இதுகுறித்து சென்னை உயர்நீதிமன்ற வழக்கறிஞர் அஜிதாவிடம் பேசினோம்.

சட்டபூர்வமான வயதில் திருமணம் செய்த கணவன் அல்லது மனைவிக்கு, பெரிய உடல்ரீதியான மருத்துவப் பிரச்னை அல்லது மன ரீதியான பிரச்னை அல்லது முன்பு இன்னொரு திருமணம் செய்து அதை மறைத்திருப்பது அல்லது இருவரும் இணைந்து வாழ முடியாத அளவுக்கு ஏதாவதொரு பிரச்னை இருப்பது தெரியவருகிறது. மறைக்கப்பட்ட விஷயம், தனக்கு இழைக்கப்பட்ட பெரிய அநீதியாகவோ அல்லது தன் வாழ்க்கையைப் பாதிக்கக்கூடியது என்றோ கருதினால் மனுதாரர் விவாகரத்து கேட்டு வழக்குத் தொடுக்கலாம். இவ்விஷயத்தில் மனுதாரர் தரப்பில் நியாயம் இருந்தால், சாதகமாகத் தீர்ப்பு கிடைக்கும். இதற்கு `செல்லாத திருமணம்’ (nullity) என்று பெயர்.

ஒரு பெண்ணுக்கு 18 வயதுக்கு முன்பும், ஓர் ஆணுக்கு 21 வயதுக்கு முன்பும் நடைபெறும் சட்டத்துக்குப் புறம்பான திருமணங்கள், அந்த நிமிடத்திலிருந்தே `செல்லாத் திருமண’மாகத்தான் (null and void) கருதப்படும்.

அல்லது, மறைக்கப்பட்ட விஷயம் தெரிந்த உடனேயே விவாகரத்து வழக்கைத் தொடுக்கலாம். இவ்விஷயத்தில் தன் வாழ்க்கைத் துணை மனநலம் பாதிக்கப்பட்டிருந்தால், அவர் மீது வழக்குத் தொடுக்கமுடியாது. மனுதாரர் சார்பில் அவரது பெற்றோர்/பாதுகாவலர் மீது வழக்குத் தொடுக்கலாம். வாழ்க்கைத் துணை மீது நாம் சுமத்தும் குற்றச்சாட்டு உண்மையெனில், அதற்கு உரிய மருத்துவர்களின் அறிக்கை உள்ளிட்ட வலுவான பிற ஆவணங்களைத் திரட்டி நீதிமன்றத்தில் சமர்ப்பித்தால், விரைவில் சாதகமாகத் தீர்ப்பு கிடைக்கும்.

பெரிய விஷயத்தை கணவனோ அல்லது மனைவியோ மறைத்துத் திருமணம் செய்துகொண்டிருக்கலாம். திருமணத்துக்குப் பிறகு அப்பிரச்னை குறித்து தன் வாழ்க்கைத் துணையிடம் சொல்லிவிட்டார் என வைத்துக்கொள்வோம். அதன் பிறகு அவரை மன்னித்தோ அல்லது சகித்துக்கொண்டோ அவருடன் சில காலம் குடும்பம் நடத்திவிட்டு, பிறகு அந்தப் பிரச்னையை காரணமாகச் சொல்லி விவாகரத்து கேட்டால் நீதிமன்றம் ஏற்றுக்கொள்ளாது.

இதுபோன்று உங்களுக்கு எழும் கேள்விகளை https://special.vikatan.com/doubt-of-commonman/ என்ற இணையதளத்தில் பதிவு செய்யுங்கள். பதிலைச் சொல்ல காத்திருக்கிறோம்.