Published:Updated:

உணவே மருந்து! - உடல்நலம் காக்கும் உன்னத உணவுகள் 30

உணவே மருந்து! - உடல்நலம் காக்கும் உன்னத உணவுகள் 30
பிரீமியம் ஸ்டோரி
உணவே மருந்து! - உடல்நலம் காக்கும் உன்னத உணவுகள் 30

உணவே மருந்து! - உடல்நலம் காக்கும் உன்னத உணவுகள் 30

உணவே மருந்து! - உடல்நலம் காக்கும் உன்னத உணவுகள் 30

உணவே மருந்து! - உடல்நலம் காக்கும் உன்னத உணவுகள் 30

Published:Updated:
உணவே மருந்து! - உடல்நலம் காக்கும் உன்னத உணவுகள் 30
பிரீமியம் ஸ்டோரி
உணவே மருந்து! - உடல்நலம் காக்கும் உன்னத உணவுகள் 30
உணவே மருந்து! - உடல்நலம் காக்கும் உன்னத உணவுகள் 30

நோய் எதிர்ப்பு சக்தி பானம்

உணவே மருந்து! - உடல்நலம் காக்கும் உன்னத உணவுகள் 30

ஒட்டுமொத்த விகடனுக்கும் ஒரே ஷார்ட்கட்!

தேவை:  ஆப்பிள் (சிறியது), பீட்ரூட், கேரட், நெல்லிக்காய் - தலா ஒன்று இஞ்சி - ஒரு சிறிய துண்டு  பேரீச்சை - 3  மிளகுத்தூள், சீரகத்தூள் - தலா கால் டீஸ்பூன்  பனங்கற்கண்டுத்தூள் - ஒரு டீஸ்பூன்  தண்ணீர் - 200 மில்லி.

செய்முறை: பீட்ரூட், இஞ்சியைத் தோல் சீவவும், பேரீச்சை, நெல்லிக்காயைக் கொட்டை நீக்கவும். சுத்தம் செய்து நறுக்கிய ஆப்பிள், பீட்ரூட், கேரட், நெல்லிக்காய், இஞ்சி மற்றும் பேரீச்சை, மிளகுத்தூள், சீரகத்தூள், பனங்கற் கண்டுத்தூள் ஆகியவற்றை ஒரு மிக்ஸி ஜாரில் சேர்த்து ஒரு சுற்றுச் சுற்றவும். பிறகு தண்ணீர்விட்டு மையாக அரைத்து வடிகட்டாமல் அப்படியே அருந்தவும். இதைக் காலை உணவுக்குப் பதில் ஒரு கிளாஸ் அருந்தலாம். வயிறு நிறையும்; புத்துணர்ச்சி கிடைக்கும்.

பயன்: இது அனைத்துவிதமான வைட்டமின்கள், நார்ச்சத்து, புரதச்சத்து, இரும்புச்சத்து, அமினோ அமிலங்கள் ஒருசேர பெற்றிருக்கும் பானம். தலைமுடியில் தொடங்கி கால் பாதம் வரை உடலின் அனைத்துப் பாகங்களுக்கும் பயனளிக்கும் விதமாகவும் நோய் எதிர்ப்பு சக்தி அளிப்பதாகவும் விளங்கும்.

ஸ்பினச் இம்யூனிட்டி ஸ்பெஷல் சூப்

உணவே மருந்து! - உடல்நலம் காக்கும் உன்னத உணவுகள் 30

தேவை: பசலைக்கீரை முருங்கைக்கீரை, வெந்தயக்கீரை - தலா ஒரு கைப்பிடி அளவு  பூண்டு - 5 பற்கள்  சின்ன வெங்காயம் - 8 (தோலுரித்து, இரண்டாக நறுக்கவும்)  அரிசி கழுவிய நீர் - 3 கப்  மிளகுத்தூள், சீரகத்தூள், மஞ்சள்தூள், ஆளிவிதைப் பொடி - தலா கால் டீஸ்பூன்  கறிவேப்பிலை, கொத்தமல்லித்தழை, புதினா சேர்த்து - ஒரு கைப்பிடி அளவு  தேங்காய்ப்பால் - 100 மில்லி  உப்பு - தேவையான அளவு.

செய்முறை: குக்கரில் சுத்தம் செய்து நறுக்கிய கீரை வகைகளுடன் கறிவேப்பிலை, புதினா, கொத்தமல்லித்தழை சேர்த்து, அதனுடன் பூண்டு, உப்பு, மஞ்சள்தூள், சின்ன வெங்காயம், ஆளிவிதைப் பொடி மற்றும் அரிசி கழுவிய நீர் சேர்த்து, குக்கரை மூடி 4 விசில் வந்தவுடன் இறக்கவும். ஆவி அடங்கியபின் குக்கரைத் திறந்து நன்கு கடைந்து வடிகட்டி, மிளகுத்தூள், சீரகத்தூள் மற்றும் தேங்காய்ப்பால் சேர்த்து இளஞ்சூடாகப் பருகவும்.

பயன்: இந்த சூப் நோய் எதிர்ப்பு சக்தி பெற மிகவும் பொருத்தமான ஒன்றாகும். கீரையில் அதிக ஃபோலிக் ஆசிட் உள்ளது. இது ரத்த சோகையைப் பெருமளவில் தவிர்க்கிறது. உணவில் புரதத்தைக் கூட்டி வளர்ச்சியுறவும், பார்வைத் திறன் மேம்படவும், சருமப் பராமரிப்பு மற்றும் ரத்த விருத்திக்கும் இந்த சூப் உதவும். கெட்ட கொழுப்பைக் கரைக்கும்; வயிற்றுப்புண், வாய்ப்புண்ணை சரி செய்யும்; ரத்தத்தில் சர்க்கரை அளவைக் கட்டுப்படுத்தும்.

செவ்வாழையிலை கறி

உணவே மருந்து! - உடல்நலம் காக்கும் உன்னத உணவுகள் 30

தேவை: செவ்வாழைக்காய் (பெரியது) - ஒன்று  செவ்வாழையிலை - ஒன்று  மஞ்சள்தூள் - கால் டீஸ்பூன்  மிளகுத்தூள், மல்லித்தூள் (தனியாத்தூள்) - தலா ஒரு டீஸ்பூன் தயிர் - ஒரு டீஸ்பூன்  நறுக்கிய சின்ன வெங்காயம், பொடியாக நறுக்கிய தக்காளி - தலா ஒரு குழிக்கரண்டி அளவு  இஞ்சி - பூண்டு விழுது - ஒரு டேபிள்ஸ்பூன் புளிக்கரைசல் - ஒரு டேபிள்ஸ்பூன் சாம்பார் பொடி - ஒரு டேபிள்ஸ்பூன்  எண்ணெய், உப்பு - தேவையான அளவு.

தாளிக்க: 
எண்ணெய் - தேவையான அளவு  கடுகு, சீரகம் - தலா கால் டீஸ்பூன்  கறிவேப்பிலை - சிறிதளவு.

செய்முறை: வாழைக்காயைத் தோல் சீவி நறுக்கி அதனுடன் தேவையான அளவு உப்பு, மஞ்சள்தூள், மல்லித்தூள், மிளகுத்தூள் மற்றும் புளிக்கரைசல்விட்டு நன்றாகப் பிசிறவும். தோசைக்கல்லில் எண்ணெய்விட்டு வாழைக்காயைச் சேர்த்து வறுத்து எடுக்கவும் (முக்கால் பாகம் வெந்தால் போதும்). பிறகு ஒரு கடாயில் தாளிக்கக் கொடுத்துள்ள பொருள்களைக்கொண்டு தாளிதம் செய்து, நறுக்கிய சின்ன வெங்காயம் சேர்த்து வதக்கி, பிறகு தக்காளி மற்றும் இஞ்சி - பூண்டு விழுது, சாம்பார் பொடி சேர்த்து மேலும் வதக்கவும். அதனுடன் தயிர் மற்றும் உப்பு சேர்த்து, தேவையான நீர் தெளித்து (தேவைப்பட்டால் மட்டும்) நன்றாகக் கிளறவும். அதனுடன் வறுத்த வாழைக்காய் சேர்த்துப் புரட்டி அதை அப்படியே எடுத்து வாழையிலையின் நடுவில் வைத்து மடித்து, நாரால் கட்டி, இட்லி பாத்திரம் அல்லது ஸ்டீமரில் ஆவியில் வேகவைத்து எடுத்தால் வீடே மணக்கும் செவ்வாழையிலை கறி தயார்.

பயன்: வாழையிலையோடு சமைத்து உண்ணும்போது, அந்த இலையில் உள்ள ‘குளோரோபில்’ உணவை எளிதில் ஜீரணமாக்கும் சிறந்த பசி தூண்டியாகும். வயிற்றில் உள்ள புண்களைக் குணமாக்கும். வாழையிலை மற்றும் காயில் உள்ள நார்ச்சத்து கெட்ட கொழுப்பைக் கரைக்கும். மலச்சிக்கலைச் சரியாக்கும். வாழையிலை ஒரு நல்ல நச்சுமுறிப்பானும்கூட.

புரோக்கோலி பன்ச் ரைஸ்

உணவே மருந்து! - உடல்நலம் காக்கும் உன்னத உணவுகள் 30

தேவை: சுத்தம் செய்த புரோக்கோலி துண்டுகள் - ஒரு கப்  பாசுமதி (அ) சீரகசம்பா அரிசி - ஒரு கப்  தண்ணீர் - 2 கப்  புதினா, கொத்தமல்லித்தழை - தலா ஒரு கைப்பிடி அளவு  பச்சை மிளகாய் - 2 (கீறவும்)  பெரிய வெங்காயம், தக்காளி - தலா 2 (நறுக்கவும்)  இஞ்சி - பூண்டு விழுது - ஒரு டேபிள்ஸ்பூன் எலுமிச்சைப்பழம் - பாதியளவு  தயிர் - ஒரு டேபிள்ஸ்பூன்  மஞ்சள்தூள் - கால் டீஸ்பூன்  மிளகாய்த்தூள், மல்லித்தூள் (தனியாத்தூள்) - தலா ஒரு டீஸ்பூன்  கரம் மசாலாத்தூள் - கால் டீஸ்பூன்  நெய் - ஒரு டீஸ்பூன் எண்ணெய், உப்பு - தேவையான அளவு.

தாளிக்க:  பட்டை - 2 சிறிய துண்டு  கிராம்பு, ஏலக்காய் - தலா 2  சோம்பு - கால் டீஸ்பூன்.

செய்முறை: அரிசியைக் கழுவி 10 நிமிடங்கள் ஊறவிடவும். புரோக்கோலியைச் சுத்தம் செய்து தயிர், மஞ்சள்தூள் சேர்த்துப் புரட்டி வைக்கவும். குக்கரில் தேவையான அளவு எண்ணெய்விட்டு, தாளிக்கக் கொடுத்துள்ள பொருள்களைக்கொண்டு தாளிதம் செய்து, பிறகு வெங்காயம், பச்சை மிளகாய் சேர்த்து வதக்கவும். இதனுடன் இஞ்சி - பூண்டு விழுது மற்றும் தக்காளி சேர்த்து வதக்கவும். புதினா, கொத்தமல்லித்தழை சேர்த்து மேலும் வதக்கி, ஊறவைத்த அரிசி, புரோக்கோலியையும் சேர்க்கவும். அதனுடன் மிளகாய்த்தூள், மல்லித்தூள், கரம் மசாலாத்தூள், உப்பு சேர்த்து வதக்கி, தண்ணீர்விட்டு குக்கரை மூடவும். 2 விசில்விட்டு இறக்கி, குக்கரில் ஆவி அடங்கியதும் மூடியைத் திறந்து எலுமிச்சைச்சாறு மற்றும் நெய்விட்டுக் கிளறி எடுத்தால், கமகமக்கும் புரோக்கோலி பன்ச் ரைஸ் ரெடி!

பயன்: நோய் எதிர்ப்பு சக்தியை மேம்படுத்தும். புரோக்கோலியில் நிறைய ஆன்டி ஆக்ஸிடன்ட்ஸ் உள்ளதால், இதை மதிய உணவாகச் சிறியவர் முதல் பெரியவர்கள் வரை அனைவரும் உண்ணலாம்.  புரோக்கோலியில் வைட்டமின் சி மற்றும் பொட்டாசியம் அதிகம் உள்ளது.

யோகர்ட் தர்பார்

உணவே மருந்து! - உடல்நலம் காக்கும் உன்னத உணவுகள் 30

தேவை:  யோகர்ட் - 100 மில்லி  ஸ்ட்ராபெர்ரி பழம் - 2  தேன் - ஒரு டேபிள்ஸ்பூன்  சாட் மசாலாத்தூள் - 2 சிட்டிகை  பொடி செய்த ஓமம் - ஒரு சிட்டிகை  கறுப்பு உப்பு - ஒரு சிட்டிகை.

செய்முறை: யோகர்ட் உடன் பொடியாக நறுக்கிய ஸ்ட்ராபெர்ரி சேர்த்துக் கடைந்து சாட் மசாலாத்தூள், ஓமம், தேன், கறுப்பு உப்பு சேர்த்துக் கலந்து எடுத்தால் யோகர்ட் தர்பார் ரெடி.

பயன்: இதில் உடலுக்கு நன்மை செய்யும் நல்ல பாக்டீரியாக்கள் இருப்பதால் இது ஒரு சிறந்த நோய் எதிர்ப்பு சக்தி தரும் பொருளாகும். இதில் உள்ள வைட்டமின் சி, பி 6, பி 12 போன்றவை செரிமானத்துக்கு உதவுகின்றன. இதில் உள்ள ‘புரோபயாடிக்’ பாக்டீரியா செரிமான மண்டலத்துக்கு வலுவூட்டுகிறது. பல் மற்றும் எலும்புச் சிதைவைத் தடுக்கிறது.

குறிப்பு: யோகர்ட் இல்லையெனில் வீட்டுத் தயிரிலே இதைச் செய்யலாம்.

இஞ்சி பூண்டு புதினா நீர்

உணவே மருந்து! - உடல்நலம் காக்கும் உன்னத உணவுகள் 30

தேவை: தோல் சீவிய இஞ்சி, தோலுரித்த பூண்டு - தலா 50 கிராம் எலுமிச்சைப்பழம் - ஒன்று (சாறு பிழியவும்)  தேன் - ஒரு டேபிள்ஸ்பூன்  தண்ணீர் - 650 மில்லி  புதினா இலை - 10.

செய்முறை: இஞ்சியுடன் பூண்டு சேர்த்து இடிக்கவும். அதனுடன் 650 மில்லி தண்ணீர் சேர்த்து, கசக்கிய புதினா இலைகளும் சேர்த்து நன்கு கொதிக்கவிடவும். பிறகு 200 மில்லி நீராக வற்றியதும் வடிகட்டி அதனுடன் தேன், எலுமிச்சைச்சாறு சேர்த்து இளஞ்சூடாகக் காலை வேளையில் 50-ல் இருந்து 100 மில்லி வரை பருகலாம்.

பயன்: இது செரிமான மண்டலம் மற்றும் நோய் எதிர்ப்பு மண்டலத்தை வலுப்படுத்தும். சிறந்த நோய் எதிர்ப்பாற்றலைத் தரும். ரத்தத்தில் உள்ள கொழுப்பு நீங்க உதவும்; இதய தமனி அடைப்பைச் சரி செய்யும்; தொற்று நோய்களுக்கு மருந்தாகும். கருப்பை கோளாறுகளைச் சரி செய்யும். முகம் வசீகரமாகும்; ஆழ்ந்த தூக்கம் வரும்.

சூரியகாந்தி விதை புரோட்டீன் பொடி

உணவே மருந்து! - உடல்நலம் காக்கும் உன்னத உணவுகள் 30

தேவை: சூரியகாந்தி விதை, ஆளி விதை, கறுப்பு எள், கறுப்பு உளுந்து, பறங்கி விதை, துவரம்பருப்பு - தலா 50 கிராம்  கறிவேப்பிலை - 2 கைப்பிடி அளவு  வேர்க்கடலை - 20 கிராம்  பொட்டுக்கடலை - 50 கிராம்  மிளகு, சீரகம் - தலா ஒரு டீஸ்பூன் (விருப்பப்பட்டால் காய்ந்த மிளகாய் 5)  கல் உப்பு - தேவையான அளவு.

செய்முறை: கொடுக்கப்பட்டுள்ள பொருள்கள் அனைத்தையும் (கல் உப்பு தவிர) வெறும் கடாயில் தனி தனியாக வறுத்து, பிறகு கல் உப்பு சேர்த்துப் பொடிக்கவும். இதிலிருந்து ஒரு டீஸ்பூன் அளவு எடுத்துச் சூடான சாதம் மற்றும் இட்லி, தோசை வகைகளுடன் மற்றும் பொரியல் செய்யும்போது பயன்படுத்தலாம்.

பயன்: சூரியகாந்தி விதையில் வைட்டமின் ஈ அதிகம் உள்ளது. எனவே, இது சருமம் பொலிவடைய உதவும். இந்தப் பொடி ஆன்டி ஆக்ஸிடன்ட்ஸ் நிறைந்த புரோட்டீன் பொடியாக விளங்கும். இது நோய் எதிர்ப்பு சக்தி கொண்டது.  இதில் உள்ள அனைத்து விதைகள் மற்றும் பருப்புகளில் நல்ல கொழுப்பு உள்ளது.

நெல்லி புதினா சர்பத்

உணவே மருந்து! - உடல்நலம் காக்கும் உன்னத உணவுகள் 30

தேவை:  பெரிய நெல்லிக்காய் - 2  புதினா - ஒரு கைப்பிடி அளவு இஞ்சி - ஒரு சிறிய துண்டு  ஊறவைத்த பாதாம் பிசின் - அரை டீஸ்பூன்  தண்ணீர் - 200 மில்லி  தேன் - ஒரு டேபிள்ஸ்பூன் (அ) வெல்லத்தூள் - ஒரு டேபிள்ஸ்பூன்.

செய்முறை: ஒரு மிக்ஸி ஜாரில் கொட்டை நீக்கிய நெல்லிக்காய், புதினா மற்றும் தோல் சீவிய இஞ்சி, தண்ணீர் சேர்த்து நன்கு அரைத்து வடிகட்டி அதனுடன் தேன் (அ) வெல்லத்தூள் மற்றும் ஊறவைத்த பாதாம் பிசின் சேர்த்துப் பருகவும்.

பயன்: இது ஒரு நல்ல பசி தூண்டி மற்றும் செரிமான சர்பத். உடல் சூட்டைத் தணித்து, நோய் எதிர்பாற்றலை அதிகரிக்கும். வைட்டமின் சி அதிகம் நிறைந்த நெல்லி மற்றும் புதினாவின் வைட்டமின் ஏ கூட்டணி சேரும்போது உடலின் செல்களைப் புதுப்பிக்கும். வளரும் குழந்தைகள் முதல் பெரியவர்கள் வரை வாரம் மூன்று முறை இதைப் பருகலாம்.

ஆல்மண்ட் வித் டேட் ஸ்கொயர்

உணவே மருந்து! - உடல்நலம் காக்கும் உன்னத உணவுகள் 30

தேவை:  பாதாம், பேரீச்சை, முந்திரி, வேர்க்கடலை, பிஸ்தா, பொட்டுக்கடலை, சாரைப்பருப்பு, சூரியகாந்தி விதை - தலா 50 கிராம்  வெள்ளை எள் - 20 கிராம்  தேன் - ஒரு டேபிள்ஸ்பூன்  பட்டைப் பொடி - கால் டீஸ்பூன்  ஆளி விதை - 10 கிராம்.

செய்முறை: பாதாம், முந்திரி, வேர்க்கடலை, பிஸ்தா, பொட்டுக்கடலை, வெள்ளை எள், ஆளி விதை, சாரைப்பருப்பு, சூரியகாந்தி விதையை லேசாக வாசம் வரும் வரை வறுக்கவும். பேரீச்சையைக் கொட்டை நீக்கி சிறு சிறு துண்டுகளாக நறுக்கவும். ஒரு மிக்ஸி ஜாரில் வறுத்தவற்றைச் சேர்த்துக் கொரகொரப்பாகப் பொடித்து, தனியே எடுத்து வைக்கவும். பிறகு பேரீச்சை துண்டுகள் சேர்த்து ஒரு சுற்றி எடுக்கவும். கடைசியாக நட்ஸ் பொடி, பேரீச்சை, பட்டைப் பொடி, தேன் ஆகிவற்றைச் சேர்த்து ஒரு சுற்றுச் சுற்றி, அதை ஒரு தட்டில் போட்டு நன்றாகப் பிசைந்து சிறிய சதுரங்கள் அல்லது விருப்பமான வடிவில் செய்து வைக்கவும்.

பயன்: இதில் இரும்புச்சத்து மற்றும் புரதச்சத்து அபரிமிதமாக இருக்கும். மேலும், இதை ஒரு சிறிய துண்டைச் சுவைக்கும்போதே உடனடி எனர்ஜி கிடைக்கும். வளரும் குழந்தைகள் மற்றும் பதின்பருவ பெண்கள் மற்றும் அனைவருக்கும் ஏற்ற சக்தி மிகுந்த இந்த ஸ்நாக்ஸ் வகை உணவு, நோய் எதிர்ப்பு மண்டலத்தை வலுவானதாக்க மிகவும் துணைபுரியும்.

திராட்சை குலாய்லாமா

உணவே மருந்து! - உடல்நலம் காக்கும் உன்னத உணவுகள் 30

தேவை:  விதையுள்ள பன்னீர் திராட்சை - ஒரு கப்  நாட்டுச் சர்க்கரை - 2 டேபிள்ஸ்பூன்  இந்துப்பு, சீரகத்தூள், வெள்ளை மிளகுத்தூள், சுக்குத்தூள், திப்பிலிப் பொடி - தலா ஒரு சிட்டிகை  தண்ணீர் - 200 மில்லி.

செய்முறை: ஒரு மிக்ஸி ஜாரில் விதையுடன் உள்ள பன்னீர் திராட்சை, நாட்டுச் சர்க்கரை மற்றும்  நீர் சேர்த்து நன்கு மையாக அரைத்து வடிகட்டவும். அதில் இந்துப்பு, சீரகத்தூள், வெள்ளை மிளகுத்தூள், சுக்குத்தூள், திப்பிலிப் பொடி சேர்த்து நன்றாகக் கலக்கவும். காலை வேளை 11 மணி அளவில் இதை மதிய உணவுக்கு முன்பாக அருந்த, அந்த நாள் முழுவதும் புத்துணர்ச்சியுடன் இருப்பதை உணர முடியும்.

பயன்: இந்த பானம் இதயத்துக்கு மிகவும் நல்லது. நரம்பு சம்பந்தமான நோய்களுக்குச் சிறந்த நோய் எதிர்ப்பு காரணியாக இருக்கும். வாதம், பித்தம் போன்றவற்றைச் சமன் செய்யும். நாவறட்சியை நீக்கும்; நீர்க்கோவையைச் சரி செய்யும்.

திப்பிலி ரசம்

உணவே மருந்து! - உடல்நலம் காக்கும் உன்னத உணவுகள் 30

தேவை:  திப்பிலி - ஒரு டீஸ்பூன்  மிளகு - அரை டீஸ்பூன்  சீரகம் - ஒரு டீஸ்பூன்  மஞ்சள்தூள் - அரை டீஸ்பூன்  கறிவேப்பிலை - ஓர் ஆர்க்கு  வேகவைத்த பாசிப்பருப்பு நீர் - கால் கப்  புளி - சிறிய எலுமிச்சை அளவு  தக்காளி - 2  வெல்லம் - ஒரு சிறிய துண்டு  தண்ணீர் - 400 மில்லி  கொத்தமல்லித்தழை - சிறிதளவு  உப்பு - தேவையான அளவு.

தாளிக்க: நெய் - ஒரு டீஸ்பூன்  காய்ந்த மிளகாய் - 2  கடுகு, உளுந்து, வெந்தயம், சீரகம் - தலா கால் டீஸ்பூன்.

செய்முறை: திப்பிலி, மிளகு, சீரகம், கறிவேப்பிலையை வெறும் வாணலியில் வறுத்துப் பொடிக்கவும். ஒரு பாத்திரத்தில் புளியைக் கரைத்து வடிகட்டி, அதனுடன் தக்காளி சேர்த்துக் கரைத்து உப்பு, மஞ்சள்தூள் கலந்து சூடாக்கி, ஒரு கொதிவிடவும். பிறகு வறுத்துப் பொடித்த பொடியைத் தூவி  இன்னொரு கொதிவிடவும். இதனுடன் பாசிப்பருப்பு நீரைவிட்டு நுரைத்து வந்ததும் இறக்கவும். அதில் வெல்லம் மற்றும் கொத்தமல்லித்தழை சேர்க்கவும். பிறகு தாளிக்கக் கொடுத்துள்ள பொருள்களைக் கொண்டு தாளிதம் செய்து சேர்க்கவும். வீடே மணக்கும் திப்பிலி ரசம் ரெடி.

பயன்: திப்பிலி கபத்தை அகற்றும் சிறந்த மூலிகை நோய் எதிர்ப்பு காரணியாக விளங்கும். இது உடல்வலி, ஜலதோஷம் ஆகியவற்றுக்கு ஒரு சிறந்த மருந்து. வயிற்றுப்போக்கு, நீர்க்கோவை, வாய்வுக்கோளாறு  ஆகியவற்றைச் சரி செய்யும். இது ஒரு நல்ல பசி தூண்டியும்கூட.

கேரட் பீட்ரூட் சர்பத்

உணவே மருந்து! - உடல்நலம் காக்கும் உன்னத உணவுகள் 30

தேவை:  கேரட் - 2  பீட்ரூட் (சிறியது) - ஒன்று (தோல் சீவவும்)  தேங்காய் - ஒரு துண்டு  ஏலக்காய் - ஒன்று  நாட்டுச் சர்க்கரை - ஒரு டீஸ்பூன் (அ) தேன் - ஒரு டீஸ்பூன்  எலுமிச்சைப்பழம் - பாதியளவு  சாட் மசாலாத்தூள் - ஒரு சிட்டிகை  தண்ணீர் - 200 மில்லி  ஊறிய பாதாம் பிசின் - அரை டீஸ்பூன்.

செய்முறை: ஒரு மிக்ஸி ஜாரில் சுத்தம் செய்து நறுக்கிய கேரட், பீட்ரூட், தேங்காய் மற்றும் ஏலக்காய், தண்ணீர் சேர்த்து நன்கு மையாக அரைத்து வடிகட்டவும். அதில் எலுமிச்சைப்பழம் பிழிந்து, நாட்டுச் சர்க்கரை (அ) தேன் மற்றும் சாட் மசாலாத்தூள், பாதாம் பிசின் சேர்த்து உடனே பருகவும். தலையில் இருந்து கால் பாதம் வரை புத்துணர்வாக இருப்பதை உணர முடியும்.

பயன்: கேரட்டில் உள்ள வைட்டமின் ஏ மற்றும் பீட்டா கரோட்டின், பீட்ரூட்டில் உள்ள இரும்புச்சத்து மற்றும் எலுமிச்சையில் உள்ள வைட்டமின் சி கூட்டணியில், இந்த பானம் ஒரு கிளாஸ் எடுத்துக்கொள்ளும்போது ஒரு நாளைக்கு நமக்குத் தேவையான நுண் ஊட்டச்சத்துகள் கிடைக்கும். நோய் எதிர்ப்பு சக்தி மேம்பட உறுதுணை புரியும். கூந்தல் வளர்ச்சி, பார்வை தெளிவு, சருமப் பளபளப்பு, எலும்பு வலுப்படுதல், நரம்பு தளர்ச்சியின்மை போன்றவற்றுக்கு உதவும்.

பப்பாளி பால்பரி

உணவே மருந்து! - உடல்நலம் காக்கும் உன்னத உணவுகள் 30

தேவை:  பழுக்காத செங்காயாக உள்ள பப்பாளிக்காய் துண்டுகள் - ஒரு கப் (அ) 200 கிராம்  தேங்காய்ப்பால் - 100 மில்லி  பாசிப்பருப்பு - 50 கிராம்  பச்சை மிளகாய் (கீறியது) - 2  சின்ன வெங்காயம் - 10  பூண்டு - 5 பல்  துருவிய இஞ்சி - ஒரு டீஸ்பூன்  பெருங்காயத்தூள் - கால் டீஸ்பூன்  சாம்பார் பொடி - ஒரு டீஸ்பூன்  தக்காளி - 2 (பொடியாக நறுக்கவும்)  கொத்தமல்லித்தழை - சிறிதளவு மஞ்சள்தூள் - கால் டீஸ்பூன்  உப்பு - தேவையான அளவு.

றுத்து அரைக்க:  தேங்காய்த் துருவல் - ஒரு டேபிள்ஸ்பூன்  கசகசா - ஒரு டீஸ்பூன்  மிளகு, சீரகம் - தலா அரை டீஸ்பூன்.

தாளிக்க:  தேங்காய் எண்ணெய் - தேவையான அளவு  கடுகு, உளுந்து, சீரகம், கடலைப்பருப்பு - தலா கால் டீஸ்பூன்  காய்ந்த மிளகாய் - 2  கறிவேப்பிலை - சிறிதளவு. 

செய்முறை: வறுத்து அரைக்கக் கொடுத்துள்ளவற்றை மிக்ஸியில் சேர்த்து தண்ணீர் தெளித்து விழுதாக அரைக்கவும். ஒரு குக்கரில் சுத்தம் செய்த பப்பாளி, பாசிப்பருப்பு, பூண்டு, மஞ்சள்தூள், பெருங்காயத்தூள், இஞ்சித் துருவல், பச்சை மிளகாய், தேவையான அளவு தண்ணீர் சேர்த்து 2 விசில் விட்டு இறக்கவும். கடாயில் எண்ணெய்விட்டுத் தாளிக்கக் கொடுத்துள்ள பொருள்களைக் கொண்டு தாளிதம் செய்து அதனுடன் பொடியாக நறுக்கிய சின்ன வெங்காயம் மற்றும் தக்காளி சேர்த்து வதக்கவும். பிறகு சாம்பார் பொடி, உப்பு சேர்த்துப் புரட்டி, வறுத்து அரைத்த மசாலாவைச் சேர்த்து நன்கு கலந்து, அதனுடன் குக்கரில் உள்ளதையும் சேர்த்து ஒரு கொதிவிட்டு, கடைசியாக தேங்காய்ப்பால் சேர்த்து, கொத்தமல்லித்தழை தூவி அடுப்பை அணைத்து இறக்கவும். இதை சாதம் முதல் இட்லி, தோசை, சப்பாத்தி என அனைத்து உணவிலும் துணை உணவாகச் சேர்க்கலாம்.

பயன்: இதில் சேர்க்கப்பட்டுள்ள அனைத்துப் பொருள்களும் நோய் எதிர்ப்பு சக்தி கொண்டவை. பப்பாளியில் வைட்டமின் ஏ சத்து மிகுந்து உள்ளது. இது கண்களுக்கு மிகவும் நல்லது.

நவதானிய கட்லெட்

உணவே மருந்து! - உடல்நலம் காக்கும் உன்னத உணவுகள் 30

தேவை:  ஊறவைத்து முளைவிட்ட நவதானியக் கலவை - ஒரு கப்  வேகவைத்த வேர்க்கடலை - 50 கிராம்  வேகவைத்து, மசித்த உருளைக்கிழங்கு - ஒரு கப்  பச்சை மிளகாய் - 2  பெரிய வெங்காயம் - ஒன்று (பொடியாக நறுக்கவும்)  இஞ்சி - பூண்டு விழுது - ஒரு டீஸ்பூன்  கரம் மசாலாத்தூள் - கால் டீஸ்பூன்  மிளகாய்த்தூள், மல்லித்தூள் (தனியாத்தூள்) - தலா ஒரு டீஸ்பூன்  சோள மாவு - ஒரு டேபிள்ஸ்பூன் (கரைசலாக்கி வைக்கவும்)  பிரெட் கிரம்ஸ் - கால் கப்  பொடியாக நறுக்கிய புதினா, கொத்தமல்லித்தழை - சிறிதளவு  சோம்பு - கால் டீஸ்பூன்  எண்ணெய், உப்பு - தேவையான அளவு.

செய்முறை: கடாயில் தேவையான அளவு எண்ணெய்விட்டு அதில் சோம்பு தாளித்து, பொடியாக நறுக்கிய வெங்காயம், பச்சை மிளகாய் சேர்த்து வதக்கவும். அதனுடன் இஞ்சி - பூண்டு விழுது சேர்த்து வதக்கி, நவதானியக் கலவையைச் சேர்த்து பாதி வேகும் வரை நன்கு வதக்கவும். அதில் மிளகாய்த்தூள், மல்லித்தூள், கரம் மசாலாத்தூள், உப்பு சேர்த்து அதனுடன் மசித்த உருளைக்கிழங்கு மற்றும் வேர்க்கடலை சேர்த்து வதக்கி, கொத்தமல்லித்தழை, புதினா தூவி இறக்கவும். இந்தக் கலவை ஆறியதும் வேண்டிய வடிவில் கட்லெட்டுகளாகச் செய்யவும். இவற்றை சோள மாவு கரைசலில் தோய்த்து எடுத்து, பிரெட் கிரம்ஸில் புரட்டி, தவாவில் கொஞ்சம் எண்ணெய்விட்டு, கட்லெட்டுகளை வைத்து இருபுறமும் சுட்டு எடுக்கவும் (கட்லெட்டுகளை பொரித்தெடுக்க வேண்டாம்).

பயன்: நவதானியத்தில் ஆன்டி ஆக்ஸிடன்ட்ஸ் நிறைந்துள்ளது. இது நோய் எதிர்ப்பு சக்திக்கு உதவுகிறது. உருளைக்கிழங்கில் உள்ள கார்போஹைட்ரேட், வேர்க்கடலையில் உள்ள புரதம் மற்றும் எசன்ஷியல் ஃபேட்டி அசிட் ஆகியவை நோய் எதிர்ப்பு சக்தியாக விளங்கும்.

குறிப்பு: இந்த கட்லெட்டை குழந்தைகளும் விரும்பிச் சாப்பிடுவார்கள்.

அஞ்சறைப் பெட்டி பொடி

உணவே மருந்து! - உடல்நலம் காக்கும் உன்னத உணவுகள் 30

தேவை:  ஓமம், சீரகம், வெந்தயம் - தலா 2 டேபிள்ஸ்பூன்  பெருங்காயம் - ஒரு துண்டு (20 கிராம்)  நெல்லி வற்றல் - 20 கிராம்  மிளகு - ஒரு டேபிள்ஸ்பூன்  திப்பிலி - 20 கிராம்  ஆளிவிதை - 20 கிராம்  விரளி மஞ்சள் - 20 கிராம்  நிழலில் உலர்த்திய புதினா மற்றும் வேப்பிலை இலைகள் - ஒரு கைப்பிடி அளவு.

செய்முறை: வெறும் கடாயில் ஓமம், சீரகம், வெந்தயம், பெருங்காயம், நெல்லி வற்றல், மிளகு, திப்பிலி, ஆளிவிதை, மஞ்சள், புதினா மற்றும் வேப்பிலை ஆகியவற்றைத் தனித்தனியாக வறுத்துப் பொடிக்கவும். வாரம் இருமுறை
200 மில்லி தண்ணீருடன் அரை டீஸ்பூன் இந்தப் பொடி சேர்த்து கொதிக்க வைத்துப் பருகலாம் அல்லது கால் டீஸ்பூன் இந்தப் பொடியை அரை அல்லது ஒரு டீஸ்பூன் தேனில் குழைத்தும் உண்ணலாம்.

பயன்: இது நமது ஜீரண மண்டலத்தைப் பாதுகாக்கும். வயிறு சம்பந்தமான அனைத்து நோய்களுக்கும் சிறந்த நோய் எதிர்ப்பு சக்தி வாய்ந்த பொடியாக இருக்கும். வாதம், பித்தம், கபத்தைச் சமன்படுத்தும்.

தாமரை மொட்டு ஈவ்னிங் ஸ்நாக்ஸ்

உணவே மருந்து! - உடல்நலம் காக்கும் உன்னத உணவுகள் 30

தேவை:  தாமரை மொட்டுகள் - ஒரு கப் (டிபார்ட்மென்ட் கடைகள் (அ) நாட்டு மருந்துக் கடைகளில் கிடைக்கும்)  சாட் மசாலாத்தூள் - கால் டீஸ்பூன் மிளகுத்தூள் - ஒரு சிட்டிகை  கரம் மசாலாத்தூள், மிளகாய்த்தூள் - தலா கால் டீஸ்பூன்  சீரகத்தூள் - ஒரு சிட்டிகை  ஆம்சூர் பவுடர் (மாங்காய்த்தூள்) - 2 சிட்டிகை  ஆலிவ் எண்ணெய் - ஒரு டேபிள்ஸ்பூன்  கறுப்பு உப்பு - ஒரு சிட்டிகை.

செய்முறை: கடாயில் ஆலிவ் எண்ணெய்விட்டு, அடுப்பைச் சிறுதீயில் வைத்து, தாமரை மொட்டுகளை மொறுமொறுப்பாக வறுக்கவும் (பொரிக்கத் தேவையில்லை). சாட் மசாலாத்தூள், மிளகுத்தூள், கரம் மசாலாத்தூள், மிளகாய்த்தூள், சீரகத்தூள், கறுப்பு உப்பு, ஆம்சூர் பவுடர் ஆகியவற்றை அதன் மேலே தூவி உடனே அடுப்பை அணைக்கவும். சூடாக இருக்கும்போதே இதை உண்ணலாம்.

பயன்: தாமரை மொட்டு கார்போஹைட்ரேட், புரதம், சோடியம், கால்சியம், மக்னீசியம், பொட்டாசியம் போன்ற சத்துகள் நிறைந்தது. நாள்பட்ட வயிற்றுப் போக்கு, மலச்சிக்கலைச் சரி செய்யும். இதயத்தைப் பாதுகாக்கும்; ரத்த ஓட்டத்தைச் சீராக்கும். நோய் எதிர்ப்பு திறனுக்கு உதவும்.

இம்யூனிட்டி பூஸ்டர் ஸ்மூத்தி

உணவே மருந்து! - உடல்நலம் காக்கும் உன்னத உணவுகள் 30

தேவை:  பசலைக்கீரை, லெட்யூஸ் (Lettuce), புதினா, கொத்தமல்லித்தழை - தலா ஒரு கைப்பிடி அளவு  வெள்ளரிக்காய்த் துண்டுகள் (தோலுடன்) - கால் கப்  தயிர் - கால் கப்  தண்ணீர் - 50 மில்லி  சாட் மசாலாத்தூள் - ஒரு சிட்டிகை  உப்பு - தேவையான அளவு.

செய்முறை: ஒரு மிக்ஸி ஜாரில் சுத்தம் செய்த பசலைக்கீரை, லெட்யூஸ், புதினா, கொத்தமல்லித்தழை, வெள்ளரிக்காய் ஆகியவற்றுடன் உப்பு மற்றும் தண்ணீர் சேர்த்து மையாக அரைக்கவும். இதை வடிகட்டாமல் தயிர், சாட் மசாலா சேர்த்து அப்படியே பருகவும். காலை வேளையில் பிரேக்ஃபாஸ்டாக ஒரு கிளாஸ் இந்த ஸ்மூத்தி, இரு பழங்கள் சாப்பிட்டாலே போதும்... காலை முதல் மாலை வரை நம் உடல் புத்துணர்வுடனும் சுறுசுறுப்புடனும் இயங்கும்.

பயன்: இந்த ஸ்மூத்தியில் சேர்க்கப்பட்டுள்ள அனைத்துப் பொருள்களிலும் சத்துகள் மற்றும் நோய் எதிர்ப்பு மூலக்கூறுகள் அமைந்துள்ளன. கீரைகளில் உள்ள ஃபோலிக் ஆசிட், வைட்டமின் சி, ஏ, கே போன்றவை மற்றும் தயிரில் உள்ள நல்ல பாக்டீரியாக்கள் போன்றவை நம் உடலுக்கு நன்மை செய்யும். இதை வடிகட்டாமல் அப்படியே பருகும்போது நம் உடலுக்குத் தேவையான நார்ச்சத்தும் முழுமையாகக் கிடைக்கும்.

திரிபலா பானம்

உணவே மருந்து! - உடல்நலம் காக்கும் உன்னத உணவுகள் 30

தேவை:  திரிபலா பொடி (தலா 50 கிராம், நெல்லிக்காய், கடுக்காய், தான்றிக்காய் சேர்த்து அரைத்தது) - ஒரு டீஸ்பூன்  தேன் - ஒரு டீஸ்பூன்  நறுக்கிய முட்டைகோஸ் - ஒரு கப்.

செய்முறை: ஒரு கப் முட்டைகோஸை தேவையான நீர் சேர்த்து அரைத்து வடிகட்டி, ஒரு டம்ளர் சாறு எடுத்து, திருபலா பொடி மற்றும் தேன் சேர்த்துக் கலக்கவும். வாரம் மூன்று முறை இந்த பானத்தை காலை வேளை அல்லது 11 மணி அளவில் குடித்து வர, உடலின் தேவையற்ற கொழுப்பு கரைந்து உடல் எடை குறைவதையும், மேலும் உடல் முழுவதும் புத்துணர்வுடனும் ஆரோக்கியத்துடனும் இருப்பதையும் நாம் உணர முடியும்.

பயன்: ஒரு கப் முட்டைகோஸில் வெறும் 14 கலோரிகளே உள்ளது. மேலும் இதனுடன் திரிபலா சேரும்போது இது ஒரு காயகல்பம் ஆகும். இந்த பானம் நம் உள்ளுறுப்புகளின் இயக்கத்தைச் சீர்ப்படுத்தும். தேன் நோய் எதிர்ப்பு சக்தி தரும் பொருளாகும். திரிபலா பானம் வாத, பித்த, கபத்தைச் சரி செய்யும். நோய்களுக்குக் காரணமான அனைத்து பாக்டீரியா, வைரஸ்களுடன் போராட உதவும்.

துளசி மஞ்சள் சார வடிநீர்

உணவே மருந்து! - உடல்நலம் காக்கும் உன்னத உணவுகள் 30

தேவை:  துளசி இலைகள் - ஒரு கைப்பிடி அளவு  சுத்தமான விரளி மஞ்சள்தூள் - கால் டீஸ்பூன்  தண்ணீர் - 200 மில்லி  சீரகம், மல்லி (தனியா) - தலா கால் டீஸ்பூன்  இந்துப்பு - ஒரு சிட்டிகை.

செய்முறை:  200 மில்லி தண்ணீரைச் சூடாக்கி அதில் துளசி இலைகள், சீரகம், மல்லி, விரளி மஞ்சள்தூள் ஆகியவற்றைச் சேர்த்து நன்கு கொதிக்கவிடவும். 100 மில்லியாக வந்ததும் வடிகட்டி, இந்துப்பு கலந்து பருகலாம்.

பயன்: துளசி மற்றும் மஞ்சளில் ஏராளமான மருத்துவக் குணங்கள் உள்ளன. துளசி மஞ்சள் சார வடிநீர் நுரையீரல் நோய்த்தொற்றைச் சரி செய்து, ரத்த ஓட்டத்தைச் சீராக்கி, இதய துடிப்புக்கு மிகவும் துணைபுரியும். நோய் எதிர்ப்பு சக்தியை மேம்படுத்த உதவும். மூளை செல்கள் சிதைவடையாமல் காத்து மன அமைதிக்கு வழிவகுக்கும். செரிமான மண்டலத்தைச் சீர்செய்யும்.

குறிப்பு: இதில் இந்துப்பைத் தவிர்த்து, பால் மற்றும் பனங்கற்கண்டு சேர்த்தும் வளரும் குழந்தைகளுக்குக் கொடுக்கலாம்.

அறுகு நோய் எதிர்ப்பு பானம்

உணவே மருந்து! - உடல்நலம் காக்கும் உன்னத உணவுகள் 30

தேவை:  அறுகம்புல் - ஒரு சிறிய கட்டு  இஞ்சி - ஒரு துண்டு (தோல் சீவவும்)  எலுமிச்சைப்பழம் - பாதியளவு  தேன் - ஒரு டீஸ்பூன்  மஞ்சள்தூள் - ஒரு சிட்டிகை  தண்ணீர் - 200 மில்லி.

செய்முறை: அறுகம்புல்லைத் தண்ணீர்விட்டு நன்கு சுத்தம் செய்யவும். பிறகு, ஒரு மிக்ஸி ஜாரில் அறுகம்புல், இஞ்சி சேர்த்து அதனுடன் 200 மில்லி தண்ணீர்விட்டு நன்கு மையாக அரைத்து வடிகட்டவும். அதனுடன் மஞ்சள்தூள், தேன், எலுமிச்சைச்சாறு சேர்த்துப் பருகி வர, உடலின் நோய் எதிர்ப்பு சக்தி பல மடங்கு அதிகரிக்கும்.

பயன்: அறுகம்புல்லைச் சித்தர்கள் `ஆரோக்கிய புல்’ என்று அழைக்கின்றனர். இதில் அதிகப்படியான நார்ச்சத்து உள்ளது. இந்த பானத்தைப் பருகுவதால் பலவீனமான உடல் பலம்பெறும். மருந்துகளைச் சாப்பிடுவதால் ஏற்படும் பக்கவிளைவை இது சரி செய்யும். ரத்தத்தில் உள்ள நச்சுகளை முறிக்கும். மூல நோயிலிருந்து நிவாரணம் அளிக்கும். இதயத்தைப் பலப்படுத்தும். மலச்சிக்கலைப் போக்கும். சரும நோய்களைச் சரி செய்யும்.

சத்துமாவு புரோட்டீன் டிரிங்க்

உணவே மருந்து! - உடல்நலம் காக்கும் உன்னத உணவுகள் 30

தேவை:  கேழ்வரகு, சம்பா கோதுமை, சிவப்பு கவுனி அரிசி - தலா 200 கிராம்  பச்சைப் பயறு, வெள்ளை சோயா, கறுப்பு உளுந்து, மக்காச்சோளம், கம்பு, பார்லி - தலா 100 கிராம்  வேர்க்கடலை, பொட்டுக்கடலை, கொள்ளு, ஜவ்வரிசி, மூங்கில் அரிசி - தலா 50 கிராம்  முந்திரி, பாதாம் (சேர்த்து) - 100 கிராம்  சுக்கு - 50 கிராம்  ஏலக்காய் - 25 கிராம்.

கஞ்சி செய்ய:  பால் - 200 மில்லி  நாட்டுச் சர்க்கரை, சத்து மாவு - தலா ஒரு டேபிள்ஸ்பூன்  காய்ச்சிய பால் - சிறிதளவு.

செய்முறை: கொடுக்கப்பட்டுள்ள அனைத்து பொருள்களையும் சுத்தம் செய்து தனித்தனியாக நன்கு வறுத்து மெஷினில் கொடுத்து மாவாக அரைத்துக் கொள்ளவும். இந்த மாவில் ஒரு டேபிள்ஸ்பூன் எடுத்து, காய்ச்சிய பால் சிறிதளவு விட்டு கரைத்துக்கொள்ளவும். பிறகு 200 மில்லி பாலைக் காய்ச்சி, அதில் இந்த மாவுக் கரைசலைவிட்டுக் கலந்து, நாட்டுச் சர்க்கரை சேர்த்து நன்கு கொதித்து வந்ததும் இறக்கி ஒரு கிளாஸ் பருகவும். இதை தினமும் பருகி வர, உடல் பலம் பெறும். அனைத்து உள்ளுறுப்புகளும் வலுவடையும்.

பயன்: இதில் சேர்க்கப்பட்டுள்ள அனைத்துப் பொருள்களும் அபரிமிதமான ஊட்டச்சத்துகளைப் பெற்றுள்ளன. வளரும் குழந்தைகள், பெண்கள் என அனைவரும் ஏற்ற சத்துமிக்க புரத பானமாகும். நம் உடல் வலுவுடன் திகழும்போது நம் நோய் எதிர்ப்பு மண்டலமும் வலுவுடன் திகழும்.

நோன்பு கஞ்சி

உணவே மருந்து! - உடல்நலம் காக்கும் உன்னத உணவுகள் 30

தேவை:  வரகரிசி - 100 கிராம்  பாசிப்பருப்பு - 50 கிராம்  சின்ன வெங்காயம் (தோலுரித்து, இரண்டாக நறுக்கவும்)  பூண்டு பற்கள் - தலா 8  துருவிய இஞ்சி  - ஒரு டீஸ்பூன்  உடைத்த மிளகு - சீரகம் - ஒரு டீஸ்பூன்  புதினா, கொத்தமல்லித்தழை, கறிவேப்பிலை (சேர்த்து) - ஒரு கைப்பிடி அளவு  பச்சை மிளகாய் (கீறியது) - ஒன்று  மஞ்சள்தூள், சீரகம் - தலா கால் டீஸ்பூன் பொடியாக நறுக்கிய கேரட், பீன்ஸ் (சேர்த்து) - கால் கப்  தக்காளி - ஒன்று (நறுக்கவும்)  பச்சைப் பட்டாணி - ஒரு கைப்பிடி அளவு  எலுமிச்சைப்பழம் - பாதி அளவு  அரிசி கழுவிய நீர் - 600 மில்லி  உப்பு - தேவையான அளவு.

செய்முறை:  குக்கரில் அரிசி மற்றும் பாசிப்பருப்பைச் சேர்த்து நன்கு வாசம் வரும் வரை வறுக்கவும். அதனுடன் சின்ன வெங்காயம், தக்காளி, பூண்டு, இஞ்சி, சீரகம், உடைத்த மிளகு - சீரகம், புதினா, கொத்தமல்லித்தழை, கறிவேப்பிலை, பச்சை மிளகாய், மஞ்சள்தூள், கேரட், பீன்ஸ், பச்சைப் பட்டாணி, உப்பு மற்றும் அரிசி கழுவிய நீர் சேர்க்கவும். 5 - 6 விசில்விட்டு இறக்கி, எலுமிச்சையைப் பிழிந்து நன்கு கலக்கி, வீட்டில் ஆளுக்கு ஒரு கிளாஸ் காலை நேர உணவாகவும், மாலை நேரச் சிற்றுண்டியாகவும் பருகலாம்.

பயன்: மனிதனின் நோய் எதிர்ப்பு மண்டலத்தை வலுப்படுத்த ஒரு நாளைக்கு வேண்டிய அடிப்படை நுண்சத்துகள், உயிர்ச்சத்துகள், கனிமசத்துகள், தாது உப்புகள் மேலும் அடிப்படை அமினோ அமிலங்கள் ஆகியவை சேர்ந்த கலவையாக இந்த நோன்பு கஞ்சி அமையும். உடலுக்கு வலு சேர்க்கும். நாள்பட்ட காய்ச்சலில் அவதியுற்றோர் இந்தக் கஞ்சியைத் தினம் பருகும்போது மெலிந்த உடல் திடமாக மாறும்.

வேப்பிலை மஞ்சள் உருண்டை

உணவே மருந்து! - உடல்நலம் காக்கும் உன்னத உணவுகள் 30

தேவை:  கொழுந்து வேப்பிலை - ஒரு கைப்பிடி அளவு  விரளி மஞ்சள்தூள் - ஒரு டீஸ்பூன்  பொடித்த வெல்லம் - ஒரு டீஸ்பூன்  இந்துப்பு - ஒரு சிட்டிகை  பெருங்காயத்தூள் - ஒரு சிட்டிகை.

செய்முறை: கழுவி சுத்தம் செய்த வேப்பிலையுடன் மஞ்சள்தூள், இந்துப்பு, பெருங்காயத்தூள் சேர்த்து இடித்து அதனுடன் வெல்லம் கலந்து சிறு சிறு உருண்டைகளாகச் (சுண்டக்காய் அளவு) செய்துகொள்ளவும். இதை வாரத்தில் இருமுறை காலை வேளையில்  உட்கொண்டுவர, தலை முதல் கால் வரை அனைத்து பாகங்களுக்கும் நோய் எதிர்ப்பு சக்தி தரும் பொருளாக இருக்கும்.

பயன்: வேப்பிலையில் வைட்டமின் ஈ நிறைய உள்ளது. எனவே, சருமப் பொலிவு அளிக்கும். தசைபிடிப்பு மற்றும் வலி, வீக்கத்தைச் சரிசெய்ய வேப்பிலை உதவும். மேலும் இதனுடன் மஞ்சள் சேருவதால் சிறந்த நோய் எதிர்ப்பு சக்தியாக விளங்கும்.

குறிப்பு:
கர்ப்பிணிகள் அளவுக்கு அதிகமாக வேப்பிலை எடுக்க வேண்டாம். அதேபோல பித்தப்பை கற்கள் உள்ளவர்கள் மஞ்சளை அளவுக்கு அதிகமாகச் சேர்க்க வேண்டாம்.

நவதானிய நவாப் மோர் கொழுக்கட்டை

உணவே மருந்து! - உடல்நலம் காக்கும் உன்னத உணவுகள் 30

தேவை:  முளைகட்டிய நவதானியங்களை வறுத்து அரைத்த மாவு (அ) நவதானியம் சேர்த்த சத்துமாவு - ஒரு கப்  புளித்த மோர் - இரண்டரை முதல் 3 கப்  துருவிய தேங்காய் - ஒரு கைப்பிடி அளவு  எண்ணெய் - தேவையான அளவு (தேங்காய் எண்ணெய் நல்லது)  உப்பு - தேவையான அளவு.

தாளிக்க:  கடுகு, உளுந்து, சீரகம், கடலைப்பருப்பு - தலா கால் டீஸ்பூன்  மோர் மிளகாய் - 3 (கிள்ளவும்)  கறிவேப்பிலை - சிறிதளவு.

செய்முறை: புளித்த மோரில் மாவு, உப்பு சேர்த்துக் கட்டியில்லாமல் நன்கு கரைக்கவும். பிறகு கடாயில் எண்ணெய்விட்டுத் தாளிக்கக் கொடுத்துள்ள பொருள்களைக் கொண்டு தாளிதம் செய்து, அதில் தேங்காய்த் துருவல் மற்றும் இந்தக் கரைத்த மாவுக் கரைசலை விட்டு நன்கு கிளறி, கெட்டியானதும் இறக்கவும். ஆறியதும் சிறு சிறு கொழுக்கட்டைகளாக (கையில் எண்ணெய் தடவிக்கொண்டு) பிடித்து, இட்லித் தட்டில் 5 நிமிடங்கள்  ஆவியில் வேகவைத்து இறக்கினால், வீடே மணக்கும் நவதானிய நவாப் மோர் கொழுக்கட்டை தயார்.

பயன்: முளைகட்டிய நவதானியங்களை மாவாகத் திரித்து அதைப் பயன்படுத்தும் போதும் முழு பயனாகவே அமையும். இதில் உள்ள ஆன்டி ஆக்ஸிடன்டட்ஸ் நோய் எதிர்பாற்றலுக்கு மிகவும் நல்லது. உடலில் உள்ள கெட்ட கழிவுகளை வெளியேற்ற துணைபுரியும். ஜீரண மண்டலத்தைச் சரி செய்யும்.

அவகாடோ மில்க்‌ஷேக்

உணவே மருந்து! - உடல்நலம் காக்கும் உன்னத உணவுகள் 30

தேவை:  அவகாடோ (பழுத்தது) - ஒன்று  பால் (காய்ச்சியது) - 200 மில்லி  தேன் (அ) சர்க்கரை - ஒரு டேபிள்ஸ்பூன்  டூட்டி ஃப்ரூட்டி - 2 டீஸ்பூன்.

செய்முறை:  ஒரு மிக்ஸி ஜாரில் கொட்டை நீக்கிய அவகாடோ பழ விழுது, பால், தேன் கலந்து நன்கு அரைத்து அதில் டூட்டி ஃப்ரூட்டி சேர்த்துக் கலந்து பருக வேண்டும். இதை ஃப்ரிட்ஜில் வைத்து எடுத்து டெசர்ட் போலவும் சாப்பிடலாம்.

பயன்: அவகாடோ பழத்தில் வைட்டமின் ஏ, பி 6, ஈ, கே போன்ற உயிர்ச்சத்துகள் அடங்கியுள்ளன. இதில் சருமத்தைப் பொலிவாக்கும் வைட்டமின் ஈ அதிகம் உள்ளது. நல்ல கொழுப்பு அடங்கியுள்ளது. இதயத்தைப் பாதுகாத்து வலுவாக்கும்.
பார்வைக்கு நல்லது. ஃபோலிக் ஆசிட் இருப்பதால் கர்ப்பிணிகளுக்கு மிகவும் நல்லது. நோய் எதிர்ப்பு மண்டலம் திறம்படச் செயலாற்ற உறுதுணை புரியும்.

திரிகடுகு சூரணம்

உணவே மருந்து! - உடல்நலம் காக்கும் உன்னத உணவுகள் 30

தேவை:  சுக்கு, மிளகு, திப்பிலி - தலா 50 கிராம்  பனை வெல்லம் - 50 கிராம் (அ) தேன் - ஒரு டீஸ்பூன்.

செய்முறை: சுத்தமான பால் சுக்கு என்று நாட்டு மருந்து கடைகளில் கேட்டு வாங்கவும். பால் சுக்கு, நல்ல கறுப்பு மிளகு (வால் மிளகு 25 கிராம், கறுப்பு மிளகு 25 கிராம் என்ற அளவில் சேர்க்கலாம்), திப்பிலி (அரிசி திப்பிலி (அ) கண்டந்திப்பிலி) ஆகிய மூன்றையும் வெறும் கடாயில் தனித்தனியாக வறுத்து, ஒன்றாகச் சேர்த்துப் பொடித்து வைத்துக்கொள்ளவும். இந்தப் பொடி கால் டீஸ்பூன், இதனுடன் தேன் ஒரு டீஸ்பூன் என்ற விகிதத்தில் காலை வேளையில் எடுக்கலாம் அல்லது பனை வெல்லம் சேர்த்துப் பொடித்தும் உண்ணலாம். எந்த வகையில் உண்டாலும் மருத்துவப் பலன் மிகுதியாகக் கிடைக்கும்.

பயன்: முக்கிய மருந்து உணவுப்பொருள்களான சுக்கு, மிளகு, திப்பிலி மூன்றும் வாதம், பித்தம், கபம் ஆகியவற்றைச் சமன் செய்ய கூடியவை. உடலின் நோய் எதிர்ப்பு சக்தி அதிகரிக்க வழிவகை செய்கிறது. எலும்புகளுக்கு நல்லது.வாய்வுக்கோளாறுகளைச் சரிசெய்யும். மூளை நரம்புகளைச் சுறுசுறுப்பாகும். உடலின் வலிகளைச் சரி செய்யும்; நீர்க்கோவையை அகற்றும்.

அத்திப்பழ வால்நட் ஸ்டிக்கி

உணவே மருந்து! - உடல்நலம் காக்கும் உன்னத உணவுகள் 30

தேவை:  அத்திப்பழம் - 10  பொடித்த வெல்லம் - ஒரு டீஸ்பூன்  பேரீச்சை - 20  வால்நட் - 20  வறுத்த ஆளிவிதை - ஒரு டீஸ்பூன்  டார்க் சாக்லேட் - 5 துண்டுகள்  டூத் பிக் - தேவையான அளவு.

செய்முறை: ஒரு மிக்ஸி ஜாரில் அத்திப்பழம், வால்நட், வறுத்த ஆளிவிதை, கொட்டை நீக்கிய பேரீச்சை, வெல்லம் சேர்த்து மிக்ஸியில் அரைத்துத் தனியே எடுத்து வைக்கவும். பிறகு பாத்திரத்தில் சிறிதளவு நீர்விட்டு அது சூடாகும்போது அதில் ஒரு கிண்ணம் வைத்து அதில் டார்க் சாக்லேட்டைப் போட்டு வைத்தால், அது உருகி லிக்விட் ஆக வரும். அப்போது தனியே எடுத்து வைக்கவும். இது `டபிள் பாய்லிங் முறை’ என அழைக்கப்படுகிறது. பிறகு அரைத்த அத்திப்பழ - வால்நட் கலவையை விரும்பிய வடிவில் செய்து, டூத் பிக் செருகி, லிக்விட் சாக்லேட்டில் முக்கியெடுத்து 10 நிமிடங்கள் ஃப்ரிட்ஜில் வைத்து எடுத்தால், அனைவரும் விரும்பும் அத்திப்பழ வால்நட் ஸ்டிக்கி ரெடி.

பயன்: அத்திப்பழம் மற்றும் வால்நட்டில் நிறைய ஆன்டி ஆக்ஸிடன்ட்ஸ் உள்ளது. இது நோய் எதிர்ப்பு திறனை வலுப்படுத்தும். தீங்கு விளைவிக்கும் பாக்டீரியாக்களை அழிக்கும். பாலுக்கு இணையாக கால்சியம் உள்ளது. இது எலும்புகளை வலுபடுத்தும் உயர் ரத்த அழுத்தத்தைச் சரி செய்யும்.

கடுக்காய் மூலிகை பொடி தேநீர்

உணவே மருந்து! - உடல்நலம் காக்கும் உன்னத உணவுகள் 30

தேவை:  கடுக்காய் பொடி - ஒரு டீஸ்பூன்  தண்ணீர் - 200 மில்லி பனங்கற்கண்டு - ஒரு டீஸ்பூன்  புதினா இலைகள் - 5  துளசி இலைகள் - 5.

செய்முறை: ஒரு பாத்திரத்தில் தண்ணீர்விட்டுச் சூடாக்கி அதில் கடுக்காய் பொடி, பனங்கற்கண்டு, புதினா, துளசி சேர்த்து, அடுப்பைக் குறைந்த தீயில் வைத்து 5 நிமிடங்கள் கொதித்ததும் வடிகட்டி பருகவும். இந்தத் தேநீரைக் காலை வேளையில் தினசரி தேநீருக்குப் பதிலாகப் பருகி வர, புத்துணர்வை உடனடியாக உணர முடியும்.

பயன்:`கடுக்காய் சாப்பிட்டால் மிடுக்காய் வளரலாம்’ என்பது பழமொழி, அதற்கேற்ப நாம் ஒரு நாளைய தொடக்க வேளையான காலையில் நாம் இந்தத் தேநீரைப் பருக, நோய் எதிர்ப்பு சக்தி நம் உடலில் கூடும். மலச்சிக்கலுக்குக் கைகண்ட மருந்து. மூலநோயைக் கட்டுபடுத்தும். பித்தப்பை கற்களைத் தடுக்கும். இதயத்தைப் பாதுகாக்கும். உயர் ரத்த அழுத்தத்தைக் கட்டுப்படுத்தும். வயிற்றுப்புண்ணைச் சரி செய்யும். கெட்ட கொழுப்பைக் கரைக்கும்.

மாதுளை தயிர் பனாமி

உணவே மருந்து! - உடல்நலம் காக்கும் உன்னத உணவுகள் 30

தேவை:  மாதுளை முத்துகள் - அரை கப்  ஃப்ரெஷ் மாதுளைச்சாறு (நீர் சேர்க்காது சாறு எடுக்கவும்) - 50 மில்லி  புளிக்காத கெட்டித் தயிர் - அரை கப்  வெள்ளை மிளகுத்தூள், சீரகத்தூள், சாட் மசாலாத்தூள் - தலா கால் டீஸ்பூன்  பொடியாக நறுக்கிய புதினா - ஒரு டேபிள்ஸ்பூன்  உப்பு - 2 சிட்டிகை.

செய்முறை: ஒரு பவுலில் உரித்த மாதுளை முத்துகள், உப்பு, வெள்ளை மிளகுத்தூள், சீரகத்தூள், சாட் மசாலாத்தூள், மாதுளைச்சாறு சேர்த்து நன்கு கிளறி, அதனுடன் கெட்டித் தயிர் மற்றும் புதினா கலந்து எடுத்தால் அருமையான சுவையுடன் மாதுளை தயிர் பனாமி ரெடி. இதைக் காலை உணவாக ஒரு கப் முழுமையாக எடுக்கலாம். அனைத்துக் கலவை சாதத்துக்கும் ஏற்ற சைடிஷ் இது.

பயன்:மாதுளை சிறந்த நோய் எதிர்ப்பு சக்தி தரும் வரப்பிரசாதப் பழமாகும். புரோட்டீன், கார்போஹைட்ரேட், தாதுகள், கால்சியம், மெக்னீசியம், வைட்டமின் சி போன்ற பல சத்துகளை உள்ளடக்கியது. தயிரில் உள்ள புரோட்டீன் செரிமானத்தைச் சுலபமாக்கும். உடலின் சூட்டைத் தணிக்கும். தயிர், கால்சியம் மிக்கது.

பஞ்சலோக பால்

உணவே மருந்து! - உடல்நலம் காக்கும் உன்னத உணவுகள் 30

தேவை:  பால் - 250 மில்லி  பனங்கற்கண்டு - ஒரு டீஸ்பூன்  மஞ்சள்தூள், சுக்குத்தூள், ஜாதிக்காய்ப் பொடி - தலா கால் டீஸ்பூன்  ஏலக்காய் - ஒன்று  மிளகுத்தூள் - 2 சிட்டிகை.

செய்முறை: பாலைக் காய்ச்சி அதில் இடித்த ஏலக்காய், சுக்குத்தூள், ஜாதிக்காய்ப் பொடி, மிளகுத்தூள், மஞ்சள்தூள் சேர்க்கவும். நன்கு கொதித்ததும் வடிகட்டி அதில் பனங்கற்கண்டு சேர்த்து இளம் சூடாக அருந்தவும்.

பயன்: இவ்வுலகைக் காக்கும் பஞ்சபூதங்கள் போல நம் உடலைக் காக்க பஞ்ச உலோகம் போன்ற திறன்மிக்க ஐந்து பொருள்கள் (மஞ்சள்தூள், சுக்குதூள், ஜாதிக்காய்ப் பொடி, ஏலக்காய், மிளகுத்தூள்) அடங்கியது பஞ்சலோக பால். நோய் எதிர்ப்பு சக்தியை மேம்படுத்த இந்தப் பொருள்கள் பெரும்பங்கு வகிக்கும். நரம்பு மண்டலத்தைச் சீராக்கும். மனதை அமைதிப்படுத்த உதவும். ஆழ்ந்த தூக்கம் வரும். மிளகுத்தூள், மஞ்சள்தூள் சிறந்த ஆன்டிபயாடிக் ஆகும்.

உணவால் விரட்டலாம் உடல்நலக் கோளாறுகளை!

உணவே மருந்து! - உடல்நலம் காக்கும் உன்னத உணவுகள் 30

லுவலகம், பள்ளி, கல்லூரி என்று காலில் சக்கரம் கட்டிக்கொண்டு அவசர அவசரமாக ஓடும் இன்றைய வேகமான உலகில் பல்வேறு நோய்கள் நம்மைப் படையெடுத்து வந்து தாக்குகின்றன. வாழ்க்கைமுறை மாற்றம் இதற்கு முக்கியக் காரணமாகக் கூறப்படுகிறது. அதோடு, போதிய  உடல் உழைப்பு இல்லாமலும் உடற்பயிற்சியில் ஈடுபடாமலும் நம்மில் பலரும் நோய்களுக்கு அழைப்பிதழ் வைத்துவிடுகிறோம்.

அந்தந்த நோய்களின் தாக்குதலிலிருந்து விடுபட மருந்துகளை எடுத்துக்கொண்டாலும், முழுமையாக அதிலிருந்து நாம் விடுபட நமது உடலின் நோய் எதிர்ப்பு மண்டலத்தைத் திறம்பட வைத்திருப்பதே சிறந்த வழி. அவ்வாறு நோய் எதிர்ப்பு சக்தியுடன் திகழ, நாம் உண்ணும் உணவில் ஊட்டச்சத்துகள் சரிவர  இடம்பெற வேண்டும்.

நோய் எதிர்ப்பு மண்டலம் சரிவர இருந்தால் மட்டுமே நமது உடலைத் தாக்கும் வைரஸ் மற்றும் பாக்டீரியாக்கள் மூலம் தோன்றும் நோய்களை எதிர்த்துப் போராட முடியும். இதற்கு உதவும் வகையில், நம் உணவில் வைட்டமின்கள், புரோட்டீன், இரும்புச்சத்து, நார்ச்சத்து, கால்சியம், ஃபோலிக் ஆசிட், பொட்டாசியம், மக்னீசியம் போன்ற பல சத்துகள் தவறாது இடம்பெற வேண்டும்.

இவ்வாறு அனைத்து சத்துகளும் பெற உதவும் வகையில் ஆரோக்கியம் காக்கும், சுவையான  பல்வேறு உணவு வகைகளை இங்கே வழங்குகிறார் ஓசூரைச் சேர்ந்த சமையல் கலைஞர் எஸ்.சாந்தி.
 
படங்கள்: யஷ்வந்த்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism