Published:Updated:

தமிழ்நாட்டில் ஹைட்ரோ கார்பன் அபாயம்... மூடி மறைக்கும் மத்திய அரசு!

ஹைட்ரோ கார்பன்
பிரீமியம் ஸ்டோரி
ஹைட்ரோ கார்பன்

எச்சரிக்கை

தமிழ்நாட்டில் ஹைட்ரோ கார்பன் அபாயம்... மூடி மறைக்கும் மத்திய அரசு!

எச்சரிக்கை

Published:Updated:
ஹைட்ரோ கார்பன்
பிரீமியம் ஸ்டோரி
ஹைட்ரோ கார்பன்

க்களின் வாழ்வாதாரங்களைக் கடுமையாகப் பாதிக்கக்கூடிய ஹைட்ரோ கார்பன் திட்டம் இன்றளவும் தமிழக மக்களை அச்சுறுத்திக்கொண்டேதான் இருக்கிறது. தஞ்சாவூர் மாவட்டம், கதிராமங் கலம் மற்றும் புதுக்கோட்டை மாவட்டம் நெடுவாசல் உள்ளிட்ட பகுதிகளில் மத்திய அரசு இத்திட்டத்தை நிறைவேற்ற முயன்றபோது, இப்பகுதி மக்களின் அப்பணிப்புமிக்கத் தொடர் போராட்டங்களால் இத்திட்டம் தடுத்து நிறுத்தப்பட்டது. ஆனாலும்கூட மக்களால் குறிப்பாக, விவசாயிகளால் நிம்மதியாக இருக்க முடியவில்லை. காரணம் ஹைட்ரோ கார்பன் திட்டத்தைத் தமிழ்நாட்டில் நிறைவேற்ற மத்திய அரசு, தொடர்ந்து முயன்று வருகிறது.

இந்நிலையில் கடந்த ஆகஸ்ட் 2-ம் தேதி நாடாளுமன்ற உறுப்பினர் கனிமொழி, மக்களவையில் இது தொடர்பாக எழுப்பிய கேள்விக்கு, மத்திய பெட்ரோலியத்துறை இணையமைச்சர் ரமேஷ்வர் தெலி அளித்துள்ள பதில் சுற்றுச்சூழல் ஆர்வலர்களை ஆதங்கத்திலும் அச்சத்திலும் ஆழ்த்தியுள்ளது.

இதுகுறித்து நம்மிடம் பேசிய மீத்தேன் திட்ட எதிர்ப்புக் கூட்டமைப்பின் தலைமை ஒருங்கிணைப்பாளர் பேராசிரியர் ஜெயராமன், ‘‘தமிழக அரசு கேட்டுக் கொண்டதற்கு இணங்க, தமிழ்நாட்டில் பாதுகாக்கப்பட்ட வேளாண் மண்டலப் பகுதியில் ஹைட்ரோ கார்பன் எடுப்பதற்கான ஏலத்தைக் கைவிடுவது பற்றி ஒன்றிய அரசு பரிசீலித்ததா? பரிசீலிக்கப்பட்டிருந்தால் அதுகுறித்த விவரங்கள் இல்லையெனில் அதற்கான காரணங்கள் மற்றும் பாது காக்கப்பட்ட வேளாண் மண்டலச் சட்டம்-2020 தடை செய்துள்ள பகுதியில் ஹைட்ரோ கார்பன் எடுக்க உள்ள சட்டபூர்வ அடிப்படை ஆகியவை குறித்து மத்திய பெட்ரோலிய அமைச்சகம் விளக்கம் அளிக்க வேண்டும்’ என நாடாளுமன்ற உறுப்பினர் கனிமொழி கோரியிருந்தார்.

ஜெயராமன்
ஜெயராமன்


இதற்குப் பதில் அளித்த மத்திய பெட்ரோலிய இணையமைச்சர் ரமேஷ்வர் தெலி, ‘பாதுகாக்கப்பட்ட வேளாண் மண்டலப் பகுதியில் ஹைட்ரோகார்பன் பிரித்தெடுக்கும் வேலை நடைபெறவில்லை’ என்று தெரிவித்துள்ளார்.

புதுக்கோட்டை மாவட்டம், கறம்பக்குடி வட்டம், கருக்காகுறிச்சி அருகே வடதெரு கிராமம் மற்றும் ராமநாதபுரத்தில் ஹைட்ரோ கார்பன் கிணறுகள் அமைக்கும் திட்டத்துக் காகக் கண்டுபிடிக்கப்பட்ட சிறிய வயல்கள் (Discovered Small Fields) மூன்றாவது சுற்று ஏலத்துக்கான பட்டியலில் சேர்க்கப் பட்டுள்ளது. இதை எதிர்த்துக் குரல் எழுப்பினோம். பட்டியலிலிருந்து வட தெரு, ராமநாதபுரம் நீக்கப்பட வேண்டும் என்பது தான் நம்முடைய கோரிக்கை. அவை நீக்கப்பட்டுவிட்டன என்ற பதிலைத்தான் பெட்ரோலியத் துறையிடமிருந்து நாங்கள் எதிர்பார்த்துக் கொண்டிருக்கிறோம். ஆனால், ‘பாதுகாக்கப்பட்ட வேளாண் மண்டலப் பகுதியில் ஹைட்ரோகார்பன் பிரித்தெடுக்கும் வேலை நடைபெறவில்லை’ என்கிறார் அமைச்சர். இது தெளிவான பதில் அல்ல.

மத்திய அரசின் நயவஞ்சகம் இந்த விளக்கத்தில் மறைந்திருந்து அச்சமூட்டுகிறது. மத்திய அமைச்சர் அளித்துள்ள விளக்கத்தில், ‘இந்திய அரசால் கண்டுபிடிக்கப்பட்ட சிறிய எண்ணெய் வயல்களில் மூன்றாம் ஏலத்தை 2021 ஜூன் 10 அன்று தொடங்கியது. இது இந்தியா முழுவதும் 75 வயல்களை உள்ளடக்கிய 3,204 ச.கி.மீ பகுதியை உள்ளடக்கியது. தமிழ்நாட்டில் புதுக்கோட்டை மற்றும் ராமநாதபுரம் மாவட்டங்களைச் சேர்ந்த பெட்ரோலிய சுரங்கக் குத்தகை இரண்டு பகுதிகளைக் கொண்ட ஒப்பந்தப் பகுதியாகும். இவற்றுக்கான பெட்ரோலிய சுரங்கக் குத்தகை என்பது 2007 டிசம்பர் மற்றும் 2012 நவம்பரில் முறையே வழங்கப்பட்டன. நிலப்பரப்பில் இவற்றைச் செய்ய, எண்ணெய் வயல்கள் (ஒழுங்குபடுத்தல் மற்றும் மேம்படுத்தல்) சட்டம்-1948 மற்றும் பெட்ரோலியம் மற்றும் இயற்கை வாயு விதிமுறைகள்-1959-ன் கீழும் அனுமதி வழங்கப்படுகிறது.

ஹைட்ரோ கார்பன்
ஹைட்ரோ கார்பன்



பெட்ரோலியம் ஆய்வு உரிமம், பெட்ரோலிய சுரங்கக் குத்தகை ஆகியவை மாநில அரசால் வழங்கப்படுகின்றன. தற்போது ஹைட்ரோ கார்பன் எடுப்பு என்பது நிகழவில்லை’ எனத் தெரிவித்துள்ளார். தமிழ்நாட்டில் இதுவரை எந்த ஹைட்ரோ கார்பன் திட்டமும் செயல்படுத்தப்படவில்லை என்று அமைச்சர் ரமேஷ்வர் கூறியிருக்கிறார். ஆனால், இனி எந்த எண்ணெய்க் கிணறு அமைத்தாலும் அது ஹைட்ரோகார்பன் கிணறுதான் என்று 2018 ஆகஸ்ட் மாதம் தனது கொள்கை முடிவை ஒன்றிய அரசு அறிவித்துவிட்டது. ஆகவே, இனி கனரக எந்திரங்களைத் தூக்கிக்கொண்டு எந்த நிறுவனம் வந்தாலும் அது ஹைட்ரோ கார்பன் எண்ணெய்க் கிணறு அமைக்கத் தான் என்பது சொல்லாமலே புரியும்.

டி.எஸ்.எஃப் (DSF) என்று சொல்லப்படும் சிறிய அளவிலான அடையாளம் காணப்பட்ட எண்ணெய் வயல்கள் முதல் ஏலத்தில் நெடுவாசலை உள்ளடக்கி, 2017 பிப்ரவரி மாதம் இந்திய பெட்ரோலிய அமைச்சகம் ஏலத்தை அறிவித்தபோது, மீத்தேன் திட்ட எதிர்ப்புக் கூட்டமைப்பு உடனடியாகத் தீவிரப் போராட்டத்தை நடத்தியது. இரண்டாவது ஏலம் 2018-ல் நடத்தப்பட்டது. மூன்றாவது ஏலத்துக்கு, 2021 ஜூன் 10-ம் தேதி ஏல அறிவிப்பு வெளியானது. ஜூன் 30 அளவில் எண்ணெய் நிறுவனங்களுடன் பேச்சு வார்த்தை நடக்க இருப்பதாகவும் பெட்ரோலியத்துறை அறிவிப்பை வெளி யிட்டது.

தமிழ்நாட்டில் எந்தப் பகுதியையும் ஏலத்துக்குக் கொண்டு வராதே என்று கோரிக்கை வைத்தோம். அதுகுறித்து இந்திய ஒன்றிய அமைச்சர் ரமேஷ்வர் தெளிவான பதிலை அளிக்கவில்லை.

ஹைட்ரோ கார்பன் திட்டங்கள் எந்தச் சட்டங்களின் அடிப்படையில் செய்யப் படுகிறது என்பது பற்றிச் சட்டங்களின் பெயர்களைக் குறிப்பிட்டுப் பேசும் அமைச்சர், பாதுகாக்கப்பட்ட வேளாண் மண்டலச் சட்டம் இயற்றிய பிறகு, அம்மண்டலப் பகுதியில் ஹைட்ரோகார்பன் திட்டத்துக்கு ஏலம் விட முடியுமா, முடியாதா? என்பது குறித்து நேர்மையாகப் பதிலளிக்கவில்லை. பாதுகாக்கப்பட்ட வேளாண் மண்டலம் என்று அறிவிக்கப்பட்ட பிறகும், அதுசம்பந்தமாகச் சட்டம் இயற்றப்பட்ட பிறகும், அதற்கு உட்பட்ட பகுதிகளில் எண்ணெய் எடுப்புத் திட்டங் களுக்கு ஏலம் விடுவது தமிழ்நாட்டை அவமதிப்பதாகும்.

ரமேஷ்வர் தெலி
ரமேஷ்வர் தெலி



அடுத்து, இது போன்ற திட்டங்களை ஒரு காலத்திலும் அனுமதிக்க மாட்டோம் என்று தமிழக அரசு அறிவித்தபிறகு, அரியலூர் மாவட்டத்தில் 10 ஹைட்ரோகார்பன் கிணறுகள், கடலூர் மாவட்டத்தில் 5 கிணறுகள் அமைக்க ஓ.என்.ஜி.சி விண்ணப்பம் கொடுத்தது. அந்த விண்ணப்பம் தமிழக அரசால் நிராகரிக்கப்பட்டது. இனி அமைக்க இருக்கிற அத்தனை கிணறுகளும் ஹைட்ரோகார்பன் கிணறுகள்தான் என்று 2018-ல் பெட்ரோலியத் துறை முடிவெடுத்த பிறகு, அரியலூரிலும் கடலூரிலும் கிணறுகள் அமைக்க ஓ.என்.ஜி.சி விண்ணப்பத்தைக் கொடுத்தது. அவை ஹைட்ரோகார்பன் கிணறுகள்தான். அவை ஷேல் (Shale) மீத்தேன் கிணறுகள் ஆகும், தமிழ் நாட்டின் பாதுகாக்கப்பட்ட வேளாண் மண்டலம் மேம்பாட்டுச் சட்டம்-2020-ஐ ஓ.என்.ஜி.சி எள்ளி நகையாடுகிறதா?

தமிழ்நாட்டின் நாடாளுமன்ற உறுப்பினர் கேட்ட கேள்விக்கு ஒன்றிய அமைச்சர் ரமேஷ்வர் உரிய பதிலைத் தரவில்லை. சுற்றி வளைத்துத் தேவையற்ற பதிலைத் தந்திருக்கிறார். நாம் எச்சரிக்கையாக இருக்க வேண்டிய நேரம் இது. எம்.பி கனிமொழியும், மற்ற எம்.பி-க்களும் இது தொடர்பாக மேலும் சில கூடுதல் கேள்விகளை அழுத்தம் திருத்தமாகக் கேட்டு, மத்திய பெட்ரோலிய அமைச்சகத்தின் பொய்யை அம்பலப்படுத்த வேண்டும்’’ என்றார் அழுத்தமாக.