Published:Updated:

பூச்சிக்கொல்லிகளை மறுக்கும் வங்கதேசம்!

வெளிநாட்டு விவசாயம்
பிரீமியம் ஸ்டோரி
வெளிநாட்டு விவசாயம்

வெளிநாட்டு விவசாயம்-10

பூச்சிக்கொல்லிகளை மறுக்கும் வங்கதேசம்!

வெளிநாட்டு விவசாயம்-10

Published:Updated:
வெளிநாட்டு விவசாயம்
பிரீமியம் ஸ்டோரி
வெளிநாட்டு விவசாயம்

த்திரியில் காய்ப்புழுவை ஒழிக்க வேண்டித்தான் மரபணு மாற்றப்பட்ட கத்திரி ரகங்கள் சமீப காலங்களில் அறிமுகப்படுத்தப்பட்டன. ஆனால், 20 ஆண்டுகளுக்கு முன்பே இனக்கவர்ச்சிப் பொறிகளைப் பயன்படுத்தி, கூட்டம் கூட்டமாக ஆண் அந்துப்பூச்சிகளைக் கவர்ந்து கட்டுப்படுத்தும் தொழில்நுட்பம், வங்கதேசத்தில் பரவலாக அறிமுகம் ஆனது. அதற்கு முன்பு தினம்தோறுமோ, ஒருநாள் விட்டு ஒருநாளோ கத்திரியில் பூச்சிக்கொல்லிகளைப் பயன்படுத்திய உழவர்கள், அதை மாதத்துக்கு ஒருமுறை மட்டுமே என வெகுவாகக் குறைத்தனர். இந்த மாற்றம் எப்படிச் சாத்தியமானது? இது தொடர்பான கட்டுரையின் தொடர்ச்சி இங்கே இடம்பெறுகிறது.

இனக்கவர்ச்சிப் பொறிகளைப் பயன்படுத்துகையில் கிடைக்கும் மற்றொரு மறைமுக நன்மையையும் நிச்சயம் தெரிந்துகொள்ள வேண்டும். முதன்மையாக, பூச்சிக்கொல்லிகளின் உபயோகம் வெகுவாகக் குறைக்கப்படுகிறது அல்லது முற்றிலும் தவிர்க்கப்படுகிறது. அப்படிப் பூச்சிக்கொல்லிகள் அற்ற வயல்வெளிகளில் நன்மை செய்யும் பூச்சிகளின் எண்ணிக்கை படிப்படியாக அதிகரிக்கிறது. இது ஏதோ பொதுவான கருத்து என்று நினைத்துவிடாதீர்கள். அறிவியல்பூர்வமாக நிரூபித்திருக்கின்றோம். ஆம், வங்கதேசத்தில் தொடர்ந்து இரண்டு ஆண்டுகள் ஒரே இடத்தில் கத்திரிச் செடிகளை வெவ்வேறு பருவங்களில் பயிரிட்டு, நான் மேற்சொன்ன இனக்கவர்ச்சிப் பொறிகள் உள்ளிட்ட பூச்சிக் கட்டுப்பாட்டு முறைகளைப் பின்பற்றினோம். தொடக்கத்தில் 10 சதவிகிதத்திற்கும் கீழிருந்த ஒட்டுண்ணிகளின் தாக்குதல், இரண்டாம் ஆண்டின் முடிவில் 50 சதவிகிதத்தைத் தாண்டியிருந்தது. ஆகவே, இயற்கைக்கு உகந்த பூச்சிக் கட்டுப்பாட்டு முறைகளை நாம் பின்பற்றும்போது, இயற்கையும் அதன் பங்களிப்பை நமக்குக் கொடுக்க ஆரம்பிக்கிறது என்பதில் இருவேறு கருத்திற்கு இடமேயில்லை.

வங்கதேச பெண் விவசாயி - கத்திரி காய்ப்புழுவின் இனக்கவர்ச்சிப் பொறிகளுடன்
வங்கதேச பெண் விவசாயி - கத்திரி காய்ப்புழுவின் இனக்கவர்ச்சிப் பொறிகளுடன்

காய்ந்த கத்திரிச் செடிகளுக்கு

அருகே நாற்றங்கால் கூடாது


கத்திரியின் காய்ப்பு முடிந்த பிறகு, கத்திரிச் செடிகளைப் பிடுங்கி உலரவைத்து, அடுப்பெரிக்கப் பயன்படுத்தும் பழக்கம் முன்பெல்லாம் சகஜம். சமையல் எரிவாயு நடைமுறைக்கு வந்தபிறகு, இது புழக்கத்தில் இல்லாமல் போயிருக்கலாம். ஆனால், ஒருவேளை கத்திரிச் செடிகளைக் காயவைத்து, அடுக்கி வைத்தால், அவற்றைப் பிடுங்கும் சமயத்தில் செடிகளில் இருக்கும் கூட்டுப்புழுக்கள் வளர்ந்து, இப்படி அடுக்கி வைக்கப்பட்டிருக்கும் காய்ந்த செடிகளிலிருந்து அந்துப் பூச்சிகளாக வெளிவரும். அவை உடனடியாகக் கலவி புரிந்து, அடுத்த பருவத்திற்காக வளர்க்கப்படும் நாற்றங்கால்கள் அருகாமையில் இருந்தால், அவற்றைத் தேடிச் சென்று முட்டை வைக்கும். இதை நாம் யாருமே கற்பனை செய்துகூடப் பார்த்திருக்கமாட்டோம். ஆனால், இது அறிவியல்பூர்வமாக நிரூபிக்கப்பட்ட உண்மை. ஆகவே, அப்படிப்பட்ட இடங்களில் நாற்றங்கால்கள் அமைக்கப்பட்டால், அவற்றை வலை மூடாக்குகளைக் கொண்டு மூடி வைத்திருக்க வேண்டும். ஆக, கத்திரிக் காய்ப்புழுவின் மேலாண்மை நாற்றங்கால்களிலிருந்தே தொடங்க வேண்டும்.

காய்ந்துபோன கத்திரி செடிகளை அடுக்கி வைத்திருக்கும் இடத்திலேயே கத்திரி நாற்றங்கால்களை அமைத்தல்
காய்ந்துபோன கத்திரி செடிகளை அடுக்கி வைத்திருக்கும் இடத்திலேயே கத்திரி நாற்றங்கால்களை அமைத்தல்


இனக்கவர்ச்சிப் பொறிகளே

கட்டுப்படுத்தும் முக்கியக் காரணி


நான் இதுவரை சொன்ன தகவல்களிலிருந்து, உங்களுக்கு ஓர் உண்மை தெரிந்திருக்கும். அது, கத்திரிக் காய்ப்புழுவினைக் கட்டுப்படுத்த ஒருங்கிணைந்த பூச்சிக் கட்டுப்பாட்டு நடைமுறைகள் அவசியம். அது பாதுகாப்பாக நாற்றுகளை உருவாக்குவதிலிருந்து தொடங்குகிறது. மேலும் இனக்கவர்ச்சிப் பொறிகளே இந்தப் பூச்சிகளைக் கட்டுப்படுத்தும் முக்கியக் காரணி. இதற்குக் கூடுதல் வலு சேர்ப்பவை, பாதிக்கப்பட்ட குருத்துக்களையும், காய்களையும் சேகரித்து அழிப்பதுதான். வேப்பெண்ணெய் அல்லது உயிரியல் பூச்சிக்கொல்லிகளைப் பயன்படுத்தியும் பூச்சிகளைக் கட்டுப்படுத்தலாம். இவை அனைத்தையும் பின்பற்றினால், இயற்கையே நமக்கு நன்மை செய்யும் பூச்சிகளைக் கத்திரி வயல்களில் அதிகப்படுத்திக் கூடுதல் பலன்களை உருவாக்கிக் கொடுக்கிறது.

மூன்று ஆண்டுகளில் இவ்வாறு வடிவமைக்கப்பட்ட தொழில்நுட்பமானது, 2003-05 ஆண்டுகளில் இந்தியாவிலும், வங்கதேசத்திலும் கத்திரி விவசாயிகளிடையே அறிமுகம் செய்யப்பட்டது. இந்தியாவில் குஜராத், உத்தரப்பிரதேசம், ஒடிஸா, ஜார்க்கண்ட், மேற்கு வங்கம், திரிபுரா மற்றும் மேகாலயா மாநிலங்களில் இந்தத் தொழில்நுட்பம் செயல்விளக்கப் பண்ணைகளின் மூலமும், வயல்வெளிப் பள்ளிகளின் மூலமும் ஆயிரக்கணக்கான விவசாயிகளிடம் கொண்டு சேர்க்கப்பட்டது. இந்த ஒருங்கிணைந்த பயிர் பாதுகாப்பு முறையில், மிக முக்கிய அங்கம் வகிப்பது இனக்கவர்ச்சிப் பொறிகளே. எனவே அவற்றை விவசாயிகளுக்கு எளிதில் கிடைக்கும் வண்ணம் சந்தைப்படுத்துவது மிகவும் அவசியமான ஒன்றாகும்.

கத்தரிக் காய்ப்புழுவினைத் தாக்கும் பிரதான ஒட்டுண்ணி
கத்தரிக் காய்ப்புழுவினைத் தாக்கும் பிரதான ஒட்டுண்ணி


இந்தியாவில் சிறியதும் பெரியதுமாகப் பத்து கம்பெனிகள்வரை கத்திரிக் காய்ப்புழுவிற்கான இனக்கவர்ச்சிக் குப்பிகளையும், பொறிகளையும் 2005-ம் ஆண்டுச் சந்தைக்குக் கொண்டுவந்தன. விவசாயிகளுக்கு இந்தத் தொழில்நுட்பம் குறைந்த விலையில் கிடைக்க வேண்டும் என்பதற்காக, அந்த கம்பெனிகளுடன் இந்தத் தொழில்நுட்பத்தை இலவசமாகவே பகிர்ந்துகொண்டோம். ஆனால், தென்னிந்தியாவில் இந்தத் தொழில்நுட்பம் பெரிய அளவில் அறிமுகப்படுத்தப்படவில்லை.

வங்கதேசத்திலோ இந்தியாவினைப் போன்ற சூழல் அப்போது இல்லை. விவசாயிகளிடம் பெரும் வரவேற்பைப் பெற்ற இந்தத் தொழில்நுட்பம் (இருக்காதா பின்னே, நூற்றுக்கணக்கான முறை பூச்சிக்கொல்லிகளைத் தெளித்தவர்கள் இப்போது மிகச்சில முறைகளே பூச்சிக்கொல்லிகளை நாடவேண்டிய சூழலுக்கு வந்திருந்தனர்), சந்தைக்கு வருவதில் பெரும் சிக்கல் இருந்தது. வங்கதேசத்தில் அப்போது புதிய பூச்சிக்கொல்லிகளைச் சந்தைக்குக் கொண்டுவருவதில் தெளிவான சட்டங்களும், நடைமுறைகளும் இருந்தன. ஆனால், இனக்கவர்ச்சிப் பொறிகள் உள்ளிட்ட உயிரியல் பூச்சிக்கட்டுப்பாட்டுத் தொழில்நுட்பங்களைச் சந்தைக்குக் கொண்டு வருவதற்கான சட்டங்களோ, நடைமுறைகளோ இல்லை. எனவே, எங்களது ஆய்வுத் திட்டம் முடிவிற்கு வந்தபிறகு விவசாயிகளுக்கு இந்தத் தொழில்நுட்பம் கிடைக்காமல் போனது.

குழப்பத்தால் கலவி புரியாத ஆண் அந்துப்பூச்சி
குழப்பத்தால் கலவி புரியாத ஆண் அந்துப்பூச்சி


ஆனால், ருசிகண்ட பூனைகளாய் மாறிப்போன கத்திரி விவசாயிகள், இந்தத் தொழில்நுட்பம் தங்களுக்கு வேண்டுமென ஒற்றைக் காலில் நின்றனர். மிகப்பெரிய வாக்கு வங்கியான விவசாயிகளை, வங்கதேசத்தின் எந்த அரசும் புறக்கணிக்க முடியாது. எனவே, உடனடியாக உயிரியல் பூச்சிக் கட்டுப்பாட்டுத் தொழில்நுட்பங்களைச் சந்தைப்படுத்த தேவையான நடைமுறைகளை உருவாக்கவும், அதற்கான சட்டம் இயற்றவும் வல்லுநர் குழுக்கள் அமைக்கப்பட்டன. ஆனால், வங்கதேசம் உள்ளிட்ட தெற்காசியாவின் பல நாடுகளும் காலனி ஏகாதிபத்திய காலத்து நடைமுறைகளையே இன்னும் பின்பற்றி வருவதால், இந்தச் சட்டம் இயற்றப்பட்டு நடைமுறைக்கு வருவதற்கு ஒருசில ஆண்டுகளாவது ஆகுமே? அதுவரை, விவசாயிகளின் கோரிக்கைக்கு என்ன தீர்வு?

மிகவும் யோசித்த அன்றைய வங்கதேச அரசு, இந்தத் தொழில்நுட்பத்திற்காக வருடத்திற்குச் சில கோடிகளைத் தனது விவசாயப் பட்ஜெட்டில் ஒதுக்கியது. அந்தப் பணத்தை அப்படியே வங்கதேச வேளாண்மை ஆராய்ச்சி நிறுவனத்திற்கு (Bangladesh Agricultural Research Institute) கைமாற்றிக் கொடுத்தது. அந்நிறுவனமும், இரண்டு மூன்று தனியார் நிறுவனங்களிடம் கத்திரிக் காய்ப்புழுவின் இனப்பெருக்கத் தூதுவேதி குப்பிகளையும், இனக்கவர்ச்சிப் பொறிகளையும் உருவாக்கித் தர ஒப்பந்தம் போட்டுக்கொண்டது. அவ்வாறு பெறப்பட்ட இனப்பெருக்கத் தூதுவேதி குப்பிகளும், பொறிகளும் வேளாண் விரிவாக்கத் துறையின் மூலமாகக் கத்திரி விவசாயிகளுக்கு வழங்கப்பட்டு வந்தது. இதன் மூலம் விவசாயிகளின் தொழில்நுட்ப தேவை முழுமையாகப் பூர்த்திச் செய்யப்படாவிடினும், இந்தத் தொழில்நுட்பம் அடுத்த சில ஆண்டுகளுக்கு உயிர்ப்புடன் இருந்தது.

இறுதியாக நாடாளுமன்றத்தில் சட்டம் நிறைவேற்றப்பட்டு, உயிரியல் பூச்சிக் கட்டுப்பாட்டுத் தொழில்நுட்பங்களைச் சந்தைப்படுத்துவதற்கான நடைமுறைகள் வங்கதேசத்தில் 2009-ம் ஆண்டில் செயல்பாட்டிற்கு வந்தன. அதற்கான அடிப்படை விதையை வங்கதேசத்தில் ஊன்றியது, கத்திரிக் காய்ப்புழுவின் இனக்கவர்ச்சிப் பொறி தொழில்நுட்பமே. உடனடியாக, அரசுக்கு இந்தத் தொழில்நுட்பத்தைத் தயாரித்து வழங்கிய மூன்று கம்பெனிகளும் முறைப்படி அனுமதி பெற்று, இந்தத் தொழில்நுட்பத்தை வெளிச்சந்தையில் விற்க ஆரம்பித்தன. அடுத்த ஐந்து ஆண்டுகளில், வங்கதேசத்தில் உயிரியல் பூச்சிக்கொல்லிகளின் பயன்பாடு ஒன்றரை லட்சம் ஏக்கருக்குப் பரவியது. சுமார் 65 விதமான உயிரியல் பூச்சிக்கொல்லிகளும், இனக்கவர்ச்சிப் பொறிகளும் சந்தைக்கு வந்தன. 2008-ம் ஆண்டு உச்சம் தொட்ட பூச்சிக்கொல்லிகளின் விற்பனை, கடந்த பத்து ஆண்டுகளுக்கும் மேலாகத் தொடர்ந்து சரிவிலேயே இருக்கிறது என்றால், நம்ப முடிகின்றதா? வங்கதேசத்தில் கத்திரிக் காய்ப்புழு இனக்கவர்ச்சிப் பொறி தொழில்நுட்பத்தைப் பிரபலமாக்கியவர்களில் முக்கியமானவர் முனைவர் சையத் நூருல் ஆலம் ஆவார். வங்கதேசத்தால் செய்ய முடிந்ததை, இந்தப் பிராந்தியத்தில் உள்ள எந்தவொரு நாடுமே செய்ய இயலும். அதற்கு, அரசும், ஆராய்ச்சியாளர்களும், தனியார் நிறுவனங்களும், விவசாயிகளும் ஒருங்கிணைந்து செயல்பட வேண்டும்.

வங்கதேசத்தில் கத்திரிக் காய்ப்புழு இனக்கவர்ச்சிப் பொறி தொழில்நுட்பத்தைப் பிரபலமாக்கிய முனைவர். சையத் நூருல் ஆலம்
வங்கதேசத்தில் கத்திரிக் காய்ப்புழு இனக்கவர்ச்சிப் பொறி தொழில்நுட்பத்தைப் பிரபலமாக்கிய முனைவர். சையத் நூருல் ஆலம்


கத்திரிக் காய்ப்புழுவினைக் கட்டுப்படுத்துவதில் இனக்கவர்ச்சிப் பொறிகளே பிரதானமானவை என்று பார்த்தோம் அல்லவா? அதில் ஒரு சமீபத்திய வரவு - கவர்ந்து அழிக்கும் பொறிகளுக்குப் பதிலாக, குழப்பி அழிக்கும் பொறிகள் வந்துள்ளன. அதைப் பற்றியும் சற்று விரிவாகத் தெரிந்துகொள்வது நல்லது. ஏனெனில் இந்தத் தொழில்நுட்பம் வேறுபல பூச்சிகளுக்கும் அடுத்த சில ஆண்டுகளில் அறிமுகம் ஆகும் வாய்ப்புள்ளது.

பொதுவாகவே இனக்கவர்ச்சிப் பொறிகளில் பயன்படுத்தப்படும் தூதுவேதிகள் ஒரேயொரு வேதிப்பொருள் அல்ல. அது, இரண்டு அல்லது மூன்று வேதிப்பொருள்களை உள்ளடக்கிய ஒரு கலவை ஆகும். அந்த இரண்டு அல்லது மூன்று வேதிப்பொருள்களும் ஒரு குறிப்பிட்ட விகிதத்தில் இருந்தால் மட்டுமே, அந்தக் கலவை ஆண் அந்துப்பூச்சிகளைக் கவரும். ஏனெனில் அது இயற்கையாகப் பெண் அந்துப் பூச்சிகளால் சுரக்கப்படும் தூதுவேதிக் கலவையை ஒத்திருக்கும். எனவே, நாம் அவற்றைக் குப்பிகளுக்குள் அடைத்து, பொறிகளுக்குள் வைத்துவிட்டால், அங்கே பெண்பூச்சி இருப்பதாக நம்பி வரும் ஆண் அந்துப் பூச்சிகள், பொறிகளில் சிக்குண்டு, மீண்டும் வெளியேற இயலாமல் இறந்துவிடும். அந்த விகிதாச்சாரம் மாறுபட்டுவிட்டால், அந்த இனக்கவர்ச்சி குப்பி வெறும் குப்பையைப் போன்றதே.

ஆனால், சமீப காலங்களில் விஞ்ஞானிகள் குப்பையான குப்பிகளிலும் ஒரு பயன் இருப்பதைக் கண்டுகொண்டனர். அதாவது தூதுவேதிகளில் இருக்கும் ஒரேயொரு பிரதான வேதிப்பொருளை மட்டும் எடுத்துக் குப்பிகளில் அடைத்து வயல்வெளிகளில் வைத்துவிட்டால், அது ஆண் அந்துப் பூச்சிகளைக் குழப்பம் அடையச் செய்கிறது. அதைச் சற்றே உங்களுக்குப் புரியும்படி சொல்கின்றேன்.

கத்திரியில் காய்ப்புழுத் தாக்குதல்
கத்திரியில் காய்ப்புழுத் தாக்குதல்
கத்திரியில் காய்ப்புழுத் தாக்குதல்
கத்திரியில் காய்ப்புழுத் தாக்குதல்
கத்திரியில் காய்ப்புழுத் தாக்குதல்
கத்திரியில் காய்ப்புழுத் தாக்குதல்


நாம் குடிக்கின்ற காபியை உருவாக்கும்போது, ஒரு டம்ளர் தண்ணீரில் எவ்வளவு காபித்தூள், எவ்வளவு பால், எவ்வளவு சர்க்கரை என்று ஓர் அளவு வைத்திருப்போம். அதன்படி தயாரித்தால் மட்டுமே, காபி நமக்குப் பிடித்தமான நிறம், சுவை, மணம் ஆகியவற்றைக் கொண்டிருக்கும். இப்போது, நாம் காபிக்குப் பயன்படுத்தும் ஏதோ ஒரு பொருள் இல்லையென்றாலும் காபி, காபியாகவே இருக்காது; அதைக் குடிக்கவும் இயலாது. அப்படியே குடித்தாலும், நமக்குக் காபி குடித்த மனநிறைவோ, புத்துணர்ச்சியோ கிடைக்காது. அதேதான் கத்திரிக் காய்ப்புழுவின் ஆண் அந்துப் பூச்சிகளுக்கும் நடக்கும். மூன்று வேதிப்பொருள்கள் இருக்க வேண்டிய இனக்கவர்ச்சிப் பொறிகளில், இப்போது ஒன்றே ஒன்று மட்டும்தான் இருக்கிறது. அதாவது, பால் மற்றும் சர்க்கரை இல்லாத காபியைப்போல. நாம்கூடக் கொஞ்சம் அனுசரித்து, சர்க்கரை இல்லாத கடுங்காப்பியைக் குடித்துவிடுவோம். ஆனால், பூச்சிகள் அப்படி அல்ல. முழுமை பெறாத தூதுவேதிகள் அவற்றைக் கொஞ்சம்கூடக் கவராது. ஆனால், அதே நேரத்தில் ஒருவித புதிய குழப்பத்தையும் உருவாக்கிவிடும்.

தான் வழக்கமாகச் சுவாசிக்கும் நறுமணத்தை அவற்றால் நுகர இயலாது. ஆனால், அதே நேரத்தில் தனக்குப் பரிச்சயமான நறுமணத்திற்கு மிக நெருக்கமான ஏதோவொன்று அங்கே இருப்பதாகவும் படுகிறது. மிகுந்த மனக்குழப்பத்திற்கு ஆளாகும் ஆண் அந்துப் பூச்சிகள், பெண்பூச்சிகளைத் தேடவும் செய்யாது; கலவியில் ஆர்வமும் காட்டாது. விளைவு? கலவி புரியாத பெண்பூச்சிகள், கருவுறாத முட்டைகளை இட வேண்டிய நிர்பந்தம். முடிவில், அடுத்தடுத்த தலைமுறைகள் உருவாவது குறைந்து, கத்திரியில் காய்ப்புழுவின் சேதம் முற்றிலும் குறைந்துவிடும். இந்தியா உள்ளிட்ட பல்வேறு ஆசிய நாடுகளில், வயல்வெளி ஆய்வுகள் மேற்கொண்டதில், இந்தப் புதிய உத்தி, நல்ல பலனைக் கொடுப்பதாக விஞ்ஞானிகள் கண்டுபிடித்துள்ளனர். மூன்று வேதிப்பொருள்களுக்குப் பதிலாக, ஒரேயொரு வேதிப்பொருள் மட்டுமே பயன்படுத்தப்படுவதால் அதன் விலையும் இனக்கவர்ச்சிப் பொறிகளைவிடக் குறைவாகவே இருக்கும். எனவே, இந்தத் தொழில்நுட்பமும் விரைவில் கத்திரி விவசாயிகளுக்குக் கைகொடுக்கும்.

முனைவர் சீனிவாசன் ராமசாமி
முனைவர் சீனிவாசன் ராமசாமி


புதுப்புது மற்றும் உன்னத வேளாண் தொழில்நுட்பங்கள் ஆசியா, அமெரிக்கா, ஐரோப்பா கண்டங்களில் மட்டுமே உருவாவதில்லை. அவை, ஆப்ரிக்கா கண்டத்திலும் உருவாகி, அங்கிருக்கும் விவசாயிகளின் வாழ்வினில் மிகப்பெரும் மாற்றங்களை உருவாக்கியிருக்கிறது. கென்யா போன்ற கிழக்கு ஆப்பிரிக்கா நாடுகளில் உற்பத்தி செய்யப்பட்டு, ஐரோப்பிய ஒன்றியத்திற்கு ஏற்றுமதி செய்யப்படும் பீன்ஸ் பயிரில் அப்படிச் செயல்படுத்தப்பட்ட ஓர் உன்னதத் தொழில்நுட்பத்தைப் பற்றி அடுத்த கட்டுரையில் சொல்கின்றேன்.

-வளரும்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism