Published:Updated:

ஜவ்வரிசியில் புதுமை!

ஜவ்வரிசியில் புதுமை!
பிரீமியம் ஸ்டோரி
News
ஜவ்வரிசியில் புதுமை!

மீனா சுதிர்

ஜவ்வரிசியில் புதுமை!

சிறு சிறு முத்துகளாக இருக்கும்... சமைக்கும் முன் வெண்ணிறத்தில் பளிச்சிடும் இது சமைத்த பின் கிட்டத்தட்ட ஒளிஊடுருவும் வடிவத்தைப் பெற்றுவிடும். இப்படியொரு வித்தியாசமான தன்மைகொண்டது ஜவ்வரிசி.

ஆரம்பத்தில் ஜாவாவிலிருந்து இந்தியாவுக்கு இறக்குமதி செய்யப்பட்டதால், இது ஜாவா அரிசி (ஜவ்வரிசி) எனப்பட்டது. தெற்காசியச் சதுப்பு நிலங்களில் விளைகிற ஒருவகைப் பனைமரத்தின் ஊறலைக் (பதநீரை) காய்ச்சுவதால் கிடைக்கும் மாவுதான் சேகோ. அந்த மாவைக் கோள வடிவில் அரிசி போல சிறிய உருண்டைகளாக்கி ஜவ்வரிசியாக்கப்பட்டது. இப்போது ஜவ்வரிசி பெரும்பாலும் மரவள்ளிக் கிழங்கிலிருந்தே தயாரிக்கப்படுகிறது.

ஜவ்வரிசியில் புதுமை!

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

ஜவ்வரிசியை எடுத்தாலே நாம் செய்யக்கூடிய ஒரே உணவு பாயசம்தான். சிலர் அபூர்வமாக சாபுதானா வடை செய்வதுண்டு. இதோ... சென்னையைச் சேர்ந்த சமையற்கலைஞர் மீனா சுதிர் வழங்கும் ஜவ்வரிசி ரெசிப்பிகள் நம்மை ஆச்சர்யப்படுத்தும்... சுவையில் சொக்கவைக்கும்!

படங்கள்: தே.அசோக்குமார்

ஜவ்வரிசி உருளை டோனட்

தேவையானவை:

* ஜவ்வரிசி - ஒரு கப்
* பெரிய உருளைக்கிழங்கு - 2 (வேகவைத்து, தோலுரித்து மசிக்கவும்)
* அரிசி மாவு - 2 டேபிள்ஸ்பூன்
* மிளகுத்தூள் - ஒரு டீஸ்பூன்
* சீரகத்தூள் - ஒரு டீஸ்பூன்
* எண்ணெய், உப்பு - தேவையான அளவு

செய்முறை:

ஜவ்வரிசியில் புதுமை!

ஜவ்வரிசியை 4 மணி நேரம் ஊறவைக்கவும். ஒரு பெரிய பவுலில், வேகவைத்து, தோலுரித்து மசித்த  உருளைக்கிழங்கை எடுத்துக் கொள்ளவும். இதனுடன் ஊறவைத்த ஜவ்வரிசியைத் தண்ணீர் வடித்துச் சேர்க்கவும்.

பிறகு அரிசி மாவு, மிளகுத்தூள், சீரகத் தூள், உப்பு ஆகியவற்றைச் சேர்த்து நன்கு கலந்து இறுக்கமான மாவுப் பதத்தில் பிசைந்து கொள்ளவும். மாவு சற்று தளர இருந்தால் இன்னும் கொஞ்சம் அரிசி மாவு சேர்த்துக் கொள்ளலாம். பின்னர் பிசைந்த மாவை டிக்கி வடிவத்தில் செய்து கொள்ளவும்.

பின்னர் அதன் நடுவில் துளை ஒன்றைப் போட்டு டோனட் வடிவத்துக்குக் கொண்டுவரவும். டோனட்களை எண்ணெயில் பொன்னிறமாகப் பொரித்தெடுக்கவும். விருப்பமான சாஸுடன் சூடாகப் பரிமாறவும்.

*ரத்த அழுத்தத்தைக் கட்டுப்படுத்தும் தன்மை ஜவ்வரிசிக்கு உண்டு. இது பதற்றத்தையும் குறைக்கும்.

ஜவ்வரிசி பூசணி கீர்

தேவையானவை:
* ஜவ்வரிசி - ஒரு கப்
* துருவிய பூசணி - ஒரு கப்
* சர்க்கரை - ஒரு கப் அல்லது விருப்பத்துக்கேற்ப
* பால் - அரை லிட்டர்
* பொடியாக நறுக்கிய அல்லது துருவிய டிரை ஃப்ரூட்ஸ் (பாதாம், முந்திரி, பிஸ்தா) - விருப்பத்துக்கேற்ப
* ஏலக்காய்த்தூள் - அரை டீஸ்பூன்

செய்முறை:

ஜவ்வரிசியில் புதுமை!

ஜவ்வரிசியைக் கழுவி, ஊறவைக்கவும். பாலைக் கொதிக்கவிடவும். பின்னர் இதனுடன் ஊறவைத்த ஜவ்வரிசியைத் தண்ணீர் வடித்து சேர்த்து, ஜவ்வரிசி வேகும்வரை அடுப்பை சிம்மில் வைத்துக் கொதிக்கவிடவும். ஜவ்வரிசி வெந்ததும் அதனுடன் துருவிய பூசணியைச் சேர்த்து, பூசணி வேகும்வரை மறுபடியும் கொதிக்கவிடவும்.

பிறகு இதனுடன் சர்க்கரையைச் சேர்த்து, அடுப்பை சிம்மில் வைத்து கலவை கெட்டியாகும்வரை கொதிக்கவிட்டு, ஏலக்காய்த்தூள் சேர்த்துக் கலந்து  இறக்கவும். பொடியாக நறுக்கிய அல்லது துருவிய டிரை ஃப்ரூட்ஸ்  சேர்த்து, சூடாகவோ அல்லது குளிரவைத்தோ பரிமாறவும்.

*அமெரிக்க உட்பட பல நாடுகளில் `ஹாலோவின்’ திருவிழாவில் பூசணி முக்கியமான இடம் வகிக்கிறது.

ஜவ்வரிசி ஸ்வீட் பொட்டேட்டோ அப்பே

தேவையானவை:

* ஜவ்வரிசி - ஒரு கப்
* துருவிய சர்க்கரைவள்ளிக்கிழங்கு - ஒரு கப்
* பொடித்த வேர்க்கடலை - அரை கப்
* பச்சை மிளகாய் - 2 (பொடியாக நறுக்கவும்)
* சீரகம் - ஒரு டேபிள்ஸ்பூன்
* மல்லித்தூள் (தனியாத்தூள்) - ஒரு டேபிள்ஸ்பூன்
* பொடியாக நறுக்கிய கொத்தமல்லித்தழை - 2 டேபிள்ஸ்பூன்
* உப்பு - தேவையான அளவு
* நெய் - 2 டேபிள்ஸ்பூன்

செய்முறை:

ஜவ்வரிசியில் புதுமை!

ஜவ்வரிசியைக் கழுவி, தண்ணீரில் 10 நிமிடங்கள் ஊறவைத்து, தண்ணீரை வடித்துக் கொள்ளவும். இதனுடன் நெய் தவிர,  மற்ற பொருள்கள் அனைத்தையும் சேர்த்து மாவாகப் பிசைந்து கொள்ளவும். பிசைந்த மாவை `அப்பே’களாக (பணியாரம் போல) செய்து கொள்ளவும். பணியாரக்கல்லைக் குறைவான தீயில் வைத்து சூடாக்கவும். ஒவ்வொரு குழியிலும் சிறிதளவு நெய் தடவவும்.

பிறகு செய்து வைத்திருக்கும் பணியாரங்களை பணியாரக்குழிகளில் வைத்து, மூடியால் மூடி குறைவான தீயில் பணியாரங்களை 3 நிமிடங்களுக்கு வேகவிடவும். 3 நிமிடங்கள் கழித்து மூடியைத் திறந்தால், பணியாரங்கள் பந்துபோல உப்பி வந்திருக்கும். இப்போது பணியாரங்களைத் திருப்பிவிடவும்.

பிறகு அவற்றின் மேல் இன்னும் கொஞ்சம் நெய்விடவும். அடுப்பை மிதமான தீயில் வைக்கவும். அப்போதுதான் பணியாரங்கள் பொன்னிறமாக மொறுமொறுப்பாக வரும். பணியாரங்கள் சரியான பதத்துக்கு வந்தவுடன் அடுப்பை அணைக்கவும். தயிர் அல்லது பச்சை சட்னியுடன் பணியாரங்களைப் பரிமாறவும்.

*சர்க்கரைவள்ளிக்கிழங்கு என்பது அத்தாவரத்தின் வேர்ப்பகுதியே. சிவப்பு, கருஞ்சிவப்பு, சாம்பல், வெள்ளை ஆகிய நிறங்களில் விளைகிறது.

ஜவ்வரிசி லாலிபாப்

தேவையானவை:
* ஜவ்வரிசி - ஒரு கப் (ஊறவைத்து தண்ணீரை வடிக்கவும்)
* வேகவைத்து, தோலுரித்து மசித்த உருளைக்கிழங்கு - ஒரு கப்
* துருவிய கேரட் - அரை கப்
* வறுத்துப்பொடித்த வேர்க்கடலை - அரை கப்
* பொடியாக நறுக்கிய கொத்தமல்லித்தழை - சிறிதளவு
* பச்சை மிளகாய் - ஒன்று (பொடியாக நறுக்கவும்)
* சர்க்கரை - ஒரு டீஸ்பூன்
* எலுமிச்சைச்சாறு - அரை டீஸ்பூன்
* கார்ன்ஃப்ளார் (சோள மாவு) - ஒரு டேபிள்ஸ்பூன்
* மரக்குச்சிகள் - தேவையான அளவு
* எண்ணெய், உப்பு - தேவையான அளவு

செய்முறை:

ஜவ்வரிசியில் புதுமை!

ஊறவைத்து தண்ணீர் வடிக்கப்பட்ட ஜவ்வரிசியை ஒரு பெரிய பவுலில் எடுத்துக் கொள்ளவும். இதனுடன் வேகவைத்து மசித்த உருளைக்கிழங்கு மற்றும் துருவிய கேரட்டை சேர்த்துக் கொள்ளவும். பின்னர் நறுக்கிய கொத்தமல்லித்தழை, பச்சை மிளகாய், சர்க்கரை, உப்பு, எலுமிச்சைச்சாறு சேர்த்து நன்கு கலக்கவும். இதனுடன் வறுத்துப் பொடித்த வேர்க்கடலையையும் சேர்த்து நன்கு பிசைந்து கொள்ளவும்.

பிறகு கைகளில் எண்ணெய் தடவிக்கொண்டு பிசைந்த கலவையை உருண்டைகளாக்கி அவற்றில் மரக்குச்சிகளைச் செருகி லாலிபாப் வடிவத்தில்  செய்து கொள்ளவும் (மரக்குச்சிகளை வைத்து லாலிபாப் செய்வதற்குமுன்பு அவற்றைத் தண்ணீரில் நனைத்துக் கொள்ளவும். (இப்படிச் செய்வதால் லாலிபாப்பை எண்ணெயில் போட்டுப் பொரிக்கும்போது மரக்குச்சி கருகிவிடாது). பின்னர் இந்த லாலிபாப்களை கார்ன்ஃப்ளாரில் புரட்டி எண்ணெயில் பொரித்தெடுக்கவும். பச்சை சட்னி அல்லது தக்காளி சாஸுடன் சூடாகப் பரிமாறவும்.

*தென்அமெரிக்காவின் ஆண்டீஸ் மலைப்பகுதிகளில் ஆயிரத்துக்கும் அதிகமான உருளைக்கிழங்கு வகைகள் விளைகின்றன.

ஜவ்வரிசி பேரீச்சை புடிங்

தேவையானவை:
* பால் - அரை லிட்டர்
* பேரீச்சை - 10 முதல் 12 வரை
* ஜவ்வரிசி - கால் கப்
* சர்க்கரை - தேவையான அளவு (விருப்பப்பட்டால் சேர்த்துக் கொள்ளலாம்)
* ஏலக்காய்த்தூள் - கால் டீஸ்பூன்
* ரோஸ் வாட்டர் - ஒரு டீஸ்பூன்

அலங்கரிக்க:
* பொடியாக நறுக்கிய பேரீச்சை, பிஸ்தா மற்றும் உலர் ரோஜா இதழ்கள் - தேவையான அளவு

செய்முறை:

ஜவ்வரிசியில் புதுமை!

பேரீச்சையை இரவு முழுவதும் ஊறவைத்து, கொட்டை நீக்கி அரைத்துக் கொள்ளவும். ஜவ்வரிசியை 2 மணி நேரம் ஊறவைத்து தண்ணீரை வடித்துக் கொள்ளவும். பாலைக் கொதிக்கவிடவும். அதனுடன் ஊறவைத்த ஜவ்வரிசியைச் சேர்க்கவும்.

அடுப்பை சிம்மில் வைத்து கலவை சற்று கெட்டியாகும்வரை வேகவிடவும். இதனுடன், ஏலக்காய்த்தூள், பேரீச்சை விழுது, சர்க்கரை, ரோஸ் வாட்டரை சேர்த்து நன்கு கலந்து, ஓரிரு நிமிடங்களுக்குக் கொதிக்கவிடவும்.

பிறகு அடுப்பை அணைத்து, கலவையை சிறிய பவுல்களில் சேர்க்கவும். பொடியாக நறுக்கிய பிஸ்தா, பேரீச்சை மற்றும் உலர் ரோஜா இதழ்களால் அலங்கரித்துப் பரிமாறவும்.

*பேரீச்சை மரம் 15 முதல் 25 மீட்டர் உயரம் வரை வளரும். இதன் ஓலைகளே 4 முதல் 6 மீட்டர் நீளம் வரை இருக்கும்.

சாக்லேட் ஜவ்வரிசி கீர்

தேவையானவை:
* ஜவ்வரிசி - அரை கப்
* பால் - 2 கப்
* சர்க்கரை - அரை கப்
* சாக்லேட் துண்டுகள் - 2 டேபிள்ஸ்பூன்
* சாக்லேட் துருவல் (அலங்கரிக்க) - ஒரு டேபிள்ஸ்பூன்

செய்முறை:

ஜவ்வரிசியில் புதுமை!

ஜவ்வரிசியைக் கழுவி ஒரு மணி நேரம் ஊறவைத்து தண்ணீரை வடித்துக் கொள்ளவும். ஒரு பானில் (pan) பாலை ஊற்றி, அது பாதியாகக் குறுகும்வரை கொதிக்கவிடவும். பிறகு இதனுடன் ஊறவைத்த ஜவ்வரிசியைச் சேர்க்கவும். ஜவ்வரிசி நன்கு வேகும்வரை கலவையைத் தொடர்ந்து கிளறிவிடவும்.

பிறகு சர்க்கரையைச் சேர்த்து அது கரையும் வரை கிளறவும். அதனுடன் சாக்லேட் துண்டுகளைச் சேர்த்து அவை கரையும் வரை மேலும் கிளறவும். பிறகு அடுப்பை அணைத்து, கலவையைக் கீழே இறக்கவும். கலவையானது அறை வெப்பநிலைக்கு வந்தவுடன் அதனை ஃப்ரிட்ஜில் வைத்துக் குளிரவிடவும். சாக்லேட் துருவல்களால் அலங்கரித்துப் பரிமாறவும்.

*உலகளவில் அதிகம் பால் உற்பத்தி செய்யும் நாடு இந்தியாவே (மொத்தம் 18.5% பங்களிப்பு).

மாங்காய் ஜவ்வரிசி புடிங்

தேவையானவை:
* தண்ணீர் - 2 கப்
* ஜவ்வரிசி - கால் கப்
* மாங்காய் - 5
* பால் பவுடர் - அரை கப்
* சர்க்கரை - கால் கப்

செய்முறை:

ஜவ்வரிசியில் புதுமை!

ஒரு பெரிய பாத்திரத்தில் தண்ணீரை ஊற்றி, மிதமான தீயில் கொதிக்கவிடவும். தண்ணீர் கொதித்ததும், ஜவ்வரிசியைச் சேர்த்து 7 முதல் 10 நிமிடங்களுக்கு கொதிக்கவிடவும். இடையிடையே கலவையைக் கிளறிவிட வேண்டியது அவசியம். பிறகு அடுப்பை அணைத்து, பாத்திரத்தை மூடி போட்டு மூடி சிறிது நேரம் அப்படியே வைக்கவும்.

இப்படிச் செய்வதால், ஜவ்வரிசி தண்ணீரின் சூட்டிலேயே  மிக நன்றாக வெந்துவிடும். பிறகு, ஒரு வடிதட்டில் வெந்த ஜவ்வரிசியைக் கொட்டவும். பின்னர் குழாய் தண்ணீரில் வடிதட்டைக் காண்பித்து வெந்த ஜவ்வரிசியை நன்கு கழுவிக் கொள்ளவும். இப்படிச் செய்வதால் ஜவ்வரிசியில் இருக்கின்ற அதிகப்படியான ஸ்டார்ச் முற்றிலும் வெளியேறிவிடும். பிறகு, மீதமிருக்கும் தண்ணீரையும் நன்கு வடித்து ஜவ்வரிசியைக் குளிரவைக்கவும். கால் கப் ஜவ்வரிசியை வேகவைத்தால் நமக்கு இப்படி ஒரு கப் வெந்த ஜவ்வரிசி கிடைக்கும்.

நான்கு மாங்காய்களின் தோலை நீக்கித் துண்டுகளாக்கிக் கொள்ளவும். பிறகு, இந்த மாங்காய்த் துண்டுகளுடன் பால் பவுடர், சர்க்கரை சேர்த்து மிக்ஸியில் மையாக அரைத்துக் கொள்ளவும். மீதமிருக்கும் ஒரு மாங்காயின் தோலை நீக்கி துண்டுகளாக நறுக்கி தனியே வைத்துக் கொள்ளவும். பிறகு வேகவைத்த ஜவ்வரிசியுடன் மாங்காய் விழுதைச் சேர்த்து நன்கு கலக்கவும். இந்தக் கலவையை ஃப்ரிட்ஜில் வைத்துக் குளிரவைக்கவும். பரிமாறும் பவுல்களில் குளிரவைத்த மாங்காய் - ஜவ்வரிசி கலவையை எடுத்துக் கொள்ளவும். அதன்மேல் மாங்காய் துண்டுகளைப் போட்டுப் பரிமாறவும்.

*பாலைப் பதப்படுத்தி பவுடராக்கும் தொழில்நுட்பம் 1802-ம் ஆண்டில் ரஷ்ய மருத்துவர் ஓசிப் கிரிச்சோவ்ஸ்கி என்ற ரஷ்ய மருத்துவரால் கண்டுபிடிக்கப்பட்டது.

ஜவ்வரிசி பேல்

தேவையானவை:

* ஜவ்வரிசி - ஒரு கப்
* உருளைக்கிழங்கு - ஒன்று
* பொடியாக நறுக்கிய கொத்தமல்லித்தழை - 2 டேபிள்ஸ்பூன்
* பச்சை மிளகாய் - 2 அல்லது 3 (பொடியாக நறுக்கவும்)
* நறுக்கிய மாங்காய் - ஒரு டேபிள்ஸ்பூன்
* மாதுளை முத்துகள் - 2 டேபிள்ஸ்பூன்
* மிளகாய்த்தூள் - தேவைக்கேற்ப
* சீரகத்தூள் - அரை டீஸ்பூன்
* எலுமிச்சைப்பழம் - பாதியளவு
* உப்பு, எண்ணெய் - தேவையான அளவு
* ஃபராலி நம்கீன் (farali namkin) - ஒரு கப்

செய்முறை:

ஜவ்வரிசியில் புதுமை!

ஜவ்வரிசியை நன்கு கழுவி, நிறைய தண்ணீர் ஊற்றி 2 மணி நேரம் ஊறவைக்கவும். பின்னர் தண்ணீரை வடித்து 30 நிமிடங்களுக்கு அப்படியே உலரவிடவும். உருளைக்கிழங்கை சிறுசிறு துண்டுகளாக நறுக்கி தண்ணீரில் போட்டுவைக்கவும். உருளைக்கிழங்கில் இருக்கும் தண்ணீரை வடிக்கவும். இதனுடன் ஊறவைத்த ஜவ்வரிசியைச் சேர்க்கவும். ஒரு டீஸ்பூன் எண்ணெய்விட்டு இந்தக் கலவையைப் பிசிறிக் கொள்ளவும். பிறகு இந்தக் கலவையை 8 நிமிடங்களுக்கு ஆவியில் வேகவைத்து எடுத்து, ஆறவைக்கவும்.

ஒரு பெரிய பவுலில் வேகவைத்த கலவையை எடுத்துக் கொள்ளவும். இதனுடன் பொடியாக நறுக்கிய மாங்காய், கொத்தமல்லித்தழை, பச்சை மிளகாய், மிளகாய்த்தூள், சீரகத்தூள், உப்பு, கொஞ்சம் எலுமிச்சைச் சாறு சேர்க்கவும். பின்னர் பராலி நம்கீனைச் சேர்க்கவும். பிறகு இன்னும் கொஞ்சம் எலுமிச்சைச்சாறு, உப்பு ஆகியவற்றைத் தேவைக்கேற்ப சேர்க்கவும். கடைசியாக மாதுளை முத்துகளைச் சேர்த்து நன்கு கிளறி பரிமாறவும்.

குறிப்பு:

ஃபராலி நம்கீன் என்பது வட இந்திய மிக்ஸர் வகை. இந்த  மிக்ஸர் பாக்கெட்டாக  கடைகளில் கிடைக்கும். இது கிடைக்கவில்லையென்றால் நம்முடைய மிக்ஸரையே பயன்படுத்தலாம்.

*கொத்தமல்லித்தழையில் நிறைந்துள்ள இரும்புச்சத்து நோய் எதிர்ப்பு சக்தியை மேம்படுத்தும்.

ஜவ்வரிசி பைனாப்பிள் அல்வா

தேவையானவை:
* ஜவ்வரிசி - ஒரு கப்
* நெய் - 2 டேபிள்ஸ்பூன்
* பைனாப்பிள் சாறு - அரை கப்
* பைனாப்பிள் துண்டுகள் - அரை கப்
* வெதுவெதுப்பான பால் - 5 டேபிள்ஸ்பூன் (சில குங்குமப்பூக்கள் போட்டு ஊறவைக்கவும்)
* சர்க்கரை - ஒரு கப்
* ஏலக்காய்த்தூள் - ஒரு டீஸ்பூன்
* நறுக்கிய டிரை ஃப்ரூட்ஸ் (பாதாம், முந்திரி, பிஸ்தா)  - 4 அல்லது 5 டேபிள்ஸ்பூன்

செய்முறை:

ஜவ்வரிசியில் புதுமை!

வெதுவெதுப்பான நீரில் ஜவ்வரிசியை 4 மணி நேரம் ஊறவைத்து, வடிகட்டியால் தண்ணீரை வடித்துக் கொள்ளவும். ஒரு பெரிய பாத்திரத்தில் சர்க்கரையுடன் ஒரு கப் தண்ணீரைச் சேர்த்துக் கொதிக்கவிடவும். சர்க்கரைப் பாகானது இரண்டு கம்பிப் பதத்துக்கு வரும்வரை கலவையைக் கொதிக்கவிடவும் (சர்க்கரைப் பாகை தண்ணீரில் போட்டால் மென்மையான உருண்டையாக உருண்டு வரவேண்டும். இதுவே இரண்டு கம்பிப் பதம்). இரண்டு கம்பிப் பதம் வந்தவுடன் பாகுடன் குங்குமப்பூ - பால் கலவையை சேர்த்து அடுப்பை அணைக்கவும்.

ஒரு பெரிய கடாயில் நெய்யைச் சூடாக்கவும். அதில் ஊறவைத்து வடிகட்டி வைத்திருக்கும் ஜவ்வரிசியைச் சேர்த்து 4 நிமிடங்களுக்கு வறுக்கவும். அல்லது ஜவ்வரிசி கண்ணாடிபோல பளபளப்பாக மாறும்வரை வறுத்து எடுத்துக் கொள்ளவும். பின்னர் நெய்யில் வறுத்த ஜவ்வரிசியை சர்க்கரைப் பாகில் சேர்த்து அடுப்பை மிதமான தீயில் வைத்துக் கிளறவும். இதனுடன் பைனாப்பிள் சாறு மற்றும் பைனாப்பிள் துண்டுகளைச் சேர்த்துக் கிளறவும். பிறகு ஏலக்காய்த்தூள், உலர் பழங்களையும் சேர்த்து நன்கு கிளறி அல்வா பதத்துக்குச் சுருண்டு வந்தவுடன் இறக்கவும்.

இந்த அல்வாவைச் சூடாகவோ, குளிர வைத்தோ பரிமாறலாம்.

*மருத்துவ முறைகளில் நெய்யின் பயன்பாடு மிகுதியாக இருந்து வருகிறது.

சாக்கோ ஜவ்வரிசி டிலைட்

தேவையானவை:
* ஜவ்வரிசி - அரை கப்
* பால் - 2 கப்
* சர்க்கரை - 2 டேபிள்ஸ்பூன்
* கோகோ பவுடர் - ஒரு டேபிள்ஸ்பூன்
* சாக்லேட் சாஸ் - ஒரு டேபிள்ஸ்பூன்
* பொடியாக நறுக்கிய முந்திரி - சிறிதளவு

செய்முறை:

ஜவ்வரிசியில் புதுமை!

ஜவ்வரிசியைத் தண்ணீரில் ஒரு மணி நேரம் ஊறவைக்கவும். பிறகு தண்ணீரை வடித்து எடுத்துக் கொள்ளவும். பாலைக் கொதிக்கவைத்து அதில் ஊறவைத்த ஜவ்வரிசியைச் சேர்த்து, ஜவ்வரிசி மென்மையாகும்வரை வேகவிடவும்.

ஜவ்வரிசி வெந்ததும் அதனுடன் சர்க்கரை, கோகோ பவுடரைச் சேர்த்து, சர்க்கரை நன்கு கரையும்வரை கொதிக்கவிடவும். பிறகு இதனுடன் சாக்லேட் சாஸ் மற்றும் பொடியாக நறுக்கிய முந்திரியைச் சேர்த்துக் கிளறி அடுப்பை அணைக்கவும். சூடாகவோ அல்லது ஃப்ரிட்ஜில் வைத்து `ஜில்’லென்றோ பரிமாறவும்.

*சராசரியாக ஒரு மரத்திலிருந்து ஒன்று முதல் இரண்டு கிலோ வரை கோகோ கிடைக்கும்.