Published:Updated:

முன்னறிவிப்பு : தேங்காய் விலை ரூ. 14 கொப்பரை கிலோ ரூ.90

தேங்காய்
பிரீமியம் ஸ்டோரி
News
தேங்காய்

வர்த்தக மூலகங்களின்படி, தேங்காய் உற்பத்தி செய்யும் மாவட்டங்களின் உற்பத்தியை, முந்தைய பருவத்துடன் ஒப்பிடும்போது, இப்பருவத்தில் ஓரளவு குறைவாகவே உள்ளது.

தேங்காய் மற்றும் கொப்பரைக்கான விலை முன்னறிவிப்பு பற்றி தமிழ்நாடு வேளாண்மைப் பல்கலைக்கழகம் வெளியிட்டுள்ள முன்னறிவிப்பு இது.

உலக அளவில் தேங்காய் உற்பத்தி செய்யும் நாடுகளில் இந்தோனேஷியா, பிலிப்பைன்ஸுக்கு அடுத்து மூன்றாவது இடத்திலுள்ளது இந்தியா. இந்தியாவிலிருந்து ஐக்கிய அரபு நாடுகள், ஈரான் மற்றும் கத்தார் ஆகிய நாடுகளுக்கு அதிக அளவில் தேங்காய் ஏற்றுமதி செய்யப்படுகிறது. தேசிய தோட்டக்கலை வாரியத்தின் இரண்டாவது முன்கூட்டிய மதிப்பீட்டின்படி, 2019-20-ம் ஆண்டில், தேங்காய் 21.53 லட்சம் ஹெக்டேர் பரப்பளவில் பயிரிடப்பட்டு 146.95 லட்சம் டன் உற்பத்தி செய்யப்படுவதாகக் குறிப்பிடப்பட்டுள்ளது.

தமிழ்நாட்டில், 2019-20-ம் ஆண்டில் 37.01 லட்சம் டன் தேங்காய் உற்பத்தி செய்யப்பட்டுள்ளது. கோயம்புத்தூர், திருப்பூர், தஞ்சாவூர், திண்டுக்கல் மற்றும் கன்னியாகுமரி ஆகியவை தேங்காய் உற்பத்தி செய்யும் முக்கிய மாவட்டங்களாகும்.

வர்த்தக மூலகங்களின்படி, தேங்காய் உற்பத்தி செய்யும் மாவட்டங்களின் உற்பத்தியை, முந்தைய பருவத்துடன் ஒப்பிடும்போது, இப்பருவத்தில் ஓரளவு குறைவாகவே உள்ளது. கோவிட்-19 தடை காரணமாக உணவு விடுதிகள், சுப நிகழ்ச்சிகள் மற்றும் விடுதிகளில் குறைந்தளவு தேவைகள் இருப்பினும், மக்களின் தேவைகளால் சில்லறை விலை மாறாமல் நிலையாக உள்ளது.

தேங்காய்
தேங்காய்

இச்சூழலில், விவசாயிகள் விற்பனை முடிவுகளை எடுக்க ஏதுவாகத் தமிழ்நாடு வேளாண்மைப் பல்கலைக்கழகத்தின் வேளாண் மற்றும் ஊரக மேம்பாட்டு ஆய்வு மையத்தில் இயங்கிவரும் தமிழ்நாடு பாசன விவசாய மேம்பாட்டுத் திட்டத்தின் விலை முன்னறிவிப்புத் திட்டம், கடந்த 10 ஆண்டுகளாக ஈரோட்டில் உள்ள அவல் பூந்துறை ஒழுங்குமுறை விற்பனைக் கூடத்தில் நிலவிய தேங்காய் மற்றும் கொப்பரை விலையினை ஆய்வு செய்தது. மேலும் பெருந்துறை வேளாண் உற்பத்தி கூட்டுறவு விற்பனை மையத்தில் சந்தை ஆய்வுகளும் மேற்கொள்ளப்பட்டன. ஆய்வு முடிவின் அடிப்படையில் 2020 ஆகஸ்ட் முதல் செப்டம்பர் மாதம் வரை தரமான தேங்காயின் பண்ணை விலை 14 ரூபாய் முதல் 15 ரூபாய் வரை இருக்கும். நல்ல தரமான கொப்பரை கிலோவுக்கு 90 ரூபாய் முதல் 95 ரூபாய் வரை இருக்கும். எனவே, விவசாயிகள் மேற்கூறிய சந்தை ஆலோசனை அடிப்படையில் விற்பனை முடிவுகளை எடுக்குமாறு பரிந்துரைக்கப்படுகின்றனர்.

தொடர்புக்கு:

உள்நாட்டு மற்றும் ஏற்றுமதி சந்தைத் தகவல் மையம், வேளாண் மற்றும் ஊரக மேம்பாட்டு ஆய்வு மையம், தமிழ்நாடு வேளாண்மைப் பல்கலைக்கழகம், கோயம்புத்தூர்-641003. தொலைபேசி: 0422 2431405.