ராயல் பகாரா பைங்கன்

தேவையானவை விதையில்லாத சிறிய கத்திரிக்காய் - 10 (நீளவாக்கில் நறுக்கிக் கொள்ளவும்), பழுத்த தக்காளி, பச்சை மிளகாய் - தலா 3, கிராம்பு, ஏலக்காய் - தலா 2, பட்டை - 1 துண்டு, சோம்பு - ஒரு டீஸ்பூன், கசகசா - ஒன்றரை டீஸ்பூன், முந்திரிப்பருப்பு - 10, வேர்க்கடலை, எள் - தலா ஒரு டீஸ்பூன், கொப்பரைத் துருவல் - 3 டீஸ்பூன், கெட்டியான பால் - ஒன்றரை கப், பெரிய வெங்காயம் - 2, எண்ணெய், உப்பு - தேவையான அளவு.

செய்முறை கடாயில் எண்ணெய் விட்டு, கத்திரிக்காயை போட்டு வதக்கி தனியாக வைக்கவும். தக்காளியை அரைத்து வடிகட்டி வைக்கவும். கடாயில் ஒரு டீஸ்பூன் எண்ணெய் விட்டு நறுக்கிய வெங்காயம், பச்சை மிளகாய் இரண்டையும் நன்றாக வதக்கி, கத்திரிக்காய் சேர்த்துக் கிளறவும்.

கிராம்பு முதல் கொப்பரைத் துருவல் வரையுள்ள பொருட்களை வறுத்து, சிறிதளவு தக்காளிப்பழச் சாறு சேர்த்து வெண்ணெய் போல் அரைக்கவும். தக்காளி சாறு முழுவதையும் கொஞ்சம் கொஞ்சமாக சேர்க்கவும்.

கத்திரிக்காய் கலவையில் பாலைச் சேர்த்து வேக விடவும். உப்பு சேர்த்து, கரைத்து வைத்துள்ள தக்காளி மசாலா கலவையை ஊற்றி நன்றாகக் கொதித்து, குழம்பு பதம் வந்ததும் இறக்கவும்.

பரோட்டா, புலாவ், பூரிக்கு ஏற்ற சூப்பர் சைட் டிஷ் இது!

- பிரேமா ராவ், ஸ்ரீரங்கம்

வாழைப்பூ தோசை

தேவையானவை நறுக்கிய வாழைப்பூ - ஒரு கப், அரிசி - 2 கப், உளுந்து - கால் கப், பொடியாக நறுக்கிய இஞ்சி - ஒரு டீஸ்பூன், பொடியாக நறுக்கிய வெங்காயம், கொத்தமல்லி - தலா கால் கப், நறுக்கிய பச்சை மிளகாய் - 5, எண்ணெய், உப்பு - தேவையான அளவு.

செய்முறை வாழைப்பூவை வேக வைத்துக் கொள்ளவும். அரிசி, உளுந்தை ஊற வைத்து சுத்தம் செய்து அரைக்கவும். இதனுடன் வேக வைத்த வாழைப்பூ, உப்பு சேர்த்து மேலும் நன்றாக அரைக்கவும்.

கடாயில் எண்ணெய் விட்டு வெங்காயம், பச்சை மிளகாய், இஞ்சி, கொத்தமல்லி போட்டு வதக்கி, அரைத்த மாவில் சேர்த்துக் கலக்கவும். தோசைக்கல்லில் மாவை ஊற்றி முறுகலாக எடுக்கவும்.

தேங்காய் சட்னி, வெங்காய சட்னியை இதற்கு தொட்டுக்கலாம்.

- மன்னை சதிரா, மன்னார்குடி

தயிர் டிக்கி

தேவையானவை கெட்டித் தயிர் - 2 கப், கோதுமை மாவு - ஒரு கப், பெரிய வெங்காயம் - 2 (பொடியாக நறுக்கவும்), கேரட் துருவல், கோஸ் துருவல், பல்லு பல்லாக நறுக்கிய தேங்காய் - தலா ஒரு டேபிள்ஸ்பூன், பச்சை மிளகாய் - இஞ்சி சேர்த்து அரைத்த விழுது - ஒரு டேபிள்ஸ்பூன், கொத்தமல்லி, கறிவேப்பிலை - சிறிதளவு, உப்பு, எண்ணெய் - தேவையான அளவு.

செய்முறை எண்ணெய் நீங்கலாக, கொடுத்துள்ள எல்லாவற்றையும் தயிரில் சேர்த்து தண்ணீர் சேர்க்காமல் பிசறவும்.

கடாயில் எண்ணெய் விட்டு காய்ந்ததும் பிசறியதிலிருந்து சிறிய போண்டாக்களாக உருட்டிப் போட்டு எடுக்கவும்..

தக்காளி சட்னி (அ) தேங்காய் சட்னி இதற்கு நல்ல காம்பினேஷன்.

- சந்தியா வேணுகோபால் சென்னை-94

படங்கள் ஆ.முத்துக்குமார்