Published:Updated:

கல்யாண விருந்து!

கல்யாண விருந்து!
பிரீமியம் ஸ்டோரி
கல்யாண விருந்து!

கல்யாண விருந்து!

கல்யாண விருந்து!

கல்யாண விருந்து!

Published:Updated:
கல்யாண விருந்து!
பிரீமியம் ஸ்டோரி
கல்யாண விருந்து!
கல்யாண விருந்து!
கல்யாண விருந்து!

அசோகா

தேவை:     * பாசிப்பருப்பு - அரை கப் * சர்க்கரை - ஒரு கப் * ஏலக்காய்த்தூள் - கால் டீஸ்பூன் * சிவப்பு நிற ஃபுட் கலர் - சிறிதளவு * கோதுமை மாவு - ஒரு டீஸ்பூன் * நெய் - தேவையான அளவு * உடைத்த முந்திரி - 5 டேபிள்ஸ்பூன்.

செய்முறை:     வெறும் வாணலியில் பாசிப்பருப்பை வறுத்தெடுக்கவும். குக்கரில் பாசிப்பருப்புடன் தேவையான அளவு தண்ணீர்விட்டு குழைவாக வேகவிட்டு எடுக்கவும். ஆறியதும் நன்கு மசிக்கவும். அடி கனமான பாத்திரத்தில் 2 டேபிள்ஸ்பூன் நெய்விட்டு முந்திரியைச் சேர்த்து வறுத்தெடுத்துத் தனியாக வைக்கவும். அதே நெய்யில் கோதுமை மாவைச் சேர்த்து நன்கு வறுக்கவும். அதனுடன் மசித்த பருப்பு, சர்க்கரை, ஃபுட் கலர், ஏலக்காய்த்தூள் சேர்த்துக் கிளறவும். அடுப்பைச் சிறு தீயில் வைத்து, இடையிடையே தேவையான அளவு நெய்விட்டு, கைவிடாமல் கிளறவும். கலவை நன்கு சுருண்டு பாத்திரத்தில் ஒட்டாமல் வரும்போது இறக்கவும். மேலே வறுத்த முந்திரி தூவி அலங்கரித்துப் பரிமாறவும்.

ஒட்டுமொத்த விகடனுக்கும் ஒரே ஷார்ட்கட்!

கல்யாண விருந்து!

பைனாப்பிள் கேசரி வித் டூட்டி ஃப்ரூட்டி

தேவை:    *  ரவை - ஒரு கப் * சர்க்கரை - ஒன்றரை கப் * பைனாப்பிள் எசென்ஸ் - சிறிதளவு * அன்னாசிப்பழத் துண்டுகள் - கால் கப் (விரும்பினால்) * டூட்டி ஃப்ரூட்டி (பச்சை, சிவப்பு, ஆரஞ்சு) - தலா 5 டீஸ்பூன் * ஏலக்காய்த்தூள் - ஒரு சிட்டிகை * நெய் - கால் கப்.

செய்முறை:    வாணலியில் சிறிதளவு நெய்விட்டு ரவையைச் சேர்த்து வறுத்துத் தனியாக எடுத்து வைக்கவும். அதே வாணலியில் 2 கப் தண்ணீர் ஊற்றி நன்கு கொதிக்கவிடவும். அதனுடன் பைனாப்பிள் எசென்ஸ், ஏலக்காய்த்தூள் சேர்த்துக் கலக்கவும். பிறகு வறுத்த ரவை சேர்த்து, அடுப்பைச் சிறு தீயில் வைத்து, கட்டி தட்டாமல் கிளறி வேகவிடவும். அதனுடன் மீதமுள்ள நெய், அன்னாசிப்பழத் துண்டுகள், சர்க்கரை, டூட்டி ஃப்ரூட்டி சேர்த்துக் கிளறி இறக்கவும். இதை நெய் தடவிய தட்டில் கொட்டி, சற்று ஆறியதும் துண்டுகளாக்கவும்.

கல்யாண விருந்து!

மக்கன் பேடா

தேவை: * மைதா மாவு - ஒரு கப் * சர்க்கரை சேர்க்காத கோவா - அரை கப் * உடைத்த நட்ஸ் கலவை - தேவையான அளவு * சர்க்கரை - 2 கப் * தண்ணீர் - 2 கப் * பேக்கிங் பவுடர் - கால் டீஸ்பூன் * நெய் - 4 டேபிள்ஸ்பூன் * தயிர் - கால் கப் * ஏலக்காய்த்தூள் - ஒரு சிட்டிகை * குங்குமப்பூ - சிறிதளவு * எண்ணெய் - பொரிக்கத் தேவையான அளவு.

செய்முறை:  பாத்திரத்தில் சர்க்கரையுடன் தண்ணீர் சேர்த்துக் கொதிக்கவிடவும். சர்க்கரை கரைந்ததும் ஏலக்காய்த்தூள், குங்குமப்பூ சேர்த்து ஒரு கொதிவிட்டு இறக்கவும். அகலமான பாத்திரத்தில் கோவாவுடன் மைதா மாவு, பேக்கிங் பவுடர், தயிர், நெய் சேர்த்து விரல்களால் பிசிறவும். தேவையானால் 2 டீஸ்பூன் தண்ணீர் தெளித்து மிருதுவாகப் பிசையவும். மாவை அப்படியே 15 நிமிடங்கள் மூடி வைக்கவும். பிறகு மாவுக் கலவையை எலுமிச்சை அளவு உருண்டைகளாக்கி, நடுவே பள்ளம் செய்து சிறிதளவு நட்ஸ் கலவை வைத்து மூடி உருட்டவும். வாணலியில் எண்ணெயைக் காயவிட்டு, அடுப்பை சிறு தீயில் வைத்து, மாவு உருண்டைகளைப் போட்டுப் பொரித்தெடுக்கவும். பிறகு பொரித்த உருண்டைகளை சர்க்கரைப் பாகில் அரை மணி நேரம் ஊறவைத்துப் பரிமாறவும்.

கல்யாண விருந்து!

ரசமலாய்

தேவை:    *  காய்ச்சாத பால் - ஒன்றரை லிட்டர் * எலுமிச்சைச் சாறு - ஒரு டீஸ்பூன் * சர்க்கரை - ஒன்றரை கப் * ஏலக்காய்த்தூள் - ஒரு சிட்டிகை * குங்குமப்பூ - சிறிதளவு * பாதாம், முந்திரி, பிஸ்தா துருவல் - சிறிதளவு.

செய்முறை:    அடிகனமான பாத்திரத்தில் ஒரு லிட்டர் பாலை ஊற்றிக் காய்ச்சவும். அதனுடன் எலுமிச்சைச் சாறு சேர்த்துப் பாலைத் திரியவிடவும். பிறகு மெல்லிய துணியில் திரிந்த பாலை ஊற்றித் தண்ணீரை வடிகட்டவும். மேலே தங்கியுள்ள பால் கலவையோடு துணியை மூட்டைக் கட்டி அரை மணி நேரம் தொங்கவிடவும். தண்ணீர் முழுவதும் வடிந்த பிறகு கிடைக்கும் பனீரை நன்கு கைகளால் பிசைந்து சிறிய உருண்டைகளாக்கி வடை போல தட்டவும். இதுதான் ரசமலாய். பாத்திரத்தில் ஒரு கப் சர்க்கரையுடன் மூழ்கும் அளவு தண்ணீர்விட்டுக் கொதிக்கவிடவும். அதனுடன் ஏலக்காய்த்தூள் சேர்த்துக் கலக்கவும். பிறகு ரசமலாய்களைச் சேர்த்து மூடி 10 நிமிடங்கள் வேகவிட்டு எடுக்கவும். மற்றொரு பாத்திரத்தில் மீதமுள்ள பாலுடன் மீதமுள்ள சர்க்கரை, குங்குமப்பூ சேர்த்துக் காய்ச்சி இறக்கவும். அதில் ரசமலாய், பாதாம், முந்திரி, பிஸ்தா துருவல் சேர்த்து ஊறவைத்துப் பரிமாறவும்.

கல்யாண விருந்து!

பாலடை பிரதமன்

தேவை:   *  அரிசி பாலடை - 100 கிராம் (ரெடிமேடாக கடைகளில் கிடைக்கிறது) * காய்ச்சாத பால் - ஒரு லிட்டர் * சர்க்கரை - கால் கப் * கண்டன்ஸ்டு மில்க் - 5 டீஸ்பூன் * நெய் - ஒரு டீஸ்பூன் * முந்திரி, திராட்சை - தேவையான அளவு * ஏலக்காய்த்தூள் - ஒரு சிட்டிகை.

செய்முறை:    பாத்திரத்தில் ஒரு கப் தண்ணீர்விட்டுக் கொதிக்கவிடவும். அதனுடன் பாலடைகளைச் சேர்த்து 5 நிமிடங்கள் வேகவிட்டு இறக்கவும். ஆறியதும் நீரை வடியவிட்டு, அடைகளைச் சுத்தமான தண்ணீரில் அலசி எடுக்கவும். மற்றொரு பாத்திரத்தில் பாலுடன் அரை கப் தண்ணீர் ஊற்றிக் கொதிக்கவிடவும். பால் பாதியாகச் சுண்டும்போது சர்க்கரை, ஏலக்காய்த்தூள், கண்டன்ஸ்டு மில்க், வேகவைத்த பாலடை சேர்த்துக் கலந்து கொதிக்கவிட்டு இறக்கவும். வாணலியில் நெய்விட்டு முந்திரி, திராட்சை சேர்த்து வறுத்தெடுத்துப் பாயசத்துடன் கலந்து பரிமாறவும்.

கல்யாண விருந்து!

இளநீர்ப் பாயசம்

தேவை:  * காய்ச்சாத பால் - ஒரு லிட்டர் * இளநீர் - 2 கப் * இளநீர் வழுக்கைத் துண்டுகள் - ஒரு கப் * கண்டன்ஸ்டு மில்க் - 5 டேபிள்ஸ்பூன் * ஏலக்காய்த்தூள் - கால் டீஸ்பூன் * சர்க்கரை - ஒரு கப் * நெய் - ஒரு டீஸ்பூன் * முந்திரி, திராட்சை - தலா 10.

செய்முறை:    வாணலியில் நெய்விட்டு உருக்கி முந்திரி, திராட்சை சேர்த்து வறுத்துத் தனியே எடுத்து வைக்கவும். இளநீருடன் ஒரு கப் இளநீர் வழுக்கை சேர்த்து மிக்ஸியில் விழுதாக அரைத்தெடுக்கவும். அடி கனமான பாத்திரத்தில் பாலை ஊற்றிச் சூடாக்கி, அடுப்பை சிறு தீயில் வைத்து, பாதியாகச் சுண்டும்வரை காய்ச்சவும். அதனுடன் கண்டன்ஸ்டு மில்க், ஏலக்காய்த்தூள், சர்க்கரை சேர்த்துக் கலந்து, ஒரு கொதிவிட்டு இறக்கி ஆறவிடவும். நன்கு ஆறிய பிறகு அரைத்த விழுது, மீதமுள்ள வழுக்கைத் துண்டுகள் சேர்த்துக் கலக்கவும். மேலே முந்திரி, திராட்சை சேர்த்து அலங்கரித்துப் பரிமாறவும்.

கல்யாண விருந்து!

பாதாம் கீர்

தேவை:  *  காய்ச்சாத பால் - ஒரு லிட்டர் * பாதாம் - 15 * குங்குமப்பூ - சிறிதளவு * சர்க்கரை - கால் கப் * பாதாம் துருவல் - 5 டேபிள்ஸ்பூன்.

செய்முறை:    பாதாமைத் தண்ணீரில் ஊறவைத்துத் தோலுரிக்கவும். அதனுடன் கால் கப் பால் சேர்த்து மிக்ஸியில் விழுதாக அரைத்தெடுக்கவும். அடி கனமான பாத்திரத்தில் மீதமுள்ள பாலை ஊற்றி, அடுப்பை சிறு தீயில் வைத்து, பாதியாகச் சுண்டும்வரை காய்ச்சவும். அதனுடன் குங்குமப்பூ, சர்க்கரை, அரைத்த பாதாம் விழுது சேர்த்துக் கொதிக்கவிட்டு இறக்கவும். மேலே பாதாம் துருவலைத் தூவி சூடாகவோ அல்லது குளிரவைத்தோ பருகலாம்.

கல்யாண விருந்து!

காஷ்மீரி புலாவ் வித் நட்ஸ்

தேவை:   * பாசுமதி அரிசி - ஒரு கப் * வெங்காயம் - 2 (நீளவாக்கில் நறுக்கவும்) * பச்சை மிளகாய் - 2 (நீளவாக்கில் நறுக்கவும்) * இஞ்சி - பூண்டு விழுது - ஒரு டீஸ்பூன் * நெய் - 2 டேபிள்ஸ்பூன் * முந்திரி, திராட்சை, பிஸ்தா, பாதாம் - தலா 10 * சீரகம் - ஒரு டீஸ்பூன் * பிரியாணி இலை - ஒன்று * பட்டை - சிறிய துண்டு * ஏலக்காய் - 2  கிராம்பு - ஒன்று * மிளகு - 4 * சோம்பு - கால் டீஸ்பூன் * மிளகாய்த்தூள் - ஒரு டீஸ்பூன்  காய்ச்சிய பால் - 2 டீஸ்பூன் * குங்குமப்பூ - சிறிதளவு * கொத்தமல்லித்தழை - சிறிதளவு * உப்பு - தேவையான அளவு.

செய்முறை:    பாலில் குங்குமப்பூ சேர்த்து ஊறவைக்கவும். அரிசியை 10 நிமிடங்கள் தண்ணீரில் ஊறவைத்து வடியவிடவும். குக்கரில் நெய்விட்டு முந்திரி, திராட்சை, பிஸ்தா, பாதாம் சேர்த்து வறுத்துத் தனியாக எடுத்து வைக்கவும். அதே நெய்யில் சீரகம், பிரியாணி இலை, பட்டை, ஏலக்காய், கிராம்பு, சோம்பு, மிளகு தாளிக்கவும். அதனுடன் வெங்காயம், பச்சை மிளகாய், இஞ்சி - பூண்டு விழுது சேர்த்து வதக்கவும். பிறகு மிளகாய்த்தூள், உப்பு, ஊறவைத்த அரிசி, ஒன்றரை கப் தண்ணீர், பாலில் ஊறவைத்த குங்குமப்பூ சேர்த்து, குக்கரை மூடி 2 விசில் விட்டு இறக்கவும். மேலே திராட்சை, பாதாம், முந்திரி, பிஸ்தா, கொத்தமல்லித்தழை தூவிப் பரிமாறவும்.

கல்யாண விருந்து!

காளான் பிரியாணி வித் ராய்த்தா

தேவை: * பச்சரிசி - ஒரு கப் * காளான் - 10 * வெங்காயம் - 2 (நீளவாக்கில் நறுக்கவும்) * தக்காளி - 4 (பொடியாக நறுக்கவும்) * தயிர் - அரை கப் * மஞ்சள்தூள் - கால் டீஸ்பூன் * மிளகாய்த்தூள் - 2 டீஸ்பூன் * கரம் மசாலாத்தூள், தனியாத்தூள் (மல்லித்தூள்) - தலா அரை டீஸ்பூன் * பிரியாணி மசாலாத்தூள் - ஒரு டீஸ்பூன் * புதினா, கொத்தமல்லித்தழை - தலா ஒரு கைப்பிடிஅளவு * நெய் - 4 டேபிள்ஸ்பூன் * எண்ணெய், உப்பு - தேவையான அளவு.

தாளிக்க: * பிரியாணி இலை - ஒன்று * பட்டை - சிறிய துண்டு * கிராம்பு, ஏலக்காய் - தலா ஒன்று.

ராய்த்தா செய்ய: * கெட்டித் தயிர் - ஒரு கப் * வெங்காயம் - ஒன்று (பொடியாக நறுக்கவும்) * உப்பு - தேவையான அளவு.

செய்முறை:  வாணலியில் எண்ணெய்விட்டு வெங்காயம், தக்காளி சேர்த்து வதக்கி எடுக்கவும். பாத்திரத்தில் காளான் துண்டுகளுடன் தயிர், மஞ்சள்தூள், மிளகாய்த்தூள், கரம் மசாலாத்தூள், தனியாத்தூள், பிரியாணி மசாலாத்தூள், புதினா, கொத்தமல்லித்தழை, உப்பு, வதக்கிய வெங்காயம், தக்காளி சேர்த்துக் கலந்து அரை மணி நேரம் ஊறவைக்கவும். குக்கரில் நெய்விட்டு, தாளிக்கக் கொடுத்துள்ள பொருள்களைச் சேர்த்துத் தாளிக்கவும். அதனுடன் காளான் கலவை சேர்த்து வதக்கவும். பிறகு களைந்த அரிசி சேர்த்து, 2 கப் தண்ணீர்விட்டு மூடி 3 விசில்விட்டு இறக்கவும். ராய்த்தா செய்ய கொடுத்துள்ள பொருள்களை ஒன்றாகச் சேர்த்துக் கலக்கவும். பிரியாணியை ரய்த்தாவுடன் பரிமாறவும்.

கல்யாண விருந்து!

பிசிபேளாபாத்

தேவை: * சாதம் - ஒரு கப் * வேகவைத்த துவரம்பருப்பு - அரை கப் * புளி - எலுமிச்சை அளவு * சின்ன வெங்காயம் - 10 * கேரட், பீன்ஸ், பட்டாணி கலவை - அரை கப் * வேர்க்கடலை - 3 டேபிள்ஸ்பூன் * பெருங்காயத்தூள் - கால் டீஸ்பூன் * மஞ்சள்தூள், எண்ணெய், உப்பு - தேவையான அளவு.

அரைக்க: * தனியா (மல்லி ), கடலைப்பருப்பு - தலா 2 டீஸ்பூன் * உளுத்தம்பருப்பு - ஒரு டீஸ்பூன் * சீரகம் - அரை டீஸ்பூன் * வெந்தயம் - கால் டீஸ்பூன் * மிளகு - 4 * பட்டை - சிறிய துண்டு * கிராம்பு, ஏலக்காய் - தலா 2 * தேங்காய்த் துருவல் - 5  டேபிள்ஸ்பூன் * கசகசா, எள் - தலா ஒரு டீஸ்பூன் * கறிவேப்பிலை - சிறிதளவு * காய்ந்த மிளகாய் - 6.

தாளிக்க: 
* நெய் - ஒரு டீஸ்பூன் * கறிவேப்பிலை - சிறிதளவு * முந்திரி - 10.

செய்முறை:  வெறும் வாணலியில் அரைக்கக் கொடுத்துள்ள பொருள்களைச் சேர்த்து வறுத்தெடுத்து, மிக்ஸியில் பொடியாக அரைத்தெடுக்கவும். புளியை ஊறவைத்துக் கரைத்து வடிகட்டவும். அடி கனமான வாணலியில் எண்ணெய்விட்டு வெங்காயம், காய்கறிக் கலவை, மஞ்சள்தூள், பெருங்காயத்தூள், வேர்க்கடலை, சிறிதளவு தண்ணீர் சேர்த்து வேகவிடவும். அதனுடன் புளிக்கரைசல், உப்பு, அரைத்த பொடி, வேகவைத்த பருப்பு, சாதம் சேர்த்துக் கிளறி இறக்கவும். வாணலியில் தாளிக்கக் கொடுத்துள்ள பொருள்களைச் சேர்த்துத் தாளித்து சாத கலவையுடன் கலக்கவும். மேலே கொத்தமல்லித்தழை தூவி அலங்கரித்துப் பரிமாறவும்.

கல்யாண விருந்து!

சேமியா பகாளாபாத்

தேவை: *  வறுத்த சேமியா - ஒரு கப் * தயிர் - ஒன்றரை கப் * காய்ச்சி ஆறவைத்த பால் - அரை கப் * கடுகு - கால் டீஸ்பூன் * பச்சை மிளகாய் - 2 (பொடியாக நறுக்கவும்) * கடலைப்பருப்பு - ஒரு டீஸ்பூன் * தோல் சீவி துருவிய இஞ்சி - அரை டீஸ்பூன்  *மாதுளை முத்துகள் - 5 டேபிள்ஸ்பூன் * கொத்தமல்லித்தழை - சிறிதளவு * வறுத்த முந்திரி - 10 * தண்ணீர் - 3 கப் * எண்ணெய் - ஒரு டீஸ்பூன் * உப்பு - தேவையான அளவு.

செய்முறை:  பாத்திரத்தில் தண்ணீருடன் சிறிதளவு உப்பு சேர்த்து நன்கு கொதிக்கவிடவும். அதனுடன் சேமியா சேர்த்து வேகவிட்டு இறக்கி வடிகட்டி தண்ணீரில் அலசி ஆறவிடவும். வாணலியில் எண்ணெய்விட்டு கடுகு, கடலைப்பருப்பு, பச்சை மிளகாய், இஞ்சி தாளித்து சேமியாவுடன் கலக்கவும். பிறகு தயிர், பால், தேவையான அளவு உப்பு சேர்த்துக் கலக்கவும். மேலே முந்திரி, மாதுளை முத்துகள், கொத்தமல்லித்தழை தூவி அலங்கரித்துப் பரிமாறவும்.

கல்யாண விருந்து!

தக்காளிப் பச்சடி

தேவை:  * கடைந்த தயிர் - ஒரு கப் * தக்காளி - 2 (பொடியாக நறுக்கவும்) * கடுகு - கால் டீஸ்பூன் * சீரகம் - ஒரு டீஸ்பூன் * பெருங்காயத்தூள் - கால் டீஸ்பூன் * பச்சை மிளகாய் - ஒன்று (பொடியாக நறுக்கவும்) * காய்ந்த மிளகாய் - ஒன்று * கறிவேப்பிலை, கொத்தமல்லித்தழை - சிறிதளவு * எண்ணெய், உப்பு - தேவையான அளவு.

செய்முறை:   வாணலியில் எண்ணெய்விட்டு கடுகு, கறிவேப்பிலை, சீரகம், பெருங்காயத்தூள் தாளிக்கவும். அதனுடன் பச்சை மிளகாய், காய்ந்த மிளகாய், தக்காளித் துண்டுகள், சிறிதளவு உப்பு சேர்த்து வதக்கவும். பிறகு கொத்தமல்லித்தழை தூவி இறக்கி ஆறவிடவும். தயிருடன் சிறிதளவு உப்பு, ஆறிய தக்காளி கலவை சேர்த்துக் கலக்கவும்.

கல்யாண விருந்து!

பாசிப்பருப்பு கார கோசுமல்லி

தேவை:   * பாசிப்பருப்பு - 50 கிராம் * கேரட் துருவல், தேங்காய்த் துருவல் - தலா கால் கப் * பச்சை மிளகாய் - 2 (பொடியாக நறுக்கவும்) * கொத்தமல்லித்தழை - சிறிதளவு * எலுமிச்சைச் சாறு - ஒரு டீஸ்பூன் * உப்பு - தேவையான அளவு.

செய்முறை:    பாசிப்பருப்பைக் கழுவி ஒரு மணி நேரம் ஊறவிட்டுத் தண்ணீரை வடியவிடவும். அதனுடன் கேரட் துருவல், தேங்காய்த் துருவல், பச்சை மிளகாய், உப்பு, கொத்தமல்லித்தழை, எலுமிச்சைச்சாறு சேர்த்துக் கலந்தால் கார கோசுமல்லி ரெடி.

கல்யாண விருந்து!

கோஸ் தேங்காய்ப் பொரியல்

தேவை:   * முட்டைகோஸ் - கால் கிலோ (பொடியாக நறுக்கவும்) * பச்சை மிளகாய் - 4 (பொடியாக நறுக்கவும்) * கடுகு - கால் டீஸ்பூன் * கடலைப்பருப்பு, உளுத்தம்பருப்பு - தலா ஒரு டீஸ்பூன் * பெருங்காயத்தூள் - ஒரு சிட்டிகை * கறிவேப்பிலை - சிறிதளவு * தேங்காய்த் துருவல் - கால் கப் * எண்ணெய், உப்பு - தேவையான அளவு.

செய்முறை:    வாணலியில் எண்ணெய்விட்டு கடுகு, கறிவேப்பிலை, கடலைப்பருப்பு, உளுத்தம்பருப்பு, பெருங்காயத்தூள் தாளிக்கவும். அதனுடன் பச்சை மிளகாய், கோஸ் சேர்த்து வதக்கி, சிறிதளவு தண்ணீர் தெளித்து மூடி வேகவிடவும். பிறகு உப்பு, தேங்காய்த் துருவல் சேர்த்துக் கிளறி இறக்கவும்.

கல்யாண விருந்து!

பீன்ஸ் கடலை உசிலி

தேவை: * பீன்ஸ் - கால் கிலோ (பொடியாக நறுக்கவும்) * கடலைப்பருப்பு - ஒரு கப் * காய்ந்த மிளகாய் - 5 * பெருங்காயத்தூள் - கால் டீஸ்பூன் * வேகவைத்த வேர்க்கடலை - கைப்பிடியளவு * கறிவேப்பிலை - சிறிதளவு * மஞ்சள்தூள் - ஒரு டீஸ்பூன் * கடுகு, கடலைப்பருப்பு, உளுத்தம்பருப்பு - தலா கால் டீஸ்பூன் * எண்ணெய், உப்பு - தேவையான அளவு.

செய்முறை:  கடலைப்பருப்பை ஒரு மணி நேரம் ஊறவைத்து வடியவிடவும். அதனுடன் பெருங்காயத்தூள், அரை டீஸ்பூன் மஞ்சள்தூள், சிறிதளவு உப்பு, காய்ந்த மிளகாய் சேர்த்து மிக்ஸியில் தண்ணீர்விடாமல் கொரகொரவென அரைத்தெடுக்கவும். இதை இட்லித் தட்டில் வைத்து ஆவியில் வேகவைத்து எடுக்கவும். ஆறியதும் பிரெட் தூள் பதத்துக்கு உதிர்க்கவும். பீன்ஸுடன் அரை டீஸ்பூன் மஞ்சள்தூள், சிறிதளவு தண்ணீர்விட்டு வேகவைத்து வடியவிடவும். அடி கனமான வாணலியில் சற்றுக் கூடுதலாக எண்ணெய்விட்டு கடுகு, கடலைப்பருப்பு, உளுத்தம்பருப்பு, சிறிதளவு பெருங்காயத்தூள், கறிவேப்பிலை தாளிக்கவும். அதனுடன் உதிர்த்த பருப்பு கலவை சேர்த்து, அடுப்பைச் சிறு தீயில் வைத்துக் கிளறவும். பிறகு வேகவைத்த பீன்ஸ், வேர்க்கடலை, தேவையான அளவு உப்பு சேர்த்துக் கிளறி இறக்கவும்.

கல்யாண விருந்து!

மலபார் அவியல்

தேவை:  *  நறுக்கிய கேரட், சேனைக்கிழங்கு, பூசணிக்காய், வாழைக்காய், முருங்கைக்காய், மாங்காய் கலவை - ஒரு கப் * பச்சை மிளகாய் - 3 * தயிர் - ஒரு கப் * சீரகம் - 2 டீஸ்பூன் * தேங்காய்த் துருவல் - அரை கப் * தோல் சீவிய இஞ்சி - சிறிதளவு * மஞ்சள்தூள் - கால் டீஸ்பூன் * கடுகு - கால் டீஸ்பூன் * கறிவேப்பிலை - சிறிதளவு * காய்ந்த மிளகாய் - 2 * தேங்காய் எண்ணெய் - 4 டீஸ்பூன் * உப்பு - தேவையான அளவு.

செய்முறை:     தேங்காய்த் துருவலுடன் பச்சை மிளகாய், சீரகம், இஞ்சி சேர்த்து தண்ணீர்விடாமல் அரைத்தெடுக்கவும். காய்கறிகளுடன் தேவையான அளவு தண்ணீர், மஞ்சள்தூள் சேர்த்து வேகவிடவும். அதனுடன் அரைத்ததைச் சேர்த்து, உப்பு போட்டு நன்கு கிளறவும். பிறகு தயிர் சேர்த்துக் கிளறி 2 நிமிடங்கள் கழித்து இறக்கவும். வாணலியில் தேங்காய் எண்ணெய்விட்டு கடுகு, கறிவேப்பிலை, காய்ந்த மிளகாய் தாளித்துச் சேர்க்கவும்.

கல்யாண விருந்து!

கத்திரிக்காய் சாப்ஸ்

தேவை:    * கத்திரிக்காய் - கால் கிலோ (பொடியாக நறுக்கவும்) * வெங்காயம் - ஒன்று (பொடியாக நறுக்கவும்) * தேங்காய்த் துருவல் - 4 டீஸ்பூன் * மிளகு - 4 * மிளகாய்த்தூள் - ஒரு டீஸ்பூன் * பூண்டு - 4 பல் * கசகசா - அரை டீஸ்பூன் * கடுகு - கால் டீஸ்பூன் * கறிவேப்பிலை, கொத்தமல்லித்தழை - சிறிதளவு * எண்ணெய், உப்பு - தேவையான அளவு.

செய்முறை:    தேங்காய்த் துருவலுடன் பூண்டு, மிளகு, மிளகாய்த்தூள், கசகசா சேர்த்து மிக்ஸியில் விழுதாக அரைத்தெடுக்கவும். அதனுடன் கொத்தமல்லித்தழை, கத்திரிக்காய்த் துண்டுகள், உப்பு சேர்த்துக் கலக்கவும். வாணலியில் எண்ணெய்விட்டு கடுகு, கறிவேப்பிலை தாளித்து, வெங்காயம் சேர்த்து வதக்கவும். அதனுடன் கத்திரிக்காய் கலவை சேர்த்துக் கலந்து நன்கு வேகவிட்டு இறக்கவும்.

கல்யாண விருந்து!

பேபி பொட்டேட்டோ ரோஸ்ட்

தேவை:   *  குட்டி உருளைக்கிழங்கு - கால் கிலோ * கடுகு - கால் டீஸ்பூன் * கறிவேப்பிலை - சிறிதளவு * கடலைப்பருப்பு, உளுத்தம்பருப்பு - தலா ஒரு டீஸ்பூன் * பெருங்காயத்தூள் - கால் டீஸ்பூன் * மஞ்சள்தூள் - ஒரு சிட்டிகை * மிளகாய்த்தூள் - ஒரு டீஸ்பூன் * கொத்தமல்லித்தழை - சிறிதளவு * எண்ணெய், உப்பு - தேவையான அளவு.

வறுத்து அரைக்க: * கடலைப்பருப்பு, உளுத்தம்பருப்பு - தலா 2 டீஸ்பூன் * காய்ந்த மிளகாய் - 3 * மிளகு - அரை டீஸ்பூன்.

செய்முறை:  உருளைக்கிழங்கை வேகவைத்துத் தோல் உரிக்கவும். வெறும் வாணலியில் வறுத்து அரைக்கக் கொடுத்துள்ள பொருள்களை ஒன்றாகச் சேர்த்து வறுத்தெடுக்கவும். ஆறியதும் மிக்ஸியில் ஒன்றிரண்டாக அரைத்தெடுக்கவும். அதே வாணலியில் எண்ணெய்விட்டு கடுகு, கடலைப்பருப்பு, உளுத்தம்பருப்பு, கறிவேப்பிலை, பெருங்காயத்தூள் தாளிக்கவும். அதனுடன் மஞ்சள்தூள், மிளகாய்த்தூள் சேர்த்து வதக்கவும். பிறகு உருளைக்கிழங்கு, உப்பு, அரைத்த பொடி சேர்த்துக் கிளறவும். மேலே கொத்தமல்லித்தழை தூவிக் கிளறி இறக்கவும்.

குறிப்பு:     முதல் நாளே உருளைக்கிழங்கை வேகவைத்துத் தோல் உரித்து, ஃப்ரிட்ஜில் வைத்து எடுத்துச் செய்தால் உடையாமல் வரும்.

கல்யாண விருந்து!

மசாலா சேனை வறுவல்

தேவை:   * சேனைக்கிழங்கு - கால் கிலோ * இஞ்சி - பூண்டு விழுது - ஒரு டீஸ்பூன் * கடுகு - கால் டீஸ்பூன் * சீரகம் - ஒரு டீஸ்பூன் * கறிவேப்பிலை - சிறிதளவு * கரம் மசாலாத்தூள் - ஒரு டீஸ்பூன் * தனியாத்தூள் (மல்லித்தூள்) - அரை டீஸ்பூன் * மஞ்சள்தூள் - கால் டீஸ்பூன் * மிளகாய்த்தூள் - ஒரு டீஸ்பூன் * எண்ணெய், உப்பு - தேவையான அளவு.

செய்முறை:   சேனைக்கிழங்கை தோல்சீவி, சதுரத் துண்டுகளாக்கவும், அதனுடன் மஞ்சள்தூள், சிறிதளவு உப்பு சேர்த்து முக்கால் வேக்காடு பதத்தில் வேகவிட்டு எடுத்து, நீரை நன்கு வடியவிடவும். வாணலியில் எண்ணெய்விட்டு சேனைத் துண்டுகளைச் சேர்த்துப் பொரித்தெடுக்கவும், மற்றொரு வாணலியில் சிறிதளவு எண்ணெய்விட்டு கடுகு, சீரகம், கறிவேப்பிலை தாளிக்கவும். அதனுடன் இஞ்சி - பூண்டு விழுது, கரம் மசாலாத்தூள், மிளகாய்த்தூள், தனியாத்தூள், தேவையான அளவு உப்பு, சேனைத் துண்டுகள் சேர்த்து நன்கு வதக்கி இறக்கவும்.

கல்யாண விருந்து!

சேப்பங்கிழங்கு ரோஸ்ட்

தேவை:   * சேப்பங்கிழங்கு - கால் கிலோ * மஞ்சள்தூள் - கால் டீஸ்பூன் * மிளகாய்த்தூள் - 2 டீஸ்பூன் * தனியாத்தூள் (மல்லித்தூள்) - அரை டீஸ்பூன் * கரம் மசாலாத்தூள் - ஒரு டீஸ்பூன் * கடுகு - கால் டீஸ்பூன் * கறிவேப்பிலை - சிறிதளவு * பெருங்காயத்தூள் - கால் டீஸ்பூன் * எண்ணெய், உப்பு - தேவையான அளவு.

செய்முறை:    சேப்பங்கிழங்குடன் மூழ்கும் அளவு தண்ணீர்விட்டு வேகவிட்டு எடுக்கவும். ஆறியதும் தோல் நீக்கி தண்ணீரில் அலசி எடுக்கவும். அதனுடன் மஞ்சள்தூள், மிளகாய்த்தூள், தனியாத்தூள், கரம் மசாலாத்தூள், உப்பு சேர்த்துக் கலக்கவும். பேனில் (Pan) சற்றுக் கூடுதலாக எண்ணெய்விட்டு கடுகு, கறிவேப்பிலை, பெருங்காயத்தூள் தாளிக்கவும். அதனுடன் சேப்பங்கிழங்கு சேர்த்து நன்கு புரட்டி ரோஸ்ட் செய்து எடுக்கவும்.

கல்யாண விருந்து!

பனீர் மசாலா பக்கோடா

தேவை:     * பனீர் துண்டுகள் - 10 * கடலை மாவு - 4 டீஸ்பூன் * அரிசி மாவு - 2 டீஸ்பூன் * மிளகாய்த்தூள், கொத்தமல்லித்தழை - சிறிதளவு * தோல் சீவி, துருவிய இஞ்சி - 3 டீஸ்பூன் * கறிவேப்பிலை - சிறிதளவு * எண்ணெய், உப்பு - தேவையான அளவு.

செய்முறை:   பனீர் துண்டுகளுடன் மிளகாய்த்தூள், இஞ்சி, உப்பு, கொத்தமல்லித்தழை, கடலை மாவு, அரிசி மாவு சேர்த்து, சிறிதளவு தண்ணீர் சேர்த்துப் பிசிறவும். இதுதான் பனீர் மசாலா. வாணலியில் எண்ணெயைக் காயவைத்து பனீர் மசாலாவைப் பக்கோடாக்களாகப் எடுத்துப் போட்டுப் பொரித்தெடுக்கவும். அதே எண்ணெயில் கறிவேப்பிலையைச் சேர்த்துப் பொரித்தெடுத்து பனீர் பக்கோடாவுடன் கலந்து பரிமாறவும்.

கல்யாண விருந்து!

ஸ்பிரிங் ரோல்

தேவை:   *  ஸ்பிரிங் ரோல் ஷீட்ஸ் - 10 (கடைகளில் கிடைக்கும்) * கேரட் துருவல், முட்டைகோஸ் துருவல் - தலா கால் கப் * அரிசி மாவு - 4 டீஸ்பூன் * சில்லி சாஸ், சோயா சாஸ், மிளகுத்தூள் - தலா ஒரு டீஸ்பூன் * எண்ணெய், உப்பு - தேவையான அளவு.

செய்முறை:   அரிசி மாவுடன் சிறிதளவு தண்ணீர் சேர்த்துக் கெட்டியாகக் கரைக்கவும். வாணலியில் சிறிதளவு எண்ணெய்விட்டு கேரட் துருவல், கோஸ் துருவல் சேர்த்து வதக்கவும். அதனுடன் உப்பு, மிளகுத்தூள், சோயா சாஸ், சில்லி சாஸ் சேர்த்துக் கிளறி இறக்கி ஆறவிடவும். ஸ்பிரிங் ரோல் ஷீட்டின் மீது சிறிதளவு காய்கறிக் கலவை வைத்துச் சுருட்டி, ஓரங்களை அரிசி மாவு கலவையால் ஒட்டவும். வாணலியில் எண்ணெயைக் காயவைத்து ரோல்களைப் போட்டுப் பொரித்தெடுக்கவும்.

கல்யாண விருந்து!

அரைத்துவிட்ட கதம்ப சாம்பார்

தேவை: * துவரம்பருப்பு - 50 கிராம் * மஞ்சள்தூள் - கால் டீஸ்பூன் * புளி - எலுமிச்சை அளவு * முருங்கைத் துண்டுகள் - 5 * தக்காளி - 2 * சின்ன வெங்காயம் - 5 * கத்திரிக்காய் - ஒன்று (நீளவாக்கில் நறுக்கவும்) * கொத்தமல்லித்தழை - சிறிதளவு * உப்பு - தேவையான அளவு.

வறுத்து அரைக்க : * தேங்காய்த் துருவல் - கால் கப் * தனியா - ஒரு டீஸ்பூன் * கடலைப்பருப்பு - 2 டீஸ்பூன் * சீரகம் - ஒரு டீஸ்பூன் * மிளகு - அரை டீஸ்பூன் * காய்ந்த மிளகாய் - 5 * வெந்தயம் - கால் டீஸ்பூன் * பெருங்காய்த்தூள் - கால் டீஸ்பூன் * கறிவேப்பிலை - சிறிதளவு.

தாளிக்க: * கடுகு - கால் டீஸ்பூன் * கறிவேப்பிலை - சிறிதளவு * தேங்காய் எண்ணெய் - 2 டீஸ்பூன் * காய்ந்த மிளகாய் - ஒன்று.

செய்முறை:  வெறும் வாணலியில் வறுத்து அரைக்கக் கொடுத்துள்ள பொருள்களைச் சேர்த்து வறுத்து அரைத்தெடுக்கவும். பருப்புடன் மஞ்சள்தூள் சேர்த்து மலர வேகவிடவும். புளியைத் தண்ணீரில் ஊறவைத்துக் கரைத்து வடிகட்டவும். வாணலியில் தாளிக்கக் கொடுத்துள்ள பொருள்களைச் சேர்த்துத் தாளிக்கவும். அதனுடன் சின்ன வெங்காயம், தக்காளி, முருங்கைக்காய், கத்திரிக்காய் சேர்த்து வதக்கி, தண்ணீர்விட்டு வேகவிடவும். பிறகு புளிக்கரைசல், உப்பு, அரைத்த விழுது சேர்த்துக் கொதிக்கவிடவும். இறுதியாகப் பருப்பு சேர்த்து ஒரு கொதிவிட்டு இறக்கவும். மேலே கொத்தமல்லித்தழை தூவிப் பரிமாறவும்.

கல்யாண விருந்து!

கல்யாண வத்தக்குழம்பு

தேவை:    * புளி - எலுமிச்சை அளவு * தோலுரித்த முழு சின்ன வெங்காயம் - கால் கப் * முருங்கைத் துண்டுகள் - 10 * மணத்தக்காளி வற்றல் - ஒரு டீஸ்பூன் * கடுகு - கால் டீஸ்பூன் * கறிவேப்பிலை - சிறிதளவு * மஞ்சள்தூள் - கால் டீஸ்பூன் * வத்தக்குழம்பு பொடி - 4 டீஸ்பூன் * நல்லெண்ணெய் - 50 மில்லி * உப்பு - தேவையான அளவு.

செய்முறை:     புளியைத் தண்ணீரில் ஊறவைத்துக் கரைத்து வடிகட்டவும். வாணலியில் நல்லெண்ணெய்விட்டு கடுகு, கறிவேப்பிலை தாளிக்கவும். அதனுடன் சின்ன வெங்காயம், முருங்கைக்காய், மணத்தக்காளி வற்றல் சேர்த்து வதக்கவும். பிறகு புளிக்கரைசல், உப்பு, மஞ்சள்தூள், வத்தக்குழம்பு பொடி சேர்த்துக் கொதிக்கவிடவும். குழம்பு நன்கு கொதித்து எண்ணெய் பிரிந்து வரும் நேரத்தில் இறக்கி, சூடான சாதத்துடன் பரிமாறவும்.

கல்யாண விருந்து!

வெண்டைக்காய் மோர்க்குழம்பு

தேவை:  * கடைந்த கெட்டி மோர் - ஒரு கப் * வெண்டைக்காய் - 5 (ஓரங்களை நீக்கிவிட்டு, ஒரு இன்ச் துண்டுகளாக நறுக்கவும்) * மஞ்சள்தூள், பெருங்காயத்தூள் - தலா கால் டீஸ்பூன் * கடுகு - கால் டீஸ்பூன் * கறிவேப்பிலை - சிறிதளவு * தேங்காய்த் துருவல் - கால் கப் * எண்ணெய், உப்பு - தேவையான அளவு.

அரைக்க:     * சீரகம், தனியா (மல்லி), பச்சரிசி - தலா ஒரு டீஸ்பூன் * தோல் சீவிய இஞ்சி - சிறிய துண்டு * பச்சை மிளகாய் - 3.

செய்முறை:    அரைக்கக் கொடுத்துள்ள பொருள்களை ஒன்றாகச் சேர்த்து 15 நிமிடங்கள் ஊறவைக்கவும். அதனுடன் தேங்காய்த் துருவல் சேர்த்து விழுதாக அரைத்தெடுக்கவும். மோருடன் அரைத்த விழுது, மஞ்சள்தூள், உப்பு, பெருங்காயத்தூள் சேர்த்துக் கலந்து சூடாக்கி, நுரை வரும் வரை கொதிக்கவிட்டு இறக்கவும். வாணலியில் எண்ணெய்விட்டு கடுகு, கறிவேப்பிலை தாளிக்கவும். அதனுடன் வெண்டைக்காய் துண்டுகள் சேர்த்து நன்கு வறுத்தெடுத்து மோர்க்குழம்புடன் கலந்து பரிமாறவும்.

குறிப்பு :     வெண்டைக்காய்க்குப் பதிலாக வேகவைத்த சேப்பங்கிழங்கு, வறுத்த சுண்டைக்காய் வற்றல் சேர்க்கலாம்.

கல்யாண விருந்து!

கல்யாண ரசம்

தேவை:   * துவரம்பருப்பு - 50 கிராம் * தக்காளி - ஒன்று * புளி - நெல்லிக்காய் அளவு * ரசப்பொடி - ஒரு டீஸ்பூன் * கறிவேப்பிலை - சிறிதளவு * மஞ்சள்தூள் - கால் டீஸ்பூன் * பச்சை மிளகாய் - ஒன்று (இரண்டாகக் கீறவும்) * காய்ந்த மிளகாய் - ஒன்று * மிளகு - சீரகத்தூள் - அரை டீஸ்பூன் * கடுகு, பெருங்காயத்தூள் - தலா கால் டீஸ்பூன் * கொத்தமல்லித்தழை - சிறிதளவு * நெய், உப்பு - தேவையான அளவு.

செய்முறை:      துவரம்பருப்புடன் சிறிதளவு மஞ்சள்தூள் சேர்த்துக் குழைய வேகவிடவும். புளியைத் தண்ணீரில் ஊறவைத்துக் கரைத்து வடிகட்டவும். புளிக்கரைசலுடன் உப்பு, மஞ்சள்தூள், ரசப்பொடி, பச்சை மிளகாய், காய்ந்த மிளகாய், கறிவேப்பிலை, தக்காளி சேர்த்துக் கரைத்துக் கொதிக்கவிடவும். புளியின் பச்சை வாசனை போன பிறகு வேகவைத்த பருப்பு, மிளகு - சீரகத்தூள் சேர்த்து நுரைவரும்வரை கொதிவிட்டு இறக்கவும். வாணலியில் நெய்விட்டு கடுகு, பெருங்காயத்தூள் தாளித்துச் சேர்க்கவும். மேலே கொத்தமல்லித்தழை தூவி சூடான சாதத்துடன் பரிமாறவும்.

கல்யாண விருந்து!

பொடி மாங்காய் ஊறுகாய்

தேவை:   *  பச்சை மாங்காய் - 2 * மஞ்சள்தூள் - அரை டீஸ்பூன் * மிளகாய்த்தூள் - 3 டீஸ்பூன் * கடுகு - ஒரு டீஸ்பூன் * பெருங்காயத்தூள் - கால் டீஸ்பூன் * கறிவேப்பிலை - சிறிதளவு  நல்லெண்ணெய், உப்பு - தேவையான அளவு.

செய்முறை:      மாங்காயின் கொட்டையை நீக்கி, பொடியாக நறுக்கவும். அதனுடன் உப்பு சேர்த்து ஒரு மணி நேரம் ஊறவிடவும். வாணலியில் எண்ணெய் விட்டு கடுகு, கறிவேப்பிலை, பெருங்காயத்தூள் தாளிக்கவும். அதனுடன் மஞ்சள்தூள், மிளகாய்த்தூள் சேர்த்து நன்கு கிளறி இறக்கி, ஊறவைத்த மாங்காய்த் துண்டுகளுடன் சேர்த்துக் கலக்கவும்.

கல்யாண விருந்து!

இஞ்சிப்புளி

தேவை:   *  தோல் சீவி துருவிய இஞ்சி - 100 கிராம் * பச்சை மிளகாய் - 4 (பொடியாக நறுக்கவும்) * புளி - எலுமிச்சை அளவு * மஞ்சள்தூள் - கால் டீஸ்பூன் * மிளகாய்த்தூள் - 2 டீஸ்பூன் * வெல்லத்தூள் - சிறிதளவு * கடுகு - கால் டீஸ்பூன் * பெருங்காயத்தூள் - ஒரு சிட்டிகை * கறிவேப்பிலை - சிறிதளவு * எண்ணெய், உப்பு - தேவையான அளவு.

செய்முறை:     புளியைத் தண்ணீரில் ஊறவைத்துக் கரைத்து வடிகட்டவும். வாணலியில் எண்ணெய்விட்டுச் சூடாக்கி, கடுகு, கறிவேப்பிலை, பெருங்காயத்தூள் தாளிக்கவும். அதனுடன் மஞ்சள்தூள், இஞ்சித் துருவல், பச்சை மிளகாய் சேர்த்து வதக்கவும். பிறகு புளிக்கரைசல், உப்பு, மிளகாய்த்தூள் சேர்த்துக் கொதிக்கவிடவும். கலவை நன்கு கொதித்துக் கெட்டியாக வரும்போது வெல்லம் சேர்த்துக் கலந்து இறக்கவும்.

கல்யாண விருந்து!

கல்யாண சமையல் சாதம்!

கல்யாண சீஸன் களைகட்டும் நேரமிது. கல்யாணம் என்றதுமே அனைவருக்கும் நினைவுக்கு வருவது விருந்துதான். கல்யாண விருந்தில் பரிமாறப்பட்ட உணவு வகைகளின் சுவையைப் பற்றி பல நாள்களுக்குப் பிறகும் சொல்லி மகிழ்பவர்கள் ஏராளம். ``இதையெல்லாம் எப்படித்தான் இவ்வளவு சூப்பரா பண்றாங்களோ!’’ என்று பிரமிப்பவர்களும் உண்டு.

``கல்யாணத்தில் பரிமாறப்படும் விதவிதமான, ருசிகரமான உணவுகளை நம் வீட்டிலேயே செய்து பரிமாறலாம்’’ என்று அன்புடன் அழைப்புவிடுக்கிறார் சமையல் கலைஞர் தீபா பாலச்சந்தர்.

``மக்கன் பேடா, பாதாம் கீர், ரசமலாய், கோசுமல்லி, கதம்ப சாம்பார், மலபார் அவியல், பிசிபேளாபாத், இளநீர் பாயசம், ஸ்பிரிங் ரோல், காஷ்மீரி புலாவ், கத்திரிக்காய் சாப்ஸ் என்று இங்கே அணிவகுத்து நிற்கும் ஸ்பெஷல் அயிட்டங்களைச் செய்து பரிமாறினால், பாராட்டு மழையில் நீங்கள் நனையலாம்’’ என்று உற்சாகக் குரலில் ஊக்கமளிக்கிறார் தீபா.

படங்கள்: சொ.பாலசுப்ரமணியன், வீ.நாகமணி