Published:Updated:

ஹைட்ரோ கார்பன் திட்டத்தால் என்னென்ன பாதிப்புகள் ஏற்படும்? - நம்பிக்கை அளிக்கும் ஆய்வுக்குழு!

ஹைட்ரோ கார்பன்
பிரீமியம் ஸ்டோரி
ஹைட்ரோ கார்பன்

அடுத்தகட்டம்

ஹைட்ரோ கார்பன் திட்டத்தால் என்னென்ன பாதிப்புகள் ஏற்படும்? - நம்பிக்கை அளிக்கும் ஆய்வுக்குழு!

அடுத்தகட்டம்

Published:Updated:
ஹைட்ரோ கார்பன்
பிரீமியம் ஸ்டோரி
ஹைட்ரோ கார்பன்

விவசாயிகளின் வாழ்வாதாரத்தைப் பாதிக்கக்கூடிய மிகவும் ஆபத்தான திட்டங்களான மீத்தேன், ஷேல் கேஸ், ஹைட்ரோ கார்பன் என எண்ணெய் - எரிவாயு திட்டங்கள் காவிரி டெல்டாவைத் தொடர்ந்து அச்சுறுத்திக்கொண்டே இருக்கின்றன. இந்நிலையில், இப்பகுதி மக்களின் தொடர் போராட்டங்களின் விளைவாகக் கடந்த ஆண்டு காவிரி டெல்டா மாவட்டங்களைப் பாதுகாக்கப்பட்ட வேளாண் மண்டலமாக அறிவித்து, சட்டம் இயற்றியது அ.தி.மு.க தலைமையிலான அன்றைய தமிழக அரசு.இது மட்டும் போதாது, தமிழ்நாட்டின் மற்ற பகுதிகளையும் ஹைட்ரோ கார்பன் திட்டங் களின் பேராபத்துகளிலிருந்து பாதுகாக்க வேண்டும் என விவசாயிகள், சுற்றுச்சூழல் ஆர்வலர்கள் கோரிக்கை எழுப்பி வந்தார்கள். இந்நிலையில் இத்திட்டம் செயல்படுத்தப் பட்டால், என்னென்ன பாதிப்புகள் ஏற்படும் என்பதை ஆராய, மாநில வளர்ச்சிக் கொள்கைக் குழு உறுப்பினர், பேராசிரியர் சுல்தான் அகமது இஸ்மாயில் தலைமையில் ஆய்வுக்குழுவை அமைத்துள்ளது தி.மு.க தலைமையிலான இன்றைய தமிழக அரசு.

பேராசிரியர் ஜெயராமன்
பேராசிரியர் ஜெயராமன்


இதுகுறித்து நம்மிடம் பேசிய மீத்தேன் திட்ட எதிர்ப்புக் கூட்டமைப்பின் தலைமை ஒருங்கிணைப்பாளர் பேராசிரியர் ஜெயராமன், ‘‘ஹைட்ரோ கார்பன் திட்டங் களால் ஏற்பட்ட, ஏற்படக்கூடிய விளைவுகள் குறித்து ஆய்வு செய்வதற்குத் தமிழ்நாடு அரசு உயர்மட்ட தொழில்நுட்ப வல்லுநர் குழுவை அமைத்து, அதற்கான நோக்கங்களையும் பொறுப்புகளையும் வரையறுத்துள்ளது. இதை நாங்கள் வரவேற்கிறோம். உரிய காலத்தில் எடுக்கப்பட்ட இந்த நடவடிக் கையை மனதாரப் பாராட்டுகிறோம்.

தமிழ்நாடு அரசு விவசாயத்தையும் மண்ணையும் பாதுகாப்பதற்கான நடவடிக்கைகளைத் தொடர்ந்து எடுத்து வருகிறது. அரியலூர் மாவட்டத்தில் 10 ஹைட்ரோகார்பன் கிணறுகள் மற்றும் கடலூர் மாவட்டத்தில் 5 கிணறுகள் அமைக்க ஓ.என்.ஜி.சி அனுமதி கோரியபோது, அதைத் தமிழ்நாடு அரசு நிராகரித்தது. மேலும், தமிழ்நாடு முழுவதுமே எண்ணெய் - எரிவாயுக் கிணறுகள் அமைக்க அனுமதி இல்லை என்று அறிவித்தது. தொடர்ந்து வேளாண்மையைப் பாதுகாக்கும் வகையில் தமிழ்நாட்டில் முதன்முறையாக வேளாண்மை நிதிநிலை அறிக்கை தாக்கல் செய்யப்பட்டது. தொடர்ந்து இப்போது ஹைட்ரோகார்பன் விளைவுகள் குறித்து ஆய்வு செய்ய ஏழு பேர் கொண்ட உயர்மட்ட தொழில்நுட்ப வல்லுநர் குழு அமைக்கப் பட்டுள்ளது.

2020-ம் ஆண்டு பிப்ரவரி 21-ம் தேதி, தமிழ்நாடு பாதுகாக்கப்பட்ட வேளாண் மண்டல மேம்பாட்டுச் சட்டம் - 2020 செயல் பாட்டுக்கு வந்தது. ஆனால், பாதுகாக்கப்பட்ட வேளாண் மண்டலம் வரம்புக்குள் முழுக் காவிரிப்படுகையும் கொண்டுவரப் பட வில்லை. மேலும், பழைய எண்ணெய் எரிவாயுத் திட்டங்கள் நடைபெறுவதை அச்சட்டம் தடுக்கவில்லை. இதுகுறித்துக் கவலை தெரிவித்து வந்தோம்.

ஹைட்ரோ கார்பன்
ஹைட்ரோ கார்பன்


இந்நிலையில்தான் பாதுகாக்கப்பட்ட வேளாண் மண்டலத்துக்கு வெளியிலுள்ள நிலப்பரப்புகளில் ஹைட்ரோகார்பன் திட்டத்தால் ஏற்படக்கூடிய விளைவுகள் குறித்து ஆய்வு செய்யத் தொழில்நுட்ப வல்லுநர் குழு அமைக்கப்பட்டுள்ளது. இதன் நோக்கமும் பொறுப்புகளும் வரையறுக் கப்பட்டுள்ளன. நீரியல் விரிசல் உள்ளிட்ட எண்ணெய்க் கிணறு துரப்பணத் தொழில்நுட்பத்தால் ஏற்பட்ட பாதிப்புகள், ரசாயன பயன்பாட்டால் ஏற்படும் பாதிப்புகள், நிலக்கரி படுகை மீத்தேன், ஷேல் மீத்தேன் உள்ளிட்ட ஹைட்ரோகார்பன் திட்டங்களுக்குத் தேவைப்படும் நிலத்தடி நீரின் அளவு, இத்திட்டங்கள் செயல் படுத்தப்பட்டால் நிலத்தின் மட்டம் கீழிறங்கித் தாழ்ந்து போகுமா, நிலத்தடித் தட்டுகள் இடம்பெயர்ந்து நகருமா மற்றும் மக்களின் வாழ் வாதாரங்கள் எப்படிப் பாதிக்கப்படும், தமிழ்நாட்டின் உணவு உறுதிப்பாடு எந்த அளவில் பாதிப்புக்குள்ளாகும்? போன்ற ஆய்வு நோக்கங்களும், பொறுப்பு களும் குழுவுக்கு அளிக்கப்பட்டுள்ளன.

குறிப்பாக, ஹைட்ரோகார்பன் திட்டங்கள், ஆய்வுக் கிணறுகள் மற்றும் சுரங்கப் பணிகள் ஏற்படுத்தும் விளைவுகள் குறித்து ஆய்வு செய்ய இருக்கிறது. மண்ணையும் மக்களையும் பாதுகாப்பதில் இந்தக் குழுவின் அறிக்கை முக்கியப் பங்களிக்கும் என்று நம்புகிறோம். எந்த ஒரு திட்டத்தையும் தடைசெய்யச் சான்றாக ஓர் அறிவியல்பூர்வமான ஆய்வறிக்கை தேவை. ஆகவே, தமிழ்நாட்டை நாசம் செய்யும் எண்ணெய் - எரிவாயுத் திட்டங்களிலிருந்து மண்ணையும் நீரையும் பாதுகாக்க இக்குழுவின் அறிக்கை எதிர் காலத்தில் முக்கியப் பங்களிக்கும்.

2020-ம் ஆண்டு வேளாண் மண்டலச் சட்டத்தில் உள்ள குறைபாடுகளை இந்த ஆய்வறிக்கையின் மூலமாக நாம் நிவர்த்திச் செய்யலாம். 2020-ம் ஆண்டுச் சட்டம் காவிரிப்படுகையின் ஒரு பகுதியை மட்டுமே பாதுகாக்கப்பட்ட வேளாண் மண்டலமாக அறிவித்தது. இப்போது தமிழ்நாடு முழுவதுமே பாதுகாப்பதற்கான வாய்ப்பு ஏற்பட்டுள்ளது. தமிழ்நாட்டில் ஏற்கெனவே செயல் படுத்தப்பட்டு வரக்கூடிய எண்ணெய்-எரிவாயு கிணறுகளால், விவசாயிகளின் வாழ்வாதாரம் கடுமையாகப் பாதிக்கப்பட்டுள்ளதாக, எங்களைப் போன்றவர்கள் தொடர்ந்து குற்றம்சாட்டி வந்தோம். இது உண்மைதான் என்பது ஆய்வுக்குழுவின் விசாரணையில் அதிகாரபூர்வமாக உறுதி செய்யப்படும்’’ என நம்பிக்கை தெரிவித்தார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism