Published:Updated:

முடங்கிக் கிடக்கும் பயிர் காப்பீட்டுத் திட்டம்... வேதனையில் விவசாயிகள்!

விவசாயம்
பிரீமியம் ஸ்டோரி
விவசாயம்

பிரச்னை

முடங்கிக் கிடக்கும் பயிர் காப்பீட்டுத் திட்டம்... வேதனையில் விவசாயிகள்!

பிரச்னை

Published:Updated:
விவசாயம்
பிரீமியம் ஸ்டோரி
விவசாயம்

இயற்கைச் சீற்றங்களால் மகசூல் பாதிக்கப்படும்போது, விவசாயிகளுக்கு ஓரளவு கைகொடுப்பது, பயிர்க்காப்பீடு மூலம் கிடைக்கும் இழப்பீடுதான். அதிலும் பல்வேறு குளறுபடிகள் நீடித்துவரும் நிலையில், இந்த ஆண்டுக்கான பயிர் காப்பீடு திட்டத்தை இதுவரை செயல்பாட்டுக்குக் கொண்டுவராததால் கவலையில் இருக்கிறார்கள் விவசாயிகள்.

இதுகுறித்து பேசிய காவிரி விவசாயிகள் பாதுகாப்பு சங்கத்தின் தஞ்சாவூர் மாவட்டச் செயலாளர் ‘சுவாமிமலை’ சுந்தரவிமல்நாதன், “பயிர் காப்பீடு திட்டம். காரீப், ரபி என இரு பருவங்களாக இந்தத் திட்டம் நடைமுறைபடுத்தப்பட்டு வருகிறது. இதில் 2016-ம் ஆண்டுத் திருத்தப்பட்ட சில மாற்றங்களுடன் ‘பிரதம மந்திரி பயிர் காப்பீடு திட்டம்’ எனப் பெயர் மாற்றம் செய்து அறிவித்தார், பிரதமர் மோடி.

விவசாயிகள், சாகுபடிக்காகக் கூட்டுறவு கடன் சங்கங்கள் மற்றும் தேசியமயமாக்கப்பட்ட வங்கிகளில் கடன் பெறும்போதே காப்பீட்டுக்கான ‘பிரீமியம்’ தொகையைப் பிடித்தம் செய்துவிடுவார்கள். ஒவ்வொரு பயிருக்குமான பிரீமியம் தொகை வேறுபடும். விவசாயிகளிடம் பிடித்தம் செய்யப்படும் தொகையுடன் அதற்கு இணையான தொகையை மத்திய, மாநில அரசுகள் பங்களிப்பாகச் சேர்த்து காப்பீட்டு நிறுவனத்தில் செலுத்தப்படும். மகசூல் இழப்பு நேரும்போது அறுவடையை ஆய்வு செய்து, பாதிப்புக்கேற்ப விவசாயிகளுக்கு வங்கிமூலம் இழப்பீடு வழங்கப்படும். பிர்க்கா அளவில் விவசாயிகளுக்கான இழப்பீட்டுத்தொகை மாறுபடும். வெளிப்படையாக இழப்பீட்டுத் தொகை அறிவிக்கப்படுவதில்லை என்பதால் விவசாயிகளுக்கு வழங்க வேண்டிய தொகையை முழுமையாக வழங்காமல் மோசடி செய்கிறார்கள், கூட்டுறவுத்துறையினர்.

இதனைத் தடுக்க மத்திய அரசு கண்காணிப்புக் குழு அமைக்க வேண்டும் என மூன்று ஆண்டுகளாகக் கோரிக்கை வைத்து வருகிறோம். இது தொடர்பாக உயர் நீதிமன்ற மதுரைக் கிளையில் விவசாயிகள் சார்பில் 28 பொதுநல வழக்குகள் தாக்கல் செய்யப்பட்டு விசாரணையில் உள்ளன.

விவசாயம்
விவசாயம்


டெல்டா மாவட்டங்களில் கடந்த குறுவை பருவத்தில், 3 லட்சம் ஏக்கர் பரப்பில் நெல் சாகுபடி செய்யப்பட்டது. சம்பா பட்டத்தில் 10 லட்சம் ஏக்கர் பரப்பில் நெல் சாகுபடி செய்யப்பட்டது. குறுவைச் சாகுபடி செய்து பாதிக்கப்பட்டவர்களில் 20 சதவிகிதம் பேருக்கு மட்டுமே இழப்பீடு பணம் கொடுக்கப்பட்டுள்ளது. சம்பா சாகுபடியில் பாதிக்கப்பட்ட விவசாயிகள் யாருக்கும் இழப்பீடு வழங்கப்படவில்லை. இரண்டு பட்டங்களுக்கும் சேர்த்துக் கிட்டத்தட்ட 2,000 கோடி ரூபாய் இழப்பீடு வழங்கப்பட வேண்டும். இதனை உடனே வழங்க வேண்டும் என்று கோரி பல கட்டப் போராட்டங்களை நடத்தி வருகிறோம்.

இந்த ஆண்டு டெல்டா மாவட்ட பாசனத்துக்காக மேட்டூரில் ஜூன் 12-ம் தேதி தண்ணீர் திறக்கப்பட்டது. இதையடுத்து தஞ்சாவூர், திருவாரூர், நாகப்பட்டினம், மயிலாடுதுறை உள்ளிட்ட மாவட்டங்களில் சுமார் மூன்றரை லட்சம் ஏக்கருக்கு மேல் விவசாயிகள் குறுவைச் சாகுபடி செய்துள்ளனர். அறுவடை வரை போதிய தண்ணீர் கிடைக்குமா எனத் தெரியவில்லை. அப்படிக் கிடைக்காவிட்டால் பாதிப்பு ஏற்பட வாய்ப்பு இருக்கிறது. இதனால், ‘அதிகமான இழப்பீட்டுத்தொகை வழங்க வேண்டியிருக்கும்’ என நினைத்து எந்தக் காப்பீடு நிறுவனமும் ‘டெண்டர்’ எடுக்க முன்வரவில்லை.

‘‘தனியார் காப்பீட்டு நிறுவனங்களுக்கு ஒப்பந்தம் வழங்கப்பட்டதற்குப் பிறகுதான் இது போன்ற பிரச்னைகள் ஏற்பட்டுள்ளன.’’


ஜூலை 31-ம் தேதிதான், குறுவை பயிருக்கான பிரீமியம் தொகை செலுத்துவதற்கான கடைசித்தேதி. ஆனால், இதுவரை பிரீமியம் தொகை வசூலிக்கப்படவில்லை. மத்திய அரசும், தமிழக அரசும் இதில் மெத்தனம் காட்டி வருகிறது. தமிழக அரசு இதுவரை எந்த அறிவிப்பையும் வெளியிடாததால், விவசாயிகள் குழப்பத்தில் தவித்துக் கொண்டிருக்கிறார்கள். பயிர் காப்பீட்டுத்திட்டம் இந்த ஆண்டுச் செயல்படுத்தப்படுமா என்பதே கேள்விக்குறியாக இருக்கிறது” என்றார்.

பட்டுக்கோட்டையைச் சேர்ந்த விவசாயி வீரசேனன், “அரசு 80 சதவிகிதம், ‘டெண்டர்’ எடுக்கும் தனியார் காப்பீட்டு நிறுவனம் 20 சதவிகிதம் என்கிற ஒப்பந்தத்தின் அடிப்படையில் விவசாயிகளுக்கு இழப்பீட்டுத் தொகை வழங்கப்பட்டு வருகிறது. இதில் கடந்த சம்பா பயிருக்கு மட்டுமே காப்பீட்டு நிறுவனத்துக்கு அரசு சுமார் 1,200 கோடி தரவேண்டியுள்ளதாகக் கூறப்படுகிறது. அதனால் இழப்பீட்டுத் தொகை இதுவரை விவசாயிகளுக்குக் கிடைக்கவில்லை. இந்நிலையில் இந்த ஆண்டுக்காக அரசு மூன்று முறை ‘டெண்டர்’ நடத்தியும் தனியார் காப்பீட்டு நிறுவனங்கள் அதில் கலந்து கொள்ள முன்வரவில்லை. அதிகமான இழப்பீட்டுத் தொகையினை வழங்குவதால் தங்களுக்கு நஷ்டம் ஏற்படுவதாகக் காப்பீடு நிறுவனங்கள் தெரிவிக்கின்றன.

அரசுக்குச் சொந்தமான காப்பீடு நிறுவனங்கள்மூலம் பயிர் காப்பீடு திட்டத்தினைச் செயல்படுத்தியபோது இது போன்ற பிரச்னைகள் இல்லை. கார்ப்பரேட் நிறுவனங்களான தனியார் காப்பீட்டு நிறுவனங்களுக்கு ஒப்பந்தம் வழங்கப்பட்டதற்குப் பிறகுதான் இது போன்ற பிரச்னைகள் ஏற்பட்டுள்ளன. பயிர் காப்பீடு என்கிற முறையே இல்லாமல் பாதிப்புக்குத் தகுந்த இழப்பீட்டை ஊக்கத் தொகையாக அரசே நேரடியாக விவசாயிகளிடம் வழங்க வேண்டும்” என்றார்.

சுந்தரவிமல்நாதன், வீரசேனன்
சுந்தரவிமல்நாதன், வீரசேனன்


“மத்திய அரசு மாற்றியமைத்திருக்கும் காப்பீட்டுத்திட்டத்தின்படி, காப்பீட்டுக்காக மாநில அரசு வழங்கும் பிரீமியம் தொகை கணிசமான அளவில் உயர்ந்துள்ளது. கடந்த 2016-17-ம் ஆண்டில் 566 கோடியாக இருந்த மாநில அரசின் பங்குத் தொகை, 2020-21-ம் நிதி ஆண்டில் 1,918 கோடியாக உயர்ந்துள்ளது. அதனால், இத்திட்டத்தைச் செயல்படுத்துவது தமிழக அரசுக்குச் சவாலாக உள்ளது. மத்திய அரசின் இந்த நடவடிக்கையால் திட்டத்தின் நோக்கமே முடக்கப்பட்டுள்ளது. எனவே பழைய முறைப்படி இத்திட்டத்தை மாற்றியமைக்க வேண்டும்” என்று தமிழக முதலமைச்சர் ஸ்டாலின் பிரதமர் மோடிக்குக் கடிதம் அனுப்பியிருக்கிறார்.

காப்பீட்டுத் திட்டக் குளறுபடிகள்குறித்து வேளாண் உற்பத்தி ஆணையர் மற்றும் செயலாளர் சமயமூர்த்தியிடம் பேசினோம். “டெண்டர் திறக்கப்பட்டுவிட்டது. பயிர் காப்பீட்டு நிறுவனங்களுடன் பேச்சுவார்த்தை நடந்து கொண்டிருக்கிறது. அது முடிவுக்கு வந்தவுடன் செயல்படுத்தப்படும்” என்று முடித்துக்கொண்டார்.