அலறித் துடிக்க வைக்கும் அல்சர் நோய் அவஸ்தை பற்றியும், அதை மருந்தில்லாமல் அடித்து விரட்டும் அற்புத ரெசிபிகள் குறித்தும் கடந்த சில இதழ்களாகப் பார்த்தோம். அடுத்து, சீனியர் சிட்டிஸன்களை, குறிப்பாக பெண்களை பெருமளவு தாக்கும் ஆஸ்டியோபொரோசிஸ் (Osteoporosis) எனும் நோய், அதற்கான ரெசிபி பற்றி பார்க்கலாம்.

முதலில் ஆஸ்டியோபொரோசிஸ் பற்றி சென்னை, குரோம்பேட்டை, பத்மாவதி மருத்துவமனையின் சீஃப் ஆர்த்தோபீடிக் சர்ஜன், டாக்டர் முத்துக்குமார் பேசுகிறார்.

''உடம்பில் உள்ள எலும்புகள் இரும்பு போல் உறுதியானவைதான். ஆனால், வயது ஏற ஏற, வலுவிழக்கும்போது வரக்கூடியதுதான் ஆஸ்டியோபொரோஸிஸ். கால்சியம், பாஸ்பரஸ், புரதம் எல்லாம் கலந்து உருவானதுதான் எலும்பு. கால்சியம் எலும்புகளுக்கு நல்ல உறுதியைத் தருகிறது. வயதாகும்போது, எலும்புகளில் கால்சியத்தின் அளவு மெதுவாகக் குறைய ஆரம்பிக்கும். இதனால் எலும்பு வெறும் கூடாக மாறிவிடும்.

எலும்பில் உள்ள கால்சியத்தையும், புரதத்தையும் அப்படியே பாதுகாக்கும் திறன், ஈஸ்ட்ரோஜன் போன்ற ஹார்மோன்களுக்கு உண்டு. மாதவிடாய் நின்ற பின் ஹார்மோன் குறைபாடு ஏற்படுவதால், எலும்புகள் வலுவிழந்து விடுகின்றன. இதனால், பெரும்பாலும் பெண்கள்தான் இந்நோய்க்கு ஆளாகிறார்கள்.

இப்படிப்பட்ட பாதிப்பிலிருப்பவர்கள் ஆட்டோ, வேன், டூ-வீலர் என்று பயணிக்கும்போது மேடு, பள்ளங்களில் வேகமாக வண்டி ஏறி இறங்கினால்... முதுகு, இடுப்பு எலும்புகள் முறிந்து போக வாய்ப்பிருக்கிறது. லேசாகக் கையை ஊன்றிக் கொண்டு எழும்போது மணிக்கட்டு எலும்பு உடைந்துவிடும் ஆபத்தும் இருக்கிறது.

இந்நோய் இளம்வயதினரை தாக்குவதில்லை. ஏனெனில், வளரும் குழந்தைகளின் எலும்புகளில் கால்சியம் சத்து அதிகமாகவே இருக்கும். அதோடு, அவர்கள் சாப்பிடும் உணவின் மூலமாகவும் கூடுதல் கால்சியம் கிடைத்து, அது அவர்களின் எலும்பை உறுதியாக்கும்.

வயதானவர்கள்... உணவுப் பழக்கம், நடைபயிற்சி, மூட்டு மற்றும் சதைகளை அசைப்பதற்கான உடற்பயிற்சி போன்றவற்றால் மட்டுமே எலும்பை உறுதியாகவும், பாதுகாப்பாகவும் வைத்துக்கொள்ள முடியும். தேவைப்பட்டால் சிகிச்சையும் எடுத்துக்கொள்ள லாம்'' என்று சொன்னார் டாக்டர்.

''உடற்பயிற்சிகளை மேற்கொள்ளுங்கள். அதோடு, நான் சொல்லும் உணவு களையும் சாப்பிடுங்கள், நிச்சயமாக உங்கள் எலும்புகள் உறுதியாகும். அதற்கு நான் கியாரண்டி'' என்று நம்பிக்கையோடு பேசும் செஃப் ஜேக்கப், கால்சியம், புரதம் நிறைந்த உணவு ரெசிபிகளைச் சொல்ல ஆரம்பித்தார்.

பாலக் பனீர்!

தேவையானவை பனீர் - 5 துண்டுகள் (25 கிராம்), பாலக்கீரை - 50 கிராம், இஞ்சி-பூண்டு விழுது - ஒரு டீஸ்பூன் (5 கிராம்), பச்சை மிளகாய் - 1, எண்ணெய் - 2 டீஸ்பூன், க்ரீம் - 2 டீஸ்பூன், சீரகம் - ஒரு டீஸ்பூன், சிறியதான (20 கிராம் இருக்கலாம்) தக்காளி, வெங்காயம் - தலா 1, உப்பு - தேவையான அளவு.

செய்முறை தக்காளி, வெங்காயம், பச்சை மிளகாயை பொடியாக நறுக்கவும். கீரையை நன்றாக அலசி, பொடியாக நறுக்கி, தண்ணீர் குறைவாக விட்டு வேக வைத்து, மிக்ஸியில் அரைக்கவும். கடாயில் எண்ணெய் விட்டு சீரகம், வெங்காயத்தைப் போட்டு வதக்கவும். பிறகு, தக்காளி, பச்சை மிளகாய், இஞ்சி-பூண்டு விழுது, பனீர் சேர்த்து வதக்கவும். கூடவே உப்பு, அரைத்த பாலக்கீரை ஆகியவற்றைச் சேர்த்துக் கிளறி இறக்கவும். கடைசியில் க்ரீம் சேர்க்கவும்.

சப்பாத்தி, அடை போன்றவற்றுக்கு சைட் டிஷ்ஷாக சாப்பிடலாம். சாதத்துடனும் கலந்தும் சாப்பிடலாம்.

ஆலு தஹி சாட்!

தேவையானவை வேக வைத்த சிறிய உருளைக்கிழங்கு - 3 (100 கிராம்), தயிர் - ஒரு கப் (100 மில்லி), சீரகத்தூள், சாட் மசாலா, ஜல்ஜீரா தூள் - தலா ஒரு டீஸ்பூன் (5 கிராம்), பொடியாக நறுக்கிய வெங்காயம் - ஒரு டேபிள்ஸ்பூன் (10 கிராம்), பப்டி சாட் - 5, கொத்தமல்லி இலை - ஒரு டீஸ்பூன், கறுப்பு உப்பு - தேவையான அளவு.

செய்முறை தயிரில் வெங்காயம், சீரகத்தூள், பப்டி சாட், சாட் மசாலா, ஜல்ஜீரா தூள், கறுப்பு உப்பு சேர்த்துக் கலந்து கொள்ளுங்கள். இதில் வேக வைத்த உருளைக்கிழங்கை உதிர்த்து சேருங்கள். கடைசியாக கொத்தமல்லி தூவி சாப்பிடுங்கள்.

மாலை நேரத்துக்கு அருமையான உணவு.