எலும்புகளை உறுதியாக்கும் ஸ்ப்ரவுட்ஸ் சாலட் !

இரும்புபோல் உறுதியாக இருக்கும் எலும்புகள், வலுவிழந்து வளைந்து உடைந்து போகும் நிலையை அடைவதுதான் 'ஆஸ்டியோபெரோசிஸ்'. இது எதனால் வருகிறது? வந்தால் ஏற்படும் பாதிப்புகள் என்ன என்பது பற்றியெல்லாம் கடந்த முறை சொல்லியிருந்தார் சென்னை, குரோம்பேட்டை, பார்வதி மருத்துவமனையின் (கடந்த முறை பத்மாவதி மருத்துவமனை என்று தவறுதலாக வெளியாகிவிட்டது). சீஃப் ஆர்த்தோபீடிக் சர்ஜன் டாக்டர் முத்துக்குமார்.

அதைத் தொடர்கிறார்... ''மெனோபாஸ் நிலையைத் தாண்டிய பெண்கள் மற்றும் சைவ உணவு சாப்பிடுபவர்கள் ஆகியோரை ஆஸ்டியோபெரோசிஸ் அதிகமாகத் தாக்கும். பெண்களைப் பொறுத்தவரை மூன்று பேரில் ஒருவருக்கும், ஆண்களை பொறுத்தவரை 12 பேரில் ஒருவருக்கும் இந்நோய் தாக்குதல் ஏற்படுகிறது.

அல்சர், மஞ்சள்காமாலை போன்ற நோய்களை அறிகுறிகள் மூலம் சட்டென நம்மால் அறிந்து கொள்ள முடியும். ஆனால், ஆஸ்டியோபெரோசிஸ் நோயை எளிதாகக் கண்டு பிடிக்கமுடியாது. டெக்சா ஸ்கேன் மூலம் தெரிந்து கொள்ளலாம்.

பெண்களைப் பொறுத்தவரை 25 வயதுக்கு முன்பாக ஒரு தடவையும். 25 வயதுக்குப் பிறகு கடைசி காலம் வரை ஐந்து ஆண்டுகளுக்கு ஒரு தடவையும் கண்டிப்பாக பி.எம்.டி. (BMD- Bone Mineral Density) டெஸ்ட் செய்து கொள்ளவேண்டும். இதற்கு நிமிட நேரம்தான் ஆகும். டெஸ்ட் எடுத்தபிறகு ஆஸ்டியோபெரோசிஸ் உறுதியானால், பாதிப்பின் தன்மைக்கு ஏற்ப மருந்து மாத்திரைகள், இன்ஜெக்ஷன் மற்றும் தசை ஸ்ப்ரே மூலம் குணப்படுத்தலாம். இடுப்பு எலும்பு முறிந்து போனால் மட்டும் ஆபரேஷன் செய்ய வேண்டியிருக்கும். ஆண்டுதோறும் ஒரு இன்ஜெக்ஷன் போட்டுக் கொள்வதன் மூலம் வாழ்நாள் முழுவதும் ஆஸ்டியோபெரோசிஸ் பாதிப்பு வராமல் பார்த்துக் கொள்ளமுடியும்'' என்று சொன்னார் டாக்டர் முத்துக்குமார்.

''பால், தயிர், சீஸ், பழங்கள் போன்ற சத்துக்கள் நிறைந்த உணவுகளை அன்றாடம் சுவையாகச் செய்து சாப்பிடும்போது, எலும்பு தேய்மானம் என்ற பேச்சுக்கே இடமிருக்காது. இதோ, எலும்புகளை ஸ்ட்ராங்காக்க நான் தயார். சாப்பிட நீங்க தயாரா?'' என்றபடியே ரெசிபிகளை தந்தார் 'செஃப்' ஜேக்கப்.

கஸ்டர்ட் ஆப்பிள் ஸ்மூத்தி

தேவையானவை சீதாப்பழம் - 2, சர்க்கரை - ஒரு டேபிள்ஸ்பூன், பால் - அரை கப், க்ரீம் - ஒரு டீஸ்பூன்.

செய்முறை சீதாப்பழத்தை நன்றாகக் கழுவி, உள்ளிருக்கும் சதைப்பகுதியை எடுத்து, அதனுடன் சர்க்கரை, பால், க்ரீம் சேர்த்து, மிக்ஸியில் போட்டு தண்ணீர் சேர்க்காமல் 'திக்'காக அரைத்தெடுத்தால்... ஸ்மூத்தி ரெடி!

காலை அல்லது மதிய உணவுக்கு முன்பாக குடிக்கலாம்.

ஸ்ப்ரவுட்ஸ் சாலட்

தேவையானவை நான்கு வகையான முளைகட்டிய பயறு - 100 கிராம், ஆலிவ் ஆயில், மிளகுத்தூள் - தலா ஒரு டீஸ்பூன், எலுமிச்சைச் சாறு - 5 முதல் 6 துளிகள், தேன் - அரை டீஸ்பூன், பொடியாக நறுக் கிய வெங்காயம், உப்பு - சிறிதளவு.

செய்முறை பயறு வகைகளை நன்றாகக் கழுவி, சூடான தண்ணீரில் போட்டு, பத்து நிமிடம் மூடி வைத்துவிடுங்கள். பிறகு, வெளியில் எடுத்து உப்பு, மிளகுத்தூள், வெங்காயம், எலுமிச்சைச் சாறு, தேன், ஆலிவ் ஆயில், வெங்காயம் சேர்த்துக் கலக்கினால், ஸ்ப்ரவுட்ஸ் சாலட் தயார்.

இதை மாலை டிபனாக எடுத்துக் கொள்ளலாம்.

சீஸ் டிப்

தேவையானவை கெட்டித் தயிர் - ஒரு கப், சீஸ் - 3 டேபிள்ஸ்பூன், எலுமிச்சைச் சாறு - 3 முதல் 4 துளிகள், க்ரீம் - 2 டேபிள்ஸ்பூன், உப்பு - சிறிதளவு.

செய்முறை தண்ணீர் சேர்க்காமல் எல்லாவற்றையும் மிக்ஸியில் போட்டு அரைத்தால்... அதுதான சீஸ் டிப்!

இதை பிரெட், சப்பாத்திக்கு தொட்டுச் சாப்பிடலாம்.

'டயட்டீஷியன்' கிருஷ்ணமூர்த்தியின் கருத்து...

''பொதுவாக 'இன்டர் செல்லுலார் சப்ஸ்டென்ஸ்'... அதாவது, எலும்புக்குள் இருக்கும் திசுக்கள் நன்றாக வளர்வதற்கு வைட்டமின்-சி மிகவும் அவசியம். கஸ்டர்ட் ஆப்பிள் ஸ்மூத்தி, ஸ்ப்ரவுட் சாலட் மூலமாக இந்தச் சத்து நேரடியாக நமக்கு கிடைத்துவிடுகிறது. மிக அதிக அளவில் இரும்புச் சத்தும் கிடைக்கிறது. ஓரளவு நார்ச்சத்தும், கால்சியமும், தாது உப்புகளும் கிடைத்துவிடுகின்றன. பால், க்ரீம் சேர்க்கும்போது வைட்டமின்-ஏ சத்து கிடைத்து கண்ணையும், சருமத்தையும் பாதுகாக்கிறது.

ஸ்ப்ரவுட் சாலட் மூலம் கால்சியம், நார்ச்சத்து, வைட்டமின்-ஏ, தாது உப்புகள் கிடைக்கின்றன. ஆலிவ் ஆயில் சேர்த்துக் கொள்ளும்போது, உடம்பில் கெட்டக் கொலஸ்ட்ராலைக் குறைத்துவிடும். தேன், எலுமிச்சை சேர்ப்பதால் டேஸ்ட்டும் அருமையாக இருக்கும்.

'சீஸ் டிப்'பில் கால்ஷியம் நிறைய கிடைக்கிறது. மிகவும் வயதானவர்கள் சீஸின் அளவைக் குறைத்துக் கொள்ளலாம். ஆனால், வளரும் குழந்தைகளின் எலும்பு நல்ல உறுதியாக இருக்க... இதுதான் சூப்பர் ரெசிபி'' என்றார் கிருஷ்ணமூர்த்தி.

- பரிமாறுவோம்...
படங்கள் எம்.உசேன்