Published:Updated:

நிறைவேறியது கார்ப்பரேட் நிறுவனங்களின் கனவு... விவசாயிகளை அடிமையாக்கும் வேளாண் சட்டங்கள்!

விவசாயிகளின் போராட்டங்கள்
பிரீமியம் ஸ்டோரி
விவசாயிகளின் போராட்டங்கள்

ஆபத்து

நிறைவேறியது கார்ப்பரேட் நிறுவனங்களின் கனவு... விவசாயிகளை அடிமையாக்கும் வேளாண் சட்டங்கள்!

ஆபத்து

Published:Updated:
விவசாயிகளின் போராட்டங்கள்
பிரீமியம் ஸ்டோரி
விவசாயிகளின் போராட்டங்கள்
விவசாயிகளைப் பல வகைகளிலும் பாதிக்கக்கூடிய வேளாண் சட்டங்கள், கடும் எதிர்ப்புகளுக்கிடையே நாடாளு மன்றத்தில் நிறைவேற்றப்பட்டது. இந்தச் சட்டங்களைத் திரும்பப் பெறக்கோரி, நாடு முழுவதும் போராட்டங்கள் தீவிரமடைந்து வருகின்றன.

அத்தியாவசியப் பொருள்கள் திருத்த சட்டம், வேளாண் விளைபொருள் வணிகம் ஊக்குவிப்புச் சட்டம், ஒப்பந்த பண்ணையச் சட்டம் ஆகிய மூன்று சட்டங்களைத் தற்போது மத்திய அரசு நிறைவேற்றியுள்ளது. கார்ப்பரேட் நிறுவனங்களின் நலன்களுக்காகவே இந்தச் சட்டங்கள் கொண்டு வரப்பட்டிருக்கின்றன. இதனால் விவசாயிகளும் பொதுமக்களும் பாதிக்கப்படுவார்கள் என்ற அச்சம் எழுந்துள்ளது.

இந்த மசோதாக்கள் நாடாளு மன்றத்தில் தாக்கல் செய்யப்பட்டதற்கு காங்கிரஸ், தி.மு.க, திரிணாமுல் காங்கிரஸ், தெலங்கானா ராஷ்டிரிய சமிதி, ஆம் ஆத்மி, கம்யூனிஸ்ட் உள்ளிட்ட கட்சிகள் கடும் எதிர்ப்பு தெரிவித்தன. ஆனாலும், இந்த மசோதாக்கள் குரல் வாக்கு எடுப்புகள் மூலம் நிறைவேற்றப்பட்டன.

பெ.மணியரசன், கி.வெங்கட்ராமன், ஜி.கே.நாகராஜ்
பெ.மணியரசன், கி.வெங்கட்ராமன், ஜி.கே.நாகராஜ்

இதைப் பற்றி, இச்சட்டங்களின் நகல்களை எரித்துப் போராட்டங்களை நடத்தி வரும் காவிரி உரிமை மீட்புக்குழுவின் ஒருங்கிணைப்பாளர் பெ.மணியரசனிடம் பேசினோம்.

“அதானி, அம்பானி உள்ளிட்ட கார்ப்பரேட் நிறுவனங்கள் தற்போது உணவு பதனீட்டுத் தொழில்களில் இறங்கியுள்ளன. இவர்கள் அவசரப் படுத்தியதால்தான், இச்சட்டங்களைக் கொண்டு வர பிரதமர் நரேந்திர மோடி இந்தளவுக்கு அவசரம் காட்டியுள்ளார். ஆனால், விவசாயிகளின் நலன்களுக் காகத்தான் இச்சட்டங்களைக் கொண்டு வருவதாகப் பிரதமர் சொல்கிறார். விவசாயிகளின் நலனில் இவருக்கு உண்மையான அக்கறை இருந்திருந்தால், எம்.எஸ்.சுவாமிநாதன் குழுவின் பரிந்துரையின்படி, விவசாய விளைபொருள்களுக்கு உற்பத்தி செலவோடு சேர்த்து, கூடுதலாக 50 சதவிகிதம் விலை நிர்ணயம் செய்ய வேண்டும் என இச்சட்டங்களில் ஏன் குறிப்பிடவில்லை? குறைந்தபட்ச ஆதார விலை நிர்ணயம் செய்வது தொடரும் என ஏன் குறிப்பிடப் படவில்லை?

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

கார்ப்பரேட் நிறுவனங்கள், விவசாயிகளைத் தங்கு தடையின்றி சட்ட பாதுகாப்போடு, சுரண்டி கொழிப்பதற்காகத்தான் இச்சட்டங்கள் கொண்டு வரப்பட்டுள்ளன. அத்தியா வசியப் பொருள்கள் பட்டியலிலிருந்து நெல், கோதுமை உள்ளிட்ட பொருள்கள் நீக்கப்பட்டுள்ளதால், இவற்றுக்குக் குறைந்தபட்ச ஆதார விலை நிர்ணயம் செய்யப்படுவது விரைவில் நிறுத்தப்படும். விளைபொருள்களைக் கொள்முதல் செய்யும் கடமையிலிருந்தும் மத்திய, மாநில அரசுகள் விலகிக் கொள்ளும். ரேஷன் கடைகளும் படிப்படியாக மூடப்படும். இவை அனைத்துமே கார்ப்பரேட் நிறுவனங்களில் கொள்ளைகளுக்கு உறுதுணையாக இருக்கும். இதற்காகத் தான் இச்சட்டங்கள் கொண்டு வரப்பட்டுள்ளன” எனக் கடுமையாகச் சாடினார்.

வேளாண் சட்டங்களுக்கு எதிராக நடைபெற்ற விவசாயிகளின் போராட்டங்கள்
வேளாண் சட்டங்களுக்கு எதிராக நடைபெற்ற விவசாயிகளின் போராட்டங்கள்

வேளாண் பொருளியல் ஆய்வாளரும் தமிழக உழவர் முன்னணி ஆலோசகருமான கி.வெங்கட்ராமன், “‘இன்றியமையாப் பொருள்கள்’ என்ற பட்டியலிலிருந்து உணவு தானியங்கள், பருப்பு வகைகள், எண்ணெய் வித்துகள், உணவு எண்ணெய் வகைகள், வெங்காயம், உருளைக் கிழங்கு உட்பட இன்னும் பல விளைபொருள்கள் நீக்கப்பட்டுள்ளன. இதன் காரணமாக, இனிவரும் காலங்களில், விவசாயிகளின் விளைபொருள்களை அரசு கொள்முதல் செய்யாது. குறைந்தபட்ச ஆதார விலையும் இனி நிர்ணயம் செய்ய வாய்ப்பில்லை. இதனால் தனியார் நிறுவனங்களின் கோரப் பிடியில் விவசாயிகள் சிக்கித் தவிக்கக்கூடிய நிலை உருவாகியுள்ளது.

வேளாண் விளைபொருள்கள் வணிக ஊக்குவிப்பு சட்டத்தின் மூலமாக, கார்ப்பரேட் நிறுவனங்கள், வேளாண் சந்தையை முழுமையாக ஆக்கிரமிப்பதற்கான ஆபத்தும் உருவாகியுள்ளது.

மூன்றாவதாக, ‘பண்ணை சேவைகள் ஒப்பந்த அவசரச் சட்டம்’ என்ற பெயரில் ஒப்பந்தப் பண்ணையச் சட்டமும் தற்போது பிறப்பிக்கப் பட்டுள்ளது. இந்த மூன்று சட்டங்களுமே விவசாயிகளின் கழுத்தை நெறிக்கக்கூடியது” என்றார்.

தமிழக பா.ஜ.க விவசாய அணி மாநிலத் தலைவர் ஜி.கே.நாகராஜ், “விவசாயிகள் இடைத்தரகர்கள் இல்லாமல் பொருள்களை விற்க வழி செய்கின்றன இந்தச் சட்டங்கள். விவசாயிகள் வியாபாரிகளாக மாற வேண்டும் என்பதே இந்தச் சட்டத்தின் நோக்கம். எத்தனை காலத்துக்குத்தான் விவசாயிகள் விளைந்ததை வந்த விலைக்கு விற்றுக்கொண்டிருப்பார்கள். அதை நல்ல விலைக்கு விற்க இச்சட்டங்கள் வழிகாட்டும்.

இன்னொன்று அத்தியாவசிய பொருள்கள் சட்டத்திலிருந்து விளைபொருள்கள் நீக்கப்பட்டிருப்பதால், இனி பொருள்களுக்கு டிமாண்டு அதிகரிக்கும். அதன்மூலமாக விளைபொருள்களுக்கு நல்ல விலை கிடைக்கும். விவசாயிகளே நடத்தி வரும் உழவர் உற்பத்தியாளர் நிறுவனங்கள் நாட்டில் பெருகி வருகின்றன. அந்த நிறுவனங்களுக் கெல்லாம் நல்ல விற்பனை வாய்ப்பு கிடைக்கும்” என்றார்.

அ.தி.மு.க-வின் இரட்டை வேடம்!

க்களவை மற்றும் மாநிலங்களவையில் இந்த மசோதாக்கள் தாக்கல் செய்யப்பட்டபோது, காங்கிரஸ், தி.மு.க, திரிணாமுல் காங்கிரஸ், சிரோன்மணி அகாலிதளம், தெலங்கானா ராஷ்டிரிய சமிதி, ஆம் ஆத்மி, கம்யூனிஸ்ட் உள்ளிட்ட கட்சிகள் கடும் எதிர்ப்பு தெரிவித்தன. ஆனால், அ.தி.மு.க இந்தப் பிரச்னையில் இரட்டை வேடம் போடுகிறது. மக்களவையில் இந்த மசோதாக்கள் தாக்கல் செய்யப்பட்டபோது, தமிழகத் துணை முதல்வரின் மகனும் தேனி தொகுதி நாடாளுமன்ற உறுப்பினருமான ரவீந்திரநாத் குமார் ஆதரவு தெரிவித்தார். அதேசமயம், இச்சட்டங்களுக்கு எதிர்ப்பு வலுத்து வருவதால் விவசாயிகளிடம் நாடகமாடுவதற்காக, மாநிலங்களவையில் அ.தி.மு.க-வைச் சேர்ந்த உறுப்பினர் எஸ்.ஆர்.பாலசுப்ரமணியன் இந்த மசோதாக்களுக்கு எதிர்ப்பு தெரிவித்தார்.

உண்மையான விவசாயி ஆதரிப்பாரா?

மூச்சுக்கு முந்நூறு தடவை, தன்னை ஒரு விவசாயியெனச் சொல்லிக்கொள்ளும் தமிழக முதலமைச்சர் எடப்பாடி பழனிசாமி, இந்த மூன்று மசோதாக்களை வெளிப்படையாக ஆதரித்துப் பேசினார். ‘விவசாயிகளை நசுக்கி, அடிமையாக்கக்கூடிய இந்த மூன்று மசோதாக்களையும் எந்த ஒரு உண்மையான, விவரம் அறிந்த விவசாயிகள் ஆதரிக்கமாட்டார்கள்’ என்கிறார்கள் விவசாயச் சங்க நிர்வாகிகள்.