கர்நாடகத்தில் மீண்டும் எடியூரப்பா தலைமையில் ஆட்சி அமைந்துள்ள பா.ஜ.க அரசு திப்பு ஜயந்தியை அரசு விழாவாக கொண்டாடப்படுவதை நிறுத்தப்போவதாக அறிவித்துள்ளது. எதிர்க்கட்சியாக இருந்த சமயத்தில் இருந்தே திப்பு ஜயந்தி கொண்டாட்டத்துக்கு பா.ஜ.க எதிர்ப்பு தெரிவித்து வந்தது. கர்நாடக பா.ஜ.க-வின் ட்விட்டர் பக்கத்தில் `எங்களுடைய அரசு சர்ச்சைக்குரிய மற்றும் வகுப்புவாத திப்பு ஜயந்தி கொண்டாடப்படுவதை முடிவுக்குக் கொண்டுவந்துள்ளது’ என பதிவிடப்பட்டுள்ளது.

இந்த நிலையில், கர்நாடகாவில் இன்று வரை பேசுபொருளாக நினைவுகூரப்படும் திப்பு சுல்தான் சர்ச்சைக்குரியவரா, வகுப்புவாதியா என பலதரப்பினரிடமும் பேசினோம்.

கர்நாடக பா.ஜ.க-வின் செய்தி தொடர்பாளர் ஜீ. மதுசூதன் பேசுகையில், "முதலில் திப்பு சுல்தான் ஒரு முஸ்லிம் அரசர். பிரிட்டிஷாரை எதிர்த்து ஒரு போர் தொடுத்துவிட்டார் என்பதற்காக மட்டுமே தேசப்பற்றுடையவர் என்று கருதமுடியாது. திப்பு சுல்தான் பிரெஞ்சு உதவியுடன்தான் பிரிட்டிஷை எதிர்த்துப் போரிட்டார். அவர்கள் நியாயமற்ற முறையில் அதிகாரத்துக்கு வந்து மைசூர் அரசரை சிறைவைத்தார்கள். அனைவருமே இஸ்லாம் மதத்துக்கு மதமாற்றம் செய்ய வேண்டும் என்கிற கொடூர எண்ணம் கொண்ட வகுப்புவாதியாக இருந்தார்.

திப்புவின் மத அடையாளத்தை வைத்து வகுப்புவாதியாகச் சித்திரிப்பது அபத்தத்தின் உச்சம். திப்பு சுல்தான் எல்லாரையும் மதமாற்றம் செய்தார் எனக்கூறுவது தவறு. அந்தக் காலகட்டத்தில் அனைத்து மதங்களுக்காகவுமே மக்கள் மதம் மாறிக்கொள்வது சகஜமான ஒன்றாக இருந்தது. திப்பு சுல்தான் கட்டாயமாக மதமாற்றம் செய்தார் எனக்கூறுவது வரலாற்றைத் திரிப்பதாகும். திருவாங்கூர் சமஸ்தானத்தின் ஆவணங்களில் கூட இந்துக் கோயில்களுக்கு திப்பு சுல்தான் அதிக அளவில் கொடைகள் அளித்ததற்கான சான்றுகள் இருக்கின்றன.

முந்தைய பா.ஜ.க ஆட்சியில்தான் 2010-ம் ஆண்டு மைசூர் பல்கலைக்கழகத்தில் திப்பு சுல்தானைப் பற்றி சர்வதேச கருத்தரங்கு நடத்தப்பட்டது. தற்போது அரசியல் நோக்கங்களுக்காக மக்களை பிளவுபடுத்த திப்பு சுல்தானை தவறாகச் சித்திரித்து இரட்டை வேடம் போடுவதைத் தவிர்க்க வேண்டும். அரசு ஆய்வாளர்களை அழைத்து உரையாடலுக்கு வழிவகுக்கலாம். அரசே முன்முடிவோடு ஓர் அரசரை இழிவுபடுத்துவது தவறானது” என்றார்.