இஞ்சி சர்பத்

தேவையானவை இஞ்சி - அரை கப், எலுமிச்சம்பழம் - 20, ஏலக்காய் - 10, உருண்டை வெல்லம் - 4 கப்.

செய்முறை இஞ்சியை தோல் சீவி நறுக்கி, மிக்ஸியில் போட்டு அரைத்து, 2 டம்ளர் தண்ணீர் விட்டு வடிகட்டவும். எலுமிச்சம்பழங்களை சாறு பிழிந்து வடிகட்டிக் கொள்ளவும். ஒரு பாத்திரத்தில் வெல்லம், ஏலக்காயைத் தட்டிப் போட்டு, ஒரு லிட்டர் தண்ணீர் விட்டு கரண்டியினால் கலக்கி வடிகட்டவும். பாத்திரத்தை அடுப்பில் வைத்து வெல்லக் கரைசல், இஞ்சிச் சாறு விட்டு கால் மணி நேரம் காய்ச்சவும். பிறகு, எலுமிச்சைச் சாறை விட்டு, ஐந்து நிமிடத்தில் இறக்க வேண்டும். நன்றாக ஆற வைத்து, பாட்டிலில் ஊற்றி, ஃப்ரிட்ஜில் வைத்து தேவைப்படும்போது தண்ணீர் சேர்த்துப் பருகலாம்.

வெயிலுக்கு உகந்த குளிர்பானம் இது. வயிற்றுப் பிரச்னைகளுக்கும் இணையற்ற தீர்வு தரும்.

- சுமதி ராஜாராம், சந்தைப்பேட்டை

பீட்ரூட் கோலா உருண்டை

தேவையானவை பீட்ரூட் துருவல் - ஒரு கப், கடலை மாவு - கால் கப், அரிசி மாவு - ஒரு டேபிள்ஸ்பூன், மிளகாய்த்தூள், சோம்புத்தூள், கரம் மசாலாத் தூள் - தலா ஒரு டீஸ்பூன், பொடியாக நறுக்கிய வெங்காயம் - 1, கறிவேப் பிலை, உப்பு, எண்ணெய் - தேவையான அளவு.

செய்முறை எண்ணெய் தவிர, எல்லா பொருட்களையும் ஒன்றாகச் சேர்த்துக் கலந்து பிசையவும். தேவைப்பட்டால் தண்ணீர் தெளித்துக் கொள்ளலாம். சிறு கோலா உருண்டைகளாக உருட்டி, சூடான எண்ணெயில் பொரித்து எடுக்கவும்.

- பானுமதி ராமதாஸ், தஞ்சாவூர்

இலைப்பொடி சாதம்

தேவையானவை எலுமிச்சை இலை, நார்த்தை இலை - தலா ஒரு பிடி, கறிவேப்பிலை - ஒரு கப், வெற்றிலை - 4, காய்ந்த மிளகாய் - 8, கடலைப்பருப்பு, உளுத்தம்பருப்பு - தலா அரை கப், கடுகு - ஒரு டீஸ்பூன், பெருங்காயத்தூள் - அரை டீஸ்பூன், உதிர் உதிராக வடித்த சாதம், உப்பு, எண்ணெய் - தேவையான அளவு.

செய்முறை இலைகளை நிழலில் உலர்த்தவும். கடாயில் எண்ணெய் விட்டு... கடுகு, உளுத்தம்பருப்பு, கடலைப்பருப்பு, மிளகாயைப் போட்டு வறுத்து, உலர்ந்த இலைகளையும் சேர்த்துப் போட்டு மிக்ஸியில் பொடிக்கவும். இதில் பெருங்காயத்தூள், உப்பு கலந்து மிக்ஸியை ஒருமுறை சுற்றி எடுக்கவும்.

சாதம் சூடாக இருக்கும்போது, அதில் நல்லெண்ணெய் விட்டுக் கிளறி, தேவையான அளவு பொடியைப் போட்டு நன்றாகக் கலக்கி பரிமாறவும்.

அப்பளம், மோர்க்குழம்பு, வடகம் தொட்டு சாப்பிடலாம். இது நல்ல ஜீரண சக்தியைக் கொடுக்கும்.

- ஜெயலக்ஷ்மி, புதுடெல்லி-3

வாசகிகளின் குறிப்புகளைத் தேர்ந்தெடுத்து, சமைத்து, ருசித்து சர்டிஃபிகேட் தந்திருப்பவர் 'சுவையரசி' சாந்தி விஜயகிருஷ்ணன். அவருடைய கமென்ட்ஸ்...

இஞ்சி சர்பத் சிட்டிகை உப்பு சேர்த்துச் செய்தால்... டேஸ்ட் வித்தியாசமாக இருக்கும்.

பீட்ரூட் கோலா உருண்டை புரதச்சத்தை அள்ளித் தரும் அசத்தல் ரெசிபி.

இலைப்பொடி சாதம் தேவைப்பட்டால்... கற்பூரவல்லி, கண்டதிப்பிலி, துளசி போன்ற மருத்துவ இலைகளையும் சேர்த்துக் கொள்ளலாம்.