, ஆறிய பனீர் கலவையை உருண்டைகளாகப் பிடிக்கவும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு