Published:Updated:

இன்றைய சமையல்! - 2

'செஃப்’ தாமு, படங்கள்: ச.பா.முத்துக்குமார், ப.சரவணகுமார்

இன்றைய சமையல்! - 2

'செஃப்’ தாமு, படங்கள்: ச.பா.முத்துக்குமார், ப.சரவணகுமார்

Published:Updated:
##~##

 'இன்றைய சமையல்’ பகுதியில் தினமும் என்ன சமைக்கலாம் என்பதைப் பற்றி வாசகிகளுக்காக இங்கே பேசுகிறார் செஃப் தாமு. கடந்த இதழில், திங்கட்கிழமை சமையல் ரெசிபிகளை தாமு சொல்ல, சென்னையைச் சேர்ந்த இல்லத்தரசி அஞ்சனா ராவ், அவற்றை சமைத்துக் காட்டினார்.

இம்முறை செவ்வாய்க்கிழமை ரெசிபிகளுக்காக செஃப் தாமு, அஞ்சனா ராவ் இருவரும் சந்தித்து கொண்டது சென்னை, கோடம்பாக்கத்தில் உள்ள பிரவுன் ஸ்டார் ஹோட்டலில். ''இந்த ஹோட்டலில் வைக்கிற சாம்பார் மாதிரி, வீட்ல வைக்க என்ன சார் பண்ணணும்... பனீர் பட்டர் மசாலாவுல பனீரை வதக்கிப் போடணுமா... எப்படி?’ என்று தன் சந்தேகங்களை அஞ்சனா அடுக்க, ஒவ்வொன்றுக்கும் பொறுமையாக பதில் அளித்தபடியே... ரெசிபிகளை சொல்ல ஆரம்பித்தார் செஃப் தாமு. பொறுப்பான ஸ்டூடன்ட்டாக குறிப்பெடுத்துக் கொண்டார் அஞ்சனா ராவ்.

ஒட்டுமொத்த விகடனுக்கும் ஒரே ஷார்ட்கட்!

காலை சிற்றுண்டி: ரவா கிச்சடி

தேவையானவை: ரவை - ஒரு டம்ளர், பட்டை, லவங்கம், பிரிஞ்சி இலை - தலா 2, கேரட், பீன்ஸ், பச்சைப் பட்டாணி (எல்லாம் சேர்த்து) - 200 கிராம், பெரிய வெங்காயம் - ஒன்று, பச்சை மிளகாய் - 2, மஞ்சள்தூள் - அரை டீஸ்பூன், பூண்டு - 8 பல், எண்ணெய் - ஒரு குழிக்கரண்டி, தண்ணீர் - 2 டம்ளர், உப்பு - தேவையான அளவு.

செய்முறை: அடுப்பைப் பற்ற வைத்து வாணலியில் ரவையை லேசாக வறுத்து, தனியாக வையுங்கள். அதே வாணலியில் எண்ணெய் ஊற்றி... பட்டை, லவங்கம், பிரிஞ்சி இலை தாளித்து... நீளமாக நறுக்கிய பெரிய வெங்காயம், பச்சை மிளகாய், பொடியாக நறுக்கிய கேரட், பீன்ஸ், பூண்டு, பச்சைப் பட்டாணி, மஞ்சள்தூள் சேர்த்து நன்கு வதக்குங்கள். இதில், இரண்டு டம்ளர் தண்ணீர் ஊற்றி, தேவையான அளவு உப்பு சேர்த்து வேகவிடுங்கள். தண்ணீர் நன்கு கொதித்து வரும்போது... ரவையை அதில் தூவி கிளறி, அடுப்பை சிம்மில் வைத்தால்... தளதளவென வெந்து, சற்று நேரத்தில் உதிரி உதிரியாக ரவா கிச்சடி ரெடி!

இதற்கு பெஸ்ட் சைட் டிஷ் தேங்காய் சட்னி.

இன்றைய சமையல்! - 2

தேங்காய் சட்னி

தேவையானவை: தேங்காய் - கால் மூடி, பச்சை மிளகாய் - 2, பொட்டுக்கடலை - ஒரு கைப்பிடி அளவு, எண்ணெய், கடுகு, உளுத்தம்பருப்பு - தாளிக்க தேவையான அளவு, உப்பு - தேவையான அளவு.

செய்முறை: தேங்காய், பச்சை மிளகாய், பொட்டுக்கடலை ஆகியவற்றை மிக்ஸியில் நன்கு அரைத்துக் கொள்ளுங்கள். வாணலியை அடுப்பிலேற்றி சூடாக்கி, எண்ணெய் விட்டு கடுகு, உளுத்தம்பருப்பு தாளித்து, அரைத்து வைத்த தேங்காய் கலவை, உப்பு சேர்த்துக் கலக்கி இறக்குங்கள்.

மதிய சாப்பாடு: தக்காளி புலாவ்

தேவையானவை: தக்காளிப்பழம் - 6, கொத்தமல்லி - ஒரு கட்டு, பச்சை மிளகாய் - 3, இஞ்சி - ஒரு சின்ன துண்டு, பூண்டு - 6 பல், அரிசி - 2 டம்ளர், பெரிய வெங்காயம் (நறுக்கியது) - ஒரு கைப்பிடி அளவு, பட்டை, லவங்கம், பிரிஞ்சி இலை - தலா இரண்டு, உப்பு - தேவையான அளவு, எண்ணெய் - ஒரு குழிக்கரண்டி.

செய்முறை: கொத்தமல்லி, இஞ்சி, பூண்டு, பச்சை மிளகாய், தக்காளிப்பழத்தை கழுவி மிக்ஸியில் ஒன்றாக சேர்த்து மையாக அரைத்துக் கொள்ளுங்கள். அரிசியை நன்கு கழுவி, தண்ணீரை வடியுங்கள். அரைத்த கொத்தமல்லி விழுதை அரிசியுடன் கலந்து, இருபது நிமிடம் ஊற வையுங்கள். அடுப்பில் கடாயை வைத்து சூடாக்கி, ஒரு குழிக்கரண்டி எண்ணெய் விட்டு... பட்டை, லவங்கம், பிரிஞ்சி இலை தாளித்து, நறுக்கிய வெங்காயத்தைச் சேர்த்து நன்கு வதக்கிக் கொள்ளுங்கள். ஊற வைத்த அரிசிக் கலவையை இதில் சேர்த்து, உப்பு சேர்த்து நன்கு வதக்குங்கள். இதில் நான்கு டம்ளர் தண்ணீர் ஊற்றி வேக வையுங்கள். கொதித்து குமிழ்கள் கிளம்ப ஆரம்பித்ததும்... அடுப்பை 'சிம்’மில் வைத்து, வெந்ததும் இறக்குங்கள். இதுவே, குக்கரில் வைப்பதாக இருந்தால்... அடுப்பை 'சிம்’மில் வைத்து மூன்று விசில் வந்ததும் இறக்கிவிடுங்கள்.

பொதுவாக தக்காளி புலாவுக்கு தண்ணீர் சேர்க்கும்போது சாதாரண ரக அரிசியாக இருந்தால், ஒரு டம்ளர் அரிசிக்கு, இரண்டு டம்ளர் தண்ணீர்... பிரியாணி அரிசியாக இருந்தால் ஒரு டம்ளர் அரிசிக்கு, ஒன்றரை டம்ளர் தண்ணீர் என்ற விகிதத்தில் சேர்க்க வேண்டும்.

இந்த புலாவுக்கு சைட் டிஷ் தேவையில்லை. விருப்பப்பட்டால்... கத்திரிக்காய் வதக்கல் செய்யுங்கள்.

இன்றைய சமையல்! - 2

கத்திரிக்காய் வதக்கல்

தேவையானவை: கத்திரிக்காய் - கால் கிலோ, எண்ணெய் - அரை குழிக்கரண்டி, உப்பு - தேவையான அளவு.

அரைக்க: காய்ந்த மிளகாய் - 8, தனியா - 2 கைப்பிடி அளவு, வெந்தயம் - அரை டீஸ்பூன், சீரகம் - ஒரு டீஸ்பூன், மிளகு - ஒன்றரை டீஸ்பூன், துவரம்பருப்பு, கடலைப்பருப்பு - தலா ஒரு கைப்பிடி அளவு.

செய்முறை: அடுப்பில் ஒரு வாணலியை வைத்து சூடாக்கி, அரைக்க வேண்டிய பொருட்களை எண்ணெய் இல்லாமல் வறுத்து மிக்ஸியில் பொடி செய்யுங்கள்.

கத்திரிக்காயை நன்கு கழுவி, காம்பு நீக்கி, லேசாக நறுக்கி, நான்காக பிளந்து கொள்ளுங்கள். அடுப்பில் வாணலியை வைத்து அரைக்குழிக் கரண்டி எண்ணெய் ஊற்றி சூடாக்கி, கத்திரிக்காயை சேர்த்து நன்கு வதக்குங்கள். கூடவே உப்பு சேருங்கள். நன்கு சுருண்டு வரும்போது, அரைத்து வைத்துள்ள பொடியை பரவலாகத் தூவி கிளறி இறக்குங்கள். கத்திரிக்காய் வதக்கல் ரெடி.

இரவு உணவு: ஸ்டஃப்டு சப்பாத்தி

தேவையானவை: கேரட், பீன்ஸ், காலிஃப்ளவர், உருளைக்கிழங்கு (எல்லாம் சேர்த்து) - கால் கிலோ, கோதுமை மாவு - 2 டம்ளர், மிளகாய்த்தூள்- ஒரு டீஸ்பூன், தனியாத்தூள் - ஒன்றரை டீஸ்பூன், மஞ்சள்தூள் - அரை டீஸ்பூன், எண்ணெய், உப்பு - தேவையான அளவு.

செய்முறை: கோதுமை மாவில்... தேவையான தண்ணீர், எண்ணெய், உப்பு சேர்த்து, சப்பாத்திக்கு மாவு பிசைந்துவிடுங்கள். சிறிது நேரம் கழித்து, சிறுசிறு உருண்டைகளாக பிரித்து வையுங்கள். மறுபுறம் காய்கறிகளை எல்லாம் கழுவி, சின்னதாக நறுக்கிக் கொள்ளுங்கள். வாணலியில் எண்ணெய் ஊற்றி, காய்கறிகளை வதக்கி... மிளகாய்த்தூள், மஞ்சள்தூள், தனியாத்தூள், உப்பு சேர்த்து சுருள வதக்கி, காய்கறி மசாலா செய்து கொள்ளுங்கள்.

மாவு உருண்டையை ஒவ்வொன்றாக எடுத்து உருட்டி, அகல்விளக்கு போல குழியாக்கிக் கொள்ளுங்கள். வேக வைத்த காய்கறி மசாலாவை, மாவுக்குள் வைத்து மூடி, லேசாக கையால் தட்டையாக்கிக் கொள்ளுங்கள். வாய் அகன்ற, பிளேடு போன்ற ஓரங்கள் உள்ள சிறிய பாத்திரத்தை (எவர்சில்வர் டிபன் பாக்ஸ்) மாவின் மேல் வைத்து அழுத்தினால்... ஓரங்கள் துண்டாகி வட்டமான சப்பாத்தி கிடைக்கும் (ஸ்டஃப் செய்யப்பட்டிருக்கும் மசாலா வெளியில் வராமல் இருப்பதற்காகவே இப்படி செய்கிறோம்). சப்பாத்திக் கல்லில் வைத்து மெதுவாக உருட்டி, அடுப்பில் தவாவை சூடாக்கி, டீஸ்பூன் நெய் அல்லது எண்ணெய் விட்டு சப்பாத்தியை இருபுறமும் வேகவைத்து எடுங்கள்.

இதற்கு தயிர் பச்சடி அருமையாக இருக்கும்.

தயிர் பச்சடி

தேவையானவை: கெட்டித் தயிர் - தேவையான அளவு, பெரிய வெங்காயம் - ஒன்று, பச்சை மிளகாய் -  2, உப்பு - தேவையான அளவு.

செய்முறை: வெங்காயத்தை நீளமாக நறுக்கி, உலர்ந்த துணியில் ஒற்றி எடுத்துக் கொள்ளுங்கள். இனி, பொடியாக நறுக்கிய பச்சை மிளகாய், வெங்காயம், உப்பு ஆகியவற்றை தயிரில் சேர்த்து நன்கு கலந்துவிட்டால்... அருமையான தயிர் பச்சடி ரெடி.

கமகமக்கும்...

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism