Published:Updated:

சோறு முக்கியம் பாஸ்! - 51

சோறு முக்கியம் பாஸ்! - 51
பிரீமியம் ஸ்டோரி
News
சோறு முக்கியம் பாஸ்! - 51

சோறு முக்கியம் பாஸ்! - 51

ம் இந்திய மருத்துவ மரபுகள் அனைத்தும், உணவையே மருந்து என்று சொல்கின்றன. நாம் சாப்பிட்ட உணவு அவ்வளவு சக்தி வாய்ந்ததாக இருந்தது. இன்று நாம் நம்பிச் சாப்பிடுகிற பல உணவுகள் உண்மையில்  நம் உயிருக்கு உலை வைப்பதாகத்தான் இருக்கின்றன. உதாரணத்துக்கு எண்ணெய். 

சோறு முக்கியம் பாஸ்! - 51

ஒரு காலத்தில், ஊருக்கு ஒரு செக்கு இருக்கும். எள்ளோ, கடலையோ, தேங்காயோ கொண்டு சென்றால் வெல்லம் அல்லது கருப்பட்டி சேர்த்து மரச்செக்கில் போடுவார்கள். மாடு அடிமேல் அடிவைத்து நிதானமாகச் சுற்றிவரும். அதிக வெப்பமில்லாமல், நிதானமாக எண்ணெய் வெளியேறும். இரண்டரை கிலோ எள்ளை வெல்லம் சேர்த்து அரைத்தால் ஒரு லிட்டர் நல்லெண்ணெய் கிடைக்கும். எண்ணெய் அரைத்ததுபோக, மிஞ்சுகிற பிண்ணாக்கைத் தின்பண்டம்போல வீட்டில் வைத்திருந்து பிள்ளைகளுக்குக் கொடுப்பார்கள். எள் முதிராமல் இருந்தால் எண்ணெய் சற்றுக் கலங்கலாக இருக்கும்; நன்கு முற்றிய எள்ளென்றால், இளமஞ்சள் நிறத்தில் பளபளப்பாக இருக்கும்.

இன்று பாக்கெட்டில் விற்பனைக்கு வரும்  எண்ணெய்கள் எல்லாம் ஒரே நிறத்தில், ஒரே வாசனையில் இருக்கின்றன. அரைத்த எண்ணெயை உயர் வெப்ப நிலையில் கொதிக்கவைத்து, ரீபைண்ட் செய்து நிறத்துக்கு ஒன்று, வாசனைக்கு ஒன்று, கெட்டுப்போகாமல் இருக்க ஒன்று என வகைவகையாக ரசாயனங்களைக் கொட்டித்தான் பேக்கிங் செய்து அனுப்புகிறார்கள்.

உணவகங்களிலும் எண்ணெய்தான் பிரச்னை. சிலர், ஏற்கெனவே கொதிக்கவைத்து பேக்கிங் செய்து வருகிற எண்ணெயை மீண்டும் மீண்டும் நான்கைந்து முறை பயன்படுத்துகிறார்கள். சாப்பிடும்போதே தெரிந்துவிடும். எண்ணெயின் கார்ப்பு நாக்கில் ஒட்டும்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
சோறு முக்கியம் பாஸ்! - 51



சில உணவகங்கள், அக்கறையாக செக்கு எண்ணெயைப் பயன்படுத்தத் தொடங்கியிருக்கின்றன.  தொடுகறிகளிலும் குழம்பு வகைகளிலும் செக்கெண்ணெய்ப் பயன்பாட்டை அதன் வாசனையையும் சுவையையும் வைத்தே கண்டுபிடித்துவிட முடியும். சென்னை, அண்ணாநகர் கிழக்கில், ஐயப்பன் கோயிலை ஒட்டியிருக்கும் கோவை அலங்கார் விலாஸ் அப்படியான ஒரு செக்கெண்ணெய் உணவகம்.

சபரிராஜன், மணிகண்டன், ஹர்ஷினி பிரியா மூவரும் இணைந்து நடத்துகிற இந்த உணவகத்தில் கொங்கு மண்ணுக்கே உரித்தான அசைவ உணவுகளை  அதன் தன்மையோடு சாப்பிடலாம். 

சோறு முக்கியம் பாஸ்! - 51

கொங்கு உணவுகளைப் பொறுத்தவரை, மசாலா மிதமாகவே இருக்கும். தேங்காய்ப் பயன்பாடு மிகுந்திருக்கும். இஞ்சி, பூண்டுகூட அளவாகத்தான் பயன்படுத்துவார்கள். சமைக்கும் நுட்பம்கூட வித்தியாசமாக இருக்கும். தீ அதிகம் வைத்துச் சமைக்க மாட்டார்கள். அது உணவைச் சக்கையாக்கிவிடுமாம். இதெல்லாம்தான் கொங்கு உணவுகளின் தனித்தன்மைக்குக் காரணம்.

கோவை அலங்கார் விலாஸில் மதியம் சைவச்சாப்பாடு, அசைவச்சாப்பாடு இரண்டும் உண்டு. சைவச்சாப்பாடு 130 ரூபாய். சாதத்திற்கு முதலில் பொடியுருண்டையும் நெய்யும் தருகிறார்கள். கடலைப்பருப்பைத் துகளாக அரைத்து, கறிவேப்பிலை, மசாலாப் பொருள்கள் சேர்த்து உருண்டையாக உருட்டி வைத்திருக்கிறார்கள். நெய்யோடு சேர்த்துப் பிசைந்ததும் சாதத்தில் கரைந்துவிடுகிறது. தொடக்கமே அமர்க்களம். கூட்டு, பொரியல், பச்சடி என மூன்று தொடுகறிகள் தருகிறார்கள். அப்பளத்தைப் போட்டு  வித்தியாசமாகக் கூட்டு செய்திருக்கிறார்கள். பீட்ரூட்டில் தயிர் சேர்த்துப் பச்சடி. நிறமே ஈர்க்கிறது. எல்லாம் கொங்கு மரபு. சாம்பாருக்கு அடுத்து, எண்ணெய்க் கத்திரிக்காய்க் குழம்பு ஊற்றுகிறார்கள். எனக்குத் தெரிந்து சென்னையில் வேறெங்கும் வாய்க்காது. தனி ருசி.  இவற்றோடு ரசம், தயிர்... கூடவே கால் கிண்ணம் குல்கந்தும் தருகிறார்கள். தயிரோடு குல்கந்தைச் சேர்த்துச் சாப்பிடுவது சுகம். இறுதியில் ஒரு கிண்ணம் பாயசமும் தருகிறார்கள்.  

சோறு முக்கியம் பாஸ்! - 51

அசைவச்சாப்பாடு 190 ரூபாய். சைவச் சாப்பாட்டில் என்னவெல்லாம் தருவார்களோ, அவற்றோடு சேர்த்து சிக்கன் குழம்பு, மட்டன் குழம்பு, மீன்குழம்பு, இறால்குழம்பு தருகிறார்கள்.

கோவை அலங்கார் விலாஸின் சிறப்பே பிரியாணி வகைகள்தாம். அதுவும் கொங்கு ஸ்டைல்தான். பட்டை, கிராம்பென பிரியாணிக்குச் சேர்க்கும் எல்லாப் பொருள்களையும் அரைத்து அரிசியோடு சேர்த்துவிடுகிறார்கள். வித்தியாசமாக இருக்கிறது. ஞாயிற்றுக்கிழமை என்றால் நாட்டுக்கோழி பிரியாணி சாப்பிடலாம். வழக்கமான வெங்காயப் பச்சடியோடு சிக்கன் குருமாவும் தொட்டுக்கொள்ளத் தருகிறார்கள்.

பிரியாணியையும் ப்ரைடு ரைஸையும் சாப்பிட்டு அலுத்துப் போனவர்களுக்காக, கீமா ரைஸ் என்று ஒன்று வைத்திருக்கிறார்கள். பார்க்கும்போதே சாப்பிடத் தோன்றுகிறது. சிக்கன் கீமா ரைஸ், மட்டன் கீமா ரைஸ் என இரண்டு வகை இருக்கிறது. பிரியாணி விலைதான். இறைச்சியை நன்றாகக் கொத்தி சாதத்தில் சேர்த்து முட்டையை ஊற்றி ப்ரை செய்து தருகிறார்கள். வித்தியாசமாக இருக்கிறது.  

சோறு முக்கியம் பாஸ்! - 51

வழக்கமான மட்டன், சிக்கன் தொடுகறி வகைகளைச் சாப்பிட்டுப் போரடித்துப் போனவர்களுக்குக் கோவை அலங்கார் விலாஸ் நல்லனுபவம் தரும். கோழி வடை என்று ஒன்று வைத்திருக்கிறார்கள். ஒரு வடை 30 ரூபாய். சிக்கனைக் கொத்தி வடைபோலத் தட்டிப் போட்டுப் பொரித்துத் தருகிறார்கள். குழந்தைகள் விரும்பிச் சாப்பிடுவார்கள். ‘கொங்கனாபுரம் பிச்சுப்போட்ட கோழி’யும் சிறப்பு. எலும்பில்லாத சிக்கனை, கறிவேப்பிலை, மிளகு போட்டுப் பிரட்டித் தருகிறார்கள். பொள்ளாச்சி மிளகு லெக்பீஸ்  வறுவல், பள்ளிப்பாளையம் சிக்கன், காங்கேயம் சிக்கன் சுக்கா என மண்மணக்கும் தொடுகறிகளும் நிறைய உண்டு. நிறைய கறிவேப்பிலையை அரைத்துப்போட்டு, பெரிய பெரிய இறால்களைப் பிரட்டி அழகாக அடுக்கிப் பரிமாறுகிறார்கள். அட்டகாசம்!

சோறு முக்கியம் பாஸ்! - 51



உணவகத்தின் சூழல், பரிமாறும் விதம், உணவுகள் என எல்லாவற்றிலும் கனிவும் அக்கறையும் இருப்பது ஒரு நல்ல விஷயம். ஒவ்வொரு டேபிளிலும் சீருடை அணிந்த பெண்கள் கவனிக்கிறார்கள். குளிர்பானங்கள் ஏதும் விற்பதில்லை. நன்னாரி சர்பத், இளநீர் சர்பத், இளநீர்ப் பாயசம், கரும்பு ஜூஸ் மட்டும்தான். அழகாக பேக் செய்து ப்ரிட்ஜில் வைத்திருக்கிறார்கள்.

“எண்ணெய்தான் உணவோட தன்மையைத் தீர்மானிக்கும். குழம்புகள், தொடுகறிகள் எல்லாத்துக்கும் செக்குல ஆட்டுற எண்ணெய்தான் பயன்படுத்துறோம். இயற்கை வேளாண்மையில விளைஞ்ச எள்ளை வாங்கி நாங்களே மரச்செக்குல எண்ணெய் தயாரிக்கிறோம். அசைவ உணவுகளைச் சாப்பிட்டு முடிச்சதும் கையில எண்ணெய் ஒட்டியிருக்கக்கூடாது. அதைத்தான் தரத்துக்கான அளவுகோலா வச்சிருக்கோம்...” என்கிறார்,  உரிமையாளர்களில் ஒருவரான சபரிராஜன். 

கொங்கு உணவை வெளுத்துக்கட்ட விரும்பும் சென்னைவாசிகளுக்கு கோவை அலங்கார் விலாஸ் பொருத்தமான தேர்வு!

- பரிமாறுவோம்

வெ.நீலகண்டன் - படங்கள்: சொ.பாலசுப்ரமணியன்

கர்ப்பிணிகள் பப்பாளி,  அன்னாசி சாப்பிடலாமா?   

சோறு முக்கியம் பாஸ்! - 51

கற்பகம், உணவியல் நிபுணர்

“வ
ழக்கமாக சராசரியான பெண்ணுக்கு ஒருநாளைக்கு 1800 கலோரி தேவை. கர்ப்பகாலத்தில் 300 கலோரி கூடுதலாகத் தேவைப்படும். எனவே, பெண்கள் கர்ப்பகாலத்தில் வழக்கத்தைவிட அதிகம் சாப்பிடவேண்டும். அதுவும் சத்துள்ள உணவாக இருக்கவேண்டும். இரும்புச்சத்து, போலிக் ஆசிட், கால்சியம் உள்ளிட்ட சத்துகள் அத்தியாவசியமானவை. காய்கறி, கீரை, பருப்புகள், சிறுதானியங்கள் அன்றாட உணவில் இடம்பெற வேண்டும். பழங்களைப் பொறுத்தவரை, பப்பாளி, அன்னாசி இரண்டையும் தவிர்க்க வேண்டும். பப்பாளியில் உள்ள பெப்சின் என்ற என்சைமும் லாடெக்ஸ் என்ற வேதிப்பொருளும் கருப்பைச் சுருக்கங்களை அதிகரித்து, சவ்வுகளை பலவீனப்படுத்திவிடும்.  அன்னாசிப்பழத்தில் ப்ரோமெலைன் என்னும் என்சைம் அதிகமிருக்கிறது. இது பிரசவத்தை பாதிக்கும். பால் ஒவ்வாமை இருப்பவர்கள், அதுசார்ந்த பொருள்களைத் தவிர்த்துவிட்டு, சோயாப்பால் சாப்பிடலாம். மீன், இறைச்சி சேர்த்துக்கொள்ளலாம். முட்டையைச் சிலர் சமைக்காமல் சாப்பிடுவார்கள். அதுவும் நல்லதல்ல. குளிர்பானங்களைத் தவிர்த்து இளநீர், மோர் பருகலாம்.”