Published:Updated:

அந்நியச் செலாவணியில் அரசாங்கம் கடன் வாங்கலாமா?

பட்ஜெட் ஃபாலோஅப்

பிரீமியம் ஸ்டோரி

திகரித்துவரும் நிதிப் பற்றாக்குறையைச் சமாளிப்பதற்காக, சர்வதேசச் சந்தைகளில் கடன் பத்திரங்களை வெளியிடப் போவதாக மத்திய நிதி அமைச்சர் நிர்மலா சீதாராமன் 2019- 20-ம் நிதியாண்டிற்கான பட்ஜெட்டில் தெரிவித்துள்ளார். நடப்பு நிதியாண்டில் மத்திய அரசு திரட்டவுள்ள மொத்தக் கடனில் சுமார் 10-15% (சுமார் ரூ.70,000 கோடி) அந்நியச் செலாவணிக் கடனாக இருக்கலாம் என்றும், இந்தியாவின் முதல் அந்நியச் செலாவணிக் கடன் பத்திரம் நிதியாண்டின் இரண்டாம் பாதியில் வெளியிடப்படலாம் என்றும் பல ஊகங்கள் வெளியாகியுள்ளன.

மத்திய அரசின் இந்தப் புதிய அறிவிப்பிற்குக் கடன் சந்தைகளிலும் அந்நியச் செலாவணிச் சந்தைகளிலும் பெரும் வரவேற்பு இருந்தபோதிலும் சில அபாய எச்சரிக்கைக் குரல்களும் ஒலித்துக் கொண்டுதான் உள்ளன. சர்வதேசச் சந்தைகளில் கடன் வாங்க முந்தைய மத்திய அரசாங்கங்கள் ஏற்கெனவே சிலமுறை திட்டமிட்டிருந்தாலும், அந்த முயற்சிகள் முழுமையடையாமல் போய்விட்டன. அந்நியச் செலாவணியில் கடன் வாங்குவதில் உள்ள ஆதாயங்கள் மற்றும் அபாயங்கள் குறித்துப் பார்ப்போம்.

அந்நியச் செலாவணியில் அரசாங்கம் கடன் வாங்கலாமா?

அரசுமுறைக் கடன் பத்திரங்களுக்கு வரவேற்பு இருக்குமா..?

இந்திய அரசாங்கத்திற்குச் சர்வதேசத் தரநிர்ணய நிறுவனமான ஃபிட்ச் வழங்கியிருக்கும் ரேட்டிங் BBB- ஆகும். சர்வதேச அளவில் முதலீடுகளைப் பெறுவதற்கான மிகக் குறைந்தபட்ச தகுதி இந்த ரேட்டிங்தான். இந்திய அரசின் அதிகப்படியான நிதிப் பற்றாக் குறைதான் இவ்வளவு குறைவான ரேட்டிங் வழங்குவதற்கான முக்கியக் காரணம் என இந்த நிறுவனம் தெரிவித்துள்ளது.

இன்னொரு ரேட்டிங் நிறுவனமான ஸ்டாண்டர்டு அண்டு புவர் கூட, இதே அளவு ரேட்டிங்கைத்தான் இந்திய அரசாங்கத்திற்கு வழங்கியுள்ளது. அதேசமயம், மற்றொரு பிரபல தர நிர்ணய நிறுவனமான மூடிஸ், இந்திய அரசாங்கத்திற்கு வழங்கியிருக்கும் ரேட்டிங் Baa2 ஆகும். இந்த ரேட்டிங் BBB- என்கிற மிகக் குறைந்தபட்ச முதலீட்டு அளவைவிட ஒருபடி மேலானதாகும்.

ஆர்.மோகனப் பிரபு, CFA
ஆர்.மோகனப் பிரபு, CFA

மிக அதிகபட்ச ரேட்டிங்கைவிட ஒருபடி கீழான AA+ (ஸ்டாண்டர்டு அண்டு புவர்) ரேட்டிங் பெற்றுள்ள அமெரிக்க அரசின் 10 வருடக் கடன் பத்திரங்களின் வட்டி விகிதம் சுமார் 2% ஆகும். அமெரிக்காவைவிட மிகக் குறைவான ரேட்டிங் கொண்ட இந்தியாவின் கடன் பத்திரங்களின் வட்டி விகிதம் இன்றைய சூழ்நிலையில் 2 சதவிகிதத்தைவிடக் கூடுதலாக இருக்கவே வாய்ப்புகள் அதிகம். (நமது மத்திய அரசாங்கம் 10 வருட உள்நாட்டுக் கடன் பத்திரங்களுக்குத் தற்போது 6.5% வட்டியை வழங்கவேண்டிய நிலையில் இருப்பது குறிப்பிடத்தக்கது.)

பூஜ்யம் சதவிகிதத்தில் கடன்...

சர்வதேசச் சந்தைகளில் தற்போது பணப்புழக்கம் மிக அதிகமாக உள்ளதால், மிகக் குறைந்த வட்டியில் மிக அதிகமாகக் கடன் வழங்கப்பட்டு வருகிறது. கடன் நெருக்கடி காரணமாக உலகப் பொருளாதாரச் சிக்கல் ஏற்பட்ட 2008-ம் ஆண்டில் நிலுவையில் இருந்த கடன் தொகையைப்போல, தற்போது பல மடங்கு கடன் தொகை உயர்ந்துள்ளது. ஜப்பான், ஐரோப்பிய ஒன்றியம் போன்ற பகுதிகளில் மைனஸ் வட்டி விகிதங்கள் உள்ளன. அதாவது, அந்த நாட்டு வங்கிகளில் மக்கள் தங்களுடைய பணத்தை டெபாசிட் செய்தால், மக்களே வட்டிப் பணத்தை வங்கிக்குக் கட்ட வேண்டும்.

அந்நியச் செலாவணியில் அரசாங்கம் கடன் வாங்கலாமா?

இதுபோன்ற ‘மென்மையான வட்டி விகிதச் சூழ்நிலையை’ நமது அரசாங்கம் பயன்படுத்திக்கொள்ள வேண்டும் என்ற கருத்து கார்ப்பரேட் வட்டாரத்தில் பரவலாக உள்ளது. சர்வதேசச் சந்தையில் வழங்கப்பட்டுள்ள மொத்தக் கடன் அளவில் 77% கடன்களுக்கான வட்டி விகிதம் 2 சதவிகிதத்துக்கும் கீழேதான் உள்ளது என்றும், இதில் பாதி அளவிற்கான கடன்களுக்கான வட்டி விகிதம் பூஜ்ய சதவிகிதத்துக்கும் குறைவாகத்தான் உள்ளது என்றும் தெரிவித்துள்ள கோட்டக் வங்கியின் தலைவரான உதய் கோட்டக், இதுபோன்றதொரு தருணத்தில் வெளிநாட்டில் கடன் திரட்ட வேண்டும் என்று முடிவெடுத்துள்ள மத்திய அரசின் முடிவினை வெகுவாகப் பாராட்டியிருக்கிறார். அதேசமயம், சரியானதொரு முன்னெச்சரிக்கை நடவடிக்கைகளை மேற்கொள்ள வேண்டியிருக்கும் என்றும் அவர் எச்சரித்துள்ளார்.

இவ்வாறு மத்திய அரசு சர்வதேசச் சந்தைகளில் நிதி திரட்டும் பட்சத்தில், உள்நாட்டுக் கடன் சந்தைகளின் மீதான நெருக்கடி குறையும்; எனவே, கார்ப்பரேட் நிறுவனங்கள் குறைந்த வட்டியில் கடன் பெற்றுக்கொள்ள முடியும் என்றும் நம்பப்படுகிறது. மேலும், மத்திய அரசு வெளிநாடுகளில் கடன் பெறும்போது, குறுகிய கால நோக்கில் ஏராளமான அந்நியச் செலாவணி இந்தியாவிற்குள் வரும் என்பதால், ரூபாயின் மதிப்பு பெருமளவு உயரவும் வாய்ப்புள்ளது. அதிகப்படியான ரூபாயின் மதிப்புயர்வு, நமது ஏற்றுமதியாளர்கள் உலக அளவில் போட்டியிடும் வலிமையினைக் குறைத்துவிடும் அபாயமும் உண்டு. என்றாலும், இறக்குமதியாளர்களுக்கும் வெளிநாடுகளில் கடன் பெற்றுள்ள தொழில் நிறுவனங்களுக்கும் இது லாபகரமாகவே இருக்கும். மேலும், ரூபாயின் அதிகப்படியான மதிப்பு, உள்நாட்டு பணவீக்கத்தைக் கட்டுப்படுத்தவும் உதவிகரமாக இருக்கும்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

இந்தியா - இரட்டைப் பற்றாக்குறை தேசம்….

தனிநபர்களைப் போலவோ அல்லது கார்ப்பரேட் நிறுவனங்களை போலவோ, ஓர் அரசுக்கு சுயசம்பாத்தியம் ஏதும் இல்லாத பட்சத்தில், அரசுக் கடனை திரும்பச் செலுத்துவதற் காக புதிதாகக் கடன் பெறவேண்டும் அல்லது அதிகப்படியான வரிகளை விதிக்க வேண்டும். இந்த இரண்டு வழிகளும் இல்லை எனில், புதிதாக கரன்சி தாள்களை அச்சடிக்கவேண்டியிருக்கும். உள்நாட்டுக் கடனாக இருக்கும்போது எளிதாக உள்நாட்டு கரன்சிகளை வெளியிட்டு, கடன் களைத் திரும்பச் செலுத்துவிட முடியும். உள்நாட்டுக் கடனை உடனடியாகத் திரும்பக் கட்டமுடியாதபட்சத்தில், கடனைத் திரும்பத் தரும் காலத்தைத் தற்காலிகமாகத் தள்ளிப் போடலாம். ஆனால், இது போன்ற வாய்ப்புகள் அந்நியச் செலாவணி கடன்களில் அபூர்வம்.

அந்நியச் செலாவணியில் அரசாங்கம் கடன் வாங்கலாமா?

மேலும், நம் நாடு இறக்குமதி சார்ந்ததொரு நாடு. ஏற்றுமதி இறக்குமதிப் பற்றாக்குறையுடன் நிதிப் பற்றாக்குறையும் சேர்ந்துகொள்வதால், இரட்டைப் பற்றாக்குறை கொண்ட தேசமாக இந்தியா விளங்குகிறது. இதனால் அரசாங்கத்தின் நிதிப் பற்றாக்குறையைச் சமாளிக்கத் தேவையான நிதியை உள்நாட்டிலேயே திரட்டமுடியாத சூழ்நிலை உள்ளது. கிட்டத்தட்ட அமெரிக்காவிலும் இதேபோன்ற சூழ்நிலைதான் நிலவுகிறது என்றாலும், அமெரிக்காவின் நாணயமான டாலர் உலகத்திற்கே பொதுவான நாணயமாக இருப்ப தால், அமெரிக்காவிற்கு அந்நியச் செலாவணியில் கடன் வாங்கும் அவசியம் எதுவுமில்லை.

எனவேதான், அந்நியச் சந்தைகளில் அரசாங்க மானது கடன் பெறுவது பல நேரங்களில் பெருத்த அபாயத்தை ஏற்படுத்திவிடுகிறது. அர்ஜென்டினா, கிரீஸ், இத்தாலி, அயர்லாந்து, ஐஸ்லாந்து, பல ஆப்பிரிக்க நாடுகள் எனப் பல்வேறு நாடுகள் அதிகப்படியாகக் கடன் வாங்கிவிட்டு, அதனைத் திரும்பக் கட்ட முடியாமல் தவித்து வருகின்றன!

ஏற்கெனவே குறிப்பிட்டபடி, அமெரிக்க அரசு கடன் பத்திரங்களுக்கே 2% வட்டி வழங்க வேண்டியுள்ள சூழலில், இந்திய அரசு அதைவிட அதிகமான வட்டியைத்தான் செலுத்த வேண்டி யிருக்கும். இந்த வட்டி அமெரிக்க டாலர் விகிதத்தில் என்பதால், ரூபாய் எதிர்கால மாற்று விகிதமான (சுமார்) 4 சதவிகிதத்தையும் சேர்த்துக் கொண்டால், மொத்த வட்டி விகிதம் 6 சதவிகிதத்துக்கும் மேலாக இருக்கும். இந்திய ரூபாயிலேயே 10 வருடக் கடன் 6.5 சதவிகிதத்தில் கிடைக்கும்போது, வெளிநாடுகளில் கடன் வாங்குவது அரசுக்கு லாபகரமாக இருக்காது. அதேசமயம், சரியான முன்னெச்சரிக்கை நடவடிக்கைகளை மேற்கொள்ளாதபட்சத்தில், இப்படி வாங்கும் அந்நியக் கடனால் இந்தியாவின் எதிர்காலத்திற்கே ஆபத்தாக முடியலாம்.

அளவுக்கு மிஞ்சினால் அமிர்தமும்...?

ஆக மொத்தத்தில், வெளிநாட்டுக் கடன் பத்திரங்களின்மூலம் நிதி திரட்டுவது சரிவரக் கையாளப்படாவிட்டால், நீண்ட கால நோக்கில் சில பேரபாயங்களை நாம் சந்திக்க வேண்டி யிருக்கும். ஆனால், இந்தியாவின் நிதிச் சந்தையில் தற்போது நிலவிவரும் கடினமான சூழ்நிலையில், மத்திய பட்ஜெட்டில் அறிவித்துள்ள பல்வேறு நலத்திட்டங்களை நிறைவேற்றுவதற்காக உள்நாட்டு நிதிச் சந்தையில் மத்திய அரசு கடன் வாங்குவது, தற்போதைய நிதி நெருக்கடியை மேலும் அதிகப்படுத்திவிடும். அவ்வாறு நடந்தால், பொருளாதாரச் சுணக்கத்திலிருந்து நம் நாடு மீண்டுவர மேலும் தாமதமாகும். எனவே, பலத்த யோசனைக்குப் பிறகே அந்நியச் செலாவணிச் சந்தையில் கடன் பெறும் முடிவை அரசு எடுத்திருப்பதாக நாம் நம்பலாம்.

நோயைத் தீர்க்க வழங்கப்படும் மருந்து அதற்குரிய அளவுடன் இருக்குமாறு பார்த்துக் கொள்வது நல்லது. தேவைக்கு அதிகமாக உட்கொள்ளப்படும் மருந்து, நோயைவிட அதிகப் பாதிப்புகளை உருவாக்கிவிடும் என்பதுதான் அர்ஜென்டினா போன்ற நாடுகள் நமக்குக் கற்றுத்தரும் அனுபவப் பாடம்.

(குறிப்பு: இந்தக் கட்டுரையில் சொல்லப் பட்டுள்ளவை கட்டுரையாளரின் தனிப்பட்ட கருத்துகளே!)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு