Published:Updated:

‘‘16 திட்டங்கள்... ஒதுக்கப்பட்டதோ 16 ஆயிரம் ரூபாய் மட்டுமே!’’

மத்திய ரயில்வே பட்ஜெட்... விளாசும் சு.வெங்கடேசன்

பிரீமியம் ஸ்டோரி

‘‘மத்திய பட்ஜெட்டில் தமிழக ரயில்வே திட்டங்களுக்கு சொற்பமாக 10,000 ரூபாய் மட்டும் ஒதுக்கப்பட்டுள்ளது! இது பெரிய அநீதி. இதை எதிர்த்து தமிழக அரசியல் கட்சிகள் குரல் எழுப்ப வேண்டும்’’ என்று மார்க்சிஸ்ட் கம்யூனிஸ்ட் கட்சியின் மதுரை எம்.பி-யான சு.வெங்கடேசன் புகார் எழுப்பியது, சமீபத்தில் பெரும் அதிர்ச்சியை ஏற்படுத்தியது.

இதை மறுத்து தெற்கு ரயில்வே வெளியிட்ட அறிக்கையில், ‘தெற்கு ரயில்வேயில் தமிழ்நாட்டின் உட்கட்டமைப்பு மற்றும் பாதுகாப்புத் திட்டங்களுக்கு 2020-21ம் ஆண்டில் 8,501 கோடி ரூபாய் ஒதுக்கீடு செய்யப்பட்டுள்ளது. 1,600 கோடி ரூபாய் மதிப்பீட்டில் காட்பாடி - விழுப்புரம் இரட்டை வழிப்பாதைத் திட்டம், 1,600 கோடி ரூபாய் மதிப்பீட்டில் சேலம் - கரூர் - திண்டுக்கல் இரட்டை வழிப்பாதைத் திட்டம், 650 கோடி ரூபாய் மதிப்பீட்டில் ஈரோடு - கரூர் இரட்டை வழிப்பாதைத் திட்டம், 2,900 கோடி ரூபாய் மதிப்பீட்டில் தர்மாவரம் - காட்பாடி இரட்டை வழிப்பாதைத் திட்டம், 1,470 கோடி ரூபாய் மதிப்பீட்டில் ஓசூர் - ஓமலூர் இரட்டை வழிப்பாதைத் திட்டம், 278 கோடி ரூபாய் மதிப்பீட்டில் சென்னை கடற்கரை - எழும்பூர் இரட்டை வழிப்பாதைக்கான திட்டங்கள் நடைபெற்றுவருகின்றன’ என்று அதில் குறிப்பிட்டிருந்தனர்.

தெற்கு ரயில்வே
தெற்கு ரயில்வே

இது மக்கள் மத்தியில் பெரும்குழப்பத்தை ஏற்படுத்திவரும் நிலையில், ‘‘உங்கள் குற்றச்சாட்டு உண்மையல்ல என்று தெற்கு ரயில்வே விளக்கம் அளித்துள்ளதே?’’ என்று சு.வெங்கடேசனிடம் கேட்டோம்.

‘‘ `கடந்த வருடங்களில் அறிவிக்கப்பட்ட தமிழகத்துக்கான பத்து ரயில் வழித்தடங்களுக்கு தலா 1,000 ரூபாய் என 10,000 ரூபாய் மட்டும் ஒதுக்கப் பட்டிருக்கிறது’ என்று நான் கூறியதை, தெற்கு ரயில்வே மறுக்கவில்லை. அவர்களின் அறிக்கையில், தமிழகத்தில் நடைபெறும் இரட்டைவழிப் பாதைக்கான ஆறு திட்டங்களின் மதிப்பைக் குறிப்பிட்டு 826 கிலோமீட்டருக்கு 8,501 கோடி ரூபாய் ஒதுக்கியிருப்பதுபோல் தோற்றத்தை உருவாக்கியுள்ளனர். அவர்கள் கூறும் ஆறு திட்டங்களில் 2,900 கோடி ரூபாய் செலவில் 290 கிலோமீட்டர் தூரத்துக்கான தர்மாவரம் - பாகலா - காட்பாடி இரட்டை வழிப்பாதைத் திட்டம், தென் மத்திய ரயில்வேயில் வருகிறது. இதில் 90 சதவிகிதம் ஆந்திர மாநிலத்துக்கானது. இப்படி வெவ்வேறு ரயில்வே மண்டலங்களில் நடப்பதை தமிழகத்தின் திட்டமாக எப்படிக் கூறுகிறார்கள் என்பதுகுறித்து ரயில்வே துறை விளக்க வேண்டும்.

சு.வெங்கடேசன்
சு.வெங்கடேசன்

இதில் அதிர்ச்சியான விஷயம், இவர்கள் சொல்லும் இரட்டை வழிப்பாதைக்கான ஆறு புதிய திட்டங்களுக்கு பட்ஜெட்டில் இந்த ஆண்டு தலா 1,000 ரூபாய் வீதம் 6,000 ரூபாய்தான் ஒதுக்கப்பட்டுள்ளது. இந்த உண்மையை மறைக்கும்விதமாக தமிழகத்துக்கு அறிவிக்கப்பட்ட திட்டங்களின் மதிப்பீட்டை மட்டும் கூறியுள்ள ரயில்வே துறை, ஒதுக்கப்பட்ட நிதி பற்றிக் கூறவில்லை’’ என்றார் விளக்கமாக.

இதற்கு என்ன பதில் சொல்லப்போகிறது ரயில்வே துறை?

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு