Published:Updated:

இயற்கை வேளாண்மைக்கு மரியாதை! - பசுமை பாதைக்கு திரும்பும் தமிழ்நாடு!

ஆலோசனைக் கூட்டம்
பிரீமியம் ஸ்டோரி
ஆலோசனைக் கூட்டம்

நாட்டு நடப்பு

இயற்கை வேளாண்மைக்கு மரியாதை! - பசுமை பாதைக்கு திரும்பும் தமிழ்நாடு!

நாட்டு நடப்பு

Published:Updated:
ஆலோசனைக் கூட்டம்
பிரீமியம் ஸ்டோரி
ஆலோசனைக் கூட்டம்

விவசாயிகள் ஆவலுடன் எதிர்பார்க்கும் வேளாண்மைக் குத் தனி பட்ஜெட் தயாரிப்புப் பணிகளில் தமிழக வேளாண்மைத் துறையினர் மும்முரமாக ஈடுபட்டு வருகிறார்கள். இதே வேளையில் இன்னும் ஒரு வேலையையும் சத்தமில்லாமல் செய்து வருகின்றனர். ஆம், விவசாயிகளின் நீண்ட நாள் கோரிக்கையான தமிழ்நாட்டை முழுமையான இயற்கை வழி வேளாண்மை மாநிலமாக உருவாக்கும் பணிகளும் நடந்து வருகின்றன. தமிழ்நாடு இயற்கை வேளாண்மை கொள்கை மற்றும் மாநில இயற்கை வேளாண்மைத் திட்டங்கள் (Organic farming policy for Tamil Nadu and preparation of state schemes for Organic Agriculture) உருவாக்குதல் குறித்து இதுவரை மூன்று ஆலோசனைக் கூட்டங்கள் நடந்து முடிந்துள்ளன. நான்காவது ஆலோசனைக் கூட்டம் ஆன்லைன் மூலம் கடந்த ஜூலை 24-ம் தேதி நடைபெற்றது. வேளாண்மைத்துறை செயலர் சமயமூர்த்தி ஐ.ஏ.எஸ், வேளாண்மைத்துறை சிறப்புச் செயலர் ஆபிரஹாம் ஐ.ஏ.எஸ், வேளாண் விற்பனை துறை ஆணையர் வள்ளலார் ஐ.ஏ.எஸ் மற்றும் துறைசார்ந்த அலுவலர்கள் கலந்துகொண்டனர். நிகழ்ச்சியை தமிழ்நாடு அங்கக சான்றளிப்புத்துறை ஒருங்கிணைத்திருந்தது.

தமிழ்நாடு மற்றும் வெளிமாநிலங்களிலிருந்து 30-க்கும் மேற்பட்ட துறை சார்ந்த வல்லுநர்கள், முன்னோடி விவசாயிகள் கலந்துகொண்டு ஆலோசனைகளை அடுக்கினார்கள். பசுமை விகடன் சார்பிலும் பல தரப்பு விவசாயிகளிடம் பேசி பெற்றிருந்த ஆக்கபூர்வமான ஆலோசனைகள் அளிக்கப்பட்டன.

ஆலோசனைக் கூட்டம்
ஆலோசனைக் கூட்டம்


‘‘எந்தப் பயிருக்கு எந்த நேரத்தில் எந்த இயற்கை உரத்தைக் கொடுக்க வேண்டும் என்ற சாகுபடி பரிந்துரைகளைத் தெளிவாக வெளியிட வேண்டும். வெளி இடுபொருள்கள் குறைக்க வேண்டும். நிலைத்த உற்பத்தியை அடைய வேண்டும். பாரம்பர்ய விதைகள் பரவலாக்கத்துக்கு மானியம், கால்நடை வளர்ப்பை ஊக்கப்படுத்த வேண்டும். இயற்கையில் விளைந்த பொருள்களுக்கு விற்பனை வாய்ப்புகளை உருவாக்க வேண்டும். மாடித்தோட்டம் அமைத்துள்ளவர்களையும் ஊக்கப்படுத்த வேண்டும். இயற்கை வேளாண்மையில் வெற்றி பெற வேண்டும் என்றால், குழுவாக இணைந்து செயல்படும்போதுதான் வெற்றிபெற முடியும். இயற்கை வேளாண்மைத் தொழில்நுட்பங்களை வயல்வெளிப்பள்ளி போல ஊர்தோறும் நடத்த வேண்டும்’’ என்றெல்லாம் பயனுள்ள விஷயங்களை பலரும் பதிவு செய்தனர்.

‘‘நம்மாழ்வார், முன்னோடி விவசாயிகளோடு பசுமை விகடன் இதழும் பல ஆண்டுகளாக இயற்கை வேளாண்மையைப் பரப்பும் பணியைச் செய்து வருகிறது. இந்த நேரத்தில் இயற்கை வேளாண்மையின் பக்கம் அரசு திரும்பி இருப்பதை வரவேற்கிறோம். அதே சமயம், படிப்படியாக மாற்றுவது, கொஞ்சம், கொஞ்சமாக மாற்றுவது என்று முடிவு எடுக்க வேண்டாம்.

‘குடியை படிப்படியாக நிறுத்துங்கள்; புகை பிடிப்பதை கொஞ்சம் கொஞ்சமாக நிறுத்துங்கள்’ என்று சொன்னால், யாரும் நிறுத்த மாட்டார்கள். ‘இனி நாளையிலிருந்து குடிப்பதை நிறுத்துவிடு’ என்று உறுதியாகச் சொல்லும்போதுதான், குடியை விடுவார்கள் என்பதை என் மருத்துவ அனுபவத்தில் பார்த்திருக்கிறேன். இது போல அதிரடியாக அரசு அறிவிக்க வேண்டும்’’ என்று கோரிக்கை வைத்தார் ‘பஞ்சகவ்யா’ டாக்டர் கே.நடராஜன்.

அன்பழகன், ஆபிரஹாம், நடராஜன்
அன்பழகன், ஆபிரஹாம், நடராஜன்


இந்தியாவின் முதல் இயற்கை வேளாண்மை மாநிலமான சிக்கிமிலிருந்து அம்மாநில இயற்கை விவசாய இயக்கத்தின் இயக்குநர் அன்பழகன், ஐ.எஃப்.எஸ் பேசும்போது, ‘‘ ரசாயன முறையில் சாகுபடி செய்யும் விவசாயிகளை இயற்கை வேளாண்மைக்கு மாற்றுவது என்பது தனிப்பணி. இயற்கை வேளாண்மை சான்றிதழ் வழங்குவது என்பது தனிப்பணி. இயற்கை வேளாண்மைக்கு மாறிய அனைத்து விவசாயிகளையும் இயற்கை வேளாண்மை சான்றிதழ் பெற வேண்டும் என்று வலியுறுத்த வேண்டாம். விற்பனை வாய்ப்பினை பெருக்கிக் கொள்ள விரும்புவர்கள் இயற்கை வேளாண்மை சான்றிதழ் பெற்றுக்கொண்டால் போதும். இந்த இரண்டு பணிகளையும் பிரித்துதான் செய்ய வேண்டும். இதை சேர்த்து செய்தால், உரிய நேரத்தில் இலக்கை அடைய முடியாது. சிக்கிம் மாநிலத்தில் இப்படித்தான் இயற்கை வேளாண்மைக்கு மாற்றினோம். களத்தில் இறங்கி பணியாற்றும்போது இன்னும் பல அனுபவங்கள் கிடைக்கும். அண்மையில் கர்நாடக மாநிலத்தில் இயற்கை வேளாண்மை கொள்கையினை உருவாக்கியிருக்கிறார்கள். அங்கு நல்ல விஷயங்கள் இருந்தால் அதையும் கூட தமிழ்நாடு எடுத்துக்கொள்ளலாம்’’ என்று ஆலோசனை வழங்கினார்.

‘‘எங்களது ஆய்வில் இயற்கை உரங்களையும் செயற்கை உரங்களையும் கலந்து பயன் படுத்தும்போது நல்ல விளைச்சல் கிடைத்தது’’ என்று தமிழ்நாடு வேளாண் பல்கலைக்கழக விஞ்ஞானிகள் பேசி முடித்ததும்

‘‘தமிழ்நாடு அரசின் கொள்கை நம் மாநிலம் முழுமையான இயற்கை வேளாண்மைக்குத் திரும்ப வேண்டும் என்பதுதான். இதில் இயற்கை பாதி, செயற்கை பாதி என்ற பேச்சுக்கே இடமில்லை’’ என்று திட்டவட்ட மாகத் தெரிவித்தார் ஆபிரஹாம் ஐ.ஏ.எஸ்.

இதே வேகத்தில் முனைப்புடன் அரசு செயல்பட்டால், முழுமையான இயற்கை வேளாண்மை மாநிலமாகத் தமிழ்நாடு மாறும் நாள் வெகுதொலைவில் இல்லை.