Published:Updated:

நபார்டு வங்கி அறிவிப்பு... உழவர் உற்பத்தியாளர் நிறுவனங்களுக்கு ரூ.45 லட்சம் நிதி உதவி!

நாட்டுநடப்பு
பிரீமியம் ஸ்டோரி
நாட்டுநடப்பு

நாட்டுநடப்பு

நபார்டு வங்கி அறிவிப்பு... உழவர் உற்பத்தியாளர் நிறுவனங்களுக்கு ரூ.45 லட்சம் நிதி உதவி!

நாட்டுநடப்பு

Published:Updated:
நாட்டுநடப்பு
பிரீமியம் ஸ்டோரி
நாட்டுநடப்பு

- ஆறுச்சாமி

தேசிய வேளாண்மை மற்றும் ஊரக மேம்பாட்டு வங்கியின் (நபார்டு) மண்டல அலுவலகம் சென்னை நுங்கம்பாக்கத்தில் உள்ளது. அண்மையில் இங்கு நடைபெற்ற பத்திரிகையாளர் சந்திப்பில் வங்கியின் தலைமைப் பொதுமேலாளர் செல்வராஜ் பேசும்போது,

‘‘நபார்டு வங்கியின் தமிழ்நாடு மண்டல அலுவலகத்தால் வழங்கப்பட்ட கடனுதவி முன் எப்போதும் இல்லாத உச்சபட்ச அளவாக, 2020-21-ம் ஆண்டில், ரூ.27,104 கோடியை எட்டியுள்ளது. இது சென்ற ஆண்டின், ரூ.14,458 கோடியைவிட 87 சத விகிதம் அதிகமாகும். ‘நிடா’ எனப்படும் ‘நபார்டு உள்கட்டமைப்பு மேம்பாட்டு உதவி நிதி’யிலிருந்து 2020-21-ல், முதல் முறையாகத் தமிழ்நாடு அரசு கடனுதவி பெற்றுள்ளது. பல்வேறு குடிநீர் மற்றும் நீர்ப்பாசனத் திட்டங்களுக்காக ரூ.2,347 கோடி, நீர்ப்பாசன உட்கட்டமைப்புகள் ஏற்படுத்துவதற்காக ரூ.4,184 கோடி உட்படத் தமிழக அரசுக்கு வழங்கப்பட்டுள்ள நிடா கடனுதவி மொத்தம் ரூ.6,531 கோடி ஆகும்.

பிரதம மந்திரியின் விவசாய நீர்ப்பாசன திட்டத்தின்படி ஒவ்வொரு துளியின் மூலமாக அதிக மகசூல் என்ற லட்சியத்தைச் செயல் படுத்துவதற்காக ‘சிறிய நீர்ப்பாசன திட்டங் களுக்கான நிதி’யிலிருந்து நபார்டு வங்கி ரூ.937 கோடி கடனுதவி வழங்கியுள்ளது. சேமிப்புக் கிடங்குகள் அமைப்பதற்காக வழங்கப்பட்டுள்ள நிதி உதவி ரூ.332 கோடி ஆகும். கடலூர், நாகப்பட்டினம் மற்றும் திருவள்ளூர் மாவட்டங்களில் மீன்பிடித் துறைமுகங்கள் அமைப்பதற்காக மீன்வள மேம்பாட்டு நிதியின் மூலமாக வழங்கப் பட்டுள்ள கடனுதவி ரூ.194 கோடி. மேலும், ரூ.13 கோடி, உணவுப் பதப்படுத்துதல் நிதியிலிருந்து வழங்கப்பட்டுள்ளது.

இவற்றைத் தவிர, தமிழ்நாடு பால் உற்பத்தியாளர் கூட்டுறவு இணையத்துக்கு ‘பால்வள உள்கட்டமைப்பு மேம்பாட்டு நிதி’ மூலமாக ரூ.303 கோடி அனுமதிக்கப் பட்டுள்ளது. ‘உணவு பதப்படுத்துதல் நிதி’யிலிருந்து தமிழ்நாட்டில் ஏழு இடங்களில் வேளாண் பதப்படுத்தும் மையங்கள் அமைப்பதற்காகத் தமிழக அரசுக்கு நிதி வழங்கப்பட்டுள்ளது.

பத்திரிகையாளர் சந்திப்பில் செல்வராஜ்
பத்திரிகையாளர் சந்திப்பில் செல்வராஜ்

தமிழ்நாடு வேளாண்மைப் பல்கலைக் கழகத்தின் மூலமாக மதுரையில் உள்ள வேளாண் கல்லூரி மற்றும் ஆராய்ச்சி மையத்தில் நபார்டு வங்கியின் ரூ. 15.32. கோடி இலவச நிதி (மானியம்) உதவியுடன் “மதுரை அக்ரி பிசினஸ் இன்குபேஷன் மையம்” தொடங்கப்பட்டு, மிகச் சிறப்பாகச் செயல்பட்டு வருகிறது. இம்மையத்தின் மூலமாக 80 உழவர் உற்பத்தியாளர் நிறுவனங்கள் உட்பட மொத்தம் 154 புதிய தொழில் முனைவோர் பயன்பெற்றுள்ளனர். பருவம் அல்லாத காலத்திலும் மல்லிகை விளைவித்தல், தரமான காய்கறிகளை உற்பத்தி செய்வதற்குரிய தாவர நலன் கண்காணிப்பு, காய்கறிகளை நீண்டநாள் பாதுகாக்க புறஊதா திட்டம் உள்ளிட்ட பல்வேறு விவசாயம் சார்ந்த திட்டங்களுக்குமாக ரூ.93 லட்சம் இலவச நிதிஉதவி வழங்கப்பட்டுள்ளது’’ என்றவர்

‘‘தமிழக அரசுக்கு இதுவரை வழங்கப்பட்ட கடன்கள் அனைத்தும் திரும்பப் பெறப் பட்டுள்ளன. கூட்டுறவு வங்கிகளில் விவசாயக் கடன்கள் ரத்துச் செய்யப்பட்டாலும், அதன் தொகையை முறையாகத் திருப்பிச் செலுத்துவோம் என அரசு உறுதி அளித்துள்ளது. எனவே, விவசாயக் கடன் ரத்தால் நபார்டு வங்கிக்கு எவ்விதச் சிக்கலும் இல்லை. அதேபோல, விவசாயக் கடன் தள்ளுபடி ஆனதால், வரும் ஆண்டில் கூட்டுறவு வங்கியில் விவசாயிகள் மீண்டும் அதிக அளவில் கடன் வாங்க வாய்ப்பு உள்ளது.

தற்போது தமிழகத்தில் 650 உழவர் உற்பத்தியாளர் நிறுவனங்கள் செயல்பட்டு வருகின்றன. இவற்றில் நபார்டு வங்கி மூலம் 310 நிறுவனங்கள் இயங்குகின்றன. இவர்களுக்குத் தொண்டு நிறுவனங்கள் உதவியுடன் ரூ.15 லட்சம் முதல் 25 லட்சம் வரை இலவச நிதி உதவி வழங்கப்பட்டது. தற்போது தேசிய அளவில் சிறந்த உழவர் உற்பத்தியாளர் நிறுவனங்களை தேர்வு செய்து ரூ.45 லட்சம் வரை இலவச நிதி உதவி வழங்கி, பிரத்யேக பயிற்சி அளிக்கவுள்ளோம்.

இன்னும் நான்கு ஆண்டுகளில் மத்திய அரசு நாடு முழுக்க 10,000 உழவர் உற்பத்தியாளர் நிறுவனங்களை உருவாக்கத் திட்டமிட்டுள்ளது.

தமிழ்நாட்டைப் பொறுத்தவரை பெரும்பாலான உழவர் உற்பத்தியாளர் நிறுவனங்கள் சிறப்பாகச் செயல்பட்டு வருகின்றன. சில நிறுவனங்களில் சிக்கல்கள் ஏற்படுகின்றன. அதையும் கண்காணித்து வருகிறோம். அந்தச் சிக்கல்களை நீக்கி திறம்படச் செயல்பட உரிய வழிகாட்டு தல்களையும் ஆலோசனை களையும் கொடுத்து வருகிறோம்’’ என்று சொல்லி முடித்தார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism