Published:Updated:

இதயம் காக்கும் ஆளி விதை!

இதயம் காக்கும் ஆளி விதை!
பிரீமியம் ஸ்டோரி
News
இதயம் காக்கும் ஆளி விதை!

ரெசிப்பிஸ் மற்றும் படங்கள்: ஜானகி அஸாரியா

இதயம் காக்கும் ஆளி விதை!

``இந்த ரெசிப்பிகளின் கதாநாயகி ஃப்ளாக்ஸ் சீட்ஸ் (Flax Seeds) எனப்படும் ஆளி விதை. இந்த ஆளி விதையின் குணாதிசயங்கள் என்ன? எப்படிப் பயன்படுத்துவது?

`ஓமேகா 3 ஃபேட்டி ஆசிட்’ எனப்படும் இதயத்தைக் காக்கும் சத்து ஆளி விதையில் அதிகமாக உள்ளது. இது ரத்தத்தில் கொழுப்பு சேராமல் தடுக்கிறது. நார்ச்சத்தும் புரதச்சத்தும் அதிகமாக உள்ளதால் பசியை அடக்கி, எடையைக் குறைப்பதற்கும் இது உதவுகிறது. நார்ச்சத்து  மலச்சிக்கலுக்கும் மருந்தாகிறது. மேலும், கேன்சரை எதிர்க்கும் `லிக்னன்ஸ்’ எனும் சத்து இதில் உள்ளது.

இதயம் காக்கும் ஆளி விதை!

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

ஆளி விதையில் நார்ச்சத்தும் புரதச்சத்தும் அதிகமாக இருப்பதால் அப்படியே உண்ண முடியாது. ஜீரணிப்பது கடினம். நாம் அன்றாடம் செய்யும் ஜூஸ், சூப், லஸ்ஸி, சப்பாத்தி, சாலட், பிரெட், பிஸ்கட், கேக், சட்னி போன்றவற்றில் சிறிதளவு ஆளி விதை / ஆளி விதை பவுடரைச் சேர்த்துக் கொள்ளலாம்’’ என்கிறார் பெங்களூருவைச் சேர்ந்த சமையற்கலைஞர் ஜானகி அஸாரியா. அதோடு, ஆளி விதையைப் பயன்படுத்தி தயாரிக்கக்கூடிய பல்வேறு உணவு வகைகளை இங்கே வழங்குகிறார்.

உருளைக்கிழங்கு சாலட்

தேவையானவை:

* உருளைக்கிழங்கு - 2
* கேரட் – ஒன்று (துண்டுகளாக நறுக்கவும்)
* வெங்காயம் - ஒன்று (நறுக்கவும்)
* பச்சைப் பட்டாணி – அரை கப்
* தயிர் – ஒரு கப்
* பூண்டு – ஒரு பல் (பொடியாக நறுக்கவும்)
* வறுத்த ஆளி விதை - 2 டீஸ்பூன்
* மிளகுத்தூள் – அரை டீஸ்பூன்
* மாதுளை முத்துகள் - 2 டேபிள்ஸ்பூன்
* உப்பு – தேவைக்கேற்ப

செய்முறை:

இதயம் காக்கும் ஆளி விதை!

தயிரை ஒரு வெள்ளைத் துணியில் கட்டித் தொங்கவிட்டு அரை மணி நேரம் தண்ணீரை வடியவைக்கவும். உருளைக்கிழங்கை வேக வைத்து, தோல் உரித்து, பெரிய துண்டுகளாக நறுக்கவும். பச்சைப் பட்டாணியையும், நறுக்கிய கேரட்டையும் லேசாக வேகவைக்கவும்.

ஒரு கிண்ணத்தில் வடியவைத்த தயிருடன் உப்பு, மிளகுத்தூள், பொடியாக நறுக்கிய பூண்டு சேர்த்து நன்கு கலந்து கொள்ளவும். அதில் வேகவைத்த உருளைக்கிழங்கு, பச்சைப் பட்டாணி, கேரட், நறுக்கிய வெங்காயம், மாதுளை முத்துகள் ஆகியவற்றைச் சேர்த்து நன்றாகக் கலக்கவும். வறுத்த ஆளி விதையை அதன்மேல் தூவி, ஃப்ரிட்ஜில் வைத்து, `ஜில்’லென்று பரிமாறவும்.

*சில வகை உருளைக்கிழங்குகள் அவற்றிலிருந்து பெறக்கூடிய தங்க, நீல, சிவப்பு நிறச் சாயங்களுக்காகப் பயிரிடப்படுகின்றன.

ஆளி விதை சட்னி

தேவையானவை:

* வெங்காயம் (பெரியது) – ஒன்று
* பூண்டு - 5 பல்
* ஆளி விதை – ஒரு டேபிள்ஸ்பூன்
* புளி - ஒரு சிறிய எலுமிச்சை அளவு
* காய்ந்த மிளகாய் - 4
* வேர்க்கடலை - 2 டேபிள்ஸ்பூன்
* உளுத்தம்பருப்பு – ஒரு டேபிள்ஸ்பூன்
* கடுகு - ஒரு டீஸ்பூன்
* எண்ணெய் - 2 டேபிள்ஸ்பூன்
* கறிவேப்பிலை - சிறிதளவு
* உப்பு - தேவைக்கேற்ப

செய்முறை:

இதயம் காக்கும் ஆளி விதை!

ஒரு கடாயில் ஒரு டேபிள்ஸ்பூன் எண்ணெய்விட்டு அதில் வேர்க்கடலை, உளுத்தம்பருப்பு, ஆளி விதை, பூண்டு, காய்ந்த மிளகாய் ஆகியவற்றை வறுத்து தனியாக எடுத்துவைக்கவும்.

பிறகு கடாயில் அரை டேபிள்ஸ்பூன் எண்ணைய்விட்டு நறுக்கிய வெங்காயத்தை வதக்கவும். வறுத்த பொருள்கள், வதக்கிய வெங்காயம், புளி, உப்பு, எல்லாவற்றையும் சிறிது தண்ணீர் சேர்த்து விழுதாக அரைக்கவும். கடாயில் அரை டேபிள்ஸ்பூன் எண்ணெய்விட்டு கடுகு, கறிவேப்பிலை தாளித்து சட்னியுடன் சேர்க்கவும்.

*வெங்காயத்தில் 89% நீரும், 9% மாவுப் பொருளும், சிறிதளவு கொழுப்புப் பொருள்களும் அடங்கியுள்ளன. 100 கிராம் வெங்காயத்தில் 40 கலோரி சக்தி கிடைக்கிறது.

க்ரனோலா பார்ஸ்

தேவையானவை:

* ஓட்ஸ் – ஒரு கப்
* ஆளி விதை பவுடர் – கால் கப்
* பேரீச்சம்பழம் - 4
* வறுத்த வேர்க்கடலை - 4 டேபிள்ஸ்பூன்
* நறுக்கிய பாதாம் - 2 டேபிள்ஸ்பூன்
* தேன் – கால் கப்
* பொடித்த வெல்லம் - 4 டேபிள்ஸ்பூன்
* வெனிலா எசென்ஸ் – ஒரு டீஸ்பூன்
* வெண்ணெய் - 4 டேபிள்ஸ்பூன்
* பீநட் பட்டர் (Peanut butter) - 4 டேபிள்ஸ்பூன்
* வறுத்த ஆளி விதை - 2 டேபிள்ஸ்பூன்

செய்முறை:

இதயம் காக்கும் ஆளி விதை!

கடாயைச் சூடாக்கி அதில் ஓட்ஸை லேசாக வறுக்கவும். பேரீச்சம்பழத்தின் விதையை எடுத்துவிட்டு பொடியாக நறுக்கவும். ஒரு கடாயில் வெல்லம், வெண்ணெய், தேன் ஆகியவற்றைச் சேர்த்து மிதமான தீயில் கொதிக்கவிடவும். வெல்லம் கரைந்து இரண்டு கொதிவந்தவுடன் இறக்கி, அதில் பீநட் பட்டரைச் சேர்த்து நன்றாகக் கலக்கவும். அதனுடன் வறுத்த ஓட்ஸ், ஆளி விதை பவுடர், வேர்க்கடலை, பாதாம், பேரீச்சம்பழம், வறுத்த ஆளி விதை, வெனிலா எசென்ஸ் சேர்த்து கரண்டியால் நன்றாகக் கலந்துவிடவும்.

ஒரு ட்ரேயில் பேக்கிங் பேப்பர் வைத்து, அதன் மேல் இந்த ஓட்ஸ் கலவையைப் போட்டு நன்றாகப் பரப்பி லேசாகத் தட்டிவிடவும். பின்னர், இதை ஒரு மணி நேரம் ஃப்ரிட்ஜில் வைத்து எடுத்து, நீளவாக்கில் வில்லைகளாக நறுக்கிப் பரிமாறவும்.

*ஓட்ஸ் மித வெப்ப மண்டலப் பகுதிகளில் நன்றாக விளைகிறது. இது கோதுமை, பார்லியைவிட நன்றாக மழையைத் தாங்கும் திறன் கொண்டது.

ஆளி விதை பராத்தா

தேவையானவை மேல் மாவுக்கு:
* கோதுமை மாவு - ஒரு கப்
* ஆளி விதை பவுடர் - 2 டேபிள்ஸ்பூன்
* எண்ணெய் - ஒரு டேபிள்ஸ்பூன்
* உப்பு - தேவைக்கேற்ப

ஸ்டஃபிங் செய்ய:

* உருளைக்கிழங்கு – ஒன்று (வேகவைத்தது மசிக்கவும்)
* துருவிய பனீர் – அரை கப்
* பொடியாக நறுக்கிய புதினா – ஒரு டேபிள்ஸ்பூன்
* பொடியாக நறுக்கிய கொத்தமல்லித்தழை – ஒரு டேபிள்ஸ்பூன்
* வெங்காயம் – ஒன்று (பொடியாக நறுக்கவும்)
* பொடியாக நறுக்கிய பச்சை மிளகாய் – ஒரு டீஸ்பூன்
* சாட் மசாலாத்தூள் – ஒரு டீஸ்பூன்
* உப்பு - தேவைக்கேற்ப

செய்முறை:

இதயம் காக்கும் ஆளி விதை!

ஒரு பாத்திரத்தில் கோதுமை மாவு, ஆளி விதை பவுடர், எண்ணெய், உப்பு ஆகியவற்றைச் சேர்த்து தேவையான அளவு தண்ணீர் ஊற்றி சப்பாத்தி மாவு பதத்தில் பிசைந்து அரை மணி நேரம் ஊறவைக்கவும்.

மற்றொரு பாத்திரத்தில் உருளைக்கிழங்கு, பனீர், வெங்காயம், புதினா, கொத்தமல்லித் தழை, பச்சை மிளகாய், சாட் மசாலாத்தூள், உப்பு சேர்த்துக் கலந்து கொள்ளவும். சப்பாத்தி மாவைச் சற்று பெரிய உருண்டைகளாக உருட்டிக் கொள்ளவும். ஒவ்வோர் உருண்டையிலும் ஸ்டஃபிங்கை வைத்து மூடி, சற்று கனமான பராத்தாவாகச் செய்து கொள்ளவும்.

தவாவைச் சூடாக்கி, பராத்தாவைப் போட்டு எண்ணெய்விட்டு இரண்டு புறமும் நன்றாக வேகவிட்டு எடுக்கவும்.

*விதைக்காகவும் நாருக்காகவும் ஆளி வளர்க்கப்படுகிறது. செடியின் பல்வேறு பகுதிகள் நார், சாயம், மருந்துகள், மீன் வலை தயாரிப்பில் பயன்படுகின்றன.

ஃபொக்காஸியா பிரெட்

தேவையானவை:
* கோதுமை மாவு - 2 கப்
* ஆலிவ் ஆயில் - 4 டேபிள்ஸ்பூன்
* டிரை ஈஸ்ட் - 2 டீஸ்பூன்
* சர்க்கரை - 2 டீஸ்பூன்
* இத்தாலியன் ஹெர்ப்ஸ் - 2 டேபிள்ஸ்பூன்
* ஆளி விதை பவுடர் - 2 டீஸ்பூன்
* கறுப்பு ஆலிவ் - 8
* ஹாலபீனோ மிளகாய் (நறுக்கியது) - ஒரு டேபிள்ஸ்பூன்
* மிளகுத்தூள் – அரை டீஸ்பூன்
* உப்பு – அரை டீஸ்பூன்

செய்முறை:

இதயம் காக்கும் ஆளி விதை!

ஒரு கப் வெதுவெதுப்பான நீரில் சர்க்கரையையும் ஈஸ்டையும் சேர்த்துக் கரைத்து 5 நிமிடங்கள் மூடிவைக்கவும். 5 நிமிடங்களில் ஈஸ்ட் பொங்கி வரும். கோதுமை மாவுடன் உப்பு, இத்தாலியன் ஹெர்ப்ஸ், ஆளி விதை பவுடர், மிளகுத்தூள் சேர்த்துக் கலக்கவும் பிறகு அதில் 2 டேபிள்ஸ்பூன் ஆலிவ் ஆயில், நறுக்கிய ஹாலபீனோ மிளகாய், பொங்கிய ஈஸ்ட் கலவை ஆகியவற்றைச் சேர்த்து மாவைப் பிசையவும்.

சப்பாத்தி மாவைவிட, சற்று தளராக மாவு இருக்கும்படி நன்றாக இழுத்துப் பிசையவும் (தேவைப்பட்டால் இன்னும் ஒன்றிரண்டு டேபிள்ஸ்பூன் தண்ணீர் சேர்க்கலாம்). இவ்வாறு பிசைந்த மாவை ஈரத்துணியால் மூடி ஒரு மணி நேரம் வைக்கவும். மாவு இரண்டு மடங்காக பொங்கி இருக்கும். இந்த மாவை மறுபடியும் சற்று பிசையவும்.

இதயம் காக்கும் ஆளி விதை!

சதுர வடிவான பேக்கிங் பாத்திரத்தில் ஒரு டேபிள்ஸ்பூன் ஆலிவ் ஆயிலை நன்றாகப் பூசவும். பிசைந்த மாவை இந்த பாத்திரத்தில் சமமாகப் பரப்பி அதன் மேல் ஒரு டேபிள்ஸ்பூன் ஆலிவ் ஆயிலை ஊற்றவும். கறுப்பு ஆலிவ்களை வரிசையாக அடுக்கி மறுபடியும் அரை மணி நேரம் மூடிவைக்கவும். 180 டிகிரி சென்டிகிரேடுக்கு பிரீஹீட் செய்த அவனில் (oven) வைத்து 35 - 40 நிமிடங்கள் `பேக்’ செய்து எடுக்கவும்.

குறிப்பு:

விருப்பப்பட்டால் மாவில் கறுப்பு ஆலிவுக்குப் பதிலாக வதக்கிய குடமிளகாய், வெங்காயம், அல்லது துருவிய சீஸ் போட்டும் பேக் செய்யலாம்.

*ஆலிவ் ஆயிலில் வைட்டமின் ஈ அதிக அளவில் உள்ளது. உடலுள்ள கெட்ட கொழுப்பைக் குறைக்கும் தன்மை ஆலிவ் ஆயிலுக்கு உண்டு.

சாக்கோ சிப்ஸ் கப் கேக்

தேவையானவை:
* கோதுமை மாவு – ஒரு கப்
* ரிஃபைண்டு ஆயில் – கால் கப் + 2 டேபிள்ஸ்பூன்
* தயிர் – கால் கப்
* காய்ச்சி ஆறவைத்த பால் – கால் கப்
* பொடித்த வெல்லம் – முக்கால் கப்
* வெனிலா எசென்ஸ் – ஒரு டீஸ்பூன்
* பேக்கிங் பவுடர் – ஒரு டீஸ்பூன்
* பேக்கிங் சோடா – அரை டீஸ்பூன்
* ஆளி விதை பவுடர் - 3 டீஸ்பூன்
* வினிகர் - ஒரு டீஸ்பூன்
* சாக்கோ சிப்ஸ் – கால் கப்

செய்முறை:

இதயம் காக்கும் ஆளி விதை!

கோதுமை மாவு, பேக்கிங் பவுடர், பேக்கிங் சோடா ஆகியவற்றை ஒன்றாகக் கலந்து சலித்துவைக்கவும்.

ஒரு பாத்திரத்தில் கால் கப் எண்ணெய், தயிர், பொடித்த வெல்லம், வெனிலா எசென்ஸ் ஆகியவற்றைச் சேர்த்து நன்றாக அடிக்கவும். பிறகு அதில் வினிகர், ஆளி விதை பவுடர், சலித்த மாவு, பால் ஆகியவற்றைச் சிறிது சிறிதாக சேர்த்து நன்றாகக் கலக்கவும். மாவு மிகவும் கெட்டியாக இருந்தால் இன்னும் சிறிதளவு பால் சேர்த்து கேக் மாவு பதத்துக்குக் கலந்து கொள்ளவும். பின்னர் இதனுடன் சாக்கோ சிப்ஸையும் சேர்க்கவும்.

கப் கேக் பாத்திரத்தில் உள்ள குழிகளில் 2 டேபிள்ஸ்பூன் எண்ணெய் தடவி அதில் மாவை ஊற்றவும். குழியின் விளிம்பு வரை மாவை ஊற்றாமல் சிறிது குறைவாக ஊற்றவும். 180 டிகிரி சென்டிகிரேடுக்கு பிரீஹீட் செய்த அவனில் (oven) வைத்து 15 - 20 நிமிடங்கள் வரை `பேக்’ செய்து எடுக்கவும்.

*சோயா பாலில் இருந்தும் தயிர் தயாரிக்க முடியும். இது எடை குறைக்க விரும்புவோருக்கு ஏற்றது.

ஆளி விதை குக்கீஸ்

தேவையானவை:
* கோதுமை மாவு – ஒரு கப்
* பொடித்த சர்க்கரை – அரை கப்
* கெட்டியான வெண்ணெய் (ஃப்ரிட்ஜில் வைத்தது) – அரை கப்
* ஆளி விதை பவுடர் - 2 டீஸ்பூன்
* வறுத்த ஆளி விதை – ஒரு டீஸ்பூன்
* வெனிலா எசென்ஸ் – ஒரு டீஸ்பூன்
* பேக்கிங் பவுடர் – அரை டீஸ்பூன்
* உப்பு - ஒரு சிட்டிகை
* காய்ச்சி ஆறவைத்த பால் - 2 அல்லது 3 டேபிள்ஸ்பூன்

செய்முறை:

இதயம் காக்கும் ஆளி விதை!

ஒரு பாத்திரத்தில் கோதுமை மாவு, பொடித்த சர்க்கரை, ஆளி விதை பவுடர், வறுத்த ஆளி விதை, உப்பு, பேக்கிங் பவுடர் ஆகியவற்றைப் போட்டு நன்றாகக் கலந்துவிடவும். ஜில்லென்ற வெண்ணெயைச் சேர்த்து விரல்களால் மெதுவாகக் கலக்கவும். மாவு, சர்க்கரை, வெண்ணெய் நன்றாகக் கலந்து ரவைபோல ஆகிவிடும். அதுவரை விரல்களால் நன்றாகக் கலக்கவும்.

பிறகு, அதில் வெனிலா எசென்ஸ், பால் சேர்த்து, மாவு போல பிசையவும். அதிகமாகப் பிசைய வேண்டாம். இந்த மாவை அரை மணி நேரம் ஃப்ரிட்ஜில் வைக்கவும். பிறகு, சற்று கனமான சப்பாத்தி போல பெரியதாக இடவும். குக்கி கட்டரால் வட்ட வட்டமாக வெட்டவும்.

ஒரு பேக்கிங் ட்ரேயில் பேக்கிங் பேப்பரை விரித்து வெட்டிவைத்துள்ள குக்கிகளைச் சிறிது இடை வெளிவிட்டு வரிசையாக வைக்கவும். 180 டிகிரி சென்டிகிரேடுக்கு பிரீஹீட் செய்த அவனில் (oven) வைத்து 15 நிமிடங்கள் `பேக்’ செய்யவும்.

*ரஷ்யா, பிரான்ஸ், அமெரிக்கா, ஜெர்மனி, துருக்கி ஆகிய நாடுகளில் அதிக அளவு சர்க்கரை பீட்ரூட்டிலிருந்தே தயாரிக்கப்படுகிறது.

பைனாப்பிள் பச்சடி

தேவையானவை:
* சிறிய துண்டுகளாக நறுக்கிய பைனாப்பிள் – ஒரு கப்
* துருவிய தேங்காய் - 2 டேபிள்ஸ்பூன்
* பொடித்த வெல்லம் - ஒரு டேபிள்ஸ்பூன்
* காய்ந்த மிளகாய் - 2 அல்லது 3
* கடுகு - 2 டீஸ்பூன்
* ஆளி விதை அல்லது பவுடர் - ஒரு டீஸ்பூன்
* மஞ்சள்தூள் – கால் டீஸ்பூன்
* எண்ணெய் - 2 டீஸ்பூன்
* புளி - ஒரு சிறிய எலுமிச்சை அளவு
* கறிவேப்பிலை - சிறிதளவு
* உப்பு – தேவைக்கேற்ப

செய்முறை:

இதயம் காக்கும் ஆளி விதை!

ஒரு பாத்திரத்தில் ஒன்றரை கப் தண்ணீர், உப்பு, மஞ்சள்தூள், பைனாப்பிள் துண்டுகள் ஆகியவற்றைச் சேர்த்து வேகவைக்கவும். மிக்ஸியில் தேங்காய்த் துருவல், காய்ந்த மிளகாய், ஒரு டீஸ்பூன் கடுகு மற்றும் ஆளி விதை அல்லது ஆளி விதை பவுடர், சிறிதளவு தண்ணீர் சேர்த்து விழுதாக அரைத்துக் கொள்ளவும். புளியை ஊறவைத்து கெட்டியாகக் கரைத்து வைத்துக் கொள்ளவும்.

பைனாப்பிள் வெந்தவுடன் அதனுடன் புளிக்கரைசல், அரைத்த தேங்காய் விழுது சேர்த்துக் கொதிக்கவிடவும். கொதித்தவுடன் வெல்லத்தைச் சேர்த்து, தேவைப்பட்டால் சிறிதளவு தண்ணீரும் சேர்த்து கொதிக்கவிட்டு இறக்கவும். கடாயைச் சூடாக்கி, எண்ணெய்விட்டு ஒரு டீஸ்பூன் கடுகு, கறிவேப்பிலை தாளித்து, பச்சடியில் சேர்க்கவும்.

*உலகின் மூன்றில் ஒரு பங்கு பைனாப்பிள் விளைச்சலை கோஸ்டாரிகா, பிரேசில், பிலிப்பைன்ஸ் நாடுகளே பெறுகின்றன.

ஸ்ட்ராபெர்ரி ஃப்ரோஸன் யோகர்ட்

தேவையானவை:
* கெட்டித் தயிர் – ஒரு கப்
* நறுக்கிய ஸ்ட்ராபெர்ரி – அரை கப்
* ஸ்ட்ராபெர்ரி ஜாம் - 2 டேபிள்ஸ்பூன்
* வாழைப்பழம் – ஒன்று (நறுக்கவும்)
* ஆளி விதை பவுடர் – ஒரு டீஸ்பூன்

செய்முறை:

இதயம் காக்கும் ஆளி விதை!

ஒரு மிக்ஸி ஜாரில் நறுக்கிய வாழைப்பழம், ஸ்ட்ராபெர்ரி, தயிர், ஜாம், ஆளி விதை பவுடர் எல்லாவற்றையும் சேர்த்து நன்றாக அரைக்கவும். அரைத்த விழுதை ஒரு ஏர்டைட் டப்பாவில் போட்டு மூடி ஃப்ரீசரில் குறைந்தது 8 மணி நேரம் வைக்கவும். நன்றாக உறைந்ததும் ஐஸ் க்ரீமைப் போல பரிமாறவும்.

*ஸ்ட்ராபெர்ரி பழத்திலுள்ள ஃபிலேவனாய்டு நோய் எதிர்ப்பு சக்தியை அளிக்கக்கூடியது.

கூல் லஸ்ஸி

தேவையானவை:

* தயிர் – ஒரு கப்
* வெள்ளரிக்காய் – ஒன்று (தோல் சீவி துண்டுகளாக நறுக்கவும்)
* பச்சை திராட்சை - 12
* புதினா இலைகள் - 6
* ஆளி விதை பவுடர் - ஒரு டீஸ்பூன்
* உப்பு - தேவைக்கேற்ப

செய்முறை:

இதயம் காக்கும் ஆளி விதை!

ஒரு மிக்ஸி ஜாரில் தயிர், உப்பு, வெள்ளரிக்காய் துண்டுகள், திராட்சை, புதினா இலைகள், ஆளி விதை பவுடர் ஆகியவற்றைச் சேர்த்து நன்றாக அரைக்கவும். ஃப்ரிட்ஜில் வைத்து எடுத்து `ஜில்’லென்று பரிமாறவும்.

*வெள்ளரியின் தாயகம் இந்தியாவே. 3,000 ஆண்டுகளுக்கு முற்பட்ட தாவரம் இது.