Published:Updated:

30 வகை வெரைட்டி சமையல்! - இது பாரம்பர்ய ருசி!

30 வகை வெரைட்டி சமையல்! - இது பாரம்பர்ய ருசி!
பிரீமியம் ஸ்டோரி
News
30 வகை வெரைட்டி சமையல்! - இது பாரம்பர்ய ருசி!

நங்கநல்லூர் பத்மா

30 வகை வெரைட்டி சமையல்! - இது பாரம்பர்ய ருசி!

கதம்பக் கூட்டு

தேவை:      பாசிப்பருப்பு - 100 கிராம்  கேரட், உருளைக்கிழங்கு - தலா ஒன்று,  பீன்ஸ் - 10  பச்சைப் பட்டாணி - 100 கிராம் (தோலுரித்தது),  அவரைக்காய் - 5  தேங்காய்த் துருவல் - 2 டேபிள்ஸ்பூன்,  பச்சை மிளகாய் - 2,  எண்ணெய் - ஒரு டேபிள்ஸ்பூன்,  உப்பு - தேவையான அளவு.

தாளிக்க:  கடுகு, உளுத்தம்பருப்பு, சீரகம் - தலா அரை டீஸ்பூன்  பெருங்காயத்தூள், கறிவேப்பிலை - சிறிதளவு.

30 வகை வெரைட்டி சமையல்! - இது பாரம்பர்ய ருசி!

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

செய்முறை: கேரட்டைத் தோல் சீவிப் பொடியாக நறுக்கவும். பீன்ஸையும் பொடியாக நறுக்கவும். உருளைக்கிழங்கையும் தோல் சீவிப் பொடியாக நறுக்கவும். அவரைக்காயையும் பொடியாக நறுக்கிக் கொள்ளவும். பாசிப்பருப்பைக் குழைவாக வேகவைக்கவும்.

கேரட், பீன்ஸ், உருளைக்கிழங்கு, அவரைக்காய், பச்சைப் பட்டாணியை ஒன்றாக குக்கரில் சேர்க்கவும். அவற்றுடன் சிறிதளவு தண்ணீர், உப்பு சேர்த்து இரண்டு விசில் வரும்வரை வேகவைக்கவும். மிக்ஸியில் தேங்காய், பச்சை மிளகாயை விழுதாக அரைத்து வேகவைத்த காய் கலவையுடன்  சேர்த்து, வேகவிட்ட பாசிப்பருப்பையும் சேர்த்துக் கொதிக்கவிட்டு இறக்கவும். வாணலியில் எண்ணெய்விட்டு கடுகு, சீரகம், பெருங்காயத்தூள், கறிவேப்பிலை தாளித்து, தயாரான கூட்டில் சேர்த்துக் கலக்கவும்.

குறிப்பு: காய்கறிகள் கொஞ்சம் கொஞ்சம் மிகுந்து இருக்கும்போது இந்தக் கூட்டைத் தயாரிக்கப் பயன்படுத்தலாம்.

கூழ் கிண்டி தோசை

தேவை:     இட்லி அரிசி - 200 கிராம்,  எண்ணெய், உப்பு - தேவையான அளவு.

தாளிக்க:  இஞ்சி - ஒரு சிறிய துண்டு,  கடுகு, சீரகம் - தலா ஒரு டீஸ்பூன்,  பச்சை மிளகாய் - ஒன்று  பெரிய வெங்காயம் - ஒன்று,  எண்ணெய் - 2 டேபிள்ஸ்பூன்.

30 வகை வெரைட்டி சமையல்! - இது பாரம்பர்ய ருசி!

செய்முறை: இட்லி அரிசியை ஒரு மணி நேரம் ஊறவைத்து மிக்ஸியில் நைஸாக அரைக்கவும். ஒரு கரண்டி மாவைத் தனியாக எடுத்து நன்கு கரைத்து வாணலியில் ஊற்றிக் கெட்டியாகக் கிளறவும். மீதமுள்ள மாவுடன் கிளறிய மாவைப் போட்டு உப்பு சேர்த்து நன்கு கரைக்கவும். இஞ்சியைத் தோல் சீவிப் பொடியாக நறுக்கிக் கொள்ளவும். வெங்காயம், பச்சை மிளகாயையும் பொடியாக நறுக்கவும்.

    வாணலியில் எண்ணெய்விட்டு கடுகு, சீரகம் தாளித்து நறுக்கிய வெங்காயம், இஞ்சி, பச்சை மிளகாய் சேர்த்து வதக்கவும். பின்னர் இதை மாவுடன் சேர்த்துக் கலந்துகொள்ளவும். தோசைக் கல்லைச் சூடாக்கி, அடுப்பை மிதமான தீயில் வைத்து, மாவை ரவாதோசைக்குக் கரைப்பது போல் கரைத்துப் பரவலாக ஊற்றவும். சுற்றிலும் சிறிதளவு எண்ணெய்விட்டு இருபுறமும் வேகவிட்டு சூடாகப் பரிமாறவும்.

குறிப்பு:    உளுந்து இல்லாமல் செய்யப்படும் இந்த தோசைக்கு சட்னி, இட்லி மிளகாய்ப் பொடி சிறந்த காம்பினேஷன்.

வெஜிடபிள் இடியாப்பம்

தேவை:   இட்லி அரிசி - 250 கிராம்,  கேரட் - ஒன்று,  பீன்ஸ் - 5,  பச்சைப் பட்டாணி - 100 கிராம் (தோலுரித்தது),  குடமிளகாய், பச்சை மிளகாய் - தலா ஒன்று,  பொடியாக நறுக்கிய கொத்தமல்லித்தழை - சிறிதளவு,  மிளகுத்தூள் - அரை டீஸ்பூன், பெருங்காயத்தூள் - சிறிதளவு,  நெய் - 2 டேபிள்ஸ்பூன்,  உப்பு - தேவையான அளவு.

30 வகை வெரைட்டி சமையல்! - இது பாரம்பர்ய ருசி!

செய்முறை: இட்லி அரிசியை ஒரு மணி நேரம் ஊறவைத்து கிரைண்டரில் நைஸாக அரைக்கவும். பின்னர் வெறும் வாணலியில் அரைத்த மாவை ஊற்றிக் கெட்டியாகக் கிளறவும். கிளறிய மாவை நன்கு பிசைந்து நீளவாக்கில் உருண்டைகளாக உருட்டவும். வாணலியில் தண்ணீர் ஊற்றிக் கொதிக்கவிடவும். தண்ணீர் கொதிக்க ஆரம்பித்ததும் உருண்டைகளை அதில் போட்டு வேகவைக்கவும். உருண்டைகள் வெந்து தண்ணீரின் மேலே மிதந்து வரும்போது எடுத்துவிடவும். வேகவைத்த ஒவ்வோர் உருண்டையையும் இடியாப்ப அச்சில் போட்டுப் பிழிந்துகொள்ளவும்.

பொடியாக நறுக்கிய கேரட், குடமிளகாய், பீன்ஸ், பச்சை மிளகாயை ஒரு பாத்திரத்தில் எடுத்துக்கொள்ளவும். இதனுடன் பச்சைப் பட்டாணியையும் சேர்க்கவும். பிறகு இந்தக் கலவையில் மிளகுத்தூள், உப்பு சேர்த்துக் கலந்துகொள்ளவும். வாணலியில் நெய்விட்டு சூடாக்கி இந்தக் காய்கறிக் கலவையை அதில் போட்டு வதக்கி எடுக்கவும். பின்னர் இதை வேகவைத்த இடியாப்பத்துடன் சேர்க்கவும். கூடவே பெருங்காயத்தூள், நறுக்கிய கொத்தமல்லித்தழையையும் சேர்த்து நன்கு கலக்கவும். வெஜிடபிள் இடியாப்பம் தயார்.

இதற்குத் தொட்டுக்கொள்ள மோர்க்குழம்பு ஏற்றது.

 வெந்தயக்கீரை வாழைப்பூ சாம்பார்

தேவை:    வாழைப்பூ - ஒரு மடல்,  வெந்தயக்கீரை - சிறிய கட்டு 2,  பாசிப்பருப்பு - 100 கிராம்  புளி - ஒரு பெரிய நெல்லிக்காய் அளவு,  சாம்பார் பொடி - ஒரு டேபிள்ஸ்பூன்,  மல்லி (தனியா)  கடலைப்பருப்பு - தலா ஒரு டீஸ்பூன்,  தேங்காய்த் துருவல் - ஒரு டேபிள்ஸ்பூன்,  காய்ந்த மிளகாய் - ஒன்று  பெருங்காயத்தூள் - சிறிதளவு,  எண்ணெய், உப்பு - தேவையான அளவு .

தாளிக்க: 
கடுகு, வெந்தயம் - தலா ஒரு டீஸ்பூன்.

30 வகை வெரைட்டி சமையல்! - இது பாரம்பர்ய ருசி!

செய்முறை:  பாசிப்பருப்பை குக்கரில் குழைய வேகவைத்து எடுக்கவும். வாணலியில் சிறிதளவு எண்ணெய்விட்டு மல்லி, கடலைப்பருப்பு, காய்ந்த மிளகாயை வறுத்து எடுக்கவும். இதனுடன் தேங்காய்த் துருவல், சிறிதளவு தண்ணீர் சேர்த்து மிக்ஸியில் அரைக்கவும். வெந்தயக் கீரையை ஆய்ந்து சுத்தம் செய்து நறுக்கி சிறிதளவு எண்ணெய்விட்டு வதக்கிக்கொள்ளவும். வாழைப்பூவையும் ஆய்ந்து நறுக்கி எண்ணெய்விட்டு வதக்கி வைக்கவும்.

அரை லிட்டர் தண்ணீரில் புளியை நன்கு கரைத்து அதனுடன்  சாம்பார் பொடி, உப்பு சேர்த்துக் கொதிக்கவிடவும். கலவை கொதிக்க ஆரம்பித்தவுடன் வதக்கிய வெந்தயக்கீரை, வாழைப்பூவைச் சேர்க்கவும். பின்னர் இதனுடன் அரைத்த விழுது, வேகவைத்த பருப்பு சேர்த்துக் கலக்கவும். மற்றொரு வாணலியில் சிறிதளவு எண்ணெய்விட்டு கடுகு, வெந்தயம், பெருங்காயத்தூள் தாளித்து, அதைக் கொதிக்கும் கலவையில் சேர்க்கவும். பின்னர் ஒரு கொதிவிட்டு இறக்கவும்.

குறிப்பு:  சிறிது கசப்பான வெந்தயக்கீரையையும் துவர்ப்பான வாழைப்பூவையும் சேர்த்து சாம்பார் தயாரித்தால் வயிற்றுக்கு மிகவும் நல்லது. நீரிழிவு, ரத்த அழுத்தம் உள்ளவர்கள் உப்பைச் சற்றுக் குறைத்துப்போட்டு சாம்பார் தயாரிக்கலாம்.

புளிப்பொங்கல்

தேவை:    வரகு அரிசி - 200 கிராம்,  புளி - எலுமிச்சைப்பழ அளவு,  காய்ந்த மிளகாய் - 2  கடுகு, கடலைப்பருப்பு, உளுத்தம்பருப்பு - தலா ஒரு டேபிள்ஸ்பூன்,  பெருங்காயத்தூள் - சிறிதளவு,  மஞ்சள்தூள் - ஒரு சிட்டிகை,  நல்லெண்ணெய் - 50 மில்லி,  கறிவேப்பிலை - சிறிதளவு,  உப்பு - தேவையான அளவு. 

30 வகை வெரைட்டி சமையல்! - இது பாரம்பர்ய ருசி!

செய்முறை: வரகு அரிசியை 2 மணி நேரம் ஊறவைத்துக் களைந்துகொள்ளவும். புளியை நன்கு கரைத்து ஒரு பங்கு அரிசிக்கு நான்கு பங்கு தண்ணீர் என்கிற விகிதத்தில் புளித்தண்ணீரை அளந்து எடுத்துக்கொள்ளவும். குக்கரில் எண்ணெய்விட்டுச் சூடாக்கி காய்ந்த மிளகாயைப் கிள்ளிப்போட்டு, கடுகு, கடலைப்பருப்பு, உளுத்தம்பருப்பு, மஞ்சள்தூள், பெருங்காயத்தூள் சேர்த்து தாளிக்கவும். பின்னர் இதனுடன் அளந்து வைத்திருக்கும் புளித்தண்ணீரைச் சேர்க்கவும். பிறகு ஊறவைத்த வரகு அரிசியையும் உப்பையும் சேர்த்து நன்கு கிளறி ஐந்து விசில்விட்டு இறக்கவும். புளிப்பொங்கல் ரெடி. பொங்கலின் மேல் கறிவேப்பிலை கிள்ளிப்போட்டுக் கலந்து சூடாகப் பரிமாறவும்.

குறிப்பு:  புளிப்பு சாப்பிட ஆசை இருக்கும் கர்ப்பிணிப் பெண்கள் இந்தப் பொங்கலை மிகவும் விரும்புவார்கள்.

சிறுதானிய பிடிகொழுக்கட்டை

தேவை:  சாமை அரிசி, குதிரைவாலி அரிசி - தலா 100 கிராம்,  தினை அரிசி, வரகு அரிசி - தலா 2 டேபிள்ஸ்பூன்,  மிளகு - 10  துவரம்பருப்பு - ஒரு டேபிள்ஸ்பூன்,  தேங்காய் - ஒரு மூடி (துருவிக்கொள்ளவும்)  தேங்காய் எண்ணெய் - 2 டேபிள்ஸ்பூன்,  உப்பு - தேவையான அளவு.

தாளிக்க:     கடுகு - ஒரு டீஸ்பூன்  உளுத்தம்பருப்பு - ஒரு டீஸ்பூன்,  பெருங்காயத்தூள், கறிவேப்பிலை - சிறிதளவு.

30 வகை வெரைட்டி சமையல்! - இது பாரம்பர்ய ருசி!

செய்முறை: வரகு, சாமை, தினை, குதிரைவாலி அரிசி ஆகியவற்றை ஒன்றாகச் சேர்த்து மிக்ஸியில் ஒரு சுற்று சுற்றி உடைத்துக்கொள்ளவும். பிறகு மிளகு, துவரம்பருப்பை ஒன்றாக மிக்ஸியில் உடைக்கவும். ஒரு பங்கு உடைத்த சிறுதானிய அரிசிக் கலவைக்கு இரு பங்குத் தண்ணீரை எடுத்து, அதனுடன் உப்பு சேர்த்துக் கொதிக்கவிடவும். தண்ணீர் கொதித்ததும் அதனுடன் உடைத்த சிறுதானியக் கலவை, துவரம்பருப்பு - மிளகுக் கலவையைச் சேர்த்துக் கெட்டியாகக் கிளறவும். பின்னர் இதனுடன் தேங்காய்த் துருவல் சேர்த்துக் கிளறி இறக்கவும். வாணலியில் தேங்காய் எண்ணெயைச் சூடாக்கி, கடுகு உளுத்தம்பருப்பு, பெருங்காயத்தூள், கறிவேப்பிலை தாளித்து, தயார் செய்துவைத்திருக்கும் கலவையில் சேர்த்துக் கிளறவும். இந்தக் கலவையை சிறு உருண்டைகளாக உருட்டி, இட்லித்தட்டில் வைத்து ஆவியில் வேகவிட்டு எடுக்கவும். கொத்சுவுடன் பரிமாறவும்.

மிக்ஸ்டு வெஜிடபிள் சப்பாத்தி

தேவை:  கோதுமை மாவு - 200 கிராம்,  கேரட் துருவல், கோஸ் துருவல், பொடியாக நறுக்கிய குடமிளகாய், வெங்காயம் - தலா ஒரு சிறிய கிண்ணம்,  பச்சைப் பட்டாணி - 100 கிராம் (தோலுரித்தது),  மிளகுத்தூள் - அரை டீஸ்பூன்,  இஞ்சி விழுது, பூண்டு விழுது - தலா ஒரு டீஸ்பூன்,  எண்ணெய் - ஒரு டேபிள்ஸ்பூன் , உப்பு - தேவையான அளவு.

30 வகை வெரைட்டி சமையல்! - இது பாரம்பர்ய ருசி!

செய்முறை: கோதுமை மாவுடன் இஞ்சி விழுது, பூண்டு விழுது, சிறிதளவு எண்ணெய் சேர்த்து, கொஞ்சம் தண்ணீர்விட்டுக் கெட்டியாகப் பிசைந்துகொள்ளவும். பிசைந்த மாவைச் சிறு உருண்டைகளாக உருட்டி சப்பாத்திகளாகத் திரட்டவும். சப்பாத்திகளை தவாவில் போட்டு வாட்டி எடுக்கவும். பிறகு சிறு துண்டுகளாக கட் செய்து கொள்ளவும்.

வாணலியில் மீதமுள்ள எண்ணெய்விட்டு சூடாக்கி, கேரட் துருவல், கோஸ் துருவல், பொடியாக நறுக்கிய குடமிளகாய், வெங்காயம், பச்சைப் பட்டாணியைச் சேர்த்து வதக்கவும். பிறகு இதில் மிளகுத்தூள், உப்பு சேர்த்து வதக்கவும். இதனுடன் சப்பாத்தித் துண்டுகளைச் சேர்த்துக் கிளறி இறக்கவும்.

குறிப்பு:  இந்த முறையில் சப்பாத்தி செய்தால் அதற்கு சைடிஷ் தேவை இல்லை. மாலை நேரத்தில் சாப்பிடுவதற்கு மிகவும் ஏற்றது, இந்த வெஜிடபிள் சப்பாத்தி.

ஜவ்வரிசி உப்புமா

தேவை:  ஜவ்வரிசி - 200 கிராம்,  வறுத்த வேர்க்கடலை - 100 கிராம்,  பொடியாக நறுக்கிய கேரட், தோல் உரித்த பச்சைப் பட்டாணி (இரண்டும் சேர்த்து) - ஒரு சிறிய கிண்ணம்,  பொடியாக நறுக்கிய பச்சை, சிவப்பு, மஞ்சள், குடமிளகாய் (மூன்றும் சேர்ந்து) - ஒரு கிண்ணம்,  பெரிய வெங்காயம் - ஒன்று (பொடியாக நறுக்கவும்),  இஞ்சி விழுது, மிளகுத்தூள் - தலா ஒரு டீஸ்பூன்,  வறுத்துப் பொடித்த வேர்க்கடலை - ஒரு டேபிள்ஸ்பூன்,  நறுக்கிய கொத்தமல்லித்தழை - சிறிதளவு,  நெய் - ஒரு டேபிள்ஸ்பூன்,  உப்பு - தேவையான அளவு.

30 வகை வெரைட்டி சமையல்! - இது பாரம்பர்ய ருசி!

செய்முறை:  ஜவ்வரிசியை நனையும் வரை தண்ணீர்விட்டு அரை மணி நேரம் ஊறவைத்து எடுக்கவும். இப்போது ஜவ்வரிசி ஊறி உதிரி உதிரியாக மிருதுவாக இருக்கும். வாணலியில் நெய்விட்டு சூடாக்கி பச்சைப் பட்டாணி, நறுக்கிய கேரட், குடமிளகாய், வெங்காயம், இஞ்சி விழுது, மிளகுத்தூள், உப்பு சேர்த்து வதக்கவும். பிறகு ஜவ்வரிசி, வறுத்த வேர்க்கடலையைப் போட்டுக் கிளறவும். எல்லாம் சேர்ந்து நன்றாக வெந்தவுடன் வறுத்துப் பொடித்த வேர்க்கடலையைச் சேர்த்து நன்றாகக் கிளறவும். பின்னர் நறுக்கிய கொத்தமல்லித்தழை சேர்த்துக் கிளறி இறக்கவும். சூடாகப் பரிமாறவும்.

குறிப்பு:    பேபிகார்ன் நறுக்கிப் போட்டும் இந்த உப்புமாவைத் தயாரிக்கலாம். விருப்பப்பட்டால் சிறிதளவு எலுமிச்சைச்சாறு சேர்க்கலாம்.

வேர்க்கடலை பாகற்காய் சாம்பார்

தேவை:    பச்சை வேர்க்கடலை - 100 கிராம்,  மிதி பாகற்காய் அல்லது நீட்டு பாகற்காய் - 100 கிராம்,  புளி - ஒரு சிறிய எலுமிச்சை அளவு,  சாம்பார் பொடி - 2 டேபிள்ஸ்பூன்,  பாசிப்பருப்பு, துவரம்பருப்பு (இரண்டும் சேர்த்து) - 100 கிராம்,  உப்பு - தேவைக்கேற்ப.

தாளிக்க:  கடுகு, வெந்தயம் - தலா ஒரு டீஸ்பூன்,  எண்ணெய் - ஒரு டீஸ்பூன்,  பெருங்காயத்தூள் - சிறிதளவு.

30 வகை வெரைட்டி சமையல்! - இது பாரம்பர்ய ருசி!

செய்முறை:  குக்கரில் பாசிப்பருப்பு, துவரம்பருப்பைக் குழைய வேகவைத்து எடுத்துக்கொள்ளவும். பச்சை வேர்க்கடலையை ஒரு மணி நேரம் ஊறவைத்து, பின்னர் வேகவைக்கவும். பாகற்காயை விதை நீக்கி துண்டுகளாக நறுக்கி வேகவைத்து நீரை வடிக்கவும். ஒரு வாணலியில் புளியைக் கரைத்துவிட்டு உப்பு, சாம்பார் பொடி போட்டுக் கொதிக்கவிடவும். புளி நன்கு கொதித்ததும் இதனுடன் வேகவைத்த வேர்க்கடலை, பாகற்காய் சேர்த்துக் கொதிக்கவைக்கவும். பிறகு வேகவைத்த பருப்பையும் சேர்த்து ஒரு கொதிவிட்டு இறக்கவும். பின்னர் தாளிக்கக் கொடுத்துள்ளவற்றைத் தாளித்துச் சேர்க்கவும்.

குறிப்பு:   சாம்பார் பொடிக்குப் பதிலாக மல்லி (தனியா), கடலைப்பருப்பு, தேங்காய், காய்ந்த மிளகாயை வறுத்து அரைத்துச் சேர்த்தால் கூடுதல் சுவையுடன் இருக்கும். நீரிழிவு உள்ளவர்களுக்கு மிகவும் நல்லது.

நட்ஸ் தானிய பக்கோடா

தேவை:  அரிசி மாவு, முளைகட்டிய கொள்ளு, கடலை மாவு - தலா 100 கிராம்,  முளைகட்டிய பச்சைப் பயறு - 2 டேபிள்ஸ்பூன்,  பெரிய வெங்காயம் - 2 (பொடியாக நறுக்கவும்),  இஞ்சி - ஒரு சிறிய துண்டு (தோல் சீவி, பொடியாக நறுக்கவும்),  பொடியாக நறுக்கிய புதினா இலை - ஒரு கைப்பிடி அளவு,  பச்சை மிளகாய் - 2 (பொடியாக நறுக்கவும்),  முந்திரிப்பருப்பு - 10 (உடைக்கவும்),  வறுத்த வேர்க்கடலை (தோல் நீக்கியது) - ஒரு சிறிய கிண்ணம்,  பாதாம்பருப்பு (ஒன்றிரண்டாக உடைத்துக்கொள்ளவும்) - 10,  பெருங்காயத்தூள் - சிறிதளவு,  மிளகுத்தூள் - ஒரு டீஸ்பூன், வெண்ணெய் - ஒரு டீஸ்பூன்  உப்பு, எண்ணெய் - தேவையான அளவு.

30 வகை வெரைட்டி சமையல்! - இது பாரம்பர்ய ருசி!

செய்முறை:  அரிசி மாவுடன் முளைகட்டிய கொள்ளு, கடலை மாவு, முளைகட்டிய பயறு சேர்த்துக் கலக்கவும். இதனுடன் நறுக்கிய வெங்காயம், பச்சை மிளகாய், இஞ்சி, புதினா சேர்க்கவும். பின்னர் இவற்றுடன் வெண்ணெய், உப்பு, பெருங்காயத்தூள், மிளகுத்தூளைச் சேர்க்கவும். வறுத்த வேர்க்கடலை, முந்திரிப்பருப்பு, பாதாம் பருப்பையும் மாவுடன் சேர்த்துக் கலக்கவும்.

பிறகு கலவையை நன்கு கிளறி, சிறிதளவு தண்ணீர்விட்டு கெட்டியாகப் பிசையவும். வாணலியில் எண்ணெய்விட்டு சூடாக்கி, அடுப்பை மிதமான தீயில் வைக்கவும். பிசைந்த மாவைச் சிறிது சிறிதாகக் கிள்ளிப் போட்டு பக்கோடாக்களாகப் பொரித்து எடுக்கவும். சட்னி, சாஸுடன் பரிமாறவும்.

பிடிகருணை மசியல்

தேவை:   பிடிகருணை - 4  இஞ்சி - ஒரு சிறிய துண்டு,  பொட்டுக்கடலை - ஒரு டீஸ்பூன்,  மஞ்சள்தூள் - ஒரு சிட்டிகை ,  பச்சை மிளகாய் - ஒன்று (நறுக்கவும்),  பெருங்காயத்தூள் - சிறிதளவு,  எலுமிச்சைப்பழம் – ஒன்று,  கடுகு - ஒரு டீஸ்பூன்,  பொடித்த வெல்லம் - ஒரு டீஸ்பூன்,  எண்ணெய் - ஒரு டீஸ்பூன்,  உப்பு - தேவைக்கேற்ப.

30 வகை வெரைட்டி சமையல்! - இது பாரம்பர்ய ருசி!

செய்முறை: கருணைக்கிழங்கை நன்கு கழுவி குக்கரில் இரண்டு விசில் வரும்வரை வேகவிடவும். பின்னர் கிழங்கு ஆறியதும் அதன் தோலை உரித்துக்கொள்ளவும். வாணலியில் எண்ணெய்விட்டு சூடாக்கவும். அதில் கடுகு, பொட்டுக்கடலை, மஞ்சள்தூள், பெருங்காயத்தூள், இஞ்சி, பச்சை மிளகாய் சேர்த்துத் தாளிக்கவும். பின்னர் இதனுடன் வேகவைத்த கருணைக்கிழங்கையும் மசித்துப் போட்டு உப்பு, சிறிதளவு தண்ணீர் சேர்த்துக் கிளறவும். கடைசியாகப் பொடித்த வெல்லம் சேர்த்துக் கொதிக்கவிடவும். பின்னர் எலுமிச்சைப்பழத்தைப் பிழிந்து நன்றாகக் கிளறிவிட்டு இறக்கவும்.

குறிப்பு:  எலுமிச்சைப்பழத்துக்குப் பதில் புளி கரைத்துவிட்டும் கொதிக்கவிடலாம். கருணைக்கிழங்கு மூல நோயிலிருந்து நிவாரணம் அளிக்கும்.

கோதுமை ரவை புலாவ்

தேவை:   பெரிய கோதுமை ரவை - 200 கிராம்,  குடமிளகாய் - ஒன்று,  பீன்ஸ் - 10,  பச்சை மிளகாய் - ஒன்று,  பச்சைப் பட்டாணி - 100 கிராம்,  பெரிய வெங்காயம், கேரட், உருளைக்கிழங்கு - தலா ஒன்று  புதினா - ஒரு கைப்பிடி அளவு,  வறுத்த முந்திரிப்பருப்பு - 10  எண்ணெய், நெய் - தலா ஒரு டேபிள்ஸ்பூன்,  பொரித்த பனீர் துண்டுகள் - 10,  உப்பு - தேவைக்கேற்ப.

30 வகை வெரைட்டி சமையல்! - இது பாரம்பர்ய ருசி!

செய்முறை: கோதுமை ரவையை ஒரு பங்குக்கு இரண்டு பங்கு தண்ணீர்விட்டு குக்கரில் இரண்டு விசில் வரும்வரை வேகவிட்டு இறக்கவும். கேரட், குடமிளகாய், வெங்காயம், பீன்ஸை நீளவாக்கில் நறுக்கவும். உருளைக்கிழங்கின் தோலைச் சீவவும். பின்னர் உருளைக்கிழங்கை நீளவாக்கில் நறுக்கி வைக்கவும். பச்சை மிளகாயைப் பொடியாக நறுக்கவும். வாணலியில் எண்ணெய், நெய்விட்டு சூடாக்கி எல்லாக் காய்களையும், பச்சைப் பட்டாணியும் சேர்க்கவும்.

பின்னர் இதனுடன் தேவையான அளவு உப்பு சேர்த்து வதக்கவும். காய் கலவை நன்கு வதங்கியதும் புதினாவையும் போட்டு வதக்கி இறக்கவும்.

அகலமான பாத்திரத்தில் வேகவைத்த கோதுமை சாதத்தைப் போடவும். இதனுடன் வதக்கிய காய் கலவை, வறுத்த முந்திரி, பொரித்த பனீர் சேர்த்து நன்கு கலக்கவும். வெங்காயத் தயிர்ப் பச்சடியுடன் பரிமாறவும்.

குறிப்பு:    விருப்பப்பட்டால் பிஸ்தா, பாதாம், உலர்திராட்சையும் சேர்க்கலாம்.

பல்பருப்புப் பொடி

தேவை:   துவரம்பருப்பு 100 கிராம்,  கடலைப்பருப்பு - ஒரு டீஸ்பூன்,  மிளகு - ஒரு டேபிள்ஸ்பூன்  காய்ந்த மிளகாய் - 2,  சீரகம், மல்லி (தனியா) - தலா ஒரு டீஸ்பூன்,  கறுப்பு உளுந்து - ஒரு டேபிள்ஸ்பூன்,  கறிவேப்பிலை - ஒரு கைப்பிடி அளவு,  கொள்ளு - ஒரு டீஸ்பூன்,  உப்பு - தேவையான அளவு.

30 வகை வெரைட்டி சமையல்! - இது பாரம்பர்ய ருசி!

செய்முறை: வெறும் வாணலியில் துவரம்பருப்பைப் பொன்னிறமாக வறுத்து எடுத்துக்கொள்ளவும். கடலைப்பருப்பு, கொள்ளு, கறுப்பு உளுந்தையும் ஒன்றாக வறுத்து எடுத்துக்கொள்ளவும். மல்லி, மிளகு, சீரகத்தை ஒன்றாகப் போட்டு வறுத்து எடுக்கவும். கறிவேப்பிலையை மொறுமொறுப்பாக வறுக்கவும். கடைசியாக காய்ந்த மிளகாயைச் சூடுபடுத்தி எடுக்கவும். உப்பையும் வறுத்து எடுத்துக்கொள்ளவும். பின்னர் இவை அனைத்தையும்  ஒன்றுசேர்த்து மிக்ஸியில் பொடித்து நன்றாகக் கலந்துகொள்ளவும். காற்றுப்புகாத டப்பாவில் போட்டு மூடிவைக்கவும்.

குறிப்பு:  சமையல் செய்ய நேரம் இல்லாதபோது சாதம் மட்டும் வைத்தால் போதும். இந்தப் பொடியை சாதத்தில் கலந்து சாப்பிட்டுவிடலாம். அதேபோல கறிவேப்பிலைக்குப் பதிலாக புதினாவை வறுத்து சேர்த்து அரைக்கலாம்.

சுண்டைக்காய் வேப்பம்பூத் துவையல்

தேவை: காய்ந்த சுண்டைக்காய் வற்றல் - 10,  காய்ந்த வேப்பம்பூ - ஒரு கைப்பிடி அளவு,  கறுப்பு உளுந்து - ஒரு டேபிள்ஸ்பூன்,  காய்ந்த மிளகாய் - 2,  புளி - சிறிய நெல்லிக்காய் அளவு,  கறிவேப்பிலை - சிறிதளவு  எண்ணெய், உப்பு - தேவையான அளவு.

30 வகை வெரைட்டி சமையல்! - இது பாரம்பர்ய ருசி!

செய்முறை: வாணலியில் சிறிதளவு எண்ணெய்விட்டு சுண்டைக்காயை முதலில் வறுத்து எடுக்கவும். பின்னர் அதே வாணலியில் வேப்பம்பூவை வறுத்து எடுக்கவும். பிறகு உளுந்தையும் காய்ந்த மிளகாயையும் ஒன்றாக வறுத்து எடுக்கவும். வறுத்த வேப்பம்பூ, சுண்டைக்காய், கறுப்பு உளுந்து, காய்ந்த மிளகாய் கறிவேப்பிலை இவற்றுடன் உப்பு, புளி, தண்ணீர் சேர்த்து மிக்ஸியில் துவையலாக அரைக்கவும்

குறிப்பு:      சூடான சாதத்துடன் துவையலைச் சேர்த்து நெய் அல்லது எண்ணெய்விட்டு சாப்பிடலாம். சுட்ட அப்பளம் இதற்குச் சிறந்த காம்பினேஷன்.

வாழைத்தண்டு மோர்க்கூட்டு

தேவை:  வாழைத்தண்டு – ஒன்று  புளிக்காத கெட்டித் தயிர் - 100, மில்லி  பச்சை மிளகாய் - ஒன்று,  தேங்காய்த் துருவல் - ஒரு சிறிய கிண்ணம்,  உப்பு - ஒரு டீஸ்பூன்.

தாளிக்க:  கடுகு, உளுத்தம்பருப்பு  சீரகம் - தலா ஒரு டீஸ்பூன்,  பெருங்காயத்தூள், கறிவேப்பிலை - சிறிதளவு.

30 வகை வெரைட்டி சமையல்! - இது பாரம்பர்ய ருசி!

செய்முறை: வாழைத்தண்டை தோல் சீவி வில்லைகளாக நறுக்கி நாரை நீக்கிக்கொள்ளவும். பின்னர் பொடியாக நறுக்கி, உப்பு சேர்த்து வேகவிடவும். பச்சை மிளகாய், தேங்காய் இரண்டையும் சேர்த்து மிக்ஸியில் அரைத்துக்கொள்ளவும். அரைத்த விழுதைத் தயிருடன் கலக்கவும். பின்னர் வேகவைத்த வாழைத்தண்டுடன் அரைத்த விழுதைக் கலக்கவும். ஒரு வாணலியில் கடுகு, சீரகம், உளுத்தம்பருப்பு, பெருங்காயத்தூள், கறிவேப்பிலை தாளித்து அதில் வாழைத்தண்டுக் கலவையைச் சேர்க்கவும். பின்னர் ஒரு கொதிவிட்டு இறக்கவும்.

குறிப்பு:  வாழைத்தண்டு சிறுநீரகக் கோளாறு வராமல் தடுக்கும். இப்படி மோர்க்கூட்டாகச் செய்யாமல் வாழைத்தண்டு ஜூஸ் எடுத்து அதனுடன் மோர், ஒரு சிட்டிகை உப்பு கலந்து குடிக்கலாம். அதேபோல தயிருடன் பச்சையாக வாழைத்தண்டை நறுக்கி போட்டும் சாப்பிடலாம்.

சாமைப் பொங்கல்

தேவை:  பாசிப்பருப்பு - 50 கிராம்,  சாமை அரிசி - 200 கிராம்,  மிளகு - 10  சீரகம் - ஒரு டீஸ்பூன் (மிளகு, சீரகத்தை ஒன்றிரண்டாக உடைத்துக்கொள்ளவும்),  நெய் - 2 டேபிள்ஸ்பூன்,  தோல் சீவி பொடியாக நறுக்கிய இஞ்சி - ஒரு டீஸ்பூன்,  வறுத்த முந்திரிப்பருப்பு - 10  கறிவேப்பிலை, பெருங்காயத்தூள் - சிறிதளவு,  உப்பு - தேவைக்கேற்ப.

30 வகை வெரைட்டி சமையல்! - இது பாரம்பர்ய ருசி!

செய்முறை:  சாமை அரிசியுடன் பாசிப்பருப்பு சேர்த்து லேசாகச் சூடு வரும்வரை வறுக்கவும். இவற்றுடன் ஒரு பங்கு அரிசிக்கு மூன்று பங்கு என்கிற அளவில் தண்ணீர் சேர்த்து குக்கரில் ஐந்து விசில் வரும் வரை வேகவிட்டு இறக்கவும். வாணலியில் சிறிதளவு நெய்யைச் சூடாக்கி அதில் மிளகு, சீரகத்தைச் சேர்த்து வறுக்கவும். பிறகு இஞ்சியையும் சேர்த்து வதக்கவும். இதை வேகவைத்த பொங்கல் கலவையில் சேர்க்கவும். இதனுடன் கறிவேப்பிலை, உப்பு, வறுத்த முந்திரிப்பருப்பு, பெருங்காயத்தூள் சேர்த்து மீதமுள்ள நெய்விட்டுக் கலந்து சுடச்சுடப் பரிமாறவும்.

குறிப்பு:  அரிசிக்குப் பதிலாக இப்படி சிறுதானியங்களைப் பயன்படுத்தி செய்து ஆரோக்கியத்தை மேம்படுத்தலாம்.

சேனை மோர்க்குழம்பு

தேவை: சேனைக்கிழங்கு - ஒரு சிறிய துண்டு,  மிளகு - ஒரு டேபிள்ஸ்பூன்,  தயிர் - 100 மில்லி  அரிசி - ஒரு டீஸ்பூன்,  மஞ்சள்தூள் ஒரு சிட்டிகை,  எண்ணெய் - சிறிதளவு,  உப்பு - தேவையான அளவு.

தாளிக்க:      கடுகு, எண்ணெய் - தலா ஒரு டீஸ்பூன்.

30 வகை வெரைட்டி சமையல்! - இது பாரம்பர்ய ருசி!

செய்முறை: வாணலியில் எண்ணெய்விட்டு அரிசியையும் மிளகையும் தனித்தனியாக வறுத்து எடுத்துக்கொள்ளவும். சேனையைத் தோல் சீவி சிறு துண்டுகளாக நறுக்கி ஒரு சிட்டிகை     மஞ்சள்தூள், சிறிதளவு உப்பு சேர்த்து வேகவிட்டு, தண்ணீரை வடித்துக்கொள்ளவும். வறுத்த மிளகு, அரிசியை ஒன்றாகச் சேர்க்கவும். இதனுடன் மோர்க்குழம்புக்குத் தேவையான உப்பையும் சிறிதளவு தண்ணீரையும் சேர்த்து மிக்ஸியில் மையாக அரைத்துக்கொள்ளவும். இதைத் தயிருடன் சேர்த்துக் கலக்கவும். பின்னர் இந்தத் தயிர்க் கலவையில் வேகவைத்த சேனையைச் சேர்த்து நன்கு கொதிக்கவைத்து இறக்கவும். எண்ணெயில் கடுகு தாளித்து இந்தக் கலவையில் சேர்க்கவும். வித்தியாசமான ருசியில் மோர்க்குழம்பு ரெடி.

தேங்காய்ப்பால் குழம்பு

தேவை:  தேங்காய்ப்பால் - 100 மில்லி,  கேரட், முருங்கைக்காய் - தலா ஒன்று,  பீன்ஸ் - 10  துவரம்பருப்பு - 100 கிராம்,  கரம் மசாலாத்தூள் - ஒரு சிட்டிகை,  புளி - ஒரு பெரிய நெல்லிக்காய் அளவு,  கொத்தமல்லித்தழை - சிறிதளவு,  சாம்பார் பொடி - 2 டேபிள்ஸ்பூன்,  உப்பு - தேவையான அளவு.

30 வகை வெரைட்டி சமையல்! - இது பாரம்பர்ய ருசி!

செய்முறை: துவரம்பருப்பைக் குக்கரில் வேகவைக்கவும். பீன்ஸ், கேரட், முருங்கைக்காயை நறுக்கிக்கொள்ளவும். புளியைத் தேவையான அளவு நீரில் கரைத்து அதனுடன் உப்பு, சாம்பார் பொடி, கரம் மசாலாத்தூள் சேர்த்துக் கொதிக்கவைக்கவும். பின்னர் நறுக்கிய கேரட், பீன்ஸ், முருங்கைக்காய் சேர்த்து வேகவிடவும். காய்கள் நன்கு வெந்ததும் வேகவைத்த துவரம்பருப்பைச் சேர்த்துக் கொதிக்கவைத்து, கொத்தமல்லித்தழை சேர்த்து இறக்கவும். சிறிது சூடு ஆறியதும் தேங்காய்ப்பால் விட்டு கலக்கவும்.

இட்லி, தோசைக்கு இந்தக் குழம்பைத் தொட்டு சாப்பிட்டால் மிகவும் நன்றாக இருக்கும்.

கூட்டு வடக அப்பளக்குழம்பு

தேவை: புளி - எலுமிச்சைப்பழ அளவு,  கூட்டு வடகம் - 10,  உளுந்து அப்பளம் - 2  மணத்தக்காளி, வற்றல் - ஒரு டேபிள்ஸ்பூன்,  சாம்பார் பொடி - ஒன்றரை டேபிள்ஸ்பூன்,  கறிவேப்பிலை - சிறிதளவு,  உப்பு - தேவையான அளவு,  எண்ணெய் - 2 டேபிள்ஸ்பூன்.

தாளிக்க:  எண்ணெய், கடுகு, கடலைப்பருப்பு, வெந்தயம் - தலா ஒரு டீஸ்பூன்  காய்ந்த மிளகாய் - ஒன்று.

30 வகை வெரைட்டி சமையல்! - இது பாரம்பர்ய ருசி!

செய்முறை: கூட்டு வடகத்தைச் சிறிதளவு எண்ணெயில் வறுத்து எடுத்துக்கொள்ளவும். மணத்தக்காளி வற்றலையும் வறுத்து எடுத்துக்கொள்ளவும். மீதமுள்ள எண்ணெயில் அப்பளத்தைக் கிள்ளிப் போட்டுப் பொரித்து எடுக்கவும். ஒரு வாணலியில் புளியைக் கரைத்துவிட்டு, அதனுடன் உப்பு, சாம்பார் பொடி  சேர்த்துக் கலக்கவும். பின்னர் இதை அடுப்பில் ஏற்றவும். இதனுடன் தாளிக்கக்கொடுத்துள்ளவற்றைத் தாளித்துச் சேர்த்து, வறுத்த கூட்டு வடகம், அப்பளம், மணத்தக்காளி வற்றல் ஆகியவற்றைச் சேர்க்கவும். பிறகு தேவையான உப்பு சேர்த்துக் கொதிக்கவிட்டு கறிவேப்பிலையைச் சேர்த்து இறக்கவும்.

குறிப்பு:  காராமணி, உளுந்து, காய்ந்த மிளகாய், உப்பு, மஞ்சள்தூள் சேர்த்து அரைத்துச் செய்யப்படும் ஒருவகை வடகம்தான் கூட்டு வடகம். இது அப்பளம் விற்கும் கடைகளில் கிடைக்கும். பருப்பு சேர்க்காததால் இந்தக் குழம்பை இரண்டு நாள்கள் வரை வைத்துப் பயன்படுத்தலாம். எதிர்பாராமல் விருந்தினர்கள் வந்துவிட்டால் உடனே தயாரிக்கலாம். சுட்ட அப்பளம், தயிர்ப் பச்சடி இந்தக் குழம்புக்கு நல்ல காம்பினேஷன்.

சோயா உருண்டை சுண்டல்

தேவை: சோயா உருண்டை (சோயா சங்க்ஸ்) - 10,  முளைகட்டிய கொள்ளு, சோளம் - ஒரு தலா ஒரு கைப்பிடி அளவு,  வெள்ளரிக்காய் (பொடியாக நறுக்கியது) - ஒரு சிறிய கிண்ணம்,  கேரட் (பொடியாக நறுக்கியது) - ஒரு சிறிய கிண்ணம்,  பெருங்காயத்தூள் - சிறிதளவு  மாங்காய் (பொடியாக நறுக்கியது) - ஒரு சிறிய கிண்ணம்,  மிளகாய்த்தூள் - அரை டீஸ்பூன்,  கொத்தமல்லித்தழை (பொடியாக நறுக்கியது) - சிறிதளவு,  உப்பு - தேவையான அளவு,  எண்ணெய் - ஒரு டேபிள்ஸ்பூன்.

30 வகை வெரைட்டி சமையல்! - இது பாரம்பர்ய ருசி!

செய்முறை: சோயா உருண்டைகளைச் வெந்நீரில் போட்டு 10 நிமிடங்கள் வரை வைக்கவும். பின்னர் நீரை வடித்துப் பிழிந்துகொள்ளவும். பிழிந்துவைத்திருக்கும் சோயாவைச் சிறு துண்டுகளாக நறுக்கிக்கொள்ளவும். முளைகட்டிய சோளம், கொள்ளு இரண்டையும் குக்கரில் சேர்த்து, ஒரு டீஸ்பூன் உப்பு சேர்த்து ஒரு விசில்விட்டு இறக்கவும். பின்னர் இதிலிருக்கும் நீரை வடித்துவைக்கவும்.

வாணலியில் எண்ணெய்விட்டு சூடாக்கி, நறுக்கிய சோயா உருண்டைகளைப் போட்டு வதக்கவும். பின்னர் இதனுடன் வேகவைத்த கொள்ளு, சோளத்தைச் சேர்க்கவும். பிறகு நறுக்கிய கேரட், வெள்ளரித் துண்டுகள், மாங்காய்த் துண்டுகள், சிறிதளவு உப்பு, மிளகாய்த்தூள், பெருங்காயத்தூள் சேர்த்துக் கிளறிவிடவும். கடைசியாக நறுக்கிய கொத்தமல்லித்தழை சேர்த்துக் கலந்து இறக்கவும்.

குறிப்பு:  கொள்ளு, சோளம் மட்டுமல்லாமல், உங்களுக்கு விருப்பமான பயிறு வகைகளைச் சேர்த்து இதே முறையில் சுண்டல் தயாரிக்கலாம்.

மாங்காய் வேப்பம்பூப் பச்சடி

தேவை:  மாங்காய் - ஒன்று  வேப்பம்பூ (காய்ந்தது) - ஒரு கைப்பிடி அளவு,  பொடித்த வெல்லம் - 100 கிராம்  மஞ்சள்தூள் - ஒரு சிட்டிகை,  பச்சை மிளகாய் - ஒன்று  தேங்காய்த் துருவல் - 2 டேபிள்ஸ்பூன்,
 உப்பு - தேவையான அளவு.

தாளிக்க: 
கடுகு - ஒரு டீஸ்பூன்  எண்ணெய் - ஒரு டீஸ்பூன்.

30 வகை வெரைட்டி சமையல்! - இது பாரம்பர்ய ருசி!

செய்முறை: மாங்காயைத் தோல் சீவி நறுக்கி, மஞ்சள்தூள் சேர்த்துக் குழைவாக வேகவிடவும். தேங்காய், பச்சை மிளகாயைச் சிறிதளவு தண்ணீர்விட்டு அரைத்துக்கொள்ளவும். வாணலியில் எண்ணெய்விட்டு கடுகு தாளித்து, வேப்பம்பூவைச் சேர்த்து வறுத்து எடுத்துக்கொள்ளவும். பிறகு வேகவைத்த மாங்காயுடன் தாளித்த கடுகு - வேப்பம்பூவைச் சேர்க்கவும். அரைத்த தேங்காய் விழுதை இதனுடன் சேர்க்கவும். பொடித்த வெல்லத்தையும் சேர்த்து, உப்பு போட்டு கொதிக்கவிட்டு இறக்கவும்.

குறிப்பு:      வாழ்க்கையில் கசப்பு, இனிப்பு என்று எல்லாமே இருக்கும். இதை உணர்த்த கசப்பு, இனிப்பு, புளிப்பு, உவர்ப்பு, உப்பு, காரம் சேர்த்து இந்தப் பச்சடியை தமிழ்ப் புத்தாண்டில் தயாரித்து வருவது நமது வழக்கத்தில் உள்ளது. வாழ்க்கைத் தத்துவத்தை எளிதாக உணர்த்துவதால் இதற்குத்  `தத்துவப் பச்சடி' என்கிற பெயரும் இருக்கிறது.

மோர்க்கூழ் ரைஸ் கேக்

தேவை:  இட்லி அரிசி - 200 கிராம்,  மோர் மிளகாய் - 4,  புளித்த மோர் - 200 மில்லி,  பெருங்காயத்தூள் - சிறிதளவு,  நல்லெண்ணெய் - 50, மில்லி  இட்லி மிளகாய்ப் பொடி - ஒரு டேபிள்ஸ்பூன்,  உப்பு - தேவையான அளவு.

தாளிக்க:  கடுகு, உளுத்தம்பருப்பு - தலா ஒரு டீஸ்பூன். 

30 வகை வெரைட்டி சமையல்! - இது பாரம்பர்ய ருசி!

செய்முறை: இட்லி அரிசியை ஒரு மணி நேரம் ஊறவைத்து அரைக்கவும். அரைத்த மாவுடன் புளித்த மோர், உப்பு, பெருங்காயத்தூள் சேர்த்து 300 மில்லி தண்ணீர்விட்டுக் கரைக்கவும். வாணலியில் எண்ணெய்விட்டு கடுகு, உளுத்தம்பருப்பு தாளிக்கவும். இதனுடன் மோர் மிளகாயையும் கிள்ளிப் போட்டு வறுக்கவும். மோர் மிளகாய் வறுபட்டதும் கரைத்து வைத்திருக்கும் மாவை ஊற்றி அடுப்பை மிதமான தீயில் வைத்து நன்றாகக் கிளறவும். கையில் ஒட்டாமல் மாவு கெட்டியாக வரும்போது அதனுடன் இட்லி மிளகாய்ப் பொடி சேர்த்து நன்கு கிளறி இறக்கவும். ஒரு தட்டில் சிறிதளவு எண்ணெய் தடவி அதில் தயாரித்த மாவைப் பரவலாக போட்டு ஆறவிடவும். மாவு ஆறியதும் சிறு துண்டுகள் போட்டுப் பரிமாறவும்.

குறிப்பு:  முதல் நாளே மாவை அரைத்துப் புளிக்கவைத்து, மோர் சேர்க்காமல் செய்யலாம். இதில் மோர் மிளகாயும், இட்லி மிளகாய்ப் பொடியும் இருப்பதால் சைடிஷ் தேவையில்லை.

இலை வடாம்

தேவை:  இட்லி அரிசி - 200 கிராம்,  பச்சரிசி - 2 டேபிள்ஸ்பூன்,  ஓமம் - ஒரு டீஸ்பூன்,  மிளகாய்த்தூள் - ஒரு டீஸ்பூன்,  பெருங்காயத்தூள் - சிறிதளவு,  உப்பு - தேவையான அளவு,  சதுரமாக நறுக்கிய வாழையிலைத் துண்டுகள் - தேவையான அளவு,  எண்ணெய் - ஒரு டீஸ்பூன்.

30 வகை வெரைட்டி சமையல்! - இது பாரம்பர்ய ருசி!

செய்முறை: வடாம் செய்வதற்கு முதல் நாளே இட்லி அரிசியையும் பச்சரிசியையும் ஒன்றாக ஒரு மணி நேரம் ஊறவைத்து மிக்ஸி அல்லது கிரைண்டரில் நைஸாக அரைக்கவும். உப்பு சேர்த்துக் கரைத்து மாவை வெளியில் வைத்துவிடவும். ஓமம், ஒரு டீஸ்பூன் எண்ணெய், பெருங்காயத்தூளை மாவில் சேர்த்துக் கலந்துகொள்ளவும். ஒரு வாழையிலையின் பின்புறம் மாவை ஒரு கரண்டியால் ஊற்றிப் பரவலாகத் தேய்த்துக்கொள்ளவும். வாணலியில் தண்ணீர்விட்டுக் கொதிக்கவிடவும். தண்ணீர் கொதித்தவுடன் அதன்மேல் ஸ்டீமர் தட்டை (ரைஸ் குக்கரில் இருக்கும் ஸ்டீமர் தட்டு) வைத்து அதன் மேல் மாவு எழுதிய இலையை வைத்து மூடி ஆவியில் வேகவைக்கவும். அடுத்த இலையைத் தயாரிப்பதற்குள் முதலில் வைத்த இலை மாவு வெந்துவிடும். சிறிது ஆறியதும் எளிதாக இலையிலிருந்து உரித்து எடுத்துவிடலாம். இதே முறையில் இலையை மாற்றி மாற்றி எழுதி வேகவைத்து எடுக்கலாம். ஒரு பாதி மாவை இதுபோல காரமில்லாத இலை வடாமாகத் தயாரித்துவிட்டு, மீதமிருக்கும் மாவில் மிளகாய்த்தூள் சேர்த்துக் கலந்து இதே முறையில் இலை வடாம் தயாரிக்கலாம்.

குறிப்பு:  இந்த இலை வடாமுடன் இட்லி மிளகாய்ப் பொடி சேர்த்துச் சாப்பிடலாம். வெயிலில் காயவைத்து எண்ணெயில் பொரித்தோ அல்லது தீயில் வாட்டியோ சாப்பிடலாம். பத்தியச் சாப்பாட்டில் இந்த இலை வடாம் கட்டாயம் இடம்பெறும்.

பருப்பு உருண்டை ரசம்

தேவை: 
ரசம் தயாரிக்க:
 மல்லி (தனியா) - ஒரு டீஸ்பூன்,  காய்ந்த மிளகாய் - 4,  கடலைப்பருப்பு - ஒரு டீஸ்பூன்,  புளி - ஒரு பெரிய நெல்லிக்காய் அளவு,  தேங்காய்த் துருவல் - ஒரு டேபிள்ஸ்பூன்,  எண்ணெய் - சிறிதளவு,  உப்பு - தேவைக்கேற்ப.

பருப்பு உருண்டை தயாரிக்க:  துவரம்பருப்பு - 100 கிராம்,  கடலைப்பருப்பு - ஒரு டேபிள்ஸ்பூன்  காய்ந்த மிளகாய் - ஒன்று,  உப்பு - தேவையான அளவு,  எண்ணெய் - ஒரு டேபிள்ஸ்பூன்.

30 வகை வெரைட்டி சமையல்! - இது பாரம்பர்ய ருசி!

செய்முறை: தேங்காய்த் துருவல், மல்லி, காய்ந்த மிளகாய், கடலைப்பருப்பைச் சிறிதளவு எண்ணெயில் வறுக்கவும். மிக்ஸியில் சிறிதளவு தண்ணீர்விட்டு இதை நைஸாக அரைத்துக்கொள்ளவும். புளியைக் கரைத்து எடுத்துக்கொண்டு அதனுடன் அரைத்த விழுது, உப்பைச் சேர்த்துக் கொதிக்கவிட்டு இறக்கவும்.

உருண்டை செய்ய கொடுத்துள்ள துவரம்பருப்பு, கடலைப்பருப்பை ஒரு மணி நேரம் ஒன்றாக ஊறவைக்கவும். இதனுடன் காய்ந்த மிளகாய், உப்பு சேர்த்து மிக்ஸியில் கெட்டியாக அரைத்துக்கொள்ளவும். வாணலியில் எண்ணெய்விட்டு அரைத்த பருப்புக் கலவையைப் போட்டுக் கிளறவும். கலவை கெட்டியானதும் கீழே இறக்கி நன்கு பிசைந்துகொள்ளவும். பின்னர் இதை சிறு உருண்டைகளாக உருட்டவும். இந்த உருண்டைகளை இட்லித்தட்டில் வைத்து ஆவியில் வேகவைத்து எடுத்து ரசத்துடன் சேர்க்கவும்.

குறிப்பு:  சாதத்தில் ரசம்விட்டு உருண்டைகளைத் தொட்டுச் சாப்பிடலாம். சைடிஷ் தேவையில்லை.

ஓட்ஸ் அவல் பணியாரம்

தேவை: ஓட்ஸ், அவல், கோதுமை மாவு - தலா ஒரு சிறிய கிண்ணம்,  பெரிய வெங்காயம் - ஒன்று (பொடியாக நறுக்கவும்),  கேழ்வரகு மாவு - ஒரு டீஸ்பூன்,  அரிசி மாவு - ஒரு டேபிள்ஸ்பூன்,  மிளகுத்தூள் - ஒரு டீஸ்பூன்,  பச்சை மிளகாய் - ஒன்று (பொடியாக நறுக்கவும்),  இஞ்சி - ஒரு சிறிய துண்டு (தோல் சீவி, பொடியாக நறுக்கவும்),  கடுகு - ஒரு டீஸ்பூன்,  எண்ணெய், நெய் - தலா 50 மில்லி,  உப்பு - தேவையான அளவு.

30 வகை வெரைட்டி சமையல்! - இது பாரம்பர்ய ருசி!

செய்முறை: ஓட்ஸ், அவல் இரண்டையும் ஒன்றாக முப்பது நிமிடங்கள் ஊறவைத்து எடுக்கவும். இதனுடன் கோதுமை மாவு, கேழ்வரகு மாவு, அரிசி மாவு, உப்பு சேர்த்து கெட்டியாகக் கரைக்கவும். வாணலியில் சிறிதளவு எண்ணெய்விட்டு சூடாக்கி கடுகு தாளித்து, இஞ்சி, பச்சை மிளகாய், வெங்காயம் சேர்த்து வதக்கவும். இதனுடன் மிளகுத்தூளை சேர்த்து வதக்கி, கலவையை மாவுடன் சேர்க்கவும். மீதமுள்ள எண்ணெயுடன் நெய்யைக் கலந்து கொள்ளவும். பணியாரக்கல்லின் குழிகளில் எண்ணெய் - நெய் கலவையைத் தடவி மாவை விடவும். அடுப்பை மிதமான தீயில் வைத்து, இருபுறமும் வேகவிட்டு எடுக்கவும்.

குறிப்பு:  இதற்கு புதினாச் சட்னி, தேங்காய்ச் சட்னி சிறந்த காம்பினேஷன். தேங்காய்ப்பால் தொட்டும் சாப்பிடலாம்.

சிவப்பரிசி குழல் புட்டு

தேவை: சிவப்பரிசி புட்டு மாவு - 200 கிராம்,  நேந்திரம் பழம் - ஒன்று,  தேங்காய் - ஒரு மூடி (துருவிக்கொள்ளவும்),  தண்ணீர் - 100 மில்லி,  உப்பு - சிறிதளவு.

30 வகை வெரைட்டி சமையல்! - இது பாரம்பர்ய ருசி!

செய்முறை: சிவப்பரிசி புட்டு மாவில் உப்பு சேர்க்கவும். தண்ணீரை லேசாக சூடாக்கி இதில் தெளித்துப் பிசிறிக்கொள்ளவும். (தண்ணீர் அதிகம் விடாமல் தெளித்து, கவனமாகப் பிசிறவும்). பிசிறிய மாவுடன் நேந்திரம் பழத்துண்டுகள், தேங்காய்த் துருவல் சேர்த்துக் கலந்து புட்டுக் குழலில் அடைத்து ஆவியில் வேகவிட்டு எடுக்கவும்.

குறிப்பு:  ஒரு லேயர் புட்டு மாவு ஒரு லேயர் பழத்துண்டு மீண்டும் ஒரு லேயர் மாவு, ஒரு லேயர் தேங்காய்த் துருவல் என்று மாறி மாறி  புட்டுக்குழலை நிரப்பலாம். அல்லது எல்லாவற்றையும் ஒன்றாகக் கலந்தும் நிரப்பியும் வேகவைக்கலாம். இந்தப் புட்டுக்குப் பயறு கறி பொருத்தமாக இருக்கும்.

ஜீரணத் துவையல்

தேவை:  வல்லாரைக்கீரை - ஒரு கைப்பிடி அளவு,  இளம்பிரண்டை - 3 துண்டு,  கறிவேப்பிலை - ஒரு கைப்பிடி அளவு,  இஞ்சி - ஒரு சிறு துண்டு,  தேங்காய்த் துருவல் - ஒரு டேபிள்ஸ்பூன்,  பூண்டு - 4 பல்,  உளுத்தம்பருப்பு - ஒரு டேபிள்ஸ்பூன்,  காய்ந்த மிளகாய் - 2  எண்ணெய் - ஒரு டேபிள்ஸ்பூன்,  புளி - ஒரு நெல்லிக்காய் அளவு,  உப்பு - தேவையான அளவு.

30 வகை வெரைட்டி சமையல்! - இது பாரம்பர்ய ருசி!

செய்முறை: வல்லாரைக்கீரையை ஆய்ந்து எடுத்துக்கொள்ளவும். பிரண்டையைச் சிறிய துண்டுகளாக நறுக்கிக்கொள்ளவும். இஞ்சியைத் தோல் சீவி நறுக்கவும். பூண்டை தோல் உரித்து எடுத்துக்கொள்ளவும். வாணலியில் சிறிதளவு எண்ணெய்விட்டு, வல்லாரை, பிரண்டை, இஞ்சி, கறிவேப்பிலை, பூண்டு சேர்த்து வதக்கி எடுத்துக்கொள்ளவும். வாணலியில் மீதமுள்ள எண்ணெய்விட்டு உளுத்தம்பருப்பு, காய்ந்த மிளகாயை வறுத்து எடுக்கவும். இதனுடன், புளி உப்பு, தேங்காய்த் துருவல், வதக்கிய வல்லாரைக் கலவை ஆகியவற்றைச் சேர்த்து, சிறிதளவு தண்ணீர்விட்டு கெட்டியாக அரைக்கவும்.

குறிப்பு: சூடான சாதத்துடன் இந்தத் துவையலைச் சேர்த்து எண்ணெய் அல்லது நெய்விட்டுப் பிசைந்து சாப்பிடலாம். வயிறு மந்தமாக இருந்தால், இந்தத் துவையலை அரைத்துச் சாப்பிட, நிவாரணம் கிடைக்கும். சுட்ட அப்பளம், பச்சடி இதற்குச் சிறந்த காம்பினேஷன்.

சிறுகிழங்குப் பொரியல்

தேவை: சிறுகிழங்கு - 200 கிராம்,  கடலைப்பருப்பு, மல்லி (தனியா) - தலா ஒரு டீஸ்பூன்,  காய்ந்த மிளகாய் - ஒன்று,  தேங்காய் எண்ணெய் - ஒரு டேபிள்ஸ்பூன்,  பெருங்காயத்தூள் - சிறிதளவு,  கடுகு - ஒரு டீஸ்பூன்,  உப்பு - தேவைக்கேற்ப.

30 வகை வெரைட்டி சமையல்! - இது பாரம்பர்ய ருசி!

செய்முறை:  சிறுகிழங்கை குக்கரில் வேகவிட்டு இரண்டு விசில் வந்ததும் இறக்கவும். ஆறியவுடன் அதன் தோலை உரித்து இரண்டாக நறுக்கிக்கொள்ளவும். கடலைப்பருப்பு, மல்லி, காய்ந்த மிளகாயை  வெறும் வாணலியில் வறுத்து மிக்ஸியில் பொடித்துக்கொள்ளவும். வாணலியில் எண்ணெய்விட்டு சூடாக்கி, கடுகு தாளிக்கவும். அதில் நறுக்கி வைத்திருக்கும் சிறுகிழங்கைப் போட்டு வதக்கவும். பிறகு உப்பு, பெருங்காயத்தூள் மற்றும் வறுத்துப் பொடித்து வைத்திருக்கும் பொடியையும் சேர்த்து வதக்கவும். அடுப்பை மிதமான தீயில் வைத்து கிழங்கு மொறுமொறுப்பானதும் எடுக்கவும்.

இஞ்சி பூண்டு கோங்கூரா உலர்பழ ஊறுகாய்

தேவை:  பூண்டு விழுது - ஒரு டீஸ்பூன்,  கோங்கூரா (புளிச்ச கீரை) - ஒரு கட்டு,  பேரீச்சம்பழம் - 4,  உலர் அத்திப்பழம் - 2 துண்டுகள்,  உலர்திராட்சை - 10,  இஞ்சி விழுது - ஒரு டேபிள்ஸ்பூன்,  புளி - ஒரு சிறிய நெல்லிக்காய் அளவு,  காய்ந்த மிளகாய் - 4,  பொடித்த வெல்லம் - ஒரு டேபிள்ஸ்பூன்,  பூண்டு - 20 பல் (தோல் உரிக்கவும்),  கடுகு - ஒரு டேபிள்ஸ்பூன்,  பெருங்காயத்தூள் - சிறிதளவு,  நல்லெண்ணெய் - 50 மில்லி,  உப்பு – தேவையான அளவு,

30 வகை வெரைட்டி சமையல்! - இது பாரம்பர்ய ருசி!

செய்முறை: புளிச்ச கீரையைக் காம்பு ஆய்ந்து இலைகளைச் சுத்தம் செய்து, வாணலியில் சிறிதளவு எண்ணெய்விட்டு வதக்கவும். பின்னர் இதை அரைத்துக்கொள்ளவும். பூண்டுப்பல்லையும் சிறிதளவு எண்ணெயில் வதக்கிக்கொள்ளவும். பேரீச்சம்பழம், அத்திபழம், உலர்ந்த திராட்சை, புளி, காய்ந்த மிளகாய் சிறிதளவு தண்ணீர்விட்டு ஊறவைத்து மிக்ஸியில் அரைக்கவும். மீதமுள்ள எண்ணெயை வாணலியில்விட்டு கடுகு தாளித்து, இஞ்சி விழுது, பூண்டு விழுது சேர்த்து வதக்கவும். இதனுடன் வதக்கி அரைத்த புளிச்ச கீரை விழுது, அரைத்த உலர்பழக்கலவை, வதக்கிய பூண்டுப் பல், வெல்லம், உப்பு, பெருங்காயத்தூள் சேர்த்து வதக்கி  கெட்டியாகக் கிளறி இறக்கவும்.

இந்த ஊறுகாய் சப்பாத்தி, பிரெட்டின் மேல் தடவிச் சாப்பிட வெகு பொருத்தமானது.

தக்காளிக்காய் ரசவாங்கி

தேவை:  துவரம்பருப்பு - 100 கிராம்,  தக்காளிக்காய் - 200 கிராம்,  மல்லி (தனியா) - ஒரு டேபிள்ஸ்பூன்,  தேங்காய்த் துருவல் - 2 டேபிள்ஸ்பூன்,  காய்ந்த மிளகாய் - 2,  கடலைப்பருப்பு - ஒரு டேபிள்ஸ்பூன்,  மஞ்சள்தூள் - கால் டீஸ்பூன்,  வெல்லம் - ஒரு சிறிய துண்டு,  உப்பு - அரை டேபிள்ஸ்பூன்.

தாளிக்க:  கடுகு, உளுத்தம்பருப்பு - தலா அரை டீஸ்பூன்,  பெருங்காயத்தூள் - சிறிதளவு  கறிவேப்பிலை - சிறிதளவு,  எண்ணெய் - ஒரு டீஸ்பூன்.

30 வகை வெரைட்டி சமையல்! - இது பாரம்பர்ய ருசி!

செய்முறை: துவரம்பருப்பை குக்கரில் குழைவாக வேகவிடவும். தக்காளிக்காயைச் சிறு துண்டுகளாக நறுக்கி உப்பு, மஞ்சள்தூள் சேர்த்து வேகவைத்து எடுத்துக்கொள்ளவும். வாணலியில் எண்ணெய்விட்டு சூடாக்கி, அதில் மல்லி, கடலைப்பருப்பு, காய்ந்த மிளகாய் சேர்த்து வறுக்கவும். அதனுடன் தேங்காய்த் துருவல் சேர்த்து, சிறிதளவு தண்ணீர்விட்டு அரைத்துக்கொள்ளவும். வேகவைத்த தக்காளியுடன் அரைத்த விழுதைச் சேர்க்கவும். இதனுடன் வெல்லம், வேகவைத்த பருப்பைச் சேர்த்து நன்கு கொதிக்கவிடவும். தாளிக்கக்கொடுத்துள்ள பொருள்களைத் தாளித்து,  கொதிக்கும் கலவையில் சேர்த்து மீண்டும் ஒரு கொதிவிட்டு இறக்கவும்.

குறிப்பு:   கத்திரிக்காயிலும் இதே முறையில் செய்யலாம். சிறிது புளிப்பும், வெல்லத்தின் இனிப்பும் சேர்ந்து இது தனி ருசியுடன் இருக்கும். சாதத்துடன் பிசைந்து சாப்பிடலாம். சைடிஷ்ஷாகவும் பயன்படுத்தலாம்.

அள்ளி அள்ளிச் சாப்பிடத் தூண்டும் அம்மா... அம்மம்மா ரெசிப்பிகள்!

கைப்பேசிச் செயலி வழியாக உணவு ஆர்டர் செய்யும் கலாசாரம் இப்போது பெருகிவருகிறது. பாஸ்ட் புட், ஜங்க் புட்  போன்றவற்றை வயிற்றில் திணிக்கும் பழக்கமும் தொடர்கிறது. மறுபக்கம், மதிய உணவுக்கு சின்ன கேரியரில் ஏதோ ஒரு குழம்பு சிறிதளவு, கொஞ்சம் சாதம், பொரியல் சிறிதளவு என எடுத்துச் செல்வதுதான் நம்மில் பலரின் வழக்கமாக இருக்கிறது. இதில் `சிம்பிளாக’ என்று ஒரு கலந்த சாதம், கொஞ்சம் பொரியல் அல்லது கடையில் வாங்கிய சிப்ஸ், ஸ்நாக்ஸ் என்று எடுத்துச் சென்று அப்போதைக்கு வயிற்றைச் சமாதானப்படுத்தும் நடைமுறையும் இருக்கிறது.

30 வகை வெரைட்டி சமையல்! - இது பாரம்பர்ய ருசி!

இதற்கிடையில் `முன்ன எல்லாம் எங்க வீட்டில் குழம்பு, ரசம் வைக்கிறப்ப தெருவே மணக்கும். சாப்பிட்டவுடன் வயிற்றோடு மனமும் நிறையும்’ என்று ஏக்கப் பெருமூச்சுவிடுபவர்களும் இருக்கத்தான் செய்கிறார்கள். இவர்களைத் திருப்திப்படுத்தும் விதமாக வழிவழியாக வந்த ருசிகரமான உணவு வகைகளின் செய்முறையை வாரிவழங்குகிறார், சமையல் கலைஞர், நங்கநல்லூர் பத்மா.

``கூழ் கிண்டி தோசை, பிடிகருணை மசியல், வாழைத்தண்டு மோர்க்கூட்டு, பருப்பு உருண்டை ரசம், கூட்டு வடக அப்பளக்குழம்பு, மாங்காய் வேப்பம்பூப் பச்சடி, புளிப்பொங்கல், இலை வடாம், சிவப்பரிசி குழல் புட்டு, சிறுகிழங்குப் பொரியல், தக்காளிக்காய் ரசவாங்கி, ஜீரணத் துவையல் என எங்கம்மா எனக்குச் சொல்லிக்கொடுத்த - அவங்கம்மா அவங்களுக்குச் சொல்லிக்கொடுத்த சுவையான ரெசிப்பிகளைக் கொடுத் திருக்கிறேன். செய்து பரிமாறுங்கள். குடும்பம், உறவினர், நட்பு வட்டத்தில் உங்கள் சமையலுக்குப் பாராட்டுகள் குவியட்டும்’’ என்று மனமார வாழ்த்துகிறார் பத்மா.

படங்கள்: ஆ.வள்ளிசெளத்ரி